31975L0440

Id-Direttiva tal-Kunsill

tas-16 ta’ Ġunju 1975

dwar il-kwalità meħtieġa għall-ilma tal-wiċċ illi huwa maħsub għall-produzzjoni ta’ l-ilma tax-xorb fl-Istati Membri

(75/440/KEE)

IL-KUNSILL TAL-KOMUNITAJIET EWROPEJ;

Wara li kkunsidra t-Trattat li jistabbilixxi l-Komunità Ekonomika Ewropea, u b’mod partikolari l-Artikolu 100 u 235 tiegħu,

Wara li kkunsidra l-proposta tal-Kummissjoni,

Wara li kkunsidra l-opinjoni tal-Parlament Ewropew [1],

Wara li kkunsidra l-opinjoni tal-Kumitat Ekonomiku u Soċjali [2],

Billi ż-żieda fl-użu tar-riżorsi ta’ l-ilma għall-produzzjoni ta’ l-ilma għall-konsum tan-nies teħtieġ it-tnaqqis fit-tniġġiż ta’ l-ilma u l-protezzjoni kontra d-deterjorament li jsir bħala konsegwenza;

Billi jeħtieġ li s-saħħa pubblika tiġi protetta u li, b’dan il-għan, issir sorveljanża fuq l-ilma tal-wiċċ li huwa maħsub għall-produzzjoni ta’ l-ilma għax-xorb u fuq it-trattament ta’ purifikazzjoni ta’ dan l-ilma;

Billi kull nuqqas ta’ qbil bejn id-dispożizzjonijiet dwar il-kwalità meħtieġa ta’ l-ilma tal-wiċċ maħsub għall-produzzjoni ta’ l-ilma tax-xorb diġa applikati jew fi stat ta’ preparazzjoni fid-diversi Stati Membri jista’ joħloq kondizzjonijiet mhux ugwali tal-kompetizzjoni u b’hekk ikollu effett dirett fuq il-funżjoni tas-suq komuni; billi, jeħtieġ illi l-liġijiet f’dan il-qasam jiġu approssimati kif ipprovvdut fl-Artikolu 100 tat-Trattat;

Billi jidħer illi jeħtieġ li din l-approssimazzjoni tal-liġijiet tiġi akkompanjati b’azzjoni tal-Komunità sabiex wieħed mill-għanijiet tal-Komunità fl-isfera tal-protezzjoni ta’ l-ambjent u u tat-titjib fil-kwalità tal-ħajja jista jseħħ permezz ta’ regolamenti aktar wiesgħa; billi ċerti dispożizzjonijiet speċifiċi b’dan il-għan għandhom jiġu stabbiliti; billi l-Artikolu 235 tat-Trattat għandu jiġi invokat minħabba l-fatt li l-poteri meħtieġa għal dan il-għan mħumiex ipprovvduti fit-Trattat;

Billi l-programm ta’ azzjoni tal-Komunitajiet Ewropej dwar l-ambjent [3] jipprovdi li miri tal-kwalità għandhom jitfasslu flimkien billi jiġu stabbiliti l-ħtiġiet varji li ambjent irid jilħaq inter alia d-definizzjoni tal-valuri parametriċi għall-ilma, inkuż l-ilma tal-wiċċ maħsub għall-produzzjoni ta’ l-ilma tax-xorb;

Billi t-tfassil flimkien tal-ħtiġiet minimi tal-kwalità għall-ilma tal-wiċċ maħsub għall-produzzjoni ta’ l-ilma tax-xorb ma jipprekludu la ħtiġiet aktar stretti fil-każ ta’ dan l-ilma tax-xorb użat għal xi skop ieħor u lanqas il-ħtiġiet imposti mill-ħajja akwatika;

Billi jeħtieġ li l-valuri parametriċi li jiddefinixxu l-kwalità ta’ l-ilma tal-wiċċ użat għall-produzzjoni ta’ l-ilma tax-xorb jiġu riveduti fid-dawl ta’ l-għarfien teknoloġiku u xjentifiku ġdid;

