31981R1292

Ir-Regolament tal-Kummissjoni (KEE) Nru 1292/81

tat-12 ta' Mejju 1981

li jippreskrivi l-istandards tal-kwalità għall-kurrat, il-brunġiel u l-qargħa bagħli żġħir

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ekonomika Ewropea,

Wara li kkunsidrat ir-Regolament tal-Kunsill (KEE) Nru 1035/72 tat-18 ta' Mejju 1972 dwar l-organizzazzjoni komuni tas-suq tal-frott u ħxejjex [1], kif emendat l-aħħar bir-Regolament (KEE) Nru 1116/81 [2], u b'mod partikolari Artikolu 2(2) tiegħu,

Billi r-Regolament (KEE) Nru 1208/79 [3] u r-Regolament (KEE) Nru 1315/80 [4] żied il-kurrat, il-brunġiel u l-qargħa bagħli żgħir rispettivament ma’ Anness I tar-Regolament (KEE) Nru 1035/72 li jelenka l-prodotti għall-kunsinna friska lill-konsumatur li huma koperti minn standards ta' kwalità;

Billi huwa għalhekk meħtieġ li jiġu preskritti dawn l-istandards ta' kwalità għal dawn il-prodotti;

Billi l-istandards għandhom japplikaw fl-istadji kollha ta' marketing; billi t-trasport fuq distanza twila, il-ħażna għal ċertu tul ta' żmien jew id-diversi operazzjonijiet ta' tbagħbis bl-idejn li għalihom ikunu suġġetti l-prodotti jistgħu jġibu d-deterjorazzjoni minħabba l-iżvilupp bijoloġiku tal-prodotti jew it-tendenza tagħhom li jmorru; billi, għalhekk, trid titqies din id-deterjorazzjoni meta jiġu applikati l-istandards fl-istadji tal-marketing wara d-dispaċċ;

Billi l-miżuri previsti f'dan ir-Regolament huma skond l-opinjoni tal-Kumitat ta' Ġestjoni għall-Frott u l-Ħxejjex,

ADOTTAT DAN IR-REGOLAMENT:

Artikolu 1

1. L-istandards ta' kwalità għall-kurrat (subintestatura ex 07.01 IJ tat-Tariffa Doganali Komuni) u l-brunġiel u l-qargħa bagħli żgħir (subintestaturi ex 07.01 T tat-Tariffa Doganali Komuni huma rispettivament preskritti f'Annessi I, II u III ta' dan ir-Regolament.

2. Dawk l-istandards għandhom japplikaw fl-istadji kollha tal-marketing, taħt il-kondizzjonijiet preskritti fir-Regolament (KEE) Nru 1035/72.

Madankollu, fl-istadji ta' wara d-dispaċċ, il-prodott jista’ juri, relattivament għall-istandards preskritti,

- freskezza mnaqqsa u nefħa, u/jew

- daqsxejn deterjorazzjoni minħabba l-iżvilupp tagħhom u t-tendenza tagħhom li jidbielu.

Artikolu 2

Dan ir-Regolament għandu jidħol fis-seħħ fit-tielet ġurnata wara li jiġi ppubblikat fl-Ġurnal Uffiċjali tal-Komunitajiet Ewropej.

Għandu japplika b'effett minn:

- l-1 ta' Awissu 1981 għall-kurrat,

- l-1 ta' Lulju 1981 għall-brunġiel u l-qargħa bagħli żgħir.

Dan ir-Regolament għandu jorbot fl-intier tiegħu u jkun applikabbli direttament fl-Istati Membri kollha.

Magħmul fi Brussel, fit-12 ta' Mejju 1981.

Għall-Kummissjoni

Poul Dalsager

Membru tal-Kummissjoni

[1] ĠU L 118, ta' l-20.5.1972, p. 1.

[2] ĠU L 118, tat-30.4.1981, p. 1.

[3] ĠU L 153, tal-21.6.1979, p. 1.

[4] ĠU L 134, tal-31.5.1980, p. 20.

--------------------------------------------------

ANNESS I

STANDARDS TA' KWALITÀ GĦALL-KURRAT

I. DEFINIZZJONI TAL-PRODOTTI

Dan l-istandard japplika għall-kurrat tal-varjetajiet (cultivars) imkabbrin mill-Allium porrum L., li għandhom jingħataw friski lill-konsumatur, għajr il-kurrat għall-ipproċessar industrijali.

