This document is an excerpt from the EUR-Lex website
Document 32018R0345
Commission Delegated Regulation (EU) 2018/345 of 14 November 2017 supplementing Directive 2014/59/EU of the European Parliament and of the Council with regard to regulatory technical standards specifying the criteria relating to the methodology for assessing the value of assets and liabilities of institutions or entities (Text with EEA relevance. )
Regolament Delegat tal-Kummissjoni (UE) 2018/345 tal-14 ta' Novembru 2017 li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw il-kriterji li għandhom x'jaqsmu ma' metodoloġija għall-valutazzjoni tal-valur tal-assi u l-obbligazzjonijiet tal-istituzzjonijiet jew l-entitajiet (Test b'rilevanza għaż-ŻEE. )
Regolament Delegat tal-Kummissjoni (UE) 2018/345 tal-14 ta' Novembru 2017 li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw il-kriterji li għandhom x'jaqsmu ma' metodoloġija għall-valutazzjoni tal-valur tal-assi u l-obbligazzjonijiet tal-istituzzjonijiet jew l-entitajiet (Test b'rilevanza għaż-ŻEE. )
C/2017/7438
ĠU L 67, 9.3.2018, p. 8–17
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
9.3.2018 |
MT |
Il-Ġurnal Uffiċjali tal-Unjoni Ewropea |
L 67/8 |
REGOLAMENT DELEGAT TAL-KUMMISSJONI (UE) 2018/345
tal-14 ta' Novembru 2017
li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw il-kriterji li għandhom x'jaqsmu ma' metodoloġija għall-valutazzjoni tal-valur tal-assi u l-obbligazzjonijiet tal-istituzzjonijiet jew l-entitajiet
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2014/59/UE tal-Parlament Ewropew u tal-Kunsill tal-15 ta' Mejju 2014 li tistabbilixxi qafas għall-irkupru u r-riżoluzzjoni ta' istituzzjonijiet ta' kreditu u ditti ta' investiment (1), u b'mod partikolari l- Artikolu 36(15) tagħha,
Billi:
(1) |
F'xenarju ta' riżoluzzjoni, huwa importanti li ssir distinzjoni bejn, min-naħa l-waħda, valwazzjoni inizjali li tivvaluta jekk il-kundizzjonijiet għall-valwazzjoni negattiva u l-konverżjoni tal-istrumenti kapitali jew il-kundizzjoni għal riżoluzzjoni ġewx issodisfati, u, min-naħa l-oħra, valwazzjoni sussegwenti li tifforma l-bażi għad-deċiżjoni li tiġi applikata għodda tar-riżoluzzjoni waħda jew aktar. Fir-rigward tal-valwazzjoni inizjali, huwa xieraq li jiġi żgurat li meta jiġi ddeterminat jekk ġewx issodisfati l-kundizzjonijiet għar-riżoluzzjoni jew għall-valwazzjoni negattiva jew il-konverżjoni tal-instrumenti kapitali, issir valwazzjoni ġusta u realistika tal-assi u l-obbligazzjonijiet tal-entità. Għall-finijiet tal-valwazzjoni sussegwenti li ssejjes id-deċiżjoni dwar l-azzjonijiet tar-riżoluzzjoni, huwa importanti li jiġi żgurat li l-valwazzjoni tal-assi u l-obbligazzjonijiet tal-entità, li tiddetermina l-għażla tal-azzjoni tar-riżoluzzjoni u l-punt limitu ta' kull valwazzjoni negattiva jew konverżjoni ta' strumenti kapitali fil-punt tan-nonvijabbiltà, tkun ibbażata fuq suppożizzjonijiet ġusti, prudenti u realistiċi. |
(2) |
Sabiex jiġi żgurat li din il-valwazzjoni tkun ġusta, prudenti u realistika, huwa importanti li tistma l-impatt ta' avvenimenti qabel kull azzjoni ta' riżoluzzjoni jew qabel l-eżerċizzju tas-setgħa ta' valwazzjoni negattiva jew konverżjoni ta' strumenti kapitali fil-punt tan-nonvijabbiltà, kif ukoll ta' azzjonijiet differenti li jistgħu jittieħdu mill-awtorità ta' riżoluzzjoni. |
(3) |
Il-valwatur jinħtieġ li jkollu aċċess għal kull sors rilevanti ta' informazzjoni u għarfien espert, bħal rekords interni, sistemi u mudelli tal-istituzzjoni. L-abbiltà tal-kapaċitajiet u s-sistemi interni biex isostnu l-valwazzjonijiet tar-riżoluzzjoni jinħtieġ li tiġi vvalutata mill-awtorità tar-riżoluzzjoni bħala parti mill-valutazzjoni tar-riżolvibbiltà skont l-Artikolu 15 tad-Direttiva 2014/59/UE. Il-valwatur jinħtieġ li jitħalla wkoll jidħol f'arranġamenti biex jikseb pariri jew għarfien espert. Id-disponibbiltà ta' pariri speċjalizzati jew għarfien espert tista' tkun rilevanti, pereżempju, għall-preparazzjoni ta' stima tad-differenza fit-trattament skont l-Artikolu 36(8) tad-Direttiva 2014/59/UE. Għalhekk l-awtorità tar-riżoluzzjoni jinħtieġ li tkun sodisfatta li l-valwatur ikollu aċċess għal lista tal-pretensjonijiet kollha inklużi pretensjonijiet kontinġenti miżmuma kontra l-entità u kklassifikati skont id-drittijiet u l-prijoritajiet tagħhom skont proċeduri normali ta' insolvenza, jew għal għarfien ġuridiku adegwat għall-preparazzjoni ta' tali lista. |
(4) |
Id-determinazzjoni ta' jekk entità hix qed tfalli jew x'aktarx li tfalli tista' ssir mill-awtorità kompetenti jew mill-awtorità ta' riżoluzzjoni f'konformità mal-kundizzjonijiet stabbiliti fl-Artikolu 32(1)(a) tad-Direttiva 2014/59/UE. Biex jiġi ddeterminat jekk istituzzjoni tkunx qed tfalli jew x'aktarx li tfalli, l-awtorità kompetenti jinħtieġ li tikkunsidra l-valwazzjoni prevista fil-Kapitolu II ta' dan ir-Regolament, fejn tkun diġà disponibbli u jinħtieġ li tikkunsidra l-linji gwida maħruġa mill-Awtorità Bankarja Ewropea (EBA) skont l-Artikolu 32(6) tad-Direttiva 2014/59/UE li għandhom l-għan li jippromwovu l-konverġenza ta' prattiki fir-rigward tad-determinazzjoni ta' tali kundizzjoni ta' riżoluzzjoni. |
(5) |
