(a) Il-mira tad-defiċit fiskali għall-2011 għandha tiġi milħuqa permezz ta’ miżura eċċezzjonali. L-assi ottenuti b’riżultat tat-trasferiment tal-fondi tal-pensjonijiet tal-banek għas-sistema tas-sigurtà soċjali tal-Istat ma għandhomx jintużaw fi kwalunkwe mod li jkun detrimentali għas-sostenibbiltà fuq terminu ta’ żmien twil tal-finanzi pubbliċi Portugiżi.

(b) Il-Portugall għandu jadotta miżuri sabiex isaħħaħ il-ġestjoni tal-finanzi pubbliċi. Il-Portugall għandu jimplimenta l-miżuri mogħtija fil-Liġi Qafas Baġitarja l-ġdida, inkluż l-istabbilment ta’ qafas baġitarju ta’ terminu medju u l-istabbilment ta’ Kunsill Fiskali indipendenti. Il-qafas baġitarju fil-livelli lokali u reġjonali għandu jissaħħaħ b’mod konsiderevoli, b’mod partikolari billi jipproponi l-għażliet ewlenin għall-allinjament tal-liġijiet finanzjarji rispettivi mar-rekwiżiti tal-Liġi Qafas Baġitarja. Il-Portugall għandu jżid ir-rapportar u l-monitoraġġ tal-finanzi pubbliċi u jirrinforza r-regoli u l-proċeduri ta’ eżekuzzjoni baġitarja. Il-Gvern Portugiż għandu jħejji strateġija għall-validazzjoni u s-saldu ta’ arretrati li se tippreżenta mappa direzzjonali li tistabbilixxi kif u meta se jiġu stabilizzati l-istokkijiet ta’ arretrati u tesplora għażliet varji għas-saldu ta’ arretrati. Rigward is-Sħubiji Pubbliċi-Privati (“PPPs”), il-Gvern Portugiż m’għandux jidħol f’PPPs ġodda qabel ma jiġu disponibbli r-riżultati tal-istudji dwar PPPs eżistenti mbassra fil-Programm u r-riformi legali u istituzzjonali proposti.

(c) Il-Portugall għandu jkompli jsaħħaħ il-funzjonament tas-suq tax-xogħol, b’mod partikolari billi jieħu miżuri li jirriformaw il-leġiżlazzjoni tal-protezzjoni tal-impjieg, l-issettjar tal-pagi u l-politiki attivi tas-suq tax-xogħol.

(d) Fis-settur tal-enerġija, il-Portugall għandu jieħu miżuri biex jiffaċilita d-dħul, jippromwovi l-istabbiliment tas-suq tal-gass Iberjan u jirrevedi l-appoġġ u l-iskemi ta’ kumpens għall-produzzjoni tal-elettriku. Għal industriji oħra tan-netwerk, b’mod partikolari t-trasport, is-servizzi ta’ telekomunikazzjoni u tal-posta, il-Portugall għandu jadotta miżuri addizzjonali biex jippromwovi l-kompetizzjoni u l-flessibilità.

(e) Il-Portugall għandu jkompli jiftaħ l-ekonomija għall-kompetizzjoni. Il-Gvern Portugiż għandu jieħu l-miżuri meħtieġa sabiex jiżgura li l-Istat Portugiż jew kwalunkwe korp pubbliku ieħor ma jikkonkludix, f’kapaċità ta’ azzjonist, ftehimiet li jistgħu jxekklu l-moviment ħieles ta’ kapital jew li jistgħu jinfluwenzaw il-kontroll amministrattiv ta’ kumpaniji. Il-Liġi ta’ Privatizzazzjoni l-ġdida għandha tirrispetta wkoll il-prinċipji ta’ moviment ħieles ta’ kapital u ma tagħti jew tippermetti l-ebda drittijiet speċjali lill-Istat. Għandha ssir reviżjoni tal-liġi tal-kompetizzjoni bil-għan li jitjiebu l-veloċità u l-effettività tal-infurzar tar-regoli tal-kompetizzjoni.

