(1)

Ir-Regolament Delegat tal-Kummissjoni (UE) 2017/86 (2) stabbilixxa pjan għall-iskartar għal ċertu sajd demersali fil-Baħar Mediterran, li japplika mill-1 ta’ Jannar 2017 sal-31 ta’ Diċembru 2019.

(2)

Sabiex jiġu evitati kostijiet sproporzjonati tal-immaniġġar ta’ qabdiet mhux mixtieqa, ir-Regolament Delegat (UE) 2017/86 stabbilixxa eżenzjoni de minimis li tapplika għall-ispeċijiet demersali. Dak ir-Regolament Delegat tal-Kummissjoni skada fil-31 ta’ Diċembru 2021. Ġiet stabbilita eżenzjoni de minimis ġdida bir-Regolament Delegat tal-Kummissjoni (UE) 2021/2064 (3). Dik l-eżenzjoni ġiet stabbilita għall-ispeċijiet demersali sal-31 ta’ Diċembru 2023, filwaqt li għall-qabdiet aċċessorji ta’ ħut pelaġiku żgħir li jsir fis-sajd demersali l-eżenzjoni ġiet stabbilita biss sal-31 ta’ Diċembru 2022.

(3)

Il-Kroazja, l-Italja u s-Slovenja (“il-Grupp ta’ Livell Għoli Adriatica”) u l-Greċja, l-Italja, Ċipru u Malta (“il-Grupp ta’ Livell Għoli Sudestmed”) għandhom interess ta’ ġestjoni tas-sajd dirett fil-Baħar Adrijatiku u tax-Xlokk tal-Mediterran rispettivament. Fl-1 ta’ Mejju 2022 u fis-6 ta’ Ġunju 2022, il-Grupp ta’ Livell Għoli Adriatica u l-Grupp ta’ Livell Għoli Sudestmed talbu l-estensjoni tal-eżenzjoni de minimis għall-qabdiet aċċessorji ta’ ħut pelaġiku żgħir li jsir fis-sajd demersali stabbilita fir-Regolament Delegat (UE) 2021/2064. Iż-żewġ gruppi ppreżentaw ukoll evidenza xjentifika biex jappoġġaw it-talba tagħhom.

(4)

L-evidenza xjentifika ġiet ivvalutata mill-Kumitat Xjentifiku, Tekniku u Ekonomiku għas-Sajd (“STECF”) bejn is-16 u l-20 ta’ Mejju 2022 (4).

(5)

Fit-8 ta’ Lulju 2022, il-Grupp ta’ Livell Għoli Adriatica u l-Grupp ta’ Livell Għoli Sudestmed ippreżentaw Rakkomandazzjoni Konġunta aġġornata dwar l-estensjoni tal-eżenzjoni de minimis għall-obbligu ta’ ħatt l-art għal sena.

(6)

Il-Kummissjoni tinnota li fil-Baħar Adrijatiku u tax-Xlokk tal-Mediterran, l-ispeċijiet pelaġiċi żgħar jinqabdu f’daqqa, fi kwantitajiet li jvarjaw ħafna, u dan jagħmel approċċ ta’ stokk uniku diffiċli. Dawk l-ispeċijiet jinqabdu minn bastimenti tas-sajd ta’ skala żgħira u jinħattu l-art f’ħafna punti differenti ta’ ħatt l-art mifruxa ġeografikament tul il-kosta. Dan jirriżulta f’kostijiet sproporzjonati tal-immaniġġar ta’ qabdiet mhux mixtieqa.

(7)

L-STECF irrikonoxxa li tnaqqis ġenerali tal-isforz tas-sajd tat-tkarkir tal-qiegħ u l-istabbiliment ta’ Żoni Ristretti għas-Sajd bħala għeluq permanenti għas-sajd demersali x’aktarx li jnaqqsu l-ammont ta’ qabdiet inċidentali ta’ ħut pelaġiku żgħir.

