(1)

It-trasparenza hija essenzjali għall-funzjonament bla xkiel tas-suq intern. Il-Kummissjoni fil-komunikazzjonijiet tagħha, dik tas-27 ta’ Ottubru 2015 intitolata “Programm ta’ Ħidma tal-Kummissjoni tal-2016 - Mhux il-waqt li kollox jibqa’ l-istess” u dik tas-16 ta’ Diċembru 2014 intitolata “Programm ta’ Ħidma tal-Kummissjoni 2015 - Bidu Ġdid”, identifikat bħala prijorità l-ħtieġa li jkun hemm rispons għat-talba taċ-ċittadini tal-Unjoni għall-ġustizzja u t-trasparenza u li l-ħtieġa li l-Unjoni taġixxi bħala mudell ta’ referenza globali. Huwa essenzjali li l-isforzi sabiex tinkiseb aktar trasparenza jieħdu kont tar-reċiproċità fost il-kompetituri.

(2)

Fir-Riżoluzzjoni tiegħu tas-26 ta’ Marzu 2019 (3), il-Parlament Ewropew enfasizza l-ħtieġa ta’ rapportar pubbliku ambizzjuż għal kull pajjiż bħala għodda biex tiżdied it-trasparenza korporattiva u jissaħħaħ l-iskrutinju pubbliku. B’mod parallel mal-ħidma mwettqa mill-Kunsill biex jiġi miġġieled l-evitar tat-taxxa fuq l-introjtu tal-kumpanniji, huwa neċessarju li jissaħħaħ l-iskrutinju pubbliku tat-taxxi fuq l-introjtu tal-kumpanniji mġarrba minn impriżi multinazzjonali li jwettqu attivitajiet fl-Unjoni, biex ikompli jrawwem it-trasparenza u r-responsabbiltà korporattiva, biex b’hekk jikkontribwixxi għall-benesseri tas-soċjetajiet tagħna. Il-previżjoni ta’ tali skrutinju huwa meħtieġ ukoll għall-promozzjoni ta’ dibattitu pubbliku infurmat aħjar rigward, b’mod partikolari, il-livell ta’ konformità mar-regoli tat-taxxa ta’ ċerti impriżi multinazzjonali attivi fl-Unjoni u l-impatt tal-konformità mar-regoli tat-taxxa fuq l-ekonomija reali. L-istabbiliment ta’ regoli komuni dwar it-trasparenza fit-taxxa fuq l-introjtu jservi wkoll l-interess ekonomiku ġenerali billi jipprevedi salvagwardji ekwivalenti madwar l-Unjoni għall-protezzjoni tal-investituri, il-kredituri u partijiet terzi oħra b’mod ġenerali, u b’hekk jikkontribwixxi biex tinkiseb mill-ġdid il-fiduċja taċ-ċittadini tal-Unjoni fil-ġustizzja tas-sistemi tat-taxxa nazzjonali. Tali skrutinju pubbliku jista’ jinkiseb permezz ta’ rapport rigward l-informazzjoni dwar it-taxxa fuq l-introjtu, irrispettivament minn fejn tkun stabbilita l-impriża omm apikali tal-grupp multinazzjonali.

(3)

Ir-rapportar pubbliku għal kull pajjiż huwa għodda effiċjenti u adatta biex tiżdied it-trasparenza b’rabta mal-attivitajiet tal-impriżi multinazzjonali u biex il-pubbliku jkun jista’ jivvaluta l-impatt ta’ dawk l-attivitajiet fuq l-ekonomija reali. Dan itejjeb ukoll il-kapaċità tal-azzjonisti li jevalwaw sew ir-riskji li jittieħdu mill-impriżi, iwassal biex l-istrateġiji ta’ investiment ikunu bbażati fuq informazzjoni preċiża u jsaħħaħ il-kapaċità ta’ dawk li jieħdu d-deċiżjonijiet li jivvalutaw l-effiċjenza u l-impatt tal-leġiżlazzjoni nazzjonali. Jenħtieġ li l-iskrutinju pubbliku jitwettaq mingħajr ma ssir ħsara lill-ambjent tal-investiment fl-Unjoni jew lill-kompetittività tal-impriżi tal-Unjoni, inklużi impriżi żgħar u ta’ daqs medju (SMEs) kif previst fid-Direttiva 2013/34/UE tal-Parlament Ewropew u tal-Kunsill (4).