(f) Il-Portugall għandu jtejjeb il-prattiki u r-regoli għall-akkwist pubbliku sabiex jikkontribwixxi għal ambjent kummerċjali aktar kompetittiv u għal infiq pubbliku aktar effiċjenti.

(g) Il-Portugall għandu jadotta miżuri biex itejjeb l-effiċjenza u s-sostenibbiltà tal-SOEs fil-livell ċentrali, reġjonali u lokali. Il-Portugall għandu jipprepara dokument komprensiv ta’ strateġija tal-SOEs li janalizza l-istruttura tat-tariffi u l-provvista tas-servizz u pjan biex jissikka r-rekwiżiti tas-self mill-2012. Il-Portugall għandu jimplimenta l-pjanijiet kurrenti biex fl-SOEs tal-gvern ċentrali jitnaqqsu l-ispejjeż operattivi b’mill-inqas 15 % bħala medja barra mis-settur tas-saħħa u jipprepara pjan ekwivalenti għall-SOEs tal-gvern reġjonali u lokali.

(h) Il-Portugall għandu jħejji arranġament finanzjarju mar-Reġjun Awtonomu ta’ Madeira (“RAM”) b’mod konsistenti mal-Programm. Sakemm jintlaħaq ftehim dwar dak l-arranġament u l-implimentazzjoni tiegħu fil-baġit RAM, il-Portugall għandu jagħmel monitoraġġ mill-qrib tal-eżekuzzjoni tal-baġit tar-RAM, għandu jżomm it-trasferimenti mill-Istat lill-gvern tar-RAM sospiżi u ma għandu jonora l-ebda dejn jew garanziji kummerċjali jew finanzjarji ġodda mill-gvern tar-RAM u s-SOEs tiegħu li mhumiex approvati mill-Ministeru tal-Finanzi.

(a) Id-defiċit tal-gvern ġenerali ma għandux jaqbeż l-4,5 % tal-PDG fl-2012. Il-Portugall għandu jkompli jimmonitorja mill-qrib l-iżviluppi fiskali u jevalwa jekk humiex meħtieġa aġġustamenti ulterjuri ta’ politika sabiex tinkiseb il-mira tal-2012;

(b) Il-Portugall għandu jimmira li jnaqqas in-nefqa fl-2012 b'EUR 6,8 biljun mill-inqas, inkluż tnaqqis fil-pagi u fl-impjiegi fis-settur pubbliku; tnaqqis fil-pensjonijiet; twettiq ta' riorganizzazzjoni komprensiva tal-amministrazzjoni ċentrali, eliminazzjoni ta’ sensji u ineffiċjenzi oħra; tnaqqis fit-trasferiment lejn SOEs; riorganizzazzjoni u tnaqqis fl-għadd ta’ muniċipalitajiet u parroċċi; tnaqqis fl-edukazzjoni u s-saħħa; trasferimenti aktar baxxi lejn l-awtoritajiet reġjonali u lokali; u tnaqqis fin-nefqa kapitali u f'infiq ieħor kif stabbilit fil-Programm;

(c) Min-naħa tad-dħul, il-Portugall għandu jimplimenta miżuri ta’ dħul li jammontaw għal total ta’ EUR 3 biljun, inkluż billi jitwessgħu l-bażijiet tal-VAT permezz ta’ tnaqqis tal-eżenzjonijiet u jiġu rranġati mill-ġdid il-listi ta’ prodotti u servizzi soġġetti għal rati mnaqqsa, intermedji u ogħla; żieda fit-taxxi tas-sisa; twessigħ tal-bażijiet ta’ taxxa korporattiva u dik fuq id-dħul personali billi jonqsu t-tnaqqis fit-taxxi u s-sistemi speċjali; tiġi żgurata l-konverġenza tat-tnaqqis fit-taxxa fuq id-dħul personali applikata għal dħul minn pensjonijiet u mix-xogħol; u tibdil fit-tassazzjoni tal-proprjetà billi l-eżenzjonijiet jitnaqqsu b’mod sostanzjali. Dawn il-miżuri għandhom jiġu kkumplimentati minn azzjoni ta’ ġlieda kontra l-evażjoni tat-taxxa, frodi u informalità;