Il-valwazzjonijiet li jsejsu d-determinazzjoni mill-awtorità kompetenti jew tar-riżoluzzjoni jekk il-kundizzjonijiet għar-riżoluzzjoni jew għall-valwazzjoni negattiva jew għall-konverżjoni tal-istrumenti kapitali jkunux ġew issodisfati jinħtieġ li jkunu konsistenti mal-qafas tal-kontabbiltà u regolatorju prudenzjali applikabbli. Il-valwatur, madankollu, jinħtieġ li jkun jista' jiddevvja minn suppożizzjonijiet magħmula mill-maniġment tal-entità responsabbli mill-preparazzjoni tad-dikjarazzjonijiet finanzjarji sakemm din id-devjazzjoni tkun konsistenti mal-qafas ta' kontabbiltà u regolatorju prudenzjali applikabbli. Meta ssir devjazzjoni minn dawk is-suppożizzjonijiet, il-valwazzjoni jinħtieġ li tiġi sostnuta mill-aħjar informazzjoni disponibbli u tkun konsistenti ma' gwida superviżorja eżistenti jew ma' sorsi oħra rikonoxxuti ta' interpretazzjoni ta' standards tal-kontabbiltà, b'tali mod li ssir rappreżentanza ġusta u realistika tal-pożizzjoni finanzjarja tal-entità. |
(6) |
Huwa xieraq li jkun hemm regoli li jiżguraw li l-valwazzjonijiet li jsejsu l-għażla u t-tfassil ta' azzjonijiet ta' riżoluzzjoni jew il-punt limitu tal-valwazzjoni negattiva u tal-konverżjoni ta' strumenti kapitali fil-punt tan-nonvijabbiltà jkunu ġusti, prudenti u realistiċi, biex jiġi żgurat li t-telf kollu jkun rikonoxxut bis-sħiħ meta jiġu applikati l-għodod ta' riżoluzzjoni jew meta tiġi eżerċitata s-setgħa li ssir valwazzjoni negattiva jew konverżjoni tal-istrumenti kapitali rilevanti. L-għażla tal-bażi tal-kejl l-aktar xierqa (il-valur ta' żamma jew il-valur ta' disponiment) jinħtieġ li ssir għall-azzjonijiet ta' riżoluzzjoni partikolari li jkunu qed jiġu kkunsidrati mill-awtorità ta' riżoluzzjoni. |
(7) |
Huwa xieraq li valwazzjonijiet li jsejsu l-għażla u t-tfassil ta' azzjonijiet ta' riżoluzzjoni jew il-punt limitu tal-valwazzjoni negattiva u tal-konverżjoni ta' strumenti kapitali fil-punt tan-nonvijabbiltà jivvalutaw il-valur ekonomiku u mhux il-valur kontabilistiku. Dawn il-valwazzjonijiet jinħtieġ li jikkunsidraw il-valur preżenti ta' flussi ta' flus li l-entità tista' tistenna b'mod raġonevoli, anki fejn dan jimplika li ssir devjazzjoni minn oqfsa ta' kontabbiltà jew ta' valwazzjoni prudenzjali. |
(8) |
Valwazzjonijiet li jsejsu l-għażla u t-tfassil ta' azzjonijiet ta' riżoluzzjoni jinħtieġ li jirriflettu l-fatt li flussi ta' flus jistgħu jirriżultaw mit-tkomplija taż-żamma tal-assi, iżda jinħtieġ li jqisu l-effetti potenzjali tar-riżoluzzjoni fuq flussi ta' flus futuri u suppożizzjonijiet ġusti, prudenti u realistiċi fir-rigward tar-rati ta' inadempjenza u s-severità tat-telf. Barra minn hekk, biex jiddetermina l-valur ta' ekwità wara l-konverżjoni tal-ishma, il-valwatur jinħtieġ li jkun jista' jikkunsidra aspettattivi raġonevoli għall-valur ta' franchise. |
(9) |
Inkella, jekk l-entità ma għandhiex il-kapaċità li żżomm l-assi jew id-disponiment tagħhom huwa meqjus neċessarju jew xieraq biex jintlaħqu l-objettivi tar-riżoluzzjoni, il-valwazzjoni jinħtieġ li tirrifletti l-fatt li dawk il-flussi ta' flus jistgħu jirriżultaw mid-disponiment tal-assi, l-obbligazzjonijiet jew il-linji tan-negozju, ivvalutati tul perjodu definit ta' disponiment. |
(10) |
Il-valur ta' disponiment jinħtieġ li ġeneralment jinftiehem bħala ekwivalenti għall-prezz tas-suq osservabbli li jista' jinkiseb fis-suq għal assi partikolari jew grupp ta' assi u jista' jirrifletti tnaqqis li huwa xieraq fid-dawl tal-ammont tal-assi li jkunu qed jiġu ttrasferiti. Madankollu, il-valwatur jinħtieġ li jkun jista', fejn xieraq, wara li jqis l-azzjonijiet li jridu jittieħdu permezz tal-iskema ta' riżoluzzjoni, jiddetermina l-valur ta' disponiment billi japplika tnaqqis f'dan il-prezz tas-suq osservabbli li jikkorrispondi għal tnaqqis potenzjali ta' bejgħ aċċellerat. Jekk l-assi ma jkollhomx suq likwidu, il-valur ta' disponiment jinħtieġ li jkun iddeterminat b'referenza għall-prezzijiet osservabbli fis-swieq fejn assi simili jkunu nnegozjati jew għal mudelli ta' kalkoli li jużaw parametri osservabbli tas-suq filwaqt li jitqies it-tnaqqis għal nuqqas ta' likwidità. Jekk il-bejgħ tan-negozju jew l-użu tal-għodda tal-istituzzjoni tranżitorja jkunu kkontemplati, aspettattivi raġonevoli tal-valur ta' franchise jistgħu jkunu kkunsidrati meta jiġi ddeterminat il-valur ta' disponiment. |
(11) |
Biex tiġi żgurata l-konsistenza bejn il-kalkolu, meħtieġ mill-Artikolu 36(8) tad-Direttiva 2014/59/UE, tal-istima tat-trattament li l-azzjonisti u kull kategorija ta' kredituri kienu mistennija li jirċievu kieku l-istituzzjoni jew l-entità kellha tiġi stralċjata skont proċeduri normali ta' insolvenza, u l-valwazzjoni ta' wara r-riżoluzzjoni skont l-Artikolu 74 ta' din id-Direttiva, huwa importanti li l-valwatur juża l-kriterji stabbiliti għal din il-valwazzjoni fejn xieraq. |
(12) |
Valwazzjoni proviżorja skont l-Artikolu 36(9) tad-Direttiva 2014/59/UE li tifforma l-bażi tad-deċiżjoni dwar it-teħid tal-azzjoni ta' riżoluzzjoni xierqa jinħtieġ li tinkludi bafer intiż li jqarreb l-ammont ta' telf addizzjonali. Dan il-bafer jinħtieġ li jkun ibbażat fuq valutazzjoni ġusta, prudenti u realistika ta' dan it-telf addizzjonali. Id-deċiżjonijiet u s-suppożizzjonijiet li jsostnu l-kalkolu tal-bafer jinħtieġ li jkunu spjegati u ġustifikati b'mod adegwat fir-rapport ta' valwazzjoni. |
(13) |
