IL-KUMMISSJONI EWROPEA
Brussell, 12.11.2020
COM(2020) 698 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Unjoni ta' Ugwaljanza: Strateġija dwar l-Ugwaljanza tal-LGBTIQ 2020-2025
LEJN L-UGWALJANZA TAL-LGBTIQ: LIBERU LI TKUN DAK LI INT
M’iniex se nistrieħ fejn jidħol it-tiswir ta’ Unjoni ta’ ugwaljanza. Unjoni fejn inti tista’ tkun dak li int u tħobb lil min trid - mingħajr il-biża’ ta’ kundanni jew diskriminazzjoni.
Għaliex li tgħix ħajtek kif tixtieq mhix l-ideoloġija tiegħek. Hija l-identità tiegħek.
U ħadd ma jista’ qatt jeħodhielek.
Ursula von der Leyen (President tal-Kummissjoni Ewropea)
L-Istat tal-Unjoni 2020
Kulħadd fl-Unjoni Ewropea għandu jkun sigur u ħieles li jkun hu nnifsu. Is-saħħa soċjali, politika u ekonomika tagħna ġejja mill-għaqda tagħna fid-diversità: L-ugwaljanza u n-nondiskriminazzjoni huma valuri ewlenin u drittijiet fundamentali fl-UE, minquxa fit-Trattati tagħha u fil-Karta tad-Drittijiet Fundamentali
. Opportunitajiet indaqs huwa wkoll wieħed mill-pilastri ewlenin tal-Pilastru Ewropew tad-Drittijiet Soċjali. Il-Kummissjoni Ewropea, il-Parlament u l-Kunsill, flimkien mal-Istati Membri, kollha jikkondividu r-responsabbiltà li jipproteġu d-drittijiet fundamentali u jiżguraw trattament ugwali u ugwaljanza għal kulħadd.
F’dawn l-aħħar deċennji, l-iżviluppi leġiżlattivi, il-każistika u l-inizjattivi ta’ politika tejbu l-ħajja ta’ ħafna nies u għenuna nibnu soċjetajiet aktar ugwali u akkoljenti, anki għal persuni leżbjani, omosesswali, bisesswali, trans, mhux binarji, intersesswali u queer (LGBTIQ). Fl-2015, il-Kummissjoni ppreżentat il-“Lista ta’ Azzjonijiet biex tiġi Avvanzata l-Ugwaljanza tal-LGBTI”, l-ewwel qafas ta’ politika li speċifikament jiġġieled id-diskriminazzjoni kontra l-persuni LGBTI. Fil-livell nazzjonali, 21 Stat Membru rrikonoxxew legalment koppji tal-istess ġeneru, waqt li erbgħa introduċew proċeduri legali tar-rikonoxximent tal-ġeneru mingħajr ebda ħtiġijiet mediċi.
Riċerka reċenti turi wkoll li anke meta jkun hemm aċċettazzjoni soċjali u appoġġ akbar għad-drittijiet ugwali, mhux dejjem isarrfu f’titjib ċar fil-ħajja tal-persuni LGBTIQ.
Fi stħarriġ tal-2019, l-Aġenzija tal-Unjoni Ewropea għad-Drittijiet Fundamentali (FRA) sabet li d-diskriminazzjoni abbażi tal-orjentazzjoni sesswali, l-identità/ l-espressjoni tal-ġeneru u l-karatteristiċi tas-sess kienet fil-fatt qed tiżdied fl-UE: 43 % tal-persuni LGBT iddikjaraw li ħassewhom diskriminati fl-2019, meta mqabbla ma’ 37 % fl-2012.
Id-diskriminazzjoni kontra l-persuni LGBTIQ tippersisti madwar l-UE. Għal diversi persuni LGBTIQ fl-UE, għadu mhux sigur li juru affezzjoni pubblika, li jkunu franki dwar l-orjentazzjoni sesswali, l-identità tal-ġeneru, l-espressjoni tal-ġeneru u l-karatteristiċi tas-sess tagħhom (kemm jekk fid-dar kif ukoll fuq il-post tax-xogħol), li sempliċiment ikunu huma stess mingħajr ma jħossuhom mhedda. Għadd importanti ta’ persuni LGBTIQ huma wkoll f’riskju ta’ faqar u esklużjoni soċjali. Mhux kollha jħossuhom siguri li jirrapportaw abbużi verbali u vjolenza fiżika lill-pulizija.
Il-kriżi tal-COVID-19 tefgħet pressjoni ġdida fuq l-aktar gruppi vulnerabbli, u l-persuni LGBTIQ mhumiex eċċezzjoni. Ir-restrizzjonijiet tal-konfinament għalqu lil ħafna LGBTIQ, żgħażagħ jew xjuħ, f'ambjenti ostili fejn jistgħu jkunu f'riskju ta’ vjolenza jew livelli dejjem jiżdiedu ta' ansjetà jew depressjoni. Aħbarijiet foloz li nfirxu ma kullimkien saħansitra tefgħu l-ħtija fuq il-persuni LGBTIQ li xerrdu l-virus.
|
46 % ta’ dawk li wieġbu għal stħarriġ qalu li ma jħossuhomx komdi (totalment jew moderatament) li jkollhom persuna intersesswali eletta fl-ogħla pożizzjoni politika.
|
|
57 % ta’ dawk li wieġbu għall-istess stħarriġ qalu li ma jkunux komdi (totalment jew moderatament) dwar it-tfal tagħhom li jkunu f’relazzjoni ma’ persuna trans.
|
|
62 % ta’ dawk intersesswali li wieġbu għall-istħarriġ ħassew li saret diskriminazzjoni kontrihom f’mill-inqas qasam wieħed tal-ħajja fit-12-il xahar ta’ qabel minħabba li kienu intersesswali.
|
L-esperjenza ta’ kuljum tal-persuni LGBTIQ tvarja wkoll b’mod sinifikanti madwar l-UE. Għalkemm l-aċċettazzjoni soċjali tal-persuni LGBTI żdiedet minn 71 % fl-2015 għal 76 % fl-2019, fil-fatt kienet naqset f’disa’ Stati Membri.
Hemm ukoll xejra inkwetanti f’partijiet tal-UE ta’ inċidenti aktar frekwenti kontra l-LGBTIQ bħal attakki fuq avvenimenti pubbliċi LGBTIQ inklużi l-parati Pride, l-hekk imsejħa dikjarazzjonijiet ta’ “żona ħielsa mill-ideoloġija LGBTIQ”, u intimidazzjoni omofobika fiċ-ċelebrazzjonijiet tal-karnival. L-organizzazzjonijiet tas-soċjetà ċivili li jipproteġu u javvanzaw id-drittijiet tal-persuni LGBTIQ jirrapportaw li aktar ma jmur aktar qed jiffaċċjaw ostilità, li tikkoinċidi maż-żieda tal-moviment kontra l-ġeneru (u kontra l-LGBTIQ). Huwa imperattiv li l-Istati Membri jirreaġixxu malajr biex ireġġgħu lura dawn l-iżviluppi l-ġodda.
L-Unjoni Ewropea għandha tkun minn ta’ quddiem fl-isforzi biex tipproteġi aħjar id-drittijiet tal-persuni LGBTIQ.
B’din l-ewwel strateġija dwar l-ugwaljanza tal-LGBTIQ, il-Kummissjoni tindirizza l-inugwaljanzi u l-isfidi li jaffettwaw lill-persuni LGBTIQ, sabiex tersaq lejn Unjoni ta’ Ugwaljanza. Tagħti attenzjoni partikolari għad-diversità tal-ħtiġijiet tal-persuni LGBTIQ u ta’ dawk li huma l-aktar vulnerabbli, inklużi dawk li jesperjenzaw diskriminazzjoni intersezzjonali u persuni trans, mhux binarji u intersesswali, li huma fost il-gruppi l-inqas aċċettati fis-soċjetà u, ġeneralment jesperjenzaw aktar diskriminazzjoni u vjolenza minn oħrajn fil-komunitajiet LGBTI. Id-diskriminazzjoni ħafna drabi hija multidimensjonali u approċċ intersezzjonali biss jista’ jwitti t-triq għal bidliet sostenibbli u ta' rispett fis-soċjetà.
|
40 % ta’ dawk li wieġbu għal stħarriġ indikaw l-oriġini etnika jew l-isfond ta’ immigrazzjoni bħala bażi addizzjonali għal diskriminazzjoni, minbarra li huma LGBTI.
|
|
Il--pożizzjoni ġeografika remota tista’ tkun fattur ta’ vulnerabbiltà addizzjonali. 47 % tal-persuni LGBTI li wieġbu fil-gruppi kollha fl-UE jgħixu f'belt kbira, 11 % jgħixu fis-subborgi jew fil-periferija ta’ belt kbira, 30 % jgħixu f'raħal jew belt żgħira, u 13 % jgħixu f'żona rurali.
|
Din l-istrateġija ssegwi s-sejħiet għal azzjoni mill-Istati Membri, il-Parlament Ewropew, bl-appoġġ qawwi mill-Intergrupp għad-Drittijiet tal-LGBTI, u s-soċjetà ċivili. Tistabbilixxi serje ta’ azzjonijiet immirati f’erba’ pilastri:
1.L-indirizzar tad-diskriminazzjoni kontra l-persuni LGBTIQ;
2.L-iżgurar tas-sigurtà tal-persuni LGBTIQ;
3.Il-bini tas-soċjetajiet inklużivi għal-LGBTIQ; u
4.It-tmexxija tal-ġlieda għall-ugwaljanza tal-LGBTIQ madwar id-dinja.
Dawn l-azzjonijiet immirati se jiġu kkombinati ma’ attenzjoni għal tħassib speċifiku tal-LGBTIQ fl-integrazzjoni tal-ugwaljanza mtejba fil-politiki, il-leġislazzjoni u l-programmi ta’ finanzjament kollha tal-UE.
Din l-istrateġija għandha l-għan li tgħin biex isemmgħu l-ilħna ta’ persuni LGBTIQ u li tlaqqa’ flimkien l-Istati Membri u l-atturi fil-livelli kollha fi sforz komuni biex jiġġieldu b’mod effikaċji s-sentiment kontra l-ugwaljanza għall-LGBTIQ. Qed tiġi adottata fi żmien fejn qed naraw l-erożjoni tad-drittijiet fundamentali jew ir-rigress tagħhom f’xi Stati Membri. Filwaqt li l-UE għandha standards għoljin ħafna fil-qasam tad-drittijiet fundamentali, dawn mhux dejjem jiġu applikati b’mod ugwali. Din l-istrateġija tikkumplimenta l-inizjattivi eżistenti u futuri għall-promozzjoni tad-dimensjoni tal-UE tal-ugwaljanza b’mod ġenerali.
