(1)

Sa Teachtaireacht ón gCoimisiún an 29 Samhain 2017 dar teideal The Future of Food and Farming [Todhchaí an Bhia agus na Feirmeoireachta], leagtar amach na dúshláin, na cuspóirí agus na treochtaí a d'fhéadfadh a bheith ann don chomhbheartas talmhaíochta (CBT) tar éis 2020. Áirítear ar na cuspóirí sin, CBT a dhéanamh níos dírithe ar thorthaí a bhaint amach, borradh a chur faoin nuachóiriú agus faoin inbhuaine, lena n-áirítear inbhuaine eacnamaíoch, shóisialta agus aeráide na limistéar talmhaíochta, foraoiseachta agus tuaithe, agus cuidiú le laghdú a dhéanamh ar an ualach riaracháin sin a bhíonn ar thairbhithe mar thoradh ar reachtaíocht an Aontais.

(2)

Ós rud é gur gá faobhar a chur ar fhreagairt CBT ar na dúshláin agus ar na deiseanna de réir mar a thagann siad chun cinn ar leibhéal idirnáisiúnta, an Aontais, náisiúnta, réigiúnach, áitiúil, agus ar leibhéal na bhfeirmeacha, ní mór rialachas CBT a chuíchóiriú agus an chaoi a mbaintear cuspóirí an Aontais amach a fheabhsú agus an t-ualach riaracháin a laghdú go suntasach. Ba cheart CBT a bheith buanaithe ar fheidhmíocht (‘an tsamhail feidhmíochta’). Dá bhrí sin, ba cheart don Aontas na bunpharaiméadair bheartais a shocrú, amhail cuspóirí CBT agus na bunriachtanais, agus san am céanna, ba cheart freagracht níos mó a bheith ar na Ballstáit maidir leis an gcaoi a gcomhlíonfaidh siad na cuspóirí agus a mbainfidh siad spriocanna amach. Le coimhdeacht fheabhsaithe féadtar dálaí agus riachtanais áitiúla a chur san áireamh níos fearr mar aon le cineál sonrach na gníomhaíochta talmhaíochta, a eascraíonn as struchtúr sóisialta na talmhaíochta agus as difríochtaí struchtúracha agus nádúrtha idir na réigiúin éagsúla talmhaíochta, tríd an tacaíocht a oiriúnú chun an rannchuidiú le baint amach chuspóirí an Aontais a uasmhéadú.

(3)

Tá feidhm ag rialacha airgeadais cothrománacha arna nglacadh ag Parlaimint na hEorpa agus ag an gComhairle ar bhonn Airteagal 322 den Chonradh ar Fheidhmiú an Aontais Eorpaigh (‘CFAE’) maidir leis an Rialachán seo. Leagtar síos na rialacha sin i Rialachán (AE, Euratom) 2018/1046 ó Pharlaimint na hEorpa agus ón gComhairle (5) (‘an Rialachán Airgeadais’) agus is leis na rialacha sin a chinntear, go háirithe, an nós imeachta le haghaidh an buiséad a bhunú agus a chur chun feidhme trí dheontais, soláthar, duaiseanna agus cur chun feidhme indíreach, agus foráiltear iontu do sheiceálacha ar fhreagracht na ngníomhaithe airgeadais. I gcás rialacha arna nglacadh ar bhonn Airteagal 322 CFAE, áirítear iontu freisin córas ginearálta coinníollachta chun buiséad an Aontais a chosaint.

(4)

Chun comhleanúnachas CBT a áirithiú, ba cheart idirghabhálacha uile CBT na todhchaí a bheith ina gcuid de phlean straitéiseach, ar a n-áireofaí cineálacha idirghabhálaa in earnálacha áirithe dar foráladh le Rialachán (AE) Uimh. 1308/2013 ó Pharlaimint na hEorpa agus ón gComhairle (6).

(5)

Leagtar amach in Iarscríbhinn II a ghabhann le Rialachán (AE) Uimh. 1308/2013 sainmhínithe áirithe a bhaineann le hearnálacha a thagann faoi raon feidhme an Rialacháin sin. Na sainmhínithe a bhaineann leis an earnáil siúcra a leagtar amach i gCuid II, Roinn B den Iarscríbhinn sin, ba cheart iad a scriosadh aisti óir ní infheidhme iad a thuilleadh. Chun na sainmhínithe a bhaineann le hearnálacha eile dá dtagraítear san Iarscríbhinn sin a thabhairt cothrom le dáta, i bhfianaise eolas eolaíoch nua nó forbairtí nua ar an margadh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca le leasú na sainmhínithe sin, ach gan an chumhacht chun sainmhínithe nua a chur leo. Dá thoradh sin, an cumhachtú leithleach sin chun leasú a dhéanamh ar an sainmhíniú ar shíoróip ionúiline a tharmligtear chuig an gCoimisiún i gCuid II, Roinn A, pointe 4 den Iarscríbhinn sin, ba cheart é a scriosadh. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (7). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus beidh rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(6)

Ba cheart Cuid I de Rialachán (AE) Uimh. 1308/2013 a shimpliú. Sainmhínithe agus forálacha atá iomarcach nó dulta i léig, agus lena dtugtar an chumhacht don Choimisiún gníomhartha cur chun feidhme a ghlacadh, ba cheart iad a scriosadh.

(7)

I bhfianaise na taithí a fuarthas, ba cheart síneadh a chur le tréimhsí córas idirghabhála poiblí áirithe. I gcás ina mbeidh idirghabháil phoiblí ar oscailt go huathoibríoch, ba cheart síneadh míosa amháin a chur le ré an chórais idirghabhála poiblí. I gcás ina mbraitheann oscailt an idirghabhála poiblí ar fhorbairtí sa mhargadh, ba cheart tréimhse an chórais idirghabhála poiblí a bheith ar feadh na bliana ar fad.

(8)

Chun críche trédhearcacht a mhéadú, agus i gcomhthéacs ghealltanais idirnáisiúnta an Aontais, is iomchuí foráil a dhéanamh d’fhoilsiú na faisnéise ábhartha maidir le méideanna agus praghas maidir le ceannach agus díol na dtairgí i gcás ina gceannaítear táirgí isteach faoi idirghabháil phoiblí.

(9)

Léiríodh gur uirlis éifeachtach chun an margadh a chobhsú é cabhair a dheonú don stóráil phríobháideach d’ola olóige. I bhfianaise na taithí a fuarthas agus chun caighdeán maireachtála cothrom a áirithiú agus chun margadh na hola olóige agus na n-ológ boird a chobhsú, is iomchuí cur le liosta na dtáirgí atá incháilithe don chabhair le haghaidh stóráil phríobháideach chun ológa boird a chumhdach freisin.

(10)

Tar éis do Ríocht Aontaithe na Breataine Móire agus Thuaisceart Éireann tarraingt siar as an Aontas Eorpach, ba cheart uasdátú a dhéanamh ar na huasteorainneacha a leagtar amach in Airteagal 23a de Rialachán (AE) Uimh. 1308/2013 maidir le cabhair anAontais i dtaca le torthaí agus glasraí agus bainne agus táirgí bainne a sholáthar i bhforais oideachais. Is iomchuí, ar chúiseanna deimhneachta dlíthiúla, foráil a dhéanamh maidir le feidhm a bheith ag teorainneacha laghdaithe le héifeacht chúlghabhálach, ón 1 Eanáir 2021.

(11)

Forálacha a bhaineann le scéimeanna cabhrach a leagtar amach i gCuid II, Teideal I, Caibidil II, Ranna 2 go 6 de Rialachán (AE) Uimh. 1308/2013, ba cheart iad a scriosadh, ós rud é go ndéanfar gach cineál idirghabhála sna hearnálacha lena mbaineann a leagan amach i Rialachán (AE) 2021/2115 ó Pharlaimint na hEorpa agus ón gComhairle (8).

(12)

Ó 2016 i leith, a bhuí dá scéim údarúcháin atá ann cheana lena gceadaítear fás ordúil planduithe fíniúnacha, rannchuidigh beartas fíona an Aontais le hiomaíochas earnáil fíona an Aontais a mhéadú agus cuireadh le táirgeadh d’ardcháilíocht. Cé go bhfuil cothromaíocht bainte amach ag earnáil an fhíona idir soláthar táirgthe, cáilíocht, éileamh na dtomhaltóirí agus onnmhairí ar an margadh domhanda, níl an chothromaíocht sin seanbhunaithe ná cobhsaí go leor fós, go háirithe nuair a bhíonn ar earnáil an fhíona aghaidh a thabhairt ar shuaitheadh tromchúiseach sa mhargadh. Ina theannta sin, tá treocht ann i dtreo laghdú leanúnach ar thomhaltas fíona san Aontas de bharr athruithe ar nósanna agus ar stíl mhaireachtála na dtomhaltóirí. Mar thoradh air sin, san fhadtéarma, tá an baol ann gur bagairt a bheidh i léirscaoileadh planduithe fíniúnacha nua, ar an gcothromaíocht a baineadh amach go dtí seo idir acmhainneacht soláthar na hearnála, caighdeán cóir maireachtála do tháirgeoirí agus praghsanna réasúnta do thomhaltóirí. Tá an baol ann go gcuirfí forbairtí dearfacha a baineadh amach trí reachtaíocht agus trí bheartais an Aontais le blianta anuas a chur i gcontúirt.

(13)

Meastar go bhfuil scéim reatha na n-údaruithe i gcomhair planduithe fíniúnacha ríthábhachtach freisin chun éagsúlacht na bhfíon a áirithiú agus chun freagairt do shainiúlachtaí earnáil fíona an Aontais. Tá saintréithe sonracha ag earnáil fhíona an Aontais, lena n-áirítear timthriall fada na bhfíonghort, agus táirgeadh nach dtarlaíonn go dtí roinnt blianta tar éis plandáil ach a leanann ar aghaidh ansin ar feadh blianta fada agus bíonn an poitéinseal ann do luaineachtaí suntasacha i dtáirgeadh ó fhómhar amháin go dtí an chéad fhómhar eile. Murab ionann agus go leor tríú tíortha a tháirgeann fíon, bíonn líon ard d’fheirmeacha beaga teaghlach mar shaintréith ag earnáil fíona an Aontais freisin, agus bíonn raon éagsúil fíonta ann mar thoradh air sin. Chun inmharthanacht eacnamaíoch a dtionscadal a ráthú agus chun iomaíochas earnáil fíona an Aontais ar an margadh domhanda a fheabhsú, tá intuarthacht fhadtéarmach ag teastáil ó oibreoirí san earnáil agus ó tháirgeoirí, ós rud é go bhfuil infheistíocht shuntasach atá gá agus fíonghort á phlandáil.

