1.   L-Unjoni għandha twettaq missjoni ta’ sħubija militari fin-Niġer (EUMPM Niger) sabiex tappoġġa lin-Niġer fil-ġlieda tiegħu, f’konformità mad-dritt dwar id-drittijiet tal-bniedem u d-dritt umanitarju internazzjonali, kontra gruppi armati terroristiċi.

2.   L-objettiv strateġiku tal-EUMPM Niger għandu jkun li tappoġġa l-bini tal-kapaċità tal-Forzi Armati tan-Niġer, biex iżżid il-kapaċità tagħhom li jrażżnu t-theddid minn gruppi armati terroristiċi, li jipproteġu l-popolazzjoni fin-Niġer u li jiżguraw ambjent sikur u sigur.

3.   Għal dak l-iskop, EUMPM Niger għandha:

4.   Id-dritt umanitarju internazzjonali, id-drittijiet tal-bniedem u l-prinċipju tal-ugwaljanza bejn il-ġeneri, il-protezzjoni tal-popolazzjoni ċivili u l-aġendi skont ir-Riżoluzzjoni tal-Kunsill tas-Sigurtà tan-Nazzjonijiet Uniti (UNSCR) 1325 (2000) dwar in-Nisa, il-Paċi u s-Sigurtà, l-UNSCR 2250 (2015) dwar iż-Żgħażagħ, il-Paċi u s-Sigurtà, u l-UNSCR 1612 (2005) dwar it-Tfal u l-Konflitti Armati għandhom jiġu integrati kompletament u proattivament fl-ippjanar strateġiku u operazzjonali, fit-taħriġ u fir-rappurtar ta’ EUMPM Niger.

5.   Barra minn hekk, l-EUMPM Niger għandha tiffaċilita l-assistenza mogħtija lin-Niġer mill-Faċilità Ewropea għall-Paċi fir-rigward taċ-Ċentru għat-Taħriġ tat-Tekniki tal-Forzi Armati u, jekk il-Kunsill jiddeċiedi dwar il-miżura ta’ assistenza neċessarja, għall-battaljun magħżul ta’ appoġġ għall-komunikazzjoni u l-kmand. L-attivitajiet tal-missjoni għandhom jiġu kkoordinati bl-għoti ta’ tagħmir f’waqtu permezz tal-Faċilità Ewropea għall-Paċi.

1.   L-MPCC għandha tkun l-istruttura statika ta’ kmand u kontroll fil-livell strateġiku militari barra miż-żona tal-operazzjonijiet. Hija għandha tkun responsabbli għall-ippjanar u t-tmexxija operazzjonali ta’ EUMPM Niger.

2.   Il-Kwartieri Ġenerali tal-Forza tal-Missjoni ta’ EUMPM Niger għandhom ikunu fin-Niġer u għandhom joperaw taħt il-kmand tal-Kmandant tal-Forza tal-Missjoni tal-UE.

3.   Fl-MPCC għandha tiġi inkluża ċellola, li tkun fi Brussell, u li tagħti appoġġ lill-Kwartieri Ġenerali tal-Forza tal-Missjoni sakemm l-MPCC tilħaq kapaċità operazzjonali sħiħa.

1.   Taħt ir-responsabbiltà tal-Kunsill u tar-RGħ, il-KPS għandu jeżerċita l-kontroll politiku u d-direzzjoni strateġika ta’ EUMPM Niger. Il-Kunsill b’dan jawtorizza lill-KPS sabiex jieħu d-deċiżjonijiet rilevanti f’konformità mal-Artikolu 38 TUE. Din l-awtorizzazzjoni għandha tinkludi s-setgħa li jemenda d-dokumenti tal-ippjanar, inkluż il-Pjan tal-Missjoni u l-Linja ta’ Kmand. Għandha tinkludi wkoll is-setgħa li jieħu deċiżjonijiet dwar il-ħatra tal-Kmandanti futuri tal-Forza tal-Missjoni tal-UE. Is-setgħat biex jiġu ddeterminati l-objettivi ta’ EUMPM Niger u s-setgħa biex tintemm l-EUMPM Niger għandhom jibqgħu f’idejn il-Kunsill.

2.   Il-KPS għandu jirrapporta lill-Kunsill f’intervalli regolari.

3.   Il-KPS għandu, f’intervalli regolari, jirċievi rapporti mill-President tal-Kumitat Militari tal-UE (EUMC) dwar kif tkun sejra EUMPM Niger. Il-KPS jista’ jistieden lill-Kmandant tal-Missjoni tal-UE u l-Kmandant tal-Forza tal-Missjoni tal-UE għal-laqgħat tiegħu, kif xieraq.

1.   L-EUMC għandu jissorvelja l-eżekuzzjoni korretta ta’ EUMPM Niger li ssir taħt ir-responsabbiltà tal-Kmandant tal-Missjoni tal-UE.

