(1)

Le Teideal III, Caibidil 3, de Rialachán (AE) Uimh. 1307/2013, déantar foráil maidir le híocaíocht i leith na gcleachtas talmhaíochta chun leasa na haeráide agus an chomhshaoil (“íocaíocht ghlas”). Áirítear leis na cleachtais sin éagsúlú barr de bhun Airteagal 43(2), pointe (a), agus limistéir ina ndírítear ar an éiceolaíocht de bhun Airteagal 43(2), pointe (c), den Rialachán sin. Leagtar síos tuilleadh rialacha maidir leis na cleachtais sin i gCaibidil 3 de Rialachán Tarmligthe (AE) Uimh. 639/2014 ón gCoimisiún (2).

(2)

Le hAirteagal 44(4) de Rialachán (AE) Uimh. 1307/2013, leagtar síos, chun críoch éagsúlaithe barr, go meastar gurb éagsúil an barr é talamh a fhágtar bán ó fhéar nó foráiste luibheach eile. Tugann an méid sin le fios nach féidir talamh ar a ndearnadh innilt nó buaint chun críoch táirgthe a mheas mar thalamh a fhágtar bán.

(3)

Le hAirteagal 46(2), an chéad fhomhír, pointe (a), de Rialachán (AE) Uimh. 1307/2013, leagtar síos go bhféadfaí limistéir faoi thalamh a fhágtar bán a mheas mar limistéir ina ndírítear ar an éiceolaíocht. Le hAirteagal 45(2) de Rialachán Tarmligthe (AE) Uimh. 639/2014, ceanglaítear go bhfuil táirgeadh talmhaíochta á dhéanamh, agus le hAirteagal 45(10b) den Rialachán sin cuirtear cosc ar úsáid táirgí cosanta plandaí, ar thalamh a fhágtar bán a cháilíonn mar limistéar ina dírítear ar an éiceolaíocht.

(4)

Spreag ionradh na Rúise ar an Úcráin an 24 Feabhra 2022 borradh mór tobann ar phraghsanna tráchtearraí agus tá tionchar aige ar sholáthar agus éileamh táirgí talmhaíochta. Chun aghaidh a thabhairt ar an staid seo, ba cheart acmhainneacht táirgeachta talmhaíochta an Aontais le haghaidh soláthar bia agus beatha a mhéadú.

(5)

Is limistéir talún arúla fós iad limistéir thalún a fhágtar bán atá oiriúnach le haghaidh táirgeadh barr ar limistéir iad a d’fhéadfaí a úsáid láithreach chun bia agus beatha a tháirgeadh, bíodh go bhfuil siad oiriúnach ar leibhéil éagsúla ag brath ar an mbail atá orthu, amhail cáilíocht na hithreach. Dá bhrí sin, chun é a chur ar chumas feirmeoirí an leas is mó a bhaint as na limistéir atá ar fáil acu chun bia a tháirgeadh agus ainmhithe a chothú, ba cheart go dtabharfar údarú do na Ballstáit maolú ar na coinníollacha a bhaineann leis an íocaíocht ghlas, lena n-áirítear úsáid táirgí cosanta plandaí, le haghaidh na bliana éilimh 2022 a mhéid a bhaineann le talamh a fhágtar bán agus a dearbhaíodh go gcomhlíonann sé na ceanglais a bhaineann le héagsúlú barr nó limistéar ina ndírítear ar an éiceolaíocht i gcomhréir le hAirteagal 44(4) agus Airteagal 46(2), an chéad fhomhír, pointe (a), de Rialachán (AE) Uimh. 1307/2013, faoi seach.

(6)

Níor cheart foráil a dhéanamh leis an gCinneadh seo ach amháin maidir le maoluithe ar an éagsúlú barr agus ar na limistéir ina ndírítear ar an éiceolaíocht a mhéid is gá agus ar feadh na tréimhse is gá. Ba cheart na maoluithe a theorannú don bhliain éilimh 2022 agus ba cheart iad a bheith dírithe ar aghaidh a thabhairt ar an tionchar a bhíonn ar sholáthar agus éileamh táirgí talmhaíochta trí mhéadú a cheadú ar an limistéar iomlán talún arúla atá ar fáil chun bia agus beatha a tháirgeadh.

(7)

Agus cinneadh á dhéanamh ar chur i bhfeidhm na maoluithe, ba cheart do na Ballstáit sin aird chuí a thabhairt ar chuspóirí na gcleachtas talmhaíochta is tairbhiúil don aeráid agus don chomhshaol agus, go háirithe, ar an ngá atá le cáilíocht ithreach agus cáilíocht acmhainní nádúrtha agus an bhitheolaíocht a chosaint go leormhaith, go háirithe le linn na dtréimhsí is íogaire le haghaidh bláthú agus le haghaidh éin atá ag neadú.

(8)

Chun a áirithiú go bhfuil na maoluithe a údaraítear leis an gCinneadh seo éifeachtach d’fhonn na gcuspóirí arna saothrú, i.e. maolú ar ardú praghsanna tráchtearraí agus an tionchar ar sholáthar agus éileamh, ba cheart do na Ballstáit a gcinntí maidir le cur i bhfeidhm na maoluithe a dhéanamh laistigh de 21 lá ón dáta a thabharfar fógra faoin gCinneadh seo, agus ba cheart dóibh fógra a thabhairt don Choimisiún faoi na cinntí sin laistigh de 7 lá ón dáta a dhéanfar na cinntí.

(9)

Chun é a chur ar a chumas don Choimisiún faireachán a dhéanamh ar chur i bhfeidhm ceart na maoluithe a fhoráiltear leis seo agus ar an tionchar a bhíonn acu, ba cheart do na Ballstáit faisnéis a sholáthar maidir leis an líon gabháltas agus an líon heicteár a chumhdaítear leis na maoluithe. Ba cheart don Choimisiún an fhaisnéis sin a chur ar fáil faoin 15 Nollaig 2022 agus na hionstraimí fógartha atá ann cheana á n-úsáid aige.

(10)

Na bearta dá bhforáiltear sa Chinneadh seo, is bearta iad atá i gcomhréir leis an tuairim ón gCoiste um Íocaíochtaí Díreacha,