Approvazzjoni u miżuri ta’ sorveljanza mill-UE għal vetturi bil-mutur u t-trejlers tagħhom
SOMMARJU TA’:
Ir-Regolament (UE) 2018/858 — l-approvazzjoni u s-sorveljanza tas-suq ta’ vetturi bil-mutur u t-trejlers tagħhom, u ta’ sistemi, komponenti u unitajiet tekniċi separati maħsuba għal tali vetturi
X’INHU L-GĦAN TAR-REGOLAMENT?
- Ir-regolament jistabbilixxi regoli mifruxin mal-UE kollha dwar rekwiżiti tekniċi u l-proċeduri li jiżguraw li tipi ġodda ta’ vetturi bil-mutur u t-trejlers tagħhom ikunu konformi mar-rekwiżiti approvati mill-UE dwar is-sigurtà u l-protezzjoni tal-ambjent.
- Għandu l-għan li:
- li jgħolli l-kwalità tal-livell u l-indipendenza tal-approvazzjoni tat-tip tal-vettura* u tal-ittestjar;
- li jżid il-kontrolli ta’ karozzi li diġà jinsabu fis-suq tal-UE;
- li jsaħħaħ is-sistema globali bis-sorveljanza tal-UE.
PUNTI EWLENIN
Kamp ta’ applikazzjoni
Dan ir-regolament japplika għal:
- vetturi bil-mutur b’mill-inqas erba’ roti, li jintużaw għat-trasport tal-passiġġieri (il-kategorija M);
- vetturi bil-mutur b’mill-inqas erba’ roti, intiżi għat-trasport tal-merkanzija (il-kategorija N);
- trejlers (il-kategorija O).
Approvazzjoni tat-tip u ttestjar qabel ma’ karozza titpoġġa fuq is-suq
- Is-servizzi tekniċi se jiġu awditjati regolarment u indipendentement skont kriterji stretti ta’ prestazzjoni biex tinkiseb u tinżamm l-awtorità mogħtija mill-Istati Membri tal-UE biex jittestjaw u jispezzjonaw mudelli ta’ karozzi ġodda. Il-Kummissjoni Ewropea u Stati Membri oħra se jkunu jistgħu jikkontestaw din l-awtorizzazzjoni meta jkun hemm xi ħaġa ħażina.
- L-awtoritajiet nazzjonali għall-approvazzjoni tat-tip se jkunu soġġetti għal awditjar mill-Kummissjoni biex jiġi żgurat li r-regoli rilevanti jiġu implimentati u infurzati b’mod rigoruż mal-UE kollha.
- Il-proposta tal-Kummissjoni li timmodifika s-sistema ta’ rimunerazzjoni biex jiġi evitat li s-servizzi tekniċi jiġu mħallsa direttament mill-manifattur ma ntlaqgħetx.
Kontrolli ta’ karozzi fuq is-suq
- Regoli pre-eżistenti tal-approvazzjoni tat-tip jitrattaw l-aktar ma’ kontrolli fuq prototipi meħudin mil-linja tal-produzzjoni; dan ir-regolament jintroduċi s-sorveljanza tas-suq u barra minn hekk jitlob lill-Istati Membri jagħmlu verifiki għall-għarrieda fuq vetturi li diġà jinsabu fis-suq tagħhom u jagħmlu tali riżultati disponibbli pubblikament.
- L-Istati Membri kollha issa jistgħu jieħdu miżuri ta’ salvagwardja immedjatament kontra vetturi li mhumiex konformi fuq it-territorju tagħhom mingħajr ma jkollhom joqogħdu jistennew lill-awtorità tal-approvazzjoni tat-tip tieħu azzjoni.
Sorveljanza
- Il-Kummissjoni tista’ tagħmel kontrolli tas-suq indipendentement mill-Istati Membri u tista’ tibda l-ġbir lura mal-UE kollha.
