14.8.2010   

MT

Il-Ġurnal Uffiċjali tal-Unjoni Ewropea

C 221/25

(1)

Jistgħu jitqiesu bħala kompatibbli mal-għan — fis-sens tal-Artikolu 139(2) KE — u mal-effett utli — fis-sens tat-tielet paragrafu tal-Artikolu 249 KE — tad-Direttiva tal-Kunsill 1999/70/KE, tat-28 ta’ Ġunju 1999, dwar il-ftehim qafas dwar xogħol għal żmien fiss, id-dispożizzjonijiet tal-Artikolu 11(2) tad-Digriet Presidenzjali Grieg 164/2004 li jistabbilixxu li sabiex tiġi kkonstatata l-eżistenza tal-kundizzjonijiet għat-trasformazzjoni ta’ kuntratti għal żmien fiss f’kuntratti għal żmien indeterminat, il-ħaddiem għandu jippreżenta lill-entità kompetenti, f’terminu ta’ dekadenza ta’ xahrejn li jibda jiddekorri mid-dħul fis-seħħ tad-digriet, talba li ssemmi l-elementi li jistabbilixxu l-eżistenza ta’ dawn il-kundizzjonijiet, fid-dawl tal-fatt li t-terminu inkwistjoni huwa terminu ta’ dekadenza u jista’ jtellef lill-ħaddiem mid-dritt għat-trasformazzjoni tal-kuntratti jekk dan ma jippreżentax it-talba tiegħu f’terminu ta’ xahrejn?

(2)

Fid-dawl tal-għan tad-Direttiva tal-Kunsill 1999/70/KE, tat-28 ta’ Ġunju 1999, kif jirriżulta mill-Artikolu 139(2) KE, it-terminu ta’ xahrejn huwa suffiċjenti fid-dawl tal-ħtiġijiet tal-impjegati kollha li huma suġġetti għad-dispożizzjonijiet tal-Artikolu 11 tad-Digriet Presidenzjali 164/2004, sabiex jiġi żgurat l-effett utli tal-għanijiet tad-direttiva inkwistjoni anki biss permezz tal-pubblikazzjoni tad-dispożizzjonijiet tal-Artikolu 11 tad-Digriet Presidenzjali 164/2004 fil-Ġurnal Uffiċjali Grieg?

(3)

Fir-rigward tal-prorogi tat-termini korrispondenti mogħtija skont ir-regoli analogi li kienu fis-seħħ qabel id-Digriet Presidenzjali 164/2004, in-nuqqas ta’ proroga tat-terminu ta’ xahrejn jikkostitwixxi tnaqqis fil-livell ġenerali ta’ protezzjoni tal-ħaddiema li tmur kontra l-klawżola 8(3) tad-Direttiva tal-Kunsill 1999/70/KE, tat-28 ta’ Ġunju 1999?