Theddid transkonfinali serju għas-saħħa

PUNTI EWLENIN

Kamp ta’ applikazzjoni

Ir-regolament japplika għall-miżuri tas-saħħa pubblika fir-rigward tal-kategoriji li ġejjin ta’ theddid transkonfinali serju għas-saħħa:

• theddid ta’ oriġini bijoloġika, inkluż mard komunikabbli, infezzjonijiet assoċjati, reżistenza għall-antimikrobiċi u bijotossini jew aġenti ta’ ħsara bijoloġiċi oħra;
• theddid ta’ oriġini kimika;
• theddid ta’oriġini ambjentali, inkluż dawk marbuta mal-klima;
• theddid ta’ oriġini mhux magħrufa;
• avvenimenti li jistgħu jikkostitwixxu emerġenzi tas-saħħa pubblika ta’ tħassib skont ir-regolamenti internazzjonali tas-saħħa tal-Organizzazzjoni Dinjija tas-Saħħa.

Dan japplika wkoll għas-sorveljanza epidemjoloġika ta’ mard komunikabbli.

Kumitat għas-Sigurtà tas-Saħħa

Ir-regolament jistabbilixxi Kumitat għas-Sigurtà tas-Saħħa msaħħaħ biex jiġġieled theddid transkonfinali serju għas-saħħa, magħmul minn rappreżentanti tal-Istati Membri f’żewġ livelli ta’ ħidma:

• grupp ta’ ħidma fil-livell avvanzat biex jiddiskuti theddid transkonfinali serju għas-saħħa; u
• gruppi ta’ ħidma tekniċi biex jiddiskutu suġġetti speċifiċi meta jkun hemm bżonn.

Rappreżentanti ta’ aġenziji tal-UE u l-korpi rilevanti jistgħu jipparteċipaw bħala osservaturi.

Il-Kumitat għas-Sigurtà tas-Saħħa jaħdem fuq:

• il-koordinament u ż-żamma ta’ kuntatti mal-Kummissjoni Ewropea fuq l-ippjanar tal-prevenzjoni, tat-tħejjija u tar-rispons;
• il-koordinazzjoni tar-riskju u tal-komunikazzjoni u r-rispons għall-kriżi tal-Istati Membri;
• l-adozzjni ta’ opinjonijiet u konsulenza, inkluż fuq miżuri ta’ rispons speċifiċi bbażati fuq opinonijiet esperti minn aġenziji tekniċi tal-UE; u
• tfassil ta’ prijoritajiet u objettivi annwali fi programm ta’ ħidma.

l-ippjanar tal-prevenzjoni, tat-tħejjija u tar-rispons

Pjan u rakkomandazzjonijiet tal-UE dwar il-prevenzjoni, it-tħejjija u ir-rispons iridu jkunu żviluppati, inkluż proviżjonijiet dettaljati fuq l-ixxerjar ta’ informazzjoni bejn l-UE u l-Istati Membri. Il-pjan tal-UE ser jikkumplimenta l-pjanijiet nazzjoni tal-prevenzjoni, tat-tħejjija u tar-rispons. Il-pjan tal-UE mbagħad ser jgħaddi minn stress tests, eżerċizji u rieżamijiet, u l-pjanijiet nazzjonali ser ikunu assessjati regolarment miċ-Ċentru Ewropew għall-Prevenzjoni u l-Kontroll tal-Mard. (ECDC). Il-Kummissjoni ser tirrapporta dwar ir-riżultati ta’ dawn il-valutazzjonijiet lill-Parlament Ewropew u lill-Kunsill tal-Unjoni Ewropea.

Att ta’ implimentazzjoni, ir-Regolament ta’ Implimentazzjoni (UE) 2023/1808, jistabbilixxi l-mudell għall-għotja ta’ informazzjoni dwar l-ippjanar tal-prevenzjoni, tat-tħejjija u tar-rispons fir-rigward ta’ theddid transkonfinali serju għas-saħħa.

Att delegat, ir-Regolament Delegat (UE) 2024/1232, jistabbilixxi proċeduri, standards u kriterja għall-valutazzjonijiet tal-istat ta’ implimentazzjoni tal-Istati membri tal-pjannijiet ta’ prevenzjoni, tat-tħejjija u tar-rispons tagħhom u r-relazzjoni tagħhom mal-pjan ta’ prevenzjoni, tat-tħejjija u tar-rispons tal-UE.

