Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32021R1809

    Regolament ta’ Implimentazzjoni tal-Kummissjoni (UE) 2021/1809 tat-13 ta’ Ottubru 2021 li jemenda r-Regolament ta’ Implimentazzjoni (UE) 2020/1191 dwar il-miżuri li jipprevjenu l-introduzzjoni u t-tixrid ġewwa l-Unjoni tal-virus tal-frott imkemmex u kannella tat-tadam (ToBRFV)

    C/2021/7338

    ĠU L 365, 14.10.2021, p. 41–45 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_impl/2021/1809/oj

    14.10.2021   

    MT

    Il-Ġurnal Uffiċjali tal-Unjoni Ewropea

    L 365/41

    REGOLAMENT TA’ IMPLIMENTAZZJONI TAL-KUMMISSJONI (UE) 2021/1809

    tat-13 ta’ Ottubru 2021

    li jemenda r-Regolament ta’ Implimentazzjoni (UE) 2020/1191 dwar il-miżuri li jipprevjenu l-introduzzjoni u t-tixrid ġewwa l-Unjoni tal-virus tal-frott imkemmex u kannella tat-tadam (ToBRFV)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (UE) 2016/2031 tal-Parlament Ewropew u tal-Kunsill tas-26 ta’ Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE (1), u b’mod partikolari l-Artikolu 30 tiegħu,

    Wara li kkunsidrat ir-Regolament (UE) 2017/625 tal-Parlament Ewropew u tal-Kunsill tal-15 ta’ Marzu 2017 dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, ta’ regoli dwar is-saħħa u t-trattament xieraq tal-annimali, dwar is-saħħa tal-pjanti u dwar prodotti għall-protezzjoni tal-pjanti, li jemenda r-Regolamenti (KE) Nru 999/2001, (KE) Nru 396/2005, (KE) Nru 1069/2009, (KE) Nru 1107/2009, (UE) Nru 1151/2012, (UE) Nru 652/2014, (UE) 2016/429 u (UE) 2016/2031 tal-Parlament Ewropew u tal-Kunsill, ir-Regolamenti tal-Kunsill (KE) Nru 1/2005 u (KE) Nru 1099/2009 u d-Direttivi tal-Kunsill 98/58/KE, 1999/74/KE, 2007/43/KE, 2008/119/KE u 2008/120/KE, u li jħassar ir-Regolamenti (KE) Nru 854/2004 u (KE) Nru 882/2004 tal-Parlament Ewropew u tal-Kunsill, id-Direttivi tal-Kunsill 89/608/KEE, 89/662/KEE, 90/425/KEE, 91/496/KEE, 96/23/KE, 96/93/KE u 97/78/KE u d-Deċiżjoni tal-Kunsill 92/438/KEE (Regolament dwar il-Kontrolli Uffiċjali) (2), u b’mod partikolari l-Artikolu 22(3) u l-Artikolu 52 tiegħu,

    Billi:

    (1)

    Ir-Regolament ta’ Implimentazzjoni tal-Kummissjoni (UE) 2020/1191 (3) jistabbilixxi miżuri dwar l-introduzzjoni u l-moviment fl-Unjoni ta’ pjanti għat-tħawwil tas-Solanum lycopersicum L. u tal-Capsicum spp. Kif intwera bl-esperjenza fl-implimentazzjoni ta’ dak ir-Regolament, l-ibridi tas-Solanum lycopersicum L. jenħtieġ li jiġu inklużi wkoll fil-kamp ta’ applikazzjoni ta’ dawk il-miżuri, minħabba li dawk l-ibridi huma suxxettibbli wkoll għall-virus tal-frott imkemmex u kannella tat-tadam (ToBRFV) (“il-pest speċifikat”).