II. DISPOSIZZJONIJIET DWAR IL-KWALITÀ

L-għan ta' l-istandard huwa li jfisser il-ħtiġijet tal-kwalità tal-kurrat wara l-preparazzjoni u l-ippakkjar.

A. Ħtiġijet minimi

Fil-klassijiet kollha, bla ħsara għad-dispożizzjonijiet speċjali għal kull klassi u t-tolleranzi li huma permessi, il-kurrat għandu jkun:

- sħiħ (din il-ħtieġa ma tapplikax, madankollu, għall-għeruq u truf tal-weraq, li jistgħu jinqatgħu),

- frisk fid-dehra, bil-weraq li jkunu dbielu jew nixfu imneħħijin,

- ma wasalx għaż-żerriegħa (bla ħsara għad-dispożizzjonijiet speċjali għall-Klassi III),

- b'saħħtu: il-prodott milqut minn taħsir jew deterjorament li jagħmlu mhux tajjeb għall-ikel huwa eskluż,

- nadif, prattikament ħieles minn materja barranija li tidher; madankollu, l-għeruq jista' jkollhom il-ħamrija mwaħħla magħhom,

- ħieles minn umdità esterna mhux normali, i.e., adegwatament "imnixxef" jekk kien maħsul,

- ħieles minn irwejjaħ barranin u/jew togħma.

Meta bil-weraq, dawn iridu jinqatgħu pulit.

L-iżvilupp u l-kondizzjoni tal-kurrat għandu jkun hekk li jkun jista:

- jiflaħ għat-trasport u t-tbagħbis bl-idejn, u

- jasal f'kondizzjoni tajba fil-post destinatarju.

B. Klassifika

Il-kurrat huwa klassifikat fi tliet klassijiet kif definit hawn taħt:

(i) Klassi I

Il-kurrat f'din il-klassi għandu jkun ta' kwalità tajba. Madankollu, jista' jkollu difetti superfiċjali żgħar, basta li dawn ma jtellfux mid-dehra ġenerali, mill-kwalità, mil-kwalitajiet li jżomuh tajjeb jew mid-dehra tal-prodott.

Il-parti l-bajda tal-kurrat għandha mill-inqas tirrappreżenta terz tat-tul kollu jew nofs il-parti mgħottija.

(ii) Klassi II

Din il-klassi hi magħmula minn kurrat li ma jikkwalifikax għal inklużjoni fil-Klassi I imma li jissodisfa l-ħtiġijet minimi speċifikati hawn fuq.

Il-parti l-bajda tal-kurrat għandha mill-inqas tirrappreżenta kwart tat-tul kollu jew terz tal-parti mgħottija.

(iii) Klassi III [1]

Din il-klassi tiġbor fiha l-kurrat li ma jikkwalifikax għal inklużjoni fi klassijiet iktar għolja imma li jissodisfa l-ħtiġijet għall-Klassi II.

Madankollu, jista' juri:

- zokk bil-fjur, jekk dan ma jnaqqasx mill-edibilità tal-prodott,

- difetti ta' kuluri u tbenġil żgħir,

- traċċi ta' sadid,

- traċċi żgħar ta' ħamrija.

III. DISPOSIZZJONIJIET DWAR DAQS

(i) Id-daqs għandu jkun stabbilit bid-dijametru mkejjel b'angoli retti ma' l-assi ta' fuq in-nefħa ta' l-għonq.

L-inqas dijametru huwa dak fiss ta' 10 mm.

(ii) Għall-Klassi I, id-dijametru ta' l-ikbar kurrat fl-istess qatta jew pakkett ma għandux ikun iżjed minn darbtejn tad-dijametru ta' l-iżgħar waħda.

IV. DISPOSIZZJONIJIET DWAR TOLLERANZI

It-tolleranzi li ġejjin dwar kwalità u daqs huma permessi għal prodotti li ma jissodisfawx il-ħtiġijiet tal-klassi indikata f'kull pakkett.