Billi l-metodi li bħalissa qed jitfasslu sabiex jittieħdu kampjuni ta’ l-ilma u sabiex jitqiesu l-parametri li jiddefinixxu l-karatteristiċi fiżiċi, kimiċi u mikrobijoloġiċi ta’ l-ilma tal-wiċċ maħsub għall-produzzjoni ta’ l-ilma tax-xorb ser jaqgħu taħt Direttiva li ser tiġi adottata mill-iktar fis possibbli,

ADOTTA DIN ID-DIRETTIVA:

Artikolu 1

1. Din id-Direttiva tinteressa l-ħtiġiet tal-kwalità li l-ilma ħelu tal-wiċċ użat jew maħsub għall-użu ta’ l-produzzjoni ta’ ilma tax-xorb, minn hawn il-quddiem riferit bħala "l-ilma tal-wiċċ", irid jilħaq wara l-applikazzjoni tat-trattament xieraq. L-ilma ta’ taħt l-art, l-ilma salmastru u l-ilma maħsub għalbiex jergħu jimtlew is-saffi li fihom jagħmel l-ilma ma għandhomx jaqgħu taħt din id-Direttiva.

2. Għall-iskopijiet ta’ l-applikazzjoni ta’ din id-Direttiva, l-ilma tal-wiċċ kollu maħsub għall-konsum tan-nies u fornit permezz tas-sistemi tad-distribuzzjoni għall-użu pubbliku għandu jiġi meqjus bħala ilma tax-xorb.

Artikolu 2

Għall-iskopijiet ta’ din id-Direttiva l-ilma tal-wiċċ għandu jinqasam skond valuri limitattivi fi tlett kategoriji, A1, A2 u A3, li jikkorispondu għall-metodi standard xierqa tat-trattament stabbiliti fl-Anness I. Dawn il-gruppi jikkorispondu għal tlett kategoriji differenti ta’ ilma tal-wiċċ, il-karatterisitiċi fiżiċi, kimiċi u mikrobijoloġiċi rispettivi li huma mniżżla fit-tabella fl-Anness II.

Artikolu 3

1. L-Istati Membri għandhom jistabbilixxu, għal kull punt fejn isir it-teħid tal-kampjuni, jew għal kull punt individwali tat-teħid tal-kampjuni, il-valuri li japplikaw għall-ilma tal-wiċċ għall-parametri kollha stabbiliti fl-Anness II.

L-Istati Membri jistgħu ma jistabbilixxux il-valuri tal-parametri li għalihom ma jidħrux valuri fit-tabella fl-Aness II, skond l-ewwel subparagrafu sakemm jiġu stabbiliti ċ-ċifri b’konformità mal-proċeduri fl-Artikolu 9.

2. Il-valuri stabbiliti skond il-paragrafu 1 ma jistgħux ikunu inqas stretti minn dawk mogħtija fil-kolonni "I" ta’ l-Anness II.

3. Fejn hemm valuri fil-kolonni "G" ta’ l-Anness II, sewwa jekk hemm valur li jikkorrispondi fil-kolonni "I" ta’ l-Anness u sewwa jekk le, l-Istati Membri għandhom jagħmlu ħilithom sabiex jirrispettawhom bħala linji ta’ gwida, bla ħsara għall-Artikolu 6.

Artikolu 4

1. L-Istati Membri għandhom jieħdu l-miżuri kollha meħtieġa sabiex jiżguraw illi l-ilma tal-wiċċ jikkonforma mal-valuri stabbiliti skond l-Artikolu 3. Kull Stat Membru għandu japplika din id-Direttiva mingħajr distinzjoni għall-ilmijiet nazzjonali u għall-ilmijiet li jaqsmu l-fruntieri tiegħu.