(d) Il-Portugall għandu jkompli jadotta miżuri biex isaħħaħ l-amministrazzjoni tal-finanzi pubbliċi. Il-Portugall għandu jimplimenta l-miżuri previsti fil-Liġi Qafas Baġitarja l-ġdida, inkluż l-istabbiliment ta’ qafas baġitarju fuq terminu medju. L-oqfsa baġitarji lokali u reġjonali għandhom jissaħħu b’mod konsiderevoli, b’mod partikolari billi l-liġijiet finanzjarji rispettivi jiġu allinjati mar-rekwiżiti tal-Liġi Qafas Baġitarja. Il-Portugall għandu jżid ir-rapportar u l-monitoraġġ tal-finanzi pubbliċi u jsaħħaħ ir-regoli u l-proċeduri tal-eżekuzzjoni baġitarja. Il-Gvern Portuġiż għandu jsaħħaħ l-implimentazzjoni tal-istrateġija għall-validazzjoni u s-saldu tal-arretrati. Dik l-istrateġija tistabbilixxi l-kriterji ta’ prijoritizzazzjoni għall-ħlas tal-kredituri, kif ukoll arranġamenti ta’ governanza sabiex ikun żgurat proċess ġust u trasparenti ta’ saldu fis-setturi kollha. Il-Portugall għandu jimplimenta l-qafas legali u istituzzjonali l-ġdid tal-PPPs. Abbażi tar-riżultati ta’ studju dwar ir-rinegozjar tal-PPPs, il-gvern Portugiż għandu jirrinegozja l-kuntratti rilevanti. Il-Portugall għandu jadotta liġi li tirregola l-ħolqien u l-funzjonament tal-SOEs fil-livelli ċentrali, reġjonali u lokali;

(e) Il-Portugall għandu jirriorganizza u jnaqqas sinifikattivament l-għadd ta’ entitajiet tal-gvern lokali. Dawn il-bidliet għandhom isiru effettivi sal-bidu taċ-ċiklu tal-elezzjonijiet lokali li jmiss;

(f) Il-Portugall għandu jimmodernizza l-amministrazzjoni tal-introjti billi jlesti l-implimentazzjoni tal-Autoridade Tributária e Aduaneira, isaħħaħ ir-rabtiet mal-unitajiet tal-ġbir tad-dħul tas-Sigurtà Soċjali, u jnaqqas l-għadd ta’ uffiċċji muniċipali u jindirizza l-ostakli li jifdal fis-sistema tal-appell tat-taxxa;

(g) Il-Portugall għandu jimplimenta l-arranġement finanzjarju mar-RA M;

(h) Il-Portugall għandu jadotta miżuri biex itejjeb l-effiċjenza u s-sostenibbiltà tal-SOEs fil-livelli ċentrali, reġjonali u lokali. Il-Portugall għandu jimplimenta strateġija biex jirristruttura u jnaqqas id-dejn tal-SOEs, inkluża Parpública, u biex jiżgura kundizzjonijiet aħjar għall-finanzjament mis-suq. Il-Portugall għandu jimplimenta din l-istrateġija sabiex jilħaq bilanċ operattiv fil-livell settorjali sal-aħħar tal-2012;

(i) Il-Portugall għandu jkompli jimplimenta l-programm ta’ privatizzazzjoni. Il-bejgħ dirett tal-fergħa tal-assigurazzjoni ta’ Caixa Geral de Depósitos (CGD), Caixa Seguros, għandu jseħħ fl-2012. Il-proċess ta’ privatizzazzjoni tat-trasportatur bl-ajru nazzjonali TAP, l-operatur tal-ajruport ANA - Aeroportos de Portugal, tal-fergħa tal-merkanzija ta’ CP — Comboios de Portugal, CP Carga, u ta’ CTT — Correios de Portugal għandu jibda fl-2012 bil-ħsieb li jitlesta fl-2013;

(k) Il-gvern Portugiż għandu jippreżenta abbozz ta’ leġiżlazzjoni lill-Parlament Portugiż sabiex jallinja l-pagamenti tat-terminazzjoni tal-impjieg mal-medja tal-Unjoni ta’ 8-12-il jum għal kull sena xogħol u sabiex joħloq fond ta’ kumpens għall-pagamenti tat-terminazzjoni tal-impjieg;