(4)

Ir-rapportar pubbliku għal kull pajjiż x’aktarx ikollu wkoll impatt pożittiv fuq id-drittijiet tal-impjegati għal informazzjoni u konsultazzjoni kif previst fid-Direttiva 2002/14/KE tal-Parlament Ewropew u tal-Kunsill (5) u, billi jżid l-għarfien dwar l-attivitajiet tal-impriżi, dwar il-kwalità tad-djalogu li jsir fl-impriżi.

(5)

Wara l-konklużjonijiet tal-Kunsill Ewropew tat-22 ta’ Mejju 2013, ġiet introdotta klawżola ta’ rieżami fid-Direttiva 2013/34/UE. Dik il-klawżola ta’ rieżami kienet tirrikjedi li l-Kummissjoni tikkunsidra l-possibbiltà li tintroduċi obbligu fuq impriżi kbar f’setturi industrijali addizzjonali biex jipproduċu rapport għal kull pajjiż fuq bażi annwali, filwaqt li jittieħed kont tal-iżviluppi fl-Organizzazzjoni għall-Kooperazzjoni u l-Iżvilupp Ekonomiċi (OECD, Organisation for Economic Cooperation and Development) u tar-riżultati tal-inizjattivi Ewropej relatati.

(6)

L-Unjoni diġà introduċiet ir-rapportar pubbliku għal kull pajjiż għas-settur bankarju permezz tad-Direttiva 2013/36/UE tal-Parlament Ewropew u tal-Kunsill (6), kif ukoll għall-industrija estrattiva u tal-qtugħ tas-siġar permezz tad-Direttiva 2013/34/UE.

(7)

Bl-introduzzjoni, permezz tad-Direttiva, tar-rapportar pubbliku għal kull pajjiż, l-Unjoni ssir mexxej globali fil-promozzjoni tat-trasparenza finanzjarja u korporattiva.

(8)

Aktar trasparenza fid-divulgazzjoni finanzjarja tirriżulta f’vantaġġi għal kulħadd, peress li s-soċjetà ċivili se ssir aktar involuta, l-impjegati se jkunu infurmati aħjar u l-investituri inqas avversi għar-riskju. Barra minn hekk, l-impriżi se jibbenefikaw minn relazzjonijiet aħjar mal-partijiet ikkonċernati, li se jwassal għal aktar stabbiltà, flimkien ma’ aċċess aktar faċli għall-finanzjament minħabba profil tar-riskju aktar ċar u titjib fir-reputazzjoni.

(9)

Fil-Komunikazzjoni tagħha tal-25 ta’ Ottubru 2011 intitolata “Strateġija rinnovata tal-UE 2011-14 għar-Responsabbiltà Soċjali Korporattiva”, il-Kummissjoni ddefiniet ir-responsabbiltà soċjali korporattiva bħala r-responsabbiltà tal-impriżi għall-impatt tagħhom fuq is-soċjetà. Jenħtieġ li r-responsabbiltà soċjali korporattiva tkun taħt it-tmexxija mill-kumpaniji. L-awtoritajiet pubbliċi jista’ jkollhom rwol ta’ appoġġ permezz ta’ taħlita intelliġenti ta’ miżuri ta’ politika volontarji u, fejn ikun meħtieġ, regolamentazzjoni komplementari. L-impriżi jistgħu jmorru lil hinn mill-konformità mal-liġi u jsiru soċjalment responsabbli billi jintegraw aktar it-tħassib soċjali, ambjentali, etiku, tal-konsumatur jew relatat mad-drittijiet tal-bniedem fl-istrateġija u l-operazzjonijiet tan-negozju tagħhom.