2. L-Istati Membri għandhom, b’mod konformi ma’ l-għanijiet ta’ din id- Direttiva, jieħdu l-miżuri meħtieġa sabiex jiżguraw it-titjib kontinwu ta’ l-ambjent. B’dan il-għan, għandhom ifasslu pjan sistematiku ta’ azzjoni li jinkludi skeda taż-żmien għat-titjib ta’ l-ilma tal-wiċċ u b’mod speċjali dak li jaqa’ taħt il-kategorija A3. F’dan il-kuntest, irid jitwettaq titjib konsiderevoli taħt il-programmi nazzjonali fl-10 snin li ġejjin.

L-iskeda taż-żmien riferita fl-ewwel subparagrafu għandha ssir fid-dawl tal-bżonn tat-titjib tal-kwalità ta’ l-ambjent, u b’mod partikolari ta’ l-ilma, u ta’ l-ostakli ekonomiċi u teknoloġiċi li jeżistu jew li jistgħu jinqalgħu fir-reġjunijiet diversi tal-Komunità.

Il-Kummisjoni trid teżamina tajjeb il-pjanijiet riferiti fl-ewwel subparagrafu, inklużi l-iskedi taż-żmien, u jekk meħtieġ, tagħmel proposti xierqa lill-Kunsill.

3. L-ilma tal-wiċċ li l-karatteristiċi fiżiċi, kimiċi u mikrobijoloġiċi tiegħu jkunu inqas mill-valuri limitattivi mandatorji li jikkorrispondu għat-tip ta’ trattament A3 ma jistax jintuża għall-produzzjoni ta’ l-ilma tax-xorb. Madankollu, dan l-ilma ta’ kwalità inferjuri jista’ jintuża f’ċirkostanzi eċċezzjonali, jekk proċessi xierqa — inkluż it-taħlit — jintużaw sabiex il-karatteristiċi tal-kwalità ta’ l-ilma jitgħollew għal-livell ta’ l-istandards tal-kwalità ta’ l-ilma tax-xorb. Il-Kummissjoni trid tiġi nnotifikata dwar ir-raġunijiet għal dawn l-eċċezzjonijiet, fuq il-bażi ta’ pjan tal-maniġġjar tar-riżorsi ta’ l-ilma fiż-żona interessata, mill-iktar fis possibli fil-każ ta’ l-installazzjonijiet eżistenti, u bil-quddiem, fil-każ ta’ installazjonijiet ġodda. Il-Kummissjoni trid teżamina tajjeb dawn ir-raġunijiet u fejn meħtieġ, tissottometti proposti xierqa lill-Kunsill.

Artikolu 5

1. Għall-iskopijiet ta’ l-Artikolu 4, l-ilma tal-wiċċ għandu jitqies illi jikkonforma mal-parametri relevanti jekk kampjuni ta’ dan l-ilma mittieħda f’intervalli regolari mill-istess punt tat-tehid tal-kampjuni u użati għall-produzzjoni ta’ l-ilma tax-xorb juru li huwa konformi mal-valuri parametriċi għall-kwalità ta’ l-ilma kkonċernat, fil-każ ta’:

- 95 % tal-kampjuni għall-parametri konformi ma dawk speċifikati fil-kolonni "I" fl-Anness II,

- 90 % tal-kampjuni f’kull każ ieħor,

u jekk fil-każ tal-5 jew 10 % tal-kampjuni li ma jikkomformawx:

(a) l-ilma ma jiddevjax mill-valuri tal-parametri interessati b’iktar min 50 %, għajr għat-temperatura, il-pH, is-soluzzjoni ta’ l-ossiġnu u l-parametri mikrobijoloġiċi;

(b) ma jistax jirriżulta periklu għas-saħħa publika;

(ċ) kampjuni konsekuttivi ta’ l-ilma mittieħda f’intervalli statistikament adattati mhumiex differenti mill-valuri parametriċi relevanti.

2. Sakemm tidħol fis-seħħ politika Komunitarja dwar il-kwistjoni, il-frekwenza tat-tehid tal-kampjuni u ta’ l-analiżi ta’ kull parametru, flimkien mal-metodi tal-kejl għandhom jiġu stabbiliti mill-awtoritajiet kompetenti nazzjonali li għandhom iqisu l-volum ta’ l-ilma prodott, l-estensjoni ta’ l-produzzjoni, il-popolazzjoni moqdija, il-grad tar-riskju ikkaġunat mill-kwalità ta’ l-ilma u d-differenzi fil-kwalità skond l-istaġun.

