Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32017D2410

Deċiżjoni ta' Implimentazzjoni tal-Kummissjoni (UE) 2017/2410 tal-20 ta' Diċembru 2017 li temenda d-Deċiżjonijiet 2006/415/KE u 2007/25/KE u d-Deċiżjoni ta' Implimentazzjoni 2013/657/UE rigward ċerti miżuri ta' salvagwardja b'rabta mal-influwenza tat-tjur b'patoġeniċità għolja ħafna (notifikata bid-dokument C(2017) 8969) (Test b'rilevanza għaż-ŻEE. )

C/2017/8969

ĠU L 342, 21.12.2017, p. 13–16 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document No longer in force, Date of end of validity: 13/07/2021; Imħassar b' 32020R0687

ELI: http://data.europa.eu/eli/dec_impl/2017/2410/oj

21.12.2017   

MT

Il-Ġurnal Uffiċjali tal-Unjoni Ewropea

L 342/13

DEĊIŻJONI TA' IMPLIMENTAZZJONI TAL-KUMMISSJONI (UE) 2017/2410

tal-20 ta' Diċembru 2017

li temenda d-Deċiżjonijiet 2006/415/KE u 2007/25/KE u d-Deċiżjoni ta' Implimentazzjoni 2013/657/UE rigward ċerti miżuri ta' salvagwardja b'rabta mal-influwenza tat-tjur b'patoġeniċità għolja ħafna

(notifikata bid-dokument C(2017) 8969)

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 89/662/KEE tal-11 ta' Diċembru 1989 dwar spezzjonijiet veterinarji fil-kummerċ intra-Komunitarju bil-ħsieb tat-tlestija tas-suq intern (1), u b'mod partikolari l-Artikolu 9(4) tagħha,

Wara li kkunsidrat id-Direttiva tal-Kunsill 90/425/KEE tas-26 ta' Ġunju 1990 dwar l-iċċekkjar veterinarju u zootekniku applikabbli għall-kummerċ intra-Komunitarju ta' ċertu annimali ħajjin u prodotti bil-ħsieb tat-tlestija tas-suq intern (2), u b'mod partikolari l-Artikolu 10(4) tagħha,

Wara li kkunsidrat id-Direttiva tal-Kunsill 91/496/KEE tal-15 ta' Lulju 1991 li tistabbilixxi l-prinċipji li jirregolaw l-organizzazzjoni ta' kontrolli veterinarji fuq annimali li jidħlu fil-Komunità minn pajjiżi terzi u li temenda d-Direttivi 89/662/KEE, 90/425/KEE u 90/675/KEE (3), u b'mod partikolari l-Artikolu 18(1) u (7) tagħha,

Wara li kkunsidrat id-Direttiva tal-Kunsill 97/78/KE tat-18 ta' Diċembru 1997 li tistabbilixxi l-prinċipji li jirregolaw l-organizzazzjoni tal-verifiki veterinarji fuq prodotti li jidħlu fil-Komunità minn pajjiżi terzi (4), u b'mod partikolari l-Artikolu 22(1) u (6) tagħha,

Wara li kkunsidrat id-Direttiva tal-Kunsill 2005/94/KE tal-20 ta' Diċembru 2005 dwar miżuri Komunitarji għall-kontroll tal-influwenza tat-tjur u li tħassar id-Direttiva 92/40/KEE (5), u b'mod partikolari l-Artikolu 63(3) tagħha,

Wara li kkunsidrat ir-Regolament (UE) Nru 576/2013 tal-Parlament Ewropew u tal-Kunsill tat-12 ta' Ġunju 2013 dwar il-movimenti mhux kummerċjali tal-annimali domestiċi u li jħassar ir-Regolament (KE) Nru 998/2003 (6), u b'mod partikolari l-Artikolu 36(1),

Billi:

(1)

Id-Deċiżjonijiet tal-Kummissjoni 2006/415/KE (7) u 2007/25/KE (8) u d-Deċiżjoni ta' Implimentazzjoni 2013/657/UE (9) ġew adottati wara tifqigħat tal-influwenza tat-tjur b'patoġeniċità għolja tas-sottotip H5N1 bil-għan li jipproteġu s-saħħa tal-annimali u tal-bniedem fl-Unjoni.

