(1)

An 30 Meitheamh 2020, ghlac an Chomhairle Moladh (AE) 2020/912 maidir leis an srian sealadach ar thaisteal neamhriachtanach isteach san Aontas agus maidir leis an bhféidearthacht deireadh a chur leis an srian sin (1).

(2)

An 2 Feabhra 2021, rinne an Chomhairle leasú ar Mholadh (AE) 2020/912 maidir le srian sealadach ar thaisteal neamhriachtanach isteach san Aontas agus maidir leis an bhféidearthacht deireadh a chur leis an srian sin (2) chun na critéir a thabhairt cothrom le dáta, ar critéir iad a úsáidtear chun a mheas cé acu atá taisteal neamhriachtanach ó thríú tíortha sábháilte nó nach bhfuil agus ar cheart é a cheadú.

(3)

Leis an leasú céanna, tugadh isteach sásraí chun srian a chur le leathadh athraitheach den víreas SARS-COV-2 ar díol imní iad san Aontas (3).

(4)

An 20 Bealtaine 2021, rinne an Chomhairle leasú ar Mholadh (AE) 2020/912 (4) chun leathadh amach agus éifeachtaí dearfacha na bhfeachtas vacsaínithe a chur san áireamh maidir le srian a chur le leathadh an víris, agus chun srian a chur le hallmhairiú agus leathadh isteach san Aontas na n-athraitheach atá ag teacht chun cinn ar díol spéise agus imní iad.

(5)

An 14 Meitheamh 2021, ghlac an Pharlaimint agus an Chomhairle Rialacháin (AE) 2021/953 (5) agus (AE) 2021/954 (6) maidir le Deimhniú Digiteach COVID-19 AE. Is léir anois gurbh uirlis bhunúsach é an Deimhniú Digiteach COVID an Aontais chun cabhrú leis an taisteal a athbhunú laistigh den Aontas.

(6)

Ó glacadh Rialachán (AE) 2021/953, ghlac an Coimisiún roinnt gníomhartha cur chun feidhme lena mbunaítear go measfar deimhnithe COVID-19 arna n-eisiúint ag tríú tír áirithe a bheith coibhéiseach le deimhnithe arna n-eisiúint ag na Ballstáit i gcomhréir leis an Rialachán sin. Is féidir, dá bhrí sin, deimhnithe i ndáil le vacsaíniú, tástáil agus téarnamh a chumhdaítear leis na gníomhartha cur chun feidhme sin a fhíordheimhniú ar bhealach slán iontaofa. Dá bhrí sin, d’éascaigh Deimhniú Digiteach COVID an Aontais, agus go háirithe na cinntí cur chun feidhme a glacadh ar an mbonn sin, athoscailt shábháilte an taistil ó thríú tíortha go dtí an tAontas. (7)

(7)

Ba cheart an cur chuige reatha a leagtar amach i Moladh (AE) 2020/912 a thabhairt cothrom le dáta chun bunú Dheimhniú Digiteach COVID an Aontais a chur san áireamh agus chun éabhlóid na paindéime a mheas, lena n-áirítear teacht chun cinn an athraithigh omicron ar díol imní é, an méadú atá ag teacht ar ghlacadh an vacsaínithe agus deireadh a bheith á chur de réir a chéile le srianta taistil ar fud an domhain.

(8)

An 22 Deireadh Fómhair 2021, d’iarr an Chomhairle Eorpach sna conclúidí uaithi, i bhfianaise na staide eipidéimeolaíche, go ndéanfaí comhordú breise chun an tsaorghluaiseacht laistigh den Aontas agus an taisteal isteach san Aontas, a éascú agus go ndéanfaí athbhreithniú ar an dá mholadh, lena n-áirítear Moladh (AE) 2020/912 ón gComhairle.

(9)

Ba cheart an tréimhse chaighdeánach inghlacthachta le deimhnithe vacsaínithe arna n-eisiúint ag tríú tíortha i ndiaidh do shraith vacsaínithe phríomhúil a bheith curtha i gcrích a shocrú ag 270 lá. Chun cur chuige comhordaithe a áirithiú, níor cheart do na Ballstáit glacadh le deimhnithe vacsaínithe a eisítear i ndiaidh do shraith vacsaínithe phríomhúil a bheith curtha i gcrích má tá níos mó ná 270 lá caite ó riar na dáileoige a shonraítear iontu. Sa chás sin, ba cheart do na Ballstáit glacadh le deimhnithe vacsaínithe lena léirítear go bhfuarthas dáileog bhreise i ndiaidh do shraith vacsaínithe phríomhúil a bheith curtha i gcrích.

