(1)

Ir-Regolament (UE) Nru 1380/2013 tal-Parlament Ewropew u tal-Kunsill (2) għandu l-għan li jelimina b’mod progressiv il-qbid skartat fis-sajd kollu tal-Unjoni bl-introduzzjoni tal-obbligu ta’ ħatt l-art għall-qabdiet ta’ speċijiet li huma soġġetti għal-limiti tal-qbid.

(2)

L-Artikolu 9 tar-Regolament (UE) Nru 1380/2013 jipprevedi l-adozzjoni ta’ pjanijiet pluriennali li jkun fihom miżuri ta’ konservazzjoni għas-sajd li jisfrutta ċerti stokkijiet f’żona ġeografika rilevanti.

(3)

Dawn il-pjanijiet pluriennali jispeċifikaw id-dettalji tal-implimentazzjoni tal-obbligu ta’ ħatt l-art u jistgħu jagħtu s-setgħa lill-Kummissjoni li tispeċifika aktar dawk id-dettalji abbażi ta’ rakkomandazzjonijiet konġunti żviluppati mill-Istati Membri.

(4)

Ir-Regolament (UE) 2019/472 jistabbilixxi pjan pluriennali għall-istokkijiet mistada fl-Ilmijiet tal-Punent u għas-sajd li jisfrutta dawk l-istokkijiet. L-Artikolu 13 ta’ dak ir-Regolament jagħti s-setgħa lill-Kummissjoni li tadotta atti delegati biex tissupplimenta dan ir-Regolament billi tispeċifika d-dettalji tal-obbligu ta’ ħatt l-art għall-istokkijiet kollha tal-ispeċijiet fl-Ilmijiet tal-Punent li għalihom japplika l-obbligu ta’ ħatt l-art skont l-Artikolu 15(1) tar-Regolament (UE) Nru 1380/2013, kif previst fil-punti (a) sa (e) tal-Artikolu 15(5) ta’ dak ir-Regolament (UE) Nru 1380/2013, abbażi ta’ rakkomandazzjonijiet konġunti żviluppati mill-Istati Membri.

(5)

Ir-Regolament Delegat tal-Kummissjoni (UE) 2019/2239 (3) speċifika d-dettalji tal-implimentazzjoni tal-obbligu ta’ ħatt l-art għal ċertu sajd demersali fil-Baħar tat-Tramuntana għall-perjodu 2020-2021, wara rakkomandazzjoni konġunta mressqa mill-Belġju, mid-Danimarka, minn Franza, mill-Ġermanja, min-Netherlands, mill-Iżvezja u mir-Renju Unit (4) li għandhom interess ta’ ġestjoni dirett tas-sajd fil-Baħar tat-Tramuntana.

(6)

Wara li kkonsultaw mal-Kunsill Konsultattiv tal-Ilmijiet tal-Majjistral u mal-Kunsill Konsultattiv tal-Istokkijiet Pelaġiċi, fil-5 ta’ Mejju 2020, il-Belġju, Spanja, Franza, l-Irlanda u n-Netherlands ippreżentaw rakkomandazzjoni konġunta lill-Kummissjoni dwar pjan għall-iskartar għal ċertu sajd fl-Ilmijiet tal-Majjistral għall-perjodu 2021-2023. L-Istati Membri analizzaw ir-rakkomandazzjoni konġunta fid-29 ta’ Lulju 2020.

(7)

Ir-Regolament Delegat tal-Kummissjoni (UE) 2019/2237 (5) jispeċifika d-dettalji tal-implimentazzjoni tal-obbligu ta’ ħatt l-art għal ċertu sajd demersali fil-Baħar tat-Tramuntana għall-perjodu 2020-2021, wara rakkomandazzjoni konġunta mressqa mill-Belġju, mid-Danimarka, minn Franza, mill-Ġermanja, min-Netherlands, mill-Iżvezja u mir-Renju Unit li għandhom interess ta’ ġestjoni dirett tas-sajd fil-Baħar tat-Tramuntana.

(8)

Wara li fl-24 ta’ April 2020 ikkonsultaw mal-Kunsill Konsultattiv tal-Ilmijiet tal-Lbiċ u mal-Kunsill Konsultattiv tal-Istokkijiet Pelaġiċi, fil-5 ta’ Mejju 2020, il-Belġju, Spanja, Franza, in-Netherlands u l-Portugall ippreżentaw rakkomandazzjoni konġunta lill-Kummissjoni dwar pjan għall-iskartar għal ċertu sajd fl-Ilmijiet tal-Lbiċ għall-perjodu 2021-2023. L-Istati Membri analizzaw ir-rakkomandazzjoni konġunta fis-16 ta’ Lulju 2020.

(9)

Inkisbu kontributi xjentifiċi mingħand il-korpi xjentifiċi rilevanti, li ġew analizzati mill-Kumitat Xjentifiku, Tekniku u Ekonomiku għas-Sajd (“STECF”) (6). Il-Kummissjoni ppreżentat il-miżuri kkonċernati lil grupp ta’ esperti magħmul minn rappreżentanti tal-Istati Membri fit-28 ta’ Lulju 2020 f’laqgħa li għaliha attenda l-Parlament Ewropew bħala osservatur.

(10)

Skont l-Artikolu 18 tar-Regolament (UE) Nru 1380/2013, il-Kummissjoni qieset kemm il-valutazzjoni tal-STECF kif ukoll il-ħtieġa li l-Istati Membri jiżguraw l-implimentazzjoni sħiħa tal-obbligu ta’ ħatt l-art. F’bosta każijiet, tressqet evidenza ġdida, iżda l-STECF deherlu li hemm bżonn titjib fl-informazzjoni pprovduta. F’dawk il-każijiet, jixraq jingħataw eżenzjonijiet fuq bażi temporanja. Permezz tal-attivitajiet tas-sajd kontinwi, il-ġbir tad-data se jitjieb u se jiġu indirizzati l-kunsiderazzjonijiet tal-STECF.

