—

Il-konvenut naqas milli jisma’ lir-rikorrenti qabel l-adozzjoni tad-deċiżjoni kkontestata u b’hekk kiser l-Artikolu 41(1) u (2)(a) tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”).

—

Id-deċiżjoni kkontestata ġiet adottata bi ksur tar-rekwiżiti proċedurali ġenerali li joħorġu mill-Artikolu 41 tal-Karta, mill-Artikolu 298 TFUE, mill-prinċipji ġenerali tad-dritt u mir-regoli proċedurali tal-konvenut.

—

Fost l-oħrajn, ir-rikorrenti ma tistax tivverifika jekk fir-rigward tad-deċiżjoni kkontestata kinux osservati t-termini għall-proċedura bil-miktub.

—

Id-deċiżjoni kkontestata ma hijiex motivata b’mod suffiċjenti; b’mod partikolari, la hemm motivazzjoni li tindirizza l-każ partikolari inkwistjoni u lanqas ma hemm espożizzjoni tal-kunsiderazzjonijiet ewlenin fil-kuntest tal-proporzjonalità/tas-setgħa diskrezzjonali.

—

Barra minn hekk, ma huwiex possibbli li jinftiehem kif sar il-kalkolu tal-kontribuzzjoni annwali.

—

Għal raġunijiet legali u fattwali, l-insuffiċjenza tal-motivazzjoni ma tistax tiġi rrimedjata bid-deċiżjoni tal-Bundesanstalt für Finanzdienstleistungsaufsicht (l-Awtorità Federali għas-Superviżjoni Finanzjarja, il-Ġermanja).

—

Minħabba l-motivazzjoni insuffiċjenti tad-deċiżjoni kkontestata, huwa ferm iktar diffiċli għar-rikorrenti li tikseb stħarriġ ġudizzjarju tagħha. B’hekk, għar-rikorrenti huwa prattikament impossibbli li tiżviluppa motivi speċifiċi u li tikkontesta r-raġunijiet li wasslu għall-adozzjoni tad-deċiżjoni kkontestata.

—

B’dan il-mod, il-konvenut jikser b’mod partikolari l-prinċipju ta’ proċedura kontradittorja li jipprovdi li l-parteċipanti fil-proċedura għandhom ikunu jistgħu jiddiskutu b’mod kontradittorju kemm il-fatti kif ukoll l-aspetti legali li jkunu deċiżivi għall-eżitu tal-proċedura.

—

Fil-kuntest tal-adozzjoni tar-Regolament ta’ Delega 2015/63 bħala att iddelegat fis-sens tal-Artikolu 290 TFUE, il-Kummissjoni ma għandha ebda marġni diskrezzjonali, u dan jimplika stħarriġ ġudizzjarju limitat. Dan jgħodd ukoll għall-applikazzjoni tar-Regolament ta’ Delega 2015/63 min-naħa tal-konvenut.

—

Fil-kuntest tal-applikazzjoni tal-indikatur IPS, is-sinjifikat tal-fatt li r-rikorrenti kienet imsieħba f’sistema ta’ protezzjoni istituzzjonali kien magħruf bħala kriterju importanti għad-determinazzjoni tal-kontribuzzjoni, b’tali mod li t-tqassim fi tliet kategoriji u l-klassifikazzjoni tar-rikorrenti fil-kategorija bl-iktar profil ta’ riskju għoli huma żbaljati.

—

Skont it-tieni sentenza tal-Artikolu 6(5) tar-Regolament ta’ Delega 2015/63, il-konvenut kien imissu ħa inkunsiderazzjoni, fil-kuntest tad-determinazzjoni tal-kontribuzzjoni, il-probabbiltà ta’ riżoluzzjoni tal-istituzzjoni inkwistjoni u, għalhekk, tal-użu tal-fondi ta’ riżoluzzjoni.

—

Il-konvenut kiser ukoll il-prinċipju ta’ proporzjonalità fil-kuntest tat-tqassim tal-kategoriji u tal-attribuzzjoni tal-fattur ta’ aġġustament għall-indikatur IPS.

—

L-applikazzjoni min-naħa tal-konvenut tal-multiplikatur ta’ aġġustament fuq il-bażi tal-profil ta’ riskju li għandu jiġi ddeterminat skont l-istadju 6 tal-Anness I u l-Artikolu 9(3) tar-Regolament ta’ Delega 2015/63 tmur kontra l-prinċipju ta’ orjentament fuq il-bażi tal-profil ta’ riskju.

—

Id-determinazzjoni tal-multiplikatur ta’ aġġustament fuq il-bażi tal-profil ta’ riskju fil-valur ta’ 1,388146345995 jew 1,384564814222 tikkostitwixxi wkoll ksur tal-libertà ta’ intrapriża tar-rikorrenti stabbilita fl-Artikolu 16 tal-Karta.

—

It-tieni sentenza tal-Artikolu 7(4) tar-Regolament ta’ Delega 2015/63 hija illegali għaliex l-aġġustament tal-indikatur IPS bl-indikatur ta’ riskju ta’ “attivitajiet ta’ negozjar u skoperturi barra l-karta bilanċjali, derivattivi, kumplessità u riżolvibbiltà”, skont it-tieni sentenza tal-Artikolu 7(4) tar-Regolament ta’ Delega 2015/63, tmur kontra l-prinċipju ta’ koerenza fi ħdan sistema ta’ protezzjoni istituzzjonali previst fl-Artikolu 113(7) tar-Regolament (UE) Nru 575/2013 tal-Parlament Ewropew u tal-Kunsill (2) u b’hekk twassal għal inugwaljanza fit-trattament li ma hijiex ġustifikata bejn istituzzjonijiet differenti li huma msieħba f’sistema ta’ protezzjoni istituzzjonali.

—

It-tieni sentenza tal-Artikolu 7(4) tar-Regolament ta’ Delega 2015/63 tmur ukoll kontra l-prinċipju ta’ proporzjonalità minħabba li l-indikaturi tar-riskju addizzjonali msemmija fil-punt (a) tal-ewwel sentenza tal-Artikolu 7(4) tal-imsemmi regolament ta’ delega ttieħdu inkunsiderazzjoni diversi drabi.