EUR-Lex Access to European Union law
This document is an excerpt from the EUR-Lex website
Document 22023D0587
Decision No 2020/04 of the Regional Steering Committee of the Transport Community on the travel rules for staff of the Transport Community [2023/587]
Deċiżjoni Nru 2020/04 tal-Kumitat ta’ Tmexxija Reġjonali tal-Komunità tat-Trasport dwar ir-regoli tal-ivvjaġġar għall-persunal tal-Komunità tat-Trasport [2023/587]
Deċiżjoni Nru 2020/04 tal-Kumitat ta’ Tmexxija Reġjonali tal-Komunità tat-Trasport dwar ir-regoli tal-ivvjaġġar għall-persunal tal-Komunità tat-Trasport [2023/587]
PUB/2022/529
ĠU L 77, 16.3.2023, p. 11–17
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
16.3.2023 |
MT |
Il-Ġurnal Uffiċjali tal-Unjoni Ewropea |
L 77/11 |
DEĊIŻJONI Nru 2020/04 TAL-KUMITAT TA’ TMEXXIJA REĠJONALI TAL-KOMUNITÀ TAT-TRASPORT
dwar ir-regoli tal-ivvjaġġar għall-persunal tal-Komunità tat-Trasport [2023/587]
IL-KUMITAT TA’ TMEXXIJA REĠJONALI TAL-KOMUNITÀ TAT-TRASPORT,
Wara li kkunsidra t-Trattat li jistabbilixxi l-Komunità tat-Trasport u, b’mod partikolari, l-Artikolu 24(1) u l-Artikolu 30 tiegħu,
ADOTTA DIN ID-DEĊIŻJONI:
Artikolu 1
Ir-regoli tal-ivvjaġġar għall-persunal tal-Komunità tat-Trasport, stabbiliti fl-Anness, huma b’dan adottati.
Artikolu 2
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul f’Sarajevo, id-29 ta’ Lulju 2020.
Għall-Kumitat ta’ Tmexxija Reġjonali
Il-President
ANNESS
REGOLI TAL-IVVJAĠĠAR GĦALL-PERSUNAL TAL-KOMUNITÀ TAT-TRASPORT
1. Ambitu
1.1. |
Dawn ir-regoli għandhom japplikaw għall-ivvjaġġar uffiċjali kollu mill-post tal-impjieg fl-interess tal-Komunità tat-Trasport. |
1.2. |
Dawn ir-regoli għandhom japplikaw għall-membri kollha tal-persunal tal-Komunità tat-Trasport soġġetti għar-Regolamenti tal-Persunal tal-Komunità tat-Trasport. |
2. Awtorizzazzjonijiet għall-ivvjaġġar
2.1. |
Qabel it-tluq fuq ivvjaġġar uffiċjali, il-membru tal-persunal għandu jikseb awtorizzazzjoni fil-forma ta’ talba approvata għall-ivvjaġġar. It-talbiet għall-ivvjaġġar jiġu approvati bil-miktub mid-Direttur jew minn membru tal-persunal awtorizzat mid-Direttur. It-talba għall-ivvjaġġar trid tipprovdi lid-Direttur bid-dettalji kollha li jeħtieġ biex jieħu deċiżjoni infurmata, bħal:
|
2.2. |
Hija r-responsabbiltà tal-membru tal-persunal li jikseb l-awtorizzazzjoni meħtieġa qabel ma jibda l-ivvjaġġar uffiċjali. It-talba għall-ivvjaġġar approvata tinżamm mill-membru tal-persunal u tiġi mehmuża mat-talba għar-rimborż tal-ispejjeż tal-ivvjaġġar (“talba għall-ivvjaġġar”) mar-ritorn mill-missjoni flimkien ma’ rapport tal-ivvjaġġar. |
2.3. |
Għall-ivvjaġġar uffiċjali mid-Direttur, se jitħejja memorandum minn qabel, ibbażat fuq il-mudell stabbilit fl-Appendiċi u ffirmat mid-Direttur. Il-memorandum jindika r-raġuni għall-ivvjaġġar uffiċjali u t-tul ta’ żmien previst tiegħu. Id-Direttur għandu jsegwi l-proċeduri komuni kif previsti f’dawn ir-regoli. |