1.L-INDIRIZZAR TAD-DISKRIMINAZZJONI KONTRA L-PERSUNI LGBTIQ
|
19 % tal-persuni leżbjani, omosesswali u bisesswali, 35 % tal-persuni trans u 32 % tal-persuni intersesswali ħassewhom diskriminati fuq il-post tax-xogħol fis-sena ta’ qabel.
|
|
46 % tal-persuni LGBTI qatt ma jgħidu lill-persunal mediku jew lill-fornituri tal-kura tas-saħħa li huma LGBTI.
|
|
51 % tal-persuni intersesswali u 48 % tal-persuni trans, 35 % tal-leżbjani u 31 % tal-irġiel omosesswalijgħixu f'unitajiet domestiċi li għandhom diffikultajiet finanzjarji.
|
Id-diskriminazzjoni taffettwa lill-persuni LGBTIQ f’kull stadju tal-ħajja. Minn età żgħira, tfal u żgħażagħ LGBTIQ, u tfal ta’ LGBTIQ jew familji qawsalla, fejn wieħed mill-membri huwa LGBTIQ, huma komunement stigmatizzati, u għaldaqstant fil-mira ta' diskriminazzjoni u bullying, li jaffettwaw il-prestazzjoni edukattiva tagħhom u l-prospetti ta’ impjieg, il-ħajja ta’ kuljum tagħhom u l-benesseri personali u dak tal-familja tagħhom.
Fl-impjieg, il-persuni LGBTIQ qed ikomplu jesperjenzaw diskriminazzjoni waqt ir-reklutaġġ, fuq il-post tax-xogħol u fi tmiem il-karriera tagħhom, kuntrarjament għal-leġiżlazzjoni tal-UE f’dan il-qasam. Ħafna jiffaċċjaw ostakli biex isibu impjiegi ġusti u stabbli, li jistgħu jżidu r-riskju tal-faqar, l-esklużjoni soċjali u l-problema ta’ persuni mingħajr dar. Riċerka reċenti wriet li l-persuni trans jiltaqgħu ma’ ostakli addizzjonali meta jfittxu li jaċċessaw is-suq tax-xogħol.
Il-persuni LGBTI jbatu minn rati għoljin ta’ persuni mingħajr dar. It-tkeċċija mid-dar tal-familja u d-diskriminazzjoni li jesperjenzaw fl-aċċess għall-akkomodazzjoni huma fatturi importanti li jwasslu biex jispiċċaw mingħajr dar, b'mod partikolari għaż-żgħażagħ LGTBIQ. Huwa stmat li bejn 25 u 40 % taż-żgħażagħ li qed jesperjenzaw il-problema ta’ persuni mingħajr dar huma identifikati bħala LGBTI.
Id-diskriminazzjoni abbażi tal-orjentazzjoni sesswali, l-identità/l-espressjoni tal-ġeneru u l-karatteristika tas-sess jista’ jkollha wkoll impatt sinifikanti fuq is-saħħa fiżika, mentali u sesswali kif ukoll fuq il-benesseri tal-persuni LGBTIQ. Ir-riċerka tal-UE wriet inugwaljanzi sinifikanti fis-saħħa bejn il-komunità LGBTIQ u l-popolazzjoni kollha kemm hi. Barra minn hekk, il-persuni LGBTIQ ħafna drabi joqogħdu lura milli jfittxu kura tas-saħħa, minħabba li esperjenzaw jew jibżgħu minn reazzjonijiet ostili mill-professjonisti tas-saħħa u għadhom ibatu biex jaċċessaw medikazzjoni u kura ta’ kwalità u bi prezz raġonevoli, inkluża l-kura komunitarja u soċjali. Dawk li għandhom diżabilitajiet, huma anzjani, migranti, jew li ġejjin minn minoranzi etniċi jew reliġjużi huma partikolarment vulnerabbli għad-diskriminazzjoni. Il-kriżi tal-COVID-19 żiedet din il-vulnerabbiltà.
1.1
L-infurzar u t-titjib tal-protezzjoni legali kontra d-diskriminazzjoni
Id-dritt tal-UE li jiżgura protezzjoni legali kontra d-diskriminazzjoni huwa essenzjali għall-avvanz tal-ugwaljanza bejn il-persuni LGBTIQ, kif inhi l-ġurisprudenza tal-QĠUE. Tali protezzjoni taqa’ taħt oqfsa legali differenti skont jekk id-diskriminazzjoni li l-individwi LGBTIQ jistgħu jesperjenzaw hijiex fuq il-bażi tal-orjentazzjoni sesswali (il-qafas kontra d-diskriminazzjoni) jew is-sess, inkluż il-bidla fis-sess (il-qafas tal-ugwaljanza bejn il-ġeneri).
Id-Direttiva dwar l-Ugwaljanza fl-Impjiegi tinkorpora d-dritt li wieħed ma jiġix diskriminat, u lanqas ma jkun soġġett għal molestja, f’kuntesti ta’ impjieg abbażi tal-orjentazzjoni sesswali. F’deċiżjoni reċenti, il-QĠUE ċċarat li dikjarazzjoni pubblika ta’ persuna li teskludi r-reklutaġġ ta’ persuna ta’ ċerta orjentazzjoni sesswali tista’ tikkostitwixxi diskriminazzjoni pprojbita. Filwaqt li din id-direttiva tistabbilixxi linja bażi b’saħħitha, l-impatt tad-dispożizzjonijiet tagħha huwa limitat b’żewġ modi: minn sfidi fl-applikazzjoni, u minn limitazzjonijiet fil-kamp ta’ applikazzjoni, peress li l-leġiżlazzjoni ma tmurx lil hinn mill-impjieg.
Il-Kummissjoni se tiżgura l-applikazzjoni rigoruża mill-Istati Membri tad-drittijiet koperti mid-Direttiva dwar l-Ugwaljanza fl-Impjiegi u se tirrapporta dwar l-applikazzjoni tad-Direttiva fl-2021. Ir-rapport se jeżamina jekk l-Istati Membri segwewx ir-rakkomandazzjoni tal-Kummissjoni biex jikkunsidraw li jaħtru korp tal-ugwaljanza biex jindirizza d-diskriminazzjoni fuq il-bażi ta’ reliġjon jew twemmin, diżabbiltà, età jew orjentazzjoni sesswali fl-ambitu tal-applikazzjoni tad-Direttiva. Sal-2022, il-Kummissjoni se tressaq kwalunkwe leġiżlazzjoni meħtieġa b’riżultat ta’ dan, b’mod partikolari dwar ir-rwol tal-korpi tal-ugwaljanza.
Id-Direttiva dwar l-Ugwaljanza bejn is-Sessi tinkorpora d-dritt li wieħed ma jiġix diskriminat, u lanqas ma jkun soġġett għal molestja, fl-aċċess għall-impjiegi, il-kundizzjonijiet tax-xogħol (inkluża l-paga) u l-iskemi okkupazzjonali tas-sigurtà soċjali abbażi tas-sess, inkluż il-bidla fis-sess. Il-prinċipju ta’ trattament ugwali għall-irġiel u n-nisa jipprekludi t-tkeċċija għal raġuni relatata mal-bidla fis-sess. Id-dritt tal-UE kif ikkonfermat mill-Qorti tal-Ġustizzja tal-Unjoni Ewropea (QĠUE) jipprovdi wkoll għad-dritt li ma ssirx diskriminazzjoni abbażi tas-sess, inkluż għal darb’oħra l-bidla fis-sess fl-aċċess għall-prodotti u s-servizzi disponibbli għall-pubbliku u fis-sigurtà soċjali statutorja. Dan il-qafas legali għadu ma jsemmix espliċitament il-karatteristiċi tas-sess bħala raġuni pprojbita għad-diskriminazzjoni.
Fl-2008, il-Kummissjoni ħarġet proposta għal Direttiva dwar Trattament Ugwali, li testendi l-protezzjoni legali tal-UE kontra d-diskriminazzjoni abbażi ta’, fost oħrajn, l-orjentazzjoni sesswali lil hinn mill-qasam tal-impjieg u t-taħriġ vokazzjonali: il-Kummissjoni tappella lill-Kunsill biex jadotta l-proposta sabiex jingħalqu l-lakuni fil-protezzjoni tal-liġi tal-UE kontra d-diskriminazzjoni bbażata fuq l-orjentazzjoni sesswali.
Ir-riċerka appoġġata mill-Kummissjoni, il-Kunsill tal-Ewropa u s-soċjetà ċivili wriet li l-Istati Membri għandhom approċċi diverġenti fir-rigward tal-protezzjoni tal-persuni LGBTIQ, speċjalment persuni mhux binarji, intersesswali u queer, kontra d-diskriminazzjoni. Il-Kummissjoni se tappoġġa wkoll lill-Istati Membri biex iżidu l-iskambji tagħhom tal-aħjar prattika dwar il-protezzjoni legali kontra d-diskriminazzjoni fuq il-bażi tal-orjentazzjoni sesswali, l-identità/l-espressjoni tal-ġeneru u karatteristiċi tas-sess f'diversi oqsma. Filwaqt li xi Stati Membri żiedu l-karatteristiċi tas-sess bħala raġuni għad-diskriminazzjoni fil-leġiżlazzjoni nazzjonali tagħhom dwar l-ugwaljanza, oħrajn taw interpretazzjoni wiesgħa għar-raġuni tas-“sess”. Bl-istess mod, ir-raġunijiet għall-espressjoni tal-ġeneru jidhru fil-leġiżlazzjoni kontra d-diskriminazzjoni fi ftit Stati Membri biss. Il-Kummissjoni qed teżamina kif persuni mhux binarji, intersesswali u querr jistgħu jiġu protetti aħjar kontra d-diskriminazzjoni.
It-teknoloġiji ġodda jġibu opportunitajiet ġodda biex itejbu l-ħajja tal-Ewropej, iżda jippreżentaw ukoll sfidi ġodda. Filwaqt li l-intelliġenza artifiċjali (IA) tista’ tintuża biex tindirizza ħafna kwistjonijiet tas-soċjetà, tista' wkoll taggrava d-diskriminazzjoni fil-ħajja reali, inkluż kontra persuni LGBTIQ, u l-inugwaljanzi bejn il-ġeneri. B’mod partikolari, kif enfasizzat f’rieżami reċenti tal-politika tal-Kummissjoni, waħda mill-isfidi emerġenti fil-qasam tar-rikonoxximent tal-wiċċ tas-sistemi tal-IA hija l-identifikazzjoni ta’ uċuħ trans, speċjalment matul perjodi ta’ tranżizzjoni. Il-Kummissjoni qed tippjana li tressaq qafas regolatorju li jindirizza speċifikament il-preġudizzju u d-diskriminazzjoni mhux ġustifikata inerenti fis-sistemi tal-IA b’riskju għoli, inklużi s-sistemi bijometriċi. Se tipproponi rekwiżiti speċifiċi, anki dwar dokumentazzjoni, relatata mal-kwalità tas-settijiet tad-data tat-taħriġ u l-proċeduri tal-ittestjar għad-detezzjoni u l-korrezzjoni tal-preġudizzju. Dawn ir-rekwiżiti jservu biex jipprevjenu effetti diskriminatorji negattivi minn kmieni, u jippermettu monitoraġġ kontinwu u viġilanza għall-konformità mal-leġiżlazzjoni eżistenti dwar l-ugwaljanza matul iċ-ċiklu tal-ħajja tal-IA.