(14)

Chun an méid a baineadh amach in earnáil fíona an Aontais go dtí seo a dhaingniú agus chun cothromaíocht fhadtréimhseach chainníochtúil agus cháilíochtúil a bhaint amach san earnáil trí fhás leanúnach ordúil planduithe fíniúnacha tar éis 2030, ba cheart síneadh a chur le scéim na n-údaruithe le haghaidh planduithe finiúnacha go dtí 2045, i.e. ar feadh tréimhse a bheidh coibhéiseach leis an tréimhse thosaigh a bhí ann ó 2016 i leith, ach le dhá athbhreithniú mheántéarma a dhéanfar in 2028 agus 2040, chun meastóireacht a dhéanamh ar an scéim agus, más gá, chun tograí a thíolacadh de bhun thorthaí na n-athbhreithnithe meántéarma chun iomaíochas na hearnála fíona a fheabhsú.

(15)

D’fhéadfadh go mbeadh tionchar dearfach aige ar an gcomhshaol dá dtabharfaí cead do thairgeoirí moill a chur ar athphlandú fíonghort agus feabhas a chur ar dálaí sláintíochta ithreach trí níos lú ceimiceáin a úsáid. Dá bhrí sin, chun rannchuidiú le bainistiú níos fearr ithreach i bhfíonsaothrú, is iomchuí cead a thabhairt síneadh a chur le bailíocht na n-údaruithe i gcomhair athphlanduithe ó 3 bliana go 6 bliana i gcás ina ndéantar an t-athphlandú ar an dáileacht talún chéanna.

(16)

Mar gheall ar an ngéarchéim atá in earnáil fíona an Aontais de dheasca phaindéim COVID-19, rinneadh foráil i Rialachán (AE) 2020/2220 ó Pharlaimint na hEorpa agus ón gComhairle (9) maidir le síneadh go dtí an 31 Nollaig 2021 a chur ar bhailíocht na n-údaruithe um plandú le haghaidh planduithe nua, nó le haghaidh athphlandaithe, a bhí le dul in éag in 2020. Mar gheall ar éifeachtaí fada na géarchéime atá ann de dheasca phaindéim COVID-19, na tairgeoirí fíniúna ag a bhfuil údaruithe i gcomhair planduithe nua nó i gcomhair athphlanduithe a rachaidh in éag sna blianta 2020nó 2021, bíonn cosc leanúnach orthu den chuid is mó, ar úsáid a bhaint as na húdaruithe sin le linn na bliana deiridh dá mbailíocht. Chun nach gcaillfear na húdaruithe sin agus chun an baol a laghdú go dtiocfadh meath ar na dálaí faoina gcaithfí an plandú a dhéanamh, is iomchuí bailíocht na n-údaruithe i gcomhair planduithe do phlanduithe nua, nó d’athphlanduithe a bhí le dul in éag in 2020, a shíniú tuilleadh agus na húdaruithe sin a rachaidh in éag in 2021 a fhadú. Ba cheart, dá bhrí sin, na húdaruithe i gcomhair planduithe uile do phlanduithe nua, nó d’athphlanduithe, a bhí le dul in éag in 2020 agus 2021 a shíniú go dtí an 31 Nollaig 2022.

(17)

Chomh maith leis sin, agus athruithe ó thaobh an mhargaidh de á gcur san áireamh, ba cheart sealbhóirí údaruithe i gcomhair planduithe a rachaidh in éag in 2020 agus 2021 a bheith in ann gan a n-údaruithe a úsáid gan a bheith faoi réir pionós riaracháin. Ina theannta sin, chun aon idirdhealú a sheachaint, i gcás na dtáirgeoirí a chuir in iúl don údarás inniúil faoin 28 Feabhra 2021, i gcomhréir le Rialachán (AE) 2020/2220, nach raibh sé de rún acu úsáid a bhaint as a n-údarú agus gan fios acu go bhféadfaí bailíocht a n-údaruithe a fhadú don dara bliain, ba cheart cead a thabhairt dóibh an dearbhú sin a tharraingt siar trí theachtaireacht i scríbhinn chuig an údarás inniúil faoin 28 Feabhra 2022 agus úsáid a bhaint as a n-údarú go dtí an 31 Nollaig 2022.

(18)

Mar gheall ar shuaití sa mhargadh de dheasca phaindéim COVID-19 agus an éiginnteacht eacnamaíoch a d'eascair as paindéim COVID-19 a mhéid a bhaineann leis na húdaruithe sin a úsáid, ón 1 Eanáir 2021, ba cheart feidhm chúlghabhálach a bheith ag na forálacha i Rialachán (AE) Uimh. 1308/2013 maidir le húdaruithe i gcomhair planduithe nua nó i gcomhair athphlanduithe a rachaidh in éag in 2020 agus 2021..

(19)

I bhfianaise an laghdaithe a tháinig i roinnt Ballstát sna blianta 2014–2017 ar an achar a bhí faoi fhíniúnacha, agus i bhfianaise an chaillteanais táirgeachta a d'fhéadfadh teacht dá dheasca sin, ba cheart na Ballstáit a bheith in ann, agus an t-achar maidir le húdaruithe i gcomhair planduithe as an nua dá dtagraítear in Airteagal 63(1) de Rialachán (AE) Uimh. 1308/2013 á bhunú, rogha a dhéanamh idir an bonn atá ann faoi láthair agus céatadán den achar iomlán iarbhír a bhí faoi fhíniúnacha ar a gcríoch an 31 Iúil 2015 arna mhéadú le hachar talún arna shocrú de réir na gceart um plandú a ghabhann le Rialachán (CE) Uimh. 1234/2007 ón gComhairle (10) agus a bhí ar fáil an 1 Eanáir 2016 lena dtiontú ina n-údaruithe sa Bhallstát lena mbaineann.

(20)

Maidir le Ballstáit a chuireann teorainn le húdaruithe ar an leibhéal réigiúnach, i gcás limistéir áirithe atá incháilithe le haghaidh táirgeadh fíonta lena ngabhann sonrúchán tionscnaimh faoi chosaint nó i gcás limistéir atá incháilithe le haghaidh táirgeadh fíonta lena ngabhann tásc geografach faoi chosaint, ba cheart a shoiléiriú go bhféadfaidh siad a cheangal go n-úsáidfear na húdaruithe sin sna réigiúin sin.

(21)

Ba cheart a shoiléiriú gur féidir le Ballstáit, chun críche údaruithe i gcomhair planduithe fíniúnacha a dheonú, critéir incháilitheachta agus tosaíochta atá oibiachtúil agus neamh-idirdhealaitheach a chur i bhfeidhm ar an leibhéal náisiúnta nó ar an leibhéal réigiúnach. Ina theannta sin, léiríonn taithí na mBallstát gur gá athbhreithniú a dhéanamh ar roinnt de na critéir thosaíochta chun tús áite a thabhairt d’fhíonghoirt lena rannchuidítear le caomhnú acmhainní géiniteacha fíniúna agus do ghabháltais ina léirítear méadú ar chostéifeachtúlacht, iomaíochas nó ar láithreacht sna margaí.

(22)

Chun a áirithiú nach ndeonófar aon bhuntáiste i bhfabhar duine nádúrtha nó dhlítheanaigh a bhfuil sé suite ina leith gur go saorga a cruthaíodh na dálaí is gá chun na buntáistí sin a fháil, is iomchuí a shoiléiriú gur cheart an deis a bheith ag na Ballstáit bearta a ghlacadh chun nach féidir dul timpeall ar rialacha maidir leis an sásra coimirce i gcomhair planduithe nua agus maidir leis na critéir incháilitheachta agus thosaíochta chun údaruithe a dheonú i gcomhair planduithe nua.

(23)

An 31 Nollaig 2022, tiocfaidh deireadh leis an spriocdháta is déanaí chun iarrataí a chur isteach ar chearta um plandú a thiontú ina n-údaruithe. I gcásanna áirithe, d’fhéadfadh sé go raibh sé d'éifeacht ag cúinsí amhail an ghéarchéim eacnamaíoch a tharla mar thoradh ar phaindéim COVID -19 teorainn a chur le cearta plandaithe a thiontú ina n-údaruithe planduithe. Ar an gcúis sin, agus chun go bhféadfaidh le Ballstáit an acmhainneacht táirgthe a fhreagraíonn do na cearta i gcomhair plandú sin a chaomhnú, is iomchuí ón 1 Eanáir 2023, go bhfanfaidh cearta i gcomhair planduithe a bhí fós incháilithe le haghaidh cearta plandaithe a thiontú ina n-údaruithe planduithe an 31 Nollaig 2022 agus nár tiontaíodh fós ina n-údaruithe i gcomhair planduithe, ar fáil do na Ballstáit lena mbaineann a fhéadfaidh iad a dheonú faoin 31 Nollaig 2025 ar a dhéanaí mar údaruithe i gcomhair planduithe fíniúnacha nua, gan na húdaráis sin a áireamh chun críocha na dteorainneacha a leagtar síos in Airteagal 63 de Rialachán (AE) 1308/2013.

(24)

I roinnt Ballstát, tá fíonghoirt thraidisiúnta ann atá plandaithe le cineálacha nach bhfuil ceadaithe chun críocha fíon a tháirgeadh, lena n-áirítear táirgeadh chun críocha deochanna coipthe fíonchaor a tháirgeadh seachas fíon, nach bhfuil beartaithe do mhargadh an fhíona. Is iomchuí a shoiléiriú nach bhfuil na fíonghoirt sin faoi réir oibleagáidí grafa agus nach bhfuil feidhm ag scéim na n-údaruithe i gcomhair planduithe fíniúnacha a leagtar amach sa Rialachán seo maidir le cineálacha den sórt sin a phlandú agus a athphlandú chun críocha eile seachas táirgeadh fíona.

(25)

In Airteagal 90 de Rialachán (AE) Uimh 1308/2013, leagtar síos, mura bhforáiltear a mhalairt i gcomhaontuithe idirnáisiúnta arna dtabhairt i gcrích i gcomhréir le CFAE, go bhfuil feidhm le bheith ag rialacha an Aontais i dtaobh sonrúcháin tionscnaimh, tásca geografacha, lipéadú, sainmhínithe, sonrúcháin agus tuairiscí díolacháin de tháirgí áirithe ó earnáil an fhíona mar aon leis na cleachtais fhíoneolaíocha a d’údaraigh an tAontas, maidir leis na táirgí a allmhairítear isteach san Aontas.. Dá bhrí sin, ar mhaithe le comhsheasmhacht, is iomchuí a fhoráil gur cheart na rialacha maidir le teastais chomhlíonta agus tuarascálacha anailíse le haghaidh allmhairiú na dtáirgí sin a chur i bhfeidhm freisin i bhfianaise na gcomhaontuithe idirnáisiúnta tugtha i gcrích i gcomhréir le CFAE.

(26)

Faoi chuimsiú athchóiriú CBT, ba cheart na forálacha a bhaineann le tarraingt siar na dtáirgí nach gcomhlíonann na rialacha lipéadaithe ón margadh a chomhtháthú i Rialachán (AE) Uimh 1308/2013. I bhfianaise an mhéadaithe atá ag teacht ar an éileamh ó thomhaltóirí ar rialú táirgí, ba cheart do na Ballstáit bearta a dhéanamh chun a áirithiú nach gcuirfear ar an margadh táirgí nach bhfuil lipéadaithe i gcomhréir leis an rialachán sin, nó i gcás inar cuireadh ar an margadh táirgí den sórt sin cheana féin, go dtarraingeofar siar ón margadh iad. Mar chuid den tarraingt siar, áirítear an fhéidearthacht lipéadú na dtáirgí a cheartú gan iad a bhaint ón margadh go cinntitheach.