Għall-valwazzjoni msemmija fil-punti (a) u (c) tal-Artikolu 36(15) tad-Direttiva 2014/59/UE, il-valwatur jinħtieġ li jispjega u jiġġustifika s-suppożizzjonijiet prinċipali, l-inċertezzi u s-sensittività tal-valwazzjoni għal dawn is-suppożizzjonijiet prinċipali u l-inċertezzi. Jekk l-valwatur ikun jaf b'differenzi sinifikanti bejn is-suppożizzjonijiet użati fil-valwazzjoni u dawk li jreġu l-informazzjoni kontabilistika jew regolatorja, huwa jinħtieġ li jinkludihom fir-rapport ta' valwazzjoni. F'dan ir-rapport il-valwatur għandu wkoll jieħu nota ta' kull informazzjoni relatata addizzjonali li fl-opinjoni tal-valwatur tkun tista' tassisti l-awtorità tar-riżoluzzjoni. |
(14) |
Il-kriterji stabbiliti f'dan ir-Regolament jinħtieġ li jkunu stabbiliti esklussivament għat-twettiq ta' valwazzjonijiet skont l-Artikolu 36 tad-Direttiva 2014/59/UE. Dawn jinħtieġ li ma jissostitwixxux jew jemendaw il-prinċipji u l-istandards kontabilistiċi jew il-qafas regolatorju prudenzjali li japplikaw għal entitajiet f'kuntesti differenti minn riżoluzzjoni. Madankollu, jinħtieġ li jkun possibbli li tintuża l-informazzjoni li tirriżulta mill-valwazzjoni biex jiġu identifikati każijiet ta' applikazzjoni ħażina potenzjali mill-entità tal-istandards kontabilistiċi jew tal-qafas regolatorju prudenzjali, jew biex jiġi ddeterminat tibdil fil-politika tal-kontabbiltà tal-entità jew fis-suppożizzjonijiet jew ġudizzji li jmexxu l-kejl tal-assi u l-obbligazzjonijiet. Dawn iċ-ċirkostanzi, pereżempju, jinħtieġ li jiġu kkunsidrati għall-preparazzjoni ta' karta tal-bilanċ aġġornata skont l-Artikolu 36(6) tad-Direttiva 2014/59/UE. Għal dan il-għan, il-valwatur jinħtieġ li jipprovdi spjegazzjoni adegwata tad-differenzi bejn il-karti tal-bilanċ eżistenti u aġġornati. |
(15) |
Dan ir-Regolament huwa bbażat fuq l-abbozz tal-istandards tekniċi regolatorji ppreżentati mill-EBA lill-Kummissjoni. |
(16) |
L-EBA wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqu huwa bbażat dan ir-Regolament, analizzat l-ispejjeż u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (2), |
ADOTTAT DAN IR-REGOLAMENT:
KAPITOLU I
DISPOŻIZZJONIJIET ĠENERALI
Artikolu 1
Definizzjonijiet
Għall-fini ta' dan ir-Regolament, għandhom japplikaw id-definizzjonijiet li ġejjin:
(a) |
“valwazzjoni” tfisser il-valutazzjoni tal-assi u l-obbligazzjonijiet ta' entità mwettqa minn valwatur skont l-Artikolu 36(1) tad-Direttiva 2014/59/UE, jew il-valwazzjoni proviżorja mwettqa mill-awtorità ta' riżoluzzjoni jew il-valwatur, kif jista' jkun il-każ, skont, rispettivament, il-paragrafi (2) u (9) tal-Artikolu 36 ta' din id-Direttiva. |
(b) |
“valwatur” tfisser il-valwatur indipendenti fis-sens tal-Artikolu 38 tar-Regolament Delegat tal-Kummissjoni (UE) 2016/1075 (3) jew l-awtorità ta' riżoluzzjoni meta din twettaq valwazzjoni proviżorja skont il-paragrafi (2) u (9) tal-Artikolu 36 tad-Direttiva 2014/59/UE. |
(c) |
“entità” tfisser istituzzjoni jew entità kif imsemmija fil-punti (b), (c) jew (d) tal-Artikolu 1(1) tad-Direttiva 2014/59/UE. |
(d) |
“valur ġust” tfisser il-prezz li jkun riċevut biex jinbiegħ assi jew imħallas biex tiġi ttrasferita obbligazzjoni fi tranżazzjoni ordinata bejn parteċipanti fis-suq fid-data tal-valwazzjoni, kif definit skont il-qafas tal-kontabbiltà rilevanti. |
(e) |
“valur ta' żamma” tfisser il-valur preżenti, imnaqqas b'rata xierqa, ta' flussi ta' flus li l-entità tista' tistenna b'mod raġonevoli taħt suppożizzjonijiet ġusti, prudenti u realistiċi milli jinżammu assi u obbligazzjonijiet partikolari, filwaqt li jiġu kkunsidrati fatturi li jaffettwaw l-imġiba tal-konsumatur jew ta' kontroparti jew parametri ta' valwazzjoni oħrajn fil-kuntest ta' riżoluzzjoni. |
(f) |
“valur ta' disponiment” tfisser il-bażi tal-kejl imsemmi fl-Artikolu 12(5). |
(g) |
“valur ta' franchise” tfisser il-valur nett preżenti ta' flussi ta' flus li jistgħu jkunu mistennija b'mod raġonevoli li jirriżultaw miż-żamma u t-tiġdid tal-assi u l-obbligazzjonijiet jew negozji u jinkludi l-impatt ta' kull opportunità ta' negozju, kif rilevanti, inklużi dawk li jirriżultaw minn azzjonijiet ta' riżoluzzjoni differenti li huma valutati minn valwatur. Il-valur ta' franchise jista' jkunu ogħla jew inqas mill-valur li jirriżulta mit-termini u l-kundizzjonijiet kuntrattwali ta' assi u obbligazzjonijiet eżistenti fid-data tal-valwazzjoni. |
(h) |
“valur ta' ekwità” tfisser stima ta' prezz tas-suq, għal ishma trasferiti jew maħruġa, li tirriżulta mill-applikazzjoni ta' metodoloġiji ta' valwazzjoni aċċettati b'mod ġenerali. Skont in-natura tal-assi jew in-negozju, il-valur ta' ekwità jista' jinkludi l-valur ta' franchise. |
(i) |
“bażijiet tal-kejl” tfisser l-approċċ għad-determinazzjoni tal-ammonti monetarji li bihom l-assi jew l-obbligazzjonijiet huma ppreżentati mill-valwatur. |
(j) |
“data tar-riżoluzzjoni” tfisser id-data li fiha d-deċiżjoni biex entità tiġi riżolta tkun adottata, skont l-Artikolu 82 tad-Direttiva 2014/59/UE. |
Artikolu 2
Kriterji ġenerali
1. Meta jwettaq il-valwazzjoni, il-valwatur għandu jikkunsidra ċirkostanzi li jaffettwaw il-flussi ta' flus mistennija, u r-rati ta' tnaqqis applikabbli għall-assi u l-obbligazzjonijiet ta' entità, u għandu jkollu l-għan li jirrappreżenta b'mod ġust il-pożizzjoni finanzjarja tal-entità fil-kuntest tal-opportunitajiet u r-riskji li tittratta magħhom.