1.2
Il-promozzjoni tal-inklużjoni u d-diversità fuq il-post tax-xogħol
Lil hinn mill-projbizzjoni tad-diskriminazzjoni, ambjenti tax-xogħol diversi u inklużivi jgħinu biex joħolqu opportunitajiet indaqs fis-suq tax-xogħol u jtejbu r-riżultati tan-negozju. Id-diversità u l-inklużjoni huma kruċjali biex jiġu stimulati ideat ġodda u titrawwem soċjetà innovattiva u b'saħħitha. Pereżempju, hemm korrelazzjoni ppruvata bejn l-inklużjoni LGBTIQ u r-redditi fuq l-assi, l-innovazzjoni u l-produttività.
Il-Kummissjoni tippromwovi l-ġestjoni tad-diversità permezz tal-Pjattaforma tal-UE tal-Karti dwar id-Diversità. Il-firmatarji adottaw politiki ta’ diversità u inklużjoni, stabbilew networks LGBTIQ interni, ipprovdew taħriġ għall-impjegati tagħhom, iċċelebraw il-Jum Internazzjonali kontra l-Omofobija, it-Transfobija, il-Bifobija u l-Interfobija (IDAHOT), u pparteċipaw f’avvenimenti “Pride” nazzjonali. L-impjegati LGBTIQ jistgħu jibbenefikaw minn koordinazzjoni mtejba bejn il-Pjattaforma tal-UE, il-karti tad-diversità nazzjonali u negozji individwali. Il-Kummissjoni se tkompli trawwem il-ħolqien ta’ karti tad-diversità nazzjonali u tagħmel sforzi speċifiċi biex tippromwovi l-ugwaljanza tal-LGBTIQ permezz ta’ azzjoni ddedikata fil-qafas tal-Pjattaforma tal-UE tal-Karti dwar id-Diversità.
Il-Kummissjoni se tippromwovi l-użu tal-Fond Soċjali Ewropew Plus (FSE+) biex ittejjeb il-pożizzjoni soċjoekonomika tal-persuni LGTBIQ l-aktar emarġinati u tiżviluppa inizjattivi li jiffokaw fuq gruppi speċifiċi, bħas-sottogruppi omosesswali, leżbjani, bisesswali, trans u intersesswali. Il-Kummissjoni se tiġbor evidenza rigward l-ostakli għal ugwaljanza sħiħa esperjenzata fl-impjiegi, iżda wkoll f'oqsma oħra, bħall-protezzjoni soċjali. Dan ix-xogħol se jkun ta’ input għal-linji gwida għall-Istati Membri dwar it-titjib tal-parteċipazzjoni trans u intersesswali fis-suq tax-xogħol. Il-Kummissjoni se trawwem l-iskambju tal-aħjar prattika bejn l-Istati Membri u se tipprovdi data affidabbli u komparabbli f’dan il-qasam bl-appoġġ tal-FRA. Il-Kummissjoni se tkompli tappoġġa miżuri fl-istrateġija għall-ugwaljanza bejn il-Ġeneri maħsuba biex ittejjeb il-pożizzjoni soċjoekonomika tan-nisa, inklużi dawk li huma rilevanti għan-nisa LBTIQ.
L-intrapriżi soċjali, u l-ekonomija soċjali inġenerali, jistgħu jkunu fuq quddiem nett fl-indirizzar tad-diskriminazzjoni kontra l-LGBTIQ. Jistgħu jiżviluppaw programmi, taħriġ u skemi speċifiċi li jwasslu għal żieda fl-inklużjoni ta’ persuni LGBTIQ. Fl-2021, il-Kummissjoni se tippubblika pjan ta’ azzjoni Ewropew għall-ekonomija soċjali li se jrawwem l-iżvilupp ta’ dawn l-intrapriżi u l-organizzazzjonijiet, u se jindirizza kif l-aħjar jiġu inklużi gruppi emarġinati speċifiċi fis-soċjetà, inklużi l-persuni LGBTIQ.
Il-Kummissjoni se tmexxi bl-eżempju bħala impjegatur. Fil-qafas tal-istrateġija l-ġdida tagħha dwar ir-riżorsi umani, hija se tkompli tistinka għal ambjent tax-xogħol kompletament inklużiv, billi tipprovdi b’mod partikolari appoġġ u gwida aktar immirati għall-persunal LGBTIQ, kif ukoll ittejjeb b’mod sinifikanti l-użu ta’ lingwaġġ li juża ġens newtrali fil-komunikazzjoni kollha. Il-Kummissjoni tistieden lill-istituzzjonijiet l-oħra tal-UE biex jieħdu passi biex irawmu d-diversità u l-inklużjoni fil-postijiet tax-xogħol rispettivi tagħhom.
1.3
Il-ġlieda kontra l-inugwaljanza fl-edukazzjoni, is-saħħa, il-kultura u l-isport
Il-Kummissjoni se tappoġġa t-trawwim tal-iskambji tal-aħjar prattika bejn l-Istati Membri u l-esperti dwar l-iżgurar ta’ edukazzjoni sigura u inklużiva għat-tfal, iż-żgħażagħ u l-adulti kollha. Pereżempju, grupp ġdid ta’ esperti li jiżviluppa proposti dwar strateġiji għall-ħolqien ta’ ambjenti ta’ tagħlim ta’ appoġġ għal gruppi f’riskju ta’ nuqqas ta’ kisba u għall-appoġġ tal-benesseri fl-iskola, se jindirizza l-istereotipi tal-ġeneru fl-edukazzjoni, il-bullying u l-fastidju sesswali. Barra minn hekk, l-Istrateġija komprensiva li jmiss tal-Kummissjoni għad-drittijiet tat-tfal, se tiżgura aċċess indiskriminat għad-drittijiet, il-protezzjoni u s-servizzi anke għat-tfal LGBTIQ. Il-promozzjoni ta’ edukazzjoni aktar inklużiva hija fl-interess tal-istudenti u ċ-ċittadini kollha, billi tikkontribwixxi għall-ġlieda kontra l-istereotipi u għall-bini ta' soċjetà aktar ġusta għal kulħadd.
Ir-riċerka dwar l-esperjenzi intersezzjonali ta’ persuni LGBTIQ, bħal dawk li huma anzjani jew għandhom diżabbiltà, spiss hija nieqsa. Orizzont Ewropa se tappoġġa studji dwar il-ġeneri u riċerka intersezzjonali rilevanti għal persuni LGBTIQ, inkluża wkoll dwar is-saħħa. Il-Kummissjoni se xxerred ir-riżultati tar-riċerka, inklużi r-rakkomandazzjonijiet u l-gwida politika tagħhom, u torganizza konferenza mal-UE kollha permezz tal-Pjattaforma tal-Politika tas-Saħħa tal-UE. Se tipproponi wkoll li l-Grupp ta’ Tmexxija dwar il-Promozzjoni u l-Prevenzjoni (SGPP) jikkunsidra prattika tajba vvalidata relatata mas-saħħa f'dan il-qasam li tista' tiġi implimentata mill-Istati Membri.
L-Istati Membri se jkunu mħeġġa jorganizzaw taħriġ għall-professjonisti tal-kura tas-saħħa biex iqajmu kuxjenza dwar il-ħtiġijiet tas-saħħa tal-irġiel omosesswali u bisesswali; nisa leżbjani u bisesswali; persuni intersesswali; u persuni trans u biex jiġu evitati d-diskriminazzjoni u l-istigmatizzazzjoni fl-aċċess għas-servizzi tas-saħħa. Il-materjal ta’ taħriġ mill-proġett HEALTH4LGBTI se jkun disseminat aktar u offrut lill-Istati Membri. Il-Kummissjoni se tinkoraġġixxi u tiffaċilita l-iskambji tal-aħjar prattika bejn l-Istati Membri dwar l-indirizzar tal-isfidi tas-saħħa mentali li jiffaċċjaw għadd sinifikanti ta’ persuni LGBTIQ.
Il-preġudizzji tal-ġeneru u stereotipi oħra huma fost il-muturi ewlenin ta’ attitudnijiet negattivi jew ostili lejn persuni LGBTIQ f'ħafna komunitajiet. B’mod partikolari, dawn jistgħu jwasslu għall-esklużjoni u l-istigmatizzazzjoni ta’ kull min ma jikkonformax ma’ normi/immaġni fissi ta’ nisa u rġiel, bħall-persuni mhux binarji u queer. Is-setturi tal-media, tal-kultura u tal-isport huma għodod b’saħħithom li jibdlu l-attitudnijiet u jisfidaw il-preġudizzji bejn il-ġeneri u stereotipi oħra.
Il-Kummissjoni se tappoġġa proġetti li jużaw l-espressjoni kulturali biex jiġġieldu d-diskriminazzjoni, jibnu fiduċja u aċċettazzjoni, u jippromwovu l-inklużjoni sħiħa tal-persuni LGBTIQ. Il-Kummissjoni se ttejjeb l-integrazzjoni tal-ugwaljanza tal-LGBTIQ fl-inizjattivi relevanti kollha dwar l-impjiegi, l-edukazzjoni u s-saħħa (b’mod partikolari dawk li jirrigwardaw inizjattivi dwar is-saħħa mentali u l-prevenzjoni tal-HIV/AIDS) u programmi ta’ finanzjament tal-UE (eż. EU4Health u Erasmus+). Il-Pjan futur tal-Ewropa biex Jingħeleb il-Kanċer se jqis is-sitwazzjoni tal-gruppi vulnerabbli, inklużi l-persuni LGBTIQ. Proġetti li jindirizzaw diskriminazzjoni intersezzjonali u inugwaljanza esperjenzati minn persuni LGBTIQ, preġudizzji tal-ġeneru u stereotipi oħra jistgħu jkunu ffinanzjati permezz tal-programm “Ċittadini, Ugwaljanza, Drittijiet u Valuri”.
Erasmus+ jiffinanzja proġetti li jgħinu u jagħtu s-setgħa liż-żgħażagħ li qed jiffaċċjaw diskriminazzjoni minħabba l-ġeneru jew l-orjentazzjoni sesswali tagħhom u ostakli soċjali oħra. Bl-istess mod, il-Korp Ewropew ta’ Solidarjetà jista’ jippromwovi attivitajiet ta’ solidarjetà mmirati lejn il-ġlieda kontra r-razziżmu u d-diskriminazzjoni, u li fl-istess waqt jiffavorixxu aktar parteċipazzjoni. Għall-perjodu ta’ programmazzjoni l-ġdid, se tingħata attenzjoni partikolari għall-inklużjoni, l-ugwaljanza u d-diversità fil-Programmi tal-Erasmus+ u tal-Korp Ewropew ta’ Solidarjetà. Se jistabbilixxi approċċ multidimensjonali biex il-programm isir aktar inklużiv u biex jintlaħqu aktar persuni b’inqas opportunitajiet, anki permezz tal-introduzzjoni ta’ formati aktar flessibbli u aċċessibbli; miżuri ta’ appoġġ biex jgħinu fit-tħejjija u fl-akkumpanjament tal-parteċipanti; u miżuri finanzjarji biex jindirizzaw l-ostakli li jiffaċċjaw gruppi sottorappreżentati biex jieħdu sehem fil-programmi.
