EUR-Lex Access to European Union law
This document is an excerpt from the EUR-Lex website
Document 32015D1219(01)
Decision of the Bureau of the European Parliament of 7 October 2015 amending the Decision of the Bureau of the European Parliament of 29 March 2004 laying down the procedures for implementing Regulation (EC) No 2004/2003 of the European Parliament and of the Council on the regulations governing political parties at European level and the rules regarding their funding
Deċiżjoni tal-Bureau tal-Parlament Ewropew tas-7 ta’ Ottubru 2015 li temenda d-Deċiżjoni tal-Bureau tal-Parlament Ewropew tad-29 ta’ Marzu 2004 li tistabbilixxi l-proċeduri għall-implimentazzjoni tar-Regolament (KE) Nru 2004/2003 tal-Parlament Ewropew u tal-Kunsill dwar ir-regolamenti li jirregolaw il-partiti politiċi f’livell Ewropew u r-regoli dwar il-finanzjament tagħhom
Deċiżjoni tal-Bureau tal-Parlament Ewropew tas-7 ta’ Ottubru 2015 li temenda d-Deċiżjoni tal-Bureau tal-Parlament Ewropew tad-29 ta’ Marzu 2004 li tistabbilixxi l-proċeduri għall-implimentazzjoni tar-Regolament (KE) Nru 2004/2003 tal-Parlament Ewropew u tal-Kunsill dwar ir-regolamenti li jirregolaw il-partiti politiċi f’livell Ewropew u r-regoli dwar il-finanzjament tagħhom
ĠU C 428, 19.12.2015, p. 1–3
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 29/06/2017; Imħassar b' 32017D0629(01)
Relation | Act | Comment | Subdivision concerned | From | To |
---|---|---|---|---|---|
Modifies | 32003R2004 | Sostituzzjoni | anness 2A artikolu II.7 | 20/12/2015 | |
Modifies | 32003R2004 | Sostituzzjoni | anness 2B artikolu II.7 | 20/12/2015 |
Relation | Act | Comment | Subdivision concerned | From | To |
---|---|---|---|---|---|
Repealed by | 32017D0629(01) | 30/06/2017 |
19.12.2015 |
MT |
Il-Ġurnal Uffiċjali tal-Unjoni Ewropea |
C 428/1 |
DEĊIŻJONI TAL-BUREAU TAL-PARLAMENT EWROPEW
tas-7 ta’ Ottubru 2015
li temenda d-Deċiżjoni tal-Bureau tal-Parlament Ewropew tad-29 ta’ Marzu 2004 li tistabbilixxi l-proċeduri għall-implimentazzjoni tar-Regolament (KE) Nru 2004/2003 tal-Parlament Ewropew u tal-Kunsill dwar ir-regolamenti li jirregolaw il-partiti politiċi f’livell Ewropew u r-regoli dwar il-finanzjament tagħhom
(2015/C 428/01)
IL-BUREAU TAL-PARLAMENT EWROPEW,
Wara li kkunsidra t-Trattat dwar il-Funzjonament tal-Unjoni Ewropea, b’mod partikolari l-Artikolu 224 tiegħu,
Wara li kkunsidra r-Regolament (KE) Nru 2004/2003 tal-Parlament Ewropew u tal-Kunsill tal-4 ta’ Novembru 2003 (1), u b’mod partikolari l-Artikolu 9(1) tiegħu,
Wara li kkunsidra r-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 (2) (ir-“Regolament Finanzjarju”) u r-Regolament Delegat tal-Kummissjoni (UE) Nru 1268/2012 tad-29 ta’ Ottubru 2012 (3) (ir-“Regoli ta’ Applikazzjoni tar-Regolament Finanzjarju”),
Wara li kkunsidra l-Artikolu 25(11) tar-Regoli ta’ Proċedura tal-Parlament,
Billi:
(1) |