3. Valuri ogħla minn dawk riferiti fil-paragrafu 2, ma għandhomx jiġu kkunsidrati fil-kalkolu tal-perċentwali riferiti fil-paragrafu 1 meta jirriżultaw minn għargħar jew diżastri naturali jew kondizzjonijiet tat-temp mhux normali.

4. It-tehid ta’ kampjuni għandu jfisser il-post fejn l-ilma tal-wiċċ jiġi prodott qabel jintbagħat għat-trattament ta’ purifikazzjoni.

Artikolu 6

L-Istati Membri jistgħu meta jridu jagħmlu regoli għall-ilma tal-wiċċ iktar stretti minn dawk stabbiliti fid-Direttiva.

Artikolu 7

It-twettiq tal-miżuri li jittieħdu skond din id-Direttiva ma tista’ taħt l-ebda ċirkostanza twassal b’mod dirett jew indirett għal tnaqqis fil-kwalità korrenti ta’ l-ilma tal-wiċċ.

Artikolu 8

Din id-Direttiva tista’ tiġi rtirata:

(a) f’każ ta’għarar jew diżastri naturali oħra;

(b) f’każ ta’ parametri oħra mmarkati (O) fl-Anness II minħabba kondizzjonijiet meteoroloġiċi jew ġeografiċi eċċezzjonali;

(ċ) fejn l-ilma tal-wiċċ jiġi arrikkit b’mod naturali b’ċerti sustanzi b’riżultat li jaqbeż il-limiti stabbiliti fil-kategoriji A1, A2 u A3 fit-tabella fl-Anness II;

(d) f’kaz ta’ ilma tal-wiċċ f’laġi mhux fondi jew ilma tal-wiċċ kważi qiegħed, għall-parametri mmarkati b’asterisk fit-tabella fl’L-Anness II, billi din id-deroga tapplika biss għal-laġijiet b’fond li ma jaqbisx il-20m, b’tibdil ta’ l-ilma inqas minn darba f sena, u mingħajr skariku ta’ ilma ħażin għal ġo l-ilma.

L-arrikkiment naturali hawn ifisser li mingħajr l-intervent tal-bniedem, korp speċifikat ta’ ilma jirċievi ċerti sostanżi li jinsabu fil-ħamrija.

L-eċċeżjonijiet ipprovvduti fl-ewwel subparagrafu ma’ jistgħu fl-ebda każ ma jħarsux il-ħtiġiet tas-saħħa pubblika.

Meta Stat Membru jirrinunzja għad-dispożizzjonijiet ta’ din id-Direttiva, għandu minnufih jinnotifika lill-Kummisjoni b’dan u jiddikjara r-raġunijiet tiegħu u il-perjodi maħsuba.

Artikolu 9

Il-valuri numeriċi u l-lista tal-paramentri stabbiliti fit-tabella ta’ l-Anness II, li jfissru il-karatteristiċi fiżiċi, kimiċi u mikrobijoloġiċi ta’ l-ilma tal-wiċċ jistgħu jiġu riveduti permezz ta’ talba minn Stat Membru jew fuq proposta tal-Kummisjoni, kull meta l-għarfien tekniku u xjentifiku dwar il-metodi ta’ trattament jiġi estiż jew l-i standards għall-ilma tax-xorb jinbidlu.

Artikolu 10

l-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva fi żmien sentejn min-notifikazzjoni tagħha. Għandhom minnufih jinnotifikaw lill-Kummissjoni b’dan.

Artikolu 11

Din id-Direttiva hija indirizzata lill-Istati Membri.

Magħmula fil-Lussemburgu, fis-16 ta’ Frar 1975,

Għall-Kunsill

Il-President

R. Ryan

[1] ĠU C 62, tat-30.05.74, p. 7.

[2] ĠU C 109, tad-19.09.74, p. 41.