1.4
Il-ħarsien tad-drittijiet tal-applikanti LGBTIQ għal protezzjoni internazzjonali
Is-sistema komuni Ewropea tal-ażil tindirizza s-sitwazzjoni u l-ħtiġijiet speċifiċi ta’ applikanti vulnerabbli (inklużi persuni LGBTIQ) għall-protezzjoni internazzjonali. Il-Kummissjoni għamlet proposti biex issir riforma tas-sistema Ewropea komuni tal-ażil biex billi tagħmilha aktar reżiljenti u effettiva filwaqt li tirrispetta l-ħtiġijiet ta’ protezzjoni ta’ applikanti bħal dawn.
Il-Kummissjoni se trawwem skambji ta’ prattika tajba bejn l-Istati Membri dwar l-indirizzar tal-ħtiġijiet ta’ applikanti LGBTIQ għal protezzjoni internazzjonali, billi tiffoka fuq:
-kif tiggarantixxi kundizzjonijiet ta’ akkoljenza siguri u xierqa, inkluża l-akkomodazzjoni, għal persuni LGBTIQ li japplikaw għal protezzjoni internazzjonali;
-standards ta’ protezzjoni li japplikaw fir-rigward tad-detenzjoni tagħhom (fejn applikabbli); u
-kif tipprevjeni l-eżaminazzjoni tal-applikazzjonijiet tagħhom milli jkunu influwenzati minn diskriminazzjoni kontra persuni LGBTIQ u/jew stereotipi.
L-Uffiċċju Ewropew ta’Appoġġ fil-qasam tal-Ażil se jtejjeb it-taħriġ għall-uffiċjali ta’ protezzjoni u l-interpreti biex jiżgura li l-eżami tal-applikazzjonijiet ta’ persuni LGBTIQ għal protezzjoni internazzjonali ma jiġux influwenzati minn stereotipi u jkunu konformi mal-liġi internazzjonali/tal-UE u strumenti rilevanti oħra.
Fid-diskussjonijiet mal-Istati Membri dwar il-prijoritajiet tal-finanzjament tal-Fond għall-Ażil u l-Migrazzjoni, il-Kummissjoni se tenfasizza l-ħtieġa li tinbena l-kapaċità għar-rispett tad-drittijiet tal-persuni tal-applikanti għall-protezzjoni internazzjonali u migranti oħra.
Il-Kummissjoni Ewropea se tiżgura sinerġija fl-implimentazzjoni tal-istrateġija tal-Ugwaljanza tal-LGBTIQ u l-pjan ta’ azzjoni tal-UE dwar l-integrazzjoni u l-inklużjoni. Wieħed mill-prinċipji ewlenin tal-pjan ta’ azzjoni l-ġdid se jkun “Inklużjoni għal kulħadd”. Se tqis l-isfidi li jirriżultaw mill-intersezzjoni bejn l-istatus ta’ migrant u fatturi oħra ta’ diskriminazzjoni, bħall-orjentazzjoni sesswali u l-ġeneru.
Azzjonijiet ewlenin mill-Kummissjoni Ewropea:
üsal-2022 tipproponi kull leġiżlazzjoni li ssegwi r-rapport li jmiss dwar l-implimentazzjoni tad-Direttiva dwar l-Ugwaljanza fl-Impjiegi, b’mod partikolari biex jissaħħaħ ir-rwol tal-korpi tal-ugwaljanza;
ütiżgura protezzjoni xierqa ta’ applikanti vulnerabbli (inkluż LGBTIQ) fil-kuntest tas-sistema Ewropea komuni tal-ażil u r-riforma tagħha;
ütiżgura appoġġ għall-effettività tal-ugwaljanza tal-LGBTIQ fil-Fond għall-Migrazzjoni u l-Ażil;
ütappoġġa riċerka dwar is-saħħa ta’ rilevanza għall-persuni LGBTIQ, inklużi l-komunitajiet trans u intersesswali, permezz ta' Orizzont Ewropa.
|
Il-Kummissjoni se tappoġġa lill-Istati Membri biex:
üjiżguraw protezzjoni legali kontra d-diskriminazzjoni fuq il-bażi tal-orjentazzjoni sesswali, l-identità/l-espressjoni tal-ġeneru u karatteristiċi tas-sess f'diversi oqsma;
üitejbu edukazzjoni sigura u inklużiva għat-tfal u ż-żgħażagħ LGBTIQ;
üjindirizzaw il-bżonnijiet speċifiċi tal-applikanti LGBTIQ għal protezzjoni internazzjonali filwaqt li jiżguraw kundizzjonijiet ta’ akkoljenza, detenzjoni u akkomodazzjoni siguri;
üitejbu t-taħriġ tal-uffiċjali tal-protezzjoni u l-interpreti li jittrattaw it-talbiet għall-ażil minn persuni LGBTIQ.
|
2.TIĠI ŻGURATA S-SIGURTÀ TAL-PERSUNI LGBTIQ
|
38 % tal-persuni LGBTI esperjenzaw fastidju motivat mill-mibegħda talli kienu LGBTI fit-12-il xahar qabel l-istħarriġ.
|
|
22 % tal-persuni intersesswali esperjenzaw attakk fiżiku u/jew sesswali talli kienu intersesswali, fl-aħħar 5 snin.
|
|
21 % biss mill-vittmi LGBTI ta’ vjolenza fiżika jew sesswali motivata mill-mibegħda fl-aħħar 5 snin għamlu rapport lil xi organizzazzjoni, inklużi l-pulizija u l-korpi tal-ugwaljanza.
|
Kulħadd għandu d-dritt li jgħix b'mod sigur, kemm jekk ikun id-dar, fil-pubbliku jew online. Il-persuni LGBTIQ ibatu b’mod sproporzjonat minn reati ta’ mibegħda, diskors ta’ mibegħda u vjolenza. Biex tiġġieled id-diskors ta’ mibegħda online, fl-2016, il-Kummissjoni laħqet ftehim ma’ kumpaniji tal-IT dwar kodiċi ta’ kondotta volontarju. L-evalwazzjonijiet dwar l-implimentazzjoni tal-kodiċi juru li l-orjentazzjoni sesswali hija l-aktar raġuni komunement irrappurtata għad-diskors ta’ mibegħda (33,1 %). Il-kriżi tal-COVID-19 wasslet għal livelli saħansitra ogħla ta’ mibegħda, vjolenza u diskriminazzjoni kontra persuni LGBTIQ, u l-polarizzazzjoni tas-soċjetà kollha kemm hi.
L-avukati tad-drittijiet jiffaċċjaw it-theddid u l-marċi paċifiċi jintlaqgħu bil-mibegħda.Ħafna drabi, il-persuni LGBTIQ jiġu abbużati bħala filagi fid-diskors politiku, inkluż waqt kampanji elettorali. Ir-riżoluzzjonijiet dwar “żona ħielsa mil-LGBT” għandhom l-għan li jiċħdu d-drittijiet u l-libertajiet fundamentali lill-komunità LGBTIQ. It-tikkettar tal-LGBTIQ bħala “ideoloġija” qed jinfirex fil-komunikazzjoni online u offline u l-istess jgħodd fir-rigward tal-kampanja li għaddejja kontra l-hekk imsejħa “ideoloġija tal-ġeneru”. Iż-żoni ħielsa mil-LGBTIQ huma żoni ħielsa mill-umanità, u ma għandhomx post fl-Unjoni tagħna.
2.1
It-tisħiħ tal-protezzjoni legali għal persuni LGBTIQ kontra reati ta’ mibegħda, diskors ta’ mibegħda u vjolenza
Il-protezzjoni legali kontra reati ta’ mibegħda u diskors ta’ mibegħda kontra l-persuni LGBTIQ tvarja b’mod sinifikanti bejn l-Istati Membri. Permezz tal-Grupp ta’ Livell Għoli tal-UE dwar il-ġlieda kontra r-razziżmu, il-ksenofobija u forom oħra ta’ intolleranza, il-Kummissjoni se torganizza diskussjonijiet immirati mal-awtoritajiet nazzjonali u s-soċjetà ċivili biex tikkondividi l-aħjar prattika dwar l-implimentazzjoni tal-leġiżlazzjoni nazzjonali f’dawn l-oqsma.
Fil-livell Ewropew, filwaqt li l-UE adottat leġiżlazzjoni sekondarja li tikkriminalizza reati ta’ mibegħda u diskors ta’ mibegħda bbażati fuq ir-razziżmu u l-ksenofobija, ma hemm l-ebda sanzjoni speċifika fil-livell tal-UE għal diskors ta’ mibegħda u reati ta’ mibegħda kontra l-persuni LGBTIQ. Bħala l-ewwel pass importanti, fl-2021, il-Kummissjoni se tippreżenta inizjattiva biex testendi l-lista ta’ “reati tal-UE” skont l-Artikolu 83(1) tat-Trattat dwar il-Funzjonament tal-Unjoni Ewropea (TFUE) biex tkopri reati ta' mibegħda u diskors ta’ mibegħda, inkluż meta dawn ikunu mmirati lejn persuni LGBTIQ.
Il-Kummissjoni se tieħu azzjoni wkoll biex tindirizza l-vjolenza abbażi tal-ġeneru, kif imħabbar fl-istrateġija dwar l-ugwaljanza bejn il-ġeneri. Il-programm dwar “Iċ-Ċittadini, l-Ugwaljanza, id-Drittijiet u l-Valuri” huwa mistenni jiffinanzja proġetti li għandhom l-għan li jipprevjenu u jiġġieldu kontra r-reati ta’ mibegħda, id-diskors ta' mibegħda u l-vjolenza kontra l-persuni LGBTIQ, filwaqt li l-programm tal-Ġustizzja se jipprovdi opportunitajiet ta’ finanzjament biex jippromwovi d-drittijiet tal-vittmi tal-kriminalità, inklużi l-persuni LGBTIQ.
2.2
Tisħiħ tal-miżuri għall-ġlieda kontra d-diskors ta’ mibegħda u , id-diżinformazzjoni kontra l-LGBTIQ online
Il-Kummissjoni se tipproponi Att dwar is-Servizzi Diġitali qabel tmiem l-2020. Filwaqt li l-proposta mhux se tiddefinixxi dak li huwa meqjus bħala diskors illegali, se jkollha l-għan li tindirizza b’mod aktar effettiv it-tipi kollha ta’ kontenut illegali ospitat fuq diversi tipi ta’ pjattaformi, waqt li tiżgura r-rispett għad-drittijiet fundamentali, inkluża l-libertà tal-espressjoni. Il-Kummissjoni se tespandi wkoll l-impenn u l-kooperazzjoni tagħha ma’ kumpaniji u pjattaformi tal-IT, anki fil-kuntest tal-implimentazzjoni tal-kodiċi ta' kondotta.
