(1)

Le Rialachán Tarmligthe (AE) 2017/86 ón gCoimisiún (2), bunaítear plean maidir le hábhar muirí aischurtha d’iascaigh ghrinnill áirithe sa Mheánmhuir a bhí infheidhme ón 1 Eanáir 2017 go dtí an 31 Nollaig 2019, tar éis trí mholadh chomhpháirteacha a bheith curtha faoi bhráid an Choimisiúin in 2016 ag roinnt Ballstát a bhfuil leas díreach bainistíochta acu san iascach sa Mheánmhuir (an Ghréig, an Spáinn, an Fhrainc, an Chróit, an Iodáil, an Chipir, Málta agus an tSlóivéin). Bhain na trí mholadh chomhpháirteacha sin leis an Meánmhuir Thiar, Muir Aidriad agus an Mheánmhuir Thoir Theas faoi seach.

(2)

Chun costais dhíréireacha a sheachaint a bhaineann le gabhálacha de thaisme a láimhseáil, bunaíodh le Rialachán Tarmligthe (AE) 2017/86 díolúine de minimis a bhfuil feidhm aici maidir le speicis ghrinnill. Rachaidh an Rialachán sin in éag an 31 Nollaig 2021.

(3)

Tá leas díreach bainistíochta iascaigh ag an gCróit, an Iodáil agus an tSlóivéin (“Grúpa Ardleibhéil Mhuir Aidriad”) agus ag an nGréig, an Iodáil, an Chipir agus Málta (“Grúpa Ardleibhéil Sudestmed”) i Muir Aidriad agus sa Mheánmhuir Thoir Theas faoi seach. An 7 agus an 14 Bealtaine 2021, chuir Grúpa Ardleibhéil Mhuir Aidriad agus Grúpa Ardleibhéil Sudestmed fianaise eolaíoch isteach chun síneadh leis an díolúine de minimis a leagtar síos i Rialachán Tarmligthe (AE) 2017/86 a iarraidh.

(4)

Leagtar amach na díolúintí de minimis do speicis pheiligeacha bheaga in iascaigh atá dírithe ar na speicis sin i Rialachán Tarmligthe (AE) 2018/161 ón gCoimisiún (3). Os a choinne sin, ba cheart díolúintí de minimis maidir le foghabhálacha speiceas peiligeach beag a dhéantar in iascaigh ghrinnill a áireamh sa Rialachán seo mar a iarrtar san fhianaise eolaíoch arna cur isteach ag na Grúpaí Ardleibhéil.

(5)

Rinne an Coiste Eolaíoch, Teicniúil agus Eacnamaíoch um Iascach (“STECF”) measúnú ar an bhfianaise eolaíoch idir an 17 agus an 21 Bealtaine 2021 (4). An 13 agus an 21 Iúil 2021, thíolaic Grúpa Ardleibhéil Mhuir Aidriad agus Grúpa Ardleibhéil Sudestmed faoi seach fianaise eolaíoch nuashonraithe a bhí i gcomhréir le comhairle eolaíoch STECF.

(6)

Tugann an Coimisiún dá aire go ngabhtar speicis éagsúla ag an am céanna, agus i gcainníochtaí an-éagsúil, i Muir Aidriad agus sa Mheánmhuir Thoir Theas, rud a fhágann gur dúshlánach é cur chuige stoic amháin a chur i bhfeidhm. Ina theannta sin, gabhann soithí iascaireachta mionscála na speicis sin agus tugtar i dtír iad ag go leor pointí difriúla thar raon leathan geografach ar feadh an chósta, agus is é an toradh atá air sin go bhfuil costais dhíréireacha ann maidir le gabhálacha de thaisme a láimhseáil.