- Hija tista’ tikkontesta d-deżinjazzjoni ta’ servizzi tekniċi u timponi penali amministrattivi fuq il-manifatturi jew fuq servizzi tekniċi sa massimu ta’ EUR 30 000 għal kull karozza mhux konformi.
- Il-Kummissjoni se tippresjedi forum dwar l-infurzar ġdid biex tiżgura interpretazzjoni aktar uniformi tal-leġiżlazzjoni rilevanti tal-UE, trasparenza totali fuq każijiet ta’ nonkonformità u attivitajiet ta’ sorveljanza tas-suq aktar koordinati mill-Istati Membri.
Manifatturi
- Barra l-projbizzjoni eżistenti fuq tagħmir ta’ manipulazzjoni li jibdel il-prestazzjoni esebita waqt il-proċeduri ta’ ttestjar, il-manifatturi jridu jipprovdu aċċess għall-protokolli ta’ softwer biex jippermettu kontrolli esterni.
Rekwiżiti tas-sigurtà u l-protezzjoni ta’ utenti vulnerabbli tat-triq
- Ir-Regolament (UE) 2019/2144 jemenda r-Regolament (UE) 2018/858 u jaġġorna r-rekwiżiti tal-approvazzjoni tat-tip biex jiżgura s-sikurezza ġenerali tal-vetturi u l-protezzjoni tal-utenti vulnerabbli tat-triq bħal persuni mexjin u ċ-ċiklisti (ara s-sommarju). Huwa jemenda l-Anness II għar-Regolament (UE) 2018/858 li fih ir-rekwiżiti għall-għan tal-approvazzjoni tat-tip tal-UE ta’ vetturi, sistemi, komponenti jew unitajiet tekniċi separati.
Skambju tad-data online u n-notifika tal-approvazzjonijiet tat-tip tal-UE
- Il-Kummissjoni adottat att ta’ implimentazzjoni, ir-Regolament ta’ implimentazzjoni (UE) 2020/1812 li jistabbilixxi r-regoli dwar l-iskambju tad-data online u n-notifika tal-approvazzjonijiet tat-tip tal-UE skont ir-Regolament (UE) 2018/858.
Skambju tad-data taċ-ċertifikat ta’ konformità f’format elettroniku
- Ir-Regolament ta’ implimentazzjoni (UE) 2021/133 jistabbilixxi: l-ispeċifikazzjonijiet għall-format bażiku, l-istruttura u l-meżżi tal-iskambju tad-data taċ-ċertifikat ta’ konformità f’format elettroniku. Dan huwa biex jiżgura li ċ-ċertifikati ta’ konformità jiġu skambjati bejn il-manifatturi u awtoritajiet ta’ approvazzjoni b’mod uniformi u li l-elementi tad-data u l-messaġġi li fihom huma armonizzati.
MINN META JAPPLIKA R-REGOLAMENT?
- Ir-Regolament (UE) 2018/858 ilu japplika mill-1 ta’ Settembru 2020.
- Ir-Regolament (UE) 2019/2144 japplika mis-6 ta’ Lulju 2022.
- Ir-Regolament ta’ Implimentazzjoni (UE) 2020/1812 ilu japplika mit-22 ta’ Diċembru 2020.
- Ir-Regolament ta’ Implimentazzjoni (UE) 2021/133 japplika mill-1 ta’ Jannar 2023.
SFOND
- Id-direttiva tal-UE dwar l-approvazzjoni tat-tip ġiet trasformata f’regolament applikabbli direttament u ġiet rinforzata wara l-iskoperta li ċerti manifatturi kienu inkorporaw sistemi li jalteraw il-prestazzjoni tal-vetturi tagħhom waqt l-ittestjar (tagħmir ta’ manipulazzjoni).
- Din ir-riforma hi parti mix-xogħol usa’ tal-Kummissjoni fuq is-settur tal-karozzi stabbilit fil-komunikazzjoni “Europe on the move”.