Il-Kummissjoni se tiżgura t-traspożizzjoni korretta u l-applikazzjoni rigoruża tad-Direttiva riveduta dwar is-Servizzi tal-Media Awdjoviżiva, li ssaħħaħ il-protezzjoni kontra l-kontenut li jinċita l-mibegħda jew il-vjolenza u tipprojbixxi l-komunikazzjonijiet kummerċjali awdjoviżivi milli jinkludu jew jippromwovu d-diskriminazzjoni, inkluż fuq il-bażi tas-sess u tal-orjentazzjoni sesswali. Fl-2020, il-Kummissjoni se tadotta Pjan ta’ Azzjoni għad-Demokrazija Ewropea biex tindirizza sfidi ewlenin, inkluża l-ġlieda kontra d-diżinformazzjoni, il-protezzjoni minn interferenza esterna u l-manipulazzjoni fl-elezzjonijiet, il-libertà tal-media u l-pluraliżmu.
2.3
Rappurtar ta’ reati ta' mibegħda kontra l-persuni LGBTIQ u skambji ta’ prattiki tajbin
Il-Kummissjoni se tkompli tippromwovi ambjent sigur li fih il-vittmi LGBTIQ jistgħu jirrapportaw ir-reati, u protezzjoni u appoġġ aħjar għall-vittmi tal-vjolenza bbażata fuq il-ġeneru, tal-vjolenza domestika u ta’ reati ta’ mibegħda kontra l-LGBTIQ. Skont l-istrateġija tal-UE dwar id-drittijiet tal-vittmi (2020-2025), se tgħin lill-Istati Membri jiżguraw li s-servizzi ta’ appoġġ għall-vittmi, inklużi djar siguri, ikunu disponibbli u aċċessibbli għal persuni LGBTIQ. Il-Kummissjoni se tippromwovi wkoll appoġġ integrat u mmirat għall-vittmi bi bżonnijiet speċjali, inklużi l-vittmi LGBTIQ ta’ reati ta’ mibegħda, permezz tal-possibbiltajiet ta’ finanzjament mill-UE.
Il-Kummissjoni se tkompli taħdem mal-Istati Membri biex tiżgura l-implimentazzjoni sħiħa u korretta tad-Direttiva dwar id-Drittijiet tal-Vittmi, b’segwitu għar-rapport ta’ implimentazzjoni ta’ Mejju 2020. Il-Kummissjoni se tqajjem kuxjenza dwar id-drittijiet tal-vittmi permezz ta’ kampanja ta’ komunikazzjoni mal-UE kollha u tiffaċilita l-iskambju ta’ prattiki tajbin (bħat-twaqqif ta’ “desk qawsalla” fl-għases tal-pulizija lokali).
Permezz ta’ kooperazzjoni aktar mill-qrib mal-Aġenzija tal-UE għat-Taħriġ fl-Infurzar tal-Liġi (CEPOL), u mal-Kunsill tal-Ewropa, l-Istati Membri u s-soċjetà ċivili, fi grupp ta’ ħidma ġdid dwar taħriġ fuq ir-reati ta' mibegħda u l-bini ta’ kapaċità għall-infurzar tal-liġi, il-Kummissjoni Ewropea se tappoġġa taħriġ biex tgħin lill-persunal tal-infurzar jidentifika u jirreġistra preġudizzju LGBTIQ-fobiku u jżid ir-rapportar tar-reati.
2.4Il-protezzjoni u l-promozzjoni tad-dritt tal-persuni LGBTIQ għas-saħħa fiżika u mentali
Prattiki ta’ ħsara bħal kirurġija mhux vitali jew intervent mediku fuq tfal u adolexxenti intersesswali mingħajr il-kunsens personali u kompletament infurmat tagħhom (mutilazzjoni ġenitali intersesswali), il-medikalizzazzjoni furzata ta’ persuni trans u prattiċi ta’ konverżjoni mmirati lejn persuni LGBTIQ, jista’ jkollhom riperkussjonijiet serji fuq is-saħħa. Il-Kummissjoni se trawwem l-iskambju ta’ prattika tajba mill-Istati Membri dwar it-tmiem ta’ dawn il-prattiki. L-abort furzat u l-isterilizzazzjoni furzata u prattiki dannużi oħra kontra n-nisa u l-bniet huma forom ta’ vjolenza abbażi tal-ġeneru u ksur serju tad-drittijiet tan-nisa u tat-tfal. Il-Kummissjoni se tinkludi wkoll perspettiva intersezzjonali fir-Rakkomandazzjoni dwar prattiki dannużi kontra n-nisa u l-bniet imħabbra fl-Istrateġija dwar l-Ugwaljanza bejn il-Ġeneri 2020-2025.
Azzjonijiet ewlenin mill-Kummissjoni Ewropea:
ütippreżenta inizjattiva fl-2021 biex testendi l-lista ta’ “reati tal-UE” (l-Artikolu 83 tat-TFUE) biex tkopri reati ta’ mibegħda u diskors ta’ mibegħda, inkluż meta dawn ikunu mmirati lejn persuni LGBTIQ;
ütipprovdi opportunitajiet ta’ finanzjament għal inizjattivi li għandhom l-għan li jiġġieldu r-reati ta’ mibegħda, diskors ta’ mibegħda, vjolenza u prattiki ta’ ħsara kontra persuni LGBTIQ (programm “Ċittadini, Ugwaljanza, Drittijiet u Valuri”) u tippromwovi d-drittijiet tal-vittmi ta’ reati, inklużi persuni LGBTIQ (il-programm “Ġustizzja”);
ütressaq Rakkomandazzjoni dwar il-prevenzjoni ta’ prattiki dannużi kontra n-nisa u l-bniet.
|
Il-Kummissjoni se tappoġġa lill-Istati Membri biex:
üjiskambjaw l-aħjar prattiki dwar il-protezzjoni kontra d-diskors ta’ mibegħda u r-reati ta’ mibegħda kontra persuni LGBTIQ;
üjippromwovu ambjent sigur u ta’ appoġġ għall-vittmi LGBTIQ ta’ reati;
üitejbu t-taħriġ u l-bini tal-kapaċità għall-infurzar tal-liġi biex jidentifikaw u jirreġistraw aħjar il-preġudizzju fobiku kontra l-persuni LGBTIQ u jżidu r-rappurtar tar-reati.
|
3.IL-BINI TAS-SOĊJETAJIET INKLUŻIVI GĦAL-LGBTIQ
|
53 % tal-persuni LGBTI kważi qatt jew rarament jiftħu qalbhom dwar il-fatt li jkunu LGBTI.
|
|
21 Stat Membru jirrikonoxxu l-unjoni bejn koppji tal-istess ġeneru, filwaqt li 15-il Stat Membru jipprevedu l-adozzjoni minn koppji tal-istess ġeneru.
|
|
Ir-rikonoxximent legali tal-ġeneru bbażat fuq l-awtodeterminazzjoni japplika biss f'4 Stati Membri.
|
Il-Karta tad-Drittijiet Fundamentali tinkorpora d-dritt għar-rispett għall-ħajja privata u għall-ħajja tal-familja, kif ukoll id-dritt tat-tfal għall-protezzjoni u l-kura kif meħtieġ għall-benesseri tagħhom . Hemm firxa wiesgħa ta’ mudelli tal-familja fl-UE, inklużi l-familji qawsalla b’membru wieħed jew aktar li jkun LGBTIQ. Minħabba differenzi fil-liġi tal-familja bejn l-Istati Membri, ir-relazzjonijiet familjali jistgħu ma jkunux rikonoxxuti meta familji qawsalla jaqsmu l-fruntieri interni tal-UE. Din is-sitwazzjoni ġiet aggravata bil-miżuri ta’ konfinament minħabba l-COVID-19. Id-diffikultajiet li ltaqgħu magħhom xi familji qawsalla biex ikollhom id-dokumenti u r-relazzjonijiet tagħhom rikonoxxuti legalment, wasslu għal problemi addizzjonali matul il-pandemija, hekk kif il-pajjiżi għalqu l-fruntieri tagħhom. F’xi każijiet, persuni ġew imblukkati fil-fruntieri u ma tħallewx jingħaqdu mal-familji tagħhom waqt il-konfinament.
Persuni trans, mhux binarji u intersesswali spiss mhumiex rikonoxxuti fil-liġi jew fil-prattika, u dan jirriżulta f’diffikultajiet legali kemm għall-ħajja privata tagħhom kif ukoll għall-ħajja familjali tagħhom, inkluż f’sitwazzjonijiet transfruntiera.
3.1
L-Iżgurar tad-drittijiet tal-persuni LGBTIQ f’sitwazzjonijiet transfruntiera
Il-liġi tal-UE dwar il-moviment liberu, b’mod partikolari d-Direttiva dwar il-Moviment Liberu, tirrikonoxxi d-dritt taċ-ċittadini kollha tal-UE u tal-membri tal-familja tagħhom, inklużi partners reġistrati u familji qawsalla, li jiċċaqalqu u jirrisjedu liberament fl-UE.
Il-Kummissjoni se tkompli tiżgura l-applikazzjoni korretta tal-liġi dwar il-moviment liberu, anki biex tindirizza diffikultajiet speċifiċi li jipprevjenu lill-persuni LGBTIQ u lill-familji tagħhom milli jgawdu d-drittijiet tagħhom. Dan jinkludi djalogi ddedikati mal-Istati Membri fir-rigward tal-implimentazzjoni tas-sentenza Coman, li fiha l-QĠUE ċċarat li t-terminu “konjugi” kif użat fid-Direttiva dwar il-Moviment Liberu japplika wkoll għal sħab tal-istess sess. Jekk ikun meħtieġ, il-Kummissjoni se tieħu azzjoni legali.
Sabiex titjieb iċ-ċertezza legali għaċ-ċittadini tal-UE li jeżerċitaw id-drittijiet tagħhom ta’ moviment liberu, u biex tiġi żgurata applikazzjoni aktar effettiva u uniformi tal-leġiżlazzjoni dwar il-moviment liberu madwar l-UE, il-Kummissjoni se tirrieżamina l-linji gwida tal-2009 dwar il-moviment liberu, fl-2022. Il-linji gwida rieżaminati se jirriflettu d-diversità tal-familji, u b’hekk jikkontribwixxu għall-iffaċilitar tal-eżerċizzju tad-drittijiet tal-moviment liberu għall-familji kollha, inklużi l-familji qawsalla. Il-Kummissjoni se tkompli tiġbor evidenza tal-kwistjonijiet esperjenzati fir-realtà minn persuni LGBTIQ u mill-familji tagħhom f’sitwazzjonijiet transfruntiera.
Il-liġi sostantiva tal-familja taqa’ taħt il-kompetenza tal-Istati Membri. Il-leġiżlazzjoni tal-UE dwar il-liġi tal-familja tapplika f’każijiet transfruntiera jew f’każ ta’ implikazzjonijiet transfruntiera u tkopri l-persuni LGBTIQ. Din tinkludi regoli li jiffaċilitaw ir-rikonoxximent mill-Istati Membri tas-sentenzi ta’ xulxin dwar id-divorzju, ir-responsabbiltajiet u d-drittijiet tal-ġenituri (inklużi l-kustodja tat-tfal u d-drittijiet ta' żjara), il-manteniment (għal koppji u tfal), il-proprjetà li tkun fil-kuntest ta’ żwieġ u sħubijiet reġistrati, u kwistjonijiet ta’ suċċessjoni (għal koppji u tfal).
Il-Kummissjoni se tiżgura l-applikazzjoni rigoruża tal-liġi transfruntiera tal-familja fil-konfront tal-familji qawsalla billi ssaħħaħ l-enfażi tagħha fuq dan il-grupp fil-monitoraġġ tal-implimentazzjoni tagħha.
3.2
It-titjib tal-protezzjoni legali għall-familji qawsalla f'sitwazzjonijiet transfruntiera
Il-leġiżlazzjoni nazzjonali f’aktar minn nofs l-Istati Membri fiha dispożizzjonijiet li japplikaw għall-ġenituri qawsalla. Madankollu, u minkejja l-liġi eżistenti tal-UE kif interpretata mill-Qorti tal-Ġustizzja, meta dawn il-familji jivvjaġġaw jew jiċċaqilqu lejn Stati Membri oħra, xi drabi jkun hemm riskju li r-rabta tat-tfal mal-ġenitur (i) LGBTIQ tagħhom tinqata’, li jista’ jkollu impatt fuq id-drittijiet tat-tfal. Is-sħab miżżewġin u rreġistrati jistgħu jesperjenzaw ukoll diffikultajiet biex jivvjaġġaw u jmorru jgħixu fi Stat Membru ieħor.
Il-Kummissjoni se tinsisti għar-rikonoxximent reċiproku tar-relazzjonijiet tal-familja fl-UE. Jekk xi ħadd huwa ġenitur f’pajjiż, huwa ġenitur f’kull pajjiż. Fl-2022, il-Kummissjoni se tipproponi inizjattiva leġiżlattiva orizzontali biex tappoġġa r-rikonoxximent reċiproku tal-paternità bejn l-Istati Membri, pereżempju, ir-rikonoxximent fi Stat Membru wieħed tal-paternità attribwit b'mod validu fi Stat Membru ieħor.
Barra minn hekk, il-Kummissjoni se tkompli tappoġġa l-isforzi tal-Istati Membri biex jirrispettaw id-drittijiet tal-familji qawsalla kif inkorporati fil-Karta tad-Drittijiet Fundamentali tal-UE (b’mod partikolari d-dritt għall-ħajja privata u tal-familja u d-drittijiet tat-tfal), li tapplika meta tkun implimentata l-liġi tal-UE. Hija se tesplora miżuri possibbli biex tappoġġa r-rikonoxximent reċiproku tal-istatus legali tal-konjugi tal-istess ġeneru u tas-sħab reġistrati f’sitwazzjonijiet transfruntiera.
3.3
It-titjib tar-rikonoxximent ta’ identitajiet trans u mhux binarji, u ta’ persuni intersesswali
Ir-rekwiżiti li japplikaw għal individwi li jixtiequ jbiddlu l-ġeneru legali tagħhom ivarjaw sostanzjalment skont l-Istat Membru. F’dawn l-aħħar snin, għadd dejjem jikber ta’ Stati Membri biddlu b’mod sinifikanti l-leġiżlazzjoni tagħhom dwar ir-rikonoxximent tal-ġeneru lejn mudell ta’ awtodeterminazzjoni personali. Oħrajn iżommu għadd ta’ rekwiżiti għall-fini tar-rikonoxximent tal-ġeneru ta’ persuni trans u mhux binarji. Dawn jistgħu ma jkunux proporzjonati, u jistgħu jiksru l-istandards tad-drittijiet tal-bniedem, kif deċiż mill-Qorti Ewropea tad-Drittijiet tal-Bniedem f’każ ta’ rekwiżiti ta’ kirurġija u sterilizzazzjoni.
Il-Kummissjoni se trawwem skambji tal-aħjar prattika bejn l-Istati Membri dwar kif jistabbilixxu leġiżlazzjoni u proċeduri legali ta’ rikonoxximent tal-ġeneru aċċessibbli u proċeduri bbażati fuq il-prinċipju tal-awtodeterminazzjoni u mingħajr limiti ta’ età.
Il-Kummissjoni se tniedi djalogu transsettorjali ma’ diversi partijiet ikkonċernati, inklużi l-Istati Membri, negozji u professjonisti fil-kura medika, biex tqajjem kuxjenza dwar identitajiet trans u mhux binarji, u persuni intersesswali, u tinkoraġġixxi l-inklużività fl-azzjonijiet u l-proċeduri rilevanti kollha, inkluż fil-Kummissjoni.
3.4
It-trawwim ta’ ambjent abilitanti għas-soċjetà ċivili
Il-Kummissjoni se tipprovdi finanzjament biex trawwem ambjent utli, sostenibbli għall-organizzazzjonijiet tas-soċjetà ċivili LGBTIQ. Din l-istrateġija tirreferi għall-programmi ta’ finanzjament rilevanti tal-UE u l-prijoritajiet ta’ finanzjament tagħhom għall-ugwaljanza tal-LGBTIQ. Minbarra l-finanzjament ibbażat fuq proġetti, il-programm 2021-2027 “Ċittadini, Ugwaljanza, Drittijiet u Valuri” se jżid l-opportunitajiet ta’ finanzjament għal organizzazzjonijiet żgħar u ta’ daqs medju u jagħmel għotjiet operazzjonali disponibbli għan-networks li jippromwovu l-ugwaljanza tal-LGBTIQ. Il-fondi tal-UE jeħtieġ li jikkontribwixxu għall-bini ta’ soċjetà nondiskriminatorja u jappoġġaw l-isforzi tal-Kummissjoni biex tiżgura Unjoni ta’ Ugwaljanza.
Barra minn hekk, il-Kummissjoni se żżomm u tinkoraġġixxi djalogu strutturat u miftuħ u konsultazzjoni mas-soċjetà ċivili fil-liġi u fit-tfassil tal-politika, b’mod partikolari biex tiddiskuti l-implimentazzjoni tal-istrateġija. Se tippromwovi djalogu mal-Istati Membri, l-aġenziji tal-UE, is-sħab soċjali u s-settur privat biex tgħin fl-informazzjoni dwar l-iżvilupp ulterjuri ta’ politiki biex tiġi indirizzata d-diskriminazzjoni kontra persuni LGBTIQ. Il-Kummissjoni se tkompli tqajjem kuxjenza dwar il-ħtieġa għall-ugwaljanza u n-nondiskriminazzjoni tal-LGBTIQ, u tipparteċipa f'avvenimenti pubbliċi li jikkostitwixxu tragwardi għall-komunità LGBTIQ.
Iż-żgħażagħ għandhom rwol kritiku fil-bini ta’ soċjetajiet inklużivi. Flimkien mal-Istati Membri, il-Kummissjoni ġabret l-opinjoni tagħhom permezz tal-proċess tad-djalogu tal-UE maż-żagħżagħ, li wassal għal 11-il għan Ewropew dwar iż-żgħażagħ li (fost oħrajn) sejħu għall-ugwaljanza tal-ġeneri kollha u għal soċjetajiet inklużivi. Dawn l-għanijiet dwar iż-żgħażagħ jirriflettu l-opinjonijiet taż-żgħażagħ Ewropej u jippreżentaw viżjoni għal Ewropa li tippermetti liż-żgħażagħ jirrealizzaw il-potenzjal sħiħ tagħhom u tgħin biex tnaqqas l-ostakli għaż-żgħażagħ b’anqas opportunitajiet biex jipparteċipaw fil-ħajja soċjali u ekonomika.
Azzjonijiet ewlenin mill-Kummissjoni Ewropea:
ütirrieżamina l-linji gwida tal-2009 dwar il-moviment liberu fl-2022 biex tirrifletti d-diversità tal-familji u tikkontribwixxi għall-iffaċilitar tal-eżerċizzju tad-drittijiet tal-moviment liberu għall-familji kollha, inklużi l-familji qawsalla;
ütipproponi inizjattiva leġiżlattiva orizzontali dwar ir-rikonoxximent tal-paternità bejn l-Istati Membri;
ütesplora miżuri possibbli biex jappoġġaw ir-rikonoxximent reċiproku bejn l-Istati Membri tas-sħubija bejn l-istess ġeneru;
ütagħmel disponibbli opportunitajiet ta’ finanzjament, b’mod partikolari permezz tal-programm “Ċittadini, Ugwaljanza, Drittijiet u Valuri”.
|
Il-Kummissjoni se tappoġġa lill-Istati Membri biex:
üjistabbilixxu leġiżlazzjoni u proċeduri aċċessibbli dwar ir-rikonoxximent legali tal-ġeneru;
üitejbu l-inklużjoni ta’ persuni trans, mhux binarji u intersesswali f'dokumentazzjoni, applikazzjonijiet, stħarriġ u proċessi rilevanti;
üjapplikaw b’mod rigoruż id-dritt għall-moviment liberu u r-regoli tal-UE dwar il-liġi tal-familja.
|
4.IT-TMEXXIJ TAS-SEJĦA GĦALL-UGWALJANZA TAL-LGBTIQ MADWAR ID-DINJA
Id-drittijiet LGBTIQ huma drittijiet tal-bniedem u l-persuni LGBTIQ għandhom ikunu jistgħu jgawdu bis-sħiħ id-drittijiet tagħhom kullimkien, dejjem.
Madankollu, f’partijiet differenti tad-dinja, is-sitwazzjoni ta’ persuni LGBTIQ għadha prekarja ħafna, għax jesperjenzaw ksur serju tad-drittijiet u abbużi mingħajr aċċess għall-ġustizzja. Ħafna jiffaċċjaw diskriminazzjoni, molestja, persekuzzjoni, inkarċerazzjoni jew saħansitra qtil jew il-piena tal-mewt - sempliċement għax huma min huma. Il-Kummissjoni u s-Servizz Ewropew għall-Azzjoni Esterna (SEAE) huma impenjati li jipproteġuhom u jabilitawhom biex jasserixxu d-drittijiet tagħhom. Is-sitwazzjoni tal-persuni LGBTIQ tvarja wkoll konsiderevolment bejn il-pajjiżi. Huwa meħtieġ approċċ imfassal apposta biex jimmassimizza l-impatt tal-appoġġ tal-UE, bl-użu tal-għodod kollha għad-dispożizzjoni tagħna. L-UE tmexxi djalogi politiċi ma’ pajjiżi sħab biex tindirizza liġijiet, politiki u prattiċi diskriminatorji kontra persuni LGBTIQ u tiddikriminalizza r-relazzjonijiet bejn persuni tal-istess ġeneru u l-identitajiet trans. Se tmexxi bl-eżempju, turi solidarjetà u tibni reżiljenza fil-protezzjoni u l-avvanz tad-drittijiet tal-persuni LGBTIQ madwar id-dinja, u tikkontribwixxi għal irkupru globali li jagħti s-setgħa lil kulħadd biex jirnexxi soċjalment, ekonomikament u politikament u ma jħalli lil ħadd l-art.
Dejjem aktar, id-difensuri tad-drittijiet tal-bniedem qed jirriskjaw ħajjithom biex javvanzaw l-ugwaljanza tal-LGBTIQ. Sitwazzjonijiet ostili jew ta’ theddida għall-ħajja spiss iġiegħlu lill-persuni LGBTIQ jaħarbu mill-pajjiżi ta’ oriġini tagħhom. Impenn qawwi għall-promozzjoni u l-protezzjoni tad-drittijiet tal-bniedem jinsab fil-qalba tal-attivitajiet kollha tal-UE. Huwa importanti li l-azzjonijiet interni u esterni tal-UE f’dan il-qasam ikunu konsistenti u jsaħħu lil xulxin. L-UE se tavvanza t-tmexxija globali tagħha fil-protezzjoni tal-universalità u l-indiviżibbiltà tad-drittijiet tal-bniedem għal kulħadd, inklużi l-persuni LGBTIQ.
Irrispettivament mill-motivi għat-talba tagħhom għall-ażil, il-persuni LGBTIQ li jfittxu l-ażil huma ta’ spiss esposti għal perikli addizzjonali mal-wasla fl-UE u għandhom bżonnijiet li jistgħu jkunu differenti minn dawk ta’ persuni oħra li jfittxu l-ażil.
4.1
It-tisħiħ tal-impenn tal-UE dwar kwistjonijiet LGBTIQ fir-relazzjonijiet esterni kollha tagħha
L-UE se ssaħħaħ l-impenn tagħha dwar kwistjonijiet LGBTIQ fir-relazzjonijiet esterni tagħha kemm fuq livell politiku kif ukoll tekniku. Se tagħmel sforzi speċifiċi biex tiġġieled il-vjolenza, il-mibegħda u d-diskriminazzjoni u tiżgura li d-drittijiet LGBTIQ jiġu mħarsa fil-pajjiżi sħab.
Fir-rigward tal-pajjiżi kandidati, u kandidati potenzjali inkluż fil-kuntest tan-negozjati tal-adeżjoni u l-proċess ta’ stabbilizzazzjoni u ta’ assoċjazzjoni, il-Kummissjoni se tinsisti fuq l-ugwaljanza tal-LGBTIQ fid-djalogu politiku u tappoġġa miżuri biex jiġu indirizzati l-vjolenza, il-mibegħda u d-diskriminazzjoni kontra persuni LGBTIQ inkluż appoġġ lil organizzazzjonijiet tas-soċjetà ċivili permezz tal-Istrument għall-Assistenza ta’ Qabel l-Adeżjoni (IPA). Se tappoġġa wkoll il-monitoraġġ u l-ġbir tad-data dwar is-sitwazzjoni tal-persuni LGBTIQ fir-reġjun u tkompli timmonitorja u tirrapporta dwar is-sitwazzjoni tagħhom fil-pakkett annwali għat-tkabbir tar-rapporti tal-pajjiżi.
Il-Kummissjoni se tikkondividi l-aħjar prattiki dwar l-indirizzar tad-diskriminazzjoni u l-avvanz tad-drittijiet LGBTIQ lil hinn mill-konfini tal-UE permezz tal-kooperazzjoni u l-impenn tagħha mal-Kunsill tal-Ewropa, man-Nazzjonijiet Uniti, u ma’ korpi internazzjonali rilevanti oħra.
Il-Pjan ta’ Azzjoni 2020-2024 dwar id-drittijiet tal-bniedem u d-demokrazija jġedded l-impenn tagħha u jsejjaħ għal azzjoni biex jkunu miġġielda l-forom kollha ta’ diskriminazzjoni, b’enfażi speċifika fuq forom multipli u ta’ intersezzjoni ta’ diskriminazzjoni. Jikkundanna l-liġijiet, il-politiki u l-prattiki diskriminatorji, inkluża l-kriminalizzazzjoni tar-relazzjonijiet bejn persuni tal-istess ġeneru. L-UE se tieħu azzjoni dwar l-ugwaljanza tal-LGBTIQ f'fora internazzjonali, tibni sħubijiet internazzjonali abbażi tal-prinċipji tal-ugwaljanza u n-nondiskriminazzjoni u tieħu sehem regolarment ma’ pajjiżi sħab f'djalogi politiċi u dwar id-drittijiet tal-bniedem skont il-linji gwida tagħha biex tippromwovi u tipproteġi d-drittijiet tal-bniedem tal-persuni LGBTI skont il-linji gwida tagħha tad-drittijiet tal-bniedem dwar in-nondiskriminazzjoni f'azzjoni esterna.
L-organizzazzjonijiet lokali tas-soċjetà ċivili li jaħdmu fuq quddiem biex jippromwovu u jipproteġu d-drittijiet tal-persuni LGBTIQ se jkunu appoġġati minn finanzjament mill-UE.
Il-Kummissjoni se tkompli tappoġġa programmi nazzjonali, reġjonali u globali favur id-difensuri tad-drittijiet tal-bniedem tal-persuni LGBTIQ u l-organizzazzjonijiet tagħhom. Pereżempju, qed jingħata appoġġ biex jiżdiedu l-kapaċitajiet għal:
-bini ta’ movimenti qawwija madwar id-dinja;
-it-tisħiħ tal-inizjattivi lokali, nazzjonali u reġjonali dwar id-drittijiet tal-bniedem; u
-l-iffurmar ta’ alleanzi reġjonali fir-reġjuni tat-tkabbir u tal-viċinat, l-Afrika, l-Ażja u l-Paċifiku u l-Amerika Latina u l-Karibew.
L-UE se tkompli toffri rispons rapidu biex tipproteġi d-difensuri individwali tad-drittijiet LGBTIQ. Il-Kummissjoni se tkompli tistinka biex tiżgura li l-għajnuna umanitarja tibqa’ sensittiva għall-ġeneru u l-età, tkun adattata għall-ħtiġijiet ta' ġeneri u gruppi ta’ etajiet differenti (inklużi komunitajiet/individwi LGBTIQ) u tkun konformi mal-prinċipji umanitarji, inkluż dak tal-imparzjalità (nondiskriminazzjoni). Fl-aħħarnett, il-Pjan ta’ Azzjoni 2021-2025 tal-UE dwar l-ugwaljanza bejn il-ġeneri u l-emanċipazzjoni tan-nisa fir-relazzjonijiet esterni (GAP III) se jinbena, inter alia, fuq il-prinċipju tal-intersezzjonalità u jippromwovi l-ugwaljanza għan-nisa u l-irġiel fid-diversità kollha tagħhom.
Il-kriżi tal-COVID-19 aggravat ukoll id-diskriminazzjoni u l-vjolenza kontra l-persuni LGBTIQ lil hinn mill-fruntieri tal-Ewropa. Fir-Rispons Globali tagħha ta’ “Tim Ewropa” għall-COVID-19 tat-8 ta’ April 2020, l-UE ħadet approċċ ibbażat fuq id-drittijiet tal-bniedem, immirat biex “nibnu mill-ġdid aħjar” u nappoġġaw soċjetajiet aktar ġusti, aktar inklużivi u sostenibbli u nimplimentaw l-Aġenda 2030, ankrata fuq il-prinċipju li ħadd ma jitħalla barra. L-UE kienet qed tagħti prijorità lill-miżuri soċjoekonomiċi u tas-saħħa, pereżempju tiżgura li s-servizzi ta’ appoġġ u s-servizzi soċjali essenzjali jibqgħu disponibbli għal kulħadd, u se tkompli tippromwovi u tħares id-drittijiet tal-bniedem, l-ugwaljanza u n-nondiskriminazzjoni, kundizzjonijiet tax-xogħol deċenti, il-ġlieda kontra l-vjolenza, u kif ukoll il-valuri fundamentali f'dan il-kuntest.
Azzjonijiet ewlenin mill-Kummissjoni Ewropea:
ütimplimenta azzjonijiet li jappoġġaw id-drittijiet LGBTIQ f'konformità mal-Pjan ta’ Azzjoni 2020-2024 dwar id-drittijiet tal-bniedem u d-demokrazija u mal-Linji Gwida tal-UE biex jippromwovu u jipproteġu t-tgawdija tad-drittijiet tal-bniedem kollha mill-persuni LGBTI;
ütiżgura appoġġ għall-ugwaljanza tal-LGBTIQ f'azzjonijiet taħt l-NDICI u l-fondi IPA.
|
5.TWETTIQ TAL-ISTRATEĠIJA: NAGĦMLU UŻU SĦIĦ MILL-INIZJATTIVI TAL-UE
Din l-istrateġija se tiġi implimentata bl-użu tal-intersezzjonalità bħala prinċipju trasversali: l-orjentazzjoni sesswali, l-identità/l-espressjoni tal-ġeneru u/jew il-karatteristiċi tas-sess se jitqiesu flimkien ma’ karatteristiċi jew identitajiet personali oħra, bħas-sess, l-oriġini razzjali/etnika, ir-reliġjon/twemmin, id-diżabbiltà u l-età. Dan il-prinċipju jservi biex jispjega r-rwol ta’ dawk l-intersezzjonijiet fl-esperjenzi tal-individwi ta’ diskriminazzjoni u vulnerabbiltà. In-nisa LBTIQ jistgħu jesperjenzaw diskriminazzjoni kemm bħala nisa kif ukoll bħala persuni LBTIQ. Il-persuni LGBTIQ b’diżabbiltà jistgħu jiffaċċjaw diffikultajiet addizzjonali biex jiksbu appoġġ u informazzjoni, u biex jipparteċipaw bis-sħiħ fil-komunità LGBTIQ u fis-soċjetà inġenerali, minħabba nuqqas ta’ aċċessibbiltà, u b’hekk iżidu l-esklużjoni tagħhom. Il-persuni LGBTIQ b’diżabbiltà jeħtieġu l-aċċessibbiltà għall-informazzjoni dwar l-appoġġ u d-drittijiet f’formati aċċessibbli u alternattivi, kif ukoll l-aċċessibbiltà għal spazji, postijiet u netwerks ta’ appoġġ LGBTIQ.
L-istrateġija tindirizza wkoll l-inugwaljanzi enfasizzati mill-kriżi tal-COVID-19, li affettwat b'mod sproporzjonat persuni vulnerabbli LGBTIQ. Bħala parti minn din il-ħidma, il-Kummissjoni se tħeġġeġ lill-Istati Membri biex jagħmlu użu sħiħ mill-possibbiltajiet offruti minn Next Generation EU biex itaffu l-impatt sproporzjonat tal-kriżi u javvanzaw l-ugwaljanza LGBGTIQ. Barra minn hekk, il-Kummissjoni Ewropea se tkun lesta biex tgħin lill-Istati Membri jintegraw l-ugwaljanza fit-tfassil u l-implimentazzjoni tar-riformi permezz tal-Istrument ta’ Appoġġ Tekniku.
