Annullament

Azzjoni għal annullament hija proċedura legali li biha l-partijiet jistgħu jitolbu lill-Qorti tal-Ġustizzja tal-Unjoni Ewropea (QĠUE) biex tiddeċiedi dwar il-legalità tal-atti tal-UE.

Il-QĠUE tista’ tirrevedi l-legalità ta’:

• atti leġiżlattivi bħal-regolamenti, deċiżjonijiet u direttivi;
• atti tal-Kunsill, tal-Kummissjoni u tal-Bank Ċentrali Ewropew, għajr rakkomandazzjonijiet u opinjonijiet;
• atti tal-Parlament Ewropew u tal-Kunsill Ewropew maħsuba biex jipproduċu effetti legali vis-à-vis partijiet terzi; u
• atti ta’ korpijiet, uffiċċji jew aġenziji tal-UE maħsuba biex jipproduċu effetti legali vis-à-vis partijiet terzi.

Azzjonijiet għal annullament jistgħu jitressqu mit-tliet tipi ta’ applikanti li ġejjin.

• Applikanti Privileġġati. Il-pajjiżi tal-UE, il-Parlament Ewropew, il-Kunsill u l-Kummissjoni Ewropea jistgħu jressqu azzjoni għal annullament purament fl-interessi tal-legalità, mingħajr ma jipprovaw xi interess partikolari.
• Applikanti semi privileġġati. Il-Bank Ċentrali Ewropew, il-Qorti Ewropea tal-Awdituri u l-Kumitat Ewropew tar-Reġjuni jistgħu jressqu azzjoni għal annullament biex jipproteġu l-prerogattivi tagħhom biss.
• Applikanti mhux privileġġati. L-individwi u l-persuni ġuridiċi kollha, inklużi gvernijiet reġjonali jew lokali, jistgħu jressqu att għal annullament biss jekk jipprovaw li l-att ikkontestat huwa indirizzat lilhom jew, jekk mhuwiex indirizzat lilhom, li huwa ta’ tħassib dirett u individwali għalihom. Jistgħu wkoll iressqu tali azzjoni kontra att regolatorju li huwa ta’ tħassib dirett għalihom u ma jinvolvix miżuri ta’ implimentazzjoni.

Raġunijiet għall-annullament ta’ att jinkludu:

• nuqqas ta’ kompetenza;
• ksur ta’ rekwiżit proċedurali essenzjali;
• ksur tat-trattati tal-UE jew tal-Karta tad-Drittijiet Fundamentali;
• ksur ta’ kwalunkwe regola tal-liġi relatata mal-applikazzjoni tat-trattati; u
• l-użu ħażin tal-poteri.

Effetti ta’ annullament. Meta l-QĠUE tordna li att huwa null, l-effetti tal-annullament ġeneralment huwa mill-punt tal-adozzjoni tal-att in kwestjoni (eż tunc) imma tista’ wkoll tkun mid-data tas-sentenza tal-QĠUE (ex nunc). Barra minn hekk, il-QĠUE tista’ wkoll tordna ż-żamma tal-effetti tal-att annullat.

L-awtur tal-att annullat jista’ jieħu l-miżuri meħtieġa biex jikkonforma mas-sentenza tal-QĠUE.