    (2)

    Sabiex ir-riskju għas-saħħa tal-pjanti jiġi mmaniġġjat kif xieraq u jiġu applikati l-miżuri meħtieġa għall-materjal tal-pjanti l-aktar riskjuż, huwa xieraq li d-definizzjoni ta’ “pjanti speċifikati għat-tħawwil” tiġi sostitwita bid-definizzjoni ta’ “pjanti speċifikati”, li tkopri l-pjanti kollha tas-Solanum lycopersicum L. u l-ibridi tiegħu u tal-Capsicum spp, anki dawk li mhumiex maħsuba biex jerġgħu jitħawlu, sakemm ma jkunx speċifikat mod ieħor. Dik id-definizzjoni jenħtieġ li teskludi ż-żrieragħ speċifikati u l-frott speċifikat, li għalihom jeżistu definizzjonijiet speċifiċi. Madankollu, dawk id-definizzjonijiet jenħtieġ li jiġu emendati skont dan sabiex jinkludu l-ibridi tas-Solanum lycopersicum L.

    (3)

    Mill-adozzjoni tar-Regolament ta’ Implimentazzjoni (UE) 2020/1191, serje ta’ awditi mwettqa mill-Kummissjoni fl-2020 u fl-2021 uriet li l-implimentazzjoni tal-miżuri ta’ qerda kienet inkonsistenti. Huwa għalhekk meħtieġ li jiġu introdotti regoli speċifiċi għall-istabbiliment ta’ żoni demarkati u l-miżuri li għandhom jittieħdu hemmhekk. Dawk ir-regoli jenħtieġ ukoll li jagħmlu distinzjoni bejn is-siti ta’ produzzjoni bi protezzjoni fiżika u siti oħra ta’ produzzjoni, minħabba r-riskju fitosanitarju differenti li jippreżentaw.

    (4)

    Jenħtieġ li jiġi speċifikat li l-ittestjar tal-pjanti omm jenħtieġ li jsir fl-iqsar żmien possibbli qabel il-ħsad tal-frott, minħabba li l-esperjenza mindu ġie adottat ir-Regolament ta’ Implimentazzjoni (UE) 2020/1191 wriet li dan huwa meħtieġ biex jiġi żgurat li l-frott li minnu jiġu estratti ż-żrieragħ, ikun ħieles mill-pest speċifikat.

    (5)

    Matul il-kontrolli tas-saħħa tal-pjanti li saru abbażi tar-Regolament ta’ Implimentazzjoni (UE) 2020/1191, l-Istati Membri sabu għadd kbir ta’ kunsinni infettati li joriġinaw miċ-Ċina u mill-Iżrael. Għal din ir-raġuni, abbażi ta’ rata differenti ta’ interċettazzjonijiet irreġistrati fis-Sistema tal-Kontroll tal-Kummerċ u tal-Esperti veterinarji (TRACES) (4) mill-2020, il-frekwenza tal-ittestjar fl-importazzjoni ta’ dawk il-kunsinni jenħtieġ li tiżdied għal 50 % għaż-żrieragħ jew għall-pjanti għat-tħawwil li joriġinaw fl-Iżrael u għal 100 % għaż-żrieragħ li joriġinaw miċ-Ċina.

    (6)

    Sabiex ikun hemm żmien biex tiġi vverifikata l-implimentazzjoni tal-miżuri l-ġodda u biex tiġi żgurata protezzjoni kontinwa tat-territorju tal-Unjoni mill-introduzzjoni u t-tixrid tal-pest speċifikat, il-perjodu ta’ applikazzjoni tar-Regolament ta’ Implimentazzjoni (UE) 2020/1191 jenħtieġ li jiġi estiż sal-31 ta’ Mejju 2023.

    (7)

    Wara s-sostituzzjoni tad-definizzjoni ta’ “pjanti speċifikati għat-tħawwil” bi “pjanti speċifikati”, jeħtieġ li jsiru xi bidliet konsegwenzjali fl-Anness tar-Regolament ta’ Implimentazzjoni (UE) 2020/1191.

    (8)

    Għalhekk, jenħtieġ li r-Regolament ta’ Implimentazzjoni (UE) 2020/1191 jiġi emendat skont dan.

