(1)

L-Artikolu 6(1) tar-Regolament (UE) Nru 952/2013 jirrikjedi li l-iskambji kollha ta’ informazzjoni bejn l-awtoritajiet doganali u bejn l-operaturi ekonomiċi u l-awtoritajiet doganali u l-ħażna ta’ tali informazzjoni kif rikjest skont il-leġiżlazzjoni tad-dwana, bl-użu ta’ tekniki elettroniċi tal-ipproċessar tad-data. Għal dan l-għan u f’konformità mal-Artikolu 6(2) tar-Regolament (UE) Nru 952/2013, il-Kummissjoni tfassal rekwiżiti komuni tad-data.

(2)

L-Artikolu 6(4) tar-Regolament (UE) Nru 952/2013 jipprevedi l-possibbiltà għall-Kummissjoni li tadotta deċiżjonijiet, f’każijiet eċċezzjonali, biex Stat Membru wieħed jew aktar ikunu jistgħu jidderogaw mill-użu ta’ tekniki tal-ipproċessar elettroniku tad-data għall-iskambju u l-ħażna ta’ informazzjoni jekk tali deroga tkun ġustifikata mis-sitwazzjoni speċifika tal-Istat Membru rikjedenti u tingħata għal perjodu speċifiku ta’ żmien.

(3)

Id-Deċiżjoni ta’ Implimentazzjoni tal-Kummissjoni (UE) 2019/2151 (2) tistabbilixxi l-programm ta’ ħidma relatat mal-iżvilupp u t-tnedija tas-sistemi elettroniċi previsti fil-Kodiċi Doganali tal-Unjoni (“il-programm ta’ ħidma”). Il-programm ta’ ħidma jelenka s-sistemi elettroniċi li għandhom jiġu żviluppati u d-dati meta dawk is-sistemi huma mistennija li jsiru operattivi. Fost oħrajn, dak il-programm jispeċifika l-implimentazzjoni u l-perjodu tat-tnedija tas-Sistema ta’ Kontroll tal-Importazzjoni 2 (“ICS2”) f’konformità mal-Artikoli 6(1), 16, 46, 47 u 127 sa 132 tar-Regolament (UE) Nru 952/2013.

(4)

Barra minn hekk, l-Artikolu 278(3)(b) tar-Regolament (UE) Nru 952/2013 jispeċifika l-iskadenza sa meta mezzi għajr tekniki tal-ipproċessar elettroniku tad-data jistgħu jintużaw fuq bażi tranżizzjonali biex jiġu implimentati d-dispożizzjonijiet rigward d-dikjarazzjonijiet fil-qosor tad-dħul u l-analiżi tar-riskju f’relazzjoni mad-dħul ta’ merkanzija fit-territorju doganali tal-Unjoni.

(5)

F’konformità mal-programm ta’ ħidma, l-Istati Membri jridu jkunu lesti mill-1 ta’ Marzu 2023 biex ivaraw is-sistema nazzjonali ta’ dħul bħala komponent nazzjonali tar-Rilaxx 2 tal-ICS2 sabiex jiskambjaw u jaħżnu d-dikjarazzjonijiet fil-qosor tad-dħul miġbura mill-operaturi ekonomiċi għall-merkanzija ttrasportata bl-ajru u għandhom jagħtu lill-operaturi ekonomiċi l-possibbiltà li jikkonnettjaw mas-sistema fil-perjodu tat-tnedija li jdum sat-2 ta’ Ottubru 2023 u, mid-data tal-konnessjoni tagħhom, jippreżentaw dikjarazzjonijiet fil-qosor tad-dħul billi jużaw dik is-sistema.

(6)

Madankollu, inqalgħu tliet żviluppi kbar u parzjalment imprevisti, li kollha għandhom impatt sinifikanti fuq ir-riżorsi tal-Istati Membri, u li joħolqu sfidi komplementari għalihom: il-pandemija tal-COVID-19 ikkawżat dewmien sostanzjali fl-iżviluppi tal-IT fl-Awstrija, Franza, il-Greċja u n-Netherlands. Il-ħruġ tar-Renju Unit mill-Unjoni Ewropea u ż-żieda li tirriżulta fl-għadd ta’ dikjarazzjonijiet doganali kienu jirrikjedu li Franza u n-Netherlands ibiddlu r-riżorsi u l-prijoritajiet. Il-konsegwenzi finanzjarji tal-invażjoni Russa tal-Ukrajna fuq l-attivitajiet doganali tal-pajjiżi ġirien jew dawk qrib ġeografikament komplew jaggravaw is-sitwazzjoni u ħtieġu riżorsi addizzjonali fl-Awstrija. B’mod partikolari, id-diffikultajiet fl-akkwist u fis-sejħiet għall-offerti, kif ukoll kwistjonijiet baġitarji u ta’ persunal, li rriżultaw miċ-ċirkostanzi msemmija hawn fuq kellhom impatt sinifikanti fuq il-kapaċitajiet tal-Istati Membri li jilħqu l-iskadenzi, kif imsemmi mill-Belġju, mid-Danimarka, mill-Estonja, mill-Greċja, minn Franza, mill-Kroazja, mil-Lussemburgu, mill-Awstrija, mill-Polonja, mir-Rumanija u mill-Iżvezja.

(7)

Dawn iċ-ċirkostanzi speċifiċi kkawżaw dewmien sinifikanti fl-iżviluppi tal-IT li għaddejjin u żammew lil ċerti Stati Membri milli jlestu t-tnedija ta’ mezzi tal-IT għall-komponent tas-sistema nazzjonali ta’ dħul tas-sistema tar-Rilaxx 2 tal-ICS2 sal-1 ta’ Marzu 2023. Għalhekk, l-Estonja fis-16 ta’ Mejju 2022, in-Netherlands fid-19 ta’ Mejju 2022, ir-Rumanija fil-25 ta’ Mejju 2022, il-Greċja fit-3 ta’ Ġunju 2022, Franza fis-7 ta’ Ġunju 2022, id-Danimarka fit-23 ta’ Settembru 2022, l-Awstrija fit-28 ta’ Ottubru 2022, l-Iżvezja fil-15 ta’ Diċembru 2022, il-Belġju fid-19 ta’ Diċembru 2022, il-Lussemburgu fit-22 ta’ Diċembru 2022, il-Kroazja fit-23 ta’ Diċembru 2022 u l-Polonja fit-23 ta’ Jannar 2023 talbu li jużaw mezzi għall-iskambju u l-ħażna ta’ informazzjoni differenti mit-tekniki elettroniċi għall-ipproċessar tad-data f’konformità mat-tieni subparagrafu tal-Artikolu 6(4) tar-Regolament (UE) Nru 952/2013.

(8)

F’konformità mal-Artikolu 6(4), it-tielet subparagrafu, tar-regolament ta’ hawn fuq, jenħtieġ li tali derogi ma jaffettwawx l-iskambju tal-informazzjoni bejn l-Istat Membru li lilu hija indirizzata u Stati Membri oħra u lanqas ma jaffettwaw l-iskambju u l-ħażna ta’ informazzjoni fi Stati Membri oħra għall-finijiet tal-applikazzjoni tal-leġiżlazzjoni doganali. Il-Belġju, il-Kroazja, id-Danimarka, l-Estonja, il-Greċja, Franza, il-Lussemburgu, in-Netherlands, l-Awstrija, il-Polonja, ir-Rumanija u l-Iżvezja għandhom jinnotifikaw lill-Kummissjoni dwar il-progress li sar fl-implimentazzjoni tas-sistema ta’ dħul nazzjonali tar-Rilaxx 2 tal-ICS2 fir-rigward tal-merkanzija ttrasportata bl-ajru bħala parti mill-proċess ta’ rapportar tal-progress stabbilit fl-Artikolu 278a tar-Regolament (UE) Nru 952/2013. Għandhom jiġu żgurati l-komunikazzjoni u l-kondiviżjoni tal-informazzjoni dwar l-ippjanar nazzjonali kif deskritt fl-Artikolu 4 tad-Deċiżjoni ta’ Implimentazzjoni (UE) 2019/2151.

(9)

Minħabba s-sinifikat tas-sistema ICS2 fl-istabbiliment ta’ approċċ integrat tal-UE biex tissaħħaħ il-ġestjoni tar-riskju doganali u biex jiġu żgurati s-sigurtà u s-sikurezza ta’ qabel il-wasla, filwaqt li jiġi ffaċilitat il-fluss liberu tal-kummerċ leġittimu, u minħabba n-natura u l-kumplessità tas-sistema tal-ICS2, il-bidliet meħtieġa għall-allinjament mar-rekwiżiti tal-Kodiċi Doganali tal-Unjoni għandhom riperkussjonijiet ukoll fuq sistemi tal-IT relatati jew dipendenti oħra. Għalhekk jenħtieġ li t-tul tad-deroga jinżamm għal minimu strett. Fid-dawl ta’ dan u wara li jitqiesu l-impatti taċ-ċirkostanzi eċċezzjonali li kkawżaw dewmien fl-iżviluppi tal-IT li għaddejjin bħalissa tar-Rilaxx 2 tal-ICS 2 fl-Istati Membri u l-istat attwali ta’ dawk l-iżviluppi, id-deroga jenħtieġ li ddum sa mhux aktar tard mit-30 ta’ Ġunju 2023,