(1)

Fit-22 ta’ Jannar 2015, il-Kummissjoni rċeviet applikazzjoni mill-kumpanija Greenprotech għall-approvazzjoni tal-“maċerat ta’ widnet il-għomor” bħala sustanza bażika biex tintuża bħala repellent tal-insetti u stimulant tal-pjanti fis-siġar tal-frott, il-ħaxix u l-ħxejjex. Dik l-applikazzjoni kellha magħha l-informazzjoni meħtieġa skont it-tieni subparagrafu tal-Artikolu 23(3) tar-Regolament (KE) Nru 1107/2009.

(2)

Il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) għall-għajnuna xjentifika. L-Awtorità pprovdiet lill-Kummissjoni b’rapport tekniku dwar il-“maċerat ta’ widnet il-għomor” fit-28 ta’ Novembru 2019 (2). Abbażi ta’ dak ir-rapport tekniku u d-dokumentazzjoni pprovduta mill-applikant, huwa xieraq li l-kamp ta’ applikazzjoni jiġi definit bħala li jkopri s-sustanza attiva tal-“estratt iffermentat mill-weraq tas-Symphytum officinale L. (widnet il-għomor)”.

(3)

L-informazzjoni pprovduta mill-applikant dwar l-estratt iffermentat mill-weraq tas-Symphytum officinale L. (widnet il-għomor) ma kinitx biżżejjed biex turi li jissodisfa l-kriterji tal-oġġett tal-ikel kif definit fl-Artikolu 2 tar-Regolament (KE) Nru 178/2002 tal-Parlament Ewropew u tal-Kunsill (3).

(4)

L-Awtorità kkonkludiet li l-ispeċifikazzjoni tal-estratt iffermentat mill-weraq tas-Symphytum officinale L. (widnet il-għomor) mhijiex definita sew. L-Awtorità indikat ukoll li l-widnet il-għomor hija magħrufa li fiha komponenti ġenotossiċi u karċinoġeniċi, u l-informazzjoni dwar il-konċentrazzjoni tal-komposti ġenotossiċi u karċinoġeniċi fl-estratt iffermentat mill-weraq tas-Symphytum officinale L. ma kinitx disponibbli. B’riżultat ta’ dan, ma kienx possibbli li jiġi konkluż li l-estratt iffermentat mill-weraq tas-Symphytum officinale L. ma għandux jitqies bħala sustanza ta’ tħassib kif previst fl-Artikolu 23(1)(a) tar-Regolament (KE) Nru 1107/2009.

(5)

Barra minn hekk, l-informazzjoni disponibbli dwar l-estratt iffermentat mill-weraq tas-Symphytum officinale L. ma ħallietx l-Awtorità tiffinalizza l-valutazzjoni tar-riskju tal-esponiment mhux djetetiku u l-valutazzjoni tar-riskju għall-konsumaturi. Barra minn hekk, ma kienx hemm biżżejjed informazzjoni disponibbli dwar l-esponiment ambjentali u r-riskji għall-organiżmi li mhumiex fil-mira.

(6)

L-ebda evalwazzjoni rilevanti, imwettqa f’konformità ma’ leġiżlazzjoni oħra tal-Unjoni kif imsemmija fl-Artikolu 23(2) tar-Regolament (KE) Nru 1107/2009, ma kienet disponibbli.

(7)

Il-Kummissjoni ppreżentat ir-rapport ta’ rieżami (4) u abbozz tar-Regolament lill-Kumitat Permanenti dwar il-Pjanti, l-Annimali, l-Ikel u l-Għalf fid-19 ta’ Mejju 2020 u s-26 ta’ Jannar 2021, rispettivament, u ffinalizzathom għal-laqgħa ta’ dak il-Kumitat fl-24 ta’ Marzu 2021.

(8)

Il-Kummissjoni stiednet lill-applikant iressaq il-kummenti tiegħu dwar ir-rapport tekniku tal-Awtorità u dwar l-abbozz tar-rapport ta’ rieżami tal-Kummissjoni. L-applikant ressaq il-kummenti tiegħu, li ġew eżaminati bir-reqqa.

(9)

Madankollu, minkejja l-argumenti mressqa mill-applikant, it-tħassib relatat mas-sustanza ma jistax jiġi eliminat.

(10)

B’riżultat ta’ dan, ma ġiex stabbilit li r-rekwiżiti stipulati fl-Artikolu 23 tar-Regolament (KE) Nru 1107/2009 huma ssodisfati. Huwa għalhekk xieraq li l-estratt iffermentat mill-weraq tas-Symphytum officinale L. (widnet il-għomor) ma jiġix approvat bħala sustanza bażika.

(11)

Dan ir-Regolament ma jwaqqafx il-preżentazzjoni ta’ applikazzjoni oħra għall-approvazzjoni tal-estratt iffermentat mill-weraq tas-Symphytum officinale L. (widnet il-għomor) bħala sustanza bażika f’konformità mal-Artikolu 23(3) tar-Regolament (KE) Nru 1107/2009 jew l-applikazzjoni għall-approvazzjoni bħala sustanza attiva f’konformità mal-Artikolu 7 ta’ dak ir-Regolament.

(12)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,