    (9)

    Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

    ADOTTAT DAN IR-REGOLAMENT:

    L-Artikolu 1

    Emenda tar-Regolament ta’ Implimentazzjoni (UE) 2020/1191

    Ir-Regolament ta’ Implimentazzjoni (UE) 2020/1191 huwa emendat kif ġej:

    (1)

    fl-Artikolu 1, il-punti (b),(c) u (d) huma sostitwiti b’dan li ġej:

    “(b)

    “pjanti speċifikati” tfisser il-pjanti, minbarra ż-żrieragħ speċifikati u l-frott speċifikat, tas-Solanum lycopersicum L. u tal-ibridi tiegħu u tal-Capsicum spp.;

    (c)

    “żrieragħ speċifikati” tfisser iż-żrieragħ tas-Solanum lycopersicum L. u tal-ibridi tiegħu u tal-Capsicum spp;

    (d)

    “frott speċifikat” tfisser il-frott tas-Solanum lycopersicum L. u tal-ibridi tiegħu u tal-Capsicum spp.”;

    (2)

    L-Artikolu 4 huwa sostitwit b’dan li ġej:

    “Artikolu 4

    Miżuri dwar il-preżenza kkonfermata tal-pest speċifikat

    1.   Fejn il-preżenza jew il-preżenza suspettata tal-pest speċifikat tkun ikkonfermata uffiċjalment fit-territorju ta’ Stat Membru, l-awtorità kompetenti tal-Istat Membru kkonċernat għandha tiżgura li jittieħdu l-miżuri xierqa biex jinqered il-pest speċifikat f’konformità mal-Artikolu 17 tar-Regolament (UE) 2016/2031.

    Barra minn hekk, dik l-awtorità kompetenti għandha tieħu l-miżuri stabbiliti fil-paragrafi 2 u 3 ta’ dan l-Artikolu, sakemm ma jiġux issodisfati l-kundizzjonijiet tal-Artikolu 18(4) tar-Regolament (UE) 2016/2031 fir-rigward tal-pest speċifikat.

    2.   L-awtorità kompetenti għandha, mingħajr dewmien, tistabbilixxi żona demarkata kif ġej:

    (a)

    fil-każ tal-preżenza tal-pest speċifikat f’siti tal-produzzjoni bi protezzjoni fiżika, iż-żona demarkata għandha tikkonsisti mill-inqas fis-sit tal-produzzjoni fejn ikun instab il-pest speċifikat;

    (b)

    fil-każ tal-preżenza tal-pest speċifikat f’siti ta’ produzzjoni għajr dawk imsemmija fil-punt (a), iż-żona demarkata għandha tikkonsisti minn:

    (i)

    żona infestata li tinkludi mill-inqas is-sit tal-produzzjoni fejn tkun instabet il-preżenza tal-pest speċifikat;

    (ii)

    żona ta’ lqugħ ta’ mill-inqas 30 m madwar iż-żona infestata.

    3.   Fiż-żona demarkata, l-awtorità kompetenti, jew l-operatur professjonali taħt is-superviżjoni uffiċjali tal-awtorità kompetenti, għandhom:

    (a)

    għal siti tal-produzzjoni maħsuba għall-produzzjoni ta’ pjanti speċifikati jew għall-produzzjoni ta’ żrieragħ speċifikati:

    (i)

    immedjatament ineħħu u jeqirdu l-lottijiet infettati kollha tal-pjanti speċifikati għat-tħawwil u, fejn applikabbli, iż-żrieragħ speċifikati li joriġinaw minn dawk il-lottijiet. It-tneħħija u l-qerda għandhom jitwettqu b’tali mod li ma jkun hemm l-ebda riskju ta’ tixrid tal-pest speċifikat;

    (ii)

    japplikaw miżuri tal-iġjene speċifiċi fuq il-persunal, l-istrutturi, l-għodod u l-makkinarju tas-sit tal-produzzjoni, il-materjali u l-mezzi tat-trasport, biex jipprevjenu t-tixrid tal-pest speċifikat għal-lottijiet l-oħra preżenti fis-sit tal-produzzjoni u għall-għelejjel suċċessivi tal-pjanti speċifikati jew għal siti oħra tal-produzzjoni;

    (iii)

    jeqirdu jew jittrattaw il-materjal tat-tkabbir mill-inqas fl-aħħar tal-istaġun tal-kultivazzjoni b’tali mod li ma jkun hemm l-ebda riskju identifikabbli ta’ tixrid tal-pest speċifikat;