(10)

Jenħtieġ li l-pubbliku jkun jista’ jwettaq skrutinju tal-attivitajiet kollha ta’ grupp ta’ impriżi jekk il-grupp ikollu ċerti tipi ta’ entitajiet stabbiliti fl-Unjoni. Għall-gruppi li jwettqu attivitajiet fl-Unjoni biss permezz ta’ impriżi sussidjarji jew fergħat, jenħtieġ li dawk l-impriżi sussidjarji u fergħat jippubblikaw u jagħmlu aċċessibbli r-rapport tal-impriża omm apikali. Jekk dik l-informazzjoni jew ir-rapport ma jkunx disponibbli jew l-impriża omm apikali ma tipprovdix lill-impriżi sussidjarji jew lill-fergħat bl-informazzjoni kollha meħtieġa, jenħtieġ li l-impriżi sussidjarji u l-fergħat ifasslu, jippubblikaw u jagħmlu aċċessibbli rapport rigward l-informazzjoni dwar it-taxxa fuq l-introjtu li jkun fih l-informazzjoni kollha fil-pussess tagħhom, miksuba jew akkwistata minnhom, u dikjarazzjoni li tindika li l-impriża omm apikali tagħhom ma tkunx għamlet disponibbli l-informazzjoni meħtieġa. Madankollu, għal raġunijiet ta’ proporzjonalità u effettività, l-obbligu ta’ pubblikazzjoni u ta’ aċċessibbiltà tar-rapport rigward l-informazzjoni dwar it-taxxa fuq l-introjtu jenħtieġ li jkun limitat għal impriżi sussidjarji ta’ daqs medju u kbar stabbiliti fl-Unjoni u għal fergħat ta’ daqs komparabbli li jinfetħu fl-Unjoni. Għaldaqstant, jenħtieġ li l-kamp ta’ applikazzjoni tad-Direttiva 2013/34/UE jiġi estiż kif meħtieġ għall-fergħat miftuħa fi Stat Membru minn impriża li tkun stabbilita barra mill-Unjoni u li għandha forma ġuridika li hija komparabbli mat-tipi ta’ impriżi elenkati fl-Anness I tad-Direttiva 2013/34/UE. Jenħtieġ li l-fergħat li ngħalqu kif imsemmi fil-punt (k) tal-Artikolu 37 tad-Direttiva (UE) 2017/1132 tal-Parlament Ewropew u tal-Kunsill (7) ma jibqgħux soġġetti għall-obbligi ta’ rapportar stabbiliti f’din id-Direttiva.

(11)

Jenħtieġ li l-gruppi multinazzjonali, u fejn rilevanti, ċerti impriżi awtonomi, jipprovdu lill-pubbliku rapport rigward l-informazzjoni dwar it-taxxa fuq l-introjtu meta jaqbżu ċertu daqs, f’termini tal-ammont ta’ dħul, matul perijodu ta’ sentejn finanzjarji konsekuttivi, skont id-dħul ikkonsolidat tal-grupp jew id-dħul tal-impriża awtonoma. B’mod simetriku, jenħtieġ li tali obbligu jieqaf japplika meta dak id-d-dħul ma jibqax jaqbeż l-ammont rilevanti fuq perijodu ta’ sentejn finanzjarji konsekuttivi. F’tali każijiet, jenħtieġ li l-grupp multinazzjonali jew l-impriża awtonoma jibqgħu soġġetti għal obbligu li jirrapportaw dwar l-ewwel sena finanzjarja sussegwenti għall-aħħar sena finanzjarja meta d-dħul tagħhom jaqbeż dak l-ammont. Tali grupp multinazzjonali jew impriża awtonoma jenħtieġ li jerġgħu jsiru soġġetti għall-obbligi ta’ rapportar meta d-dħul tagħhom jaqbeż l-ammont rilevanti mill-ġdid fuq perijodu ta’ sentejn finanzjarji konsekuttivi. Minħabba l-firxa wiesgħa ta’ oqfsa ta’ rapportar finanzjarju li magħhom jistgħu jkunu konformi d-dikjarazzjonijiet finanzjarji, għall-finijiet tad-determinazzjoni tal-kamp ta’ applikazzjoni, għal impriżi regolati mil-liġi ta’ Stat Membru, jenħtieġ li ‘dħul’ jkollu l-istess tifsira bħal ‘fatturat nett’, u jkun interpretat konformement mal-qafas nazzjonali ta’ rapportar finanzjarju ta’ dak l-Istat Membru. Il-punt (c) tal-Artikolu 43(2) tad-Direttiva tal-Kunsill 86/635/KEE (8) u l-Artikolu 66(2) tad-Direttiva tal-Kunsill 91/674/KEE (9) jipprovdu definizzjonijiet għad-determinazzjoni tal-fatturat nett ta’ istituzzjoni ta’ kreditu jew ta’ impriża ta’ assigurazzjoni, rispettivament. Għal impriżi oħra, jenħtieġ li d-dħul jiġi vvalutat f’konformità mal-qafas ta’ rapportar finanzjarju li abbażi tiegħu jitħejjew id-dikjarazzjonijiet finanzjarji tagħhom. Madankollu, għall-finijiet tal-kontenut tar-rapport rigward l-informazzjoni dwar it-taxxa fuq l-introjtu, jenħtieġ li tkun tapplika definizzjoni differenti ta’ “dħul”.

(12)

Sabiex jiġi evitat rapportar doppju għas-settur bankarju, l-impriżi omm apikali u l-impriżi awtonomi li huma soġġetti għad-Direttiva 2013/36/UE u li jinkludu fir-rapport tagħhom imħejji f’konformità mal-Artikolu 89 ta’ dik id-Direttiva l-attivitajiet kollha tagħhom u, fejn adatt, l-attivitajiet kollha tal-impriżi affiljati magħhom inklużi fid-dikjarazzjonijiet finanzjarji kkonsolidati tagħhom, inklużi attivitajiet mhux soġġetti għad-dispożizzjonijiet tal-Kapitolu 2 tat-Titolu I tal-Parti Tlieta tar-Regolament (UE) Nru 575/2013 tal-Parlament Ewropew u tal-Kunsill (10), jenħtieġ li jkunu eżentati mill-obbligi ta’ rapportar stabbiliti f’din id-Direttiva.

(13)

Ir-rapport rigward l-informazzjoni dwar it-taxxa fuq l-introjtu jenħtieġ li jinkludi, fejn applikabbli, lista tal-impriżi sussidjarji kollha, fir-rigward tas-sena finanzjarja rilevanti, stabbiliti fl-Unjoni jew fil-ġuriżdizzjonijiet fil-qasam tat-taxxa inklużi fl-Anness I u, fejn applikabbli, fl-Anness II tal-verżjoni rilevanti tal-konklużjonijiet tal-Kunsill dwar il-lista riveduta tal-UE ta’ ġuriżdizzjonijiet li ma jikkooperawx għal finijiet ta’ taxxa. Sabiex jiġi evitat il-ħolqien ta’ piż amministrattiv, jenħtieġ li l-impriża omm apikali tkun tista’ tistrieħ fuq il-lista ta’ impriżi sussidjarji inklużi fid-dikjarazzjonijiet finanzjarji konsolidati tal-impriża omm apikali. Ir-rapport rigward l-informazzjoni dwar it-taxxa fuq l-introjtu jenħtieġ li wkoll jipprovdi informazzjoni dwar l-attivitajiet kollha tal-impriżi affiljati kollha tal-grupp konsolidata fid-dikjarazzjonijiet finanzjarji tal-impriża omm apikali impriża jew, skont iċ-ċirkostanzi, dwar l-attivitajiet kollha tal-impriża awtonoma. Jenħtieġ li l-informazzjoni tkun limitata għal dak li huwa meħtieġ biex ikun possibbli skrutinju pubbliku effettiv, sabiex jiġi żgurat li d-divulgazzjoni ma twassalx għal riskji jew żvantaġġi sproporzjonati għall-impriżi f’termini ta’ kompetittività jew ta’ miżinterpretazzjonijiet rigward l-impriżi kkonċernati. Jenħtieġ li r-rapport rigward l-informazzjoni dwar it-taxxa fuq l-introjtu jsir aċċessibbli mhux aktar tard minn 12-il xahar wara d-data tal-karta bilanċjali. Jenħtieġ li ma japplika ebda perijodu iqsar għall-pubblikazzjoni ta’ dikjarazzjonijiet finanzjarji fir-rigward tar-rapport rigward l-informazzjoni dwar it-taxxa fuq l-introjtu. Id-dispożizzjonijiet introdotti minn’ din id-Direttiva ma jaffettwawx id-dispożizzjonijiet tad-Direttiva 2013/34/UE rigward id-dikjarazzjonijiet finanzjarji annwali u d-dikjarazzjonijiet finanzjarji konsolidati.