2.   L-EUMC għandu, f’intervalli regolari, jirċievi rapporti mill-Kmandant tal-Missjoni tal-UE. L-EUMC jista’ jistieden lill-Kmandant tal-Missjoni tal-UE u lill-Kmandant tal-Forza tal-Missjoni tal-UE għal-laqgħat tiegħu, kif xieraq.

3.   Il-President tal-EUMC għandu jaġixxi bħala l-punt ewlieni ta’ kuntatt mal-Kmandant tal-Missjoni tal-UE.

1.   Ir-RGħ għandu jiżgura l-implimentazzjoni ta’ din id-Deċiżjoni u tal-konsistenza tagħha mal-azzjoni esterna tal-Unjoni inġenerali, inkluż il-programmi għall-iżvilupp tal-Unjoni u l- programmi ta’ assistenza umanitarja tagħha.

2.   Mingħajr preġudizzju għal-linja ta’ kmand u għall-kontroll politiku u d-direzzjoni politika tal-KPS, il-Kmandant tal-Forza tal-Missjoni tal-UE għandu jirċievi gwida politika lokali mill-Kap tad-Delegazzjoni tal-Unjoni fin-Niger.

3.   EUMPM Niger għandha tikkoordina mill-qrib ma’ EUCAP Sahel Niger dwar l-oqsma rilevanti ta’ għarfien espert biex tikkontribwixxi għall-interoperabbiltà bejn EUCAP Sahel Niger, EUMPM Niger u l-forzi tas-sigurtà u tad-difiża tan-Niġer.

4.   Barra minn hekk, EUMPM Niger għandha tikkoordina l-attivitajiet tagħha mal-inizjattivi, l-isforzi u l-attivitajiet bilaterali li għaddejjin u futuri tal-Istati Membri fin-Niġer u, kif xieraq, ma’ sħab tal-istess fehma li jappoġġaw il-pjan ta’ tisħiħ tal-kapaċità tal-Forzi Armati tan-Niġer.

1.   Mingħajr preġudizzju għall-awtonomija tat-teħid ta’ deċiżjonijiet tal-Unjoni u għall-qafas istituzzjonali uniku tagħha, u f’konformità mal-linji gwida rilevanti tal-Kunsill Ewropew, Stati terzi jistgħu jiġu mistiedna jipparteċipaw f’EUMPM Niger.

2.   Il-Kunsill b’dan jawtorizza lill-KPS jistieden lil Stati terzi biex joffru kontributi u jieħu d-deċiżjonijiet rilevanti dwar l-aċċettazzjoni tal-kontributi proposti, fuq ir-rakkomandazzjoni tal-Kmandant tal-Missjoni tal-UE, f’konsultazzjoni mal-Kmandant tal-Forza tal-Missjoni tal-UE, u l-EUMC.

3.   L-arranġamenti dettaljati fir-rigward tal-parteċipazzjoni ta’ Stati terzi għandhom ikunu koperti minn ftehimiet konklużi skont l-Artikolu 37 TUE u f’konformità mal-proċedura stabbilita fl-Artikolu 218 TFUE. Fejn l-Unjoni u Stat terz ikunu kkonkludew ftehim li jistabbilixxi qafas għall-parteċipazzjoni ta’ dan tal-aħħar f’missjonijiet tal-Unjoni ta’ maniġġar ta’ kriżijiet, id-dispożizzjonijiet ta’ tali ftehim għandhom japplikaw ukoll fil-kuntest ta’ EUMPM Niger.

4.   L-Istati terzi li jagħmlu kontributi militari sinifikanti għal EUMPM Niger għandu jkollhom l-istess drittijiet u obbligi fir-rigward tat-tmexxija ta’ kuljum ta’ EUMPM Niger bħall-Istati Membri li jieħdu sehem f’EUMPM Niger.

5.   Fejn Stati terzi jagħmlu kontributi militari sinifikanti lill-EUMPM Niger, il-Kunsill b’dan jawtorizza lill-KPS biex jieħu d-deċiżjonijiet rilevanti rigward l-istabbiliment ta’ Kumitat ta’ Kontributuri.

1.   L-ispejjeż komuni ta’ EUMPM Niger għandhom jiġu amministrati f’konformità mad-Deċiżjoni (PESK) 2021/509.

2.   L-ammont ta’ referenza finanzjarja għall-ispejjeż komuni ta’ EUMPM Niger għal perjodu ta’ tliet snin wara d-data tal-adozzjoni ta’ din id-Deċiżjoni għandu jkun ta’ EUR 27,3 miljun. Il-perċentwal tal-ammont ta’ referenza msemmi fl-Artikolu 51(2) tad-Deċiżjoni (PESK) 2021/509 għandu jkun ta’ 15 % għall-impenji u 10 % għall-ħlasijiet.