3. Trasport bejn il-post tal-impjieg u l-post tal-ivvjaġġar uffiċjali
3.1. |
Bħala regola ġenerali, jiġi awtorizzat l-aktar mod kosteffettiv ta’ trasportazzjoni, relattiv għall-iskop u d-durata tal-ivvjaġġar uffiċjali. |
3.2. |
L-ivvjaġġar bl-ajru jsir mill-aktar rotta diretta bl-aktar prezz baxx disponibbli. Meta d-dati tal-ivvjaġġar jissuġġerixxu l-inklużjoni ta’ tmiem il-ġimgħa sabiex tinkiseb tariffa mnaqqsa li tkun disponibbli fuq xi biljetti tal-ajru u tal-ferrovija meta jiġu prenotati ċertu perjodu bil-quddiem (it-tariffa “Advance Purchase Excursion” jew “APEX”), il-membru tal-persunal se jkun intitolat għall-gratifika addizzjonali għas-sussistenza għal kull jum (“DSA”), dment li t-tariffa tal-APEX jikkostitwixxi l-inqas tariffa tal-ajru disponibbli u jkun jista’ jinkiseb iffrankar kumplessiv. |
3.3. |
L-istandard normali għall-ivvjaġġar bil-ferrovija se jkun bit-tieni klassi. |
3.4. |
Meta t-trasport bl-ajru jew bil-ferrovija ma jkunx disponibbli jew ma jkunx kosteffettiv, l-ivvjaġġar bix-xarabank jew bil-karozza jiġi awtorizzat. |
3.5. |
Meta jiġi awtorizzat l-ivvjaġġar bil-karozza, il-membru tal-persunal jiġi mħeġġeġ jagħmel użu mill-arranġamenti tal-kiri tal-karozzi magħmula mill-Komunità tat-Trasport. Il-Komunità tat-Trasport se tipprevedi l-ogħla kopertura tal-assigurazzjoni possibbli disponibbli. Madankollu, meta l-assigurazzjoni tinvolvi xi ħlas, il-Komunità tat-Trasport għandha tkoprih. Il-Komunità tat-Trasport ma għandhiex tinżamm responsabbli f’każijiet fejn l-assigurazzjoni ma tkoprix id-danni, telf jew serq. |
3.6. |
B’mod eċċezzjonali, l-użu ta’ vettura privata jista’ jiġi awtorizzat. F’każijiet hekk, il-kostijiet jiġu rimborżati lill-membru tal-persunal bl-ammont ekwivalenti għall-kostijiet tal-biljett tal-ferrovija tat-tieni klassi f’konformità mal-punt 3.3. Meta jkun hemm aktar minn membru tal-persunal wieħed li jivvjaġġaw b’vettura privata, ir-rimborż isir biss lil sid il-vettura. Meta l-Komunità tat-Trasport tawtorizza l-użu ta’ vettura privata, il-Komunità tat-Trasport ma għandhiex tassumi responsabbiltà għal kwalunkwe talba ta’ parti terza, dannu fil-vettura, telf jew serq ta’ oġġetti personali li jitħallew fil-vettura. |
3.7. |
Il-membri tal-persunal jistgħu jinkludu biss destinazzjonijiet privati f’itinerarju ta’ vvjaġġar uffiċjali jekk dan ikun ġie debitament awtorizzat mid-Direttur. Jekk l-inklużjoni ta’ destinazzjoni privata tirriżulta f’kostijiet ogħla, il-membru tal-persunal għandu jħallas id-differenza bejn it-tariffa tal-itinerarju uffiċjali u t-tariffa mibdula. |
4. Xiri tal-biljetti
4.1. |
L-arranġamenti għall-prenotazzjoni tal-ivvjaġġar huma ċentralizzati fid-Diviżjoni tal-Amministrazzjoni tas-Segretarjat Permanenti (id-“Diviżjoni tal-Amministrazzjoni”). |
