—

tannulla d-deċiżjoni kkontestata sa fejn hija teskludi mill-finanzjament tal-Unjoni ċerti spejjeż tar-Repubblika Ellenika f’ammont totali (gross) ta’ EUR 17869131,75 (implikazzjoni għall-baġit ta’ EUR 14857076,98) sostnuti u ddikjarati fil-kuntest tal-FAEŻR fir-rigward tal-miżuri 125A, 321 u 322 (ammont gross ta’ EUR 15631043,52 u implikazzjoni għall-baġit ta’ EUR 12618988,75) u l-miżura 123A (ammont ta’ EUR 2238088,23) kif ukoll f’ammont ta’ EUR 588103,59 [għal spejjeż] sostnuti fil-kuntest tal-FAEG wara l-miżura ta’ kontroll tat-tranżazzjonijiet għas-snin finanzjarji 2011-2014, u

—

tikkundanna lill-konvenuta għall-ispejjeż tar-Repubblika Ellenika.

1.

L-ewwel motiv ibbażat fuq interpretazzjoni u applikazzjoni żbaljata tal-Artikolu 52(4)(c) tar-Regolament (UE) Nru 1306/2013, il-qbiż tal-kompetenza ratione temporis tal-Kummissjoni fir-rigward tal-impożizzjoni tal-korrezzjonijiet finanzjarji kontenzjużi u żball ta’ fatt mill-Kummissjoni fid-determinazzjoni tal-bażi ta’ kalkolu tal-korrezzjoni kontenzjuża.

2.

It-tieni motiv ibbażat fuq l-allegazzjoni, b’mod sussidjarju, ta’ ksur tal-prinċipji ta’ ne bis in idem, ta’ ċertezza legali, ta’ amministrazzjoni tajba, ta’ aspettattivi leġittimi tal-Istat Membru u ta’ proporzjonalità.

3.

It-tielet motiv ibbażat fuq il-ksur tad-dispożizzjonijiet tal-Artikolu 71(2) u tal-Artikolu 75(1) tar-Regolament tal-Kunsill (KE) Nru 1698/2005 ( 2 ), tal-Artikolu 43 tar-Regolament tal-Kummissjoni (KE) Nru 1974/2006 ( 3 ), tad-dispożizzjonijiet tal-programm nazzjonali tal-iżvilupp rurali, adottat mill-Kummissjoni (PŻR 2007-2013), kif ukoll tal-Artikolu 24(2)(b) tar-Regolament tal-Kummissjoni (UE) Nru 65/2011 ( 4 ), fuq nuqqas ta’ bażi legali u ta’ motivazzjoni kif ukoll fuq żball ta’ fatt għal dak li jirrigwarda l-korrezzjoni b’rata fissa ta’ 10 % li ġiet imposta, fid-dawl tal-fatt li l-awtorità ta’ ġestjoni eżerċitat legalment u b’mod sħiħ il-kompetenzi tagħha.

4.

Ir-raba’ motiv, b’mod sussidjarju għat-tielet motiv, ibbażat fuq l-allegazzjoni ta’ ksur tal-prinċipji ta’ proporzjonalità, ta’ aspettattivi leġittimi tal-Istat Membru u tal-linji gwida msemmija fid-dokumenti VI/5339/1997 u C(2015) 3675 tat-8 ta’ Ġunju 2015 kif ukoll fuq motivazzjoni insuffiċjenti dwar ir-rata ta’ 10 % tal-korrezzjoni b’rata fissa li ġiet imposta.

5.

Il-ħames motiv ibbażat fuq il-ksur tad-dispożizzjonijiet tal-Artikolu 24(2) tar-Regolament (UE) Nru 65/2011, fuq żball ta’ fatt u motivazzjoni insuffiċjenti dwar l-allegati nuqqasijiet fl-evalwazzjoni tat-talbiet għal għajnuna mill-awtorità ta’ ġestjoni u l-allegata assenza ta’ kontroll tal-attività ta’ evalwazzjoni, iżda ukoll fuq il-ksur tal-prinċipju ta’ proporzjonalità.

6.

Is-sitt motiv ibbażat fuq il-ksur tad-dispożizzjonijiet tal-Artikolu 24(1) u (2) tar-Regolament (UE) Nru 65/2011 u tal-prinċipju ta’ proporzjonalità, fuq żball ta’ fatt u motivazzjoni insuffiċjenti dwar l-allegat nuqqas fl-evalwazzjoni tan-natura raġonevoli tal-ispejjeż.

7.

Is-seba’ motiv ibbażat fuq l-allegazzjoni li l-korrezzjoni finanzjarja imposta għas-snin finanzjarji mill-2011 sal-2013 għandha tiġi annullata sa fejn hija nieqsa minn bażi legali u minn motivazzjoni, b’mod partikolari għall-2013 sa fejn hija tmur kontra il-prinċipju ta’ amministrazzjoni tajba.

8.

It-tmien motiv, li jinqasam f’ħames partijiet distinti, ibbażat fuq l-allegazzjoni li l-korrezzjoni kontenzjuża ġiet imposta minħabba żball ta’ fatt mill-Kummissjoni b’assenza ta’ motivazzjoni u bi ksur tad-drittijiet tad-difiża tar-Repubblika Ellenika.