Edizzjoni speċjali bil-Kroat: Kapitolu 18 Volum 012 P. 104 - 107
English
Select your language
Official EU languages:
Access to European Union law
EUR-Lex
Access to European Union law
This document is an excerpt from the EUR-Lex website
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Need more search options? Use the
Advanced search
Document 32010D0179
2010/179/CFSP: Council Decision 2010/179/CFSP of 11 March 2010 in support of SEESAC arms control activities in the Western Balkans, in the framework of the EU Strategy to combat the illicit accumulation and trafficking of SALW and their ammunition
2010/179/CFSP: Deċiżjoni tal-Kunsill 2010/179/PESK tal- 11 ta’ Marzu 2010 b’appoġġ għall-attivitajiet tas-SEESAC fil-kontroll ta’ armi fil-Balkani tal-Punent, fil-qafas tal-Istrateġija tal-UE għall-ġlieda kontra l-akkumulazzjoni u t-traffikar illeċiti tas-SALW u tal-munizzjon tagħhom
2010/179/CFSP: Deċiżjoni tal-Kunsill 2010/179/PESK tal- 11 ta’ Marzu 2010 b’appoġġ għall-attivitajiet tas-SEESAC fil-kontroll ta’ armi fil-Balkani tal-Punent, fil-qafas tal-Istrateġija tal-UE għall-ġlieda kontra l-akkumulazzjoni u t-traffikar illeċiti tas-SALW u tal-munizzjon tagħhom
ĠU L 80, 26.3.2010, p. 48–51
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV) Dan id-dokument ġie ppubblikat f’edizzjoni(jiet) speċjali
(HR)
In force
Language
HTML
PDF
Official Journal
|
26.3.2010 |
MT |
Il-Ġurnal Uffiċjali tal-Unjoni Ewropea |
L 80/48 |
DEĊIŻJONI TAL-KUNSILL 2010/179/PESK
tal-11 ta’ Marzu 2010
b’appoġġ għall-attivitajiet tas-SEESAC fil-kontroll ta’ armi fil-Balkani tal-Punent, fil-qafas tal-Istrateġija tal-UE għall-ġlieda kontra l-akkumulazzjoni u t-traffikar illeċiti tas-SALW u tal-munizzjon tagħhom
IL-KUNSILL TAL-UNJONI EWROPEA
Wara li kkunsidra t-Trattat dwar l-Unjoni Ewropea, u b’mod partikolari l-Artikolu 26(2) tiegħu,
Billi:
|
(1) |
L-akkumulazzjoni eċċessiva u bla kontroll u t-tixrid tal-armi ħfief u ta’ kalibru żgħir (SALW - small arms and light weapons) żiedu l-insigurtà fil-Ewropa tax-Xlokk, waqt li tħarrxu l-konflitti fir-reġjun u ddgħajfet l-opportunità ta’ paċi wara l-konflitt, b’hekk inħolqot theddida serja għal-paċi u s-sigurtà fir-reġjun. |
|
(2) |
Fil-15-16 ta’ Diċembru 2005, il-Kunsill Ewropew adotta l-Istrateġija tal-UE fil-ġlieda kontra l-akkumulazzjoni u t-traffikar illeċiti tas-SALW u tal-munizzjoni tagħhom (Strateġija tal-UE dwar is-SALW) li tistabbilixxi linji gwida għall-azzjoni tal-UE fil-qasam tas-SALW. |
|
(3) |
L-Istrateġija tal-UE dwar is-SALW tidentifika fost l-objettivi tagħha li jitrawwem multilateraliżmu effettiv sabiex jissawru mekkaniżmi, kemm internazzjonali, reġjonali jew fl-UE u l-Istati Membri tagħha, kontra l-forniment u t-tixrid destabbilizzanti tas-SALW u tal-munizzjoni tagħhom. L-Istrateġija tal-UE dwar is-SALW tidentifika wkoll lill-Balkani tal-Punent bħala wieħed mir-reġjuni l-aktar milquta mill-kummerċ illeċitu u l-akkumulazzjoni eċċessiva tal-armi. |