4.2. |
Huwa mistenni li l-membri tal-persunal jikkomunikaw il-ħtiġijiet tal-ivvjaġġar tagħhom mill-aktar fis possibbli sabiex ikun jista’ jinkiseb l-aktar tariffa ekonomika. |
4.3. |
Id-Diviżjoni tal-Amministrazzjoni għandha tibgħat it-talba għall-ivvjaġġar approvata lill-aġent tal-ivvjaġġar awtorizzat u tirritornaha lill-vjaġġatur. L-aġent tal-ivvjaġġar għandu jingħata struzzjonijiet mill-Komunità tat-Trasport biex ma joħroġx jew ma jikkonsenjax biljetti qabel ma jkun irċieva, permezz ta’ faks, it-talba għall-ivvjaġġar awtorizzata. L-istess proċedura tapplika għall-biljetti tal-ferrovija. F’każ li l-biljetti tal-ferrovija ma jkunux jistgħu jinkisbu permezz tal-aġent tal-ivvjaġġar, il-membri tal-persunal jistgħu jixtru l-biljetti tal-ferrovija tagħhom stess u jiġu rimborżati mal-preżentazzjoni tal-talba tal-ivvjaġġar relatata. |
5. Spejjeż tal-ivvjaġġar
L-ispejjeż tal-ivvjaġġar imħallsa jew rimborżati mill-Komunità tat-Trasport abbażi tad-dokumenti ta’ sostenn jinkludu:
— |
il-kost tat-trasport, inkluż it-trasport lejn/mill-ajruport jew punt ieħor ta’ wasla jew tluq (eż. lukanda, post ieħor ta’ residenza, post tal-laqgħa, bini tas-Segretarjat Permanenti); |
— |
DSA; |
— |
kostijiet oħrajn b’relazzjoni diretta mal-ivvjaġġar uffiċjali u awtorizzati bit-talba għall-ivvjaġġar (eż. piż żejjed tal-bagalji, kostijiet tal-viża, ħlas għar-reġistrazzjoni tal-konferenzi, seminars). |
6. Trasport lejn l-ajruporti, il-portijiet u l-istazzjonijiet fil-post tal-impjieg u minnhom
Bħala regola ġenerali, il-membri tal-persunal għandhom jużaw it-trasport pubbliku. Madankollu, trasferimenti bit-taksi jistgħu jiġu awtorizzati mid-Direttur jekk ikunu ġġustifikati, bħal meta jkun hemm żewġ impjegati jew aktar fuq missjoni li jirkbu t-taksi flimkien meta ma jkun hemm l-ebda alternattiva oħra ta’ trasport pubbliku disponibbli, jew meta t-trasferiment iseħħ qabel it-tmienja ta’ filgħodu jew wara d-disgħa ta’ filgħaxija. Il-kostijiet korrispondenti jiġu rimborżati mal-preżentazzjoni tad-dokumenti ta’ sostenn. L-użu ta’ vettura privata jista’ jiġi awtorizzat, dment li jkun iġġustifikat. F’każijiet hekk, ir-rimborż ikun limitat għat-tariffi tal-parkeġġ (fl-ajruport, fl-istazzjon jew fil-port) mal-preżentazzjoni tad-dokumenti ta’ sostenn.
7. Trasport fil-post fejn iseħħ l-ivvjaġġar uffiċjali
Bħala regola ġenerali, il-membri tal-persunal għandhom jużaw it-trasport pubbliku. Minkejja dan, l-użu tat-taksis permess jekk it-trasport pubbliku ma jkunx alternattiva xierqa (pereżempju, minħabba raġunijiet ta’ sigurtà). Billi jiffirma t-talba għall-ivvjaġġar tal-membru tal-persunal ikkonċernat, id-Direttur ikun qed jirrikonoxxi dan il-fatt. Il-kostijiet jiġu rimborżati mal-preżentazzjoni tad-dokumenti ta’ sostenn.
