Appell ippreżentat fit-2 ta’ Settembru 2009 minn Perfetti Van Melle SpA mis-sentenza tal-Qorti tal-Prim’Istanza (It-Tmien Awla) tal-1 ta’ Lulju 2009 fil-Kawża T-16/08: Perfetti Van Melle SpA vs L-Uffiċċju għall-Armonizzazzjoni fis-Suq Intern (Trade marks u Disinni) (UASI) u Cloetta Fazer AB

(Kawża C-353/09 P)

2009/C 267/78

Lingwa tal-kawża: L-Ingliż

Partijiet

Appellanti: Perfetti Van Melle SpA (rappreżentant: P. Perani u P. Pozzi, avukati)

Appellati: L-Uffiċċju għall-Armonizzazzjoni fis-Suq Intern (Trade marks u Disinni) (UASI) u Cloetta Fazer AB

Talbiet tal-appellanti

L-appellanti titlob li l-Qorti tal-Ġustizzja jogħġobha:

Aggravji u argumenti prinċipali

1.   Motivi legali

Permezz ta’ dan l-appell, Perfetti Van Melle S.p.A. tikkontesta s-sentenza tal-Qorti tal-Prim’Istanza fil-Kawża T-16108 tal-1 ta’ Lulju 2009, li ġiet innotifikata fit-2 ta’ Lulju 2009.

Insostenn tal-appell, l-appellanti tqis li s-sentenza tal-Qorti tal-Prim’Istanza appellata f’din il-kawża, hija vvizzjata b’interpretazzjoni u applikazzjoni żbaljata tal-Artikolu 8(1)(b) tar-Regolament tal-Kunsill (KE) Nru 40/94 tal-20 ta’ Diċembru 1993 dwar it-trade mark Komunitarja (RTMK) (1), flimkien mal-Artikolu 53(1)(a) tal-istess Regolament.

1.1.   Fuq l-ewwel aggravju: l-appellanti tilmenta li l-Qorti tal-Prim’Istanza ma eżaminatx it-trade marks inkwistjoni abbażi tal-kriterji ta’ “evalwazzjoni globali” jew “impressjoni ġenerali”.

Huwa prinċipju stabbilit li l-evalwazzjoni globali tal-probabbiltà ta’ konfużjoni, fir-rigward tax-xebh viżiv, fis-smigħ jew kunċettwali tat-trade marks inkwistjoni, għandha tkun ibbażata fuq l-impressjoni ġenerali prodotta mit-trade marks, billi jittieħdu inkunsiderazzjoni b’mod partikolari l-elementi distintivi u dominanti tagħhom. L-appellanti ssostni li l-Qorti tal-Prim’Istanza ma applikatx il-prinċipju msemmi hawn fuq u, b’mod partikolari, iddeċidiet li hemm probabbiltà ta’ konfużjoni, billi bbażat l-evalwazzjoni tagħha esklużivament fuq il-fatt li t-tnejn fihom l-element komuni “CENTER”.

Is-sentenza appellata naqset milli teżamina t-trade marks fid-dawl ta’ “evalwazzjoni globali” u l-“impressjoni ġenerali” li jagħtu. Minflok, is-sentenza appellata ħadet approċċ analitiku u, għamlet eżami bejn it-trade mark “CENTER” minn naħa u l-ewwel parti verbali tat-trade mark ikkontestata “CENTER” min-naħa l-oħra, filwaqt li naqset milli tagħti importanza lit-tieni parti verbali “SHOCK”. Huwa veru li s-sentenza appellata rreferiet għall-kriterji ta’ evalwazzjoni globali u tal-impressjoni ġenerali, iżda huwa veru wkoll li mhuwiex biżżejjed li jiġi ċċitat u rripetut kriterju ġurisprudenzjali: sabiex qorti taġixxi kif suppost, jeħtieġ li dan jiġi segwit u applikat b’mod korrett fil-każ ineżami. Dan ma sarx fis-sentenza appellata. Is-sentenza appellata llimitat ruħha sabiex tiddeċiedi li ż-żewġ trade marks inkwistjoni huma simili peress li t-tnejn fihom l-element verbali “CENTER”, mingħajr ma spjegat għaliex l-element verbali “SHOCK” mhuwiex biżżejjed sabiex tiġi eskluża l-probabbiltà ta’ konfużjoni.

Għal dawn ir-raġunijiet l-appellanti ssostni wkoll li s-sentenza appellata hija vvizzjata b’distorsjoni tal-fatti u bil-ksur tal-obbligu ta’ motivazzjoni.

1.2.   Fuq it-tieni aggravju: l-appellanti ssostni li fis-sentenza appellata, il-Qorti tal-Prim’Istanza naqset milli tqis ċerti fatturi estremament importanti u rilevanti.

Is-sentenza appellata kisret ukoll l-Artikolu 8(1)(b) billi naqset milli tevalwa fatturi li kienu estremament rilevanti sabiex tiġi ddeterminata l-probabbiltà ta’ konfużjoni bejn it-trade marks inkwistjoni. B’mod partikolari, il-Qorti tal-Prim’Istanza ma ħaditx inkunsiderazzjoni l-koeżistenza għal tul ta’ żmien tat-trade marks inkwistjoni u n-nuqqas ta’ konfużjoni attwali, kif ġie spjegat fit-tul fir-rikors quddiem il-Qorti tal-Prim’Istanza.

Barra minn hekk, il-Qorti tal-Prim’Istanza ma evalwatx, b’mod korrett, fattur importanti ieħor, dak tal-grad ta’ attenzjoni tal-pubbliku rilevanti. Fil-fatt, ma kienx loġiku għall-Qorti tal-Prim’Istanza li tiddeċiedi li konsumatur normalment informat u raġonevolment attent u prudenti jonqos milli josserva l-preżenza tal-kelma “SHOCK” u milli jagħraf li t-trade marks inkwistjoni, mhux biss huma differenti viżwalment u fonetikament iżda għandhom ukoll tifsira differenti peress li t-trade mark “CENTER” hija kelma li tindika “il-punt fin-nofs ta’ xi ħaġa”, u t-trade mark “CENTER SHOCK”, minħabba l-preżenza tal-element distintiv “SHOCK”, hija espressjoni li tindika idea ta’ sensazzjoni qawwija (xokk) li l-konsumatur iħoss meta jomgħod iċ-ċentru taċ-chewing gum.

2.   Talbiet:

(1)  ĠU L 11, p. 1