L-Artikolu 209(1) tar-Regoli ta’ Applikazzjoni tar-Regolament Finanzjarju huwa indirizzat permezz tal-Artikolu II.7 tal-Anness 2 A u l-Artikolu II.7 tal-Anness 2B tad-Deċiżjoni tal-Bureau tal-Parlament Ewropew tad-29 ta’ Marzu 2004 (4) (“id-Deċiżjoni”). |
(2) |
F’dawn l-aħħar snin, il-Parlament Ewropew, skont l-Artikolu 104 tar-Regolament Finanzjarju u l-Artikolu 137 tar-Regoli ta’ Applikazzjoni tar-Regolament Finanzjarju, ħtieġ il-partiti u l-fondazzjonijiet li jiġbru tal-inqas tliet offerti għal kull akkwist li jaqbeż valur tal-kuntratt ta’ EUR 15 000. |
(3) |
Skont l-Artikolu 209(2) tar-Regoli ta’ Applikazzjoni tar-Regolament Finanzjarju, fejn l-implimentazzjoni tal-azzjoni jew tal-programm ta’ ħidma tkun teħtieġ l-għoti ta’ kuntratt ta’ akkwist pubbliku b’valur ta’ aktar minn EUR 60 000, l-uffiċjal awtorizzanti responsabbli huwa permess li jeżiġi lill-benefiċjarju li josserva r-regoli speċjali minbarra dawk imsemmijin fl-Artikolu 209(1) tar-Regoli ta’ Applikazzjoni tar-Regolament Finanzjarju. Dawk ir-regoli speċjali għandhom ikunu bbażati fuq ir-regoli li jinsabu fir-Regolament Finanzjarju u għandhom ikunu stabbiliti filwaqt li jitqies kif jistħoqq il-valur tal-kuntratti kkonċernati, id-daqs relattiv tal-kontribuzzjoni tal-Unjoni fir-rigward tal-ispiża totali tal-azzjoni u r-riskju. Barra minn hekk, dawn ir-regoli speċjali għandhom jiġu inklużi fid-deċiżjoni jew ftehim ta’ għoti. |
(4) |
Konsegwentement, l-Artikolu 209(2) tar-Regoli ta’ Applikazzjoni tar-Regolament Finanzjarju jikkostitwixxi l-bażi legali rilevanti għall-għoti ta’ kuntratti fil-qafas ta’ finanzjament ta’ għotjiet b’valur ta’ aktar minn EUR 60 000 u huwa għaldaqstant xieraq li jintuża bħala l-bażi legali għal għotjiet inter alia għal partiti politiċi u fondazzjonijiet f’livell Ewropew li jaqbżu dan l-ammont. |
(5) |
Ir-riżultati tal-verifika tal-Qorti Ewropea tal-Awdituri għas-sena baġitarja 2014 (5) jinkludu kumment dwar nuqqas ta’ konformità mar-rekwiżit ta’ mill-inqas tliet offerti fuq kuntratt b’valur ta’ iktar minn EUR 15 000. Meta l-partiti u l-fondazzjonijiet ingħataw opportunità biex jikkummentaw dwar dan, huma indikaw li ma kienx ċar jekk dak ir-rekwiżit kienx japplika għal kuntratti ġodda biss u jekk kellux jiġi applikat fil-livell tal-fattura jew fil-livell tal-fornitur. Barra minn hekk, huma qajmu l-punt li s-sejħiet annwali għall-offerti għal ċerti kuntratti ta’ servizz bħal tindif jew il-manutenzjoni jirriżultaw f’piż amministrattiv żejjed. |
(6) |
Fid-dawl tal-Artikolu 209 tar-Regoli ta’ Applikazzjoni tar-Regolament Finanzjarju, ta’ dawk ir-riżultati tal-verifika u ta’ dawk il-kummenti, ir-regola tal-akkwist ġenerali għandha tiġi ċċarata, b’kont meħud, l-ewwel nett, tal-fatt li l-partiti politiċi Ewropej u l-fondazzjonijiet tagħhom huma limitati f’termini ta’ riżorsi umani u tal-kapaċità tagħhom tal-ġestjoni u, it-tieni nett, li dawn għandhom orjentazzjonijiet politiċi u ideoloġiċi speċifiċi li jkollhom impatt fuq l-għażla tagħhom ta’ fornituri. Dan il-karattru speċifiku huwa diġà rikonoxxut fl-Artikolu II.2.1 tal-Anness 2 A tad-Deċiżjoni, li jistipula li “[l]-affinità politika fil-prinċipju ma tikkostitwixxi raġuni għal kunflitt ta’ interessi fil-każ ta’ ftehimiet konklużi bejn il-partit politiku u l-organizzazzjonijiet bl-istess valuri politiċi”. |