Il-finanzjament tal-UE huwa essenzjali biex jappoġġa l-implimentazzjoni tal-politiki tal-UE fl-Istati Membri. Il-fondi tal-UE ġestiti mill-Istati Membri għandhom ikunu ta’ benefiċċju għaċ-ċittadini kollha tal-UE mingħajr ebda forma ta’ diskriminazzjoni fuq bażi ta’ sess, razza jew oriġini etnika, reliġjon jew twemmin, diżabbiltà, età u orjentazzjoni sesswali. Permezz ta’ monitoraġġ rigoruż, il-Kummissjoni u l-Istati Membri jeħtieġ li jiżguraw li l-fondi tal-UE jikkontribwixxu għall-ugwaljanza u li l-proġetti kollha ffinanzjati mill-UE jikkonformaw mad-dritt tal-UE, inklużi t-Trattati u l-Karta tad-Drittijiet Fundamentali. Jekk il-proġetti jiksru r-regoli tal-UE kontra d-diskriminazzjoni, il-finanzjament jista’ jiġi sospiż jew irtirat. Il-proposta tal-Kummissjoni għal Regolament ġdid dwar Dispożizzjonijiet Komuni (RDK) li jistabbilixxi regoli għall-perjodu ta’ programmazzjoni 2021–2027 fiha “kundizzjoni abilitanti”
relatata mal-Karta. Barra minn hekk, l-Istati Membri huma meħtieġa jistabbilixxu u japplikaw kriterji u proċeduri għall-għażla ta’ proġetti li ma jkunux diskriminatorji u li jqisu l-Karta.
Data dwar l-ugwaljanza li tkun affidabbli u komparabbli se tkun kruċjali għall-valutazzjoni tas-sitwazzjoni ta' persuni LGBTIQ u biex tindirizza l-inugwaljanzi b’mod effettiv. Il-Kummissjoni se tistieden lill-aġenzija għad-Drittijiet Fundamentali (Fundamental Rights Agency, FRA) u lill-Istitut Ewropew għall-Ugwaljanza bejn il-Ġeneri (European Institute for Gender Equality, EIGE) biex ikomplu jipprovdu lill-Istati Membri b’assistenza teknika u appoġġ metodoloġiku dwar it-tfassil u l-implimentazzjoni ta’ eżerċizzji ta’ ġbir ta’ data dwar persuni LGBTIQ kemm dwar aspett uniku jew dwar aspetti multipli. Se tappoġġa wkoll il-ġbir ta’ data intersezzjonali dettaljata mill-FRA, l-EIGE u l-Istati Membri, b’mod partikolari permezz tas-sottogrupp tad-data dwar l-ugwaljanza tal-Grupp ta’ Livell Għoli dwar in-nondiskriminazzjoni, l-ugwaljanza u d-diversità.
Barra minn hekk, il-Kummissjoni se torganizza diskussjoni madwar mejda dwar id-data dwar l-ugwaljanza li tlaqqa’ flimkien il-partijiet ikkonċernati ewlenin biex teżamina l-ostakli għall-ġbir ta’ data relatata mal-oriġini razzjali jew etnika u tidentifika mogħdijiet għal approċċ aktar armonizzat, inkluż dwar data intersezzjonali fir-rigward, pereżempju, tal-oriġini razzjali jew etnika u tal-orjentazzjoni sesswali.
Il-Kummissjoni (Eurostat) se tkompli l-ħidma tagħha dwar id-data dwar l-ugwaljanza b’mod ġenerali billi tindirizza l-kwistjoni direttament mal-Istati Membri f’laqgħat tekniċi mal-uffiċċji nazzjonali tal-istatistika, meta dan ikun rilevanti. L-Eurostat se jipprovdi lis-servizzi tal-Kummissjoni b’appoġġ metodoloġiku għall-valutazzjoni tal-possibbiltà li tinġabar data statistika dwar persuni LGBTIQ li tkun disponibbli fuq bażi volontarja mill-Istati Membri.
Ewrobarometru ġdid dwar id-diskriminazzjoni fl-UE se jiġi ppubblikat fl-2023. Il-Kummissjoni se tħeġġeġ ukoll lill-FRA biex twettaq stħarriġ komprensiv dwar l-LGBTIQ fl-2024.
L-Istati Membri huma mħeġġa jibnu fuq l-aħjar prattika eżistenti
u jiżviluppaw il-pjanijiet ta’ azzjoni tagħhom stess dwar l-ugwaljanza tal-LGBTIQ. L-objettiv se jkun li tiżdied il-protezzjoni kontra d-diskriminazzjoni kontra l-LGBTIQ, biex jiġi żgurat is-segwitu fil-livell nazzjonali tal-objettivi u l-azzjonijiet stabbiliti f’din l-istrateġija u biex jiġu kkumplimentati b'miżuri li javvanzaw l-ugwaljanza tal-LGBTIQ f'oqsma ta’ kompetenza tal-Istati Membri. Il-Kummissjoni se tkompli wkoll tappoġġa u tagħmel viżibbli l-isforzi tal-bliet biex jistabbilixxu politiki ta’ inklużjoni robusti fil-livell lokali, anki permezz ta’ deżinjazzjoni annwali tal-Kapitali Ewropea/Ewropej tal-inklużjoni u d-diversità.
Lil hinn milli twettaq l-azzjonijiet ewlenin stabbiliti f'din l-istrateġija, il-Kummissjoni twaqqaf sottogrupp għall-ugwaljanza tal-LGBTIQ taħt il-Grupp ta' Livell Għoli dwar in-nondiskriminazzjoni, l-ugwaljanza u d-diversità biex tappoġġa u tissorvelja l-progress fl-Istati Membri, anki fir-rigward tal-iżvilupp ta’ pjanijiet ta’ azzjoni nazzjonali dwar l-ugwaljanza tal-LGBTIQ. Se torganizza laqgħat regolari, fil-livell politiku u tal-esperti, mas-soċjetà ċivili, u mal-Istati Membri u se tieħu sehem fix-xogħol tan-network governattiv tal-punti fokali LGBTI tal-Kunsill tal-Ewropa. Se timmonitorja regolarment l-implimentazzjoni tal-azzjonijiet ippreżentati f’din l-istrateġija u tippreżenta rieżami ta’ nofs it-terminu fl-2023.
Azzjonijiet ewlenin mill-Kummissjoni Ewropea:
ütivvaluta u timmonitorja l-issodisfar tal-kundizzjoni abilitanti relatata mal-Karta tad-Drittijiet Fundamentali, kif provdut fil-proposta tal-Kummissjoni għal Regolament dwar Dispożizzjonijiet Komuni (CPR) ġdid;
ütimmonitorja l-implimentazzjoni ta’ programmi ffinanzjati mill-UE biex tiżgura li dawn jirrispettaw il-prinċipji tal-ugwaljanza u jikkonformaw mal-liġi tal-UE, inklużi t-Trattati u l-Karta tad-Drittijiet Fundamentali;
ütistieden lill-FRA u lill-EIGE biex ikomplu jipprovdu assistenza teknika u appoġġ metodoloġiku lill-Istati Membri dwar it-tfassil u l-implimentazzjoni ta’ eżerċizzji ta’ ġbir ta’ data dwar persuni LGBTIQ.
|
Il-Kummissjoni se tappoġġa lill-Istati Membri biex:
üjiġu żviluppati pjanijiet nazzjonali dwar l-ugwaljanza tal-LGBTIQ.
|
6.
KONKLUŻJONI: NAĦDMU FLIMKIEN GĦALL-UGWALJANZA TAL- LGBTIQ
Din l-Istrateġija hija bbażata fuq viżjoni ta’ Ewropa fejn in-nies, fid-diversità kollha tagħhom, huma ugwali - fejn huma ħielsa li jgħixu ħajjithom irrispettivament mill-orjentazzjoni sesswali, l-identità/ l-espressjoni tal-ġeneru jew il-karatteristiċi tas-sess tagħhom.
Filwaqt li l-Ewropa pass wara pass għamlet progress matul dawn l-aħħar snin, din l-istrateġija tal-ugwaljanza tal-LGBTIQ timmarka fażi ġdida fl-isforzi tagħna biex nippromwovu l-ugwaljanza għal persuni leżbjani, omosesswali, bisesswali, trans, mhux binarji, intersesswali u queer filwaqt li nkomplu niffukaw fuq oqsma ta’ prijorità. Barra minn hekk, hija tenfasizza l-ħtieġa biex tiġi integrata perspettiva ta’ ugwaljanza tal-LGBTIQ fil-politiki kollha tal-UE kif ukoll fil-programmi ta’ finanzjament tal-UE.
Il-ġlieda kontra l-inugwaljanza fl-UE hija responsabbiltà kondiviża u teħtieġ sforzi konġunti u azzjoni f’kull livell. L-istituzzjonijiet u l-aġenziji tal-UE, l-Istati Membri, inklużi l-awtoritajiet reġjonali u lokali, il-korpi tal-ugwaljanza, is-soċjetà ċivili, u n-negozji għandhom isaħħu l-impenn tagħhom biex jiksbu l-objettivi tal-istrateġija.
L-istituzzjonijiet kollha għandhom jistabbilixxu impenn ċar biex isegwu strateġija komuni. Il-Kummissjoni tistieden lill-Parlament Ewropew iġedded l-impenn tiegħu u jappoġġa l-implimentazzjoni tal-istrateġija u lill-Kunsill jadotta Konklużjonijiet bħala segwitu għall-istrateġija. Titlob lill-Kumitat tar-Reġjuni u lill-Kumitat Ekonomiku u Soċjali Ewropew biex jippromwovu djalogu mal-awtoritajiet lokali u reġjonali u mas-soċjetà ċivili, inklużi s-sħab soċjali, dwar kif titmexxa 'l quddiem l-ugwaljanza tal-LGBTIQ. Permezz ta’ stħarriġ regolari, assistenza teknika u appoġġ metodoloġiku lill-Istati Membri, l-Aġenzija tal-Unjoni Ewropea għad-Drittijiet Fundamentali u l-Istitut Ewropew għall-Ugwaljanza bejn il-Ġeneri se jkomplu jappoġġaw l-ugwaljanza tal-LGBTIQ.
Id-diskriminazzjoni, il-vjolenza u l-mibegħda kontra persuni LGBTIQ imorru kontra l-valuri fundamentali tal-Unjoni Ewropea, u għandhom ikunu eliminati. Flimkien, nistgħu nkissru l-ostakli għall-ugwaljanza tal-LGBTIQ u nagħmlu progress ċar sal-2025 lejn UE fejn il-persuni LGBTIQ, fid-diversità kollha tagħhom, ikunu siguri u jkollhom opportunitajiet indaqs biex jipparteċipaw b’mod sħiħ fis-soċjetà u b’hekk jilħqu l-potenzjal sħiħ tagħhom.