(7)

Thug STECF dá aire go gcumhdaítear leis an gcur chuige de minimis comhcheangailte atá san áireamh san fhianaise eolaíoch a cuireadh ar fáil, go gcumhdaítear leis grúpa leathan speiceas le raon fairsing rátaí aischuir ach mheas STECF gur cur chuige bailí é cumhdach leathan den sórt sin i bhfianaise chastacht na n-iascach i Muir Aidriad agus sa Mheánmhuir Thoir Theas. Ina theannta sin, mheas STECF gur dhócha go mbeadh go leor díolúintí ar leith ann a bheadh chomh dúshlánach céanna faireachán a dhéanamh orthu mar thoradh ar dhíolúintí aonair de minimis lena gcumhdaítear aon speiceas amháin.

(8)

Chuir Grúpa Ardleibhéil Mhuir Aidriad fianaise eolaíoch nuashonraithe ar fáil maidir leis na costais dhíréireacha a bhaineann le gabhálacha de thaisme a láimhseáil. Cé gur thug STECF dá aire go gcuirtear meastacháin ar an méadú ar chostais ar fáil, leag sé béim ar na deacrachtaí atá ann leibhéal costas atá díréireach a mheas. Thug STECF dá aire go bhféadfaí tuilleadh a chur leis an bhfaisnéis a cuireadh ar fáil maidir le costais dhíréireacha agus gur cheart meastóireacht a dhéanamh ar thionchar na díolúine. Ina theannta sin, thug STECF dá aire gur cheart tosaíocht a thabhairt do laghdú ar leibhéal na ngabhálacha de thaisme trí threalamh roghnaitheach nó limistéir mhuirí faoi chosaint a úsáid. Is díol sásaimh don Choimisiún an gealltanas a thug Grúpa Ardleibhéil Mhuir Aidriad obair bhreise a dhéanamh ar roghnaíocht agus ar shrianta spásúla iascaigh mar thosaíocht chun laghdú ar ghabhálacha de thaisme a bhaint amach. Measann an Coimisiún gur cheart an díolúine a shíneadh leis na leibhéil chéatadáin atá beartaithe.

(9)

Beartaítear leis an bhfianaise eolaíoch nuashonraithe do Mhuir Aidriad an díolúine de minimis, maidir le hainseabhaí (Engraulis encrasicolus), sairdín (Sardina pilchardus), ronnach (Scomber spp.) agus bolmán (Trachurus spp.) a shíneadh suas le huasmhéid 5 % le haghaidh 2022 d’fhoghabhálacha bliantúla iomlána na speiceas sin a ghabhann soithí a úsáideann tráil ghrinnill (OTB, OTT, PTB, TBN, TBS, TB, OT, PT, TX). Mheas STECF go bhfuil an ráta aischuir an-suntasach i gcás an iascaigh sin, ach go bhfuil tionscadail roghnaíochta fós ar siúl. Measann an Coimisiún gur cheart an díolúine a shíneadh ar feadh 1 bhliana amháin, leis na leibhéil chéatadáin atá beartaithe. Ba cheart do Ghrúpa Ardleibhéil Mhuir Aidriad sonraí breise a chur isteach faoin 1 Bealtaine 2022, bunaithe ar na staidéir leanúnacha agus ar mheastóireacht ar thionchar na díolúine.

(10)

Chuir an Grúpa Ardleibhéil Sudestmed fianaise eolaíoch nuashonraithe ar fáil maidir le costais dhíréireacha a bhaineann le gabhálacha de thaisme a láimhseáil. Cé gur thug STECF dá aire go gcuirtear meastacháin ar an méadú ar chostais ar fáil, leag sé béim ar na deacrachtaí atá ann leibhéal costas atá díréireach a mheas. Thug STECF dá aire go bhféadfaí tuilleadh a chur leis an bhfaisnéis a cuireadh ar fáil maidir le costais dhíréireacha agus gur cheart meastóireacht a dhéanamh ar thionchar na díolúine. Ina theannta sin, thug STECF dá aire gur cheart tosaíocht a thabhairt do laghdú ar leibhéal na ngabhálacha de thaisme trí threalamh roghnaitheach nó limistéir mhuirí faoi chosaint a úsáid. Is díol sásaimh don Choimisiún an gealltanas a thug an Grúpa Ardleibhéil Sudestmed obair bhreise a dhéanamh ar roghnaíocht agus ar shrianta spásúla iascaigh mar thosaíocht chun laghdú ar ghabhálacha de thaisme a bhaint amach. Measann an Coimisiún gur cheart an díolúine a shíneadh leis na leibhéil chéatadáin atá beartaithe.

