22.4.2010

MT

Il-Ġurnal Uffiċjali tal-Unjoni Ewropea

C 103/14

---

Pubblikazzjoni ta' applikazzjoni għar-reġistrazzjoni skont l-Artikolu 8(2) tar-Regolament tal-Kunsill (KE) Nru 509/2006 dwar prodotti agrikoli u oġġetti tal-ikel bħala speċjalitajiet tradizzjonali garantiti

2010/C 103/07

Din il-pubblikazzjoni tikkonferixxi d-dritt għal oġġezzjoni għall-applikazzjoni skont l-Artikolu 9 tar-Regolament tal-Kunsill (KE) Nru 509/2006. Id-dikjarazzjonijiet ta' oġġezzjoni għandhom jaslu għand il-Kummissjoni fi żmien sitt xhur mid-data ta' din il-pubblikazzjoni.

APPLIKAZZJONI GĦAR-REĠISTRAZZJONI TA' STG

IR-REGOLAMENT TAL-KUNSILL (KE) Nru 509/2006

“LIPTOVSKÁ SALÁMA”/“LIPTOVSKÝ SALÁM”

Nru tal-KE: SK-TSG-0007-0042-04.08.2006

1.   Isem u indirizz tal-grupp applikant:

Isem:	Slovenský zväz spracovateľov mäsa
Indirizz:	Kukučínova 22 831 03 Bratislava SLOVENSKO/SLOVAKIA
Tel.	+421 255565162
Feks	+421 255565162
Posta elettronika:	slovmaso@slovmaso.sk

Isem:	Český svaz zpracovatelů masa
Indirizz:	Libušská 319 142 00 Praha 4 – Písnice ČESKÁ REPUBLIKA
Tel.	+420 244092404
Feks	+420 244092405
Posta elettronika:	reditel@cszm.cz

2.   Stat Membru jew pajjiż terz:

Ir-Repubblika Slovakka

Ir-Repubblika Ċeka

3.   Speċifikazzjoni tal-prodott:

3.1.   Isem/Ismijiet li għandu/għandhom jiġi/u rreġistrat(i):

“Liptovská saláma” (SK)

“Liptovský salám” (CS)

3.2.   Jekk l-isem:

	huwiex speċifiku fih innifsu
	jesprimix il-karattru speċifiku tal-prodott agrikolu jew tal-oġġett tal-ikel

L-isem “Liptovská saláma” jew “Liptovský salám” huwa speċifiku fih innifsu minħabba li għandu x'jaqsam ma' tip partikolari ta' salami. Fis-Slovakkja u r-Repubblika Ċeka huwa stabbilit u magħruf sew, u għandu tradizzjoni twila u reputazzjoni tajba. Il-produzzjoni tiegħu ilha konformi mal-istandards nazzjonali.

3.3.   Jekk l-isem hux qed jiġi rriżervat skont l-Artikolu 13(2) tar-Regolament (KE) Nru 509/2006:

	Reġistrazzjoni bir-riżervazzjoni tal-isem
	Reġistrazzjoni mingħajr riżervazzjoni tal-isem

3.4.   Tip ta' prodott:

Klassi 1.2.

Prodotti tal-laħam (imsajrin, immellħin, affumikati, eċċ.)

3.5.   Deskrizzjoni tal-prodott agrikolu jew tal-oġġett tal-ikel li għalih japplika l-isem indikat fil-punt 3.1:

Il-fatturi karatteristiċi tal-“Liptovská saláma” jew tal-“Liptovský salám” huma d-dehra omoġenja tiegħu meta jitqatta', it-togħma delikata ta' laħam li għandu, u r-riħa li tiġi mill-ħwawar li jintużaw u mill-proċess ta' affumikazzjoni.

Karatteristiċi fiżiċi

—	forma ta' ċilindru, b'dijametru bejn 8 u 9 ċm, u tul ta' bejn wieħed u ieħor 35-50 ċm; l-istess prodott magħmul fiċ-ċokon għandu dijametru ta' 5 ċm u tul ta' bejn 15 u 20 ċm,

—	jinħass elastiku;

Karatteristiċi kimiċi

—	kontenut tax-xaħam: mass. 40 %,

—	kontenut ta' melħ: mass. 2,1 % ± 0,6 %;

—	proteina netta tal-muskoli ta' mill-inqas 8 % mill-piż;

Karatteristiċi organolettiċi

—	dehra esterna u kulur: il-prodott hu lixx jew kemxejn imkemmex, il-kisja użata hi ta' kulur ċar jew kannella skur, u fuq il-kisja huwa permess li jkun hemm ammonti żgħar ħafna ta' sugu mnixxef u dbabar tal-proċess tal-affumikazzjoni,