(7) |
B’mod partikolari, għal kwalunkwe kuntratt ta’ implimentazzjoni b’valur ta’ iktar minn EUR 60 000 għal kull fornitur, għal kull sena, għal kull servizz jew prodott partikolari, għandu jkun hemm mill-inqas tliet offerti. Il-kuntratti għandhom ikunu għal perijodu ta’ mhux aktar minn ħames snin. L-evalwazzjoni tal-offerti għandha tkun iddokumentata u l-għażla tal-fornitur finali għandha tkun immotivata b’mod suffiċjenti. F’ċerti sitwazzjonijiet speċifiċi tas-suq, f’każijiet debitament ġustifikati, għandu jkun possibbli li kuntratt jingħata fuq bażi ta’ offerta waħda. F’dan il-każ l-oneru tal-prova għandu jkun f’idejn il-partit jew il-fondazzjoni li jkunu l-benefiċjarji tal-għotja, |
ADOTTA DIN ID-DEĊIŻJONI:
Artikolu 1
Id-Deċiżjoni hija emendata kif ġej:
(1) |
Fl-Anness 2 A, l-Artikolu II.7 huwa sostitwit b’dan li ġej: “Artikolu II.7 – GĦOTI TA’ KUNTRATTI Jekk il-Benefiċjarju jikkonkludi kuntratti biex jimplimenta l-programm ta’ ħidma u l-beni jew servizzi miksuba jikkostitwixxu nfiq eliġibbli fil-baġit tal-operat, il-Benefiċjarju għandu jkun meħtieġ li jfittex offerti kompetittivi u li jagħti l-kuntratt lill-offerent li jagħmel l-aktar offerta ekonomikament vantaġġuża, li għandha tkun meqjusa li hija l-offerta li toffri l-aħjar valur għall-flus minfuqa. Il-Benefiċjarju għandu josserva l-prinċipji tat-trasparenza u tat-trattament indaqs ta’ offerenti u għandu jevita kwalunkwe konflitt ta’ interess. Għal kuntratti b’valur ta’ aktar minn EUR 60 000 għal kull fornitur, għal kull sena u għal kull beni jew servizz, il-Benefiċjarju għandu jiġbor mill-inqas tliet offerti bi tweġiba għal stedina bil-miktub għal offerta li tagħti dettalji dwar ir-rekwiżiti għall-akkwist. Il-Benefiċjarju għandu jżomm rekord tal-evalwazzjoni tal-offerti u għandu jiġġustifika bil-miktub l-għażla tiegħu tal-fornitur finali. Jekk ikun hemm inqas minn tliet offerti bi tweġiba għal istedina bil-miktub għal offerta, il-Benefiċjarju għandu jkun meħtieġ li juri li kien impossibbli li jinkisbu aktar offerti għall-akkwist inkwistjoni. It-tul ta’ żmien tal-kuntratti kkonċernati ma għandux jaqbeż il-ħames snin. Il-Benefiċjarju għandu jibqa’ l-uniku wieħed responsabbli f’dak li għandu x’jaqsam mal-implimentazzjoni tal-programm ta’ ħidma u l-osservazzjoni tad-dispożizzjonijiet tad-Deċiżjoni. Il-Benefiċjarju jrid jintrabat li jagħmel l-arranġamenti kollha meħtieġa biex jiżgura li l-kuntrattur jaċċetta li jirrinunzja għad-drittijiet kollha favur il-Parlament Ewropew skont id-Deċiżjoni.”; |
(2) |