A. Tolleranzi ta' kwalità

(i) Klassi I

10 % fin-numru jew bil-piż tal-kurrat li ma jissodisfax il-ħtiġijet għall-klassi, imma li jissodisfa dawk ta' Klassi II jew, bħala eċċezzjoni, li jaqa' fil-limitu tat-tolleranzi għal dik il-klassi.

(ii) Klassi II

10 % fin-numru jew bil-piż tal-kurrat li ma jissodisfax il-ħtiġijiet la tal-klassi lanqas dawk minimi, bl-eċċezzjoni ta' prodotti milqutin minn tħassir, tbenġil ċar jew xi deterjorazzjoni li jagħmluh mhux tajjeb għall-ikel.

(iii) Klassi III

15 % fin-numru jew bil-piż tal-kurrat li ma jissodisfax la l-ħtiġijiet tal-klassi u lanqas il-ħtiġijiet minimi, bl-eċċezzjoni ta' prodotti milqutin minn tħassir, tbenġil ċar jew xi deterjorazzjoni oħra li jagħmluh mhux tajjeb għall-ikel.

B. Tolleranzi ta' daqs

Għall-klassijiet kollha, 10 % fin-numru jew bil-piż tal-kurrat li ma jkunx konformi mal-ħtieġa ta' dijametru minimu jew, fil-każ ta' kurrat tal-Klassi I, il-ħtieġa ta' uniformità.

V. DISPOSIZZJONIJIET DWAR PREŻENTAZZJONI

A. Uniformità

Il-kontenut ta' kull pakkett, jew kull qatta fl-istess pakkett, għandu jkun uniformi u jkun fih kurrat biss ta' l-istess oriġini, kwalità jew daqs (meta, għal dan il-kriterju, l-uniformità hija preskritta), u fil-biċċa l-kbira ta' l-istess żvilupp u kulur.

Fil-każ tal-Klassi III, huwa biżżejjed illi l-oriġini tkun uniformi.

Il-parti li tidher tal-kontenut ta' kull pakkett jew qatta għandha tirrappreżenta l-kontenut kollu kemm hu.

B. Preżentazzjoni

Il-kurrat jista' jiġi ppreżentat kif ġej:

- f'arranġament b'ordni fil-pakkett,

- jew f'qatet, kemm f'pakkett u kemm le..

Ċ. Ippakkjar

Il-kurrat għandu jkun ippakkjat b' mod li jipproteġi l-prodott kif jixraq.

Il-materjali wżati ġol-pakkett għandhom ikunu ġodda, indaf u ta' kwalità li ma jikkawżawx xi ħsara minn barra jew minn ġewwa lill-prodott. L-użu ta' materjal, u b'mod partikolari ta' karti jew bolol li jkollhom speċifikazzjonijiet kummerċjali huwa permess basta li l-stampar u t-tikkettjar ikun sar b'linka jew kolla mhux tossika.

Il-pakketti għandhom ikunu ħielsa minn kull materja barranija.

VI. DISPOSIZZJONIJIET DWAR L-IMMARKAR

Kull pakkett, jew kull qatta kunsinnata b'volum, għandu jkollhom id-dettalji li ġejjin li jistgħu jinqraw u mmarkati b'mod li ma jitħassarx u jidhru minn barra.

A. Identifikazzjonidak li jagħmel l-ippakkeġġar

u/jew | isem u indirizz jew marka ta' kodiċi uffiċjalment maħruġa |

jew aċċettata |

il-kunsinnatur |

B. Natura tal-prodotti

- "Kurrat", jekk il-kontenut ma jkunx jidher minn barra.

Ċ. Oriġini tal-prodott

- pajjiż ta' l-oriġini u, jekk wieħed irid, id-distrett fejn tkabbar jew l-isem nazzjonali, reġjonali jew tal-post lokali.

D. Speċifikazzjonijiet kummerċjali

- klassi,

- numru ta' qatet (għal kurrat ippakkjat f'qatet u fil-kaxxi).

E. Marka ta' kontroll uffiċjali (mhux obbligatorja)

Meta l-kurrat ikun ippakkjat, dawn id-dettalji għandhom jinġabru fl-istess naħa.