(11)

Il-gruppi reġjonali sostnew li hemm żieda potenzjali fil-kostijiet bħala konsegwenza tal-ġestjoni tal-qabdiet mhux mixtieqa għall-biċċa l-kbira tal-eżenzjonijiet de minimis. L-informazzjoni pprovduta mill-Istati Membri f’dan ir-rigward tjiebet. Madankollu, l-STECF jinnota li għadd hemm bżonn jitjieb il-ġbir tad-data, filwaqt li t-titjib tas-selettività jenħtieġ ikun prijorità biex jitnaqqas il-livell tal-qabdiet mhux mixtieqa. Għalhekk, f’każijiet bħal dawn, l-eżenzjonijiet se jingħataw fuq bażi ta’ każ b’każ għal sena jew sentejn. L-Istati Membri jenħtieġ jipprovdu data addizzjonali li tirriżulta minn provi u studji xjentifiċi li għadhom għaddejjin.

(12)

L-eżenzjonijiet tas-sopravivenza għolja li ġejjin għall-obbligu ta’ ħatt l-art jenħtieġ japplikaw għall-Ilmijiet tal-Majjistral.

(13)

Ir-Regolament Delegat (UE) 2019/2239 jinkludi eżenzjoni tas-sopravivenza, kif previst mill-Artikolu 15(4)(b) tar-Regolament (KE) Nru 1380/2013, għall-iskampu li jinqabad bin-nases jew bil-kavetti fis-subżoni 6 u 7 tal-Kunsill Internazzjonali għall-Esplorazzjoni tal-Baħar (“ICES”). L-Istati Membri talbu li l-eżenzjoni titkompla. L-STECF evalwa l-evidenza mressqa mill-Istati Membri fis-snin preċedenti u kkonkluda (7) li l-eżenzjoni hi ġustifikata. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm.

(14)

Ir-Regolament Delegat (UE) 2019/2239 jinkludi eżenzjoni tas-sopravivenza għall-iskampu li jinqabad bl-użu ta’ xbieki tat-tkarkir tal-qiegħ b’daqs tal-malja ta’ 100 mm jew akbar u għall-iskampu li jinqabad bix-xbieki tat-tkarkir tal-qiegħ b’daqs tal-malja ta’ 70-99 mm flimkien ma’ alternattivi ta’ rkaptu selettiv (sajd TRI u TR2) fis-subżona 7 tal-ICES. L-Istati Membri talbu li l-eżenzjoni titkompla. Fis-snin preċedenti, l-STECF analizza l-evidenza pprovduta mill-Istati Membri u kkonkluda (8) li l-istudju tas-sopravivenza li sar bix-xibka tat-tkarkir Seltra pprovda data suffiċjenti, iżda li jibqa’ diffiċli li jiġi vvalutat l-effett ġenerali fuq is-sajd estensiv tal-iskampu bi rkapti tas-sajd oħra. L-STECF innota li jekk wieħed jassumi li tapplika rata tas-sopravivenza relattivament għolja għall-irkapti kollha, dak is-sajd ikun jinvolvi rata ta’ skartar relattivament baxxa. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm f’dan ir-Regolament bi speċifiċitajiet tal-irkaptu għaż-Żona ta’ Protezzjoni tal-Baħar Ċeltiku u għall-Baħar Irlandiż.

(15)

Ir-Regolament Delegat (UE) 2019/2239 jinkludi eżenzjoni tas-sopravivenza għall-iskampu li jinqabad fid-diviżjoni 6a tal-ICES, sa tnax-il mil nawtiku mill-kosta, billi jintużaw xbieki tat-tkarkir bid-diriġenti b’daqs tal-malja ta’ 80-110 mm flimkien ma’ alternattivi ta’ rkaptu selettiv. L-Istati Membri talbu li l-eżenzjoni titkompla. L-STECF analizza l-evidenza mressqa mill-Istati Membri fis-snin preċedenti u kkonkluda (9) li l-istudju dwar is-sopravivenza hu sod u jindika rata tas-sopravivenza relattivament għolja. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm.

(16)

Ir-Regolament Delegat (UE) 2019/2239 jinkludi eżenzjoni tas-sopravivenza għal-lingwata komuni inqas mid-daqs minimu ta’ referenza għall-konservazzjoni (MCRS) li tinqabad bix-xbieki tat-tkarkir bid-diriġenti ta’ 80-99 mm fid-diviżjoni 7d tal-ICES sa sitt mili nawtiċi mill-kosta u barra ż-żoni ta’ tkabbir identifikati. L-Istati Membri talbu li l-eżenzjoni titkompla. Fis-snin preċedenti, l-STECF evalwa l-evidenza mressqa mill-Istati Membri u kkonkluda (10) li l-evidenza kienet biżżejjed biex tagħti prova tar-rati tas-sopravivenza. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm.