Akkwist konġunt ta’ kontramiżuri mediċi

Sistema rinfurzata ta’ akkwist konġunt ta’ kontramiżuri mediċi, miftuħa wkoll għal pajjiżi msieħba bħal membri tal-Assoċjazzjoni Ewropea tal-Kummerċ Ħieles, hi miftuħa għal Andorra, Monaco, San Marino, l-Istat tal-Belt tal-Vatikan u pajjiżi kandidati tal-UE.

Networks tal-UE

Sistema msaħħa u integrata ta’ sorveljanza fil-livell tal-UE ser ittejjeb l-iskambju tad-data. Ir-regolament jipprovdi għal:

• aċċess msaħħaħ tal-ECDC għad-data fuq is-saħħa għal aspetti tar-riċerka u epijemoloġija;
• rapportar fuq sistema tad-data rilevanti għas-saħħa;
• sorveljanza marbuta ma’ sorsi u data ta’ informazzjoni oħra disponibbli.

Iż-żewġ networks ġodda nħalqu: network Ewropew tal-Laboratorji ta’ Referenza u networks tal-UE fuq l-użu ta’ sustanzi ta’ oriġini umana.

Regolament ta’ Implimentazzjoni (UE) 2024/892 jaħtar laboratorji ta’ referenza tal-Unjoni Ewropea għal ċerti oqsma speċifiċi tas-saħħa pubblika.

• reżistenza għall-antimikrobiċi fil-batterja;
• patoġeni virali li jinġarru minn vettur, patoġeni emerġenti li jinġarru minn roditur u patoġenti virali żoonotiċi;
• patoġeni ta’ riskju għoli u batterji żoonotiċi;
• Leġjonella, u
• difterite u pertussis.

Valutazzjoni ta’ twissija bikrija u riskju tas-saħħa pubblika

Is-sistema ta’ twissija bikrija u rispons tfisser li l-Kummissjoni, l-ECDC u l-awtoritajiet kompetenti responsabbli fil-livell nazzjonali jkunu f’komunikazzjoni permanenti għall-iskopijiet ta’ tħejjija, twissija bikrija u rispons, notifiki ta’ twissija, valutazzjoni tar-riskji għas-saħħa pubblika u determinazzjoni tal-miżuri li jista’ jkun hemm bżonn biex jipproteġu s-saħħa pubblika.

Qafas ġdid ta’ valutazzjoni ta’ riskju għall-perikli kollha twaqqaf u jinvolvi mhux biss lill-ECDC imma wkoll lill-Aġenzija Ewropea għas-Sustanzi Kimiċi, l-Aġenzija Ewropea għall-Ambjent, l-Awtorità Ewropea dwar is-Sigurtà fl-Ikel, l-Aġenzija Ewropea tal-Mediċini, l-Aġenzija tal-Unjoni Ewropea dwar id-Drogi (qabel iċ-Ċentru Ewropew għall-Monitoraġġ tad-Droga u d-Dipendenza fuq id-Droga) u l-Aġenzija Ewropea għall-Kooperazzjoni fl-Infurzar tal-Liġi.

Rikonoxximent ta’ emerġenza tas-saħħa pubblika fil-livell tal-UE

Il-Kummissjoni tista’ tiddikjara emerġenza għas-saħħa pubblika fil-livell tal-UE bbażata fuq opinjonijiet esperti bħal dawk maħruġa minn kumitat ta’ konsulenza speċjali. Dikjarazzjoni ta’ sitwazzjoni ta’ emerġenza tal-UE ser tqanqal:

• kumulazzjoni konġunta u akkwist ta’ prodotti jew tagħmir mediku rilevanti għall-kriżi; u
• attivitazzjoni ta’ timijiet ta’ assistenza tat-tifqigħ, inkluż it-Task Force Ewropea tas-Saħħa.

Finanzjament

Konformi mal-approċċi “saħħa waħda” u “saħħa fil-politiki kollha” tal-Organizzazzjoni Dinjija tas-Saħħa, l-implimentazzjoni hi appoġġjata minn finanzjament minn programm u strumenti rilevanti tal-UE.