(14)

Sabiex jiġi evitat il-ħolqien ta’ piż amministrattiv, jenħtieġ li l-impriżi jkunu intitolati li jippreżentaw l-informazzjoni abbażi tal-istruzzjonijiet ta’ rapportar stipulati fit-Taqsima III, il-Partijiet B u C, tal-Anness III tad-Direttiva tal-Kunsill 2011/16/UE (11) meta jħejju, f’konformità ma’ din id-Direttiva, rapport rigward l-informazzjoni dwar it-taxxa fuq l-introjtu. Għal din ir-raġuni, jenħtieġ li r-rapport rigward l-informazzjoni dwar it-taxxa fuq l-introjtu jispeċifika liema qafas ta’ rapportar ġie użat. Barra minn hekk, ir-rapport rigward l-informazzjoni dwar it-taxxa fuq l-introjtu jista’ jinkludi narrattiva ġenerali li tipprovdi spjegazzjonijiet f’każ li jkun hemm diskrepanzi materjali fil-livell ta’ grupp bejn l-ammonti ta’ taxxi akkumulati u l-ammonti ta’ taxxi mħallsa, filwaqt li jittieħed kont tal-ammonti korrispondenti li jikkonċernaw is-snin finanzjarji preċedenti.

(15)

Huwa importanti li tiġi żgurata l-komparabbiltà tad-data. Għal dak il-għan, jenħtieġ li l-Kummissjoni tingħata setgħat ta’ implimentazzjoni biex tistipula mudell komuni u formati elettroniċi ta’ rapportar, li jkunu jistgħu jinqraw mill-magni, għall-preżentazzjoni, f’konformità ma’ din id-Direttiva, tar-rapport rigward l-informazzjoni dwar it-taxxa fuq l-introjtu. Meta tistipula dak il-mudell komuni u dawk il-formati elettroniċi ta’ rapportar, jenħtieġ li l-Kummissjoni tqis il-progress li sar fil-qasam tad-diġitizzazzjoni u l-aċċessibbiltà tal-informazzjoni ppubblikata mill-impriżi, speċjalment fir-rigward tal-iżvilupp tal-punt ta’ aċċess uniku Ewropew kif propost fil-Komunikazzjoni tagħha tal-24 ta’ Settembru 2020 intitolata “Unjoni tas-Swieq Kapitali għall-persuni u n-negozji — pjan ta’ azzjoni ġdid”. Dawk is-setgħat għandhom jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (12).

(16)

Sabiex tiġi żgurata l-eżistenza ta’ livell ta’ dettall li jippermetti liċ-ċittadini jivvalutaw aħjar il-kontribuzzjoni ta’ impriżi multinazzjonali għall-benesseri tas-soċjetà f’kull Stat Membru, jenħtieġ li l-informazzjoni tinqasam skont l-Istat Membru. Barra minn hekk, informazzjoni li tikkonċerna l-operazzjonijiet tal-impriżi multinazzjonali jenħtieġ li tintwera wkoll f’livell għoli ta’ dettall fir-rigward ta’ ċerti ġuriżdizzjonijiet tat-taxxa ta’ pajjiżi terzi li jippreżentaw sfidi partikolari. Għall-operazzjonijiet l-oħra kollha ta’ pajjiż terzi, jenħtieġ li l-informazzjoni tingħata fuq bażi aggregata, sakemm l-impriża ma tixtieqx tippreżenta informazzjoni aktar dettaljata.