(17)

Ir-Regolament Delegat (UE) 2019/2239 ta eżenzjoni tas-sopravivenza għar-rebekkini u r-raj li jinqabdu b’xi rkaptu fis-subżoni 6 u 7 tal-ICES. L-Istati Membri talbu li l-eżenzjoni titkompla. L-STECF analizza l-evidenza l-ġdida mressqa mill-Istati Membri u kkonkluda (11) li s-sopravivenza tvarja skont l-ispeċi u t-tip ta’ sajd. L-STECF innota li għaddejjin proġetti li jenħtieġ jipprovdu informazzjoni utli dwar din l-eżenzjoni. Din il-konklużjoni tapplika għar-raja kukù (Leucoraja naevus). L-STECF innota li l-evidenza indikat rati tas-sopravivenza aktar baxxi għar-raja kukù. L-Istati Membri jenħtieġ jippreżentaw informazzjoni xjentifika addizzjonali li tirriżulta minn dawn l-istudji mill-aktar fis possibbli, iżda sa mhux aktar tard mill-1 ta’ Mejju ta’ kull sena.

(18)

Ir-Regolament Delegat (UE) 2019/2239 ta eżenzjoni tas-sopravivenza għall-barbun tat-tbajja’ li jinqabad fid-diviżjonijiet 7a sa 7k tal-ICES minn bastimenti li jużaw xbieki tat-tkarkir bi travu, b’potenza massima tal-magna ta’ 221 kW, tul massimu ta’ 24 metru, li jistadu sa 12-il mil nawtiku mill-kosta u b’ħinijiet ta’ rmunkar ta’ mhux aktar minn siegħa u nofs, u minn bastimenti li jużaw xbieki tat-tkarkir bi travu b’potenza tal-magna akbar minn 221 kW, bl-użu ta’ ħabel flip-up jew pannell tar-rilaxx bentiku. L-Istati Membri talbu li l-eżenzjoni titkompla. L-STECF analizza l-evidenza l-ġdida mressqa mill-Istati Membri u kkonkluda (12) li l-estimi tas-sopravivenza għall-iskartar huma varjabbli bejn il-vjaġġi u l-evidenza ma kinitx biżżejjed għad-diviżjonijiet 7h, 7j u 7k tal-ICES. F’dawk iċ-ċirkostanzi, l-eżenzjoni għall-barbun tat-tbajja’ jenħtieġ tinżamm biss fid-diviżjonijiet 7a sa 7 g tal-ICES. L-Istati Membri kkonċernati jenħtieġ jippreżentaw l-evidenza mill-aktar fis possibbli, iżda sa mhux aktar tard mill-1 ta’ Mejju ta’ kull sena. Il-Kummissjoni tinnota li l-Istati Membri impenjaw ruħhom li jippreżentaw skeda taż-żmien għat-tlestija tal-pjan direzzjonali bir-rapport annwali li jmiss sal-1 ta’ Mejju 2021.

(19)

Ir-Regolament Delegat (UE) 2019/2239 jinkludi eżenzjoni tas-sopravivenza għall-barbun tat-tbajja’ li jinqabad b’pariti jew xbieki tat-tkarkir bid-diriġenti fid-diviżjonijiet 7d sa 7 g tal-ICES. L-Istati Membri talbu li l-eżenzjoni titkompla. L-STECF analizza l-evidenza mressqa mill-Istati Membri fis-snin preċedenti u kkonkluda (13) li l-istudju dwar is-sopravivenza hu robust u jindika rata tas-sopravivenza relattivament għolja. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm.

(20)

Ir-Regolament Delegat (UE) 2019/2239 ta eżenzjoni tas-sopravivenza tal-barbun tat-tbajja’ li jinqabad bit-tartaruni Daniżi fid-diviżjoni 7d tal-ICES. L-Istati Membri talbu li l-eżenzjoni titkompla. Fis-snin preċedenti, l-STECF analizza l-evidenza mressqa mill-Istati Membri u kkonkluda (14) li d-data tal-istudju dwar ir-rati tas-sopravivenza hi affidabbli u tagħti estimi sodi tas-sopravivenza għal dak it-tip ta’ sajd. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm.

(21)

Ir-Regolament Delegat (UE) 2019/2239 jinkludi eżenzjoni tas-sopravivenza għall-ispeċijiet li jinqabdu fin-nases u fil-kavetti fl-Ilmijiet tal-Majjistral (is-subżoni 5, 6 u 7 tal-ICES). L-Istati Membri talbu li l-eżenzjoni titkompla. L-Istati Membri pprovdew evidenza xjentifika biex juru r-rati għolja tas-sopravivenza tal-qbid skartat għall-ispeċijiet li jinqabdu f’dak it-tip ta’ sajd. L-STECF analizza l-evidenza fis-snin preċedenti u kkonkluda (15) li s-sopravivenza tal-ispeċijiet skartati mis-sajd bin-nases u bix-xbieki nassa aktarx tkun sostanzjali. Iċ-ċirkostanzi ma nbidlux u għalhekk din l-eżenzjoni jenħtieġ tinżamm.

(22)

Ir-Regolament Delegat (UE) Nru 1393/2014 (16) jinkludi eżenzjoni tas-sopravivenza għall-kavalli u l-aringi li jinqabdu b’tartaruni tal-borża f’ċerti kundizzjonijiet fis-subżona 6 tal-ICES. L-Istati Membri talbu li l-eżenzjoni titkompla. L-STECF analizza l-evidenza ġustifikattiva fis-snin preċedenti u kkonkluda (17) li r-rati tas-sopravivenza jiddependu fuq iż-żmien tal-iffullar u d-densità tal-ħut fix-xibka, li ġeneralment ikunu limitati f’dawn it-tipi ta’ sajd. Jekk wieħed jassumi li r-riżultati tal-istudju dwar is-sopravivenza huma rappreżentattivi tar-rati tas-sopravivenza waqt l-operazzjonijiet tas-sajd kummerċjali, il-proporzjon ta’ superstiti tal-kavalli meħlusa aktarx ikun madwar 70 %. Id-densitajiet ikunu wkoll aktar baxxi mid-densità fejn ikun ġie osservat li l-mortalità tal-aringi żdiedet. Iċ-ċirkostanzi ma nbidlux u għalhekk din l-eżenzjoni jenħtieġ tinżamm f’dan ir-Regolament.

