Il-kompetittività

Ekonomija kompetittiva hija ekonomija li r-rata sostnuta tal-produttività tagħha tista’ tixpruna t-tkabbir u, konsegwentement, id-dħul u l-benesseri. Il-kompetittività ekonomika ilha ħafna waħda mill-prijoritajiet politiċi ewlenin tal-Unjoni Ewropea (UE).

Biex tirkupra mill-pandemija tal-COVID-19, l-UE adottat NextGenerationEU — pjan ta’ rkupru post-pandemiku ta’ EUR 1.8 triljun (fi prezzijiet tal-2018), imfassal biex jibni Ewropa aktar ekoloġika, aktar diġitali u aktar reżiljenti — u l-Faċilità ta’ Rkupru u Reżiljenzatagħha.

F’dan il-kuntest, l-UE aċċellerat it-tranżizzjoni tagħha lejn in-newtralità tal-klima u t-tmexxija diġitali, biex tittrasforma l-ekonomija, is-soċjetà u l-industrija u l-ħtieġa ta’ teknoloġiji ġodda, investiment u innovazzjoni biex tiżgura li l-UE tibqa’ kompetittiva, filwaqt li tippermetti lill-ekonomiji u lis-soċjetajiet tal-UE jikbru u jnaqqsu l-faqar u l-inugwaljanza. Fi kliem ieħor, biex tinħoloq ekonomija li taħdem għan-nies. Dan jinvolvi, fost affarijiet oħra, bidla mill-produzzjoni lineari għal ekonomija ċirkolari għall-prodotti, is-servizzi, is-swieq u l-mudelli tan-negozju.

Tnejn mill-prijoritajiet tal-Kummissjoni Ewropea li huma ta’ rilevanza partikolari għall-kompetittività tal-UE huma:

• il-Patt Ekoloġiku Ewropew u
• Ewropa adattata għall-era diġitali.

Il-Patt Ekoloġiku Ewropew jiffoka fuq il-ħolqien ta’ ekonomija effiċjenti fl-użu tar-riżorsi u kompetittività. Il-komunikazzjoni ġiet segwita mil-liġi dwar il-klima, u miżuri oħra, biex il-politiki tal-UE dwar il-klima, l-enerġija, it-trasport u t-tassazzjoni jkunu adattati biex inaqqsu l-emissjonijiet netti tal-gassijiet serra b’mill-inqas 55 % sal-2030, meta mqabbla mal-livelli tal-1990.

It-trasformazzjoni diġitali tal-UE hija bbażata prinċipalment fuq:

• l-istrateġija diġitali (2020), għal ekonomija diġitali ġusta u kompetittiva;
• il-kumpass diġitali tal-2030 (2021), imfassal biex jippermetti lin-nies u lin-negozji biex joħolqu futur diġitali ffukat fuq il-bniedem, sostenibbli u għani;
• il-mogħdija proposta lejn id-deċennju diġitali (2021), li tindirizza l-lakuni fil-kapaċitajiet diġitali, u tiffoka fuq il-ħiliet diġitali, l-infrastruttura diġitali, in-negozju diġitali u s-servizzi pubbliċi diġitali.

L-istrateġija industrijali l-ġdida għall-Ewropa, kif aġġornata fl-2021, toffri miżuri ġodda biex jitħaffu t-tranżizzjonijiet ekoloġiċi u diġitali, u twieġeb ukoll għal sejħiet biex jiġu identifikati u mmonitorjati l-indikaturi ewlenin tal-kompetittività ekonomika:

• l-integrità tas-suq intern
• it-tkabbir fil-produttività
• il-kompetittività internazzjonali
• l-investiment pubbliku u privat u
• ir-riċerka u l-investiment fl-iżvilupp.