(1)

Ir-Regolament (UE) Nru 576/2013 jistabbilixxi r-rekwiżiti tas-saħħa tal-annimali applikabbli għall-movimenti mhux kummerċjali tal-annimali domestiċi, inkluż l-għasafar imsemmija fil-Parti B tal-Anness I tiegħu (għasafar domestiċi), u jipprevedi li l-miżuri sanitarji preventivi jistgħu jiġu adottati permezz ta’ atti delegati għall-ħarsien tas-saħħa tal-annimali u tas-saħħa pubblika minn mard jew minn infezzjonijiet li x’aktarx li jinxterdu minħabba l-movimenti mhux kummerċjali tal-għasafar domestiċi fi Stat Membru minn territorju jew minn pajjiż terz.

(2)

Ir-Regolament (UE) Nru 576/2013 jipprevedi wkoll li l-miżuri sanitarji preventivi jkunu msejsa fuq tagħrif xjentifiku adegwat, affidabbli, u vvalidat u jkunu japplikaw b’mod proporzjonat mar-riskju għas-saħħa pubblika u għas-saħħa tal-annimali tal-firxa ta’ dak il-mard jew ta’ dawk l-infezzjonijiet minn movimenti transfruntieri tal-għasafar domestiċi.

(3)

Fl-interessi tas-sempliċità u tat-trasparenza tar-regoli tal-Unjoni, kif ukoll sabiex tiġi ffaċilitat l-applikazzjoni ta’ dawn ir-regoli u jiġi evitat xogħol doppju, jenħtieġ li r-regoli għall-movimenti mhux kummerċjali tal-għasafar domestiċi fi Stat Membru minn territorju jew minn pajjiż terz jiġu stabbiliti f’att uniku aktar milli f’għadd ta’ atti separati b’kontroreferenza. Dan l-approċċ huma allinjat ukoll mal-approċċ attwali fil-qasam tal-leġiżlazzjoni tal-Unjoni dwar is-saħħa tal-annimali, bħal dak adottat fir-Regolament (UE) 2016/429 tal-Parlament Ewropew u tal-Kunsill (2), li jiffavorixxi s-simplifikazzjoni tar-regoli tal-Unjoni biex tiġi ffaċilitata l-applikazzjoni tagħhom u jitnaqqas il-piż amministrattiv.

(4)

L-influwenza tat-tjur hi marda virali infettiva tal-għasafar li jista’ jkollha impatt negattiv fuq is-saħħa tal-annimali u fuq is-saħħa pubblika. B’mod partikolari, l-infezzjonijiet bil-viruses tal-influwenza tat-tjur fit-tjur domestiku jikkawżaw żewġ forom ewlenin ta’ dik il-marda li jvarjaw fil-virulenza tagħhom. Il-forma b’patoġeniċità baxxa ġeneralment tikkawża biss sintomi ħfief, filwaqt li l-forma b’patoġeniċità għolja twassal għal rati ferm għoljin ta’ mortalità fil-parti l-kbira tal-ispeċijiet tat-tjur tat-trobbija. Għaldaqstant, dik il-marda tista’ tħalli impatt qawwi fuq il-profitabbiltà tat-trobbija tat-tjur. Barra minn hekk, għalkemm l-influwenza tat-tjur tinstab l-aktar fl-għasafar, f’ċerti ċirkustanzi jaf ikun hemm infezzjonijiet ukoll fil-bnedmin, minkejja li r-riskju ta’ dan huwa ġeneralment baxx ħafna.

(5)

Wara l-ewwel okkorrenza, fl-2005, ta’ każ ta’ influwenza tat-tjur b’patoġeniċità għolja (HPAI) tas-subtip H5N1, f’għasfur imrobbi fil-magħluq introdott fl-Unjoni, id-Deċiżjoni tal-Kummissjoni 2005/759/KE (3) stabbiliet miżuri ta’ protezzjoni mmirati biex jevitaw l-introduzzjoni u l-firxa tal-virus tal-HPAI minħabba l-movimenti fl-Unjoni tal-għasafar domestiċi li huma akkumpanjati minn sidhom. Id-Deċiżjoni 2005/759/KE tħassret u ġiet sostitwita mid-Deċiżjoni tal-Kummissjoni 2007/25/KE (4) minħabba r-riskji kontinwi għas-saħħa tal-annimali li ġejjin minn dawn il-movimenti. Id-Deċiżjoni 2007/25/KE reġgħet ġiet emendata minħabba l-bidliet fil-qagħda epidemjoloġika fl-Unjoni u d-data tal-applikazzjoni tagħha ġiet estiza diversi drabi, l-aħħar darba mid-Deċiżjoni ta’ Implimentazzjoni tal-Kummissjoni (UE) 2020/2107 (5). Id-Deċiżjoni 2007/25/KE issa se tiskadi fil-31 ta’ Diċembru 2021.

