Il-Liġi Ewropea dwar il-Klima

PUNTI EWLENIN

L-istituzzjonijiet tal-UE u tal-Istati Membri tal-UE jridu jieħdu l-miżuri kollha meħtieġa biex jissodisfaw l-għanijiet tar-regolament, filwaqt li jqisu l-ġustizzja, is-solidarjetà u l-kosteffettività.

Ir-regolament jistabbilixxi Bord Konsultattiv Xjentifiku Ewropew dwar it-Tibdil fil-Klima indipendenti. Il-kompiti tal-bord jinkludu, pereżempju, il-kunsiderazzjoni tal-aħħar sejbiet xjentifiċi mir-rapporti tal-Grupp Intergovernattiv ta’ Esperti dwar it-Tibdil fil-Klima u d-data xjentifika dwar il-klima, b’mod partikolari fir-rigward tal-informazzjoni rilevanti għall-UE, l-għoti ta’ pariri xjentifiċi u l-ħruġ ta’ rapporti.

L-Istati Membri huma mistiedna jistabbilixxu korp konsultattiv dwar il-klima biex jipprovdi pariri xjentifiċi esperti lill-awtoritajiet nazzjonali rilevanti.

Ir-regolament jiddefinixxi l-passi intermedji tal-UE li ġejjin, li għandhom l-għan li jgħinu lill-UE tilħaq l-objettiv tagħha tan-newtralità klimatika għall-2050.

• It-tnaqqis tal-emissjonijiet netti tal-UE mill-gass serra b’mill-inqas 55 % (meta mqabbla mal-livelli tal-1990) sal-2030; fl-2023, l-UE adottat il-pakkett “lesti għall-mira ta’ 55 %” li jaġġorna l-leġiżlazzjoni eżistenti tal-UE u li jinkludi inizjattivi ġodda fl-implimentazzjoni ta’ din il-mira l-ġdida.
• Il-limitazzjoni tal-kontributi tal-assorbimenti netti għal massimu ta’ ekwivalent ta’ 225 miljun tunnellata ta’ diossidu tal-karbonju (CO₂) biex jiġi żgurat li jsiru sforzi ta’ mitigazzjoni suffiċjenti qabel l-2030. Bil-għan li jtejjeb il-bir² tal-karbonju tal-UE f’konformità mal-objettiv tan-newtralità tal-klima 2050, ir-regolament jipprovdi wkoll biex l-UE timmira lejn volum ogħla tal-bir tal-karbonju nett tagħha fl-2030.
• L-istabbiliment ta’ mira klimatika vinkolanti għall-2040 għal tnaqqis ta’ 90 % fl-emissjonijiet netti ta’ gassijiet serra (emissjonijiet wara t-tnaqqis tal-assorbimenti) meta mqabbla mal-livelli tal-1990.
• Il-ħtieġa li l-Kummissjoni Ewropea, fid-dawl tal-perjodu wara l-2030, tirrieżamina l-leġiżlazzjoni rilevanti tal-UE, abbażi ta’ valutazzjonijiet tal-impatt dettaljati, sabiex tippermetti l-ilħuq tal-mira tal-2040 u tal-objettiv tan-newtralità klimatika, u biex tkompli ssaħħaħ il-qafas ta’ abilitazzjoni biex tappoġġa lill-persuni ġuridiċi u fiżiċi affettwati matul it-tranżizzjoni.
• Il-ħtieġa li l-Kummissjoni tiżgura li l-proposti leġiżlattivi ta’ wara l-2030 jirriflettu b’mod xieraq firxa ta’ elementi speċifikati, inklużi:
  • kontribut adegwat ta’ krediti internazzjonali ta’ kwalità għolja skont l-Artikolu 6 tal-Ftehim ta’ Pariġi (sa 5 % tal-emissjonijiet netti tal-UE tal-1990, mill-2036);
  • ir-rwol tal-assorbimenti permanenti domestiċi fis-Sistema għall-Iskambju tal-Kwoti tal-Emissjonijiet tal-UE (ETS);
  • flessibbiltà akbar fi ħdan u bejn is-setturi u l-istrumenti;
  • il-ħtieġa ta’ tranżizzjoni ġusta, ekwa, prammatika, kosteffikaċi u soċjalment ibbilanċjata;
  • in-newtralità teknoloġika u l-kosteffettività;
  • id-disponibbiltà, l-affordabbiltà, is-sigurtà tal-enerġija u l-effiċjenza fl-użu tal-enerġija; u
  • il-ħtiġijiet u l-opportunitajiet ta’ investiment.
• Il-ħtieġa li l-Kummissjoni tivvaluta u tirrapporta kull sentejn dwar l-implimentazzjoni tal-miri intermedji u t-trajettorji tad-dekarbonizzazzjoni, filwaqt li tqis l-aħħar evidenza xjentifika, avvanzi teknoloġiċi u sfidi li qed jevolvu għall-kompetittività globali tal-UE, u l-opportunitajiet għaliha. Il-valutazzjoni tista’, meta jkun xieraq, tkun akkumpanjata minn proposti leġiżlattivi.