(17)

Għal ċerti ġuriżdizzjonijiet tat-taxxa, jenħtieġ li jintwera livell għoli ta’ dettall. Ir-rapport rigward l-informazzjoni dwar it-taxxa fuq l-introjtu jenħtieġ li dejjem jiddivulga informazzjoni separatament għal kull ġuriżdizzjoni li tkun inkluża fl-Annessi tal-konklużjonijiet tal-Kunsill dwar il-lista riveduta tal-UE ta’ ġuriżdizzjonijiet li ma jikkooperawx għall-finijiet tat-taxxa (13), u l-aġġornamenti sussegwenti tagħhom li huma approvati speċifikament darbtejn fis-sena, normalment fi Frar u f’Ottubru, u ppubblikati fis-serje C tal-Ġurnal Uffiċjali tal-Unjoni Ewropea. L-Anness I ta’ dawk il-konklużjonijiet tal-Kunsill jagħti l-“lista tal-UE ta’ ġuriżdizzjonijiet li ma jikkooperawx għall-finijiet tat-taxxa”, waqt li l-Anness II jagħti s-“Sitwazzjoni attwali tal-kooperazzjoni mal-UE fir-rigward tal-impenji meħuda minn ġuriżdizzjonijiet kooperattivi biex jimplimentaw prinċipji ta’ governanza tajba fir-rigward tat-taxxa”. Għall-Anness I, il-ġuriżdizzjonijiet li jenħtieġ li jkunu kkunsidrati huma dawk li ġew elenkati fl-1 ta’ Marzu tas-sena finanzjarja li għaliha jenħtieġ jrid jitfassal ir-rapport rigward l-informazzjoni dwar it-taxxa fuq l-introjtu. Għall-Anness II, il-ġuriżdizzjonijiet li jenħtieġ li jkunu kkunsidrati huma dawk li ssemmew f’dak l-Anness fl-1 ta’ Marzu tas-sena finanzjarja li għaliha jrid jitfassal ir-rapport rigward l-informazzjoni dwar it-taxxa fuq l-introjtu, u fl-1 ta’ Marzu tas-sena finanzjarja preċedenti.

(18)

Id-divulgazzjoni immedjata tad-data li għandha tiġi inkluża fir-rapport rigward l-informazzjoni dwar it-taxxa fuq l-introjtu tista’, f’ċerti każijiet, tkun serjament preġudikali għall-pożizzjoni kummerċjali ta’ impriża. Għaldaqstant, jenħtieġ li l-Istati Membri jkunu jistgħu jippermettu lill-impriżi jiddifferixxu d-divulgazzjoni ta’ punti speċifiċi ta’ informazzjoni għal għadd limitat ta’ snin, dment li jiddivulgaw b’mod ċar l-eżistenza tad-differiment, jagħtu spjegazzjoni motivata għalih fir-rapport u jiddokumentaw il-bażi tal-motivazzjoni. Jenħtieġ li l-informazzjoni li titħalla barra mill-impriżi tiġi divulgata f’rapport aktar tard. Jenħtieġ li qatt ma titħalla barra l-informazzjoni relatata mal-ġuriżdizzjonijiet fil-qasam tat-taxxa inklużi fl-Annessi I u II tal-konklużjonijiet tal-Kunsill dwar il-lista riveduta tal-UE ta’ ġuriżdizzjonijiet li ma jikkooperawx għall-finijiet tat-taxxa.

(19)

Sabiex isaħħu t-trasparenza u r-responsabbiltà korporattiva fir-rigward ta’ investituri, kredituri, partijiet terzi oħra u l-pubbliku ġenerali, u biex jiżguraw governanza adatta, jenħtieġ li l-membri tal-korpi ta’ amministrazzjoni, ta’ ġestjoni u ta’ superviżjoni tal-impriża omm apikali jew tal-impriża awtonoma li tinsab fl-Unjoni u li għandha l-obbligu li tfassal, tippubblika u tagħmel aċċessibbli r-rapport rigward l-informazzjoni dwar it-taxxa fuq l-introjtu jkunu kollettivament responsabbli li jiżguraw konformità mal-obbligi ta’ rapportar taħt din id-Direttiva. Billi l-membri tal-korpi ta’ amministrazzjoni, ta’ ġestjoni u ta’ superviżjoni tas-sussidjarji li huma stabbiliti fl-Unjoni u li huma kontrollati minn impriża omm apikali stabbilita barra mill-Unjoni, jew billi l-persuna jew persuni inkarigati mit-twettiq tal-formalitajiet tad-divulgazzjoni għall-fergħa, jista’ jkollhom għarfien limitat tal-kontenut tar-rapport rigward l-informazzjoni dwar it-taxxa fuq l-introjtu mħejji mill-impriża omm apikali jew jista’ jkollhom kapaċità limitata li jiksbu tali informazzjoni jew tali rapport mill-impriża omm apikali, jenħtieġ li r-responsabbiltà ta’ dawk il-membri jew dawk il-persuni tinkludi li jiġi żgurat, skont l-aħjar għarfien u kapaċità tagħhom, li r-rapport rigward l-informazzjoni dwar it-taxxa fuq l-introjtu tal-impriża omm apikali jew tal-impriża awtonoma tfassal u sar pubbliku b’mod konsistenti ma’ din id-Direttiva, jew li l-impriża sussidjarja jew il-fergħa tkun fasslet, ippubblikat u għamlet aċċessibbli l-informazzjoni kollha fil-pussess tagħha, miksuba jew akkwistata, f’konformità ma’ din id-Direttiva. F’każ li l-informazzjoni jew ir-rapport ma jkunux kompluti, jenħtieġ li r-responsabbiltà ta’ dawk il-membri jew dawk il-persuni testendi sal-pubblikazzjoni ta’ dikjarazzjoni li tindika li l-impriża omm apikali jew l-impriża awtonoma ma tkunx għamlet l-informazzjoni meħtieġa disponibbli.