—	dehra u kulur tal-wiċċ tal-qatgħa: il-wiċċ tal-qatgħa hu ta' kulur roża lewn il-laħam u jista' jkun li jkollu partiċelli rotob tal-kollaġen fil-massa omoġenja; il-partiċelli tal-ħwawar naturali huma viżibbli,

—	riħa u togħma: riħa moderata ta' ħwawar (speċjalment tal-qoxra ta' barra tan-noċemuskata, tan-noċemuskata stess u tal-ġinġer) u r-riħa li tħalli l-affumikazzjoni, togħma mielħa moderata u pikkanti, iqarmeċ,

—	konsistenza: elastika, kumpatta.

3.6.   Deskrizzjoni tal-metodu tal-produzzjoni tal-prodott agrikolu jew tal-oġġett tal-ikel li għalih japplika l-isem indikat fil-punt 3.1:

Il-“Liptovská saláma” jew il-“Liptovský salám” hu magħmul mil-laħam taċ-ċanga b'kontenut ta' xaħam mhux iktar minn 10 % u mil-laħam taċ-ċanga b'kontenut ta' xaħam mhux iktar minn 30 %, laħam tal-majjal b'kontenut ta' xaħam mhux iktar minn 10 %, fdal tal-majjal – majjal b'kontenut ta' xaħam mhux iktar minn 50 %, xaħam tal-majjal, ilma tajjeb għax-xorb jew silġ, taħlita għat-tmelliħ b'bażi ta' nitrati, u taħlita ta' ħwawar naturali: (bżar iswed mitħun, noċemuskata mitħuna, il-qoxra tan-noċemuskata, ġinġer mitħun), tewm (imfarrak, ikkonċentrat jew trab), f'ammont li jikkorrispondi mal-ammont standardizzat ta' tewm frisk, u kisja ta' ċelluloża affumikabbli. Addittivi: polifosfati (E450, E451 bħala P2O5) fi kwantità li ma taqbiżx 0,03 f'kull kilogramma u aċidu assorbiku fi kwantità li ma taqbiżx 0,05 f'kull kilogramma.

Dawn l-ingredjenti li ġejjin jintużaw biex isiru 100 kg ta' “Liptovská saláma” jew ta' “Liptovská saláma”:

ċanga b'kontenut ta' xaħam ta' mhux iktar minn 10 %	19,1 kg
ċanga b'kontenut ta' xaħam ta' mhux iktar minn 30 %	6,7 kg
majjal b'kontenut ta' xaħam ta' mhux iktar minn 10 %	19,0 kg
fdal tal-majjal b'kontenut ta' xaħam ta' mhux iktar minn 50 %	23,3 kg
xaħam tal-majjal	23,4 kg
ilma tax-xorb jew silġ	16,0 kg
taħlita għat-tmelliħ b'bażi ta' nitrati	2,0 kg
bżar iswed mitħun	0,19 kg
noċemuskata mitħuna	0,02 kg
qoxra tan-noċemuskata	0,02 kg
ġinġer mitħun	0,02 kg
tewm (imfarrak, ikkonċentrat jew trab)	0,06 kg
polifosfati (E450 u E451)	0,30 kg
aċidu assorbiku (E300)	0,05 kg
kisjiet – kisjiet ta' ċelluloża affumikabbli

Proċedura teknika

Titħejja massa omoġenja fina magħmula mill-materja prima kollha, l-addittivi, il-ħwawar u t-tewm u l-għajnuniet għall-ipproċessar. It-taħlita li titħejja b'dan il-mod titpoġġa fil-kisjiet li jkollhom dijametru ta' bejn 8 u 9 ċm u li jkunu bejn 35 u 50 ċm twal. Il-prodotti jiddendlu fuq virgi li jitpoġġew fil-kamra tal-affumikazzjoni, fejn jitnixxfu u jiġu affumikati bis-saħħa tal-proċess sħun tal-affumikazzjoni, sabiex jingħata kulur karatteristiku u jikseb ir-riħa tiegħu. Il-prodotti affumikati imbagħad jissajru f'temperatura ta' bejn 75 u 78 °C sakemm jintlaħaq effett baxx ta' sħana ta' temperatura ta' 70 °C fil-qalba tal-prodott għal mill-anqas 10 minuti. Wara li jissajru, il-prodotti jitbexxu bl-ilma kiesaħ u jitħallew jiksħu. Il-“Liptovská saláma” jew il-“Liptovský salám” jitqiegħed fis-suq f'kisja jew f''vakum jew f'pakketti bl-atmosfera kkontrollata. Jitqiegħed fis-suq bħala prodott imqatta' f'vakum jew f'pakketti bl-atmosfera kkontrollata ta' piżijiet differenti.

