Ċittadinanza tal-UE

Kwalunkwe ċittadin ta’ Stat Membru tal-UE jitqies bħala ċittadin tal-UE. Iċ-ċittadinanza tal-UE ma tissostitwixxix iċ-ċittadinanza nazzjonali: hija addizzjoni għaliha. Iċ-ċittadinanza tagħtihom id-dritt:

• li jiċċaqilqu u jirrisjedu fi kwalunkwe post fl-UE;
• li jivvotaw u joħorġu bħala kandidati fl-elezzjonijiet tal-gvern lokali u tal-Parlament Ewropew fil-pajjiż tar-residenza tagħhom;
• għal protezzjoni diplomatika u konsulari barra mill-UE mill-awtoritajiet ta’ kwalunkwe Stat Membru jekk il-pajjiż tan-nazzjonalità tagħhom ma jkunx rappreżentat;
• li jressqu petizzjoni lill-Parlament Ewropew u appell quddiem l-Ombudsman Ewropew;
• li jindirizzaw lill-istituzzjonijiet Ewropej bi kwalunkwe lingwa uffiċjali tagħha u li jirċievu tweġiba bl-istess lingwa;
• għan-nondiskriminazzjoni fuq il-bażi tan-nazzjonalità;
• li jistiednu lill-Kummissjoni tissottometti proposta leġiżlattiva (l-inizjattiva taċ-ċittadini),
• li jkollhom aċċess għad-dokumenti tal-korpi u tal-istituzzjonijiet tal-UE, soġġetti għal ċerti kundizzjonijiet (l-Artikolu 15 tat-TFUE).

Iċ-ċittadini kollha tal-UE għandhom aċċess ugwali għas-Servizz Ċivili tal-UE.

Iċ-ċittadinanza Ewropea ġiet definita għall-ewwel darba fl-Artikoli 9-12 tat-Trattat dwar l-Unjoni Ewropea. L-Artikoli 18-25 tat-Trattat dwar il-Funzjonament tal-Unjoni Ewropea (TFUE) stipulaw id-drittijiet li jirriżultaw miċ-ċittadinanza tal-UE.