(20)

Sabiex jiġi żgurat li l-pubbliku jkun sensibilizzat dwar il-kamp ta’ applikazzjoni ta’, u dwar il-konformità ma’, l-obbligi ta’ rapportar introdotti fid-Direttiva 2013/34/UE minn din id-Direttiva, jenħtieġ li l-Istati Membri jirrikjedu li awdituri statutorji jew id-ditti tal-awditjar jiddikjaraw jekk impriża kinitx meħtieġa tippubblika rapport rigward l-informazzjoni dwar it-taxxa fuq l-introjtu, u jekk dan ikun il-każ, jekk ġiex ippubblikat dak ir-rapport.

(21)

L-obbligi fuq l-Istati Membri li jipprovdu għal penali u li jieħdu l-miżuri kollha meħtieġa biex jiżguraw li dawk il-penali jiġu infurzati skont id-Direttiva 2013/34/UE japplikaw għall-ksur tad-dispożizzjonijiet nazzjonali fir-rigward tad-divulgazzjoni ta’ informazzjoni dwar it-taxxa fuq l-introjtu minn ċerti impriżi u fergħat adottati skont din id-Direttiva.

(22)

Din id-Direttiva għandha l-għan li ttejjeb it-trasparenza korporattiva kif ukoll it-trasparenza u l-iskrutinju pubbliku rigward informazzjoni dwar it-taxxa fuq l-introjtu tal-kumpanniji billi tadatta l-qafas ġuridiku eżistenti rigward l-obbligi imposti fuq il-kumpanniji u d-ditti fir-rigward tal-pubblikazzjoni ta’ rapporti, għall-protezzjoni tal-interessi tal-membri u ta’ oħrajn, fis-sens tal-punt (g) tal-Artikolu 50(2) TFUE. Kif iddikjarat il-Qorti tal-Ġustizzja, b’mod partikolari, fil-Kawża C-97/96 Verband deutscher Daihatsu-Händler (14) , il-punt (g) tal-Artikolu 50(2) TFUE jirreferi għall-ħtieġa li jiġu protetti l-interessi ta’ “oħrajn” b’mod ġenerali, mingħajr distinzjoni jew esklużjoni tal-ebda kategorija li taqa’ fl-ambitu ta’ dak it-terminu. B’hekk, it-terminu “oħrajn” huwa usa’ mill-investituri u mill-kredituri, u jestendi għal partijiet terzi interessati oħra, inkluż kompetituri u l-pubbliku ġenerali. Barra minn hekk, l-objettiv tal-kisba tal-libertà tal-istabbiliment, li huwa assenjat f’termini wesgħin ħafna lill-istituzzjonijiet permezz tal-Artikolu 50(1) TFUE, ma jistax jiġi ċirkoskritt mid-dispożizzjonijiet tal-Artikolu 50(2) TFUE. Billi din id-Direttiva tikkonċerna biss l-obbligi ta’ pubblikazzjoni ta’ rapporti rigward l-informazzjoni dwar it-taxxa fuq l-introjtu, u ma tikkonċernax l-armonizzazzjoni ta’ taxxi, l-Artikolu 50(1) TFUE jikkostitwixxi l-bażi ġuridika adatta.