(10)

Chun taisteal sábháilte isteach san Aontas a éascú a thuilleadh, ba cheart an tairseach don ráta carnach fógartha COVID-19 le haghaidh tréimhse 14 lá a mhéadú ó 75 go 100 in aghaidh gach 100 000 cónaitheoir. Ag an am céanna, agus chun na cumais fheabhsaithe tástála a chur san áireamh beagnach 2 bhliain tar éis do chéad teacht an víris, ba cheart an t-íosráta tástála seachtainiúil is gá a mhéadú ó 300 go 600 tástáil in aghaidh 100 000 cónaitheoir. Ba cheart go méadódh sé sin iontaofacht na sonraí a úsáidtear chun a chinneadh cá mhéad taistil neamhriachtanaigh ba cheart a cheadú ó thríú tír áirithe.

(11)

Chun gur fearr a bheifear in ann taisteal neamhriachtanach a dhéanamh isteach san Aontas agus chun intuarthacht a mhéadú do thaistealaithe tríú tír, ní hamháin gur cheart do na Ballstáit glacadh le vacsaíní COVID-19 ar deonaíodh údarú margaíochta dóibh de bhun Rialachán (CE) Uimh. 726/2004 ó Pharlaimint na hEorpa agus ón gComhairle (8) ach ba cheart dóibh glacadh freisin leis na cinn sin a bhfuil nós imeachta um liostú éigeandála na hEagraíochta Domhanda Sláinte (EDS) curtha i gcrích ina leith.

(12)

Ina theannta sin, mar mhalairt ar vacsaíniú, ba cheart do na Ballstáit taisteal neamhriachtanach a cheadú do dhaoine a théarnaigh ó COVID-19 laistigh de 180 lá roimh thaisteal go dtí an tAontas Eorpach agus a bhfuil Deimhniú Digiteach COVID an Aontais acu nó ceann a aithnítear é a bheith coibhéiseach leis.

(13)

Ag an am céanna, chun riosca tarchurtha víreas SARS-CoV-2 a laghdú a thuilleadh, d’fhéadfadh na Ballstáit cruthúnas bailí ar thástáil imoibrithe shlabhrúil polaiméaráise fíor-ama dhiúltach (RT-PCR) a éileamh roimh imeacht: (i) nuair a fuair an taistealaí vacsaín COVID-19 tar éis an próiseas um liostú úsáide éigeandála EDS a dhéanamh ach nach bhfuil an vacsaín sin ar liosta na vacsaíní arna n-údarú san Aontas de bhun Rialachán (CE) Uimh. 726/2004 nó (ii) más amhlaidh gur théarnaigh an taistealaí ó COVID-19 laistigh de 180 lá roimh thaisteal go dtí an tAontas.

(13a)

Ós rud é go bhféadfadh sé nach mbeifí in ann barántúlacht, sláine agus bailíocht na ndeimhnithe vacsaínithe arna n-eisiúint ag tríú tíortha a fhíorú, ar deimhnithe iad nach n-úsáideann creat iontaoibhe Dheimhniú Digiteach COVID an Aontais nó deimhniú vacsaínithe a aithnítear a bheith coibhéiseach leis, d’fhéadfadh na Ballstáit cruthúnas bailí a éileamh ar thástáil dhiúltach RT-PCR roimh imeacht i gcás ina mbeidh an taistealaí vacsaínithe go hiomlán le vacsaín COVID-19 a bhfuil údarú margaíochta deonaithe di de bhun Rialachán (CE) Uimh. 726/2004 ach nach bhfuil Deimhniú Digiteach COVID an Aontais, nó deimhniú a aithnítear a bheith coibhéiseach leis, ina sheilbh aige.

(14)

Ba cheart leanaí os cionn 6 bliana d’aois agus faoi bhun 18 mbliana d’aois a bheith in ann taisteal ar an gcoinníoll go ndearna siad tástáil dhiúltach RT-PCR roimh imeacht dóibh. Sna cásanna sin, d’fhéadfadh Ballstáit tástáil bhreise a éileamh tar éis teachta, coraintín nó féinleithlisiú. I gcás ina mbeidh cruthúnas bailí ar vacsaíniú COVID-19 arna eisiúint ar bhonn vacsaín COVID-19 arna húdarú san Aontas de bhun Rialachán (CE) Uimh. 726/2004 ag leanaí atá os cionn 6 bliana d’aois agus faoi bhun 18 bliana d’aois, níor cheart aon tástáil a éileamh. Níor cheart leanaí faoi bhun 6 bliana d’aois atá ag taisteal in éineacht le duine fásta a bheith faoi réir ceanglais bhreise.