• Il-ħtieġa li l-Kummissjoni tirrapporta lill-Parlament Ewropew u lill-Kunsill tal-Unjoni Ewropea, fi żmien 6 xhur mill-ewwel rendikont globali skont il-Ftehim ta’ Pariġi, dwar it-tħaddim tar-regolament. F’dan ir-rapport, il-Kummissjoni għandha tqis elementi bħall-kompetittività tal-industriji Ewropej, l-evoluzzjoni tal-prezzijiet tal-enerġija, l-impatti soċjoekonomiċi, l-avvanzi teknoloġiċi, il-livell stmat ta’ assorbimenti netti fil-livell tal-UE, il-progress lejn l-ilħuq tal-miri intermedji u l-flessibbiltà għall-Istati Membri biex jużaw krediti internazzjonali ta’ kwalità għolja sa 5 % tal-miri u l-isforzi tagħhom għal wara l-2030.

• Il-posponiment sal-2028 tal-applikazzjoni tal-iskambju ta’ kwoti tal-emissjonijiet għall-binjiet, għat-trasport bit-triq u għal setturi addizzjonali (ETS2), kif stabbilit fil-Kapitolu IVa tad-Direttiva 2003/87/KE (ara l-verżjoni konsolidata). Japplikaw ir-regoli stabbiliti fl-Artikolu 30k(2), il-punti (a) sa (e), tad-Direttiva 2003/87/KE (ara s-sommarju). Id-dispożizzjonijiet tal-Artikolu 10a(8b) tad-Direttiva 2003/87/KE japplikaw ukoll fl-2026.

L-adattament għat-tibdil fil-klima jeħtieġ:

• l-istituzzjonijiet tal-UE u l-Istati Membri biex itejbu l-kapaċità ta’ adattament, isaħħu r-reżiljenza u jnaqqsu l-vulnerabbiltà għat-tibdil fil-klima, u biex jiżguraw li l-politiki ta’ adattament ikunu koerenti u ta’ appoġġ reċiproku, jipprovdu benefiċċji għall-politiki settorjali, jgħinu fl-integrazzjoni ta’ dawn il-miżuri fl-oqsma kollha ta’ politika u jiffokaw speċjalment fuq l-aktar nies u setturi vulnerabbli;
• il-Kummissjoni għandha tadotta strateġija u linji gwida tal-UE dwar l-adattament, sat-30 ta’ Lulju 2022, li jistabbilixxu prinċipji u prattiki komuni għall-identifikazzjoni, għall-klassifikazzjoni u għall-ġestjoni tar-riskju klimatiku fl-ippjanar, fl-iżvilupp, fl-eżekuzzjoni u fil-monitoraġġ ta’ proġetti u programmi;
• l-Istati Membri għandhom jadottaw u jimplimentaw strateġiji u pjanijiet nazzjonali ta’ adattament, u jikkunsidraw is-setturi partikolarment vulnerabbli bħall-agrikoltura, sistemi tal-ilma u tal-ikel, flimkien mal-bżonn tal-promozzjoni ta’ soluzzjonijiet ibbażati fuq in-natura u l-ekosistemi.

L-evalwazzjoni tal-progress tal-UE u nazzjonali teħtieġ li l-Kummissjoni:

• tivvaluta sat-30 ta’ Settembru 2023, u kull 5 snin wara dan, il-progress li għamlu l-UE u l-Istati Membri lejn l-objettivi tal-2050 u ta’ adattament, u jekk il-miżuri tal-UE u dawk nazzjonali lejn dawk l-objettivi humiex konsistenti;
• tivvaluta jekk l-abbozzi ta’ miżuri u leġiżlazzjoni tal-UE, inklużi l-proposti baġitarji, humiex konsistenti mal-miri tal-2030 u tal-2040 u mal-objettiv tan-newtralità klimatika tal-2050, u mal-iżgurar tal-progress fl-adattament;
• tivvaluta regolarment il-konsistenza tal-miżuri nazzjonali rilevanti u toħroġ rakkomandazzjonijiet lil Stat Membru fejn isib inkonsistenzi mal-objettiv tan-newtralità klimatika jew mal-iżgurar tal-progress li sar lejn it-tisħiħ tal-kapaċità ta’ adattament, it-tisħiħ tar-reżiljenza u t-tnaqqis tal-vulnerabbiltà għat-tibdil fil-klima.

Ir-regolament jemenda:

• ir-Regolament (KE) Nru 401/2009 dwar l-Aġenzija Ewropea għall-Ambjent u n-Network Ewropew ta’ Informazzjoni u Osservazzjoni tal-Ambjent (ara s-sommarju) u r-Regolament (UE) 2018/1999 dwar il-governanza tal-unjoni tal-enerġija (ara s-sommarju).