[3] ĠU C 112, ta’ l-20.12.73, p. 3.

--------------------------------------------------

ANNESS I

Id-definizzjoni tal-metodi standard tat-trattament għat-tibdil ta' l-ilma tal-wiċċ tal-kategoriji A1, A2 u A3 f'ilma għax-xorb

Kategorija A1:

It-trattament fiżiku u d-diżinfezzjoni sempliċi, p.e. il-filtrazzjoni u d-diżinfezzjoni mgħaġġla.

Kategorija A2:

It-trattament fiżiku, it-trattament kimiku u d-diżinfezzjoni normali, p.e. il-klorurazzjoni ta' qabel, il-koagulazzjoni, il-flokkulazzjoni, id-dekantazzjoni, il-filtrazzjoni, id -diżinfezzjoni (il-klorurazzjoni finali).

Kategorija A3:

It-trattament fiżiku u t-trattament kimiku intensivi, it-trattament u d-diżinfezzjoni estiżi, p.e. il-klorurazzjoni sal-punt li ma jiflahx iżjed, il-koagulazzjoni, il-flokkulazzjoni, id-dekantazzjoni, il-filtrazzjoni, l-assorbiment (karbonju attivat), id-diżinfezzjoni (ożonu, klorurazzjoni finali).

--------------------------------------------------

L-ANNESS II

Il-karatteristiċi ta' l-ilma tal-wiċċ maħsub għall-produzzjoni ta' l-ilma tax-xorb

I = mandatorju.

G = ta' gwida.

O = kondizzjonijiet ġeografiċi jew tat-temp eċċezzjonali.

* = ara l-Artikolu 8(d).

[1] [2]

| Il-parametri | A1 G | A1 I | A2 G | A2 I | A3 G | A3 I |

| |

1 | Il-PH | | 6.5 sa 8.5 | 5.5 sa 9 | 5.5 sa 9 |

2 | Il-kolorazzjoni (wara l-filtrazzjoni sempliċi | Mg/l skala Pt | 10 | 20 (0) | 50 | 100 (0) | 50 | 200 (0) |

3 | It-total tas-solidi fis-sospensjoni | Mg/l SS | 25 | | | | | |

4 | It-temperatura | oC | 22 | 25 (0) | 22 | 25 (0) | 22 | 25 (0) |

5 | Il-konduttività | μs/ċm –1 f'temperatura ta' 20oĊ | 1000 | | 1000 | | 1000 | |

6 | Ir-riħa | (il-fattur tat-tgħammid f'temperatura ta' 25oĊ) | 3 | | 10 | | 20 | |