(27)

I bhfianaise aisghairm Rialachán (AE) Uimh. 1306/2013 ó Pharlaimint na hEorpa agus ón gComhairle (11) le Rialachán (AE) 2021/2116 ó Pharlaimint na hEorpa agus ón gComhairle (12), ba cheart a chomhtháthú, i Rialachán (AE) Uimh. 1308/2013, na forálacha a bhaineann le seiceálacha agus pionóis i dtaca le rialacha margaíochta, agus sonrúcháin tionscnaimh faoi chosaint, tásca geografacha agus téarmaí traidisiúnta.

(28)

Chun é a chur ar chumas do tháirgeoirí cineálacha fíniúna a úsáid atá níos oiriúnaí do na hathruithe ar dhálaí aeráide agus ar mó a bhfriotaíocht in aghaidh galair, ba cheart foráil a dhéanamh chun go gceadófaí táirgí a dhéanamh do tháirgí a dhéantar as sonrúcháin tionscnaimh de na cineálacha fíniúna a bhaineann le Vitis vinifera agus as sonrúcháin tionscnaimh de bhunús crosála Vitis vinifera le speicis eile den ghéineas Vitis.

(29)

Ba cheart na sainmhínithe ar ‘shonrúchán tionscnaimh’ agus ar ‘thásc geografach’ i Rialachán (AE) Uimh. 1308/2013 a bheith i gcomhréir leis na sainmhínithe sa Chomhaontú maidir le Gnéithe de Chearta Maoine Intleachtúla a bhaineann le Trádáil ('Comhaontú TRIPS'), arna fhormheas le Cinneadh 94/800/CE ón gComhairle (13), agus go háirithe ba cheart é a bheith i gcomhréir le hAirteagal 22(1) de Chomhaontú TRIPS, is é sin é go sainaithnítear le tásca geografacha áit shonrach, réigiún sonrach nó ar tír sonrach inar tionscnaíodh an táirge. Ar mhaithe le soiléireacht, is iomchuí a leagan síos go sainráite go n-áirítear ainmneacha a úsáidtear go traidisiúnta sa sainmhíniú nua sin ar shonrúchán tionscnaimh. Mar thoradh air sin, imíonn liosta na gceanglas maidir le hainm a úsáidtear chun sonrúchán tionscnaimh in earnáil an fhíona a leagtar amach i Rialachán (AE) Uimh. 1308/2013 as feidhm agus ba cheart é a scriosadh. Ar chúiseanna comhsheasmhachta, ba cheart soiléiriú den sórt sin a thabhairt isteach sa sainmhíniú ar thásc geografach d'earnáil an fhíona a leagtar síos i Rialachán (AE) Uimh. 1308/2013 agus sna sainmhínithe ar ‘shonrúchán tionscnaimh’ agus ar thásca geografacha d'earnáil an bhia a leagtar síos i Rialachán (AE) Uimh. 1151/2012 ó Pharlaimint na hEorpa agus ón gComhairle (14).

(30)

Is cuid ríthábhachtach í an timpeallacht gheografach lena gnéithe nádúrtha agus daonna, lena ndéantar difear do cháilíocht agus do shaintréithe táirgí fíniúna, táirgí talmhaíochta agus bia-earraí a bhaineann tairbhe as sonrúcháin tionscnaimh faoi chosaint nó tásca geografacha faoi chosaint de bhun Rialacháin (AE) Uimh. 1308/2013 agus (AE) Uimh. 1151/2012. Go háirithe, i gcás táirgí úra nach ndéantar mórán próiseála orthu nó nach ndéantar aon phróiseáil orthu, d'fhéadfaí tionchar níos mó a bheith ag gnéithe nádúrtha agus cáilíocht agus saintréithe an táirge lena mbaineann á gcinneadh, agus d'fhéadfadh sé nach mbeadh rannchuidiú na ngnéithe daonna i gcáilíocht agus saintréithe an táirge chomh sonrach céanna. Dá bhrí sin, maidir leis na gnéithe daonna ba cheart a chur san áireamh sa tuairisc ar an nasc idir cáilíocht nó saintréithe táirge agus timpeallacht áirithe gheografach atá le cur san áireamh sa tsonraíocht táirge ar shonrúcháin tionscnaimh faoi chosaint de bhun Airteagal 94 de Rialachán (AE) Uimh. 1308/2013 agus Airteagal 7 de Rialachán (AE) Uimh. 1151/2012, níor cheart iad a theorannú do mhodhanna sonracha táirgthe nó próiseála, lena dtugtar cáilíocht shonrach don táirge lena mbaineann, ach is féidir a chun san áireamh leis na gnéithe daonna bainistiú ithreach agus tírdhreach, cleachtais saothraithe agus aon ghníomhaíochtaí daonna eile a rannchuidíonn le cothabháil na ngnéithe dúchasacha nádúrtha fíor-riachtanacha sin a chinneann den chuid is mó an timpeallacht gheografach agus cáilíocht agus saintréithe an táirge lena mbaineann.

(31)

Chun comhleanúnachas a áirithiú sa chinnteoireacht a dhéantar a mhéid a bhaineann le hiarrataí ar chosaint agus le hagóidí a chuirtear isteach le linn an réamh-nós imeachta náisiúnta dá dtagraítear in Airteagal 96 de Rialachán (AE) Uimh. 1308/2013 agus in Airteagal 49 de Rialachán (AE) Uimh. 1151/2012, ba cheart an Coimisiún a chur ar an eolas, ar mhodh rialta tráthúil, faoi lainseáil nósanna imeachta os comhair cúirteanna náisiúnta nó comhlachtaí eile, nuair is nósanna imeachta iad a bhaineann le hiarratais ar chosaint arna gcur ag an mBallstát chuig an gCoimisiún, dá dtagraítear in Airteagal 96(5) de Rialachán (AE) Uimh. 1308/2013 agus in Airteagal 49(4) de Rialachán (AE) Uimh. 1151/2012. Ar an gcúis chéanna, i gcás ina gcuireann Ballstát in iúl don Choimisiún ar dócha go neamhbhaileofar an cinneadh náisiúnta ar a bhfuil an t-iarratas ar chosaint bunaithe ag deireadh imeachta breithiúnaigh náisiúnta, ba cheart an Coimisiún a dhíolmhú ón oibleagáid an nós imeachta grinnscrúdaithe a leagtar amach in Airteagal 97 de Rialachán (AE) Uimh 1308/2013 agus in Airteagal 50 de Rialachán (AE) Uimh 1151/2012 a dhéanamh laistigh den spriocdháta atá leagtha síos maidir le hiarratas ar chosaint agus ón oibleagáid an t-iarratasóir a chur ar an eolas faoi chúiseanna na moille. Chun an t-iarratais a chosaint ar ghníomhaíochtaí dlíthiúla cráiteacha agus chun ceart bunúsach an iarrthóra a chaomhnú chun cosaint an táisc gheografaigh a fháil laistigh de thréimhse réasúnta, ba cheart an díolúine a theorannú do chásanna ina ndearnadh an t-iarratais ar chosaint a neamhbhailíochtú ar an leibhéal náisiúnta trí chinneadh breithiúnach atá infheidhme láithreach ach nach bhfuil críochnaitheach, nó ina measann na Ballstáit go bhfuil an ghníomhaíocht chun bailíocht an iarratais a cheistiú bunaithe ar fhorais bhailí.

(32)

Ba cheart clárú na dtásc geografach a shimpliú agus a luathú trí dhealú a dhéanamh idir an measúnú a dhéantar maidir le comhlíonadh na rialacha um maoin intleachtúil agus an measúnú a dhéantar maidir leis na ceanglais a leagtar síos sna caighdeáin margaíochta agus sna rialacha lipéadaithe a bheith á gcomhlíonadh ag sonraíochtaí an táirge.

(33)

Céim fíor-riachtanach sa nós imeachta clárúcháin is ea an próiséas measúnuithe a dhéanann údaráis inniúla na mBallstát. A bhuí leis an eolas agus leis an saineolas atá ag na Ballstáit chomh maith leis an rochtain atá acu ar shonraí, is iad na Ballstáit is fearr a bheidh in ann a fhíorú, an bhfuil an fhaisnéis a thugtar san iarratas cruinn agus fírinneach. Dá bhrí sin, ba cheart do na Ballstáit a áirithiú gur beacht agus gurb iontaofa toradh an mheasúnaithe sin, toradh a ndéanfar taifead dílis air i ndoiciméad aonair ina mbeidh cur síos achomair ar eilimintí ábhartha shonraíocht an táirge. Ba cheart don Choimisiún, ag féachaint do phrionsabal na coimhdeachta, scrúdú a dhéanamh ina dhiaidh sin ar na hiarratais lena áirithiú nach mbeidh aon earráidí follasacha iontu, chun a áirithiú, go háirithe, go bhfuil an fhaisnéis riachtanach iontu, go bhfuil siad saor ó earráidí follasacha substainteacha, go dtacaíonn an réasúnú a chuirtear i láthair leis an iarratas, agus go gcuirtear san áireamh dlí an Aontais agus leasanna geallsealbhóirí lasmuigh de Bhallstát an iarratais agus lasmuigh den Aontas.

(34)

In earnáil an fhíona, an tréimhse ama ar féidir agóid a dhéanamh lena linn, ba cheart síneadh a chur léi, go 3 mhí, chun a áirithiú go mbeidh a ndóthain ama ag na páirtithe leasmhara uile le hanailís a dhéanamh ar an iarratas ar chosaint agus go bhféadfaidh siad ráiteas agóide a chur isteach. Chun a áirithiú gurb é nós imeachta amháin a leanfar i gcás agóidí a dhéanfar faoi Rialacháin (AE) Uimh. 1308/2013 agus (AE) Uimh. 1151/2012 agus chun é a chur ar chumas na mBallstát, i dtaca le hagóidí ó dhaoine nádúrtha nó dlítheanacha a mbeidh cónaí orthu nó a bheidh bunaithe laistigh dá gcríocha, na hagóidí sin a chur ar aghaidh chuig an gCoimisiún ar mhodh comhordaithe éifeachtúil, ba cheart gach agóid ó dhaoine dlítheanacha nó nádúrtha a chur isteach trí údaráis an Bhallstáit ina mbeidh cónaí orthu nó ina mbeidh siad bunaithe. Ar mhaithe le simpliú a dhéanamh ar an nós imeachta agóide, ba cheart an chumhacht a thabhairt don Coimisiún chun ráitis agóide neamh-inghlactha a dhiúltú leis na ngníomh cur chun feidhme lena dtugtar an chosaint ar an sonrúchán tionscnaimh nó ar an tásc geografach lena mbaineann.

