16.12.2014   

MT

Il-Ġurnal Uffiċjali tal-Unjoni Ewropea

L 359/155

(1)

L-istituzzjonijiet għandhom jissodisfaw ir-rekwiżiti ta' kapital li jirriflettu b'mod adegwat ir-riskji li jkunu ħadu dawk l-istituzzjonijiet, inkluż ir-riskju tal-kreditu, billi jqisu l-kuntesti ġeografiċi differenti li joperaw fihom. Ir-riskju ta' kreditu mġarrba minn istituzzjonijiet marbuta ma' skoperturi għal entitajiet li jinsabu barra mill-Unjoni huwa determinat, sakemm il-fatturi l-oħra kollha jkunu ndaqs, mill-kwalità tal-qafas regolatorju rilevanti u s-superviżjoni implimentata fil-pajjiż terz rilevanti.

(2)

L-Artikolu 107(3) tar-Regolament (UE) Nru 575/2013 jippermetti lill-istituzzjonijiet biex jittrattaw skoperturi għal ditti tal-investiment, l-istituzzjonijiet ta' kreditu u boroż ta' pajjiżi terzi bħala skoperturi għall-istituzzjonijiet biss jekk il-pajjiż terz japplika rekwiżiti prudenzjali u superviżorji lill-entità kkonċernata li jkunu mill-inqas ekwivalenti għal dawk applikati fl-Unjoni.

(3)

L-Artikoli 114(7), 115(4) u 116(5) tar-Regolament (UE) Nru 575/2013 jistabbilixxu ponderazzjonijiet ta' riskju speċifiċi applikabbli għal skoperturi għal gvernijiet ċentrali, banek ċentrali, gvernijiet reġjonali, awtoritajiet lokali u entitajiet tas-settur pubbliku li jinsabu f'pajjiżi terzi li japplikaw arranġamenti superviżorji u regolatorji tal-inqas ekwivalenti għal dawk applikati fl-Unjoni.

(4)

L-Artikolu 153 tar-Regolament (UE) Nru 575/2013 jistabbilixxi l-formula għall-kalkolu tal-ammonti tal-iskoperturi ponderati għar-riskju tal-iskoperturi għal korporattivi, istituzzjonijiet, gvernijiet ċentrali u banek ċentrali skont approċċ ibbażat fuq il-klassifikazzjoni interna (internal-ratings based — IRB) u jiddeskrivi l-parametri li għandhom jintużaw għall-kalkolu, inkluż il-koeffiċjent ta' korrelazzjoni. L-Artikolu 153(2) tar-Regolament (UE) Nru 575/2013 jistabbilixxi l-koeffiċjent ta' korrelazzjoni applikabbli għal entitajiet kbar fis-settur finanzjarju. Skont l-Artikolu 142(1)(4)(b) ta' dan ir-Regolament, sabiex tikkwalifika għad-definizzjoni ta' “entità kbira tas-settur finanzjarju”, l-entità tas-settur finanzjarju jew waħda mis-sussidjarji tagħha trid tkun suġġetta għal-liġijiet ta' pajjiż terz li japplika rekwiżiti superviżorji prudenzjali li tal-anqas ikunu ekwivalenti għal dawk applikati fl-Unjoni.

(5)

Sabiex tiddetermina l-iskoperturi ponderata għar-riskju xierqa għall-kalkolu tar-rekwiżiti ta' kapital għar-riskju tal-kreditu marbut ma' skoperturi għal ċerti kategoriji ta' entitajiet li jinsabu f'pajjiżi terzi, il-Kummissjoni vvalutat l-ekwivalenza tal-arranġamenti superviżorji u regolatorji ta' pajjiżi terzi mal-arranġamenti superviżorji u regolatorji korrispondenti fl-Unjoni.

(6)

L-ekwivalenza ġiet iddeterminata permezz ta' analiżi bbażata fuq ir-riżultati tal-arranġamenti regolatorji u ta' superviżjoni tal-pajjiż terz li tittestja l-kapaċità tagħhom li jiksbu l-istess objettivi ġenerali bħall-arranġamenti superviżorji u regolatorji tal-Unjoni. L-objettivi jirreferu, b'mod partikolari, għall-istabbiltà u l-integrità tas-sistema finanzjarja kemm domestika kif ukoll globali fl-intier tagħha; l-effikaċja u l-adegwatezza tal-protezzjoni tad-depożitanti u konsumaturi oħrajn tas-servizzi finanzjarji; il-koperazzjoni bejn atturi differenti tas-sistema finanzjarja, inklużi regolaturi u superviżuri; l-indipendenza u l-effikaċja tas-superviżjoni; u l-implimentazzjoni effettiva u l-infurzar ta' standards rilevanti miftiehma internazzjonalment. Sabiex jintlaħqu l-istess objettivi ġenerali tal-arranġamenti superviżorji u regolatorji, tal-Unjoni, l-arranġamenti superviżorji u regolatorji tal-pajjiż terz għandhom jikkonformaw ma' sensiela ta' standards operazzjonali, organizzazzjonali u superviżorji, li jirriflettu l-elementi essenzjali tar-rekwiżiti superviżorji u regolatorji tal-Unjoni applikabbli għal kategoriji rilevanti ta' istituzzjonijiet finanzjarji. Billi kkunsidrat il-valutazzjonijiet indipendenti mill-organizzazzjonijiet internazzjonali, bħal dawk imwettqa mill-Kumitat ta' Basel dwar is-Superviżjoni Bankarja, il-Fond Monetarju Internazzjonali u l-Organizzazzjoni Internazzjonali tal-Kummissjonijiet tat-Titoli, il-Kummissjoni vvalutat arranġamenti superviżorji u regolatorji ta' ċerti pajjiżi terzi applikabbli għal istituzzjonijiet ta' kreditu, ditti tal-investiment, u boroż. Din l-analiżi ppermettiet lill-Kummissjoni biex tevalwa l-ekwivalenza ta' arranġamenti ta' pajjiżi terzi sabiex jiġi ddeterminat it-trattament tal-kategoriji relevanti ta' skoperturi msemmija fl-Artikoli 107, 114, 115, 116 u 142 tar-Regolament (UE) Nru 575/2013.

(7)

Għall-finijiet tal-Artikoli 114, 115, u 116 tar-Regolament (UE) Nru 575/2013 l-ekwivalenza għandha tkun determinata b'referenza għal arranġamenti superviżorji u regolatorji applikabbli għall-istituzzjonijiet ta' kreditu peress li dawn l-arranġamenti normalment jistabbilixxu l-ponderazzjonijiet tar-riskju għall-kalkolu tar-rekwiżiti ta' kapital għar-riskju tal-kreditu.

(8)

Għall-finijiet tal-Artikolu 142(1)(4)(b) tar-Regolament (UE) Nru 575/2013, il-valutazzjoni tal-ekwivalenza hija limitata għal arranġamenti superviżorji u regolatorji applikabbli għal impriżi ta' pajjiżi terzi b'operat komparabbli ma' dak ta' istituzzjoni ta' kreditu jew ditta ta' investiment, skont id-definizzjoni mogħtija fl-Artikolu 4(1)(27) ta' dak ir-Regolament.

(9)

Wara l-valutazzjoni, jidher li l-Awstralja, il-Brażil, il-Kanada, iċ-Ċina, Guernsey, Ħong Kong, l-Indja, l-Isle of Man, il-Ġappun, Jersey, il-Messiku, Monako, l-Arabja Sawdija, Singapor, l-Afrika t'Isfel, l-Isvizzera u l-Istati Uniti tal-Amerika għandhom fis-seħħ arranġamenti superviżorji u regolatorji li jikkonformaw ma' sensiela ta' standards operazzjonali, organizzattivi u superviżorji li jirriflettu l-elementi essenzjali tal-arranġamenti superviżorji u regolatorji tal-Unjoni applikabbli għall-istituzzjonijiet ta' kreditu. Għalhekk, huwa xieraq li s-sistemi ta' rekwiżiti superviżorji u regolatorji għal istituzzjonijiet ta' kreditu li jinsabu f'dawn il-pajjiżi u territorji terzi jiġu kkunsidrati bħala mill-inqas ekwivalenti għal dawk applikati fl-Unjoni għall-finijiet tal-Artikolu 107(4) u 142(1)4(b) tar-Regolament (UE) Nru 575/2013.

(10)

Wara l-valutazzjoni, jidher li l-Awstralja, il-Brażil, il-Kanada, iċ-Ċina, il-Messiku, l-Arabja Sawdija, Singapor, l-Afrika t'Isfel u l-Istati Uniti tal-Amerika għandhom fis-seħħ arranġamenti superviżorji u regolatorji li jikkonformaw ma' sensiela ta' standards operazzjonali, organizzattivi u superviżorji li jirriflettu l-elementi essenzjali tal-arranġamenti superviżorji u regolatorji tal-Unjoni applikabbli għad-ditti tal-investiment. Għalhekk, huwa xieraq li r-rekwiżiti superviżorji u regolatorji li japplikaw għal ditti ta' investiment li jinsabu f'dawn il-pajjiżi terzi jitqiesu bħala mill-inqas ekwivalenti għal dawk applikati fl-Unjoni għall-finijiet tal-Artikolu 107(4) u l-Artikolu 142(1)4(b) tar-Regolament (UE) Nru 575/2013.

(11)

Wara l-valutazzjoni, jidher li l-Brażil, il-Kanada, iċ-Ċina, l-Indja, il-Ġappun, il-Messiku, l-Arabja Sawdija, Singapor, l-Afrika t'Isfel u l-Istati Uniti tal-Amerika għandhom fis-seħħ arranġamenti superviżorji u regolatorji li jikkonformaw ma' sensiela ta' standards operazzjonali li jirriflettu l-elementi essenzjali tal-arranġamenti superviżorji u regolatorji tal-Unjoni applikabbli għall-boroż. Għalhekk, huwa xieraq li r-rekwiżiti superviżorji u regolatorji ta' dawn il-pajjiżi terzi applikati għal boroż jitqiesu bħala mill-inqas ekwivalenti għal dawk applikati fl-Unjoni għall-finijiet tal-Artikolu 107(4) tar-Regolament (UE) Nru 575/2013 limitati għal skoperturi għal boroż li jinsabu f'dawn il-pajjiżi terzi.

(12)

L-uniku skop ta' din id-Deċiżjoni huwa li tiddetermina ekwivalenza bil-għan li jiġu assenjati l-ponderazzjonijiet tar-riskju skont l-Artikoli 107, 114, 115, 116 u 142 tar-Regolament (UE) Nru 575/2013.

(13)

Il-lista tal-pajjiżi u territorji terzi li jitqiesu bħala ekwivalenti għall-iskopijiet ta' din id-Deċiżjoni mhijiex definittiva. Il-Kummissjoni, bl-assistenza tal-Awtorità Bankarja Ewropea, se tkompli tagħmel monitoraġġ fuq bażi regolari tal-evoluzzjoni tal-arranġamenti superviżorji u regolatorji ta' pajjiżi u territorji terzi bil-għan li taġġorna, kif xieraq u mill-inqas kull ħames snin, il-lista ta' pajjiżi u territorji terzi stipulati f'din id-Deċiżjoni fid-dawl, b'mod partikolari, tal-iżviluppi kostanti fl-arranġamenti superviżorji u regolatorji, fl-Unjoni u fil-livell globali, u ħadet inkonsiderazzjoni sorsi ġodda disponibbli ta' informazzjoni rilevanti.

(14)

Ir-rieżami regolari tar-rekwiżiti prudenzjali u superviżorji applikabbli fil-pajjiżi u territorji terzi elenkati fl-Annessi għandhom ikunu mingħajr ħsara għall-possibbiltà li l-Kummissjoni twettaq rieżami speċifiku relatat ma' pajjiż jew territorju terz individwali fi kwalunkwe ħin barra l-analiżi ġenerali, fejn l-iżviluppi rilevanti jagħmluha neċessarja għall-Kummissjoni li tivvaluta mill-ġdid ir-rikonoxximent mogħti minn din id-Deċiżjoni. Tali valutazzjoni mill-ġdid tista' twassal għall-irtirar tar-rikonoxximent tal-ekwivalenza.

(15)

Id-dispożizzjonijiet f'din id-Deċiżjoni huma marbuta mill-qrib, billi jittrattaw l-ekwivalenza tar-rekwiżiti superviżorji u regolatorji ta' ċerti pajjiżi u territorji terzi għall-finijiet tat-trattament ta' skoperturi skont ir-Regolament (UE) Nru 575/2013. Biex jiżguraw koerenza bejn dawk id-dispożizzjonijiet, li għandhom jidħlu fis-seħħ fl-istess ħin, u biex jiffaċilitaw perspettiva komprensiva u aċċess kumpatt għalihom minn istituzzjonijiet suġġetti għal dawk l-obbligi, huwa mixtieq li ċerti atti ta' implimentazzjoni meħtieġa mir-Regolament (UE) Nru 575/2013 jkunu inklużi f'Deċiżjoni waħda.

(16)

Il-miżuri previsti f'din id-Deċiżjoni huma konformi mal-opinjoni tal-Kumitat tal-Banek Ewropej.

(17)

Sabiex jiġi evitat li jkun hemm żieda f'daqqa ta' rekwiżiti ta' kapital għall-istituzzjonijiet ta' kreditu u d-ditti ta' investiment fl-Unjoni, din id-Deċiżjoni għandha tidħol fis-seħħ fl-1 ta' Jannar 2015,