|
(4) |
Taħt il-patroċinju tal-Programm tal-Iżvilupp tan-Nazzjonijiet Uniti (UNDP) u l-Patt preċedenti ta’ Stabbilità għall-Ewropa tax-Xlokk (mill-2008 ‘l hawn magħruf bħala l-Kunsill Reġjonali għall-Koperazzjoni), ġie stabbilit “Ċentru ta’ skambju ta’ informazzjoni tal-Ewropa tax-Xlokk u tal-Lvant għall-kontrol tal-armi ħfief u ta’ kalibru żgħir” (SEESAC). Is-SEESAC jinsab f’Belgrad u jikkonsisti f’unità teknika ta’ appoġġ, li tappoġġa numru ta’ attivitajiet operattivi fil-livelli reġjonali u nazzjonali. |
|
(5) |
L-objettivi segwiti mis-SEESAC jinkludu l-prevenzjoni tal-proliferazzjoni u l-akkumulazzjoni eċċessiva tas-SALW u tal-munizzjoni tagħhom fl-Ewropa tax-Xlokk kollha. Is-SEESAC jagħmel enfasi partikolari fuq l-iżvilupp ta’ proġetti reġjonali biex tiġi indirizzata r-realtà tal-flussi transkonfinali tal-armi. |
|
(6) |
L-UE preċedentement appoġġat lis-SEESAC permezz tad-Deċiżjoni tal-Kunsill 2002/842/PESK tal-21 ta’ Ottubru 2002, li timplimenta l-Azzjoni Konġunta 2002/589/PESK, estiża u emendata bid-Deċiżjonijiet tal-Kunsill 2003/807/PESK tas-17 ta’ Novembru 2003 u 2004/791/PESK tat-22 ta’ Novembru 2004. L-implimentazzjoni ta’ dawn id-Deċiżjonijiet ġiet ivvalutata pożittivament mill-Kunsill, |
ADOTTA DIN ID-DEĊIŻJONI:
Artikolu 1
1. L-UE għandha taħdem għall-promozzjoni tas-sigurtà u l-paċi fil-Balkani tal-Punent permezz ta’ appoġġ għal multilateraliżmu effettiv u għal inizjattivi reġjonali rilevanti bil-għan li jitnaqqas ir-riskju għall-paċi u s-sigurtà bil-proliferazzjoni u l-akkumulazzjoni eċċessiva tas-SALW u tal-munizzjoni tagħhom.
2. Sabiex jinkiseb l-objettiv imsemmi fil-paragrafu 1, l-UE ser tappoġġa proġett tas-SEESAC bil-għan li titnaqqas it-theddida li s-SALW tippreżenta għas-sigurtà fil-Balkani tal-Punent. L-attivitajiet li għandhom ikunu appoġġati mill-UE għandhom ikollhom l-objettivi speċifiċi li ġejjin:
|
— |
it-titjib tal-ġestjoni u s-sigurtà tal-kumulu ta’ ħażniet insikuri u instabbli ta’ armi u munizzjoni; |
|
— |
it-tnaqqis tal-kumulu ta’ ħażniet disponibbli ta’ armi u munizzjoni permezz ta’ attivitajiet ta’ distruzzjoni; |
|
— |
it-tisħiħ tal-kontrolli fuq is-SALW, ukoll permezz tal-implimentazzjoni tal-istrumenti internazzjonali u nazzjonali dwar l-immarkar u t-traċċar fil-pajjiżi tal-Balkani tal-Punent u t-titjib tal-proċess ta’ reġistrazzjoni tal-armi. Deskrizzjoni dettaljata tal-proġett tinsab fl-Anness. |
Artikolu 2
1. Ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (RGħ) għandu jkun responsabbli għall-implimentazzjoni ta’ din id-Deċiżjoni.