(35)

Chun éifeachtúlacht an nós imeachta a mhéadú agus chun coinníollacha aonfhoirmeacha a áirithiú i dtaca le cosaint a thabhairt do shonrúcháin tionscnaimh nó do thásca geografacha, ba cheart cumhachtaí cur chun feidhme a thabhairt don Choimisiún a ligfeadh dó gníomhartha cur chun feidhme a ghlacadh lena dtugtar cosaint den sórt sin in earnáil an fhíona, gan dul in iontaoibh an nós imeachta scrúdúcháin, i gcás nach mbeadh aon ráiteas inghlactha agóide curtha isteach in aghaidh an iarratais ar chosaint. I gcásanna ina gcuirfí isteach ráiteas inghlactha agóide, ba cheart cumhachtaí cur chun feidhme a thabhairt don Choimisiún a ligfeadh dó gníomhartha cur chun feidhme a ghlacadh, lena dtabharfaí cosaint nó lena ndiúltófaí an t-iarratas ar chosaint, i gcomhréir leis an nós imeachta scrúdúcháin.

(36)

Ba cheart an gaol idir trádmharcanna agus tásca geografacha táirgí fíniúna a shoiléiriú i ndáil leis na critéir maidir le diúltú, neamhbhailíochtú agus cómhaireachtáil. Le soiléiriú den sórt sin, níor cheart difear a dhéanamh do chearta arna bhfáil ag sealbhóirí tásc geografach ar an leibhéal náisiúnta nó do chearta arb ann dóibh de bhua comhaontuithe idirnáisiúnta arna gcur i gcrích ag Ballstáit le haghaidh na tréimhse roimh bhunú chóras cosanta an Aontais i gcomhair táirgí fíniúna.

(37)

Is gné thábhachtach den scéim le cosaint a thabhairt do shonrúcháin tionscnaimh nó do thásca geografacha in earnáil an fhíona a leagtar síos faoi láthair i Rialachán Tarmligthe (AE) 2019/33 ón gCoimisiún (15) iad na rialacha a bhaineann leis an nós imeachta náisiúnta, an nós imeachta agóide, aicmiú na leasuithe idir leasuithe an Aontais agus leasuithe caighdeánacha, lena n-áirítear na príomhrialacha lena nglacadh, agus rialacha maidir le lipéadú sealadach agus cur i láthair sealadach. Ar chúiseanna comhsheasmhachta le Rialachán (AE) Uimh. 1151/2012 agus Rialachán (AE) 2019/787 ó Pharlaimint na hEorpa agus ón gComhairle (16), agus chun gur fusa an cur i bhfeidhm, ba cheart na forálacha sin a chomhtháthú i Rialachán (AE) Uimh. 1308/2013.

(38)

I ndáil le tásca geografacha a chosaint, tá sé tábhachtach aird chuí a thabhairt ar an gComhaontú Ginearálta um Tharaifí agus Trádáil lena n-áirítear Airteagal V de maidir le saoirse idirthurais, a formheasadh le Cinneadh 94/800/CE. Laistigh den chreat dlíthiúil sin, chun cosaint tásc geografach a neartú agus chun góchumadh a chomhrac ar bhealach níos éifeachtaí, ba cheart feidhm a bheith ag an gcosaint ar ainmniúcháin tionscnaimh agus ar thásca geografacha maidir le hearraí a thiocfaidh isteach i gcríoch chustaim an Aontais gan iad a scaoileadh i saorchúrsaíocht, agus a chuirtear faoi nósanna imeachta speisialta custaim, amhail na nósanna imeachta a bhaineann le hidirthuras, stóráil, úsáid shonrach nó próiseáil. Dá bhrí sin, ba cheart an chosaint a thugtar le hAirteagal 103(2) de Rialachán (AE) Uimh. 1308/2013 agus Airteagal 13(1) de Rialachán (AE) Uimh. 1151/2012 a leathnú chun earraí atá ar idirthuras i gcríoch chustaim an Aontais a chumhdach agusan chosaint a thugtar le hAirteagal 103(2) de Rialachán (AE) 1308/2013 agus le hAirteagal 13(1) agus Airteagal 24 de Rialachán (AE) Uimh. 1151/2012 do shonrúcháin tionscnaimh, tásca geografacha agus sainearraí traidisiúnta faoi ráthaíocht a leathnú chun earraí a dhíoltar ar an idirlíon nó trí mhodhanna eile tráchtála leictreonaí a chumhdach. Ina theannta sin, ba cheart sonrúcháin tionscnaimh agus tásca geografacha in earnáil an fhíona a chosaint ar aon úsáid tráchtála dhíreach nó indíreach i gcás ina dtagraíonn siad do tháirgí a úsáidtear mar chomhábhar. Ba cheart cosaint a thabhairt freisin do shonrúcháin tionscnaimh agus tásca geografacha in earnáil an fhíona agus do shainearraí traidisiúnta faoi ráthaíocht i gcoinne mí-úsáide, aithrise, agus tabhairt chun cuimhne, i gcás ina n-úsáidtear iad do tháirgí a úsáidtear mar chomhábhair.

(39)

Ba cheart é a bheith indéanta an chosaint a bheadh ag sonrúchán tionscnaimh nó ag tásc geografach a chur ar ceal, i gcúinsí nach mbeadh sé in úsáid ní ba mhó nó i gcúinsí nár mhian leis an iarrthóir dá dtagraítear in Airteagal 95 de Rialachán (AE) Uimh. 1308/2013 an chosaint sin a choinneáil i bhfeidhm ní ba mhó.

(40)

I bhfianaise an tsíormhéadaithe atá ag teacht ar an éileamh ó thomhaltóirí ar tháirgí nuálacha fíniúna ar lú a neart alcóil iarbhír ná an neart alcóil iarbhír íosta a leagtar amach le haghaidh táirgí fíniúna in Iarscríbhinn VII, Cuid II a ghabhann le Rialachán (AE) Uimh. 1308/2013, ba cheart é a bheith indéanta a leithéidí sin de tháirgí nuálacha fíniúna a tháirgeadh san Aontas freisin. Chun na críche sin, is gá coinníollacha a leagan síos faoina bhféadfar táirgí áirithe fíniúna a dhí-alcólú nó a dhí-alcólú go páirteach agus na próisis údaraithe dá ndí-alcólú a bhunú. Ba cheart a chur san áireamh sna coinníollacha sin na Rúin ón Eagraíocht Idirnáisiúnta um Fhíniúin agus um Fhíon (OIV), OIV-ECO 432-2012 Beverage Obtained By Dealcoholisation of Wine [deochanna ó dhí-alcólú fíona] agus OIV-ECO 433-2012 Beverage Obtained By Partial Dealcoholisation of Wine [deochanna ó pháirt-dhí-alcólú fíona] agus OIV-ECO 523-2016 Wine With An Alcohol Content Modified by Dealcoholisation [fíon a ndearnadh a chion alcól a mhodhnú trí dhí-alcólú] agus OIV-OENO 394A-2012 Dealcoholisation of Wines [dí-alcólú fíonta].

(41)

Níor cuireadh na táirgí nuálacha fíniúna sin ar an margadh san Aontas riamh mar fhíon. Ar an gcúis sin, bheadh gá le tuilleadh taighde agus turgnamh chun cáilíocht na dtáirgí sin a fheabhsú agus, go háirithe, chun a áirithiú go mbeifear in ann saintréithe éagsúlaithe na bhfíonta cáilíochta faoi chosaint ag tásc geografach nó ag sonrúchán tionscnaimh a chaomhnú i ndiaidh cion alcóil a bhaint ina iomláine. Dá bhrí sin, cé gur cheart páirt-dhí-alcólú agus dí-alcólú iomlán araon a údarú i gcás fíonta gan tásc geografach nó sonrúchán tionscnaimh, níor cheart ach páirt-dhí-alcólú a údarú i gcás fíonta a bhfuil tásc geografach faoi chosaint nó sonrúchán tionscnaimh faoi chosaint ag gabháil leo. Ina theannta sin, chun soiléireacht agus trédhearcacht a áirithiú do tháirgeoirí agus do thomhaltóirí fíonta a bhfuil tásc geografach nó sonrúchán tionscnaimh acu araon, is iomchuí a fhoráil, i gcás fíonta a bhfuil tásc geografach nó sonrúchán tionscnaimh acu a d’fhéadfadh a bheith páirt-dhí-alcólaithe, gur cheart tuairisc ar an bhfíon páirt-dhí-alcólaithe a bheith sa tsonraíocht táirge agus, i gcás inarb infheidhme, tuairisc ar na cleachtais fhíoneolaíocha shonracha atá le húsáid chun fíon nó fíonta páirtdhíalcólaithe, chomh maith leis na srianta ábhartha chun iad a dhéanamh.

(42)

Chun leibhéal níos airde faisnéise a chur ar fáil do thomhaltóirí, ba cheart a áireamh na sonraí éigeantacha faoi Airteagal 119 de Rialachán (AE) Uimh. 1308/2013 dearbhú cothúcháin agus liosta na gcomhábhar. Mar sin féin, ba cheart an rogha a bheith ag táirgeoirí maidir le hábhar an dearbhaithe cothúcháin ar an bpacáistíocht nó ar lipéad atá ceangailte di a theorannú don luach fuinnimh amháin, agus liosta iomlán na gcomhábhar a chur ar fáil go leictreonach ar an gcoinníoll nach ndéantar aon sonraí úsáideoirí a bhailiú nó a rianú ná faisnéis chun críoch margaíochta a sholáthar. Mar sin féin, níor cheart an rogha gan an dearbhú iomlán cothúcháin a chur ar an bpacáistíocht nó ar lipéad atá ceangailte di difear a dhéanamh don cheanglas atá ann faoi láthair substaintí is cúis le hailléirgí nó éadulaingtí a liostú ar an lipéad. In Airteagal 122 de Rialachán (AE) Uimh. 1308/2013, ba cheart an chumhacht chun gníomhartha tarmligthe a ghlacadh i gcomhréir le hAirteagal 290 CFAE a thabhairt don Choimisiún i ndáil le Rialachán (AE) Uimh. 1308/2013 a fhorlíonadh trí rialacha chun na comhábhair a shonrú agus a ainmniú. Ba cheart an deis a bheith ann leanúint de mhargú na stoc fíona atá ann cheana tar éis dhátaí chur i bhfeidhm na gceanglas nua lipéadaithe, go dtí go mbeidh na stoic sin ídithe. Ba cheart dóthain ama a thabhairt d'oibreoirí dul in oiriúint do na ceanglais lipéadaithe nua sula dtiocfaidh siad i bhfeidhm.