    (b)

    għal siti tal-produzzjoni maħsuba għall-produzzjoni ta’ frott speċifikat:

    (i)

    ineħħu u jeqirdu l-pjanti kollha mis-sit tal-produzzjoni, mill-inqas fl-aħħar tal-istaġun tal-kultivazzjoni. It-tneħħija għandha titwettaq b’tali mod li ma jkun hemm l-ebda riskju identifikabbli ta’ tixrid tal-pest speċifikat;

    (ii)

    japplikaw miżuri tal-iġjene speċifiċi fuq il-persunal, l-istrutturi, l-għodod u l-makkinarju tas-sit tal-produzzjoni, il-materjali u l-mezzi tal-ippakkjar u tat-trasport tal-frott, biex jipprevjenu t-tixrid tal-pest speċifikat għal għelejjel suċċessivi tal-pjanti speċifikati jew għal siti oħra tal-produzzjoni;

    (iii)

    jeqirdu jew jittrattaw il-materjal tat-tkabbir mill-inqas fi tmiem l-istaġun tal-kultivazzjoni b’tali mod li ma jkun hemm l-ebda riskju identifikabbli ta’ tixrid tal-pest speċifikat;

    4.   L-awtoritajiet kompetenti jistgħu jabolixxu żona demarkata u jtemmu l-miżuri ta’ qerda rispettivi meta, wara t-teħid ta’ kampjuni u l-ittestjar tal-pjanti speċifikati ta’ għelejjel suċċessivi, is-sit ikun instab ħieles mill-pest speċifikat għal perjodu ta’ mill-inqas sitt xhur wara t-tħawwil ta’ dawk il-pjanti.”;

    (3)

    fl-ewwel subparagrafu tal-Artikolu 7(1) il-punt (b) huwa sostitwit b’dan li ġej:

    “(b)

    iż-żrieragħ jew il-pjanti omm tagħhom ikunu għaddew minn kampjunar u ttestjar għall-pest speċifikat mill-awtorità kompetenti, jew ikunu ġew soġġetti għal kampjunar u ttestjar minn operaturi professjonali taħt is-superviżjoni uffiċjali tal-awtorità kompetenti, u skont dawk it-testijiet, ikunu nstabu ħielsa mill-pest speċifikat. Meta l-pjanti omm jiġu ttestjati, il-kampjunar għandu jsir fl-iqsar żmien possibbli qabel l-ewwel ħsad tal-frott.

    Fil-każ tal-preżenza suspettata tal-pest speċifikat, dawk il-kampjunar u l-ittestjar għandhom jitwettqu biss mill-awtoritajiet kompetenti f’konformità mal-Artikolu 87(3)(c) tar-Regolament (UE) 2016/2031;”;

    (4)

    fl-Artikolu 9(1)(a), il-punt (ii) huwa sostitwit b’dan li ġej:

    “(ii)

    iż-żrieragħ speċifikati kkonċernati jew il-pjanti omm ta’ dawk iż-żrieragħ speċifikati kkonċernati jkunu għaddew minn kampjunar u minn ittestjar uffiċjali għall-pest speċifikat kif stabbilit fl-Anness u, skont dawk it-testijiet, ikunu nstabu ħielsa mill-pest speċifikat.

    Meta l-pjanti omm jiġu ttestjati, il-kampjunar għandu jsir fl-iqsar żmien possibbli qabel l-ewwel ħsad tal-frott;”;

    (5)

    L-Artikolu 10 huwa sostitwit b’dan li ġej:

    “Artikolu 10

    Kontrolli uffiċjali mal-introduzzjoni fl-Unjoni

    Għandhom jiġu kkampjunati u ttestjati mill-awtorità kompetenti fil-post ta’ kontroll fuq il-fruntiera tal-ewwel wasla fl-Unjoni jew f’punt ta’ kontroll, mhux inqas minn 20 % tal-kunsinni taż-żrieragħ speċifikati u tal-pjanti speċifikati għat-tħawwil, kif imsemmi fir-Regolament Delegat tal-Kummissjoni (UE) 2019/2123 (*1), kif stabbilit fl-Anness ta’ dan ir-Regolament.