fl-Anness 2B, l-Artikolu II.7 huwa sostitwit b’dan li ġej: “Artikolu II.7 – GĦOTI TA’ KUNTRATTI Jekk il-Benefiċjarju jikkonkludi kuntratti biex jimplimenta l-programm ta’ ħidma u l-beni jew servizzi miksuba jikkostitwixxu nfiq eliġibbli fil-baġit tal-operat, il-Benefiċjarju għandu jkun meħtieġ li jfittex offerti kompetittivi u li jagħti l-kuntratt lill-offerent li jagħmel l-aktar offerta ekonomikament vantaġġuża, li tkun meqjusa li hija l-offerta li toffri l-aħjar valur għall-flus minfuqa. Il-Benefiċjarju għandu josserva l-prinċipji tat-trasparenza u tat-trattament indaqs ta’ offerenti u għandu jevita kwalunkwe konflitt ta’ interess. Għal kuntratti b’valur ta’ aktar minn EUR 60 000 għal kull fornitur, għal kull sena u għal kull beni jew servizz, il-Benefiċjarju għandu jiġbor mill-inqas tliet offerti bi tweġiba għal stedina bil-miktub biex jintefgħu l-offerti li tagħti dettalji dwar ir-rekwiżiti għall-akkwist. Il-Benefiċjarju għandu jżomm rekord tal-evalwazzjoni tal-offerti u għandu jiġġustifika bil-miktub l-għażla tiegħu tal-fornitur finali. Jekk ikun hemm inqas minn tliet offerti bi tweġiba għal istedina bil-miktub għal offerta, il-Benefiċjarju għandu jkun meħtieġ li juri li kien impossibbli li jinkisbu aktar offerti għall-akkwist inkwistjoni. It-tul ta’ żmien tal-kuntratti kkonċernati ma għandux jaqbeż il-ħames snin. Il-Benefiċjarju għandu jibqa’ l-uniku wieħed responsabbli f’dak li għandu x’jaqsam mal-implimentazzjoni tal-programm ta’ ħidma u l-osservazzjoni tad-dispożizzjonijiet tad-Deċiżjoni. Il-Benefiċjarju jrid jintrabat li jagħmel l-arranġamenti kollha meħtieġa biex jiżgura li l-kuntrattur jaċċetta li jirrinunzja għad-drittijiet kollha favur il-Parlament Ewropew skont id-Deċiżjoni.”. |
Artikolu 2
Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Għandha tapplika mill-1 ta’ Jannar 2016.
(1) Ir-Regolament (KE) Nru 2004/2003 tal-Parlament Ewropew u tal-Kunsill tal-4 ta’ Novembru 2003 dwar ir-regolamenti li jirregolaw il-partiti politiċi f’livell Ewropew u r-regoli dwar il-finanzjament tagħhom (ĠU L 297, 15.11.2003, p. 1).
(2) Ir-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (ĠU L 298, 26.10.2012, p. 1).
(3) Ir-Regolament ta’ Delega tal-Kummissjoni (UE) Nru 1268/2012 tad-29 ta’ Ottubru 2012 dwar ir-regoli tal-applikazzjoni tar-Regolament (UE, Euratom) Nru 966/2012 tal-Parlament Ewropew u tal-Kunsill dwar ir-regoli finanzjarji applikabbli għall-baġit ġenerali tal-Unjoni (ĠU L 362, 31.12.2012, p. 1).
(4) Id-Deċiżjoni tal-Bureau tal-Parlament Ewropew tad-29 ta’ Marzu 2004 li tistabbilixxi l-proċeduri għall-implimentazzjoni tar-Regolament (KE) Nru 2004/2003 tal-Parlament Ewropew u tal-Kunsill dwar ir-regolamenti li jirregolaw il-partiti politiċi f’livell Ewropew u r-regoli dwar il-finanzjament tagħhom, kif emendat mid-Deċiżjonijiet tal-Bureau tal-1 ta’ Frar 2006, tat-18 ta’ Frar 2008, tat-2 ta’ Frar 2011 u tat-13 ta’ Jannar 2014 (ĠU C 63, 4.3.2014, p. 1).
(5) Rapport Annwali tal-Qorti tal-Awdituri dwar l-implimentazzjoni tal-baġit fir-rigward tas-sena finanzjarja 2014, flimkien mar-risposti tal-istituzzjonijiet (ĠU C 373, 10.11.2015, p. 1).