3.7.   Karattru speċifiku tal-prodott agrikolu jew tal-oġġett tal-ikel:

Il-“Liptovská saláma” jew il-“Liptovský salám” hu differenti minn prodotti oħra li fihom jintuża kontenut ta' xaħam tal-majjal frisk, li flimkien mal-materja prima l-oħra, jagħti togħma iktar qawwija ta' laħam, u hu differenti wkoll minħabba r-riħa karatteristika li għandu, li ġejja mill-qoxra ta' barra tan-noċemuskata, in-noċemuskata, il-ġinġer u r-riħa fina ta' affumikazzjoni. Id-dehra omoġenja ta' fejn jinqata' l-prodott, il-konsistenza elastika tiegħu u l-fatt li hu faċli biex wieħed jisslajsjah u li jibqa' sħiħ meta jkun qed jiġi sslajsjat huma karatteristiċi speċifiċi bl-istess mod.

3.8.   Karattru tradizzjonali tal-prodott agrikolu jew tal-oġġett tal-ikel:

Fl-1956, il-ħaddiema li kienu jaħdmu fl-impjant tal-produzzjoni tal-laħam f'Dubnica nad Váhom ippruvaw jagħmlu prodott differenti mill-prodotti tal-laħam imsajrin u kkapuljati sew li kienu prodotti f'dik l-epoka. Dawn ħadu post ftit mix-xaħam tal-majjal li jkun hemm mal-fdal tal-majjal, il-prodott kien jiġi pproċessat b'tali mod li jkollu għamla fina iktar milli għamla raffa li kienet normali f'dik l-epoka, u r-riżultat ta' dan il-proċess kien il-“Liptovská saláma” jew il-“Liptovský salám”. F'dik l-epoka ma kinux iżidu l-paprika, u dan hu kif ġie l-isem “Liptovská saláma” jew “Liptovský salám”, minħabba li fir-reġjun Liptov ma kienx hemm id-drawwa li wieħed iżid il-paprika mal-prodotti tal-laħam. Il-prodott sar popolari ħafna. (Konversazzjoni mas-Sur Novotka, li, f'dik l-epoka, kien jaħdem fl-impjant tal-laħam ta' Dubnica).

Fil-bidu tas-sebgħinijiet ir-riċetta unika tal-“Liptovská saláma” jew tal-“Liptovský salám” ħarġet minn dan id-dipartiment tar-riċerka, u l-prodott baqa' dejjem isir iżjed popolari. Beda jiġi prodott gradwalment f'ħafna intrapriżi li jipproċessaw il-laħam. L-istandard tal-industrija ON 57 6913 ġie adottat fl-1978 (Sors: L-istandard ON 57 6913, 1978). Dan l-istandard ilu jiġi aġġornat u rrivedut fuq bażi regolari (Appendiċi, 13 ta' Awwissu 1982). Wieħed mill-iktar standards konġunti li ġew imġedda reċentament huwa t-THN (l-istandard ekonomiku tekniku) għall-prodott bin-numru 764421 64, prodott fl-1 ta' Settembru 1988. L-introduzzjoni ta' dan l-istandard jinkludi n-nota li ġejja: “Konformi mal-ON 57 6913”. Fl-1978 bdew ix-xogħlijiet fi Západoslovenský mäsový priemysel (l-Industrija tal-Laħam fin-naħa tal-Punent tas-Slovakkja) f'Trnava fil-produzzjoni tal-“Liptovská saláma” jew tal-“Liptovský salám” f'kooperazzjoni mad-dipartiment tar-riċerka tal-GRT. Sal-1990 konna nipproduċu l-“Liptovská saláma” jew il-“Liptovský salám” skont ir-riċetta tradizzjonali u ma konniex nużaw il-paprika. Il-“Liptovská saláma” jew il-“Liptovský salám” ippermetta l-ipproċessar tax-xaħam tal-majjal f'livell ogħla, u kienu prodotti madwar 600 kg fil-fabbrika ta' Trnava kuljum. Kien popolari ħafna fost il-konsumaturi minħabba t-togħma distinta tiegħu. (Testimonjanza tas-Sur Beňadik, 2003)

Il-fatt li l-produzzjoni tal-“Liptovská saláma” jew tal-“Liptovský salám” baqgħet għaddejja hu kkonfermat minn reklam dwar taħlita ta' prodotti ta' Stredoslovenský mäsový priemysel n. p. (il-kumpanija tal-Industrija tal-Laħam fiċ-Ċentru tas-Slovakkja) li tinsab fi Zvolen, li jinsab fl-anwal tal-Čítanie o správnej výžive tal-1981 (Slovenská spoločnosť pre správnu výživu, Bratislava, 1980). Il-“Liptovská saláma” jew il-“Liptovský salám” huma inklużi mal-prodotti msemmijin f'dan ir-reklam.