(23)

Ir-Regolament Delegat (UE) Nru 1393/2014 jinkludi eżenzjoni tas-sopravivenza għall-kavalli u l-aringi li jinqabdu fis-sajd bit-tartarun tal-lampara li jimmira għall-ispeċijiet mhux tal-kwota fid-diviżjonijiet 7e u 7f tal-ICES. L-Istati Membri talbu li l-eżenzjoni titkompla. L-STECF analizza l-evidenza mressqa mill-Istati Membri fis-snin preċedenti u kkonkluda (18) li r-rati tas-sopravivenza aktarx li kienu simili għar-rati tas-sopravivenza mis-sajd bit-tartarun tal-borża u l-evidenza ġustifikattiva kienet simili għall-evidenza li tiġġustifika eżenzjonijiet oħra inklużi fil-pjanijiet preċedenti għall-iskartar. Iċ-ċirkostanzi ma nbidlux u għalhekk l-eżenzjoni jenħtieġ tinżamm.

(24)

L-eżenzjonijiet tas-sopravivenza għolja li ġejjin jenħtieġ japplikaw għall-Ilmijiet tal-Lbiċ.

(25)

Ir-Regolament Delegat (UE) 2019/2237 jinkludi eżenzjoni mill-obbligu ta’ ħatt l-art għall-iskampu li jinqabad bix-xbieki tat-tkarkir tal-qiegħ fis-subżoni 8 u 9 tal-ICES u għall-paġella ħamra li tinqabad bl-irkaptu artiġjanali “voracera” fid-diviżjoni 9a tal-ICES. L-Istati Membri talbu li l-eżenzjoni titkompla. L-STECF evalwa l-eżenzjoni fuq l-iskampu fis-snin preċedenti u kkonkluda (19) li l-evidenza kienet soda. Għall-paġella ħamra, l-STECF ikkonkluda fil-valutazzjonijiet preċedenti (20) li l-istudji kienu jirrappreżentaw b’mod raġonevoli evidenza xjentifika tajba għas-sopravivenza tal-paġella ħamra. Iċ-ċirkostanzi ma nbidlux u għalhekk dawn iż-żewġ eżenzjonijiet jenħtieġ jinżammu.

(26)

Ir-Regolament Delegat (UE) 2019/2237 ta eżenzjoni tas-sopravivenza għar-rebekkini u r-raj li jinqabdu bl-irkapti kollha fis-subżoni 8 u 9 tal-ICES. L-Istati Membri talbu li din l-eżenzjoni titkompla u pprovdew evidenza ġdida. L-STECF ikkonkluda (21) li kien hemm sforz sinifikanti biex jiġu indirizzati n-nuqqasijiet fid-data, b’diversi proġetti għadhom għaddejjin. Madankollu jeħtieġ jitjieb il-ġbir tad-data. L-Istati Membri li għandhom interess ta’ ġestjoni dirett jenħtieġ jippreżentaw evidenza xjentifika addizzjonali, mill-aktar fis possibbli iżda sa mhux aktar tard mill-1 ta’ Mejju 2022, li tirriżulta mill-proġetti li għaddejjin. Għalhekk l-eżenzjoni jenħtieġ tinżamm.

(27)

Ir-Regolament Delegat (UE) 2019/2237 ta eżenzjoni għar-raja kukù li tinqabad bil-pariti fis-subżoni 8 u 9 tal-ICES u li tinqabad bix-xbieki tat-tkarkir tal-qiegħ fis-subżona 8 tal-ICES. L-Istati Membri talbu li din l-eżenzjoni titkompla u pprovdew evidenza ġdida. L-STECF analizza l-evidenza u nnota (22) li kien hemm sforz sinifikanti biex jiġu indirizzati n-nuqqasijiet fid-data u li hemm għadd sinifikanti ta’ proġetti li għadhom għaddejjin. Madankollu jeħtieġ jitjieb il-ġbir tad-data. Minħabba li r-rati tas-sopravivenza fil-passat għar-raja kukù wrew li huma aktar baxxi minn dawk għal rebekkini u raj oħrajn, jenħtieġ li l-eżenzjoni tinżamm sal-31 ta’ Diċembru 2022 għar-raja kukù li tinqabad bil-pariti fis-subżoni 8 u 9 tal-ICES u sal-31 ta’ Diċembru 2021 għar-raja kukù li tinqabad bix-xbieki tat-tkarkir tal-qiegħ fis-subżona 8 tal-ICES. L-Istati Membri jenħtieġ jippreżentaw informazzjoni xjentifika addizzjonali, mill-aktar fis possibbli, li tirriżulta mill-proġetti li għadhom għaddejjin.

(28)

Ir-Regolament Delegat (UE) 2019/2237 ta eżenzjoni tas-sopravivenza għall-paġella ħamra li tinqabad bl-irkaptu artiġjanali “voracera” fid-diviżjoni 9a tal-ICES u bis-snanar u x-xlief fis-subżoni 8 u 10 tal-ICES u fid-diviżjoni 9a tal-ICES. L-Istati Membri talbu li jkomplu din l-eżenzjoni u pprovdew evidenza ġdida. Madankollu jenħtieġ jitjieb il-ġbir tad-data. L-STECF innota (23) li diversi proġetti xjentifiċi dwar is-sopravivenza ppjanati għall-perjodu 2019-2020 ma twettqux minħabba restrizzjonijiet fil-kisba tal-materjal. L-eżenzjoni tista’ tingħata sal-31 ta’ Diċembru 2022. L-Istati Membri li għandhom interess ta’ ġestjoni dirett jenħtieġ jippreżentaw informazzjoni xjentifika addizzjonali, mill-aktar fis possibbli iżda sa mhux aktar tard mill-1 ta’ Mejju 2022, li tappoġġja l-eżenzjoni.