(43)

Chun a áirithiú go gcuirfear tomhaltóirí ar an eolas maidir le cineál na dtáirgí fíona dí-alcólaithe agus go mbeidh feidhm ag na rialacha lena rialaítear lipéadú agus cur i láthair táirgí in earnáil an fhíona maidir le táirgí fíniúna dí-alcólaithe nó páirt-dhí-alcólaithe freisin, ba cheart Airteagal 119 de Rialachán (AE) Uimh. 1308/2013 a leasú. Mar sin féin, chun an leibhéal reatha faisnéise maidir le híosmharthanacht a cheanglaítear i gcás deochanna ina bhfuil níos lú ná 10 % alcóil de réir toirte alcóil faoi Rialachán (AE) Uimh. 1169/2011 ó Pharlaimint na hEorpa agus ón gComhairle (17), is iomchuí a cheangal ar tháirgí ar a ndearnadh cóireáil dí-alcólúcháin agus ina bhfuil neart alcóil iarbhír de réir toirte ar lú ná 10 % tásc, maidir le dáta na híosmharthanachta, a áireamh mar shonraí éigeantacha.

(44)

Ina theannta sin, Iarscríbhinn I, Cuid XII, a ghabhann le Rialachán (AE) Uimh. 1308/2013, ina liostaítear na táirgí a chumhdaítear faoi earnáil an fhíona, cumhdaítear faoi láthair fíonta páirt-dhí-alcólaithe ina bhfuil cion alcóil de réir toirte os cionn 0,5%. Chun a áirithiú go gcumhdaítear in earnáil an fhíona gach fíon dí-alcólaithe, lena n-áirítear na fíonta sin ina bhfuil cion alcóil 0,5% nó níos lú, agus an méid sin san áireamh, is iomchuí Iarscríbhinn I, Cuid XII, a ghabhann le Rialachán (AE) Uimh. 1308/2013 a leasú trí iontráil nua a chur léi.

(45)

Maidir le rialacha a bhaineann le coinníollacha ar úsáid stopalláin in earnáil an fhíona chun a áirithiú go mbeidh cosaint ag na tomhaltóirí ar an úsáid mhíthreorach a bheith á baint as stopalláin áirithe a bhaineann le deochanna áirithe agus chun a áirithiú go mbeidh cosaint ag tomhaltóirí ar ábhair ghuaiseacha stopalláin a d’fhéadfadh na deochanna a éilliú, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr. Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(46)

Chuaigh na rialacha agus na ceanglais a bhaineann le córas na gcuótaí siúcra in éag ag deireadh na bliana margaíochta 2016/2017. Tá Airteagal 124 agus Airteagail 127 go 144 de Rialachán (AE) Uimh. 1308/2013 dulta i léig agus ba cheart iad a scriosadh.

(47)

Le Treoir (AE) 2019/633 ó Pharlaimint na hEorpa agus ón gComhairle (18), leagtar síos eisceacht ón sprioc-am uasíocaíochta le haghaidh fíonchaora agus úrfhíona a dhíol in earnáil an fhíona. Chun rannchuidiú le cobhsaíocht shlabhra soláthair an fhíona agus chun slándáil an chaidrimh sheanbhunaithe díolacháin a sholáthair do tháirgeoirí talmhaíochta, ba cheart caitheamh le díolacháin fíona ar an mórchóir ar an mbealach céanna. Dá bhrí sin, is iomchuí foráil a dhéanamh, de mhaolú ar na sprioc-amanna uasíocaíochta is infheidhme a leagtar síos i dTreoir (AE) 2019/633, arna iarraidh sin d'eagraíocht idirchraoibhe, gur féidir leis na Ballstáit a chinneadh nach bhfuil feidhm ag na sprioc-amanna uasíocaíochta is infheidhme maidir le díolacháin fíona ar an mórchóir, ar choinníoll go ndéantar na téarmaí sonracha maidir leis an sprioc-am íocaíochta a áireamh i gconarthaí caighdeánacha ar chuir na Ballstáit síneadh leo faoi Airteagal 164 de Rialachán (AE) Uimh. 1308/2013 roimh an 31 Deireadh Fómhair 2021 agus go bhfuil na comhaontuithe soláthair idir soláthraithe fíona ar an mórchóir agus a gceannaitheoirí díreacha ina gcomhaontuithe ilbhliantúla nó go mbeidh siad ilbhliantúil.

(48)

I gcás ina gcumhdaítear táirgí talmhaíochta a sheachadann táirgeoir chuig próiseálaí nó dáileoir le conradh i scríbhinn nó le tairiscint de bhun Airteagail 148 agus 168 de Rialachán (AE) Uimh. 1308/2013, agus ina ríomhtar an praghas is iníoctha leis an seachadadh trí fhachtóirí éagsúla a leagtar amach sa chonradh a chomhcheangal, fachtóirí a bhféadfaidh táscairí oibiachtúla, innéacsanna agus modhanna ríofa a áireamh iontu, ba cheart na fachtóirí sin a bheith intuigthe go héasca ag na páirtithe.. Thairis sin, ba cheart na Ballstáit a bheith in ann táscairí roghnacha a shonrú a bhféadfaidh na páirtithe sna conarthaí a úsáid, ar bhonn faisnéise agus staidéar oibiachtúil atá ar fáil faoin margadh.

(49)

Tar éis tharraingt siar Ríocht Aontaithe na Breataine Móire agus Thuaisceart Éireann as an Aontas, tá laghdú tagtha ar an líon iomlán bainne amh a tháirgtear san Aontas. Ionas nach mbainfear an bonn de na cumhachtaí maidir le dul i mbun caibidlíochtaí conarthacha a thugtar d’eagraíochtaí táirgeoirí in earnáil an bhainne agus in earnáil na dtáirgí bainne, ba cheart an teorainn chainníochtúil is infheidhme maidir le toirt an bhainne amh a chumhdaítear leis na caibidlíochtaí sin, arna sloinneadh mar chéatadán de tháirgeadh iomlán an Aontais, a mhéadú. Is iomchuí ar chúiseanna deimhneachta dlíthiúla foráil a dhéanamh maidir le cur i bhfeidhm na teorann cainníochtúla méadaithe le héifeacht chúlghabhálach ón 1 Eanáir 2021.

(50)

Chun cuidiú le cuspóirí comhshaoil an Aontais a bhaint amach, ba cheart na Ballstáit a bheith in ann aitheantas a thabhairt d’eagraíochtaí táirgeoirí a shaothraíonn aidhmeanna sonracha maidir le seachtháirgí, sreafaí iarmharacha agus dramhaíl a bhainistiú agus a luachshocrú, go háirithe chun an comhshaol a chosaint agus ciorclaíocht a threisiú, chomh maith le heagraíochtaí táirgeoirí a shaothraíonn aidhmeanna a bhaineann le bainistiú cistí frithpháirteacha d’aon earnáil ar bith. Is iomchuí, dá bhrí sin, cur le liosta reatha chuspóirí na n-eagraíochtaí táirgeoirí a leagtar amach in Airteagal 152 de Rialachán (AE) Uimh. 1308/2013. Ar mhaithe le trédhearcacht mhéadaithe na n-eagraíochtaí táirgeoirí, ba cheart comhaltaí táirgeoirí freisin a chumasú, trí reachtanna na n-eagraíochtaí sin, cuntais agus buiséid na heagraíochta a scrúdú go daonlathach. Ina theannta sin, ar mhaithe le héascaíocht na n-idirbheart tráchtála a bhíonn ar bun ag an eagraíocht táirgeoirí, is iomchuí a leagan síos go bhféadfar a cheadú, le reachtanna eagraíochta táirgeoirí, comhaltaí ar táirgeoirí iad a bheith i dteagmháil dhíreach le ceannaitheoirí, ar choinníoll nach ndéanfar, leis an teagmháil dhíreach sin, comhchruinniú soláthair agus cur táirgí ar an margadh ag an eagraíocht táirgeoirí a chur i gcontúirt agus ar choinníoll go mbeidh lánrogha iomlán ag an eagraíocht táirgeoirí i gcónaí maidir leis na buneilimintí díola arna gcur i gcrích ag an eagraíocht táirgeoirí.

(51)

I bhfianaise na taithí a fuarthas agus fhorbairt earnáil an bhainne agus na dtáirgí bainne ó cuireadh deireadh le córas na gcuótaí, níl sé iomchuí a thuilleadh rialacha sonracha a choinneáil maidir leis na cuspóirí agus na socruithe aitheantais dá bhforáiltear i ndáil le heagraíochtaí idirchraoibhe in earnáil an bhainne agus na dtáirgí bainne.

(52)

Is léir ón taithí in earnálacha éagsúla go bhféadfaidh na Ballstáit aitheantas a thabhairt d’eagraíochtaí idirchraoibhe ar leibhéil gheografacha éagsúla gan an bonn a bhaint de ról ná d’aidhmeanna na n-eagraíochtaí sin. Dá bhrí sin, is iomchuí a shoiléiriú go bhféadfaidh na Ballstáit a roghnú go dtabharfaí aitheantas d’eagraíochtaí idirchraoibhe den sórt sin ar aon leibhéal geografach amháin nó ar níos mó. Tá aidhm shonrach le saothrú ag eagraíochtaí idirchraoibhe, agus leasanna a gcomhaltaí agus leasanna tomhaltóirí á gcur san áireamh. I bhfianaise chuspóirí comhshaoil an Aontais, is iomchuí an liosta cuspóirí a leagtar amach in Airteagal 157 de Rialachán (AE) Uimh. 1308/2013 a leathnú le go gcuimsítear leis an liosta sin an fhaisnéis riachtanach a sholáthar agus an taighde is gá a dhéanamh chun táirgí a fhorbairt a oireann níos fearr do ghníomhú ar son na haeráide agus do chosaint sláinte ainmhithe agus leas ainmhithe, rannchuidiú le luachshocrú fotháirgí agus laghdú agus bainistiú dramhaíola, agus bearta a chur chun cinn agus a chur chun feidhme chun sláinte ainmhithe, sláinte plandaí agus rioscaí comhshaoil a chosc, a rialú agus a bhainistiú, lena n-áirítear trí chistí a bhunú agus a bhainistiú nó trí rannchuidiú le cistí den sórt sin d'fhonn cúiteamh airgeadais a íoc le feirmeoirí do na costais agus na caillteanais eacnamaíocha a eascraíonn as na bearta sin a chur chun cinn agus a chur chun feidhme. Ionas go seachnófar an riosca go ndéanfadh eagraíochtaí ag céim áirithe den soláthar biashlabhra níos mó cumhachta a chomhchruinniú, níor cheart do na Ballstáit aitheantas a thabhairt d’eagraíochtaí idirchraoibhe a fhéachann le hionadaíocht chothrom a dhéanamh ar na heagraíochtaí ag céimeanna éagsúla den slabhra soláthair arb ionann iad agus an eagraíocht idirchraoibhe.

