(1)

Ós rud é gur cheart go sroichfeadh foilsiú na faisnéise ón taobh istigh dá dtagraítear in Airteagal 87 de Rialachán (AE) 2023/1114 an oiread infheisteoirí agus is féidir agus ós rud é gur cheart é a bheith infhíoraithe, ba cheart d’eisitheoirí, do thairgeoirí agus do dhaoine a bhfuil ligean isteach chun trádála á iarraidh acu an fhaisnéis sin a scaipeadh trí na meáin agus í a fhoilsiú ar a suíomhanna gréasáin. Chun dáileadh éifeachtach na faisnéise ón taobh istigh a chur chun cinn, ba cheart an fhaisnéis ón taobh istigh a fhoilsítear ar shuíomh gréasáin eisitheoirí, tairgeoirí agus daoine a bhfuil ligean isteach chun trádála á iarraidh acu a bheith in-íoslódáilte chun stóráil áitiúil a cheadú agus chun scaipeadh breise na faisnéise sin ag tríú páirtithe a éascú.

(2)

Chun rochtain ar fhaisnéis a éascú, ba cheart go gcuirfí ar chumas úsáideoirí ar an suíomh gréasáin rochtain a fháil ar fhaisnéis ón taobh istigh ar bhonn neamh-idirdhealaitheach agus saor in aisce agus an fhaisnéis ón taobh istigh a aimsiú i roinn thiomnaithe atá inaitheanta go héasca. Chun é a chur ar chumas úsáideoirí stair iomlán na nochtaí faisnéise ón taobh istigh a fhíorú go héasca, ba cheart dáta agus am an nochta a léiriú i ngach foilsiú ar an suíomh gréasáin, agus ba cheart foilsithe a bheith eagraithe in ord croineolaíoch. I bhfianaise chineál trasteorann na trádála cripteashócmhainní, tá sé ríthábhachtach nach gcuirfí teorainn leis an rochtain ar an bhfaisnéis foilsithe de bharr bacainní teanga. Dá bhrí sin, ba cheart d’eisitheoirí, do thairgeoirí agus do dhaoine a bhfuil ligean isteach chun trádála á iarraidh acu an fhaisnéis ón taobh istigh a fhoilsiú ar a suíomh gréasáin sa teanga nó sna teangacha ina dtarraingítear suas an páipéar bán maidir le cripteashócmhainní agus, i gcás inarb indéanta, i dteanga is gnách a úsáid i réimse an airgeadais idirnáisiúnta. Chun dáileadh gníomhach na faisnéise ón taobh istigh a éascú, ba cheart go gcuirfí ar chumas infheisteoirí le suíomh gréasáin an eisitheora, an tairgeora, nó an duine a bhfuil ligean isteach chun trádála á iarraidh aige brúfhógraí nó foláirimh a fháil maidir le haon fhoilsiú nua a bhaineann le faisnéis ón taobh istigh ar bhonn rogha a bheith páirteach.

(3)

I bhfianaise thábhacht mhéadaitheach na meán sóisialta agus na n-ardán gréasánbhunaithe maidir le faisnéis a chur in iúl i ndáil le cripteashócmhainní, féadfaidh eisitheoirí, tairgeoirí agus daoine a bhfuil ligean isteach chun trádála á iarraidh acu úsáid a bhaint freisin as na meáin shóisialta nó as ardáin ghréasánbhunaithe chun faisnéis ón taobh istigh a scaipeadh nuair a dhealraíonn sé gurb iad sin na meáin a bhfuil an pobal ag brath orthu go réasúnta. Chun a áirithiú go scaipfear an fhaisnéis ón taobh istigh ar phobal atá chomh leathan agus is féidir, ba cheart d’eisitheoir, do thairgeoirí nó do dhaoine a bhfuil ligean isteach chun trádála á iarraidh acu a mheas ar an bhfaisnéis a scaipeadh trí níos mó ná meán amháin nó cineál amháin meáin nuair nach leor scaipeadh trí mheán amháin. Agus measúnú á dhéanamh an bhfuil an pobal ag brath go réasúnta ar mheán, ba cheart d’eisitheoir, do thairgeoirí nó do dhaoine a bhfuil ligean isteach chun trádála á iarraidh acu a mheas nach ag brath go réasúnta ar mheán atá an pobal i gcás gan ach úsáid á baint as meán amháin nó as cineál amháin meáin ag a bhfuil rochtain theoranta. D’fhéadfaí gur amhlaidh atá, mar shampla, i gcás scaipeadh trí ardán meán sóisialta a bhfuil líon teoranta úsáideoirí i gceist leis.

(4)

Chun rochtain ar fhoilsiú na faisnéise ón taobh istigh a éascú tuilleadh, ba cheart nasc chuig an suíomh gréasáin ar a bhfoilsítear an fhaisnéis ón taobh istigh a bheith in aon sampla d’fhoilsiú na faisnéise sin ar na meáin shóisialta nó ar na hardáin ghréasánbhunaithe. Ba cheart foilsiú ar na meáin shóisialta agus ar ardáin ghréasánbhunaithe a dhéanamh i gcomhréir leis na ceanglais maidir leis an bhfaisnéis sin a fhoilsiú ar shuíomh gréasáin an eisitheora, an tairgeora nó an duine a bhfuil ligean isteach chun trádála á iarraidh aige, lena n-áirítear rochtain ar fhaisnéis ar bhonn neamh-idirdhealaitheach. Níor cheart ach na hardáin sin atá oscailte don phobal a mheas chun rochtain ar nochtaí sna meáin shóisialta agus ar ardáin ghréasánbhunaithe ar bhonn neamh-idirdhealaitheach a áirithiú. Cé go bhfuil ceanglais chlárúcháin inghlactha, ní cháileodh meáin nach bhfuil inrochtana ach ar bhonn cuiridh mar mheáin neamh-idirdhealaitheacha.