(29)

Ir-Regolament ta’ Delega tal-Kummissjoni (UE) Nru 1394/2014 (24) jinkludi eżenzjoni tas-sopravivenza għolja għall-inċova, għas-sawrell u għall-kavalli fis-sajd bit-tartarun tal-borża (PS) artiġjanali, sakemm ix-xibka ma tkunx kompletament abbord. L-Istati Membri talbu li din l-eżenzjoni titkompla u pprovdew evidenza ġdida. L-STECF innota (25) li l-evidenza turi rati għoljin tas-sopravivenza għall-inċova, għas-sawrell u għall-kavalli meta l-ħin tal-iffullar relatat mal-proċedura ta’ tħarrib jiġi stmat li hu inqas minn 5 minuti, li huwa l-ħin tal-iffullar stmat f’kundizzjoni ta’ sajd reali. Għalhekk, jenħtieġ li l-eżenzjoni tinżamm.

(30)

L-eżenzjonijiet de minimis li ġejjin mill-obbligu ta’ ħatt l-art jenħtieġ japplikaw għall-Ilmijiet tal-Majjistral.

(31)

Ir-Regolament Delegat (UE) 2019/2239 jinkludi eżenzjonijiet de minimis mill-obbligu ta’ ħatt l-art għal ċertu sajd. L-Istati Membri talbu li l-eżenzjoni titkompla. Fis-snin preċedenti, l-STECF analizza l-evidenza mressqa mill-Istati Membri u kkonkluda (26) li l-argumenti dwar l-ispejjeż sproporzjonati fil-ġestjoni tal-qabdiet mhux mixtieqa kienu raġonevoli. Iċ-ċirkostanzi ma nbidlux u għalhekk l-eżenzjonijiet de minimis jixraq jinżammu għal:

(32)

Ir-Regolament Delegat (UE) 2019/2239 jinkludi eżenzjoni de minimis għall-merluzz tal-linja sewda li jinqabad minn bastimenti li jużaw xbieki tat-tkarkir tal-qiegħ b’daqs tal-malja ta’ 80 mm jew aktar fid-diviżjonijiet 7b, 7c u 7e sa 7k tal-ICES. L-Istati Membri talbu li l-eżenzjoni titkompla. L-STECF (27) analizza l-evidenza l-ġdida mressqa mill-Istati Membri u kkonkluda li l-merluzz tal-linja sewda hu speċi bi kwota limitanti ta’ riskju għoli f’din iż-żona. Madankollu, l-STECF innota wkoll li l-bakkaljaw u l-merlangu naqsu ħafna fil-Baħar Ċeltiku u ta parir biex jitnaqqas il-livell tal-qabdiet mhux mixtieqa ta’ dawn l-ispeċijiet. Għalhekk, l-eżenzjoni tista’ tingħata għal xbieki tat-tkarkir tal-qiegħ b’daqs tal-malja ta’ 100 mm jew akbar, it-tartaruni u għajr ix-xbieki tat-tkarkir bi travu u s-sajd dirett għall-iskampu; għall-bastimenti li jimmiraw għall-iskampu b’daqs tal-malja ta’ mill-inqas 80 mm għas-sajd dirett għall-iskampu; u għax-xbieki tat-tkarkir bi travu b’daqs tal-malja ta’ 80 mm jew akbar b’pannell Fjamming. Din l-eżenzjoni jenħtieġ tinżamm sal-31 ta’ Diċembru 2022.

(33)

Ir-Regolament Delegat (UE) 2019/2239 ta eżenzjoni de minimis għas-sajd demersali mħallat magħmul minn bastimenti li jimmiraw għall-gamblu tar-ramel u li jużaw xbieki tat-tkarkir bi travu fid-diviżjoni 7a tal-ICES. L-Istati Membri talbu li l-eżenzjoni titkompla. Fis-snin preċedenti, l-STECF analizza l-evidenza mressqa mill-Istati Membri u kkonkluda (28) li l-eżenzjoni għal dan is-sajd hi ddokumentata sew fil-Baħar tat-Tramuntana u aktarx li s-sajd fil-Baħar tat-Tramuntana jkun rappreżentattiv tas-sajd fil-Baħar Irlandiż. Iċ-ċirkostanzi ma nbidlux u għalhekk l-eżenzjoni jenħtieġ tinżamm.

(34)

Ir-Regolament Delegat (UE) 2019/2239 ta eżenzjoni de minimis għall-pixxi trumbetta li tinqabad minn bastimenti li jużaw xbieki tat-tkarkir tal-qiegħ fid-diviżjonijiet 7b, 7c u 7f sa 7k tal-ICES. L-Istati Membri talbu li l-eżenzjoni titkompla. L-STECF analizza d-data l-ġdida ppreżentata mill-Istati Membri u kkonkluda (29) li hemm evidenza ta’ żieda fl-ispejjeż assoċjati mal-ġestjoni u l-ħażna tal-qabdiet mhux mixtieqa fis-sajd rilevanti. Madankollu jenħtieġ li t-titjib tas-selettività jkun il-prijorità. L-eżenzjoni jenħtieġ tinżamm sal-31 ta’ Diċembru 2022. L-Istati Membri kkonċernati jippreżentaw evidenza addizzjonali, mill-aktar fis possibbli u sa mhux aktar tard minn Mejju 2022, li tappoġġja din l-eżenzjoni.