2. L-implimentazzjoni teknika tal-proġett imsemmi fl-Artikolu 1(2) għandha titwettaq mis-SEESAC. Huwa għandu jwettaq il-kompitu tiegħu taħt ir-responsabbiltà tar-RGħ. Għal dan l-għan, ir-RGħ għandu jidħol fl-arranġamenti meħtieġa mas-SEESAC.
Artikolu 3
1. L-ammont ta’ referenza finanzjarja għall-implimentazzjoni tal-proġett imsemmi fl-Artikolu 1(2) għandu jkun ta’ EUR 1 600 000.
2. In-nefqa ffinanzjata mill-ammont stabbilit fil-paragrafu 1 għandha tkun amministrata skont il-proċeduri u r-regoli applikabbli għall-baġit ġenerali tal-Unjoni Ewropea.
3. Il-Kummissjoni għandha tissorvelja l-amministrazzjoni korretta tan-nefqa msemmija fil-paragrafu 1. Għal dan il-għan, hi għandha tikkonkludi ftehim ta’ finanzjament mal-UNDP, f’isem is-SEESAC. Il-ftehim għandu jistipula li s-SEESAC għandu jiżgura l-viżibbiltà tal-kontribuzzjoni tal-UE, adegwatament skont id-daqs tagħha.
4. Il-Kummissjoni għandha tagħmel ħilitha biex tikkonkludi l-ftehim ta’ finanzjament imsemmi fil-paragrafu 3 malajr kemm jista’ jkun wara d-dħul fis-seħħ ta’ din id-Deċiżjoni. Hija għandha tinforma lill-Kunsill bi kwalunkwe diffikultà f’dak il-proċess u bid-data tal-konklużjoni tal-ftehim ta’ finanzjament.
Artikolu 4
Ir-RGħ għandu jirrapporta lill-Kunsill dwar l-implimentazzjoni ta’ din id-Deċiżjoni abbażi ta’ rapporti regolari mħejjija mis-SEESAC. Dawn ir-rapporti għandhom jifformaw il-bażi għall-evalwazzjoni mwettqa mill-Kunsill. Il-Kummissjoni għandha tirrapporta dwar l-aspetti finanzjarji tal-implimentazzjoni tal-proġett.
Artikolu 5
1. Din id-Deċiżjoni għandha tidħol fis-seħħ fil-jum tal-adozzjoni tagħha.
2. Din id-Deċiżjoni għandha tiskadi 24 xahar wara d-data tal-konklużjoni tal-ftehim ta’ finanzjament imsemmi fl-Artikolu 3(3), jew sitt xhur wara l-adozzjoni tagħha jekk ma jkunx ġie konkluż ftehim ta’ finanzjament f’dak il-perijodu.
Artikolu 6
Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.
Magħmul fi Brussell, il-11 ta’ Marzu 2010.
Għall-Kunsill
Il-President
J. BLANCO
ANNESS
KONTRIBUZZJONI TAL-UE GĦAL PROĠETT TAS-SEESAC DWAR IS-SALW FIL-BALKANI TAL-PUNENT
1. Introduzzjoni
L-akkumulazzjoni fuq skala kbira ta’ armi ħfief u ta’ kalibru żgħir (SALW) fl-Ewropa tax-Xlokk ġiet rikonoxxuta bħala sfida importanti għall-paċi u s-sigurtà mill-Istrateġija tal-UE dwar is-SALW. Il-pajjiżi fil-Balkani tal-Punent kienu ta’ tħassib partikolari minħabba l-akkumulazzjoni storika ta’ armi u l-kumulu ta’ ħażniet ta’ munizzjonijiet. Dan ir-reġjun mhux biss jibqa direttament milqut mill-proliferazzjoni tas-SALW u tal-munizzjoni tagħhom, iżda jkompli wkoll jippreżenta risjki ta’ traffikar tal-armi għal żoni ta’ konflitt band oħra.
