20.12.2016   

MT

Il-Ġurnal Uffiċjali tal-Unjoni Ewropea

L 345/72

(1)

Il-kumpannija Syngenta Crop Protection AG (“l-applikant”) ippreżentat applikazzjonijiet kompluti lil Spanja għar-rikonoxximent reċiproku tal-awtorizzazzjonijiet mogħtija mill-Irlanda fir-rigward tar-rodentiċidi li fihom is-sustanza attiva brodifakum (“il-prodotti”). L-Irlanda awtorizzat l-prodotti bħala rodentiċidi għall-użu fuq ġewwa, fuq barra madwar il-bini u f'kanali tad-drenaġġ minn professjonisti u professjonisti mħarrġa, kif ukoll għall-użu fuq ġewwa u fuq barra madwar il-bini mill-pubbliku ġenerali.

(2)

Skont l-Artikolu 37(2) tar-Regolament (UE) Nru 528/2012, Spanja pproponiet lill-applikant biex jaġġusta t-termini u l-kondizzjonijiet tal-awtorizzazzjonijiet li għandhom jingħataw fi Spanja u pproponiet li l-użu tal-prodotti jiġi ristrett għall-professjonisti mħarrġin u fuq ġewwa biss. L-għan ta' tali restrizzjonijiet huwa l-protezzjoni tal-ambjent kif hemm imsemmi fl-Artikolu 37(1)(a) tar-Regolament (UE) Nru 528/2012 permezz tal-prevenzjoni ta' inċidenti ta' avvelenament primarju u sekondarju ta' annimali li mhumiex fil-mira minħabba l-proprjetajiet perikolużi tal-brodifakum, li jagħmluh potenzjalment persistenti, suxxettibbli għall-bijoakkumulazzjoni u tossiku, jew persistenti ħafna u suxxettibbli ħafna għall-bijoakkumulazzjoni.

(3)

L-applikant ma qabilx mar-restrizzjonijiet proposti u qies li dawn il-miżuri mhumiex suffiċjentement iġġustifikati abbażi tar-raġunijiet stabbiliti fl-Artikolu 37(1) tar-Regolament (UE) Nru 528/2012. Bħala riżultat ta' dan, fit-18 ta' April 2016, Spanja għarrfet lill-Kummissjoni b'konformità mat-tieni subparagrafu tal-Artikolu 37(2) ta' dak ir-Regolament.

(4)

B'konformità mal-kundizzjonijiet imposti fuq l-approvazzjoni tal-brodifakum fid-Direttiva tal-Kummissjoni 2010/10/UE (2), l-awtorizzazzjonijiet ta' prodotti bijoċidali li fihom il-brodifakum huma soġġetti għall-miżuri kollha xierqa u disponibbli ta' mitigazzjoni tar-riskju biex jillimitaw ir-riskju ta' esponiment primarju u sekondarju ta' annimali li mhumiex fil-mira, kif ukoll l-effetti fuq perjodu twil tas-sustanza fuq l-ambjent. Dawk il-miżuri jistgħu, fost l-oħrajn, jinkludu r-restrizzjoni għall-użu professjonali biss jew restrizzjonijiet rigward iż-żona ta' użu tal-prodotti.

(5)

Il-Kummissjoni tinnota li l-proposta ta' Spanja hija parti minn sett nazzjonali ta' miżuri ta' mitigazzjoni tar-riskju għar-rodentiċidi antikoagulanti, li kien ikkomunikat lill-Kummissjoni fl-2012 fil-kuntest tad-diskussjonijiet dwar il-miżuri ta' mitigazzjoni tar-riskju applikati mill-Istati Membri matul l-awtorizzazzjoni ta' prodotti bijoċidali rodentiċidi antikoagulanti.

(6)

Dwar ir-restrizzjoni għall-użu mill-professjonisti mħarrġin biss, il-Kummissjoni tinnota li din il-kategorija ta' utenti hija kkunsidrata li għandha l-għarfien, il-ħiliet u l-kompetenzi meħtieġa biex tkun tista' tqis ir-riskji tal-użu tar-rodentiċidi għall-annimali li mhumiex fil-mira. Din il-kategorija ta' utenti hija għalhekk meqjusa li tista' tiddeċiedi liema rodentiċida hija meħtieġa biex tiġi kkontrollata infestazzjoni bl-inqas impatt fuq l-ambjent.

(7)

Dwar ir-restrizzjoni proposta għal ġewwa biss, din tevita l-espożizzjoni għall-brodifakum ta' annimali li mhumiex fil-mira, bħal mammiferi żgħar li jgħixu madwar il-binjiet, u dan iwassal għal tnaqqis ta' inċidenti ta' avvelenament primarju. B'konsegwenza ta' dan, ir-restrizzjoni tista' tikkontribwixxi għat-tnaqqis tar-riskju ta' avvelenament sekondarju ta' predaturi li jikkonsmaw annimali kontaminati.

(8)

Il-proposta għal deroga hija konsistenti mad-dispożizzjonijiet speċifiċi stabbiliti fid-Direttiva 2010/10/UE, li jħallu ċertu livell ta' diskrezzjoni lill-Istati Membri biex japplikaw il-miżuri xierqa u disponibbli ta' mitigazzjoni tar-riskji bħala kundizzjoni għall-awtorizzazzjoni ta' prodotti li fihom il-brodifakum. Id-deroga proposta hija ġġustifikata sabiex jitħares l-ambjent, partikolarment minħabba li għandha l-għan li tipprevjeni jew tnaqqas l-avvelenament primarju u sekondarju ta' organiżmi mhux fil-mira. Għalhekk, il-Kummissjoni tqis li l-proposta għal deroga mir-rikonoxximent reċiproku tissodisfa l-kundizzjoni msemmija fl-Artikolu 37(1)(a) tar-Regolament (UE) Nru 528/2012.

(9)

Il-miżuri previsti f'din id-Deċiżjoni huma f'konformità mal-opinjoni tal-Kumitat Permanenti dwar il-Prodotti Bijoċidali,

(a)

BC-KC011180-73;

(b)

BC-VM011322-40.