    Għal kunsinni ta’ żrieragħ speċifikati u pjanti speċifikati għat-tħawwil li joriġinaw fl-Iżrael, ir-rata ta’ kampjunar u ttestjar għandha tkun ta’ 50 % u għall-kunsinni ta’ żrieragħ speċifikati li joriġinaw fiċ-Ċina, għandha tkun ta’ 100 %.

    (*1)  Ir-Regolament Delegat tal-Kummissjoni (UE) 2019/2123 tal-10 ta’ Ottubru 2019 li jissupplimenta r-Regolament (UE) 2017/625 tal-Parlament Ewropew u tal-Kunsill fir-rigward tar-regoli għall-każijiet meta l-verifiki identitarji u l-verifiki fiżiċi fuq ċerti oġġetti jistgħu jitwettqu f’punti ta’ kontroll u l-verifiki dokumentarji jistgħu jitwettqu ’l bogħod mill-postijiet ta’ kontroll fuq il-fruntieri u l-kundizzjonijiet li bihom isiru dawn il-verifiki, (ĠU L 321, 12.12.2019, p. 64).”;"

    (6)

    fl-Artikolu 12, id-data “il-31 ta’ Mejju 2022” hija sostitwita bid-data “il-31 ta’ Mejju 2023”;

    (7)

    l-Anness huwa emendat f’konformità mal-Anness ta’ dan ir-Regolament.

    L-Artikolu 2

    Dħul fis-seħħ

    Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u jkun direttament applikabbli fl-Istati Membri kollha.

    Magħmul fi Brussell, it-13 ta’ Ottubru 2021.

    Għall-Kummissjoni

    Il-President

    Ursula VON DER LEYEN

    (1)  ĠU L 317, 23.11.2016, p. 4.

    (2)  ĠU L 95, 7.4.2017, p. 1.

    (3)  Ir-Regolament ta’ Implimentazzjoni tal-Kummissjoni (UE) 2020/1191 tal-11 ta’ Awwissu 2020 li jistabbilixxi miżuri li jipprevjenu l-introduzzjoni u t-tixrid fl-Unjoni tal-virus tal-frott imkemmex u kannella tat-tadam (ToBFV) u li jħassar id-Deċiżjoni ta’ Implimentazzjoni (UE) 2019/1615 (ĠU L 262, 12.8.2020, p. 6).

    (4)  https://ec.europa.eu/food/animals/traces_en

    ANNESS

    L-Anness tar-Regolament ta’ Implimentazzjoni (UE) 2020/1191 huwa emendat kif ġej:

    (1)

    il-punt 2 huwa sostitwit b’dan li ġej:

    “2.

    Skemi ta’ kampjunar ta’ pjanti speċifikati, għajr dawk tal-varjetajiet tal-Capsicum spp. magħrufa li huma reżistenti għall-pest speċifikat

    Fil-każ ta’ pjanti speċifikati, għajr dawk tal-varjetajiet tal-Capsicum spp. magħrufa li huma reżistenti għall-pest speċifikat, għandhom jinġabru 200 werqa minn kull sit tal-produzzjoni u kultivar, preferibbilment il-weraq iż-żgħar min-naħa ta’ fuq tal-pjanti.

    Fil-każ ta’ pjanti sintomatiċi, il-kampjunar għall-ittestjar għandu jsir fuq mill-inqas tliet werqiet sintomatiċi”;

    (2)

    fil-punt 4, l-intestatura u l-frażi ta’ introduzzjoni huma sostitwiti b’dan li ġej:

    “4.

    Metodi ta’ ttestjar għad-detezzjoni u l-identifikazzjoni tal-pest speċifikat fuq il-pjanti speċifikati, għajr dawk tal-varjetajiet tal-Capsicum spp. magħrufa li huma reżistenti għall-pest speċifikat, u fuq il-frott speċifikat

    Għandu jitwettaq wieħed mill-metodi ta’ ttestjar li ġejjin għad-detezzjoni tal-pest speċifikat fuq il-pjanti speċifikati, għajr dawk tal-varjetajiet tal-Capsicum spp. magħrufa li huma reżistenti għall-pest speċifikat, u fuq il-frott speċifikat: ”.
    Top