Attwalment l-isfida prinċipali għall-pajjiżi tal-Balkani tal-Punent hija l-implimentazzjoni prattika tal-impenji legali u politiċi tagħhom fil-qasam tal-kontroll tas-SALW, inkluż il-Programm tan-NU ta’ Azzjoni fuq s-SALW u l-Istrument Internazzjonali ta’ Markar u Traċċar (ITI).
Konsegwentement, biex jiġi mminimizzat ir-riskju tal-proliferazzjoni tas-SALW, hu kruċjali li tiżdied is-sikurezza tal-kumulu tal-ħażniet eżistenti tas-SALW u l-munizzonijiet, li jinqered l-ammont żejjed u jiġu stabbiliti kontrolli aktar stretti fuq is-SALW, anke permezz tal-implimentazzjoni fil-livell reġjonali tal-ITI u t-titjib tal-proċess ta’ reġistrazzjoni. Dawn l-objettivi u l-attivitajiet huma konformi ma’ dawk stabbiliti fl-Istrateġija tal-UE dwar is-SALW. Is-SEESAC jipproponi li tmexxi proġġetti relatati ma’ dawn it-tliet oqsma ta’ attivitajiet.
2. Deskrizzjoni tal-proġett
2.1. Ġestjoni Mtejba tal-Kumulu ta’ Ħażniet
2.1.1. Moduli ta’ Taħriġ Reġjonali dwar il-Ġestjoni tal-Kumulu ta’ Ħażniet tas-SALW
Sabiex tiġi assistita ż-żieda tas-sikurezza u s-sigurtà tal-kumulu ta’ ħażniet tal-armi u l-munizzjoni, il-proġett jipprevedi l-iżvilupp ta’ tliet moduli ta’ taħriġ għall-uffiċjali responsabbli għar-riżorsi materjali fil-Ministeri tad-Difiża u l-Ministeri tal-Intern tal-pajjiżi tal-Balkani tal-Punent. Il-kors ser jiġi offrut lill-iskwadri ta’ spezzjoni u l-uffiċjali biex jgħinuhom jiffamiljarizzaw ruħhom mal-aħjar prattika fil-metodi tekniċi tal-ġestjoni tal-kumulu ta’ ħażniet.
L-implimentazzjoni tal-proġett ser tirriżulta f’aktar sensibilizzazzjoni dwar l-istandards internazzjonali u l-aħjar prattika fil-ġestjoni tal-kumulu ta’ ħażniet. Il-livell u l-kwalità tal-implimentazzjoni tal-proċeduri ta’ ġestjoni tal-kumulu ta’ ħażniet ser tissaħħaħ u b’hekk jiżdiedu s-sikurezza u s-sigurtà tal-kumulu ta’ ħażniet.
2.1.2. Sikurezza u sigurtà mtejba fis-siti ta’ ħażniet tas-SALW u tal-munizzjoni
Il-proġett ser itejjeb is-sikurezza u s-sigurtà tas-siti tal-ħażniet tal-armi u l-munizzjoni fil-Balkani tal-Punent billi tingħata assistenza teknika u infrastrutturali sabiex jissaħħu l-kapaċitajiet ta’ ħażniet sikur. L-attivitajiet tal-proġett ser jassistu lill-Ministeri tad-Difiża fil-Bosnja u Ħerzegovina u l-Montenegro kif ukoll lill-Ministerju tal-Intern tar-Repubblika tal-Kroazja fl-akkwist u l-istallazzjoni tat-tagħmir meħtieġ biex jiġu żgurati l-kumulu ta’ ħażniet tal-armi u l-munizzjoni. Ser jingħata taħriġ lill-persunal responsabbli għall-ġestjoni tal-kumulu ta’ ħażniet
Il-proġett ser jirriżulta f’aktar dispożizzjonijiet ta’ sigurtà u kontroll ta’ aċċess fis-siti magħżula u b’hekk titjieb is-sikurezza għall-kumulu ta’ ħażniet tal-munizzjoni. Bħala konsegwenza r-riskju ta’ serq; u ta’ splużjonijiet mhux ikkontrollati ser jitnaqqsu b’mod sinifikanti permezz ta’ kontroll aħjar tal-istat tal-munizzjoni u l-armi.