(14a)

D’fhéadfadh na Ballstáit taisteal neamhriachtanach a cheadú do dhaoine a bhfuil vacsaíniú COVID-19, a nglactar leis, fritásctha ina leith ag lucht leighis ar choinníoll an doiciméadacht is gá a bheith curtha isteach ag na daoine sin agus tástáil dhiúltach RT-PCR a bheith déanta acu roimh imeacht dóibh.

(15)

I bhfianaise an mhéadaithe atá ag teacht ar ghlacadh vacsaínithe ar fud an domhain, is iomchuí tosú ag féachaint ar dhul ar aghaidh de réir a chéile ón gcur chuige hibrideach tírbhunaithe/duinebhunaithe atá ann faoi láthair go cur chuige duinebhunaithe amháin agus deireadh le srianta taistil a bhunú ar stádas vacsaínithe na dtaistealaithe nó ar an bhfeidhm atá á comhlíonadh acu nó an riachtanas ar a bhfuil siad ag freastal. Mar sin féin, tá tríú tíortha fós ann faoi láthair ina bhfuil rochtain theoranta ar vacsaíní nó ráta vacsaínithe íseal. Dá bhrí sin, chun am a thabhairt do thríú tíortha a gcuid rátaí vacsaínithe a mhéadú, lena n-áirítear teanndáileoga a thabhairt chun bailíocht na ndeimhnithe vacsaínithe a áirithiú agus tar éis measúnú ginearálta a bheith déanta roimh ré ar an staid vacsaínithe i dtríú tíortha bunaithe ar shonraí a sholáthair Toscaireachtaí an Aontais, agus dreamanna eile, faoin 30 Aibreán 2022, ba cheart don Choimisiún athbhreithniú a dhéanamh ar an Moladh d’fhonn Iarscríbhinn I a scriosadh agus glacadh vacsaínithe atá ag dul i méid ar fud an domhain á chur san áireamh. Ba cheart don Choimisiún tuarascáil a chur faoi bhráid na Comhairle, agus togra a chur faoina bráid, de réir mar is iomchuí, chun Iarscríbhinn I a scriosadh.

(16)

I gcomhréir le hAirteagail 1 agus 2 de Phrótacal Uimh. 22 maidir le Seasamh na Danmhairge, Prótacal atá i gceangal leis an gConradh ar an Aontas Eorpach agus le CFAE, níl an Danmhairg rannpháirteach i nglacadh an Mholta seo ná níl sí faoi cheangal aige ná faoi réir a chur i bhfeidhm. Ós rud é go gcuireann an Moladh seo le acquis Schengen, ba cheart don Danmhairg a chinneadh, i gcomhréir le hAirteagal 4 den Phrótacal sin, laistigh de thréimhse 6 mhí tar éis don Chomhairle cinneadh a dhéanamh ar an Moladh seo, an gcuirfidh sí chun feidhme é.

(17)

Is é atá sa Mholadh seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Cinneadh 2002/192/CE ón gComhairle (9); dá bhrí sin, níl Éire rannpháirteach ina ghlacadh agus níl sí faoi cheangal aige ná faoi réir a chur i bhfeidhm.

(18)

Maidir leis an Íoslainn agus leis an Iorua, is é atá sa Mholadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá stát sin le acquis Schengen (10) a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE ón gComhairle (11).

(19)

Maidir leis an Eilvéis, is é atá sa Mholadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE (12), arna léamh i gcomhar le hAirteagal 3 de Chinneadh 2008/146/CE ón gComhairle (13).

(20)

Maidir le Lichtinstéin, is é atá sa Mholadh seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE (14) arna léamh i gcomhar le hAirteagal 3 de Chinneadh 2011/350/AE (15).

(21)

Tá stádas dlíthiúil an Mholta seo, mar a meabhraíodh é in aithrisí 15 go 19, gan dochar don ghá atá ann do na Ballstáit uile, ar mhaithe le feidhmiú cuí limistéar Schengen, cinneadh a dhéanamh deireadh a chur leis an srian ar thaisteal neamhriachtanacha isteach san Aontas ar bhealach comhordaithe,