(6)

Madankollu, peress li t-theddida globali tal-influwenza tat-tjur żdiedet f’dawn l-aħħar snin, u li l-qagħda epidemjoloġika mhix mistennija li titjieb fil-ġejjieni qarib, xieraq li jiġu stabbiliti miżuri ta’ ħarsien permanenti fi ħdan il-qafas tar-Regolament (UE) Nru 576/2013, sabiex jiġi żgurat li l-movimenti mhux kummerċjali tal-għasafar domestiċi fl-Unjoni ma joħolqux riskju għall-introduzzjoni u l-firxa tal-virus tal-influwenza tat-tjur.

(7)

Ċerti territorji u ċerti pajjiżi terzi japplikaw regoli tas-saħħa tal-annimali għall-moviment mhux kummerċjali fit-territorju tagħhom tal-għasafar domestiċi, li huma ekwivalenti għar-regoli stabbiliti f’dan ir-Regolament. Għaldaqstant, il-movimenti mhux kummerċjali tal-għasafar domestiċi minn dawk it-territorji jew minn dawk il-pajjiżi terzi fl-Unjoni jistgħu jitqiesu li jippreżentaw riskju minimu għas-saħħa tal-annimali għall-Unjoni, u jenħtieġ li r-regoli tal-movimenti mhux kummerċjali tal-għasafar domestiċi stabbiliti f’dan ir-Regolament ma japplikawx għall-movimenti mhux kummerċjali fl-Unjoni tal-għasafar domestiċi minn dawk it-territorji partikolari u minn dawk il-pajjiżi terzi partikolari.

(8)

Sabiex jiġi evitat li l-movimenti kummerċjali tal-għasafar fl-Unjoni jinħbew b’mod qarrieqi bħala movimenti mhux kummerċjali, jenħtieġ li l-għadd massimu tal-għasafar domestiċi li jistgħu jiġu akkumpanjati minn sidhom jew minn persuna awtorizzata jkun limitat għal ħames għasafar domestiċi għal kull moviment mhux kummerċjali. Peress li għadd ogħla ta’ għasafar jirrappreżenta riskju ogħla għall-introduzzjoni u l-firxa tal-virus tal-influwenza tat-tjur, jenħtieġ li l-movimenti fl-Unjoni ta’ aktar minn ħames għasafar domestiċi ma jitqisux bħala moviment wieħed mhux kummerċjali tal-għasafar domestiċi, u jenħtieġ li tali movimenti ma jidħlux fil-kamp ta’ applikazzjoni tar-regoli stabbiliti f’dan l-att. Minflok, jenħtieġ li tali movimenti jissoktaw jitwettqu f’konformità mar-rekwiżiti għad-dħul fl-Unjoni ta’ għasafar miżmuma fil-magħluq stabbiliti fir-Regolament Delegat tal-Kummissjoni (UE) 2020/692 (6), u jkunu soġġetti wkoll għall-kontrolli uffiċjali fil-postijiet ta’ kontroll fuq il-fruntiera kif stabbilit fir-Regolament (UE) 2017/625 tal-Parlament Ewropew u tal-Kunsill (7).

(9)

Barra minn hekk, jenħtieġ li dan l-att jistabbilixxi r-regoli li jikkonċernaw il-mezzi biex jiġu identifikati l-għasafar domestiċi li jridu jittieħdu fi Stat Membru minn territorju jew minn pajjiż terz, sabiex tiġi żgurata r-rabta bejn l-għasfur domestiku u d-dokument ta’ identifikazzjoni korrispondenti.

(10)

Fl-opinjoni xjentifika tagħha dwar l-influwenza tat-tjur, li ġiet ippubblikata għall-ewwel darba fis-16 ta’ Ottubru 2017 (8), l-Awtorità Ewropea dwar is-Sigurtà fl-Ikel (EFSA) qieset li r-rekwiżiti tas-saħħa tal-annimali stabbiliti fid-Deċiżjoni 2007/25/KE huma effettivi biex itaffu r-riskji tal-introduzzjoni fl-Unjoni tal-virus tal-influwenza tat-tjur minn movimenti mhux kummerċjali tal-għasafar domestiċi fi Stat Membru minn territorji jew minn pajjiżi terzi. Għaldaqstant, jenħtieġ li ir-rekwiżiti tas-saħħa tal-annimali stabbiliti f’dik id-Deċiżjoni jintużaw bħala s-sisien għar-rekwiżiti stabbiliti f’dan ir-Regolament.