[1] Klassi addizzjonali kif previst f'Artikolu 2(1) tar-Regolament (KEE) Nru 1035/72. L-applikazzjoni ta' din il-klassi ta' kwalitàjew ta' ftit mill-ħtiġijet tagħha għandha tkun bla ħsara għal xi deċiżjoni li tittieħed taħt Artikolu 4(1) ta' l-istess Regolament.

--------------------------------------------------

ANNESS II

STANDARDS TA' KWALITÀ GĦALL-BRUNĠIEL

I. DEFINIZZJONI TAL-PRODOTTI

Dan l-istandard japplika għal brunġiel, frott tal-varjetajiet (cultivars) imkabbrin mis-Solanum melongena L. var. esculentum, insanum u ovigerum, li għandhom jingħataw friski lill-konsumatur, għajr brunġiel għall-ipproċessar industrijali.

Skond il-forma tagħhom, issir distinzjoni bejn:

- brunġiel tawwali,

- brunġiel globus.

II. DISPOSIZZJONIJIET DWAR IL-KWALITÀ

L-għan ta' l-istandard huwa li jfisser il-ħtiġijet fil-kwalità tal-brunġiel wara l-preparazzjoni u l-ippakkjar.

A. Ħtiġijet minimi

Fil-klassijiet kollha, bla ħsara għad-dispożizzjonijiet speċjali għal kull klassi u t-tolleranzi li huma permessi, il-brunġiel għandu jkun:

- sħiħ,

- frisk fid-deħra,

- sod,

- b'saħħtu; il-prodott milqut minn taħsir jew deterjorament li ma jkunx tajjeb għall-konsum huwa eskluż,

- nadif, ħieles prattikament minn kull materja barranija li tidher,

- għadu bil-buttun u l-pedunkulu li jista' kollhom xi ħsara ħafifa,

- misjur biżżejjed, mingħajr ma jkollu laħmu fibruż jew iebes u mingħajr żvilupp żejjed taż-żrieragħ (bla ħsara għad-dispożizzjonijiet speċjali tal-Klassi III),

- ħieles minn umdità minn barra li mhix normali,

- ħieles minn xi riħa barranija u/jew togħma.

L-iżvilupp u l-kondizzjoni tal-brunġiel għandu jkun hekk li jagħmlu:

- jiflaħ għat-trasport u t-tbagħbis bl-idejn, u

- jasal f'kondizzjoni tajba fil-post destinatarju.

B. Klassifikazzjoni

Il-brunġiel hu klassifikat fi tliet klassijiet kif definit hawn taħt:

(i) Klassi I

Brunġiel f'din il-klassi għandu jkun ta' kwalità tajba u għandu jkollu l-karatteristiċi tal-varjetà. Għandu jkun ukoll prattikament ħieles minn ħruq tax-xemx. Jista, madankollu, juri d-difetti superfiċjali żgħar li ġejjin, basta li dawn ma jgħarrqux id-dehra ġenerali, il-kwalità, il-ħarsien jew il-preżentazzjoni tal-prodott:

- difett żgħir fil-forma,

- tibdil żgħir fil-lewn fil-bażi,

- tbenġil żgħir u/jew xquq żgħar li għalqu basta li ma jkoprux iżjed minn 3 ċm2.

(ii) Klassi II

Din il-klassi hi magħmula minn brunġiel li ma jikkwalifikax għal inklużjoni fil-Klassi I iżda li jissodisfa l-ħtiġijiet minimi speċifikati hawn fuq. Sakemm iżomm il-karatteristiċi essenzjali tiegħu ta' kwalità u preżentazzjoni, jista' juri d-difetti li ġejjin:

- difetti fil-forma,

- difetti fil-lewn,

- ftit tixwit tax-xemx basta li dan ma jkoprix iżjed minn 4 ċm2,

- difetti ta' nixfa żgħira u superfiċjali basta li dawn ma jkoprux iżjed minn 4 ċm2.

(iii) Klassi III [1]

Din il-klassi hi magħmula minn brunġiel li ma jikkwalifikax għall- inklużjoni fl-għola klassijiet imma li jissodisfa l-ħtiġijiet tal-Klassi II.

Madankollu, jista:

- ikun ftit fibruż,

- juri żvilupp konsiderevoli taż-żerriegħa,

- juri tixwit tax-xemx basta li dan ma jkoprix iżjed minn 6 ċm2,

- juri difetti żgħar u mfejqa ta' nixfa superfiċjali basta li dawn ma jkoprux iżjed minn 6 ċm2.

III. DISPOSIZZJONIJIET DWAR DAQS

Id-daqs tal-brunġiel huwa stabbilit:

- jew bid-dijametru massimu tas-sezzjoni ekwatorjali fuq l-assi lonġitudinali,

- jew bil-piż.

A. Għad-daqs bid-dijametru id-dijametru minimu huwa ffissat għal 40 mm għal brunġiel tawwali u għal 70 mm għal brunġiel globus.

Id-differenza bejn l-iżgħar u l-ikbar brunġiel fl-istess pakkett m'għandhiex teċċedi:

- 20 mm għal brunġiel tawwali,

- 25 mm għal brunġiel globus.

B. Għad-daqs skond il-piż il-piż minimu huwa ffissat għal 100 gramma. L-iskala li ġejja għandha tkun imħarsa:

- 100 sa 300 gramma b'differenza massima ta' 75 gramma bejn l-iżgħar u l-ikbar brunġiel fl-istess pakkett,

- 300 sa 500 gramma b'differenza massima ta' 100 gramma bejn l-iżgħar u l-ikbar brunġiel fl-istess pakkett,

- il fuq minn 500 gramma b'differenza massima ta' 250 gramma bejn l-iżgħar u l-ikbar brunġiel fl-istess pakkett.

Konformità ma' l-iskala tad-daqsijiet hija obbligatorja għall-Klassi I. Barra minn dan, il-brunġiel tawwali għandu jkollu tul minimu, eskluż il-pedunkulu, ta' 80 mm.

IV. DISPOSIZZJONIJIET DWAR TOLLERANZI

Tolleranzi dwar kwalità u daqs huma permessi f'kull pakkett għall-prodotti li ma jissodisfawx il-ħtiġijiet tal-klassi indikata.

A. Kwalità ta' tolleranzi

(i) Klassi I

10 % fin-numru jew bil-piż ta' brunġiel li ma jissodisfax il-ħtiġijiet tal-klassi, imma li jissodisfa dawk għall-Klassi II jew, eċċezzjonalment, li jaqa' fil-limiti ta' tolleranzi għal dik il-klassi.

(ii) Klassi II

10 % fin-numru jew bil-piż ta' brunġiel li ma jissodisfax il-ħtiġijiet tal-klassi u lanqas dawk minimi, bl-eċċezzjoni ta' prodotti milqutin minn tħassir, tbenġil li jidher,xquq li ma għalqux jew xi deterjorazzjoni oħra li tagħmlu mhux tajjeb għall-ikel.

(iii) Klassi III

15 % fin-numru jew bil-piż ta' brunġiel li ma jissodisfax il-ħtiġijiet tal-klassi u lanqas dawk minimi, bl-eċċezzjoni ta' prodotti milqutin minn tħassir, tbenġil li jidher, xquq li ma għalqux jew xi deterjorazzjoni oħra li tagħmlu mhux tajjeb għall-ikel.

B. Tolleranzi fid-daqs

(i) Klassi I

10 % fin-numru jew bil-piż ta' brunġiel li jikkonforma mad-daqs immedjatament' l isfel jew' il fuq minn dak speċifikat fuq il-pakkett.

(ii) Klassijiet II u III

10 % fin-numru jew bil-piż ta' brunġiel li ma jikkonformax mad-daqs minimu. F'kull każ, it-tolleranza mhijiex applikabbli għal brunġiel b'dijametru ta' iżjed minn 5 mm taħt id-dijametru minimu jew, fil-każ ta' piż fid-daqs, għal brunġiel li jiżen inqas minn 90 gramma.

V. DISPOSIZZJONIJIET DWAR PREŻENTAZZJONI

A. Uniformità

Il-kontenut ta' kull pakkett għandu jkun uniformi u jkollu biss brunġiel ta' l-istess oriġini, tip kummerċjali, kwalità u daqs (fejn id-daqs huwa obbligatorju) u fil-biċċa l-kbira l-istess grad ta' żvilupp u lewn.

Fil-każ tal-Klassi III, huwa biżżejjed illi l-oriġini u t-tip kummerċjali jkunu uniformi.

Il-brunġiel tawwali ppakkjat fl-istess pakkett għandu jkun uniformi biżżejjed għal dak li hu tul.

Il-parti li tidher tal-kontenut ta' kull pakkett għandha tirrappreżenta lil kontenut kollu kemm hu.

B. Ippakkjar

Il-brunġiel għandu jkun ippakkjat b'mod li jiżgura l-ħarsien tal-prodott.

Il-materjali wżati ġol-pakkett għandhom ikunu ġodda, nodfa u ta' kwalità li ma tikkawżax xi ħsara lill-prodott minn barra jew minn ġewwa. L-użu ta' materjali, u b'mod partikolari ta' karti jew bolol, li jkollhom speċifikazzjonijiet kummerċjali huma permessi, basta li l-istampar u t-tikkettjar ikun sar b'inka jew kolla mhux tossika. Il-pakketti għandhom ikunu ħielsa minn kull materjal barrani.

VI. DISPOSIZZJONIJIET DWAR L-IMMARKAR

Kull pakkett għandu juri d-dettalji li ġejjin, b'ittri miġburin fuq l-istess naħa, li jistgħu jinqraw u mmarkati b'mod permanenti u li jidhru minn barra:

A. Identifikazzjoni

dak li jagħmel l-ippakkeġġar | isem u indirizz jew marka ta' kodiċi uffiċjalment maħruġa jew aċċettata |

u/jew |

il-kunsinnatur |

B. Natura tal-prodott

- "brunġiel", jekk il-kontenut ma jkunx jidher minn barra.

- isem tal-varjetà (mhux obbligatorju).

Ċ. Oriġini tal-prodott

- pajjiż ta' l-oriġini u, jekk wieħed irid, id-distrett fejn tkabbru jew l-isem nazzjonali, reġjonali jew tal-post lokali.

D. Speċifikazzjonijiet kummerċjali

- klassi,

- daqs (meta applikabbli) imfisser:

- jew b'dijametri massimi u minimi, meta d-daqs ikun skond id-dijametru,

- jew bil-piżijiet massimi u minimi, meta d-daqs ikun skond il-piż.

E. Marka uffiċjali ta' kontroll (mhux obbligatorja)

[1] Klassi addizzjonali kif previst f'Artikolu 2(1) tar-Regolament (KEE) Nru 1035/72. L-applikazzjoni ta' din il-klassi ta' kwalità jew ftit mill-ħtiġijiet tagħha għandha tkun bla ħsara għal deċiżjoni li trid tittieħed taħt Artikolu 4(1) ta' l-istess Regolament.

--------------------------------------------------

ANNESS III

STANDARDS TA' KWALITÀ GĦAL QARGĦA BAGĦLI ŻGĦIR

I. DEFINIZZJONI TAL-PRODOTT

Dan l-istandard japplika għal qargħa bagħli, miġbur meta jkun żgħir u teneru, qabel iż-żrieragħ tiegħu ikunu ssudaw, tal-varjetajiet (cultivars) imkabbrin mill-Cucurbita pepo L. [1], li għandhom jingħataw friski lill-konsumatur, għajr qargħa bagħli żgħir għall-ipproċessar industrijali.

II. DISPOSIZZJONIJIET DWAR IL-KWALITA`

L-għan ta' dan l-istandard huwa li jfisser il-ħtiġijiet ta' kwalità għal qargħa bagħli żgħir wara l-preparazzjoni u l-ippakkjar.

A. Ħtiġijiet minimi:

Fil-klassijiet kollha, bla ħsara għad-dispożizzjonijiet speċjali għal kull klassi u t-tolleranzi li huma permessi, il-qargħa bagħli żgħir għandu jkun:

- sħiħ, inkluż iz-zokk li jista’ jkollu ftit tal-ħsara,

- ta' dehra friska,

- sod,

- b'saħħtu; prodotti milqutin minn taħsir jew deterjorament li jirrenduhom mhux tajbin għall-ikel huma esklużi

- mingħajr ħsara kawżata minn insetti jew parassiti oħrajn,

- bla toqob,

- bla xquq,

- nadif, prattikament ħieles minn kull materjal barrani li jidher,

- misjur biżżejjed mingħajr żvilupp żejjed taż-żrieragħ (bla ħsara għad-dispożizzjonijiet speċjali għall-Klassi III),

- ħieles minn umdità minn barra li mhix normali,

- ħieles minn xi riħa barranija u/jew togħma.

L-iżvilupp u l-kondizzjoni tal-qargħa bagħli żgħir għandu jkun hekk li jkun jista:

- jiflaħ għat-trasport u tbagħbis bl-idejn, u

- jasal f'kondizzjoni tajba fil-post destinatarju.

B. Klassifikazzjoni

Il-qargħa bagħli żgħir huwa klassifikat fi tliet klassijiet kif definit hawn taħt:

(i) Klassi I

Il-qargħa bagħli żgħir f’din il-klassi għandu jkun ta' kwalità tajba u għandu jkollu l-karatteristiċi tal-varjetà. Jista’, madankollu, juri d-difetti li ġejjin basta li dawn ma jtellfux mid-dehra ġenerali, il-kwalità, il-ħarsien u l-preżentazzjoni tal-prodott:

- difetti żgħar fil-forma,

- difetti żgħar fil-lewn,

- xquq żgħar li għalqu fil-qoxra.

Il-qargħa bagħli żgħir għandu jkollu zokk ta' tul massimu ta' 3 ċm.

(ii) Klassi II

Din il-klassi hi magħmula minn qargħa bagħli żgħir li ma jikkwalifikax għal inklużjoni fil-Klassi I imma li jissodisfa l-ħtiġijiet minimi speċifikati hawn fuq.

Kemm il-darba jżomm il-karatteristiċi essenzjali tiegħu ta' kwalità u preżentazzjoni, jista’ juri d-difetti li ġejjin:

- difetti fil-forma,

- difetti fil-lewn,

- ftit tixwit tax-xemx,

- xquq li għalqu fil-qoxra, kemm il-darba dawn ma jtellfux il-konservazzjoni.

(iii) Klassi III [2]

Din il-klassi hi magħmula minn qargħa bagħli żgħir li ma jikkwalifikax għal inklużjoni fl-għola klassijiet imma li jissodisfa il-ħtiġijiet tal-Klassi II. Madankollu, jista’ juri:

- żvilupp taż-żrieragħ,

- traċċi żgħar ta' ħamrija.

III. DISPOSIZZJONIJIET DWAR DAQS

Id-daqs tal-qargħa bagħli żgħir huwa stabbilit:

- jew skond it-tul,

- jew skond il-piż.

(a) Għall-kejl skond it-tul, dan isir bejn fejn jiltaqgħu iz-zokk u t-tarf tal-frotta, skond l-iskala li ġejja:

- 7 ċm sa 14 ċm inklużivi,

- 14 ċm (esklużivi) sa 21 ċm (inklużivi),

- 21 cm (esklużivi) sa 30 ċm.

(b) Għal kejl skond il-piż, għandha tkun osservata l-iskala li ġejja:

- 50 g sa 100 g (inklużivi),

- 100 g (esklużivi) sa 225 g (inklużivi),

- 225 g (esklużivi) sa 450 g.

Konformità ma’ l-iskala tad-daqs mhijiex obbligatorja għall-Klassi III.

IV. DISPOSIZZJONIJIET DWAR TOLLERANZI

Tolleranzi dwar kwalità u daqs huma permessi f'kull pakkett għal prodotti li ma jissodisfawx il-ħtiġijiet tal-klassi indikata.

A. Tolleranzi ta' kwalità

(i) Klassi I

10 % fin-numru jew bil-piż ta' qargħa bagħli żgħir li ma jissodisfax il-ħtiġijiet tal-klassi, iżda li jissodisfa il-ħtiġiet tal-Klassi II, jew, eċċezzjonalment, li jaqa’ fil-limiti ta' tolleranza għal dik il-klassi.

(ii) Klassi II

10 % fin-numru jew bil-piż ta' qargħa bagħli żgħir li ma jissodisfax il-ħtiġijiet tal-klassi u lanqas dawk minimi, bl-eċċezzjoni ta' prodotti milqutin minn taħsir, tbenġil li jidher, xquq li ma’ għalqux jew xi deterjorazzjoni oħra li tagħmlu mhux tajjeb għall-ikel.