1.   EUMPM Niger jista’ jkollha ċellula ta’ proġetti biex tidentifika u timplimenta l-proġetti. EUMPM Niger għandha, kif xieraq, tikkoordina, tiffaċilita u tipprovdi pariri dwar il-proġetti implimentati mill-Istati Membri u minn Stati terzi, taħt ir-responsabbiltà tagħhom, f’oqsma relatati mal-mandat tal-EUMPM Niger u b’appoġġ għall-objettivi tagħha.

2.   Soġġett għall-paragrafu 3, il-Kmandant tal-Missjoni tal-UE għandu jkun awtorizzat li jirrikorri għal kontribuzzjonijiet finanzjarji mill-Istati Membri jew minn Stati terzi sabiex jimplimenta proġetti li jissupplimentaw l-azzjonijiet l-oħra ta’ EUMPM Niger u huma konsistenti magħhom. F’tali każijiet, il-Kmandant tal-Missjoni tal-UE għandu jikkonkludi arranġament ma’ dawk l-Istati Membri jew Stati terzi, li jkopri b’mod partikolari l-proċeduri speċifiċi biex jiġi ttrattat kwalunkwe lment minn partijiet terzi fir-rigward ta’ dannu li jirriżulta minn atti jew ommissjonijiet tal-Kmandant tal-Missjoni tal-UE fl-użu tal-fondi pprovduti minn dawk l-Istati Membri jew Stati terzi.

3.   Taħt l-ebda ċirkostanza l-Unjoni jew ir-RGħ ma għandhom jinżammu responsabbli mill-Istati Membri jew mill-Istat terzi kontribwenti bħala riżultat ta’ atti jew ommissjonijiet tal-Kmandant tal-Missjoni tal-UE fl-użu tal-fondi minn dawk l-Istati Membri jew Stati terzi.

4.   L-aċċettazzjoni ta’ kontribuzzjoni finanzjarja minn Stati Membri jew Stati terzi għaċ-ċellula ta’ proġetti għandha tkun kondizzjonali għall-qbil tal-KPS.

1.   Ir-RGħ għandu jkun awtorizzat li jgħaddi lil Stati terzi assoċjati ma’ din id-Deċiżjoni, kif xieraq u f’konformità mal-ħtiġijiet ta’ EUMPM Niger, informazzjoni klassifikata tal-UE ġġenerata għall-finijiet ta’ EUMPM Niger, f’konformità mad-Deċiżjoni tal-Kunsill 2013/488/UE (2) li jistabbilixxi r-regoli tas-sigurtà għall-protezzjoni ta’ informazzjoni klassifikata tal-UE:

2.   Fil-każ ta’ bżonn operazzjonali speċifiku u immedjat, ir-RGħ għandu jkun awtorizzat ukoll jirrilaxxa lin-Niġer kwalunkwe informazzjoni klassifikata tal-UE sal-livell “RESTREINT UE/EU RESTRICTED” iġġenerata għall-finijiet ta’ EUMPM Niger, f’konformità mad-Deċiżjoni 2013/488/UE. Għandhom jitfasslu arranġamenti għal dan il-għan bejn ir-RGħ u l-awtoritajiet kompetenti tan-Niġer.

3.   Ir-RGħ għandu jkun awtorizzat li jirrilaxxa lill-Istati terzi assoċjati ma’ din id-Deċiżjoni kwalunkwe dokument mhux klassifikat tal-UE marbut mad-deliberazzjonijiet tal-Kunsill relatati ma’ EUMPM Niger u li jkun kopert mill-obbligu tas-segretezza professjonali skont l-Artikolu 6(1) tar-Regoli ta’ Proċedura tal-Kunsill (3).

4.   Ir-RGħ jista’ jiddelega s-setgħat imsemmija fil-paragrafi 1 sa 3, kif ukoll il-kapaċità li jiġu konklużi l-arranġamenti msemmija fil-paragrafu 2, lill-persunal tas-Servizz Ewropew għall-Azzjoni Esterna u/jew lill-Kmandant tal-Missjoni tal-UE u/jew lill-Kmandant tal-Forza tal-Missjoni tal-UE.

1.   Din id-Deċiżjoni għandha tidħol fis-seħħ fid-data tal-adozzjoni tagħha.

2.   EUMPM Niger għandha tintemm tliet snin wara d-data tal-adozzjoni ta’ din id-Deċiżjoni.

3.   Din id-Deċiżjoni għandha titħassar mid-data tal-għeluq tal-Kwartieri Ġenerali tal-Missjoni, f’konformità mal-pjanijiet approvati għat-terminazzjoni ta’ EUMPM Niger, u mingħajr preġudizzju għall-proċeduri rigward l-awditu u l-preżentazzjoni tal-kontijiet ta’ EUMPM Niger, stipulati fid-Deċiżjoni (PESK) 2021/509.