52006IP0435

P6_TA(2006)0435

Miżuri ta' implimentazzjoni (livell 2) għad-Direttiva dwar it-"Trasparenza"

Riżoluzzjoni tal-Parlament Ewropew dwar miżuri ta' implimentazzjoni "bulk" għad-Direttiva dwar it-Trasparenza

Il-Parlament Ewropew,

- wara li kkunsidra d-Direttiva 2004/109/KE tal-Parlament Ewropew u tal-Kunsill tal- 15 ta' Diċembru 2004 dwar l-armonizzazzjoni tar-rekwiżiti ta' trasparenza f'dak li għandu x'jaqsam ma' informazzjoni dwar emittenti li t-titoli tagħhom huma ammessi għall-kummerċ f'suq regolat [1],

- wara li kkunsidra l-abbozz ta' Direttiva tal-Kummissjoni li tistabilixxi regoli dettaljati għall-implimentazzjoni ta' ċerti dispożizzjonijiet tad-Direttiva 2004/109/KE, ippubblikata mill-Kummissjoni fit- 30 ta' Mejju 2006,

- wara li kkunsidra d-Deċiżjoni tal-Kunsill 1999/468/KE tat- 28 ta' Ġunju 1999 li tistabilixxi l-proċeduri għall-eżerċizzju tas-setgħat ta' implimentazzjoni kkonferiti fuq il-Kummissjoni [2], hekk kif mid-Deċiżjoni tal-Kunsill 2006/512/KE tas- 17 ta' Lulju 2006 [3],

- wara li kkunsidra d-dikjarazzjoni tal-President tal-Kummissjoni Prodi lill-Parlament fil- 5 ta' Frar 2002,

- wara li kkunsidra r-Riżoluzzjoni tiegħu tal- 5 ta' Frar 2002 dwar l-implimentazzjoni tal-leġiżlazzjoni dwar is-servizzi finanzjarji [4],

- wara li kkunsidra l-emendi proposti għall-abbozz ta' Direttiva tal-Kummissjoni li tistabilixxi regoli dettaljati għall-implimentazzjoni ta' ċerti dispożizzjonijiet tad-Direttiva 2004/109/KE adottati mill-Kumitat għall-Affarijiet Ekonomiċi u Monetarji fl- 10 ta' Ottubru 2006,

- wara li kkunsidra t-tweġiba mill-Kummissjoni għal dawk l-emendi proposti, li ġiet mgħoddija lill-Parlament permezz ta' ittra fit- 18 ta' Ottubru 2006, indirizzata lir-rapporteur u liċ-chairwoman tal-Kumitat għall-Affarijiet Ekonomiċi u Monetarji,

- wara li kkunsidra l-konklużjonijiet ta' l-ECOFIN tal- 5 ta' Mejju 2006, li jenfasizzaw l-importanza tassuperviżjoni, il-koordinazzjoni u l-konverġenza fi ħdan l-UE,

- wara li kkunsidra l-Artikoli 81 u 103(2) tar-Regoli ta' Proċedura tiegħu,

1. Jistieden lill-Kummissjoni sabiex tqis il-limiti tas-setgħat mogħtija lilha permezz tad-Direttiva 2004/109/KE, skond id-dispożizzjonijiet applikabbli tat-Trattat, sabiex tiżgura ċertezza legali għal atturi fissuq finanzjarju;

2. Jiġbed l-attenzjoni dwar il-fatt li l-abbozz ta' miżuri ta' implimentazzjoni huma soluzzjoni li tista' taħdem sabiex jinkisbu l-objettivi ta' kundizzjonijiet ta' operazzjoni mtejba għal atturi fis-suq finanzjarju kif ukoll ta' swieq finanzjarji effiġjenti, trasparenti u sikuri fl-Unjoni Ewropea;

3. Jisħaq li x-xogħol li twettaq mill-Parlament minn meta ġew ippubblikati l-miżuri ta' implimentazzjoni ġie stimulat peremzz tal-ħtieġa li jiġu rispettati dawk id-dispożizzjonijiet leġiżlattivi mmirati lejn il-kisba ta' riżultat bilanċjat bejn il-kompetizzjoni u t-trasparenza għas-swieq finanzjarji, partijiet interessati (azzjonisti, emittenti u utenti), awtoritajiet regulatorji u rappreżentanti eletti demokratikament;

4. Jilqa' l-ħeġġa li wriet il-Kummissjoni biex taħdem mal-Parlament sabiex jinkiseb l-aħjar riżultat possibbli għall-partijiet kollha konċernati; ifakkar il-ħtieġa li l-Parlament jiġi involut u informat mill-aktar stadji bikrija bix-xogħol preparatorju fuq il-miżuri kollha tal-Livell 2;

5. Jinnota li l-proċedura li tirrigwarda l-kompletar ta' miżuri ta' implimentazzjoni tad-Direttiva 2004/109/KE hija kważi mingħajr preċedent, fid-dawl tal-mod ta' kif tiżviluppa normalment il-leġiżlazzjoni ta' l- UE; jiġbed l-attenzjoni, għaldaqstant, għall-ħtieġa li jinkiseb riżultat li b'mod reċiproku ikun sodisfaċenti għall-istituzzjonijiet kollha sabiex ir-relazzjoni interistituzzjonali tiġi żviluppata f'direzzjoni pożittiva;

6. Jistieden lill-Kummissjoni sabiex b'mod effettiv timmonitorja l-iżviluppi fl-istandards internazzjonali ta' kontabilità u verifika sabiex ikun żgurat fehim konsistenti tal-livell ta' assigurazzjoni li l-investituri jistgħu jistennew minn reviżjoni ta' l-awdituri ta' rapporti finanzjarji ta' nofs is-sena, jekk dawn isiru;

7. Jistieden lill-Kummissjoni sabiex tqis jekk id-definizzjoni tal-kontenut minimu tas-sensiela mqassra ta' stqarrijiet finanzjarji ta' nofs is-sena għandhiex tkun riveduta meta ma tkunx preparata skond l-Istandards Internazzjonali ta' Kontabilità;

8. Jistieden lill-Kummissjoni sabiex tiżgura li tinħoloq proċedura effettiva ta' notifika għas-superviżjoni ta' attivitajiet ta' twettiq tal-kummerċ;

9. Jistieden lill-Kummissjoni u lill-Istati Membri biex jinkoraġixxu lill-Kumitat tar-Regolaturi tat-Titoli Ewropej biex jibni netwerks adegwati sabiex jillimitaw il-piż ta' l-iskambju ta' informazzjoni li jaqa' fuq ilparteċipanti fis-suq;

10. Jistieden lill-Kummissjoni sabiex tagħti każ partikulari lill-aspettattivi neċessarji ekwivalenti ta' kumpaniji ta' mmaniġġjar u ditti ta' investiment ta' pajjiżi terzi, u tiżgura li dawn id-ditti b'mod ċar jippreżentaw l-identifikazzjoni ta' l-awtorità kompetenti tagħhom jew, jekk mhumiex regolati, jistqarru din l-informazzjoni b'mod ċar;

11. Jesprimi l-ħtieġa li l-Istati Membri jikkoordinaw l-isforzi meta jistabilixxu standards minimi għat-tifrix ta' informazzjoni għall-pubbliku;

12. Jistieden lill-Kummissjoni sabiex tirrevedi l-istandards għal tifrix effettiv ta' informazzjoni;

13. Jaċċetta l-miżuri ta' implimentazzjoni;

14. Jagħti istruzzjonijiet lill-President tiegħu biex jgħaddi r-riżoluzzjoni tal-Parlament lill-Kunsill, lill-Kummissjoni u lill-Kumitat Ewropew tar-Regolaturi tat-Titoli.

[1] ĠU L 390, 31.12.2004, p. 38.

[2] ĠU L 184, 17.7.1999, p. 23.

[3] ĠU L 200, 22.7.2006, P. 11.

[4] ĠU C 284 E, 21.11.2002, p. 115.

--------------------------------------------------