(iii) Klassi III

15 % fin-numru tal-piż ta' qargħa bagħli żgħir li ma jissodisfax il-ħtiġijiet tal-klassi u lanqas dawk minimi, bl-eċċezzjoni ta' prodotti milqutin minn taħsir, tbenġil li jidher, xquq li ma għalqux jew xi deterjorazzjoni oħra li tagħmlu mhux tajjeb għall-ikel.

B. Tolleranzi fid-daqs

(i) Klassijiet I u II

10 % fin-numru jew bil-piż ta' qargħa bagħli żgħir li jikkonforma mad-daqs immedjatament taħt jew fuq dak speċifikat fuq il-pakkett. Madankollu, din it-tolleranza hija applikabbli biss għal prodotti li jkun differenti b'mhux iżjed minn 10 % tal-limiti ta' daqs jew piż speċifikati.

(ii) Klassi III

10 % fin-numru jew bil-piż ta' qargħa bagħli żgħir li jkun differenti b'mhux iżjed minn 10 % tal-limiti ta' daqs jew piż speċifikati.

V. DISPOSIZZJONIJIET DWAR PREŻENTAZZJONI

A. Uniformità

Il-kontenut ta' kull pakkett irid ikun uniformi u jkollu biss qargħa bagħli żgħir ta' l-istess oriġini, kwalità u daqs (fejn id-daqs huwa obbligatorju) u fil-biċċa l-kbira ta' l-istess grad ta' żvilupp u lewn.

Fil-każ tal-Klassi III, huwa biżżejjed illi l-oriġini tkun uniformi.

Il-parti li tidher tal-kontenut ta' kull pakkett għandha tirrappreżenta l-kontenut kollu kemm hu.

B. Ippakjar

Il-qargħa bagħli żgħir għandu jkun ippakkjat b'mod li jħares il-prodott sew.

Il-materjali wżati ġol-pakkett għandhom ikunu ġodda, nodfa u ta' kwalità li ma tikkawżax xi ħsara lill-prodott minn barra jew minn ġewwa. L-użu ta' materjali u b'mod partikolari ta' karti jew bolol li jkollhom speċifikazzjonijiet kummerċjali huwa permess basta li l-istampar u t-tikkettjar ikunu saru b'inka jew kolla mhux tossika.

Il-pakkett għandu jkun ħieles minn kull materjal barrani.

VI. DISPOSIZZJONIJIET DWAR L-IMMARKAR

Kull pakkett għandu juri d-dettalji li ġejjin, b'ittri miġburin fuq l-istess naħa, li jistgħu jinqraw u li jkunu mmarkati b'mod permanenti u li jidher minn barra:

A. Identifikazzjoni

dak li jagħmel l-ippakkeġġar | isem u indirizz jew marka ta' kodiċi uffiċjalment maħruġa jew aċċettata |

u/jew |

il-kunsinnatur |

B. Natura tal-prodott

- "qargħa bagħli żgħir" jekk il-kontenut ma jkunx jidher minn barra.

Ċ Oriġini tal-prodott

Il-pajjiż ta' l-oriġini u, jekk wieħed irid, id-distrett fejn tkabbru, jew l-isem nazzjonali, reġjonali jew tal-post lokali.

D. Speċifikazzjonijiet kummerċjali

- klassi,

- daqs (fejn applikabbli) imfisser:

- jew b'kejl massimu u minimu, meta d-daqs ikun skond it-tul

- jew b'piżijiet massimi u minimi, meta d-daqs ikun skond il-piż.

E. Marka uffiċjali ta' kontroll (mhux obbligatorja).

[1] Il-qargħa bagħli żgħir bi żrieragħ żviluppati sew, li jissejħu "qargħa bagħli" fir-Renju Unit u l-Irlanda, mhuwiex kopert b'din l-istandard.

[2] Klassi addizzjonali kif previst f'Artikolu 2(1) tar-Regolament (KEE) Nru 1035/72. L-applikazzjoni ta' din il-klassi ta' kwalità jew ta' ftit mill-ħtiġijiet tagħha għandha tkun bla ħsara għad-deċiżjoni li trid tittieħed skond Artikolu 4(1) ta' l-istess Regolament.

--------------------------------------------------