(23)

Sabiex jiġi żgurat il-funzjonament sħiħ tas-suq intern u kondizzjonijiet ekwivalenti ta’ kompetizzjoni għal impriżi multinazzjonali tal-Unjoni u ta’ pajjiżi terzi, jenħtieġ li l-Kummissjoni tkompli tesplora possibbiltajiet biex jiżdiedu l-ġustizzja u t-trasparenza fiskali. B’mod partikolari, jenħtieġ li l-Kummissjoni teżamina, fil-qafas tal-klawsola ta’ reviżjoni, jekk, fost l-oħrajn, id-diżaggregazzjoni sħiħa ttejjibx l-effettività ta’ din id-Direttiva.

(24)

Minħabba li l-objettiv ta’ din id-Direttiva ma jistax jinkiseb suffiċjentement mill-Istati Membri, iżda jista’ minflok, minħabba l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ biex jinkiseb dak l-objettiv.

(25)

Din id-Direttiva twieġeb għat-tħassib li ntwera mill-partijiet interessati rigward il-ħtieġa li jiġu indirizzati d-distorsjonijiet fis-suq intern mingħajr ma tiġi pperikolata l-kompetittività tal-Unjoni. Jenħtieġ li ma tikkawżax piż amministrattiv bla bżonn għall-impriżi. Kumplessivament, fil-qafas ta’ din id-Direttiva, il-kwantità ta’ informazzjoni li trid tiġi divulgata hija proporzjonata għall-objettivi ta’ żieda fit-trasparenza korporattiva u fl-iskrutinju pubbliku. Għaldaqstant din id-Direttiva tirrispetta d-drittijiet fundamentali u tosserva l-prinċipji rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea.

(26)

F’konformità mad-Dikjarazzjoni Politika Konġunta tat-28 ta’ Settembru 2011 tal-Istati Membri u tal-Kummissjoni dwar id-dokumenti ta’ spjegazzjoni, l-Istati Membri impenjaw ruħhom li jżidu man-notifika tal-miżuri ta’ traspożizzjoni tagħhom, f’każijiet ġustifikati, dokument wieħed jew aktar li jispjegaw ir-relazzjoni bejn il-komponenti ta’ direttiva u l-partijiet korrispondenti tal-istrumenti nazzjonali ta’ traspożizzjoni. Fir-rigward ta’ din id-Direttiva, il-leġiżlatur iqis li hija ġustifikata t-trażmissjoni ta’ tali dokumenti.

(27)

Għaldaqstant, jenħtieġ li d-Direttiva 2013/34/UE tiġi emendata skont dan,

(1)

fl-Artikolu 1, jiddaħħal il-paragrafu li ġej:

(2)

wara l-Artikolu 48, jiddaħħal il-Kapitolu li ġej:

“KAPITOLU 10a

RAPPORT RIGWARD L-INFORMAZZJONI DWAR IT-TAXXA FUQ L-INTROJTU

(*1)  Id-Direttiva 2013/36/UE tal-Parlament Ewropew u tal-Kunsill tas-26 ta’ Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, 27.6.2013, p. 338)."

(*2)  Id-Direttiva tal-Kunsill 2011/16/UE tal-15 ta’ Frar 2011 dwar il-kooperazzjoni amministrattiva fil-qasam tat-tassazzjoni u li tħassar id-Direttiva 77/799/KEE (ĠU L 64, 11.3.2011, p. 1)."

(*3)  Id-Direttiva (UE) 2017/1132 tal-Parlament Ewropew u tal-Kunsill tal-14 ta’ Ġunju 2017 dwar il-ġlieda kontra l-frodi tal-interessi finanzjarji tal-Unjoni permezz tal-liġi kriminali (ĠU L 169, 30.6.2017, p. 46).”;"

(3)

fl-Artikolu 49, jiddaħħal il-paragrafu li ġej:

(*4)   ĠU L 123, 12.5.2016, p. 1.”."