(11)

I bhfianaise an lín mhóir speiceas éagsúil a ghabhtar i gcomhthráth in oibríochtaí iascaireachta grinnill ina n-úsáidtear duáin, línte, eangacha geolbhaigh agus eangacha traimlí sa Mheánmhuir Thoir Theas, mhol an Grúpa Ardleibhéil Sudestmed de minimis difriúil le haghaidh roinnt speiceas a ngabhtar iad níos minice agus a mbeadh tairseach de minimis níos ísle chun tairbhe dóibh ná speicis nach ngabhtar chomh minic céanna. Ós rud é go bhfuil sé sin i gcomhréir le fírinne an iascaigh mheasctha sa Mheánmhuir Thoir Theas, measann an Coimisiún gur cheart an díolúine a thabhairt leis na leibhéil chéatadáin atá beartaithe.

(12)

Beartaítear leis an bhfianaise eolaíoch nuashonraithe don Mheánmhuir Thoir Theas an díolúine de minimis, maidir le hainseabhaí (Engraulis encrasicolus), sairdín (Sardina pilchardus), ronnach (Scomber spp.) agus bolmán (Trachurus spp.) a shíneadh suas go huasmhéid 5 % le haghaidh 2022 d’fhoghabhálacha bliantúla iomlána na speiceas sin a ghabhann soithí a úsáideann tráil ghrinnill (OTB, OTT, PTB, TBN, TBS, TB, OT, PT, TX). Mheas STECF go bhfuil an ráta aischuir an-suntasach i gcás an iascaigh sin, ach go bhfuil tionscadail roghnaíochta fós ar siúl. Measann an Coimisiún gur cheart an díolúine a shíneadh ar feadh 1 bhliana amháin, leis na leibhéil chéatadáin atá beartaithe. Ba cheart don Ghrúpa Ardleibhéil Sudestmed sonraí breise a chur isteach faoin 1 Bealtaine 2022, bunaithe ar na staidéir leanúnacha agus ar mheastóireacht ar thionchar na díolúine.

(13)

Rinne na Ballstáit ina bhfianaise eolaíoch nuashonraithe athnuachan ar a ngealltanas roghnaíocht an trealaimh iascaireachta a mhéadú i gcomhréir le torthaí na gclár taighde reatha chun gabhálacha de thaisme a laghdú agus a theorannú go háirithe i gcás gabhálacha faoi bhun íosmhéideanna tagartha caomhnaithe.

(14)

Ina theannta sin, geallann na Ballstáit ina bhfianaise eolaíoch nuashonraithe go ndéanfaidh siad limistéir choiscthe bhreise a shainaithint d’fhonn básmhaireacht i measc na n-óg a laghdú.

(15)

Tá na bearta a iarrtar i gcomhréir le hAirteagal 15(4), pointe (c).

(16)

Ós rud é go bhfuil tionchar díreach ag na bearta dá bhforáiltear sa Rialachán seo ar phleanáil an tséasúir iascaireachta le haghaidh shoithí an Aontais agus ar na gníomhaíochtaí eacnamaíocha a bhaineann leo, ba cheart go dtiocfadh an Rialachán seo i bhfeidhm láithreach tar éis a fhoilsithe. Chun críche deimhneachta dlíthiúla, ba cheart go mbeadh feidhm ag an Rialachán seo ón 1 Eanáir 2022,