2. Il-valwatur għandu jiżvela u jiġġustifika s-suppożizzjonijiet prinċipali użati fil-valwazzjoni. Kull devjazzjoni sinifikanti fil-valwazzjoni mis-suppożizzjonijiet użati mill-maniġment tal-entità fil-preparazzjoni tad-dikjarazzjonijiet finanzjarji u fil-kalkolu tal-kapital regolatorju tal-entità u r-rekwiżiti kapitali għandha tiġi sostnuta mill-aħjar informazzjoni disponibbli.
3. Il-valwatur għandu jipprovdi l-aħjar stima tal-punt tal-valur ta' assi partikoli, obbligazzjoni partikolari, jew kombinazzjonijiet ta' dawn iż-żewġ elementi. Jekk ikun xieraq, ir-riżultati tal-valwazzjoni għandhom jiġu pprovduti wkoll fil-forma ta' firxa ta' valuri.
4. Il-kriterji stabbiliti f'dan ir-Regolament għall-kejl ta' assi u obbligazzjonijiet individwali ta' entità, għandhom japplikaw ukoll għall-kejl ta' portafolli jew gruppi ta' assi jew assi u obbligazzjonijiet kombinati, negozji, jew l-entità kkunsidrata bħala ħaġa waħda, skont kif jirrikjedu ċ-ċirkostanzi.
5. Il-valwazzjoni għandha taqsam il-kredituri f'kategoriji skont il-klassifika ta' prijorità tagħhom taħt il-liġi applikabbli ta' insolvenza, u għandha tinkludi l-istimi li ġejjin:
(a) |
il-valur ta' pretensjonijiet ta' kull kategorija skont il-liġi applikabbli ta' insolvenza u, fejn ikun rilevanti u fattibbli, skont id-drittijiet kuntrattwali mogħtija fuq il-pretendenti; |
(b) |
ir-rikavat li kull kategorija tirċievi kieku l-entità kellha tiġi stralċjata taħt proċeduri normali ta' insolvenza; Meta jiġu kkalkulati l-istimi skont il-punti (a) u (b) tal-ewwel subparagrafu, il-valwatur jista' japplika l-kriterji stabbiliti fl-Artikolu 4 tar-Regolament Delegat tal-Kummissjoni (UE) 2018/344 tal-14 ta' Novembru 2017 li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw il-kriterji li għandhom x'jaqsmu ma' metodoloġiji għall-valwazzjoni tad-differenza fit-trattament fir-riżoluzzjoni kif xieraq. |
6. Jekk xieraq u fattibbli, filwaqt li jiġi kkunsidrat l-iskedar u l-kredibbiltà tal-valwazzjoni, l-awtorità ta' riżoluzzjoni tista' titlob diversi valwazzjonijiet. F'dan il-każ, l-awtorità ta' riżoluzzjoni għandha tistabbilixxi l-kriterji sabiex tiddetermina kif għandhom jintużaw dawn il-valwazzjonijiet għall-finijiet stabbiliti fl-Artikolu 36 tad-Direttiva 2014/59/UE.
Artikolu 3
Data tal-valwazzjoni
Id-data tal-valwazzjoni għandha tkun waħda mid-dati li ġejjin:
(a) |
id-data ta' referenza kif determinata mill-valwatur fuq il-bażi tad-data qrib kemm jista' jkun qabel id-data mistennija ta' deċiżjoni mill-awtorità ta' riżoluzzjoni biex tpoġġi l-entità f'riżoluzzjoni jew biex teżerċita s-setgħa għal valwazzjoni negattiva jew konverżjoni ta' strumenti kapitali; |
(b) |
id-data tar-riżoluzzjoni, fejn valwazzjoni definittiva ex post meħtieġa mill-Artikolu 36(10) tad-Direttiva 2014/59/UE tiġi mwettqa; |
(c) |
il-mument determinat skont l-Artikolu 8 tar-Regolament Delegat tal-Kummissjoni (UE) 2016/1401 (4) fir-rigward tal-obbligazzjonijiet li jirriżultaw minn kuntratti tad-derivattivi. |
Artikolu 4
Sorsi ta' informazzjoni
Il-valwazzjoni għandha tkun ibbażata fuq kull informazzjoni pertinenti għad-data tal-valwazzjoni li tkun meqjusa rilevanti mill-valwatur. Minbarra d-dikjarazzjonijiet finanzjarji tal-entità, rapporti tal-awditjar u rappurtar regolatorju fir-rigward ta' perjodu li jintemm kemm jista' jkun qrib id-data tal-valwazzjoni, din l-informazzjoni rilevanti tista' tinkludi dan li ġej:
(a) |
id-dikjarazzjonijiet finanzjarji aġġornati u r-rappurtar regolatorju ppreparati mill-entità kemm jista' jkun qrib id-data tal-valwazzjoni; |
(b) |
spjegazzjoni tal-metodoloġiji, is-suppożizzjonijiet u l-ġudizzji prinċipali użati mill-entità biex jiġu ppreparati d-dikjarazzjonijiet finanzjarji u r-rappurtar regolatorju; |
(c) |
data inkluża fir-rekords tal-entità; |
(d) |
data dwar is-suq rilevanti; |
(e) |
konklużjonijiet tal-valwatur mid-diskussjoni mal-maniġment u l-awdituri; |
(f) |
jekk disponibbli, valutazzjonijiet superviżorji tal-kundizzjoni finanzjarja tal-entità, inkluża informazzjoni miksuba skont il-punt (h) tal-Artikolu 27(1) tad-Direttiva 2014/59/UE; |
(g) |
valutazzjonijiet tal-industrija kollha tal-kwalità tal-assi, fejn rilevanti għall-assi tal-entità, kif ukoll ir-riżultati tat-testijiet tal-istress; |
(h) |
valwazzjonijiet tal-pari, aġġustati b'mod adegwat biex jirriflettu ċ-ċirkostanzi speċifiċi tal-entità; |
(i) |
informazzjoni storika, aġġustata b'mod adegwat biex jiġu eliminati fatturi li ma għadhomx rilevanti, u biex jiġu inkorporati fatturi oħrajn li ma affettwawx l-informazzjoni storika; jew |
(j) |
analiżijiet tax-xejriet, aġġustati b'mod adegwat biex jirriflettu ċ-ċirkostanzi speċifiċi tal-entità. |
Artikolu 5
Impatt tal-arranġamenti tal-grupp
1. Jekk l-entità tagħmel parti minn grupp, il-valwatur għandu jikkunsidra l-impatt li arranġamenti ta' appoġġ intragrupp kuntrattwali eżistenti jista' jkollhom fuq il-valur tal-assi u l-obbligazzjonijiet fejn, fuq il-bażi taċ-ċirkustanzi, ikun probabbli li dawn l-arranġamenti se jidħlu fis-seħħ.