2.2. Distruzzjoni tas-SALW
L-objettiv tal-proġett hu li tiżdied is-sigurtà u jitnaqqas ir-riskju tal-proliferazzjoni billi jitnaqqsu b’mod sinifikanti n-numru tal-armi żejda maħżuna. Sabiex jitnaqqsu s-SALW żejda miżmuma mill-Ministeri tal-Intern fil-Kroazja u s-Serbja, il-proġett ser iwettaq diversi attivitajiet ta’ distruzzjoni tas-SALW. Fil-Kroazja, il-proġett jipprevedi d-distruzzjoni ta’ madwar 30 000 armi. Fis-Serbja, in-numru ta’ armi li għandhom jinqerdu hu stmat għal 40 000.
Il-proġett ser jirriżulta f’numru mnaqqas b’mod sinifikanti ta’ SALW żejda u kkonfiskati fil-ħażniet tal-Ministerju tal-Intern fil-Kroazja u s-Serbja. Id-distruzzjoni ta’ armi rkuprati ser tikkontribwixxi b’mod sinifikanti għall-prevenzjoni ta’ aktar proliferazzjoni tas-SALW. Barra minn hekk, dan ser iwassal għal sigurtà mtejba kif ukoll għal aktar sensibilizzazzjoni dwar kwistjonijiet tas-SALW f’dawn iż-żewġ pajjiżi.
2.3. Aktar kontrolli fuq is-SALW
2.3.1. Żvilupp ta’ sistemi nazzjonali ta’ reġistrazzjoni u taż-żamma ta’ rekords tal-armi
Il-proġett ser jipprovdi żvilupp jew aġġornament tas-sistemi għar-reġistrazzjoni, il-liċenzjar u ż-żamma ta’ rekords tal-armi. Is-sistemi ta’ reġistrazzjoni ser jinkludu operazzjonijiet relatati mar-rintraċċar ta’ armi tan-nar proprjetà ta’ individwu u/jew entità ġuridika u l-ammont ta’ munizzjoni awtorizzata tista’ tkun fil-pussess tiegħu. L-appoġġ għaż-żamma ta’ rekords ser jinkludi l-iżvilupp ta’ prodott/i software li jidentifikaw mhux biss l-armi fil-pussess taċ-ċivili iżda wkoll operazzjonijiet relatati mal-ġestjoni ta’ armi, munizzjoni u/jew splussivi f’imħażen ta’ armi, f’imħażen jew armeriji approvati, bħal stazzjon tal-pulizija lokali jew sit ċentrali ta’ ħażniet. Ser ikun possibbli li jiġu identifikati l-armi, l-utenti u l-postijiet tal-ħażniet tat-tagħmir, meta ma jkunx qed jiġu użati. L-attivitajiet tal-proġett ser jipprovdu wkoll għal infrastruttura teknika adegwata għall-implimentazzjoni tas-software ta’ reġistrazzjoni tal-armi.
L-iżvilupp u l-istabbiliment ta’ sistema jew sistemi elettroniċi għar-reġistrazzjoni u ż-żamma ta’ rekords tal-armi ser jirriżultaw fl-implimentazzjoni tar-rekwiżiti għar-reġistrazzjoni u ż-żamma ta’ rekords stabbiliti taħt il-Protokoll tan-NU ta’ Armi tan-Nar u l-ITI.
2.3.2. Ġbir u reġistrazzjoni tal-armi
Il-proġett jimmira li jappoġġa l-ġbir ta’ kwalunkwe arma, tagħmir splussiv, artillerija u munizzjoni assoċjata, inkluż permezz tal-leġislazzjoni ta’ armi fil-pusses taċ-ċivili permezz tar-reġistrazzjoni tagħhom.