(35)

Ir-Regolament Delegat (UE) 2019/2239 ta eżenzjoni de minimis għall-megrim inqas mid-daqs minimu ta’ referenza għall-konservazzjoni li jinqabad minn bastimenti li jużaw xbieki tat-tkarkir bi travu b’daqs tal-malja ta’ 80-119 mm fis-subżona 7 tal-ICES u li jużaw xbieki tat-tkarkir tal-qiegħ f’kundizzjonijiet speċifiċi. L-Istati Membri talbu li l-eżenzjoni titkompla. L-STECF analizza d-data l-ġdida mressqa mill-Istati Membri u kkonkluda (30) li hemm indikazzjonijiet ta’ spejjeż addizzjonali għall-ġestjoni tal-qabdiet mhux mixtieqa. L-eżenzjoni jenħtieġ tinżamm għal sentejn bi speċifikazzjonijiet addizzjonali li jippermettu l-ġbir ta’ data addizzjonali. L-Istati Membri kkonċernati jenħtieġ jippreżentaw evidenza addizzjonali, mill-aktar fis possibbli u samhux aktar tard minn Mejju 2021, li tappoġġja din l-eżenzjoni.

(36)

Ir-Regolament Delegat (UE) 2019/2239 ta eżenzjoni de minimis għal-lingwata komuni li tinqabad minn bastimenti li jużaw xbieki tat-tkarkir bi travu b’daqs tal-malja ta’ 80-119 mm b’żieda fis-selettività (pannell Fjamming) fid-diviżjonijiet 7a, 7j u 7k tal-ICES. L-Istati Membri talbu li l-eżenzjoni titkompla. L-STECF analizza l-evidenza l-ġdida mressqa mill-Istati Membri u kkonkluda (31) li kienu meħtieġa speċifikazzjonijiet tekniċi addizzjonali dwar l-irkapti tas-sajd. The exemption should be maintained for two years but only for ICES division 7a and Member States should submit as soon as possible, and not later than by 1 May 2022 the evidence supporting the exemption.

(37)

Ir-Regolament Delegat (UE) 2019/2239 jinkludi eżenzjoni de minimis għall-arġentina silus li tinqabad minn bastimenti li jużaw xbieki tat-tkarkir tal-qiegħ b’daqs tal-malja ta’ 100 mm jew aktar fid-diviżjoni 5b tal-ICES u fis-subżona 6 tal-ICES. L-Istati Membri talbu li l-eżenzjoni titkompla. L-STECF analizza l-evidenza l-ġdida mressqa mill-Istati Membri u kkonkluda (32) li hemm evidenza ta’ żieda fl-ispejjeż assoċjati mal-ġestjoni u l-ħażna tal-qabdiet mhux mixtieqa. L-eżenzjoni jenħtieġ tinżamm għal sentejn, u l-Istati Membri jenħtieġ jippreżentaw evidenza addizzjonali, mill-aktar fis possibbli iżda sa mhux aktar tard mill-1 ta’ Mejju 2022, li tappoġġja din l-eżenzjoni.

(38)

Ir-Regolament Delegat (UE) 2019/2239 ta eżenzjoni de minimis għall-kavalli u għas-sawrell li jinqabdu fis-sajd demersali mħallat minn bastimenti li jużaw ix-xbieki tat-tkarkir tal-qiegħ, it-tartaruni u x-xbieki tat-tkarkir bi travu fis-subżona 6 tal-ICES u fid-diviżjonijiet 7b sa 7k tal-ICES. L-Istati Membri talbu li l-eżenzjoni titkompla. L-STECF analizza l-evidenza mressqa mill-Istati Membri u kkonkluda li hemm evidenza ta’ żieda fl-ispejjeż assoċjati mal-ġestjoni tal-qabdiet mhux mixtieqa, kif konkluż fl-evalwazzjonijiet preċedenti. Iċ-ċirkostanzi ma nbidlux u għalhekk l-eżenzjoni jenħtieġ tinżamm għal sentejn, u l-Istati Membri jenħtieġ jippreżentaw evidenza addizzjonali, mill-aktar fis possibbli u sa mhux aktar tard mill-1 ta’ Mejju 2022, li tappoġġja l-eżenzjoni.

(39)

Ir-Regolament Delegat (UE) 2019/2239 ta eżenzjoni de minimis għall-merluzz tal-linja sewda inqas mid-daqs minimu ta’ referenza għall-konservazzjoni li jinqabad minn bastimenti li jużaw xbieki tat-tkarkir tal-qiegħ b’daqs tal-malja sa 119 mm fis-sajd għall-iskampu fil-Punent tal-Iskozja fid-diviżjoni 6a tal-ICES. L-Istati Membri talbu li l-eżenzjoni titkompla. L-STECF analizza l-evidenza mressqa mill-Istati Membri u nnota (33) li l-konklużjonijiet tar-rapport 19-08 tal-STECF kienu għadhom validi u li l-argumenti tal-ispejjeż sproporzjonati jidhru raġonevoli. Minħabba l-livell attwali ta’ qabdiet mhux mixtieqa f’dan is-sajd, l-eżenzjoni jenħtieġ tinżamm, iżda biss għall-bastimenti li jużaw irkapti selettivi ħafna.