2. Il-valwatur għandu jikkunsidra biss l-impatt ta' arranġamenti formali jew informali oħrajn fil-grupp fejn, fuq il-bażi taċ-ċirkustanzi, ikun probabbli li dawk l-arranġamenti għandhom jibqgħu fis-seħħ fil-kuntest tal-kundizzjoni finanzjarja stressjata tal-grupp jew f'riżoluzzjoni.
3. Il-valwatur għandu jiddetermina jekk ir-riżorsi ta' entità fil-grupp humiex disponibbli biex ikopru t-telf ta' entitajiet oħrajn tal-grupp.
Artikolu 6
Rapport ta' valwazzjoni
Il-valwatur għandu jipprepara rapport ta' valwazzjoni lill-awtorità ta' riżoluzzjoni, li għandu jinkludi mill-inqas l-elementi li ġejjin:
(a) |
ħlief kif ipprovdut fl-Artikolu 36(9) tad-Direttiva 2014/59/UE, l-informazzjoni msemmija fil-punti minn (a) sa (c) tal-Artikolu 36(6) ta' din id-Direttiva; |
(b) |
ħlief kif ipprovdut fl-Artikolu 36(9) tad-Direttiva 2014/59/UE, l-informazzjoni msemmija fl-Artikolu 36(8) tad-Direttiva 2014/59/UE; |
(c) |
il-valwazzjoni tal-obbligazzjonijiet li jirriżultaw mid-derivattivi mwettqa skont ir-Regolament Delegat (UE) 2016/1401 tal-Kummissjoni; |
(d) |
sommarju tal-valwazzjoni inkluża spjegazzjoni tal-aħjar stima tal-punt, firxa ta' valuri u s-sorsi ta' inċertezza tal-valwazzjoni; |
(e) |
spjegazzjoni tal-metodoloġiji u s-suppożizzjonijiet prinċipali użati mill-valwatur meta jwettaq il-valwazzjoni, kemm hija sensittiva l-valwazzjoni għall-għażliet ta' metodoloġiji u suppożizzjonijiet u, fejn fattibbli, spjegazzjoni ta' kif dawk il-metodoloġiji u s-suppożizzjonijiet huma differenti minn dawk użati għal valwazzjonijiet rilevanti oħrajn inklużi valwazzjonijiet preliminari ta' riżoluzzjoni; |
(f) |
kull informazzjoni addizzjonali li fl-opinjoni tal-valwatur tista' tassisti lill-awtorità tar-riżoluzzjoni jew l-awtorità kompetenti għall-finijiet tal-Artikolu 36 minn (1) sa (11) tad-Direttiva 2014/59/UE. |
KAPITOLU II
KRITERJI GĦALL-VALWAZZJONI GĦALL-FINI TAL-ARTIKOLU 36(4)(a)
Artikolu 7
Prinċipji ġenerali
1. Il-valwazzjonijiet għall-fini msemmi fil-punt (a) tal-Artikolu 36(4) tad-Direttiva 2014/59/UE għandhom ikunu bbażati fuq suppożizzjonijiet ġusti u realistiċi u għandhom jaraw li jiżguraw li t-telf taħt ix-xenarju xieraq ikun rikonoxxut b'mod sħiħ. Jekk valwazzjoni bħal din tkun disponibbli, hija għandha ssejjes id-determinazzjoni tal-awtorità kompetenti jew tal-awtorità ta' riżoluzzjoni kif xieraq, li istituzzjoni “qed tfalli jew probabbli tfalli” kif imsemmi fl-Artikolu 32(1)(a) tad-Direttiva 2014/59/UE. Fuq il-bażi tal-gwida superviżorja eżistenti jew ta' sorsi rikonoxxuti oħrajn li jistabbilixxu kriterji li jwasslu għal kejl ġust u realistiku ta' tipi differenti ta' assi u obbligazzjonijiet, il-valwatur jista' jikkontesta s-suppożizzjonijiet, id-data, il-metodoloġiji u l-ġudizzji li fuqhom l-entità tkun ibbażat il-valwazzjonijiet tagħha għall-obbligi ta' rappurtar finanzjarju jew għall-kalkolu tal-kapital regolatorju u r-rekwiżiti ta' kapital u jinjurahom għall-finijiet tal-valwazzjoni.
2. Il-valwatur għandu jiddetermina l-metodoloġiji għall-valwazzjoni l-aktar xierqa li jistgħu joqogħdu fuq il-mudelli interni tal-entità fejn il-valwatur iqis xieraq li jikkunsidra n-natura tal-qafas tal-immaniġġjar tar-riskju tal-entità u l-kwalità tad-data u l-informazzjoni disponibbli.