3.9.   Rekwiżiti minimi u proċeduri tal-kontroll tal-karattru speċifiku:

Il-kontrolli jinkludu:

—

konformità mal-proporzjon speċifiku ta' ingredjenti u ħwawar Matul il-proċess tekniku jsiru kontrolli viżwali tax-xaħam frisk tal-majjal li jiżdied bħala ingredjent finali. L-ammonti ta' ħwawar (il-qoxra ta' barra tan-noċemuskata, in-noċemuskata u l-ġinġer) li jitħejjew jiġu ċċekkjati qabel ma jiżdiedu mat-taħlita. L-ammonti jiġu ċċekkjati kontra l-piż speċifikat tar-riċetta.

—	konformità mal-proċess tekniku matul il-fażi li fiha jiġi proċessat prodott omoġenju fin mingħajr granulazzjoni, u mingħajr ma jkun affumikat.

—	L-uniformità tal-prodott tgħaddi minn kontroll qabel ma titpoġġa fil-kisjiet. Il-kontrolli jsiru viżwalment. Il-livell ta' affumikazzjoni huwa kkontrollat billi titkejjel it-tempertura tal-affumikazzjoni, li ma tistax taqbeż id-69 oĊ, u l-proċess tal-affumikazzjoni jdum bejn 10 u 15-il minuta.

—	l-indikaturi fiżiċi tal-prodott aħħari: il-forma ċilindrika u l-elastiċità tal-prodott

—	l-indikaturi kimiċi tal-prodott aħħari: il-kontenut ta' xaħam, il-kontenut ta' melħ, il-proteina netta tal-muskolu. Il-valuri għandhom jikkorrispondu ma' dawk speċifikati fil-punt 3.5 fl-ispeċifikazzjoni.

—

il-karatteristiċi organolettiċi tal-prodott aħħari (id-dehra u l-kulur tal-wiċċ meta jinqata', ir-riħa u t-togħma, il-konsistenza). Il-kontroll isir viżwalment u permezz ta' analiżi sensorja fl-aħħar tal-proċess tal-produzzjoni u hu konformi mal-karatteristiċi speċifikati fil-punt 3.5 tal-ispeċifikazzjoni.

Il-kontrolli mwettqa mill-awtorità jew mill-entità li tivverifika l-konformità mal-ispeċifikazzjoni tal-prodott isiru darba fis-sena.

4.   Awtoritajiet jew entitajiet li jivverifikaw il-konformità mal-ispeċifikazzjoni tal-prodott:

4.1.   Isem u indirizz:

Awtoritajiet jew entitajiet li jivverifikaw il-konformità mal-ispeċifikazzjoni tal-prodott fis-Slovakkja

Isem:	BEL/NOVAMANN International, s r.o.
Indirizz:	Továrenská 14 815 71 Bratislava PO Box 11 820 04 Bratislava 24 SLOVENSKO/SLOVAKIA
Tel.	+421 250213376
Posta elettronika:	tomas.ducho@ba.bel.sk

 Pubblika

Privata

Isem:	Štátna veterinárna a potravinová správa SR
Indirizz:	Botanická 17 842 13 Bratislava SLOVENSKO/SLOVAKIA
Tel.	+421 260257427
Posta elettronika:	buchlerova@svssr.sk

Pubblika

 Privata

Awtoritajiet jew entitajiet li jivverifikaw il-konformità mal-ispeċifikazzjoni tal-prodott fir-Repubblika Ċeka

Isem:	Státní zemedelská a potravinárská inspekce
Indirizz:	Kvetná 15 603 00 Brno ČESKÁ REPUBLIKA
Tel.	+420 543540111
Posta elettronika:	sekret.oklc@szpi.gov.cz

Pubblika

 Privata

Isem:	Státní veterinární správa ČR
Indirizz:	Slezská 7 120 00 Praha 2 ČESKÁ REPUBLIKA
Tel.	+420 227010137
Posta elettronika:	hygi@svscr.cz

Pubblika

 Privata

4.2.   Kompiti speċifiċi tal-awtorità jew tal-entità:

Awtoritajiet jew entitajiet li jivverifikaw il-konformità mal-ispeċifikazzjoni tal-prodott fir-Repubblika tas-Slovakkja u fir-Repubblika Ċeka. L-entitajiet ta’ spezzjoni msemmijin hawn fuq huma responsabbli għall-kontrolli tal-ispeċifikazzjoni kollha.

---