(53)

An sainmhíniú ar ‘limistéar eacnamaíoch’ a leagtar síos in Airteagal 164 de Rialachán (AE) Uimh. 1308/2013 chun críche rialacha agus ranníocaíochtaí éigeantacha a shíneadh, ba cheart é a chomhlánú chun an Rialachán sin a oiriúnú do shainiúlachtaí táirgthe táirgí a bhfuil sonrúchán tionscnaimh faoi chosaint nó tásc geografach faoi chosaint acu a aithnítear faoi dhlí an Aontais. D’fhonn cleachtais inbhuanaithe a chothú, ba cheart an fhéidearthacht a bheith ann comhaontuithe, cinntí agus cleachtais chomhbheartaithe eagraíochtaí idirchraoibhe a bhaineann le sláinte plandaí, sláinte ainmhithe, an tsábháilteacht bia agus rioscaí comhshaoil, ceangailteach ar neamhchomhaltaí. Mar sin féin, mar gheall ar thábhacht na bithéagsúlachta san ábhar síl a úsáidtear san fheirmeoireacht orgánach, níor cheart rialacha a bhaineann le húsáid síolta deimhnithe a dhéanamh ceangailteach dá réir sin ar neamhchomhaltaí a chleachtann an fheirmeoireacht orgánach.

(54)

I bhfianaise a thábhachtaí atá sonrúcháin tionscnaimh faoi chosaint agus tásca geografacha faoi chosaint i dtáirgeadh talmhaíochta san Aontas, agus i bhfianaise gur éirigh le tabhairt isteach rialacha bainistithe soláthair maidir le cáiseanna agus liamhás tirimleasaithe faoi thásca geografacha chun breisluach na dtáirgí sin a áirithiú agus a gclú a chothabháil, agus chun a bpraghsanna a chobhsú, ba cheart an fhéidearacht a bheith ann rialacha bainistithe soláthair a chur i bhfeidhm freisin maidir le táirgí talmhaíochta a bhfuil sonrúchán tionscnaimh nó tásc geografach faoi chosaint acu faoi Rialachán (AE) Uimh. 1308/2013 nó Rialachán (AE) Uimh. 1151/2012. Ar mhaithe le soiléireacht agus comhsheasmhacht, is iomchuí na rialacha atá ann cheana maidir le rialáil an tsoláthair a chomhtháthú in aon fhoráil amháin lena gcumhdaítear na táirgí talmhaíochta go léir. Ba cheart na Ballstáit a údarú, dá bhrí sin, na rialacha sin a chur i bhfeidhm chun soláthar táirgí talmhaíochta faoi thásca geografacha a rialáil arna iarraidh sin d’eagraíocht idirchraoibhe, d’eagraíocht táirgeoirí nó do ghrúpa táirgeoirí nó oibreoirí, ar choinníoll go n-aontaíonn ar a laghad dhá thrian de tháirgeoirí an táirge sin, nó a n-ionadaithe, leis sin, agus, i gcás inarb infheidhme, go ndeachthas i gcomhairle le táirgeoirí talmhaíochta an amhábhair lena mbaineann, agus i gcás cáise, ar mhaithe le leanúnachas, gur aontaigh siad leis. Ba cheart na rialacha sin a bheith faoi réir coinníollacha dochta, go háirithe chun damáiste don trádáil i dtáirgí i margaí eile a sheachaint agus chun cearta mionlach a sheachaint. Ba cheart do na Ballstáit na rialacha arna nglacadh a fhoilsiú láithreach agus fógra a thabhairt fúthu don Choimisiún, seiceálacha rialta a áirithiú agus na rialacha a aisghairm i gcás nach mbeidís á gcomhlíonadh. Ba cheart an chumhacht a thabhairt don Choimisiún chun gníomhartha cur chun feidhme a ghlacadh lena gcleanglaítear ar Bhallstát rialacha den sórt sin a aisghairm má fhaigheann an Coimisiún nach gcomhlíonann na rialacha coinníollacha áirithe, go ndéanann siad iomaíocht a chosc nó a shaobhadh i gcuid shubstaintiúil den mhargadh inmheánach, nó saorthrádáil a chur i gcontúirt nó go bhfuil gnóthú chuspóirí Airteagal 39 CFAE á chur i mbaol. I bhfianaise chumhachtaí an Choimisiúin i réimse bheartas iomaíochta an Aontais, agus i bhfianaise chineál speisialta na ngníomhartha sin, ba cheart don Choimisiún gníomhartha cur chun feidhme den sórt sin a ghlacadh gan Rialachán (AE) Uimh. 182/2011 a chur i bhfeidhm.

(55)

Tá clásail comhroinnte luacha i slabhra an tsoláthair bia ina ndíol suime, ní hamháin i gcomhaontuithe idir táirgeoirí agus na chéad cheannaitheoirí ach, chomh maith leis sin, i gcás inar féidir a chur ar chumas feirmeoirí a bheith rannpháirteach i bhforbairtí praghsanna sna céimeanna is iartheachtaí den slabhra. Ba cheart, dá bhrí sin, go bhféadfadh feirmeoirí agus a gcomhlachais teacht ar chomhaontú maidir leis na clásail sin le gníomhaithe atá iartheachtach i ndáil leis na chéad cheannaitheoirí.

(56)

Tá luach tráchtála speisialta ag na fíonta a chumhdaítear le sonrúchán tionscnaimh faoi chosaint (STFC) nó tásc geografach faoi chosaint (TGFC) toisc go mbaineann siad le scothchuid den mhargadh a bhuí lena ndea-cháil cáilíochta a n-eascraíonn as a sonraíochtaí táirgthe. De ghnáth, bítear in ann praghsanna níos airde a fháil ar fhíonta den sórt sin ar an margadh ós rud é gur mór ag tomhaltóirí na saintréithe a bhfuil an sonrúchán tionscnaimh agus an tásc geografach dearbhaithe orthu. Chun nach mbainfí an bonn de na dintiúir cháilíochta sin trí ghníomhú díobhálach praghsanna, ba cheart eagraíochtaí idirchraoibhe, a dhéanann ionadaíocht ar na hoibreoirí atá ag baint tairbhe as na dintiúir cháilíochta sin, a bheith in ann treoir a eisiúint maidir le praghsanna a bhaineann le díolachán na bhfíonchaora iomchuíde mhaolú ar Airteagal 101(1) CFAE. Mar sin féin, ba cheart treoir den sórt sin a bheith neamhéigeantach, ionas nach gcuirfear deireadh go hiomlán le hiomaíocht idir STFC/TGFG ó thaobh praghsanna de.

(57)

Áirítear in Airteagal 5 de Chomhaontú na hEagraíochta Domhanda Trádála (EDT) maidir leis an Talmhaíocht na modhanna ríofa a fhéadfar a úsáid chun truicearmhéid an chlásail speisialta coimirce sna hearnálacha ábhartha a shocrú. D’fhonn gach modh ríomha is féidir a chur san áireamh chun an truicearmhéid a bhunú chun críche dleachtanna allmhairiúcháin breise a chur i bhfeidhm, lena n-áirítear i gcás nach gcuirtear tomhaltas intíre san áireamh, ba cheart Airteagal 182(1) de Rialachán (AE) Uimh. 1308/2013 a leasú chun an modh ríomha a leagtar amach in Airteagal 5(4) de Chomhaontú EDT maidir leis an Talmhaíocht a léiriú.

(58)

De bhrí nach bhfuil riachtanas a thuilleadh le bearta den sórt sin ó tharla deireadh le rialú an táirgthe in earnáil an tsiúcra, ba cheart Airteagail 192 agus 193 de Rialachán (AE) Uimh. 1308/2013 a scriosadh. Chun a áirithiú go mbeidh soláthar leordhóthanach ag margaí an Aontais le hallmhairithe as tríú tíortha, ba cheart cumhachtaí tarmligthe agus cur chun feidhme a thabhairt don Choimisiún chun dleachtanna ar allmhairiúcháin cána agus moláis bhiatais a fhionraí.

(59)

Leagtar síos rialacha faoi bhearta iomaíochta onnmhairiúcháin sa Chinneadh Aireachta maidir le hIomaíocht Onnmhairiúcháin a rinneadh an 19 Nollaig 2015 ag an 10ú ceann de Chomhdhálacha Aireachta EDT, in Nairobi. A mhéid a bhaineann le fóirdheontais onnmhairiúcháin, tá de cheanglas ar chomhaltaí EDT a dteidlíochtaí fóirdheontas onnmhairiúcháin a dhíothú agus an díothú sin a chur i bhfeidhm amhail ó dháta an Chinnidh sin. Dá bhrí sin, ba cheart forálacha an Aontais i dtaca le fóirdheontais onnmhairiúcháin a leagtar amach in Airteagail 196 go 204 de Rialachán (AE) Uimh. 1308/2013 a scriosadh. I ndáil le creidmheasanna onnmhairiúcháin, ráthaíochtaí creidmheasa onnmhairiúcháin agus cláir árachais, fiontair thrádála de chuid stát easpórtála talmhaíochta agus maidir le cabhair bhia idirnáisiúnta, ba cheart an fhéidearthacht a bheith ag na Ballstáit bearta náisiúnta a ghlacadh lena n-urramófar dlí an Aontais. Ó tharla go bhfuil an tAontas agus na Ballstáit ina gcomhaltaí de chuid EDT, ba cheart, leis na bearta náisiúnta sin, na rialacha a leagtar síos i gCinneadh Aireachta EDT sin an 19 Nollaig 2015 a chomhlíonadh, óir is é sin dlí an Aontais agus an dlí idirnáisiúnta.

(60)

Braitheann an margadh inmheánach ar chur i bhfeidhm comhsheasmhach rialacha iomaíochta sna Ballstáit uile. Chuige sin, bíonn gá le dlúthchomhar leanúnach idir na húdaráis iomaíochta náisiúnta agus an Coimisiún i líonra Eorpach na n-údarás iomaíochta, inar féidir ceisteanna maidir le léiriú agus cur i bhfeidhm rialacha iomaíochta a phlé agus inar féidir gníomhaíochtaí chun cur i bhfeidhm rialacha iomaíochta a chomhordú, i gcomhréir le Rialachán (CE) Uimh. 1/2003 ón gComhairle (19).

(61)

Chun a áirithiú go n-úsáidtear eagraíochtaí idirchraoibhe Airteagal 210 de Rialachán (AE) Uimh. 1308/2013 go héifeachtach, agus ar mhaithe le simpliú agus an t-ualach riaracháin a laghdú, níor cheart aon chinneadh ón gCoimisiún a bheith de dhíth roimh do na comhaontuithe, cinntí agus cleachtais chomhbheartaithe de chuid eagraíochtaí idirchraoibhe éisithe sa chiall nach bhfuil siad faoi réir chur i bhfeidhm Airteagal 101(1) CFAE, ar choinníoll go gcomhlíontar, leis na comhaontuithe, cinntí agus cleachtais chomhbheartaithe sin, na ceanglais a leagtar síos in Airteagal 210 de Rialachán (AE) Uimh. 1308/2013. Mar sin féin, arna iarraidh sin don iarratasóir, ba cheart don Choimisiún tuairim a thabhairt uaidh maidir le comhoiriúnacht comhaontuithe, cinntí agus cleachtas comhbheartaithe den sórt sin le hAirteagal 210 de Rialachán (AE) Uimh. 1308/2013. D'ainneoin tuairim ón gCoimisiúin éisithe chun na críche go bhfuil comhaontuithe, cinntí agus cleachtais chomhbheartaithe den sórt sin comhoiriúnach leis an Airteagal sin, ba cheart an fhéidearthacht a bheith ag an gCoimisiún i gcónaí a dhearbhú tráth ar bith tar éis tuairim den sórt sin a eisiúint go mbeidh Airteagal 101(1) CFAE i bhfeidhm sa todhchaí maidir le comhaontuithe, cinntí, nó cleachtais chomhbheartaithe den sórt sin, atá i gceist má fhaigheann sé nach gcomhlíontar a thuilleadh na coinníollacha ábhartha do chur i bhfeidhm Airteagal 210 de Rialachán (AE) Uimh. 1308/2013.