(5)

Chun lárú faisnéise ón taobh istigh a éascú, féadfar faisnéis den sórt sin a bhaineann le heisitheoirí nó tairgeoirí a dtrádáiltear a gcripteashócmhainní ar ardán trádála a phostáil freisin ar shuíomh gréasáin an ardáin trádála, nuair is féidir é sin a dhéanamh ar an ardán trádála. Chun comhsheasmhacht a áirithiú leis an nochtadh arna dhéanamh ag an eisitheoir, ag an tairgeoir, nó ag an duine a bhfuil ligean isteach chun trádála á iarraidh aige, ba cheart nasc a áireamh san fhoilsiú ar shuíomh gréasáin an ardáin trádála chuig an leathanach gréasáin ar shuíomh gréasáin an eisitheora, an tairgeora, nó an duine a bhfuil ligean isteach chun trádála á iarraidh aige ar a nochtadh an fhaisnéis i dtosach.

(6)

Chun a chur ar chumas na n-údarás inniúil aon athbhreithniú nó imscrúdú riachtanach atá nasctha le faisnéis ón taobh istigh a scaipeadh nó le cásanna a d’fhéadfadh a bheith ann maidir le drochúsáid mhargaidh a dhéanamh go caoithiúil agus chun a áirithiú, i gcás inar gá, go bhféadfaidh údaráis inniúla teagmháil a dhéanamh go tapa le daoine atá i gceannas ar fhaisnéis ón taobh istigh a scaipeadh, is gá na daoine sin laistigh den eisitheoir, den tairgeoirí agus na daoine a bhfuil ligean isteach chun trádáil cripteashócmhainní á iarraidh acu a shainaithint le faisnéis faoina n-ainm, a sloinne agus a bpost laistigh den eintiteas ábhartha.

(7)

Chun a áirithiú go mbeidh eisitheoirí, tairgeoirí agus daoine a bhfuil ligean isteach chun trádála á iarraidh acu in ann a n-oibleagáid a chomhlíonadh maidir lena n-údaráis inniúla a chur ar an eolas go bhfuil moill ar nochtadh na faisnéise ón taobh istigh, mar a leagtar síos in Airteagal 88(3) de Rialachán (AE) 2023/1114, ba cheart a áirithiú leis na modhanna teicniúla chun moill a chur ar nochtadh poiblí faisnéise ón taobh istigh go ndéantar taifead ar fhaisnéis bhunriachtanach faoin bpróiseas chun moill a chur ar nochtadh na faisnéise ón taobh istigh.

(8)

Chun ionracas agus rúndacht na faisnéise ón taobh istigh agus luas a tarchuir a áirithiú, ba cheart d’eisitheoirí, do thairgeoirí nó do dhaoine a bhfuil ligean isteach chun trádála á iarraidh acu a n-údarás inniúil a chur ar an eolas faoin moill ar nochtadh na faisnéise ón taobh istigh agus, i gcás inar gá, míniú a thabhairt, i scríbhinn agus trí úsáid a bhaint as na modhanna leictreonacha slána arna sonrú ag a n-údarás inniúil, ar an gcaoi ar comhlíonadh na coinníollacha uile is infheidhme maidir leis an moill.

(9)

Ba cheart do na húdaráis inniúla a bheith in ann imscrúduithe a dhéanamh go héifeachtúil ar chásanna féideartha drochúsáide margaidh. Chun é sin a dhéanamh, is gá é a chur ar chumas na n-údarás inniúil sainaithint a dhéanamh ar na daoine laistigh den eisitheoir, den tairgeóir nó ar an duine a bhfuil ligean isteach chun trádála á iarraidh aige atá ag dul i ngleic leis an moill ar nochtadh faisnéise ón taobh istigh, gan an fhaisnéis sin a iarraidh ar an eintiteas ábhartha. Dá bhrí sin, ba cheart don eisitheoir, don tairgeoir, nó don duine a bhfuil ligean isteach chun trádála á iarraidh aige céannacht an duine a chuir an t-údarás inniúil ar an eolas faoin moill ar nochtadh na faisnéise ón taobh istigh, agus céannacht an duine nó na ndaoine a chinn moill a chur ar an nochtadh sin, a chur in iúl dá n-údarás inniúil. Chun é a chur ar chumas na n-údarás inniúil measúnú a dhéanamh an bhfuil na coinníollacha a leagtar síos in Airteagal 88(2) de Rialachán (AE) 2023/1114 á gcomhlíonadh, ba cheart don eisitheoir, don tairgeoir, nó don duine a bhfuil ligean isteach chun trádála á iarraidh aige a n-údarás inniúil a chur ar an eolas freisin faoi fhad na moille.

(10)

Tá an Rialachán seo bunaithe ar na dréachtchaighdeáin theicniúla cur chun feidhme arna gcur faoi bhráid an Choimisiúin ag an Údarás Eorpach um Urrúis agus Margaí.

(11)

Sheol an tÚdarás Eorpach um Urrúis agus Margaí comhairliúcháin phoiblí oscailte maidir leis na dréachtchaighdeáin theicniúla cur chun feidhme ar a bhfuil an Rialachán seo bunaithe, rinne sé anailís ar na costais agus ar na tairbhí gaolmhara a d’fhéadfadh a bheith ann, agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2),