- Għal aktar informazzjoni, ara:
TERMINI EWLENIN
Approvazzjoni tat-tip: proċedura li biha awtorità għall-approvazzjoni tiċċertifika li tip ta’ vettura, sistema, komponent jew unità teknika separata tissodisfa r-regolamenti amministrattivi u r-rekwiżiti tekniċi rilevanti.
DOKUMENT EWLIENI
Ir-Regolament (UE) 2018/858tal-Parlament Ewropew u tal-Kunsill tat-30 ta’ Mejju 2018 dwar l-approvazzjoni u s-sorveljanza tas-suq ta’ vetturi bil-mutur u t-trejlers tagħhom, u ta’ sistemi, komponenti u unitajiet tekniċi separati maħsuba għal tali vetturi, li jemenda r-Regolamenti (KE) Nru 715/2007 u (KE) Nru 595/2009 u li jħassar id-Direttiva 2007/46/KE (ĠU L 151, 14.6.2018, pp. 1-218)
Emendi suċċessivi għar-Regolament (UE) Nru 536/2014 ġew inkorporati fit-test oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Ir-Regolament ta’ Implimentazzjoni tal-Kummissjoni (UE) 2021/133 tal-4 ta’ Frar 2021 li jimplimenta r-Regolament (UE) Nru 2018/858 tal-Parlament Ewropew u tal-Kunsill fir-rigward tal-format bażiku, l-istruttura u l-mezzi ta’ skambju tad-data taċ-ċertifikat ta’ konformità f’format elettroniku (ĠU L 42, 5.1.2021, pp. 1-3)
Ir-Regolament ta’ Implimentazzjoni tal-Kummissjoni (UE) Nru 2020/1812 tal-1 ta’ Diċembru 2020 li jistabbilixxi regoli dwar l-iskambju tad-data online u n-notifika tal-approvazzjonijiet tat-tip tal-UE skont ir-Regolament (UE) 2018/858 tal-Parlament Ewropew u tal-Kunsill (ĠU L 404, 2.12.2020, pp. 5-8)
Ir-Regolament (UE) 2019/2144 tal-Parlament Ewropew u tal-Kunsill tas-27 ta’ Novembru 2019 dwar rekwiżiti tal-approvazzjoni tat-tip għall-vetturi bil-mutur u t-trejlers tagħhom, kif ukoll għas-sistemi, għall-komponenti u għall-unitajiet tekniċi separati maħsubin għat-tali vetturi, fir-rigward tas-sikurezza ġenerali tagħhom u tal-protezzjoni tal-okkupanti tal-vetturi u l-utenti vulnerabbli tat-triq, li jemenda r-Regolament (UE) 2018/858 tal-Parlament Ewropew u tal-Kunsill u li jħassar ir-Regolamenti (KE) Nru 78/2009, (KE) Nru 79/2009 u (KE) Nru 661/2009 tal-Parlament Ewropew u tal-Kunsill u tar-Regolamenti tal-Kummissjoni (KE) Nru 631/2009, (UE) Nru 406/2010, (UE) Nru 672/2010, (UE) Nru 1003/2010, (UE) Nru 1005/2010, (UE) Nru 1008/2010, (UE) Nru 1009/2010, (UE) Nru 19/2011, (UE) Nru 109/2011, (UE) Nru 458/2011, (UE) Nru 65/2012, (UE) Nru 130/2012, (UE) Nru 347/2012, (UE) Nru 351/2012, (UE) Nru 1230/2012 u (UE) 2015/166 (ĠU L 325, 16.12.2019, pp. 1-40)
Ara l-verżjoni konsolidata.
Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Ewropa attiva — Mobbiltà sostenibbli għall-Ewropa: sikura, konnessa u nadifa (COM(2018) 293 finali, 17.5.2018)
l-aħħar aġġornament 30.07.2023