8. Kanċellazzjoni u modifika għal qabel it-tluq
Jekk l-ivvjaġġar uffiċjali jiġi kkanċellat jew immodifikat, il-membru tal-persunal irid:
— |
jinforma minnufih lid-Direttur u lid-Diviżjoni tal-Amministrazzjoni u jipprovdi r-raġunijiet; |
— |
jikkanċella jew jerġa’ jipprenota minnufih il-biljetti u l-prenotazzjonijiet maħruġa mill-aġent tal-ivvjaġġar awtorizzat, bil-miktub, anki jekk dawn ma jkunux rimborżabbli; |
— |
jieħu l-passi meħtieġa biex jikkanċella jew jerġa’ jipprenota l-biljetti akkwistati direttament b’mezzi oħrajn; |
— |
jikkanċella jew jimmodifika minnufih il-prenotazzjonijiet tal-lukandi u l-prenotazzjonijiet tal-kiri tal-karozzi, bil-miktub; |
— |
iħejji dikjarazzjoni tal-ispejjeż imġarrba bħala riżultat tal-kanċellazzjoni jew modifika. |
Il-Komunità tat-Trasport se tkopri l-kostijiet ta’ kanċellazzjoni u prenotazzjoni mill-ġdid, irrispettivament mill-mezzi ta’ prenotazzjoni li ntużaw.
9. Estensjoni
Jekk id-durata tal-vjaġġ uffiċjali kif indikata inizjalment fuq l-awtorizzazzjoni għall-ivvjaġġar tiġi estiża minħabba ċirkostanzi mhux previsti, li jwasslu għal kostijiet addizzjonali, dan irid jissemma fit-talba għall-ivvjaġġar (ara l-punt 15).
10. Interruzzjoni
L-ivvjaġġar uffiċjali jista’ jiġi interrott għar-rekwiżiti tas-servizz, għal raġunijiet ta’ force majeure jew għal raġunijiet personali ta’ natura serja rikonoxxuti bħala tali mid-Direttur. L-interruzzjoni trid tiġi awtorizzata minn qabel mid-Direttur, ħlief f’każijiet ta’ urġenza estrema jew jekk id-Direttur ma jkunx jista’ jintlaħaq. L-ispejjeż kollha li jirriżultaw minn interruzzjoni awtorizzata mid-Direttur għar-raġunijiet elenkati hawn fuq se jiġu koperti mill-Komunità tat-Trasport u rimborżati bħala parti mill-ivvjaġġar uffiċjali.
11. Bidliet magħmula għal raġunijiet personali
Il-membri tal-persunal fuq ivvjaġġar uffiċjali jistgħu jiġu awtorizzati biex jadattaw l-iskeda ta’ żmien, l-akkomodazzjoni jew l-arranġamenti tat-trasport għal raġunijiet personali. F’dak il-każ, huma għandhom jinkludu fit-talba għall-ivvjaġġar tqabbil bejn il-kostijiet proposti u l-kostijiet li kienu jiġġarrbu mingħajr bidliet bħal dawn. It-tqabbil għandu jsir abbażi tal-informazzjoni disponibbli fil-ħin tat-talba għall-ivvjaġġar, bl-użu ta’ wieħed mill-metodi magħżula għall-organizzazzjoni tal-ivvjaġġar uffiċjali u abbażi ta’ kundizzjonijiet simili. Il-membru tal-persunal li jivvjaġġa b’mod uffiċjali jħallas direttament u personalment (bil-mezzi nnotifikati lilu mid-Diviżjoni tal-Amministrazzjoni):
— |
kwalunkwe kost addizzjonali, imkejjel b’rabta mal-kost ġenerali tal-vjaġġ uffiċjali mingħajr id-DSA, li jirriżulta mill-bidliet magħmula għal raġunijiet personali, inkluż it-tluq minn post ieħor u/jew ir-ritorn lejh, jekk il-paragun jindika żieda fil-kost tal-missjoni; |
— |
kwalunkwe tariffa imposta għat-twettiq tat-tqabbil, jekk dan ikun sar minn aġenzija tal-ivvjaġġar. |
12. Gratifika għas-sussistenza għal kull jum (DSA)
12.1. |
Id-DSA tinkludi l-kostijiet ta’ akkomodazzjoni u ikliet bi ħlas, gratwitajiet u spejjeż inċidentali oħrajn. |
12.2. |
Ir-rati ta’ DSA applikabbli għal kuntratti ta’ għajnuna esterna ffinanzjati mill-UE għandhom japplikaw fl-aktar skala riċenti tagħhom (1).