(40)

Ir-Regolament ta’ Delega (UE) Nru 1393/2014 ta eżenzjoni de minimis għat-tipi ta’ sajd pelaġiku li ġejjin:

(41)

L-Istati Membri talbu li jkomplu l-eżenzjoni de minimis għall-istokkafixx (Micromesistius poutassou) fis-sajd industrijali b’bastiment tat-tkarkir pelaġiku li jimmira għal dik l-ispeċi fid-diviżjonijiet 5b, 6 u 7 tal-ICES u għall-ipproċessar ta’ dik l-ispeċi abbord biex tinkiseb bażi tas-surimi. L-STECF analizza din l-eżenzjoni b’mod pożittiv fis-snin preċedenti (34) u din kienet ingħatat minħabba d-diffikultajiet biex tittejjeb is-selettività. Iċ-ċirkostanzi tas-sajd ma nbidlux u għalhekk l-eżenzjonijiet jenħtieġ jinżammu. L-Istati Membri jenħtieġ jipprovdu evidenza dwar ix-xejriet tas-sajd sal-1 ta’ Mejju 2023.

(42)

L-Istati Membri talbu li jkomplu l-eżenzjoni de minimis għall-alonga (Thunnus alalunga) fis-sajd dirett għall-alonga bl-użu ta’ xbieki tat-tkarkir pelaġiku bil-paranzi (PTM) fis-subżona 7 tal-ICES. L-STECF analizza l-evidenza mressqa mill-Istati Membri dwar l-ispejjeż sproporzjonati tal-ħażna u l-ġestjoni tal-qabdiet mhux mixtieqa fis-snin preċedenti u kkonkluda (35) li t-talba hi relatata mat-telf ta’ qabdiet kummerċjabbli. L-Istati Membri ddiskutew l-ispejjeż tal-ħażna u l-ġestjoni fuq il-baħar u fuq l-art. Iċ-ċirkostanzi tas-sajd ma nbidlux u għalhekk l-eżenzjonijiet jenħtieġ jinżammu. L-Istati Membri jenħtieġ jipprovdu evidenza dwar ix-xejriet tas-sajd sal-1 ta’ Mejju 2023.

(43)

L-Istati Membri talbu li jkomplu l-eżenzjoni de minimis għall-kavalli, għas-sawrell, għall-aringi u għall-merlangu li jinqabdu minn bastimenti tat-tkarkir pelaġiku b’tul kumplessiv sa 25 m bl-użu tax-xbieki tat-tkarkir pelaġiku fid-diviżjoni 7d tal-ICES. L-STECF analizza l-evidenza mressqa mill-Istati Membri fis-snin preċedenti u kkonkluda (36) li l-argumenti kwalitattivi motivati appoġġjaw l-eżenzjoni minħabba spejjeż sproporzjonati. Iċ-ċirkostanzi tas-sajd ma nbidlux u għalhekk l-eżenzjonijiet jenħtieġ jinżammu. L-Istati Membri jenħtieġ jipprovdu evidenza dwar ix-xejriet tas-sajd sal-1 ta’ Mejju 2023.

(44)

L-eżenzjonijiet de minimis li ġejjin mill-obbligu ta’ ħatt l-art jenħtieġ japplikaw għall-Ilmijiet tal-Lbiċ.

(45)

Ir-Regolament Delegat (UE) 2019/2237 jinkludi eżenzjoni de minimis għal:

(46)

Ir-Regolament Delegat (UE) 2019/2237 jinkludi eżenzjoni de minimis għall-merluzz li jinqabad bix-xbieki tat-tkarkir u tartaruni fis-subżoni 8 u 9 tal-ICES. L-Istati Membri talbu li l-eżenzjoni titkompla. L-STECF analizza l-evidenza l-ġdida mressqa mill-Istati Membri fl-2020. L-STECF ikkonkluda (37) li l-analiżi dwar l-ispejjeż addizzjonali minħabba l-ġestjoni tal-qabdiet mhux mixtieqa tfasslet apposta għall-flotot li jimmiraw għall-merluzz, u r-riżultati jindikaw li se jiżdied il-ħin tal-ġestjoni u s-separazzjoni tal-qabdiet mhux mixtieqa. L-evidenza hi komprensiva u biżżejjed biex tappoġġja l-eżenzjoni u jenħtieġ li din tinżamm. L-eżenzjoni jenħtieġ tingħata wkoll għall-merluzz u l-lingwata komuni li jinqabdu minn bastimenti li jużaw ix-xbieki tat-tkarkir bil-paranzi u xbieki tat-tkarkir bid-diriġenti (OTM, PTM).

(47)

Ir-Regolament Delegat (UE) 2019/2237 jinkludi eżenzjoni de minimis għal-lingwata komuni li tinqabad bix-xbieki tat-tkarkir bi travu u bix-xbieki tat-tkarkir tal-qiegħ fid-diviżjonijiet 8a u 8b tal-ICES u għal-lingwata komuni li tinqabad bil-pariti u bl-għeżula fid-diviżjonijiet 8a u 8b tal-ICES. L-Istati Membri talbu li l-eżenzjonijiet jitkomplew. L-STECF analizza l-evidenza mressqa mill-Istati Membri fis-snin preċedenti u kkonkluda (38) li r-rakkomandazzjoni konġunta tinkludi argumenti motivati li juru diffikultajiet biex jiżdiedu s-selettività u spejjeż sproporzjonati tal-ġestjoni tal-qabdiet mhux mixtieqa. Iċ-ċirkostanzi ma nbidlux u għalhekk dawn l-eżenzjonijiet de minimis jenħtieġ jinżammu. L-eżenzjoni jenħtieġ tingħata wkoll għal-lingwata komuni li tinqabad minn bastimenti li jużaw ix-xbieki tat-tkarkir bil-paranzi u x-xbieki tat-tkarkir bid-diriġenti (OTM, PTM).