(11)

Jenħtieġ li l-miżuri sanitarji preventivi għall-movimenti mhux kummerċjali tal-għasafar domestiċi fl-Unjoni jipprevedu bosta għażliet ta’ rekwiżiti għad-dħul tagħhom, inkluż l-iżolament, qabel ma jsiru tali movimenti mhux kummerċjali jew fil-post ta’ destinazzjoni, u l-ittestjar qabel il-moviment għas-subtipi H5 u H7 tal-virus tal-HPAI u t-tilqim kontra s-subtipi H5 u H7 tal-virus tal-HPAI.

(12)

Madankollu, jenħtieġ li l-għażla tal-iżolament qabel il-moviment mhux kummerċjali fl-Unjoni tkun permessa biss għall-għasafar domestiċi li joriġinaw minn territorji jew minn pajjiżi terzi li ġew ivvalutati għall-influwenza tat-tjur u għall-mard l-ieħor rilevanti għall-ispeċi tat-tjur. Għalhekk, jenħtieġ li din l-għażla tkun limitata għall-pajjiżi terzi jew għat-territorji elenkati fit-tabella stabbilita fil-Parti 1 tal-Anness V, tal-Anness XIV jew tal-Anness XIX tar-Regolament ta’ Implimentazzjoni tal-Kummissjoni (UE) 2021/404 (9) għad-dħul fl-Unjoni ta’ tjur u ta’ prodotti ġerminali tat-tjur, ta’ laħam frisk tat-tjur jew tal-għasafar tal-kaċċa, jew tal-bajd u tal-prodotti tal-bajd b’mod rispettiv.

(13)

Barra minn hekk, jenħtieġ li l-għażla tal-iżolament tal-għasafar domestiċi fil-post tad-destinazzjoni titwettaq biss fi stabbiliment li jista’ jiggarantixxi l-istatus tas-saħħa tal-annimali. Jenħtieġ għalhekk li jiġi mitlub, fil-qafas ta’ din l-għażla, li l-għasafar domestiċi jitqiegħdu fi stabbiliment ta’ kwarantina approvat f’konformità mal-Artikolu 14 tar-Regolament Delegat tal-Kummissjoni (UE) 2019/2035 (10).

(14)

Sabiex jittaffa’ aktar ir-riskju tal-firxa tal-virus tal-influwenza tat-tjur fl-Unjoni, minn movimenti mhux kummerċjali tal-għasafar domestiċi minn territorji jew minn pajjiżi terzi, dawk l-għasafar domestiċi m’għandhomx jitħallew jiddaħħlu f’wirjiet, f’fieri, f’esibizzjonijiet jew f’ġemgħat oħra ta’ għasafar għal perjodu ta’ żmien xieraq wara d-dħul tagħhom fl-Unjoni. Għaldaqstant, jenħtieġ li tul dak il-perjodu ta’ żmien, l-għasafar domestiċi jiġu iżolati taħt kontroll uffiċjali, f’konformità mal-kontroll uffiċjali previst fl-Artikolu 35(1), il-punt (b) tar-Regolament (UE) Nru 576/2013.

(15)

Jenħtieġ li l-konformità mar-rekwiżiti stabbiliti f’dan ir-Regolament tiġi ċċertifikata minn veterinarju uffiċjali tat-territorju jew tal-pajjiż terz tat-tluq jew inkella minn veterinarju awtorizzat u wara dan approvata mill-awtorità kompetenti tat-territorju jew tal-pajjiż terz tat-tluq, f’konformità maċ-ċertifikat veterinarju stabbilit fl-Anness tar-Regolament ta’ Implimentazzjoni tal-Kummissjoni (UE) 2021/1938 (11), li għandu jiġi applikat flimkien mar-regoli stabbiliti f’dan ir-Regolament.

(16)

Sabiex tiġi evitata lakuna legali fir-regoli għall-movimenti mhux kummerċjali tal-għasafar domestiċi fi Stat Membru minn territorji jew minn pajjiżi terzi, jenħtieġ li dan ir-Regolament japplika mill-1 ta’ Jannar 2022, peress li r-regoli stabbiliti hawnhekk jissostitwixxu għadd ta’ regoli attwalment stabbiliti fid-Deċiżjoni 2007/25/KE, li tapplika sal-31 ta’ Diċembru 2021,