(m) Il-Portugall għandu jippromwovi żviluppi fil-pagi li jkunu konsistenti mal-għanijiet ta’ trawwim tal-ħolqien tal-impjiegi u titjib fil-kompetittività tal-kumpaniji bil-għan li jiġu kkoreġuti l-iżbilanċi makroekonomiċi. Matul il-perjodu tal-Programm, kwalunkwe żieda fil-pagi minimi għandha ssir biss jekk din tkun ġustifikata mill-iżviluppi ekonomiċi u tas-suq tax-xogħol. Għandhom jittieħdu miżuri biex jiġu indirizzati d-dgħufiji fl-iskemi ta’ negozjar tal-pagi attwali, inkluża leġiżlazzjoni sabiex tiddefinixxi mill-ġdid il-kriterji u l-modalitajiet tal-estensjoni tal-ftehimiet kollettivi u biex jiġu faċilitati l-ftehimiet fil-livell tal-impriżi. Sakemm isir dan, l-applikazzjoni tal-estensjonijiet għandha tiġi sospiża;

(n) Il-politiki tas-suq tax-xogħol attiv għandhom jissaħħu wara analiżi ta’ prattiki attwali u l-istabbiliment ta’ pjan ta’ azzjoni miftiehem;

(o) Il-Portugall għandu jimplimenta l-miżuri stabbiliti fil-pjan ta’ azzjoni tiegħu biex tittejjeb il-kwalità tal-edukazzjoni sekondarja u vokazzjonali u tat-taħriġ;

(p) Il-funzjonament tas-sistema ġudizzjarja għandu jittejjeb billi jiġu implimentati l-miżuri proposti taħt il-Pjan Direzzjonali tar-Riforma Ġudizzjarja u bl-applikazzjoni ta’ miżuri mmirati biex progressivament jiġi eliminat ix-xogħol b’lura fil-qrati u biex jitrawmu riżoluzzjonijiet alternattivi ta’ disputi;

(q) Il-Portugall għandu jkompli jiftaħ l-ekonomija tiegħu għall-kompetizzjoni. Il-Gvern Portuġiż għandu jieħu l-miżuri meħtieġa sabiex jiżgura li l-ostakli għal moviment liberu tal-kapital ma jinħolqux permezz tal-azzjoni tiegħu u b'mod partikolari sabiex l-Istat Portugiż jew kwalunkwe entità pubblika ma jikkonkludux, bħala azzjonisti, ftehimiet li jistgħu jfixklu l-moviment liberu tal-kapital jew jinfluwenzaw il-kontroll tal-maniġment tal-kumpaniji. Għandhom jiġu lliberalizzati s-servizzi professjonali billi jittejjeb il-qafas ta’ kwalifiki professjonali u billi jiġu eliminati restrizzjonijiet dwar il-professjonijiet irregolati. Fir-rigward tal-attivitajiet ta' kostruzzjoni u dawk immobiljari, il-Portugall għandu jagħmel ir-rekwiżiti għal fornituri transkonfinali anqas diffiċli filwaqt li jirrevedi l-ostakli għall-istabbiliment tal-fornituri tas-servizzi;

(r) Il-qafas li jirrigwardja l-kompetizzjoni u r-regolamentazzjoni għandu jittejjeb. Il-Portugall għandu jsaħħaħ l-indipendenza u r-riżorsi tal-awtoritajiet regolatorji nazzjonali prinċipali; jimplimenta l-Liġi dwar il-Kompetizzjoni bil-għan li jtejjeb il-veloċità u l-effikaċja tal-infurzar tar-regoli tal-kompetizzjoni; u jimmonitorja l-influss ta’ każijiet ġodda u jirapporta dwar il-funzjonament tal-qorti speċjalizzata għall-kompetizzjoni, regolamentazzjoni u superviżjoni;

