Is cuid iad de bhosca uirlisí chomhbheartas eachtrach agus slándála (CBES) an Aontais Eorpaigh (AE), lena gcuirtear cuspóirí CBES chun cinn tríd an mbunús dlí a chur ar fáil do “smachtbhannaí” E i bhfianaise na staide i bPoblacht na hAfraice Láir.
Treisíonn siad an trádbhac ginearálta agus iomlán arm i gcoinne Phoblacht na hAfraice Láir a d’fhorchuir Comhairle Slándála na Náisiún Aontaithe (NA) an 5 Nollaig 2013, agus atá i bhfeidhm go dtí an 31 Iúil 2023.

PRÍOMHPHOINTÍ

An cinneadh agus an rialachán, a leasaíodh go minic:

cosc
- airm, armlón, feithiclí agus trealamh míleata, trealamh paraimíleata agus páirteanna spártha a dhíol, a sholáthar, a aistriú nó a onnmhairiú,
- cúnamh teicniúil agus airgeadais, seirbhísí bróicéireachta agus seirbhísí eile a bhaineann le gníomhaíochtaí míleata a sholáthar, a mhonarú, a chothabháil agus a úsáid, agus airm agus trealamh míleata gaolmhar de gach cineál a sholáthar, a mhonarú, a chothabháil agus a úsáid d’aon duine nádúrtha nó dlítheanach, eintiteas nó comhlacht i bPoblacht na hAfraice Láir nó lena n-úsáid i bPoblacht na hAfraice Láir;
calcadh a dhéanamh ar chistí agus acmhainní eacnamaíocha uile daoine aonair, cuideachtaí agus comhlachtaí arna sainaithint ag Coiste Smachtbhannaí na Náisiún Aontaithe mar chistí agus acmhainní a bhaineann an bonn den tsíocháin, den chobhsaíocht agus den tslándáil i bPoblacht na hAfraice Láir, ag gníomhú de shárú ar an lánchosc arm, nó a bhfuil baint acu le gníomhartha a sháraíonn an dlí idirnáisiúnta um chearta an duine nó an dlí daonnúil idirnáisiúnta (Iarscríbhinn I a ghabhann leis an rialachán);
toirmeasc a chur ar aon rannpháirtíocht ghníomhach maidir le dul timpeall ar na smachtbhannaí;
iarraidh ar Bhallstáit AE an méid seo a leanas a dhéanamh:
- aon airm agus trealamh toirmiscthe a gheobhaidh siad amach a chlárú agus a dhiúscairt (lena n-áirítear trína ndíothú),
- cosc a chur ar dhaoine aonair a liostaítear in Iarscríbhinn I dul isteach nó idirthuras a dhéanamh trína gcríocha,
- pionóis a ghearradh i leith sáruithe ar na smachtbhannaí,
- údaráis náisiúnta a ainmniú chun an rialachán a chur chun feidhme (Iarscríbhinn II a ghabhann leis an rialachán).

Díolúintí

Tá díolúintí áirithe ó na toirmisc agus ó na srianta sa chinneadh agus sa rialachán, lena n-áirítear go háirithe:

cúnamh do Mhisean Ilghnéitheach Comhtháite Cobhsúcháin na Náisiún Aontaithe i bPoblacht na hAfraice Láir agus d’fhórsaí Bhallstáit na Náisiún Aontaithe;
soláthairtí trealaimh neamh-mharfaigh le haghaidh úsáid dhaonnúil agus cabhair d’fhórsaí slándála Phoblacht na hAfraice Láir;
éadaí cosanta, lena n-áirítear seaicéid calóg agus clogaid mhíleata;
cistí reoite áirithe a scaoileadh chun críocha dlisteanacha, amhail freastal ar riachtanais bhunúsacha daoine, táillí gairmiúla réasúnta a íoc nó costais a aisíoc.

Tá feidhm ag na bearta sriantacha:

laistigh den AE, lena n-áirítear a aerspás;
ar bord aerárthaí agus soithí atá cláraithe san Aontas Eorpach;
do náisiúnaigh agus do ghnólachtaí an Aontais, laistigh agus lasmuigh de chríoch an Aontais araon;
d’aon duine aonair nó le haon chuideachta a dhéanann gnó go hiomlán nó go páirteach laistigh den Aontas Eorpach.

Díolúintí daonnúla

Tar éis Rún 2664 (2022) ó Chomhairle Slándála na Náisiún Aontaithe, le Rialachán (AE) 2023/331 ón gComhairle agus le Cinneadh (CBES) 2023/338 ón gComhairle, tugtar isteach i ndlí an Aontais díolúine do na bearta calctha sócmhainní le haghaidh cúnamh daonnúil agus gníomhaíochtaí eile lena dtacaítear le riachtanais bhunúsacha dhaonna arna ndéanamh ag eagraíochtaí daonnúla ábhartha.

CÉN UAIR ATÁ TOSACH FEIDHME AN CHINNIDH AGUS AN RIALACHÁIN?

Tá feidhm le Cinneadh 2013/798/CBES ón 24 Nollaig 2013 i leith.

Tá feidhm ag Rialachán (AE) Uimh. 224/2014 ón 11 Márta 2014.

CÚLRA

Le haghaidh tuilleadh faisnéise, féach:

An Afraic Láir agus an tAontas Eorpach (an tSeirbhís Eorpach Gníomhaíochta Seachtraí)
Toscaireacht an Aontais Eorpaigh chuig Poblacht na hAfraice Láir (an tSeirbhís Eorpach Gníomhaíochta Seachtraí).

PRÍOMHDHOICIMÉID

Cinneadh 2013/798/CBES ón gComhairle an 23 Nollaig 2013 maidir le bearta sriantacha i gcoinne Phoblacht na hAfraice Láir (IO L 352, 24.12.2013, lgh. 51–52).

Rinneadh leasuithe comhleanúnacha ar Chinneadh 2013/798/CBES a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Rialachán (AE) Uimh. 224/2014 ón gComhairle an 10 Márta 2014 maidir le bearta sriantacha i bhfianaise na staide i bPoblacht na hAfraice Láir (IO L 70, 11.3.2014, lgh. 1–9).

Féach an leagan comhdhlúite.

DOICIMÉID GHAOLMHARA

Leagan comhdhlúite den Chonradh ar an Aontas Eorpach — Teideal V — Forálacha ginearálta maidir le gníomhaíochtaí seachtracha an Aontais agus forálacha faoi leith maidir leis an gcomhbheartas eachtrach agus slándála — Caibidil 2 — Forálacha faoi leith maidir leis an gcomhbheartas eachtrach agus slándála — Roinn 1 — Forálacha comhchoiteanna — Airteagal 29 (sean–Airteagal 15 CAE) (IO C 202, 7.6.2016, lch. 33).

Leagan comhdhlúite den Chonradh ar Fheidhmiú an Aontais Eorpaigh — Cuid a cúig — Gníomhaíocht sheachtrach an Aontais — Teideal IV — Bearta sriantacha — Airteagal 215 (sean-Airteagal 301 CCE) (IO C 202, 7.6.2016, lch. 144).

Nuashonraithe 15.03.2023

Top