(8)

L-STECF innota wkoll li filwaqt li l-approċċ de minimis totali inkluż fl-evidenza xjentifika jkopri grupp wiesa’ ta’ speċijiet b’firxa wiesgħa ta’ rati ta’ skartar, it-tali kopertura wiesgħa hija approċċ validu minħabba l-kumplessità tas-sajd fil-Baħar Adrijatiku u tax-Xlokk tal-Mediterran.

(9)

Barra minn hekk, l-STECF qies li eżenzjonijiet de minimis individwali li jkopru speċi waħda li jirriżultaw f’ħafna eżenzjonijiet separati li jippreżentaw sfida biex jiġu mmonitorjati.

(10)

Il-Grupp ta’ Livell Għoli Adriatica pprovda evidenza xjentifika aġġornata dwar il-kostijiet sproporzjonati tal-immaniġġjar ta’ qabdiet mhux mixtieqa. Għalkemm l-STECF innota li huma pprovduti stimi taż-żieda fil-kostijiet, huwa saħaq fuq id-diffikultajiet fil-valutazzjoni tal-livell fejn il-kostijiet saru sproporzjonati. L-STECF irrikonoxxa wkoll li ż-żieda reċenti fil-kostijiet tal-fjuwil aggravat is-sitwazzjoni ġenerali. L-STECF innota wkoll ir-riżultati l-ġodda dwar il-proġett ta’ selettività u li hija meħtieġa aktar investigazzjoni dwar dan l-apparat ta’ selettività biex jinstab bilanċ bejn it-titjib tas-selettività u l-minimizzazzjoni tat-telf ekonomiku. Finalment, l-STECF innota li t-tnaqqis tal-livell ta’ qabdiet mhux mixtieqa permezz tal-użu ta’ rkaptu selettiv jew ta’ żoni marini protetti jenħtieġ li jingħata prijorità.

(11)

Il-Kummissjoni tilqa’ l-impenn meħud mill-Grupp ta’ Livell Għoli Adriatica biex jaħdem aktar fuq is-selettività u r-restrizzjonijiet spazjali tas-sajd bħala prijorità biex jinkiseb it-tnaqqis ta’ qabdiet mhux mixtieqa. Għalhekk, il-Kummissjoni hija tal-fehma li l-progress fis-selettività u l-kostijiet sproporzjonati jiġġustifikaw li l-eżenzjoni jenħtieġ li tiġi estiża għal sena bil-livelli perċentwali proposti.

(12)

L-evidenza xjentifika aġġornata provduta mill-Grupp ta’ Livell Għoli Adriatica tipproponi li l-eżenzjoni de minimis tiġi estiża, għall-inċova (Engraulis encrasicolus), għas-sardin (Sardina pilchardus), għall-kavall (Scomber spp.) u għas-sawrell (Trachurus spp.), sa massimu ta’ 5 % għall-2023 tal-qabdiet inċidentali annwali totali ta’ dawk l-ispeċijiet li jinqabdu minn bastimenti li jużaw xbieki tat-tkarkir tal-qiegħ (OTB, OTT, PTB, TBN, TBS, TB, OT, PT, TX).

(13)

L-STECF qies li filwaqt li r-rata ta’ skartar hija sinifikanti għal dan is-sajd, il-proġetti ta’ selettività għadhom għaddejjin.

(14)

Il-Kummissjoni tqis li l-evidenza ppreżentata hija biżżejjed biex testendi l-eżenzjoni għal sena, bil-livelli perċentwali proposti. Il-grupp ta’ Livell Għoli Adriatica jenħtieġ li jippreżenta data addizzjonali, abbażi tal-proġetti li għaddejjin.