(48)

Ir-Regolament Delegat (UE) 2019/2237 jinkludi eżenzjoni de minimis għall-fonsa ħamra li tinqabad bis-snanar u fis-subżona 10 tal-ICES. L-Istati Membri talbu li l-eżenzjoni titkompla. L-STECF analizza l-evidenza mressqa mill-Istati Membri fis-snin preċedenti u kkonkluda (39) li l-informazzjoni pprovduta tinkludi argumenti motivati li juru li hu diffiċli jinkiseb aktar titjib fis-selettività jew dan jimplika spejjeż sproporzjonati fil-ġestjoni tal-qabdiet mhux mixtieqa. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm.

(49)

Ir-Regolament Delegat (UE) 2019/2237 jinkludi eżenzjoni de minimis għal:

(50)

Ir-Regolament Delegat (UE) 2018/2033 jinkludi eżenzjoni de minimis għal:

(51)

L-Istati Membri talbu li dawn l-eżenzjonijiet jitkomplew u li din tingħata għall-petriċa kbira li tinqabad bix-xbieki tat-tkarkir pelaġiku. L-Istati Membri pprovdew analiżi ekonomika dettaljata dwar l-ispejjeż sproporzjonati tal-qabdiet mhux mixtieqa li ġiet evalwata mill-STECF (40). L-STECF ikkonkluda li għalkemm l-istudju hu dettaljat u estensiv, l-STECF ma setax jevalwa bis-sħiħ il-metodoloġija tiegħu waqt il-proċedura bil-miktub. Minħabba l-informazzjoni pprovduta mill-Istati Membri u li l-STECF ma setax jivvaluta l-metodoloġija tal-istudju, jenħtieġ li dawk l-eżenzjonijiet jiġu inklużi f’dan ir-Regolament. L-Istati Membri jenħtieġ jipprovdu data addizzjonali, mill-aktar fis possibbli iżda sa mhux aktar tard mill-1 ta’ Mejju ta’ kull sena, li tappoġġja l-eżenzjoni.

(52)

Ir-Regolament Delegat (UE) 2019/2237 jinkludi eżenzjoni de minimis għal:

(53)

L-Istati Membri talbu li dawn l-eżenzjonijiet jitkomplew għall-merlangu li jinqabad bix-xbieki tat-tkarkir u bit-tartaruni fis-subżona 8 tal-ICES, u li din tingħata għall-merlangu li jinqabad bix-xbieki tat-tkarkir pelaġiku. L-Istati Membri pprovdew evidenza ġdida. L-STECF ikkonkluda (41) li hemm indikazzjonijiet li hu diffiċli li jinkiseb titjib fis-selettività fis-sajd demersali mħallat, li fih jinqabad il-merlangu mingħajr telf sinifikanti ta’ qabdiet kummerċjabbli oħra, kif ukoll li għaddejjin studji ġodda. L-eżenzjoni jenħtieġ tingħata għal sentejn. L-Istati Membri kkonċernati jenħtieġ jipprovdu informazzjoni xjentifika addizzjonali, mill-aktar fis possibbli iżda sa mhux aktar tard mill-1 ta’ Mejju ta’ kull sena, li tirriżulta mill-istudji li għaddejjin.

(54)

L-Istati Membri talbu li titkompla l-eżenzjoni de minimis għall-merlangu li jinqabad bl-għeżula fis-subżona 8 tal-ICES u pprovdew evidenza ġdida. L-STECF ikkonkluda (42) li hu diffiċli li jinkiseb titjib fis-selettività fis-sajd bl-għeżula. Madankollu jeħtieġ titjieb fl-informazzjoni pprovduta dwar l-ispejjeż sproporzjonati. L-eżenzjoni jenħtieġ tingħata għal sentejn u l-Istati Membri kkonċernati jenħtieġ jipprovdu data addizzjonali mill-aktar fis possibbli iżda sa mhux aktar tard mill-1 ta’ Mejju ta’ kull sena.

(55)

Ir-Regolament Delegat (UE) Nru 1394/2014 jinkludi eżenzjonijiet de minimis għal:

(56)

L-Istati Membri talbu li l-eżenzjonijiet jitkomplew fir-rigward tas-sajd pelaġiku. Ir-Regolament ta’ Delega (UE) Nru 1394/2014 jipprevedi dawn l-eżenzjonijiet wara valutazzjoni pożittiva tal-STECF fis-snin preċedenti (43) u l-eżenzjonijiet kienu ngħataw minħabba d-diffikultajiet iffaċċjati biex titjieb is-selettività għall-istokkafixx, għas-sawrell u għall-kavalli; u spejjeż għoljin għall-ġestjoni tal-qabdiet mhux mixtieqa fil-każ tal-alonga u tal-inċova. Iċ-ċirkostanzi ma nbidlux u għalhekk dik l-eżenzjoni jenħtieġ tinżamm.

(57)

Wara r-rakkomandazzjonijiet konġunti ġodda, ir-Regolament Delegat (UE) 2019/2239 u r-Regolament Delegat (UE) 2019/2237 jixraq jitħassru u jiġu sostitwiti b’Regolament ġdid.

(58)

Billi l-miżuri previsti f’dan ir-Regolament għandhom impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, dan ir-Regolament jenħtieġ jidħol fis-seħħ minnufih mal-pubblikazzjoni. Dan jenħtieġ jibda japplika mill-1 ta’ Jannar 2021,