Ir-rata applikabbli hija dik għall-post fejn il-membru tal-persunal iqatta’ l-lejl. Id-DSA ta’ jum sħiħ titħallas għall-jum li fih jibda l-ivvjaġġar uffiċjali. L-ebda DSA ma titħallas għall-jum li fih jiġi konkluż l-ivvjaġġar uffiċjali, jiġifieri d-DSA titħallas abbażi tan-numru ta’ ljieli mqattgħin barra. |
12.3. |
Kumpens ogħla jista’ b’mod eċċezzjonali jiġi approvat mid-Direttur, fuq bażi ta’ każ b’każ, meta l-vjaġġatur jintalab joqgħod f’lukandi determinati minn qabel li għalihom ir-rata tal-kamra tassorbi 60 % jew aktar tar-rata tad-DSA. F’każijiet bħal dawn, il-kostijiet tal-akkomodazzjoni jiġu rimborżati mal-preżentazzjoni tal-kont relatat. Fi kwalunkwe każ, iċ-ċirkostanzi li jinvolvu talba għal kumpens ogħla jridu jiġu deskritti fit-talba għall-ivvjaġġar u approvati qabel it-tluq. |
12.4. |
Għandhom jiġu applikati rati mnaqqsa tad-DSA meta:
|
12.5. |
Meta l-ivvjaġġar uffiċjali jkun jikkonċerna vvjaġġar fil-pajjiż ospitanti (is-Serbja), tapplika d-DSA tal-pajjiż ospitanti. Għat-tnaqqis rilevanti tad-DSA fis-Serbja, japplikaw l-istess dispożizzjonijiet bħal dawk għal ivvjaġġar uffiċjali barra l-pajjiż. |
12.6. |
Meta l-ispejjeż kollha jitħallsu mill-organizzatur tal-avveniment, japplikaw id-dispożizzjonijiet iddikjarati hawn fuq fir-rigward tal-kalkolu tad-DSA. |
12.7. |
L-ebda DSA ma titħallas għall-parti tal-ivvjaġġar uffiċjali li kienet soġġetta għal bidliet li saru taħt il-punt 11. |
13. Ħlasijiet bil-quddiem għall-ivvjaġġar
13.1. |
Jekk tintalab mill-vjaġġatur, il-Komunità tat-Trasport tipprovdi ħlas bil-quddiem tal-fondi għall-ivvjaġġar uffiċjali sa 80 % tad-DSA għall-vjaġġ. It-talbiet għal ħlasijiet bil-quddiem għall-ivvjaġġar iridu jsiru mill-inqas erbat ijiem tax-xogħol qabel il-jum tat-tluq. |
13.2. |
Kwalunkwe somma mħallsa permezz ta’ ħlas bil-quddiem titnaqqas mill-ammonti rrimborżati biex jiġu koperti l-ispejjeż tal-missjoni. Jekk ikun sar ħlas bil-quddiem li jinstab li jkun akbar mill-ispiża proprja tal-missjoni, is-surplus jiġi rkuprat f’pagament wieħed minn ħlas sussegwenti tas-salarju lill-membru tal-persunal li jkun qed iwettaq il-missjoni. Jekk ikun sar ħlas bil-quddiem lil membru tal-persunal għal missjoni li sussegwentement tiġi kkanċellata, l-ammont tal-ħlas bil-quddiem jitnaqqas awtomatikament minn ħlas tas-salarju sussegwenti. |
14. Rapporti tal-ivvjaġġar
Il-membri tal-persunal fuq vjaġġ uffiċjali għandhom jippreżentaw rapport qasir tal-ivvjaġġar fi żmien ġimgħa mir-ritorn fl-uffiċċju. Ir-rapport tal-ivvjaġġar għandu jiġi ffirmat mis-superviżur, mehmuż mat-talba għall-ivvjaġġar u jintbagħat lid-Direttur, kif ukoll lill-membri tal-persunal oħrajn ikkonċernati, kif xieraq.