(62)

D’fhéadfadh tionscnaimh áirithe ingearacha agus chothrománacha a bhaineann le táirgí talmhaíochta agus bia, a bhfuil sé d’aidhm acu ceanglais níos déine ná na ceanglais éigeantacha a chur i bhfeidhm, éifeachtaí dearfacha a bheith acu ar chuspóirí inbhuanaitheachta. Le tabhairt i gcrích na gcomhaontuithe agus na gcinntí sin, agus na gcleachtas comhbheartaithe sin, idir táirgeoirí agus oibreoirí ar leibhéil éagsúla den táirgeadh, den phróiseáil agus den trádáil, d’fhéadfaí seasamh na dtáirgeoirí sa slabhra soláthair a neartú agus a gcumhacht margála a mhéadú. Dá bhrí sin, faoi imthosca sonracha, níor cheart tionscnaimh den sórt sin a bheith faoi réir chur i bhfeidhm Airteagal 101(1) CFAE. D‘fhonn úsáid éifeachtach an mhaolaithe nua seo a áirithiú agus d’fhonn na hualaí riaracháin a laghdú níor cheart cinneadh ón gCoimisiún a bheith de dhíth roimh ré chun na críche nach bhfuil siad faoi réir theacht i bhfeidhm Airteagal 101(1) CFAE. Ós rud é gur maolú nua é seo, is iomchuí a fhoráil gur cheart don Choimisiún treoirlínte a chur ar fáil d’oibreoirí maidir le cur i bhfeidhm an mhaolaithe sin laistigh de 2 bhliain ó theacht i bhfeidhm an Rialacháin seo. Tar éis an dáta sin, ba cheart go mbeidh táirgeoirí in ann freisin tuairim a iarraidh ón gCoimisiún maidir le chur i bhfeidhm an mhaolaithe maidir lena gcomhaontuithe agus a gcinntí, agus a gcleachtas comhbheartaithe. I gcásanna a bhfuil údar cuí leo, ba cheart an Coimisiún a bheith in ann ábhar a thuairime a athbhreithniú ina dhiaidh sin. Ba cheart na húdaráis iomaíochta náisiúnta a bheith in ann a chinneadh, go bhfuil comhaontú, cinneadh nó cleachtas comhbheartaithe le modhnú, go bhfuil deireadh le cur leis, nó ar cheart gan é a dhéanamh ar chor ar bith, má mheasann siad gur gá sin chun iomaíocht a chosaint, agus sa chás sin, ba cheart dóibh an Coimisiún a chur ar an eolas faoina ngníomhaíochtaí.

(63)

Le hAirteagal 214a de Rialachán (AE) Uimh. 1308/2013, ceadaítear don Fhionlainn, faoi choinníollacha áirithe, cabhair náisiúnta a dheonú i nDeisceart na Fionlainne go dtí 2020, faoi réir údarú ón gCoimisiún. Ba cheart deonú na cabhrach náisiúnta sin leanúint de bheith ceadaithe don tréimhse 2023-2027. Chun a áirithiú gur féidir leis an gcabhair náisiúnta sin a dheonú le linn na hidirtréimhse ó 2021 go 2022, ba cheart feidhm a bheith ag na forálacha nua ina leith ón 1 Eanáir 2023.

(64)

D’fhéadfadh deacrachtaí a bheith ann don mhargadh i mBallstát amháin nó níos mó de dheasca srianta ar shaorchúrsaíocht táirgí in earnáil na dtorthaí agus na nglasraí, ar srianta iad a eascraíonn as cur i bhfeidhm beart darb aidhm leathadh lotnaidí plandaí a chomhrac. Go háirithe i bhfianaise an mhéadaithe atá tagtha ar lotnaidí plandaí, is iomchuí, dá bhrí sin, bearta eisceachtúla tacaíochta a cheadú chun na srianta ar thrádáil atá ann mar thoradh ar lotnaidí plandaí a chur san áireamh agus cur le liosta na dtáirgí ar féidir bearta eisceachtúla tacaíochta a ghlacadh ina leith in earnáil na dtorthaí agus na nglasraí.

(65)

Na faireachlanna margaidh agus meithleacha earnála de chuid an Aontais atá ann cheana do na margaí talmhaíochta, is léir go bhfuil tairbhe ag baint leo ó thaobh cuidiú le hoibreoirí eacnamaíocha agus le húdaráis phoiblí a roghanna a dhéanamh agus ó thaobh faireachán ar fhorbairtí sa mhargadh a éascú freisin. Chuige sin, agus chun feabhas a chur ar thrédhearcacht na margaí talmhaíochta agus bia ar leibhéal an Aontais agus chun cur le cobhsaíocht na margaí talmhaíochta, ba cheart na hionstraimí sin a neartú. Dá bhrí sin, is iomchuí creat dlíthiúil foirmiúil aonair a bhunú le haghaidh faireachlanna margaí talmhaíochta de chuid an Aontais a chur ar bun agus a ghníomhú in aon cheann de na hearnála talmhaíochta agus chun go leagfar síos na hoibleagáidí iomchuí maidir le fógra a thabhairt agus tuairisciú a dhéanamh ar na faireachlanna sin.

(66)

Ar bhonn na sonraí staidrimh agus na faisnéise arna mbailiú chun faireachán a dhéanamh ar na margaí talmhaíochta, ba cheart d’fhaireachlanna margaí an Aontais a aithint, ina dtuarascálacha,, bagairtí go suaithfí an margadh. Ba cheart don Choimisiún faisnéis a chur faoi bhráid Pharlaimint na hEorpa agus na Comhairle go tráthrialta, faoi staid mhargaidh na dtáirgí talmhaíochta, faoi bhagairtí go suaithfí an margadh agus faoi bhearta a d’fhéadfaí a dhéanamh.trína bheith rannpháirteach i gcruinnithe den Choiste um Thalmhaíocht agus um Fhorbairt Tuaithe agus den Choiste Speisialta um Thalmhaíocht.

(67)

Ar chúiseanna soiléireachta, ba cheart ról an Choimisiúin i ndáil leis na hoibleagáidí atá aige cheana chun comhoibriú agus malartú faisnéise leis na húdaráis inniúla arna n-ainmniú i gcomhréir le hAirteagal 22 de Rialachán (AE) Uimh. 596/2014 ó Pharlaimint na hEorpa agus ón gComhairle (20) agus Údarás Eorpach um Urrúis agus Margaí (ESMA) a leagan síos go sainráite in Airteagal 223 de Rialachán (AE) Uimh. 1308/2013.

(68)

Oibleagáidí tuairiscithe atá ar an gCoimisiún maidir le margaí an bhainne agus na dtáirgí bainne agus maidir le síneadh a chur le raon scéim na scoileanna, ar oibleagáidí iad atá dulta i léig, ba cheart iad sin uile a scriosadh. An oibleagáid tuairiscithe a bhaineann le hearnáil na beachaireachta, ba cheart í a chomhtháthú i Rialachán (AE) 2021/2115 Ba cheart oibleagáidí agus spriocdhátaí tuairiscithe nua a leagan síos maidir le cur i bhfeidhm rialacha iomaíochta i leith earnáil na talmhaíochta maidir le faireachlanna margaidh Aontais a chur ar bun agus maidir le bearta eisceachtúla a úsáid. Ba cheart don Choimisiún tuairisciú a dhéanamh freisin ar staid na sonrúchán díolachán agus an aicmithe conablach in earnáil na caoireola agus na feola gabhair.

(69)

Na forálacha a bhaineann le cúlchistí do ghéarchéimeanna in earnáil na talmhaíochta a leagtar síos i gCuid V, Caibidil III, de Rialachán (AE) Uimh. 1308/2013, ba cheart iad a scriosadh, óir leagtar síos forálacha nuashonraithe a bhaineann le cúlchistí talmhaíochta i Rialachán (AE) 2021/2116

(70)

I bhfianaise an mhaolaithe atá ann cheana ar na tuairiscí díolacháin atá le húsáid do laofheoil lena ngabhann sonrúchán tionscnaimh faoi chosaint nó tásc geografach faoi chosaint a cláraíodh roimh an 29 Meitheamh 2007, ba cheart, ar chúiseanna comhsheasmhachta agus chun foráil a dhéanamh d’fhaisnéis gan débhrí do thomhaltóirí, an deis a thabhairt do na Ballstáit a cheadú do ghrúpaí atá freagrach as sonrúcháin tionscnaimh faoi chosaint nó tásca geografacha faoi chosaint a cláraíodh roimh an dáta céanna maolú ar aicmiú éigeantach conablach do laofheoil.

(71)

Chun cothromaíocht níos cothroime a bhaint amach idir na leasanna atá i gceist, ba cheart rialacha a leagan síos maidir le measúnú a dhéanamh ar choinbhleachtaí idir ainm a bhfuil iarratas déanta ina leith lena chlárú mar shonrúchán tionscnaimh nó mar thásc geografach faoi Rialachán (AE) Uimh. 1151/2012 agus ainm an chineáil planda nó póir ainmhí a tháirgtear san Aontas.

(72)

Chun feasacht tomhaltóirí a mhéadú maidir le sonrúcháin tionscnaimh faoi chosaint, tásca geografacha faoi chosaint agus sainearraí traidisiúnta faoi ráthaíocht faoi Rialachán (AE) Uimh. 1151/2012, ba cheart úsáid éigeantach shiombailí gaolmhara an Aontais a leathnú chuig na hábhair fógraíochta.

(73)

Ba cheart foráil a dhéanamh do mhaoluithe sonracha a cheadódh ainmneacha eile a úsáid taobh le hainm cláraithe sainearra thraidisiúnta faoi ráthaíocht. Ba cheart don Choimisiún idirthréimhsí a shocrú i dtaca le húsáid sonrúchán a bhfuil ainm sainearraí faoi ráthaíocht mar chuid díobh, agus é sin a dhéanamh i gcomhréir leis na coinníollacha i dtaca le hidirthréimhsí dá leithéid chéanna atá leagtha síos cheana le haghaidh sonrúchán tionscnaimh faoi chosaint agus tásca geografacha faoi chosaint.

