(1)

Peress li l-pubblikazzjoni ta’ informazzjoni privileġġjata kif imsemmi fl-Artikolu 87 tar-Regolament (UE) 2023/1114 jenħtieġ li tilħaq kemm jista’ jkun investituri u tkun verifikabbli, l-emittenti, l-offerenti u l-persuni li jkunu qed ifittxu l-ammissjoni għall-kummerċ jenħtieġ li jxerrdu din l-informazzjoni permezz tal-media u jippubblikawha fuq is-siti web tagħhom. Sabiex tiġi promossa d-distribuzzjoni effettiva tagħha, l-informazzjoni privileġġata ppubblikata fuq is-sit web tal-emittenti, l-offerenti, u l-persuni li jkunu qed ifittxu l-ammissjoni għall-kummerċ jenħtieġ li tkun tista’ titniżżel biex tinħażen lokalment u jiġi ffaċilitat aktar it-tixrid ta’ din l-informazzjoni minn partijiet terzi.

(2)

Biex jiġi ffaċilitat l-aċċess għall-informazzjoni, is-sit web jenħtieġ li jippermetti lill-utenti jaċċessaw l-informazzjoni privileġġata fuq bażi nondiskriminatorja u mingħajr ħlas u jsibu l-informazzjoni privileġġata fit-taqsima apposta faċilment identifikabbli. Sabiex l-utenti jkunu jistgħu jivverifikaw faċilment l-istorja kollha tad-divulgazzjonijiet tal-informazzjoni privileġġata, kull pubblikazzjoni fuq is-sit web jenħtieġ li tindika d-data u l-ħin tad-divulgazzjoni, u l-pubblikazzjonijiet jenħtieġ li jiġu organizzati f’ordni kronoloġiku. Minħabba n-natura transfruntiera tan-negozjar għall-kriptoassi, huwa essenzjali li l-ostakli lingwistiċi ma jillimitawx l-aċċess għall-informazzjoni ppubblikata. Għalhekk, jenħtieġ li l-emittenti, l-offerenti u l-persuna li tkun qed tfittex l-ammissjoni għall-kummerċ jippubblikaw l-informazzjoni privileġġata fuq is-sit web tagħhom bil-lingwa jew bil-lingwi li bihom titfassal il-white paper dwar il-kriptoassi u, fejn fattibbli, b’lingwa abitwali fl-isfera tal-finanzi internazzjonali. Sabiex tiġi ffaċilitata d-distribuzzjoni attiva tal-informazzjoni privileġġata, is-sit web tal-emittent, l-offerent, jew il-persuna li tkun qed tfittex l-ammissjoni għall-kummerċ jenħtieġ li jippermettu li l-investituri jirċievu notifiki jew allerti push dwar kwalunkwe pubblikazzjoni ġdida relatata ma’ informazzjoni privileġġata fuq bażi ta’ inklużjoni fakultattiva.

(3)

Minħabba l-importanza dejjem akbar tal-media soċjali u tal-pjattaformi bbażati fuq il-web fit-twassil tal-informazzjoni fir-rigward tal-kriptoassi, l-emittenti, l-offerenti u l-persuni li jkunu qed ifittxu ammissjonijiet għall-kummerċ jistgħu jużaw ukoll il-media soċjali jew il-pjattaformi bbażati fuq il-web biex ixerrdu informazzjoni privileġġata meta jidhru bħala l-media li l-pubbliku jserraħ fuqha b’mod raġonevoli. Sabiex jiġi żgurat li l-informazzjoni privileġġata tixxerred kemm jista’ jkun mal-pubbliku, l-emittent, l-offerenti, jew il-persuni li jkunu qed ifittxu l-ammissjoni għall-kummerċ jenħtieġ li jikkunsidraw li jxerrdu l-informazzjoni permezz ta’ aktar minn mezz wieħed jew tip ta’ mezz kull meta t-tixrid tagħha permezz ta’ mezz wieħed biss ma jkunx biżżejjed. Meta jiġi vvalutat jekk il-pubbliku jserraħx fuq mezz b’mod raġonevoli, l-emittent, l-offerenti, jew il-persuni li jkunu qed ifittxu l-ammissjoni għall-kummerċ jenħtieġ li jqisu li l-użu ta’ mezz wieħed biss jew ta’ tip ta’ mezz b’firxa limitata jenħtieġ li ma jitqiesx bħala wieħed li l-pubbliku jserraħ fuqu b’mod raġonevoli. Dan jista’ jkun pereżempju l-każ ta’ tixrid permezz ta’ pjattaforma tal-media soċjali b’għadd limitat ta’ utenti.

(4)

Sabiex jiġi ffaċilitat aktar l-aċċess għall-pubblikazzjoni tal-informazzjoni privileġġata, kwalunkwe pubblikazzjoni ta’ din l-informazzjoni fuq il-media soċjali jew il-pjattaformi bbażati fuq il-web jenħtieġ li jkun fiha link għas-sit web fejn l-informazzjoni privileġġata tkun ippubblikata. Il-pubblikazzjoni fuq il-media soċjali u fuq il-pjattaformi bbażati fuq il-web jenħtieġ li sseħħ f’konformità mar-rekwiżiti għall-pubblikazzjoni ta’ din l-informazzjoni fuq is-sit web tal-emittent, l-offerent, jew il-persuna li tkun qed tfittex l-ammissjoni għall-kummerċ, inkluż l-aċċess għall-informazzjoni fuq bażi nondiskriminatorja. Jenħtieġ li jitqiesu biss dawk il-pjattaformi li huma miftuħin għall-pubbliku biex jiġi żgurat aċċess fuq bażi nondiskriminatorja għad-divulgazzjonijiet fil-media soċjali u fuq il-pjattaformi bbażati fuq il-web. Filwaqt li r-rekwiżiti tar-reġistrazzjoni huma aċċettabbli, il-midja b’aċċess bi stedina biss ma tikkwalifikax bħala nondiskriminatorja.