(15)

Il-Grupp ta’ Livell Għoli Sudestmed ipprovda evidenza xjentifika aġġornata dwar il-kostijiet sproporzjonati tal-immaniġġar ta’ qabdiet mhux mixtieqa. Għalkemm l-STECF innota li huma pprovduti stimi taż-żieda fil-kostijiet, huwa saħaq fuq id-diffikultajiet fil-valutazzjoni tal-livell fejn il-kostijiet huma sproporzjonati. L-STECF irrikonoxxa wkoll li ż-żieda reċenti fil-kostijiet tal-fjuwil aggravat is-sitwazzjoni ġenerali. L-STECF innota l-istudji li għaddejjin għandhom jiġu ffinalizzati matul l-2023. L-STECF innota wkoll li t-tnaqqis tal-livell ta’ qabdiet mhux mixtieqa permezz tal-użu ta’ rkaptu selettiv jew ta’ żoni marini protetti jenħtieġ li jingħata prijorità.

(16)

Il-Kummissjoni tilqa’ l-impenn meħud mill-Grupp ta’ Livell Għoli Sudestmed biex jaħdem aktar fuq is-selettività u r-restrizzjonijiet spazjali tas-sajd bħala prijorità biex jinkiseb it-tnaqqis ta’ qabdiet mhux mixtieqa. Għalhekk, il-Kummissjoni hija tal-fehma li l-progress fis-selettività u l-kostijiet sproporzjonati jiġġustifikaw li l-eżenzjoni jenħtieġ li tiġi estiża għal sena bil-livelli perċentwali proposti.

(17)

L-evidenza xjentifika aġġornata provduta mill-Grupp ta’ Livell Għoli Sudestmed tipproponi li l-eżenzjoni de minimis tiġi estiża għall-inċova (Engraulis encrasicolus), għas-sardin (Sardina pilchardus), għall-kavall (Scomber spp.) u għas-sawrell (Trachurus spp.), sa massimu ta’ 5 % għall-2023 tal-qabdiet inċidentali annwali totali ta’ dawk l-ispeċijiet li jinqabdu minn bastimenti li jużaw xbieki tat-tkarkir tal-qiegħ (OTB, OTT, PTB, TBN, TBS, TB, OT, PT, TX).

(18)

L-STECF qies li filwaqt li r-rata ta’ skartar hija sinifikanti għal dan is-sajd, il-volum ta’ qabdiet huwa limitat u għaddejjin proġetti ta’ selettività li se jnaqqsu r-rata tal-iskartar.

(19)

Il-Kummissjoni tqis li l-evidenza ppreżentata dwar il-kost sproporzjonat hija biżżejjed biex testendi l-eżenzjoni għal sena, bil-livelli perċentwali proposti. Il-grupp ta’ Livell Għoli Sudestmed jenħtieġ li jippreżenta data addizzjonali, abbażi tal-istudji li għaddejjin.

(20)

Fl-evidenzi xjentifiċi aġġornati tagħhom, l-Istati Membri ġeddew l-impenn tagħhom li jżidu s-selettività tal-irkaptu tas-sajd skont ir-riżultati tal-programmi ta’ riċerka attwali sabiex inaqqsu u jillimitaw il-qabdiet mhux mixtieqa u partikolarment il-qabdiet b’daqsijiet iżgħar mid-daqsijiet minimi ta’ referenza għall-konservazzjoni.

(21)

Il-miżuri mitluba huma bi qbil mal-Artikolu 15(4)(c) tar-Regolament (UE) Nru 1380/2013. Għalhekk, jenħtieġ li r-Regolament Delegat (UE) 2021/2064 jiġi emendat skont dan.

(22)

Billi l-miżuri previsti f’dan ir-Regolament iħallu impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, dan ir-Regolament jenħtieġ li jidħol fis-seħħ immedjatament wara l-pubblikazzjoni tiegħu. Madanakollu, għal raġunijiet ta’ ċertezza legali, dan ir-Regolament jenħtieġ li jibda japplika minn data aktar tard,

(1)

Il-paragrafu 1 huwa emendat kif ġej:

(2)

il-paragrafu 2 huwa sostitwit b’dan li ġej: