32004D0390

Id-Deċiżjoni tal-Kummissjoni

tat-23 ta' April 2004

li tippermetti lill-Istati Membri jestendu l-awtorizzazzjonijiet provviżorji mogħtija għas-sustanza attiva ġdida aċetamiprid

(notifikat taħt id-dokument numru K(2004) 1479)

(Test b'relevanza għaż-ŻEE)

(2004/390/KE)

IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/414/KEE tal-15 ta' Lulju 1991 dwar it-tqedġid ta' prodotti tal-protezzjoni tal-pjanti fis-suq(1), u b'mod partikolari r-raba' subparagrafu ta' l-Artikolu 8 [1] tagħha,

Billi:

(1) Skond l-Artikolu 6 [2] tad-Direttiva 91/414/KEE, f'Ottubru 1999 il-Greċja rċeviet applikazzjoni minn-Nisso Chemical Europe GmbH għall-inklużjoni tas-sustanza attiva acetamiprid (qabel kien jisimha: Exp 60707B) fl-Anness I li jinsab mad-Direttiva 91/414/KEE. Id-Deċiżjoni 2000/390/KE(2) kkonfermat li d-dokumentazzjoni kienet kompleta u tista' titqies bħala li tissodisfa, fil-prinċipju, l-ħtiġiet tat-tagħrif u l-informazzjoni ta' l-Anness II u l-Anness III li jinsabu mad-Direttiva.

(2) Il-konfermazzjoni tat-tlestija tad-dokumentazzjoni kienet meħtieġa biex tippermetti li jiġi eżaminat fid-dattal u li tippermetti lill-Istati Membri l-possibbiltà li jingħataw awtorizzazzjonijiet provviżorji, għal perjodi sa tlett snin, għall-prodotti tal-protezzjoni tal-pjanti li jkun fihom l-acetamiprid, waqt li jikkonformaw mal-kondizzjonijiet preskritti fl-Artikolu 8(1) tad-Direttiva 91/414/KEE u, b'm,od partikolari l-kondizzjoni li tirrelata ma' l-istima dettaljata tas-sustanza attiva u l-prodott tal-protezzjoni tal-pjanti fid-dawl tal-ħtiġiet preskritti mid-Direttiva.

(3) Għall-acetamiprid, ġew stmati l-effetti fuq is-saħħa tal-bniedem u l-ambjent, skond id-dispożizzjonijiet ta' l-Artikolu 6(2) u (4) tad-Direttiva 91/414/KEE, għall-użi proposti mill-applikant. L-Istat Membru relatatur bagħat abbozz tar-rapport ta' stima lill-Kummissjoni fil-31 ta' Marzu 2001.

(4) L-eżami tad-dokumentazzjoni għadu għaddej wara s-sottomissjoni ta' l-abbozz tar-rapporti ta' stima mill-Istat Membru relatatur u mhux ser ikun possibbli li l-evalwazzjoni titlesta fil-limitu ta' żmien previst mid-Direttiva tal-Kunsill 91/414/KEE.

(5) Billi sa issa l-evalwazzjoni ma identifikatx xi raġuni għal tħassib immedjat, l-Istati Membri għandhom jingħataw il-possibbiltà li jtawwlu l-awtorizzazzjonijiet provviżorji mogħtija għall-prodotti tal-protezzjoni tal-pjanti li jkun fihom l-acetamiprid għal perjodu ta' 24 xahar skond id-dispożizzjonijiet ta' l-Artikolu 8 tad-Direttiva 91/414/KEE sabiex ikun jista' jitkompla l-eżami tad-dokumentazzjoni. Huwa mistenni li l-evalwazzjoni u l-proċess tat-teħid tad-deċiżjoni fir-rigward ta' l-inklużjoni possibbli fl-Anness I ta' l-acetamiprid għandha titlesta fi żmien 24 xahar.

(6) Il-miżuri li hemm provvediment dwarhom f'din id-Deċiżjoni huma konformi mal-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali,

ADOTTAT DIN ID-DEĊIŻJONI:

Artikolu 1

L-Istati Membri jistgħu jestendu l-awtorizzazzjonijiet provviżorji għall-prodotti tal-protezzjoni tal-pjanti li jkun fihom l-acetamiprid għal perjodu li ma jeċċedix l-24 xahar mid-data ta' l-adozzjoni ta' din id-Deċiżjoni.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussel, fit-23 ta' April 2004.

Ghall-Kummissjoni

David Byrne

Membru tal-Kummissjoni

[1] ĠU L 230, tad-19.8.1991, p. 1. Direttiva kif l-aħħar emendata bid-Direttiva tal-Kummissjoni 2004/30/KE (ĠU L 77, tat-13.3.2004, p. 50).

[2] ĠU L 145, ta'-20.6.00, p. 36.

--------------------------------------------------