(5)

Sabiex tiġi ffaċilitata ċ-ċentralizzazzjoni ta’ informazzjoni privileġġata, tali informazzjoni relatata mal-emittenti jew mal-offerenti li l-kriptoassi tagħhom jiġu nnegozjati fuq pjattaforma ta’ negozjar tista’ titqiegħed ukoll fuq is-sit web tal-pjattaforma ta’ negozjar, meta l-pjattaforma ta’ negozjar tippermetti li dan iseħħ. Sabiex tiġi żgurata l-konsistenza mad-divulgazzjoni magħmula mill-emittent, l-offerent, jew il-persuna li tkun qed tfittex l-ammissjoni għall-kummerċ, il-pubblikazzjoni fuq is-sit web tal-pjattaformi ta’ negozjar jenħtieġ li tinkludi link għall-paġna web tas-sit web tal-emittent, l-offerent, jew il-persuna li tkun qed tfittex l-ammissjoni għall-kummerċ fejn l-informazzjoni kienet oriġinarjament ġiet iddivulgata.

(6)

Sabiex l-awtoritajiet kompetenti jkunu jistgħu jwettqu malajr kwalunkwe rieżami jew investigazzjoni meħtieġa marbuta mat-tixrid ta’ informazzjoni privileġġata jew każijiet possibbli ta’ abbuż tas-suq u biex jiġi żgurat, fejn meħtieġ, li l-awtoritajiet kompetenti jkunu jistgħu jikkuntattjaw malajr lill-persuni inkarigati mit-tixrid ta’ informazzjoni privileġġata, huwa meħtieġ li tali persuni li għandhom x’jaqsmu mal-emittent, l-offerenti u l-persuni li jkunu qed ifittxu ammissjoni għan-negozjar tal-kriptoassi jiġu identifikati b’informazzjoni dwar isimhom, kunjomhom u l-pożizzjoni tagħhom fl-entità rilevanti.

(7)

Sabiex jiġi żgurat li l-emittenti, l-offerenti, u l-persuni li jkunu qed ifittxu l-ammissjoni għall-kummerċ ikunu jistgħu jikkonformaw mal-obbligu tagħhom li jinfurmaw lill-awtoritajiet kompetenti tagħhom li d-divulgazzjoni tal-informazzjoni privileġġata se tittardja, kif stabbilit fl-Artikolu 88(3) tar-Regolament (UE) 2023/1114, jenħtieġ li l-mezzi tekniċi għall-ittardjar tad-divulgazzjoni pubblika tal-informazzjoni privileġġata jiżguraw li tiġi rreġistrata l-informazzjoni ewlenija dwar il-proċess għall-ittardjar tad-divulgazzjoni tal-informazzjoni privileġġata.

(8)

Sabiex jiġu żgurati l-integrità u l-kunfidenzjalità tal-informazzjoni privileġġata, u l-ħeffa tat-trażmissjoni tagħha, l-emittenti, l-offerenti, jew il-persuni li jkunu qed ifittxu l-ammissjoni għall-kummerċ jenħtieġ li jinfurmaw lill-awtorità kompetenti tagħhom dwar l-ittardjar tad-divulgazzjoni tal-informazzjoni privileġġata u, fejn meħtieġ, jispjegaw bil-miktub kif ġew issodisfati l-kundizzjonijiet applikabbli kollha għall-ittardjar u billi jintużaw il-mezzi elettroniċi siguri speċifikati mill-awtorità kompetenti tagħhom.

(9)

L-awtoritajiet kompetenti jenħtieġ li jkunu jistgħu jwettqu investigazzjonijiet b’mod effiċjenti dwar każijiet possibbli ta’ abbuż tas-suq. Sabiex isir dan, huwa meħtieġ li l-awtoritajiet kompetenti jkunu jistgħu jidentifikaw, fi ħdan l-emittent, l-offerent, jew il-persuna li tkun qed tfittex l-ammissjoni għall-kummerċ, lill-persuni responsabbli mill-ittardjar tad-divulgazzjoni tal-informazzjoni privileġġata, mingħajr ma din l-informazzjoni tintalab mingħand l-entità rilevanti. Għalhekk, l-emittent, l-offerent, jew il-persuna li tkun qed tfittex l-ammissjoni għan-negozjar jenħtieġ li jipprovdu lill-awtorità kompetenti tagħhom l-identità tal-persuna li infurmat lill-awtorità kompetenti dwar l-ittardjar tad-divulgazzjoni tal-informazzjoni privileġġata, u tal-persuna jew tal-persuni li ddeċidew li jittardjaw din id-divulgazzjoni. Sabiex l-awtoritajiet kompetenti jkunu jistgħu jivvalutaw jekk il-kundizzjonijiet stabbiliti fl-Artikolu 88(2) tar-Regolament (UE) 2023/1114 humiex issodisfati, l-emittent, l-offerent, jew il-persuna li tkun qed tfittex l-ammissjoni għall-kummerċ jenħtieġ li jinfurmaw ukoll lill-awtorità kompetenti tagħhom dwar b’kemm se jittardjaw.

(10)

Dan ir-Regolament huwa bbażat fuq l-abbozz tal-istandards tekniċi ta’ implimentazzjoni ppreżentat lill-Kummissjoni mill-Awtorità Ewropea tat-Titoli u s-Swieq.

(11)

L-Awtorità Ewropea tat-Titoli u s-Swieq wettqet konsultazzjonijiet pubbliċi miftuħa dwar l-abbozz tal-istandards tekniċi ta’ implimentazzjoni li fuqu huwa bbażat dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (2),