3. Il-valwazzjonijiet għandhom ikunu konsistenti mal-qafas tal-kontabbiltà regolatorju prudenzjali applikabbli.
Artikolu 8
Oqsma li jeħtieġu attenzjoni partikolari fil-valwazzjoni
Il-valwatur għandu jiffoka b'mod partikolari fuq oqsma soġġetti għal inċertezza tal-valwazzjoni sinifikanti li jkollha impatt sinifikanti fuq il-valwazzjoni globali. Għal dawn l-oqsma, il-valwatur għandu jipprovdi r-riżultati tal-valwazzjoni fil-forma tal-aħjar stimi tal-punt u, fejn xieraq, firxa ta' valuri, kif stabbilit fl-Artikolu 2(3). Dawk l-oqsma għandhom jinkludu:
(a) |
self jew portafolli ta' self, li l-flussi ta' flus mistennija tagħhom jiddependu mill-abbiltà, ir-rieda jew l-inċentiv tal-kontroparti li jwettaq l-obbligu tiegħu, jekk dawn l-aspettattivi jkunu xprunati minn suppożizzjonijiet relatati mar-rati ta' delinkwenza, probabbiltajiet ta' inadempjenza, telf fil-każ ta' inadempjenza, jew karatteristiċi tal-istrument, speċjalment fejn xejriet ta' telf ta' portafoll ta' self juru evidenza ta' dan; |
(b) |
assi riposseduti, li l-flussi ta' flus tagħhom huma affettwati kemm mill-valur ġust tal-assi fiż-żmien meta l-entità tipprekludi t-titolu jew il-privileġġ relatati, u l-evoluzzjoni mistennija ta' tali valur wara l-preklużjoni; |
(c) |
strumenti mkejla bil-valur ġust fejn il-kalkolu ta' dan il-valur ġust f'konformità mar-rekwiżiti kontabilistiċi jew prudenzjali fir-rigward tal-evalwazzjoni tagħhom b'referenza għall-prezz tas-suq jew b'referenza għal mudell ma jkunx għadu applikabbli jew validu meta jitqiesu ċ-ċirkostanzi; |
(d) |
avvjament u assi intanġibbli, fejn it-test ta' indeboliment jista' jiddependi fuq ġudizzju suġġettiv, inkluż fir-rigward tal-kurrent tal-fluss tal-flus li jista' jintlaħaq b'mod raġonevoli, rati ta' tnaqqis, u l-perimetru ta' unitajiet li jiġġeneraw il-flus; |
(e) |
tilwim legali u azzjonijiet regolatorji, li l-flussi ta' flus mistennija tagħhom jistgħu jkunu soġġetti għal gradi differenti ta' inċertezza relatata mal-ammont u/jew l-iskedar tagħhom; |
(f) |
oġġetti li jinkludu assi u obbligazzjonijiet tal-pensjoni u oġġetti tat-taxxa differita. |
Artikolu 9
Fatturi li jaffettwaw il-valwazzjoni
1. Il-valwatur għandu jikkunsidra fatturi ġenerali li jistgħu jaffettwaw is-suppożizzjonijiet prinċipali li fuqhom ikunu bbażati l-valuri tal-assi u l-obbligazzjonijiet fl-oqsma msemmija fl-Artikolu 8, inklużi l-fatturi li ġejjin:
(a) |
iċ-ċirkostanzi ekonomiċi u tal-industrija li jaffettwaw l-entità, inklużi żviluppi tas-suq rilevanti; |
(b) |
il-mudell tan-negozju tal-entità u bidliet fl-istrateġija tagħha; |
(c) |
il-kriterji tal-għażla tal-assi tal-entità, inklużi politiki ta' sottoskrizzjoni ta' self; |
(d) |
ċirkostanzi u prattiki li x'aktarx iwasslu għal xokkijiet ta' pagament; |
(e) |
ċirkostanzi li jaffettwaw il-parametri użati biex jiġu ddeterminati l-assi mwieżna għar-riskju għall-kalkolu ta' rekwiżiti kapitali minimi; |
(f) |
l-impatt tal-istruttura finanzjarja tal-entità fuq il-kapaċità tal-entità li żżomm assi għall-perjodu ta' żamma mistenni u l-kapaċità tal-entità li tiġġenera flussi prevedibbli ta' flus; |
(g) |
tħassib dwar il-likwidità ġenerali jew tal-enetità jew tħassib dwar il-finanzjament. |
2. Il-valwatur għandu jissepara b'mod ċar kull gwadann materjali mhux realizzat identifikat fil-proċess tal-valwazzjoni, sal-punt li dawk il-gwadanji ma jkunux ġew rikonoxxuti fil-valwazzjoni, u għandu jipprovdi informazzjoni adegwata fir-rapport ta' valwazzjoni dwar iċ-ċirkostanzi eċċezzjonali li wasslu għal dawk il-gwadanji.
KAPITOLU III
KRITERJI GĦALL-VALWAZZJONI GĦALL-FINI TAL-ARTIKOLU 36(4)(b), (c), (d), (e), (f), (g) U L-ARTIKOLU 36(9), IT-TIENI SUBPARAGRAFU
Artikolu 10
Prinċipji ġenerali
1. Il-valwatur għandu jivvaluta l-impatt fuq il-valwazzjoni ta' kull azzjoni ta' riżoluzzjoni li l-awtorità tar-riżoluzzjoni tista' tadotta biex issejjes id-deċiżjonijiet imsemmija fil-punti minn (b) sa (g) tal-Artikolu 36(4) tad-Direttiva 2014/59/UE. Mingħajr preġudizzju għall-indipendenza tal-valwatur, l-awtorità tar-riżoluzzjoni tista' tikkonsulta mal-valwatur biex tidentifika l-firxa ta' azzjonijiet ta' riżoluzzjoni li tkun qed tiġi kkunsidrata minn din l-awtorità, inklużi azzjonijiet li jinsabu fil-pjan ta' riżoluzzjoni jew, jekk differenti, kull skema ta' riżoluzzjoni proposta.
2. Biex tiġi żgurata valwazzjoni ġusta, prudenti u realistika, il-valwatur għandu, fejn xieraq u f'konsultazzjoni mal-awtorità tar-riżoluzzjoni, jippreżenta valwazzjonijiet separati li jirriflettu l-impatt ta' firxa diversifikata biżżejjed ta' azzjonijiet ta' riżoluzzjoni.
3. Il-valwatur għandu jiżgura li meta jiġu applikati l-għodod ta' riżoluzzjoni jew meta s-setgħa ta' valwazzjoni negattiva jew ta' konverżjoni ta' strumenti kapitali rilevanti tiġi eżerċitata, kwalunkwe telf fuq l-assi tal-entità ikun rikonoxxut b'mod sħiħ taħt xenarji li jkunu rilevanti għall-firxa ta' azzjonijiet ta' riżoluzzjoni li jkunu qed jiġu kkunsidrati.
4. Meta l-valuri tal-valwazzjoni jvarjaw b'mod sinifikanti mill-valuri ppreżentati mill-entità fid-dikjarazzjonijiet finanzjarji, il-valwatur għandu juża s-suppożizzjonijiet ta' din il-valwazzjoni, biex isejsu l-aġġustamenti fis-suppożizzjonijiet u fil-politiki tal-kontabbiltà neċessarji għall-preparazzjoni tal-karta tal-bilanċ aġġornata meħtieġa skont l-Artikolu 36(6) tad-Direttiva 2014/59/UE, b'mod konsistenti mal-qafas tal-kontabbiltà applikabbli. Fir-rigward tat-telf identifikat mill- valwatur li ma jkunx jista jiġi rikonoxxut fil-karta tal-bilanċ aġġornata, il-valwatur għandu jispeċifika l-ammont, jiddeskrivi r-raġunijiet li fuqhom hija bbażata d-determinazzjoni tat-telf u l-probabbiltà tal-okkorrenza tagħhom u l-medda ta' żmien.
5. Meta strumenti kapitali jew obbligazzjonijiet oħrajn ikunu kkonvertiti f'ekwità, valwazzjoni għandha tipprovdi stima tal-valur ta' ekwità wara l-konverżjoni ta' ishma ġodda trasferiti jew maħruġa bħala konsiderazzjoni lid-detenturi tal-istrumenti konvertiti jew kredituri oħrajn. Din l-istima għandha tkun il-bażi għad-determinazzjoni tar-rata ta' konverżjoni jew tar-rati skont l-Artikolu 50 tad-Direttiva 2014/59/UE.
Artikolu 11
Għażla tal-bażi tal-kejl
1. Fl-għażla l-aktar xierqa tal-bażi jew bażijiet tal-kejl, il-valwatur għandu jikkunsidra firxa ta' azzjonijiet ta' riżoluzzjoni li jridu jiġu eżaminati skont l-Artikolu 10(1).
2. Il-valwatur għandu jiddetermina l-flussi ta' flus li l-entità tista' tistenna fuq il-bażi ta' suppożizzjonijiet ġusti, prudenti u realistiċi minn assi u obbligazzjonijiet eżistenti wara l-adozzjoni tal-azzjoni jew tal-azzjonijiet ta' riżoluzzjoni eżaminati, bi tnaqqis b'rata xierqa kif determinat skont il-paragrafu 6.
3. Il-flussi ta' flus għandhom jiġu stabbiliti fil-livell xieraq ta' aggregazzjoni, li jvarja minn assi u obbligazzjonijiet individwali għal portafolli jew negozji, filwaqt li jiġu kkunsidrati d-differenzi fil-profili tar-riskju.
4. Jekk l-azzjonijiet ta' riżoluzzjoni msemmija fl-Artikolu 10(1) jeħtieġu li l-assi u l-obbligazzjonijiet iridu jkunu miżmuma minn entità li tkompli tkun istituzzjoni li tqajjem tħassib, il-valwatur għandu juża l-valur ta' żamma bħala l-bażi tal-kejl xierqa. Il-valur ta' żamma, jekk jitqies ġust, prudenti u realistiku, jista' jantiċipa n-normalizzazzjoni tal-kundizzjonijiet tas-suq.
Il-valur ta' żamma ma għandux jintuża bħala l-bażi tal-kejl fejn l-assi jkunu ttrasferiti lejn vettura tal-immaniġġar tal-assi skont l-Artikolu 42 tad-Direttiva 2014/59/UE jew lejn istituzzjoni tranżitorja skont l-Artikolu 40 ta' din id-Direttiva, jew meta tintuża għodda tal-bejgħ ta' negozju skont l-Artikolu 38 tad-Direttiva 2014/59/UE.
5. Meta l-azzjonijiet ta' riżoluzzjoni msemmija fl-Artikolu 10(1) jipprevedu l-bejgħ tal-assi, il-flussi ta' flus mistennija għandhom jikkorrispondu għall-valuri tad-disponiment ikkunsidrati għall-orizzont ta' disponiment mistenni.
6. Ir-rati ta' tnaqqis għandhom ikunu ddeterminati wara l-għażla tal-iskedar tal-flussi ta' flus, il-profil tar-riskju, l-ispejjeż ta' finanzjament u l-kundizzjonijiet tas-suq kif xieraq għall-assi jew għall-obbligazzjoni li jkunu qed jitkejlu, l-istrateġija tad-disponiment ikkunsidrata u l-pożizzjoni finanzjarja tal-entità wara r-riżoluzzjoni.
Artikolu 12
Fatturi speċifiċi relatati mal-istima u t-tnaqqis ta' flussi ta' flus mistennija
1. Għall-fini li jiġu stimati l-flussi ta' flus, il-valwatur għandu japplika l-ġudizzju espert tiegħu meta jiddetermina l-karatteristiċi prinċipali tal-assi jew l-obbligazzjonijiet li jkunu qed jiġu mkejla. Il-valwatur għandu japplika wkoll il-ġudizzju espert tiegħu meta jiddetermina kif it-tkomplija, it-tiġdid potenzjali jew ir-rifinanzjament, il-likwidazzjoni jew id-disponiment ta' dawn l-assi jew l-obbligazzjonijiet, kif previst fl-azzjoni ta' riżoluzzjoni eżaminata, jaffettwaw dawk il-flussi ta' flus.
2. Jekk l-azzjoni tar-riżoluzzjoni tipprevedi entità li żżomm assi, iżżomm obbligazzjonijiet, jew tkompli negozju, il-valwatur jista' jqis fatturi li potenzjalment jistgħu jaffettwaw flussi ta' flus futuri, inklużi dawn li ġejjin:
(a) |
bidliet fis-suppożizzjonijiet jew l-aspettattivi, meta mqabbla ma' dawk prevalenti sad-data tal-valwazzjoni, konsistenti max-xejriet storiċi fuq terminu twil u orizzont raġonevoli konsistenti mal-perjodu kkontemplat taż-żamma tal-assi jew għall-irkupru tal-entità; jew |
(b) |
bażijiet ta' valwazzjoni addizzjonali jew alternattivi jew metodoloġiji li huma kkunsidrati xierqa mill-valwatur u konsistenti ma' dan ir-Regolament, inkluż fil-kuntest tal-valutazzjoni tal-valur ta' ekwità wara l-konverżjoni tal-ishma. |
3. Fir-rigward ta' gruppi ta' assi u obbligazzjonijiet jew negozji previsti li jiġu likwidati, il-valwatur għandu jikkunsidra l-ispejjeż u l-benefiċċji tal-workout.
4. Jekk is-sitwazzjoni ta' entità ma tippermettilhiex li żżomm assi jew li tkompli negozju, jew meta l-bejgħ mill-bqija jkun meqjus neċessarju mill-awtorità tar-riżoluzzjoni biex jinkisbu l-objettivi tar-riżoluzzjoni, il-flussi ta' flus mistennija għandhom jiġu referenzjati għall-valuri tad-disponiment mistennija f'perjodu speċifiku ta' disponiment.
5. Il-valur ta' disponiment għandu jiġi ddeterminat mill-valwatur fuq il-bażi tal-flussi ta' flus, il-valur nett tal-ispejjeż tad-disponiment u l-valur nett tal-valur mistenni ta' kull garanzija mogħtija, li l-entità tista' tistenna b'mod raġonevoli fil-kundizzjonijiet tas-suq prevalenti attwalment permezz ta' bejgħ jew trasferiment b'mod ordinat ta' assi jew obbligazzjonijiet. Jekk ikun xieraq, wara li jiġu kkunsidrati l-azzjonijiet li jridu jittieħdu taħt l-iskema ta' riżoluzzjoni, il-valwatur jista' jiddetermina l-valur ta' disponiment billi japplika tnaqqis potenzjali ta' bejgħ aċċellerat lill-prezz tas-suq osservabbli ta' dan il-bejgħ jew trasferiment. Biex jiġi ddeterminat il-valur ta' disponiment ta' assi li ma għandhomx suq likwidu, il-valwatur għandu jikkunsidra prezzijiet osservabbli fis-swieq fejn assi simili huma nnegozjati jew mudelli ta' kalkoli bl-użu ta' parametri osservabbli tas-suq, bi tnaqqis għal nuqqas ta' likwidità rifless kif xieraq.
6. Il-valwatur għandu jqis fatturi li jistgħu jaffettwaw il-valuri tad-disponiment u l-perjodi tad-disponiment, inklużi dawn li ġejjin:
(a) |
il-valuri tad-disponiment u l-perjodi tad-disponiment osservati fi tranżazzjonijiet simili, aġġustati b'mod adegwat biex ikunu kkunsidrati differenzi fil-mudell tan-negozju u fl-istruttura finanzjarja tal-partijiet għal dawk it-tranżazzjonijiet; |
(b) |
vantaġġi jew żvantaġġi ta' tranżazzjoni partikolari li huma speċifiċi għall-partijiet involuti jew għal subsett ta' parteċipanti tas-suq; |
(c) |
attributi partikolari ta' assi jew negozju li jistgħu jkunu rilevanti biss għal xerrej potenzjali, jew għal subsett ta' parteċipanti tas-suq; |
(d) |
l-impatt li x'aktarx ikollu l-bejgħ mistenni fuq il-valur ta' franchise tal-entità. |
7. Meta ssir il-valutazzjoni tal-valur tan-negozju għall-finijiet tal-użu tal-bejgħ tan-negozju jew tal-għodda tal-istituzzjoni tranżitorja, il-valwatur jista' jikkunsidra l-aspettattivi raġonevoli għall-valur ta' franchise. Tali aspettattiva għall-valur ta' franchise għandha tinkludi dik li tirriżulta minn tiġdid tal-assi, minn rifinanzjament ta' portafoll miftuħ, jew mit-tkomplija jew l-issoktar ta' negozju fil-kuntest tal-azzjonijiet ta' riżoluzzjoni.
8. Valwatur li jivvaluta li ebda prospett realistiku għad-disponiment ta' assi jew negozju ma jista' jiġi mistenni b'mod raġonevoli, ma għandux ikun meħtieġ li jiddetermina l-valur ta' disponiment, iżda għandu jagħmel stima tal-flussi ta' flus relatati rilevanti fuq il-bażi tal-prospetti rilevanti għat-tkomplija jew għal-likwidazzjoni. Din id-dispożizzjoni ma għandhiex tapplika għall-għodda tas-separazzjoni tal-assi jew għall-għodda tal-bejgħ ta' negozju.
9. Għal partijiet ta' grupp ta' assi jew ta' negozju li x'aktarx jiġu likwidati skont il-proċeduri ta' insolvenza ordinarja, il-valwatur jista' jikkunsidra l-valuri tad-disponiment u l-perjodi tad-disponiment osservati f'irkantijiet li jinvolvu assi ta' natura u kundizzjoni simili. Id-determinazzjoni ta' flussi ta' flus mistennija għandha tikkunsidra n-nuqqas ta' likwidità, in-nuqqas ta' inputs affidabbli għad-determinazzjoni tal-valuri tad-disponiment, u l-ħtieġa li tirriżulta li jintużaw metodoloġiji ta' valwazzjoni bbażati fuq inputs mhux osservabbli.
Artikolu 13
Metodoloġija għall-kalkolu u l-inklużjoni ta' bafer għal telf addizzjonali
1. Biex tiġi indirizzata l-inċertezza ta' valwazzjonijiet proviżorji mmexxija skont il-punti minn (b) sa (g) tal-Artikolu 36(4) tad-Direttiva 2014/59/UE, il-valwatur għandu jinkludi fil-valwazzjoni bafer biex jiġu riflessi fatti u ċirkustanzi li jsostnu l-eżistenza ta' telf addizzjonali ta' ammont jew skedar inċert. Biex jiġi evitat l-għadd doppju tal-inċertezza, is-suppożizzjonijiet li jsostnu l-kalkolu tal-bafer għandhom ikunu spjegati u ġustifikati b'mod adegwat mill-valwatur.
2. Biex ikun iddeterminat id-daqs tal-bafer, il-valwatur għandu jidentifika fatturi li jistgħu jaffettwaw il-flussi ta' flus mistennija bħala riżultat ta' azzjonijiet ta' riżoluzzjoni li x'aktarx ikunu adottati.
3. Għall-finijiet tal-paragrafu 2, il-valwatur jista' jagħmel estrapolazzjoni tat-telf stimat għal parti tal-assi tal-entità għall-bqija tal-karta tal-bilanċ tal-entità. Jekk disponibbli, it-telf medju stimat għal assi ta' kompetituri tal-pari jista' wkoll jiġi estrapolat, soġġetti għall-aġġustamenti neċessarji għad-differenzi fil-mudell tan-negozju u l-istruttura finanzjarja.
Artikolu 14
Dħul fis-seħħ
Dan ir-Regolament jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament jorbot fl-intier tiegħu u japplika direttament fl-Istati Membri kollha.
Magħmul fi Brussell, l-14 ta' Novembru 2017.
Għall-Kummissjoni
Il-President
Jean-Claude JUNCKER
(1) ĠU L 173, 12.6.2014, p. 190.
(2) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Bankarja Ewropea), li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).
(3) Ir-Regolament Delegat tal-Kummissjoni (UE) 2016/1075 tat-23 ta' Marzu 2016 li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw il-kontenut tal-pjanijiet ta' rkupru, il-pjanijiet ta' riżoluzzjoni u l-pjanijiet ta' riżoluzzjoni tal-grupp, il-kriterji minimi li l-awtorità kompetenti trid tivvaluta fir-rigward tal-pjanijiet ta' rkupru u pjanijiet ta' rkupru tal-grupp, il-kundizzjonijiet għall-appoġġ finanzjarju tal-grupp, ir-rekwiżiti għall-valwaturi indipendenti, ir-rikonoxximent kuntrattwali tas-setgħat ta' valwazzjoni negattiva u konverżjoni, il-proċeduri u l-kontenut tar-rekwiżiti ta' notifika u tal-avviż ta' sospensjoni u l-funzjonament operazzjonali tal-kulleġġi ta' riżoluzzjoni (ĠU L 184, 8.7.2016, p. 1).
(4) Ir-Regolament Delegat tal-Kummissjoni (UE) 2016/1401 tat-23 ta' Mejju 2016 li jissupplimenta d-Direttiva 2014/59/UE tal-Parlament Ewropew u tal-Kunsill li tistabbilixxi qafas għall-irkupru u r-riżoluzzjoni ta' istituzzjonijiet ta' kreditu u ditti ta' investiment fir-rigward ta' standards tekniċi regolatorji għal metodoloġiji u prinċipji dwar il-valwazzjoni tal-obbligazzjonijiet li jirriżultaw minn derivattivi (ĠU L 228, 23.8.2016, p. 7).