(1)

Skont l-Artikolu 3 tar-Regolament ta’ Implimentazzjoni tal-Kummissjoni (UE) 2017/39 (2), l-Istati Membri li jixtiequ jieħdu sehem fl-iskema ta’ għajnuna tal-Unjoni għall-provvista ta’ frott u ħxejjex, banana u ħalib fl-istabbilimenti edukattivi (“l-iskema għall-iskejjel”), għandhom jippreżentaw it-talba tagħhom lill-Kummissjoni sal-31 ta’ Jannar ta’ kull sena għall-għajnuna tal-Unjoni b’rabta mas-sena skolastika li jkun imiss, u jekk applikabbli, jaġġornaw it-talba għall-għajnuna tal-Unjoni b’rabta mas-sena skolastika attwali.

(2)

Abbażi tal-informazzjoni li l-Istati Membri nnotifikaw sal-31 ta’ Jannar 2022, id-Deċiżjoni ta’ Implimentazzjoni tal-Kummissjoni (UE) 2022/493 (3) stabbiliet l-allokazzjoni definittiva tal-għajnuna tal-Unjoni għall-frott u l-ħxejjex fl-iskejjel u għall-ħalib fl-iskejjel għall-perjodu bejn l-1 ta’ Awwissu 2022 sal-31 ta’ Lulju 2023.

(3)

Skont l-Artikolu 1 tar-Regolament ta’ Implimentazzjoni tal-Kummissjoni (UE) 2022/861 (4), l-Istati Membri jistgħu jippreżentaw it-tieni talba lill-Kummissjoni sal-15 ta’ Ġunju 2022 għall-għajnuna tal-Unjoni għall-perjodu mill-1 ta’ Awwissu 2022 sal-31 ta’ Lulju 2023, marbuta mal-ħtieġa li jipprovdu għat-tfal spostati mill-Ukrajna li huma eliġibbli għall-parteċipazzjoni fl-iskema għall-iskejjel.

(4)

Fit-tieni talba tagħhom għall-għajnuna tal-Unjoni għall-perjodu mill-1 ta’ Awwissu 2022 sal-31 ta’ Lulju 2023, Franza, in-Netherlands, l-Awstrija u s-Slovenja indikaw ir-rieda tagħhom li ma jużawx l-ammont sħiħ tal-allokazzjoni definittiva tagħhom tal-għajnuna tal-Unjoni għall-frott u l-ħxejjex fl-iskejjel u/jew għall-ħalib fl-iskejjel kif stabbilit fl-Anness I tad-Deċiżjoni ta’ Implimentazzjoni (UE) 2022/493. Il-Bulgarija, iċ-Ċekja, il-Ġermanja, l-Estonja, il-Greċja, il-Latvja, il-Litwanja, l-Ungerija, il-Polonja, ir-Rumanija u s-Slovakkja nnotifikaw ir-rieda tagħhom li jużaw aktar mill-allokazzjoni definittiva tagħhom tal-għajnuna tal-Unjoni għall-frott u l-ħxejjex fl-iskejjel u/jew għall-ħalib fl-iskejjel kif stabbilit fl-Anness I tad-Deċiżjoni ta’ Implimentazzjoni (UE) 2022/493. Il-Belġju, il-Bulgarija, id-Danimarka, l-Irlanda, il-Greċja, Spanja, il-Kroazja, l-Italja, Ċipru, il-Lussemburgu, Malta, in-Netherlands, l-Awstrija, il-Portugall, is-Slovenja, il-Finlandja u l-Iżvezja ma ppreżentawx it-tieni talba għall-għajnuna tal-Unjoni għall-frott u l-ħxejjex fl-iskejjel u/jew għall-ħalib fl-iskejjel u għalhekk jitqiesu li kkonfermaw l-allokazzjonijiet definittivi tagħhom stabbiliti fl-Anness I tad-Deċiżjoni ta’ Implimentazzjoni (UE) 2022/493.

(5)

Sabiex jiġi massimizzat il-potenzjal sħiħ tal-fondi disponibbli u jiġu indirizzati d-diffikultajiet fl-implimentazzjoni tal-iskema għall-iskejjel minħabba l-ispostament tat-tfal mill-Ukrajna wara l-aggressjoni militari Russa kontra l-Ukrajna fl-24 ta’ Frar 2022, huwa xieraq li tiġi riveduta l-allokazzjoni definittiva tal-għajnuna tal-Unjoni għall-frott u l-ħxejjex fl-iskejjel u għall-ħalib fl-iskejjel għall-perjodu mill-1 ta’ Awwissu 2022 sal-31 ta’ Lulju 2023. Ir-riallokazzjoni tal-ammonti mhux mitluba ta’ allokazzjonijiet definittivi tal-għajnuna tal-Unjoni jenħtieġ li tqis it-tieni talba tal-Istati Membri għall-għajnuna tal-Unjoni u trid tkun ibbażata fuq l-għadd ta’ tfal fl-Istati Membri ta’ bejn is-sitta u l-għaxar snin, f’konformità mal-Artikolu 5(5), it-tieni subparagrafu, tar-Regolament (UE) Nru 1370/2013.

(6)

Għalhekk, jenħtieġ li l-Anness I tad-Deċiżjoni ta’ Implimentazzjoni (UE) 2022/493 jiġi emendat skont dan.

(7)

Il-miżuri previsti f’din id-Deċiżjoni huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,