15. Rimborż tal-ispejjeż tal-ivvjaġġar
15.1. |
Membru tal-persunal għandu jippreżenta talba għall-ivvjaġġar akkumpanjata mir-rapport tal-ivvjaġġar, l-awtorizzazzjoni għall-ivvjaġġar u d-dokumenti ta’ sostenn lid-Diviżjoni tal-Amministrazzjoni u lid-Direttur fi żmien ġimgħa wara r-ritorn fl-uffiċċju, kemm jekk ikun sar ħlas bil-quddiem għall-ivvjaġġar kif ukoll jekk le. Ma għandu jiġi mehmuż l-ebda kont għal lukandi jew ikliet u spejjeż inċidentali oħrajn, minħabba li d-DSA stabbilita hija somma f’daqqa li tingħata bħala kumpens għal dawn l-ispejjeż. |
15.2. |
F’każ li membru tal-persunal ikun ingħata ħlas bil-quddiem għall-ivvjaġġar skont il-punt 13 u dan jonqos milli jissottometti t-talba għall-ivvjaġġar relatata fil-perjodu speċifikat, il-ħlas bil-quddiem għall-ivvjaġġar għandu jitnaqqas mill-ħlas tas-salarju sussegwenti. Il-ħlas bil-quddiem għall-ivvjaġġar imnaqqas jiġi rimborżat biss jekk tiġi ppreżentata t-talba għall-ivvjaġġar. |
16. Responsabbiltà u obbligazzjoni tal-persunal
Il-membri tal-persunal għandhom ikunu responsabbli għall-akkuratezza u l-kompletezza tad-dikjarazzjonijiet u tar-rappreżentazzjonijiet li jsiru minnhom meta jippjanaw, iwettqu u jirrapportaw dwar l-ivvjaġġar uffiċjali tagħhom. Huma għandhom, mingħajr preġudizzju għad-dispożizzjonijiet tar-Regolamenti tal-Persunal tal-Komunità tat-Trasport, ikunu responsabbli għal kwalunkwe ammont li jirċievu b’mod mhux xieraq jew għal kwalunkwe mġiba ħażina.
Il-membri tal-persunal għandhom jimplimentaw l-ivvjaġġar uffiċjali f’konformità mar-rekwiżiti tal-prestazzjoni ġenerali stipulati fir-Regolamenti tal-Persunal tal-Komunità tat-Trasport. Huwa mistenni li l-membri tal-persunal jilħqu l-ogħla standards ta’ etika professjonali u jibqgħu indipendenti f’kull waqt.
17. Miżuri ta’ Kontroll
Il-Komunità tat-Trasport għandha żżomm ir-rekords, id-dokumenti u l-evidenza relatati mal-awtorizzazzjoni, l-ippjanar u l-organizzazzjoni tal-vjaġġ uffiċjali u dawk relatati mas-saldu tal-ħlasijiet dovuti għal perjodu ta’ ħames snin.
Għandhom japplikaw ir-regoli finanzjarji u l-proċeduri tal-awditjar tal-Komunità tat-Trasport.
18. Applikazzjoni
Dawn ir-regoli għandhom japplikaw mill-għada tal-adozzjoni tagħhom.
APPENDIĊI
MEMORANDUM GĦAL VJAĠĠAR UFFIĊJALI MID-DIRETTUR TAS-SEGRETARJAT PERMANENTI
Għandu jimtela u jiġi ffirmat qabel it-tluq:
SKOP TAL-VJAĠĠ UFFIĊJALI |
|
||||||||
DESTINAZZJONI |
|
||||||||
DATA TAT-TLUQ |
|
||||||||
DATA TAR-RITORN |
|
||||||||
ITINERARJU |
|
||||||||
ARRANĠAMENTI TAL-AKKOMODAZZJONI |
|
||||||||
IKKOMBINAT MA’ VVJAĠĠAR PRIVAT |
|
||||||||
STIMA TAL-KOSTIJIET |
|
||||||||
KUMMENTI |
|
Firma:
Data:
Għandu jimtela u jiġi ffirmat mar-ritorn:
KOSTIJIET FINALI |
Spejjeż tal-ivvjaġġar: Gratifika għas-sussistenza għal kull jum: Oħrajn: KOST TOTALI: |
||||
OBJETTIV TAL-IVVJAĠĠAR UFFIĊJALI |
KUMMENTI: |
Firma:
Data:
(1) https://ec.europa.eu/international-partnerships/system/files/per-diem-rates-20200201_en.pdf