L-azzjonijiet ta’ sensibilizzazzjoni pubblika ser ikunu kkoordinati mill-kumitati li jikkonsistu minn speċjalisti tal-Ministeri tal-Intern u l-UNDP/SEESAC, flimkien ma’ esperti tar-Relazzjonijiet Pubbliċi rilevanti oħra fejn meħtieġ, sabiex jixxerdu b’mod korrett id-dettalji tal-leġislazzjoni u r-rilaxx volontarju ta’ armi tan-nar illegali. Il-kampanji ser jiffokaw fuq il-mezzi lokali ta’ tixrid li jistgħu jilħqu l-livell nazzjoali b’mod effettiv ħafna. It-tixrid ta’ informazzjoni lokali ser jissaħħaħ fil-livell nazzjonali permezz ta’ rappurtar, intervisti, u dokumentarji. L-informazzjoni dwar il-kampanji ser titwettaq permezz tal-media elettronika u miktuba. Il-messaġġi tal-kampanja ser ikunu pożittivi u juru l-implimentazzjoni tal-liġi fil-prattika.
Il-proġett ser isaħħaħ is-sigurtà fil-Balkani tal-Punent kollha billi jneħħi l-armi perikolużi mit-toroq permezz ta’ komunikazzjoni reċiproka bejn il-pubbliku u l-pulizija. B’mod partikolari, il-proġett ser jilħaq il-gruppi ta’ kull età li għandhom l-armi illegali fil-pussess tagħhom u dawk kollha li għandhom il-ħsieb li jakkwistaw l-armi.
2.3.3. Seminar reġjonali dwar immarkar u traċċar
Il-proġett jipprovdi għall-organizzazzjoni ta’ seminar reġjonali ta’ jumejn provviżorjament previst li jinżamm f’Belgrad, is-Serbja. Is-seminar ser jipprovdi aġġornament dwar l-adeżjoni ma’ strumenti internazzjonali u l-adozzjoni tal-leġislazzjoni nazzjonali dwar immarkar u traċċar fil-Balkani tal-Punent. Is-seminar ser jipprovdi għal reviżjoni tal-implimentazzjoni tal-leġislazzjoni nazzjonali. L-objettiv speċifiku ser ikun l-implimentazzjoni tar-rekwiżit għall-immarkar ta’ armi importati taħt il-Protokoll tan-NU ta’ Armi tan-Nar.
Il-parteċipanti f’dan is-seminar reġjonali ser jinkludu, fost l-oħrajn, rappreżentanti mill-pajjiżi tal-Balkani tal-Punent, organizzazzjonijiet internazzjonali, inklużi NGOs, industriji nazzjonali; u esperti tekniċi mill-Istati Membri tal-UE. Hu mistenni li sa 50 parteċipant ser jattendi dan is-seminar.
Is-seminar ser jipproduċi rapport tal-preżentazzjonijiet u d-diskussjonijiet u tar-rakkomandazzjonijiet. Id-dokumenti tas-seminar ser ikunu disponibbli fuq l-Internet.
3. Tul ta’ żmien
It-tul ta’ żmien totali tal-proġett hu stmat li jkun ta’ 24 xahar.
4. Benefiċjarji
Il-benefiċjarji tal-proġett huma l-istituzzjonijiet nazzjonali fil-pajjiżi tal-Balkani tal-Punent responsabbli għall-kontroll tal-armi u tal-ġestjoni tal-kumulu ta’ ħażniet.
Il-popolazzjoni ġenerali tal-pajjiżi fil-Balkani tal-Punent ser tibbenefika mill-proġett billi jitnaqqas ir-riskju tal-insigurtà u l-instabbiltà li jirriżultaw mill-proliferzzjoni mxerrda tas-SALW.