(s) Fis-settur tal-enerġija, il-Portugall għandu jieħu miżuri biex jiffaċilita d-dħul fis-suq, jippromwovi l-istabbiliment tas-suq tal-gass Iberjan u għandu jieħu passi ulterjuri lejn traspożizzjoni sħiħa tat-Tielet Pakkett dwar l-Enerġija tal-UE. Il-Portugall għandu jieħu miżuri sabiex jirrevedi l-iskemi ta' appoġġ u ta' kumpens għall-produzzjoni tal-elettriku. Il-Portugall għandu jieħu miżuri sabiex inaqqas renti eċċessivi u jelimina d-dejn tariffarju sal-2020, filwaqt li jiffoka fuq skemi ta' kumpens għal garanzija ta' enerġija, sistema speċjali (tipi ta' enerġija rinnovvabli — eskluż dawk permessi taħt mekkaniżmi ta' offerti — u koġenerazzjoni), kif ukoll sistemi ordinarji (“CMECs” u “CAEs”);

(t) F'industriji oħra tan-netwerk, b’mod partikolari s-servizzi tat-trasport, telekomunikazzjoni u posta, il-Portugall għandu jadotta miżuri addizzjonali biex jippromwovi l-kompetizzjoni u l-flessibilità.

(a) Il-baġit tal-2013 għandu jinkludi miżuri ta’ konsolidazzjoni fiskali li jammontaw għal tal-anqas EUR 3, 4 biljun bil-għan li jitnaqqas id-defiċit tal-amministrazzjoni pubblika fi ħdan il-perjodu ta’ żmien stipulat fl-Artikolu 3(3).

(b) Il-baġit għandu jinkludi miżuri ta’ dħul li jinkludu b’mod partikolari l-aktar it-twessigħ ulterjuri tal-bażijiet tat-taxxa korporattiva u fuq id-dħul personali, taxxi tas-sisa ogħla u bidliet fit-tassazzjoni tal-propjetà, li jrendu kważi EUR 0,7 biljun ta’ dħul addizzjonali.

(c) Il-Portugalli għandu jikkompleta l-eliminazzjoni tax-xogħol pendenti fil-qrati.

(d) Min-naħa tan-nefqa, il-baġit għandu jipprovdi għal tnaqqis ta’ minimalment EUR 2.7 biljun, inkluż tnaqqis tan-nefqiet fl-amministrazzjoni ċentrali, l-edukazzjoni u s-saħħa; trasferimenti għal awtoritajiet lokali u reġjonali; tnaqqis fl-għadd ta’ impjegati fis-settur pubbliku; u nefqiet aktar baxxi mis-SOEs.

(e) Il-Portugall għandu jtejjeb l-ambjent tan-negozju billi jnaqqas il-piż amministrattiv permezz tal-estensjoni tar-riformi ta’ simplifikazzjoni (Punti ta’ Kuntatt Uniku u proġetti li ma jeħtieġu l-ebda awtorizzazzjoni) għas-setturi kollha tal-ekonomija; u billi jnaqqas ir-restrizzjonijiet ta’ kreditu għall-impriżi żgħar u medji, anki permezz tal-implimentazzjoni tad-Direttiva 2011/7/UE tal-Parlament Ewropew u tal-Kunsill tas-16 ta’ Frar 2011 dwar il-ġlieda kontra l-ħlas tard fi transazzjonijiet kummerċjali ( 2 ).

(a) jagħti pariri lill-banek biex issaħħu l-istrutturi protettivi kollaterali tagħhom fuq bażi sostenibbli u jimmonitorjaw il-ħruġ tal-bonds tal-bank garantiti mill-gvern, li ġie awtorizzat sa EUR 35 biljun f’konformità mar-regoli tal-Unjoni dwar l-għajnuna mill-Istat;