(74)

Na nósanna imeachta a bhaineann le clárú sonrúchán tionscnaimh faoi chosaint, le clárú tásc geografach faoi chosaint agus le clárú sainearraí traidisiúnta faoi ráthaíocht, mar a leagtar síos iad i Rialachán (AE) Uimh. 1151/2012, ba cheart iad sin a chuíchóiriú agus a shimpliú chun a áirithiú gur féidir ainmneacha nua a chlárú laistigh de thréimhsí níos giorra. Ba cheart an nós imeachta freasúra a shimpliú. Ba cheart forais uile an ráitis freasúra agus na mionsonraí a ghabhann leis a leagan amach ar an ráiteas freasúra réasúnaithe. Níor cheart an méid sin a bheith ina bhac don údarás nó don duine a thaisc an freasúra maidir le tuilleadh mionsonraí a chur leis nó a fhorbairt, le linn na gcomhairliúchán sin dá dtagraítear in Airteagal 51(3) de Rialachán (AE) Uimh. 1151/2012.

(75)

An nós imeachta a bhaineann leis an bhformheas a dhéanamh ar leasuithe ar shonraíochtaí táirge, nós imeachta a leagtar síos i Rialachán (AE) Uimh. 1151/2012, ba cheart é a shimpliú trí idirdhealú a thabhairt isteach idir leasuithe ar leibhéal an Aontais agus leasuithe caighdeánacha. I gcomhréir le prionsabal na coimhdeachta, is iad na Ballstáit ba cheart a bheith freagrach as leasuithe caighdeánacha a fhormheas agus ba cheart gur ar an gCoimisiún a d’fhanfadh an fhreagracht i dtaca le formheas a dhéanamh ar leasuithe ar leibhéal an Aontais a dhéantar ar shonraíochtaí táirge. Ba cheart foráil a dhéanamh chun a áirithiú go bhfuil dóthain ama ann chun go n-éascófar aistirú rianúil ó na rialacha dá bhforáiltear i Rialachán (AE) Uimh. 1151/2012 a bhaineann le leasuithe ar shonraíochtaí táirge go dtí na rialacha a leagtar síos sa Rialachán seo.

(76)

I bhfianaise an éilimh mhéadaithigh ó thomhaltóirí an Aontais ar chéir beach, a húsáide san earnáil bia, agus an dlúthnaisc atá aici le táirgí talmhaíochta agus leis an ngeilleagar tuaithe, ba cheart an liosta de tháirgí talmhaíochta agus de bhia-earraí a leagtar síos in Iarscríbhinn I a ghabhann le Rialachán (AE) Uimh. 1151/2012 a leathnú chun an táirge sin a chumhdach.

(77)

I bhfianaise a theoranta atá uimhir na gclárúchán ar thásca geografacha táirgí fíona cumhraithe faoi Rialachán (AE) Uimh. 251/2014 ó Pharlaimint na hEorpa agus ón gComhairle (21), ba cheart simpliú a dhéanamh ar an gcreat dlíthiúil le haghaidh chosaint thásca geografacha na dtáirgí sin. Táirgí fíona cumhraithe agus deochanna alcólacha eile, cé is moite de na deochanna biotáilleacha agus na táirgí fíniúna a liostaítear in Iarscríbhinn VII, Cuid II, a ghabhann le Rialachán (AE) Uimh. 1308/2013, ba cheart iad sin a bheith faoi réir an réimis dlí agus na nósanna imeachta a bhaineann le táirgí eile talmhaíochta agus bia-earraí. Ba cheart raon feidhme Rialachán (AE) Uimh. 1151/2012 a leathnú chun na táirgí sin a chumhdach. Ba cheart Rialachán (AE) Uimh. 251/2014 a leasú leis an athrú seo a chur san áireamh a mhéid a mbaineann lena theideal, lena raon feidhme agus lena shainmhínithe agus a mhéid a bhaineann leis na forálacha atá ann i dtaca le lipéadú táirgí fíona chumhraithe. Ba cheart a áirithiú go ndéanfar an t-aistriú go réidh i gcás ainmneacha a chosnaítear faoi Rialachán (AE) Uimh. 251/2014.

(78)

D’fhonn trádáil le tríú tíortha a éascú, ba cheart a leagan síos gur féidir leis na Ballstáit a cheadú go ndéantar ainmníochtaí díolacháin, a éilíonn triú tíortha, a léiriú ar phacáistíocht táirgí fíona cumhraithe a tháirgtear lena n-onnmhairiú nó ar lipéad atá ceangailte di, agus lena n-áirítear i dteangacha seachas teangacha oifigiúla an Aontais, ar choinníoll go mbeidh na hainmníochtaí díolacháin iomchuí a leagtar amach in Iarscríbhinn II ar an bpacáistíocht nó ar lipéad atá ceangailte di freisin.

(79)

Ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i ndáil leis na hainmníochtaí díolacháin agus na tuairiscí ar tháirgí fíona cumhraithe a leagtar síos in Iarscríbhinn II a ghabhann le Rialachán (AE) Uimh. 251/2014 a fhorlíonadh chun iad a oiriúnú chun dul chun cinn teicniúil, forbairtí eolaíocha agus margaidh, sláinte tomhaltóirí nó an gá atá ag tomhaltóirí faisnéis a fháil a chur san áireamh.

(80)

Chun leibhéal níos airde faisnéise a chur ar fáil do thomhaltóirí, ba cheart cur le Rialachán (AE) Uimh. 251/2014 chun a rá go bhfuil sé éigeantach dearbhú cothúcháin agus liosta na gcomhábhar, a chur ar lipéadú táirgí fíona cumhraithe. Mar sin féin, ba cheart an rogha a bheith ag táirgeoirí inneachar an dearbhaithe cothúcháin ar an bpacáistíocht nó ar lipéad atá ceangailte di a theorannú don luach fuinnimh amháin agus an dearbhú iomlán cothúcháin agus liosta na gcomhábhar a chur ar fáil go leictreonach, ar choinníoll nach bhfuil aon sonraí úsáideoirí a bhailiú nó a rianú agus nach bhfuil faisnéis chun críoch margaíochta á soláthar acu. Mar sin féin, níor cheart, maidir le rogha gan dearbhú cothúcháin iomlán a chur ar an bpacáistíocht nó ar lipéad atá ceangailte di, difear a dhéanamh don cheanglas atá ann faoi láthair substaintí is cúis le hailléirgí nó éadulaingtí a liostú ar an lipéad. Ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i ndáil le Rialachán (AE) Uimh. 251/2014 lena leagtar síos rialacha mionsonraithe maidir le comhábhair le haghaidh táirgí fíona cumhraithe a léiriú agus a ainmniú. Ba cheart a cheadú leanúint de na stoc táirgí fíona cumhraithe atá ann cheana a mhargú tar éis dhátaí chur i bhfeidhm na gceanglas nua lipéadaithe, go dtí go mbeidh na stoic sin ídithe. Ba cheart dóthain ama a chur ar fáil d'oibreoirí le dul in oiriúint do na ceanglais lipéadaithe nua sula dtiocfaidh siad chun bheith infheidhme.

(81)

Is iomchuí a cheadú go ndéanfaí cainníocht theoranta de dheochanna biotáilleacha a chur leis na fíona cumhraithe in aon cheann de na catagóirí a leagtar síos in Iarscríbhinn II, pointe A, a ghabhann le Rialachán (AE) Uimh. 251/2014 chun blas a chur leo. Ós rud é go bhfuiltear in ann, mar thoradh ar an dul chun cinn teicniúil, sa lá atá inniu ann, vermouth a tháirgeadh, gan alcól a bheith curtha leis, níor cheart gur gá alcól a chur le vermouth a thuilleadh. Mar gheall ar éileamh tomhaltóirí, is iomchuí a cheadú go ndéantar fíon dearg agus fíon bán a mheascadh le chéile chun Glühwein a tháirgeadh. D’fhonn deoch cumhraithe bunaithe ar fhíon atá ar mhargadh na Polainne a chur san áireamh, is iomchuí an catagóir nua 'wino ziołowe' a chruthú, ina leagtar amach i ndlí an Aontais na gnáthcheanglais chun é a tháirgeadh.

(82)

I bhfianaise a lú atá sé, a iargúltachta agus a staide sonraí maidir le slándáil bia, tá margaí áitiúla in La Réunion an-leochaileach ó thaobh luaineachtaí praghsanna de. Tugann eagraíochtaí idirchraoibhe le chéile táirgeoirí agus oibreoirí eile de chéimeanna éagsúla de shlabhra an tsoláthair biaagus is féidir leo ról a imirt chun tacú le caomhnú agus le héagsúlú an táirgthe áitiúil. I gcomhthéacs sonrach na slándála bia in La Réunion, is iomchuí a fhoráil, de mhaolú ar Airteagal 165 de Rialachán (AE) Uimh. 1308/2013, i gcás ina leathnófar rialacha eagraíochta aitheanta idirchraoibhe d’oibreoirí nach baill den eagraíocht idirchraoibhe iad, go bhféadfaidh an Fhrainc, tar éis di dul i gcomhairle leis na geallsealbhóirí ábhartha, go ndéanfaidh na hoibreoirí nach baill den eagraíocht idirchraoibhe iad ranníocaíochtaí airgeadais a íoc i leith na ngníomhaíochtaí a chumhdaítear leis na rialacha leathnaithe atá chun leasa eacnamaíoch i gcoitinne na n-oibreoirí eacnamaíocha a nach ndéanann a gcuid gníomhaíochtaí ach in La Réunion amháin agus a bhaineann le táirgí atá le cur ar an margadh áitiúil.

(83)

Dá bhrí sin, ba cheart Rialacháin (AE) Uimh. 1308/2013, (AE) Uimh. 1151/2012, (AE) Uimh. 251/2014 agus (AE) Uimh. 228/2013 a leasú dá réir.

(84)

Ba cheart socruithe idirthréimhseacha a chur ar bun le haghaidh iarratais ar chosaint agus le haghaidh clárú sonrúchán tionscnaimh faoi chosaint, tásca geografacha faoi chosaint agus sainearraí traidisiúnta faoi ráthaíocht a dhéanfar roimh dháta theacht i bhfeidhm an Rialacháin seo, le haghaidh an chaiteachais a bheidh déanta roimh an 1 Eanáir 2023 faoi na scéimeanna cabhrach um ola olóige agus ológa boird, thorthaí agus ghlasraí, fhíon, beachaireacht agus leannlus, le haghaidh cláir oibríochta ar eagraíochtaí táirgeoirí aitheanta nó a gcomhlachais in earnáil na dtorthaí agus na nglasraí agus le haghaidh cláir thacaíochta in earnáil an fhíona a bunaíodh le hAirteagail 29 go 60 de Rialachán (AE) Uimh. 1308/2013.

(85)

Chun a áirithiú go ndéanfar aistriú rianúil go dtí an creat dlíthiúil nua a leagtar síos i Rialachán (AE) 2021/2115, ba cheart, ón 1 Eanáir 2023, feidhm a bheith ag na leasuithe ar Rialachán (AE) Uimh. 1308/2013 nasctha leis an creat dlíthiúil nua sin,

(86)

D'fhonn cur chun feidhme réidh na gcéimeanna atá á mbeartú a áirithiú agus ar bhonn práinne, ba cheart go dtiocfadh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh,