32018H2050

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
EUR-Lex - 32018H2050 - EN

Help

Search tips

Need more search options? Use the Advanced search

Document 32018H2050

Help

Rakkomandazzjoni tal-Kummissjoni (UE) 2018/2050 tad-19 ta' Diċembru 2018 dwar l-allinjament tal-kamp ta' applikazzjoni u tal-kundizzjonijiet għal-liċenzji ġenerali ta' trasferiment għall-iskopijiet ta' dimostrazzjoni u evalwazzjoni kif imsemmi fil-punt (c) tal-Artikolu 5(2) tad-Direttiva 2009/43/KE tal-Parlament Ewropew u tal-Kunsill (notifikata bid-dokument C(2018) 8598) (Test b'rilevanza għaż-ŻEE.)

C/2018/8598

ĠU L 327, 21.12.2018, p. 89–93 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

ELI: http://data.europa.eu/eli/reco/2018/2050/oj

HTML

PDF

Official Journal

21.12.2018

Il-Ġurnal Uffiċjali tal-Unjoni Ewropea

L 327/89

RAKKOMANDAZZJONI TAL-KUMMISSJONI (UE) 2018/2050

tad-19 ta' Diċembru 2018

dwar l-allinjament tal-kamp ta' applikazzjoni u tal-kundizzjonijiet għal-liċenzji ġenerali ta' trasferiment għall-iskopijiet ta' dimostrazzjoni u evalwazzjoni kif imsemmi fil-punt (c) tal-Artikolu 5(2) tad-Direttiva 2009/43/KE tal-Parlament Ewropew u tal-Kunsill

(notifikata bid-dokument C(2018) 8598)

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea, u b'mod partikolari l-Artikolu 292 tiegħu,

Billi:

(1)	Skont l-Artikolu 5 tad-Direttiva 2009/43/KE tal-Parlament Ewropew u tal-Kunsill (1), l-Istati Membri huma obbligati li jippubblikaw mill-inqas erba' liċenzji ġenerali ta' trasferiment.

(2)	Il-liċenzji ġenerali ta' trasferiment huma element ewlieni tas-sistema ta' liċenzjar issimplifikata li ddaħħlet bid-Direttiva 2009/43/KE.

(3)

Id-differenzi fil-kamp ta' applikazzjoni tal-liċenzji ġenerali ta' trasferiment ippubblikati mill-Istati Membri f'termini tal-prodotti relatati mad-difiża koperti u l-kundizzjonijiet diverġenti applikati għat-trasferimenti ta' dawn il-prodotti jistgħu jfixklu l-implimentazzjoni tad-Direttiva 2009/43/KE u l-kisba tal-għan tagħha ta' simplifikazzjoni. L-allinjament tal-approċċi nazzjonali fir-rigward tal-kamp ta' applikazzjoni u tal-kundizzjonijiet għat-trasferimenti skont il-liċenzji ġenerali ta' trasferiment ippubblikati mill-Istati Membri huwa importanti biex jiżgura l-attraenza u l-użu ta' dawk il-liċenzji.

(4)

Il-Kunsill tenna mill-ġdid fil-konklużjonijiet tiegħu tat-18 ta' Mejju 2015, il-bżonn tal-implimentazzjoni u tal-applikazzjoni, inter alia, tad-Direttiva 2009/43/KE,. Wara l-adozzjoni ta' żewġ rakkomandazzjonijiet preċedenti dwar liċenzji ġenerali ta' trasferiment għall-forzi armati (2) u għar-riċevituri ċertifikati (3), il-Kummissjoni ħabbret fil-Pjan ta' Azzjoni Ewropew għad-Difiża (4) u fir-Rapport dwar l-evalwazzjoni tad-Direttiva dwar it-Trasferimenti (5) l-fokus tagħha fuq iż-żewġ liċenzji ġenerali ta' trasferiment li fadal, li jkopru t-trasferimenti għall-iskopijiet ta' dimostrazzjoni, evalwazzjoni, wiri, tiswija u manutenzjoni.

(5)	L-inizjattiva ta' din ir-Rakkomandazzjoni kienet appoġġata bil-qawwa mir-rappreżentanti tal-Istati Membri fil-Kumitat stabbilit bl-Artikolu 14 tad-Direttiva 2009/43/KE. Il-linji gwida stabbiliti fir-Rakkomandazzjoni jirriflettu d-diskussjonijiet ta' grupp ta' esperti stabbilit taħt dan il-Kumitat.

(6)

Din ir-Rakkomandazzjoni tapplika għal-lista ta' prodotti relatati mad-difiża (li jikkorrispondu għal-Lista Militari Komuni tal-Unjoni Ewropea), kif imniżżel fl-Anness tad-Direttiva 2009/43/KE. Din ir-Rakkomandazzjoni se tiġi aġġornata meta jkun meħtieġ sabiex tirrifletti l-aġġornamenti futuri tal-lista ta' prodotti relatati mad-difiża.

(7)

Abbażi tad-diskussjonijiet mal-Istati Membri u filwaqt li jitqiesu l-karatteristiċi tal-prodotti (inklużi l-eċċezzjonijiet), bħal pereżempju s-sensittività tagħhom, il-prodotti relatati mad-difiża mniżżla taħt il-punt 1.1. ta' din ir-Rakkomandazzjoni huma lista minima u mhux eżawrjenti ta' prodotti li l-Istati Membri jippermettu t-trasferiment tagħhom taħt il-GTL-DE tagħhom. Dan ifisser li l-GTL-DE ippubblikata minn Stat Membru tista' tippermetti wkoll it-trasferiment ta' prodotti oħra relatati mad-difiża inklużi fl-Anness tad-Direttiva 2009/43/KE u li mhumiex elenkati f'din ir-Rakkomandazzjoni.

(8)

Fil-kuntest tad-diskussjonijiet dwar din ir-Rakkomandazzjoni, l-Istati Membri fakkru li huma marbuta b'impenji skont id-dritt Ewropew, bħalma hija l-Pożizzjoni Komuni tal-Kunsill 2008/944/PESK (6), kif ukoll b'impenji internazzjonali fil-qasam tal-kontroll tal-esportazzjoni. F'dan il-kuntest, l-Istati Membri rrikonoxxew id-dikjarazzjoni “Impenn Politiku tal-Istati Membri dwar is-Sigurtà tal-Provvista”. (7)

ADOTTAT DIN IR-RAKKOMANDAZZJONI:

1. LIĊENZJI ĠENERALI TA' TRASFERIMENT GĦAD-DIMOSTRAZZJONI U L-EVALWAZZJONI

L-Istati Membri huma rakkomandati li jadattaw il-liċenzji ġenerali ta' trasferiment tagħhom għad-dimostrazzjoni u l-evalwazzjoni b'konformità mal-elementi li ġejjin.

1.1. Prodotti relatati mad-difiża eliġibbli għal trasferiment taħt il-liċenzja ġenerali ta' trasferiment għall-iskopijiet ta' dimostrazzjoni u evalwazzjoni kif imsemmi fil-punt (c) tal-Artikolu 5(2) tad-Direttiva 2009/43/KE

Dawn il-kategoriji ML li ġejjin huma subsett tal-lista ta' prodotti relatati mad-difiża, kif stabbilit fl-Anness tad-Direttiva 2009/43/KE. Il-liċenzja ġenerali ta' trasferiment għall-iskopijiet ta' dimostrazzjoni u evalwazzjoni (GTL-DE) għandha, bħala minimu, tippermetti t-trasferiment tal-prodotti relatati mad-difiża speċifikati fil-kategoriji ML ta' hawn taħt. L-Istati Membri jistgħu jagħżlu li jinkludu fil-GTL-DE tagħhom aktar kategoriji ML mal-prodotti relatati mad-difiża korrispondenti.

Il-lista tal-kategoriji ML li għandhom jiġu koperti bħala minimu:

—

ML 3. Il-prodotti kollha huma inklużi, ħlief:

—	Submunizzjonijiet li jaqgħu fi ħdan il-Konvenzjoni dwar il-munizzjonijiet dispersivi;

—	Projettili ggwidati terminalment;

—	Munizzjonijiet, projettili u karigi propulsivi, iddisinjati apposta għall-użu militari.

—

ML 5. Il-prodotti kollha huma inklużi, ħlief:

—	Sottopunt 5.b) Sistemi ta' akkwist, desinjazzjoni, telemetrija, sorveljanza jew insegwiment tal-bersall; tagħmir ta' sejbien, ta' fużjoni tad-data, ta' rikonoxximent jew ta' identifikazzjoni; u tagħmir għall-integrazzjoni tas-sensur;

—	Sottopunt 5.c) Tagħmir ta' kontromiżura għall-oġġetti speċifikati minn ML5.a. jew ML5.b.

Il-prodotti kollha għandhom jitwasslu mingħajr il-komponent ta' ċifraġġ u mingħajr bażi tad-data integrata.

—

ML 6. Il-prodotti kollha huma inklużi, ħlief:

—	Vetturi kompluti li jaqgħu taħt is-sottopunt ML6.a);

—	Xażi u turretti li jaqgħu taħt is-sottopunt ML6.a);

—	It-tagħmir u l-komponenti tat-tagħmir esklużi mill-kategoriji ML l-oħra.

—

ML 7. Il-prodotti li jmiss huma inklużi:

—	Sottopunt 7.f) Tagħmir protettiv u ta' dekontaminazzjoni, iddisinjat jew modifikat apposta għall-użu militari, komponenti u taħlitiet ta' sustanzi kimiċi;

—	Sottopunt 7.g) Tagħmir iddisinjat jew modifikat apposta għall-użu militari, iddisinjat jew modifikat għas-sejbien jew l-identifikazzjoni ta' materjali speċifikati minn ML7.a, ML7.b jew ML7.d, u komponenti ddisinjati apposta għal dan.

—

ML 8. Il-prodotti kollha huma inklużi, ħlief:

—

Is-sustanzi b'dawn il-karatteristiċi li ġejjin kollha:

—	Veloċità ta' detonazzjoni daqs jew akbar minn 8 000 m/s;

—	Densità daqs jew sa 1,80 g/cm3.

—

L-isplussivi kollha, kif ġej, u t-taħlitiet relatati:

—	Sottopunt 8.a.15) HNS (eżanitrostilben) (CAS 20062-22-0);

—

Sottopunt 8.a.21) RDX u derivattivi, kif ġej:

—	RDX (ċiklotrimetilentrinitrammina, ċiklonit, T4, eżaidro-1,3,5-trinitro-1,3,5-triażin, 1,3,5-trinitro-1,3,5-triaża-ċikloeżan, eżoġenu jew eżoġene) (CAS 121-82-4);

—	Keto-RDX (K-6 jew 2,4,6-trinitro-2,4,6-triażaċikloeżanon) (CAS 115029-35-1);

—	Sottopunt 8.a.23) TATB (triamminotrinitrobenżen) (CAS 3058-38-6).

—

Is-sustanzi kollha li jistgħu jintużaw direttament jew indirettament fil-produzzjoni tal-armi tas-submunizzjonijiet li jaqgħu taħt il-Konvenzjoni dwar il-Munizzjonijiet Dispersivi, iffirmata f'Oslo fit-3 ta' Diċembru 2008, minbarra fir-rigward tal-Istati Membri li rratifikaw il-Konvenzjoni dwar il-Munizzjonijiet Dispersivi.

—

ML 9. Il-prodotti kollha huma inklużi, ħlief:

—	Bastimenti tal-gwerra kompluti (tal-wiċċ jew ta' taħt l-ilma) li jaqgħu fi ħdan is-sottopunt ML9.a);

—	Bwieq sħaħ;

—	Sottopunt Ml9.a)2.d) Sistemi attivi ta' kontromiżuri għal armi speċifikati f'ML4.b., ML5.c. jew ML11.a;

—	Sottopunt ML9.b)4. Sistemi ta' Propulsjoni Indipendenti mill-Arja (AIP) iddisinjati apposta għas-sottomarini;

—	Sottopunt ML9.d) Xbieki kontra s-sottomarini u xbieki kontra t-torpedos, iddisinjati apposta għall-użu militari;

—	Oġġetti taħt ML9.c) Apparat ta' sejbien ta' taħt l-ilma, iddisinjat apposta għall-użu militari, u l-kontrolli u l-komponenti tiegħu ddisinjati apposta għall-użu militari.

—

ML 10. Il-prodotti kollha huma inklużi, ħlief:

—	Inġenju tal-ajru komplut, vetturi eħfef mill-arja, vetturi tal-ajru mingħajr ekwipaġġ li jaqgħu taħt is-sottopunt ML10.a), ML10.b) jew ML10.c);

—	Oqfsa tal-inġenji tal-ajru tal-ġlied u tal-ħelikopters tal-ġlied;

—	Magni tal-inġenji tal-ajru tal-ġlied;

—	It-tagħmir u l-komponenti tat-tagħmir esklużi mill-kategoriji ML l-oħra.

—

ML 11. Il-prodotti li jmiss huma inklużi:

—	Sottopunt ML11.a)g. Tagħmir ta' gwida u navigazzjoni minbarra oġġetti ddisinjati jew modifikati apposta għall-missili, ir-rokits, il-lanċjaturi tal-ispazju u l-Vetturi tal-Ajru Mingħajr Ekwipaġġ (“UAVs”);

—	Sottopunt ML11.a)h. Tagħmir ta' trażmissjoni ta' komunikazzjonijiet bir-radju troposcatter diġitali;

—	Sottopunt ML11.a)j. Sistemi ta' kmand u kontroll awtomatizzati.

—	ML 13. Il-prodotti kollha huma inklużi.

—

ML 15. Il-prodotti kollha huma inklużi, ħlief:

—	Sottopunt ML15.f).

—

ML 16. Il-prodotti kollha huma inklużi, ħlief:

—	Kwalunkwe oġġett relatat ma' prodotti marbuta mat-teknoloġija ballistika u l-proliferazzjoni CBRN.

—

ML 17. Il-prodotti li jmiss huma inklużi:

—	Sottopunt ML17.b) Tagħmir tal-kostruzzjoni ddisinjati apposta għall-użu militari;

—	Sottopunt ML17.d) Tagħmir għall-assistenza teknika fuq il-post iddisinjat apposta għall-użu militari;

—	Sottopunt ML17.j) Kmamar mobbli tat-tiswija ddisinjati jew modifikati apposta għall-manutenzjoni ta' tagħmir militari;

—	Sottopunt ML17.k) Ġeneraturi ta' fuq il-post iddisinjati jew modifikati apposta għall-użu militari;

—	Sottopunt ML17.l) Kontejners iddisinjati jew modifikati apposta għall-użu militari;

—	Sottopunt ML17.m) Laneċ, minbarra dawk speċifikati xi mkien ieħor fil-lista Militari Komuni tal-UE, pontijiet u pontuni, iddisinjati apposta għall-użu militari;

—	Sottopunt ML17.o) Tagħmir ta' protezzjoni mil-laser iddisinjat apposta għall-użu militari.

—

ML 21. Il-prodotti li jmiss huma inklużi:

—	Sottopunt ML21.a) Softwer iddisinjat jew modifikat apposta għall-użu tal-prodotti mniżżla fil-GTL;

—	Sottopunt ML21.b)4. Softwer iddisinjat apposta għall-użu militari u ddisinjat apposta għal Kmand, Komunikazzjonijiet, Kontroll u Intelligence (C3I) jew applikazzjonijiet ta' Kmand, Komunikazzjonijiet, Kontroll, Kompjuter u Intelligence (C4I).

—

ML 22. Dan li ġej huwa inkluż:

—	It-teknoloġija meħtieġa għall-użu tal-oġġetti biss hija permessa fl-istess liċenzja ġenerali ta' trasferiment.

1.2. Kondizzjonijiet li għandhom jiġu inkorporati fil-liċenzja ġenerali ta' trasferiment għad-dimostrazzjoni u l-evalwazzjoni

Il-lista li ġejja mhix eżawrijenti. Madankollu, kundizzjonijiet oħra miżjuda minn Stat Membru ma jridux jikkontradixxu jew jimminaw il-kundizzjonijiet elenkati hawn taħt.

Validità ġeografika

Żona Ekonomika Ewropea (8)

Trasferiment għal dimostrazzjoni

Trasferiment ta' prodott relatat mad-difiża għall-użu f'ambjent li jissimula l-kundizzjonijiet operattivi. It-terminu “Trasferiment għal Dimostrazzjoni” jkopri t-test ta' sparar tal-armi.

Trasferiment għal evalwazzjoni

Trasferiment ta' prodott relatat mad-difiża għall-ittestjar tal-prodott u l-kondiviżjoni tar-riżultati tat-test. It-terminu “Trasferiment għal Evalwazzjoni” ikopri t-trasferiment tat-teknoloġija għall-kondiviżjoni tar-riżultati.

Trasferiment mill-ġdid

L-Istati Membri għandhom jagħżlu waħda minn dawn l-għażliet għat-trasferiment mill-ġdid ta' prodott relatat mad-difiża wara d-dimostrazzjoni jew l-evalwazzjoni:

(a)	Eżenzjoni mill-obbligu ta' awtorizzazzjoni minn qabel li tista' tiġi implimentata b'konformità mal-Artikolu 4(2)(e) tad-Direttiva 2009/43/KE;

(b)	Pubblikazzjoni ta' liċenzja ġenerali ta' trasferiment speċifika għar-ritorn tal-prodotti relatati mad-difiża wara d-dimostrazzjoni jew l-evalwazzjoni, kif xieraq, b'mill-inqas l-istess lista ta' prodotti relatati mad-difiża eliġibbli;

(c)	Inkorporazzjoni tat-trasferiment mill-ġdid fil-liċenzja ġenerali ta' trasferiment għad-dimostrazzjoni u/jew l-evalwazzjoni.

It-tul taż-żmien

L-Istati Membri ta' Oriġini jistgħu jispeċifikaw limitu ta' żmien għar-ritorn ta' prodotti relatati mad-difiża li għandhom jiġu osservati mill-fornitur lejn l-Awtorità Kompetenti fl-Istat Membru ta' Oriġini. L-Istati Membri li minnhom il-prodott relatat mad-difiża jiġi trasferit mill-ġdid jistgħu jispeċifikaw ukoll limitu ta' żmien għat-trasferiment mill-ġdid li għandu jiġi osservat mill-fornitur, jew mir-rappreżentant tiegħu.

2. SEGWITU

L-Istati Membri huma mistiedna jagħtu effett lil din ir-Rakkomandazzjoni sa mhux aktar tard mill-1 ta' Lulju 2019.

L-Istati Membri huma mħeġġa biex jinfurmaw lill-Kummissjoni dwar kwalunkwe miżura meħuda biex tagħti effett lil din ir-Rakkomandazzjoni.

3. DESTINATARJI

Din ir-Rakkomandazzjoni hi indirizzata lill-Istati Membri.

Magħmul fi Brussell, id-19 ta' Diċembru 2018.

Għall-Kummissjoni

Elżbieta BIEŃKOWSKA

Membru tal-Kummissjoni

(1) Id-Direttiva 2009/43/KE tal-Parlament Ewropew u tal-Kunsill tas-6 ta' Mejju 2009 dwar l-issimplifikar tat-termini u l-kundizzjonijiet tat-trasferimenti ta' prodotti relatati mad-difiża fil-Komunità (ĠU L 146, 10.6.2009, p. 1).

(2) ĠU L 329, 3.12.2016, p. 101.

(3) ĠU L 329, 3.12.2016, p. 105.

(4) COM(2016) 950 final.

(5) COM(2016) 760 final.

(6) Il-Pożizzjoni Komuni tal-Kunsill 2008/944/PESK tat-8 ta' Diċembru 2008 li tiddefinixxi regoli komuni li jirregolaw il-kontroll ta' esportazzjonijiet ta' teknoloġija u tagħmir militari (ĠU L 335, 13.12.2008, p. 99).

(7) Adottata mir-rappreżentanti tal-Gvernijiet tal-EDA, li pparteċipaw fil-laqgħa tal-Istati Membri fi ħdan il-Kunsill fit-3551 laqgħa tiegħu li saret fid-19 ta' Ġunju 2017.

(8) Id-Deċiżjoni tal-Kumitat Konġunt taż-ŻEE Nru 111/2013 tal-14 ta' Ġunju 2013 (ĠU L 318, 28.11.2013, p. 12), li inkorporat id-Direttiva 2009/43/KE fil-Ftehim taż-ŻEE inkludiet test ta' adattament espliċitu: “Din id-Direttiva ma għandhiex tapplika għal-Liechtenstein”.

Top

Choose the experimental features you want to try