(b) jiżgura li l-banek jilħqu l-mira tal-Programm tal-proporzjon Core Tier 1 ta’ 10 % l-aktar tard sal-aħħar tal-2012. Ir-rekwiżiti kapitali li jirriżultaw mill-evalwazzjoni tad-dejn sovran abbażi tal-prezzijiet tas-suq skont l-eżerċizzju ta’ rikapitalizzazzjoni fl-Unjoni kollha kkoordinat mill-Awtorità Bankarja Ewropea għandhom jintlaħqu f’Ġunju 2012 flimkien mal-implikazzjonijiet kapitali li jirriżultaw mill-programm speċjali ta’ spezzjonijiet fuq il-post u t-trasferiment ta’ fondi tal-pensjonijiet tal-banek fis-sistema ta’ sigurtà soċjali tal-Istat. Jekk il-banek ma jkunux jistgħu jilħqu l-livelli limiti tal-kapital meħtieġ sal-iskadenzi stabbiliti, għandha ssir disponibbli l-faċilità ta’ appoġġ għas-solvenza tal-banek li tammonta għal EUR 12-il biljun stabbilita taħt il-Programm;

(c) jiżgura develeraging ibbilanċjat u ordinat tas-settur bankarju, li jibqa’ kruċjali għall-eliminazzjoni ta’ żbilanċi fil-finanzjamenti fuq bażi permanenti. Il-pjanijiet ta’ finanzjament tal-banek għandhom l-għan li jnaqqsu l-proporzjon tas-self għad-depożiti għal valur indikattiv ta’ madwar 120 % sal-aħħar tal-Programm u potenzjalment li jnaqqsu d-dipendenza fuq il-finanzjament mill-Eurosistema sakemm idum il-Programm. Dawk il-pjanijiet ta’ finanzjament għandhom jiġu riveduti kull tliet xhur;

(d) jiżgura s-simplifikazzjoni ta’ CGD, li hija proprjetà tal-Istat, sabiex tiżdied il-bażi kapitali tal-fergħa ewlenija bankarja tagħha kif meħtieġ. Il-bejgħ tal-fergħat tal-assigurazzjoni u s-saħħa tagħha għandu jseħħ qabel tmiem l-2012, waqt li l-bejgħ tal-ishma azzjonistiċi mhux strateġiċi jinsab għaddej. Sa fejn dawn il-ħtiġijiet ma jkunux jistgħu jiġu sodisfatti minn sorsi interni tal-grupp sal-aħħar ta’ Ġunju 2012, il-CGD għandha tingħata appoġġ kapitali mill-gvern minn strutturi protettivi ta’ flus li mhumiex parti mill-faċilità ta’ appoġġ għas-solvenza bankarja;

(e) jottimizza l-proċess għall-irkupru tal-assi trasferiti mill-BPN għat-tliet vetturi bi skop speċjali li huma proprjetà tal-Istat permezz ta’ outsourcing lil parti terza professjonali tal-amministrazzjoni tal-assi, b’mandat li gradwalment tirkupra l-assi maż-żmien. Il-gvern Portugiż għandu jagħżel il-parti li tamministra l-assi permezz ta’ proċess kompetittiv ta’ tender u jinkludi inċentivi xierqa biex jottimizza l-irkupri fil-mandat;

(f) ilesti proposta għall-inkoraġġiment tad-diversifikazzjoni tal-alternattivi ta’ finanzjament għas-settur korporattiv sal-aħħar ta’ Lulju 2012;

(g) jimplimenta miżuri biex jikkonkludi l-istabbiliment ta’ Fond ta’ Riżoluzzjoni bil-ħsieb li jiġi żgurat li jkun kompletament operattiv sa Lulju 2012; jadotta l-avviżi superviżorji dwar il-pjanijiet ta’ rkupru sal-aħħar ta’ Lulju 2012 u jadotta r-regolament dwar il-pjanijiet ta’ riżoluzzjoni sal-aħħar ta’ Ottubru 2012; u jadotta r-regoli applikabli għall-istabbiliment u l-operat ta’ banek tranżitorji f’konformità mar-regoli tal-kompetizzjoni tal-Unjoni sal-aħħar ta’ Settembru 2012. Għandha tingħata prijorità lir-reviżjoni tal-irkupru u l-pjanijiet sussegwenti ta’ riżoluzzjoni tal-banek li huma ta’ importanza sistemika;

(h) jistabbilixxi qafas għall-istituzzjonijiet finanzjarji biex iwettqu ristrutturar tad-dejn barra mill-qorti għall-unitajiet domestiċi u l-SMEs.