(1)

Ir-Regolament (UE) 2016/429 jistabbilixxi regoli speċifiċi għall-mard elenkat f’konformità mal-Artikolu 5(1) tiegħu, u jispeċifika kif dawk ir-regoli jridu jiġu applikati għall-kategoriji differenti tal-mard elenkat. Ir-Regolament (UE) 2016/429 jipprevedi wkoll l-approvazzjoni jew l-irtirar mill-Kummissjoni tal-istatus ta’ ħelsien mill-mard tal-Istati Membri jew taż-żoni jew tal-kompartimenti tagħhom rigward ċertu mard elenkat imsemmi fl-Artikolu 9(1), il-punti (a), (b) u (c), tiegħu. Barra minn hekk, ir-Regolament (UE) 2016/429 jipprevedi li l-Istati Membri jistabbilixxu programmi tal-eradikazzjoni obbligatorji għall-mard elenkat imsemmi fl-Artikolu 9(1), il-punt (b), tiegħu u programmi tal-eradikazzjoni fakultattivi għall-mard elenkat imsemmi fl-Artikolu 9(1), il-punt (c), tiegħu, u għall-approvazzjoni ta’ dawn il-programmi mill-Kummissjoni.

(2)

Ir-Regolament Delegat tal-Kummissjoni (UE) 2020/689 (2) jissupplimenta r-Regolament (UE) 2016/429 u jistabbilixxi l-kriterji għall-għoti, għaż-żamma, għas-sospensjoni u għall-irtirar tal-istatus ta’ ħelsien mill-mard għall-Istati Membri jew għaż-żoni jew għall-kompartimenti tagħhom, u r-rekwiżiti għall-approvazzjoni tal-programmi tal-eradikazzjoni għall-Istati Membri jew għaż-żoni jew għall-kompartimenti tagħhom.

(3)

Ir-Regolament ta’ Implimentazzjoni tal-Kummissjoni (UE) 2021/620 (3) jistabbilixxi r-regoli ta’ implimentazzjoni għall-mard elenkat, imsemmi fl-Artikolu 9(1), il-punti (a), (b) u (c), tar-Regolament (UE) 2016/429, tal-annimali, fir-rigward tal-istatus ta’ ħelsien mill-mard u tal-istatus ta’ mingħajr tilqim ta’ ċerti Stati Membri jew taż-żoni jew tal-kompartimenti tagħhom, u l-approvazzjoni tal-programmi tal-eradikazzjoni għal dak il-mard elenkat. B’mod aktar partikolari, dan jelenka fl-Annessi tiegħu, l-Istati Membri jew iż-żoni jew il-kompartimenti tagħhom bi status approvat ta’ ħelsien mill-mard, u bil-programmi tal-eradikazzjoni obbligatorji jew fakultattivi approvati eżistenti. Minħabba s-sitwazzjoni epidemjoloġika li qed tinbidel fl-Unjoni ta’ ċertu mard elenkat, jenħtieġ li jiġu emendati l-Annessi I u VIII ta’ dak ir-Regolament ta’ Implimentazzjoni.

(4)

L-ewwel nett, għall-infezzjoni bil-Brucella abortus, bil-B. melitensis u bil-B. suis fl-annimali ovini u kaprini miżmuma, fil-11 ta’ Diċembru 2023 l-Italja nnotifikat lill-Kummissjoni dwar tifqigħa primarja fil-provinċja ta’ Alessandria fir-Reġjun tal-Piemonte, segwita minn żewġ tifqigħat sekondarji fl-istess provinċja nnotifikati fit-8 ta’ Jannar 2024 u fl-1 ta’ Awwissu 2024. Peress li r-Reġjun kollu tal-Piemonte għandu status ta’ ħelsien mill-mard u huwa elenkat fil-Kapitolu 2 tal-Parti I tal-Anness I tar-Regolament ta’ Implimentazzjoni (UE) 2021/620, jenħtieġ li l-approvazzjoni tal-istatus ta’ ħelsien mill-mard mill-infezzjoni bil-Brucella abortus, bil-B. melitensis u bil-B. suis fl-annimali ovini u kaprini miżmuma tiġi rtirata mill-provinċja ta’ Alessandria fir-Reġjun tal-Piemonte u l-entrata għall-Italja f’dik il-lista jenħtieġ li tiġi emendata kif xieraq.

(5)

It-tieni, fir-rigward tal-infezzjoni bil-virus tal-ilsien blu (is-serotipi 1-24) (infezzjoni bil-BTV), iċ-Ċekja, id-Danimarka, il-Ġermanja, il-Lussemburgu, l-Awstrija, u l-Iżvezja nnotifikaw lill-Kummissjoni dwar tifqigħat ta’ infezzjoni tas-serotip 3 tal-BTV. Fir-rigward ta’ dik il-marda, it-tifqigħat fil-Ġermanja ġew innotifikati fiż-żona li għad għandha status ta’ ħelsien mill-mard. Barra minn hekk, l-Awstrija nnotifikat lill-Kummissjoni dwar tifqigħa waħda ta’ infezzjoni tas-serotip 4 tal-BTV. Barra minn hekk, l-Italja u Spanja nnotifikaw lill-Kummissjoni dwar tifqigħat ta’ infezzjoni tas-serotip 8 tal-BTV. L-Italja fir-reġjun ta’ Valle d’Aosta, u Spanja fil-komunità awtonoma tal-Katalonja qrib il-provinċja ta’ Huesca fil-komunità awtonoma ta’ Aragona, u fil-komunità awtonoma tal-Gżejjer Baleariċi. Peress li t-territorju kollu taċ-Ċekja, il-Lussemburgu u d-Danimarka, il-Ġermanja (ħlief għal Bundesland Bremen, Hessen, Niedersachsen, Nordrhein-Westfalen, Rheinland-Pfalz), u t-territorju kollu tal-Awstrija u tal-Iżvezja, ir-reġjun ta’ Valle d’Aosta fl-Italja, u l-komunità awtonoma tal-Gżejjer Baleariċi, u l-komunità awtonoma ta’ Aragona fi Spanja għandhom status ta’ ħelsien mill-mard, u huma elenkati fil-Parti I tal-Anness VIII tar-Regolament ta’ Implimentazzjoni (UE) 2021/620, jenħtieġ li l-approvazzjoni tal-istatus ta’ ħelsien mill-mard mill-infezzjoni bil-BTV tiġi rtirata mit-territorju kollu tad-Danimarka, tal-Lussemburgu, tal-Ġermanja kif deskritt qabel, tal-Awstrija, tal-Iżvezja, diversi reġjuni taċ-Ċekja, ir-reġjun ta’ Valle d’Aosta fl-Italja, kif ukoll mill-komunità awtonoma tal-Gżejjer Baleariċi u mill-provinċja ta’ Huesca fil-komunità awtonoma ta’ Aragona fi Spanja. Għalhekk, jenħtieġ li l-entrati għaċ-Ċekja, għad-Danimarka, għall-Ġermanja, għal Spanja, għall-Italja, għal-Lussemburgu, għall-Awstrija u għall-Iżvezja f’dik il-lista jiġu emendati kif xieraq.

(6)

Barra minn hekk, Spanja infurmat lill-Kummissjoni li estendiet il-kamp ta’ applikazzjoni territorjali tal-programm tal-eradikazzjoni fakultattiv għall-infezzjoni bil-BTV li diġà ġie approvat għaż-żoni elenkati fil-Parti II tal-Anness VIII tar-Regolament ta’ Implimentazzjoni (UE) 2021/620, biż-żieda tal-komunità awtonoma tal-Gżejjer Baleariċi u żona li tinkludi l-provinċja ta’ Huesca fil-komunità awtonoma ta’ Aragona. Għalhekk, dawk iż-żoni jenħtieġ li jiżdiedu mal-entrata għal Spanja fil-Parti II tal-Anness VIII tar-Regolament ta’ Implimentazzjoni (UE) 2021/620, u tiġi approvata l-emenda proposta għall-programm tal-eradikazzjoni fakultattiv għall-infezzjoni bil-BTV.

(7)

Għalhekk jenħtieġ li l-Annessi I u VIII tar-Regolament ta’ Implimentazzjoni (UE) 2021/620 jiġu emendati kif xieraq.

(8)

Il-miżuri previsti f’dan ir-Regolament huma f’konformita mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,