7* | In-nitrati | Mg/1 NO3 | 25 | 50(0) | | 50(0) | | 50(0) |

8 [1] | Il-fluworidi | Mg/1 F | 0.7 sa 1 | 1.5 | 0.7 sa 0.7 | | 0.7 sa 0.7 | |

9 | It-total tal-kloru organiku li jista' jiġi estratt | Mg/1 Cl | | | | | | |

10* | Il-ħadid f'soluzzjoni | Mg/1 Fe | 0.1 | 0.3 | 1 | 2 | 1 | |

11* | Il-manganiż | Mg/1 Ma | 0.05 | | 0.1 | | 1 | |

12 | Ir-ram | Mg/1 Ca | 0.02 | 0.05(0) | 0.05 | | 1 | |

13 | Iż-żingu | Mg/1 Za | 0.5 | 3 | 1 | 5 | 1 | 5 |

14 | Il-boron | Mg/1 B | 1 | | 1 | | 1 | |

15 | Il-berillju | Mg/1 Be | | | | | | |

16 | Il-kobalt | Mg/1 Co | | | | | | |

17 | In-nikil | Mg/1 Ni | | | | | | |

18 | Il-vanadju | Mg/1 V | | | | | | |

19 | l-arseniku | Mg/1 As | 0.01 | 0.05 | | 0.05 | 0.05 | 0.1 |

20 | Il-kadmju | Mg/1 Cd | 0001 | 0005 | 0001 | 0005 | 0001 | 0005 |

21 | It-total tal-kromju | Mg/1 Cr | | 0.05 | | 0.05 | | 0.05 |

22 | Iċ-ċomb | Mg/1 Pb | | 0.05 | | 0.05 | | 0.05 |

23 | Is-silenju | Mg/1 Se | | 0.01 | | 0.01 | | 0.01 |

24 | Il-merkurju | Mg/1 Hg | 0005 | 0001 | 0.0005 | 0001 | 0.0005 | 0001 |

25 | Il-barju | Mg/1 Ba | | 0.1 | | 1 | | 1 |

26 | Iċ-ċjanur | Mg/1 Cn | | 0.05 | | 0.05 | | 0.05 |

27 | Is-sulfati | Mg/1 SO4 | 150 | 250 | 150 | 250 (O) | 150 | 250 (O) |

28 | Il-kloruri | Mg/1 CI | 200 | | 200 | | 200 | |

29 | Is-surfactants (li jirreaġixxu mal-metil blu) | Mg/1 (sulfattal-lauryl) | 0.2 | | 0.2 | | 0.5 | |

30* [2] | Il-fosfati | Mg/1 P2O5 | 0.4 | | 0.7 | | 0.7 | |

31 | L-aċidi karboliċi (l-indiċi ta' l-aċidi karboliċi) paranitranilina 4 aminoantipirina | C6H3OH | | 0001 | 0001 | 0005 | 0.01 | 0.1 |

32 | L-idrokarburi f'soluzzjoni jew emulsifikati (wara l-produzzjoni permezz ta' l-etere tal-petrolejum) | Mg/1 | | 0.05 | | 0.2 | 0.5 | 1 |

33 | L-idrokaburi poliċikliċi aromatiċi | Mg/1 | | 0.0002 | | 0.0002 | | 0001 |

34 | Pestiċidi totali (paratjon, BHC, dijeldrin) | Mg/1 | | 0001 | | 0.0025 | | 0005 |

35* | Id-domanda għall-ossiġnu kimiku (COD) | Mg/1 O2 | | | | | 30 | |

36* | Ir-rata tas-saturazzjoni ta' l-ossiġnu f'soluzzjoni | % O2 | > 70 | | > 50 | | > 30 | |

37* | Id-domanda għall-ossiġnu bijokimiku (BOD2) (f'temperatura ta' 20 oĊ mingħajr nitrifikazzjoni) | Mg/1 O2 | < 3 | | < 5 | | < 7 | |

38 | In-nitroġenu permezz tal-metodu Kjedaħl (għajr għall-NO2) | Mg/1 N | 1 | | 2 | | 3 | |

39 | L-ammonja | Mg/1 NH4 | 0.05 | | 1 | 1.5 | 2 | 4 (O) |

40 | Is-sustanzi li jistgħu jiġu estratti permezz tal-kloroform | Mg/1 SEC | 0.1 | | 0.2 | | 0.5 | |

41 | It-total tal-karbun organiku | Mg/1 C | | | | | | |

42 | Il-karbun organiku residwu wara l-flokkulazzjoni u l-filtrazzjoni mill-membrana (5 μ) TOC | Mg/1 C | | | | | | |

43 | It-total tal-koliformi 37 oĊ | /100 ml | 50 | | 5000 | | 50000 | |

44 | Il-koliformi fekali | /100 ml | 20 | | 2000 | | 20000 | |

45 | L-istreptokokki fekali | /100 ml | 20 | | 1000 | | 10000 | |

46 | Is-salmonella | | Mhux preżenti f'5000 ml | | Mhux preżenti f'1000 ml | | | 250 (0) |

[1] Il-valuri mogħija huma l-ogħla limiti stabbiliti fir-rigward tal-medja tat-temperatura ta' matul is-sena (l-ogħla u l-inqas).

[2] Dan il-parametru ġie inkluż għalbiex jissodisfa l-ħtiġiet ekoloġiċi ta' ċerti tipi ta' ambjent.

--------------------------------------------------