(2)

Id-Deċiżjoni 2006/415/KE tistabbilixxi ċerti miżuri ta' protezzjoni li għandhom jiġu applikati f'każ ta' tifqigħa tal-influwenza tat-tjur b'patoġeniċità għolja tas-sottotip H5N1 fil-pollam ta' Stat Membru, inkluż l-istabbiliment taż-żoni A u B wara suspett jew konferma ta' tifqigħa ta' dik il-marda.

(3)

Id-Deċiżjoni 2007/25/KE tistabbilixxi ċerti miżuri ta' protezzjoni fir-rigward tal-influwenza tat-tjur b'patoġeniċità għolja u l-movimenti ta' għasafar domestiċi li jkunu akkumpanjati minn sidhom fl-Unjoni.

(4)

Id-Deċiżjoni ta' Implimentazzjoni 2013/657/UE tistipula li f'każ ta' sejba pożittiva tal-influwenza tat-tjur tas-sottotip H5N1 f'xi għasfur selvaġġ jew ta' tifqigħa ta' dik il-marda f'pollam fl-Iżvizzera, il-miżuri ta' protezzjoni tal-Unjoni jiġu applikati biss għal dawk il-partijiet tal-pajjiż terz fejn l-awtorità kompetenti ta' dak il-pajjiż terz tapplika miżuri ta' protezzjoni ekwivalenti għal dawk stabbiliti fid-Deċiżjoni 2006/415/KE u d-Deċiżjoni tal-Kummissjoni 2006/563/KE (10).

(5)

Il-miżuri stabbiliti fid-Deċiżjonijiet 2006/415/KE u 2007/25/KE u fid-Deċiżjoni ta' Implimentazzjoni 2013/657/UE japplikaw sal-31 ta' Diċembru 2017.

(6)

Matul dawn l-aħħar snin il-biċċa l-kbira tat-tifqigħat fl-Unjoni tal-influwenza tat-tjur b'patoġeniċità għolja fil-pollam u f'għasafar oħra miżmuma fil-magħluq, kif ukoll fil-każijiet ta' għasafar slavaġ, kienu aktar ikkawżati mis-sottotipi H5 milli mis-sottotip H5N1 ta' oriġini Asjatika. Madankollu, dik ir-razza tal-virus għadha tiċċirkola sew fil-pollam, f'għasafar oħra miżmuma fil-magħluq u fl-għasafar slavaġ f'diversi pajjiżi Asjatiċi u Afrikani u r-riskji għas-saħħa tal-annimali u tal-bniedem fl-Unjoni għadhom jippersistu.

(7)

Għalhekk jixraq li jkomplu jitnaqqsu r-riskji ta' dak il-virus bis-saħħa ta' ċerti miżuri ta' protezzjoni marbuta mat-tifqigħat tal-influwenza tat-tjur b'patoġeniċità għolja fil-pollam u f'għasafar oħra miżmuma fil-magħluq fl-Unjoni u li jinżammu l-miżuri mmirati biex jimpedixxu l-introduzzjoni possibbli ta' viruses tal-influwenza tat-tjur b'patoġeniċità għolja fl-Unjoni bl-importazzjonijiet tal-prodotti tat-tjur, inkluża l-introduzzjoni tal-għasafar domestiċi.

(8)

L-introduzzjoni tal-għasafar domestiċi li jkunu akkumpanjati minn sidhom toħloq riskju aktar baxx għall-introduzzjoni tal-virus tal-influwenza tat-tjur fl-Unjoni, dejjem jekk jiġu rrispettati r-rekwiżiti tad-Deċiżjoni 2007/25/KE u li l-għasafar ikunu ddestinati għal dar privata jew għal residenza oħra tas-sid jew tal-persuna responsabbli. Madankollu, peress li r-rekwiżiti dwar id-destinazzjoni tal-għasafar domestiċi wara li jidħlu fl-Unjoni mhumiex stabbiliti b'mod suffiċjenti fid-Deċiżjoni 2007/25/KE, ma jistax jiġi eskluż li dawn l-għasafar jiddaħħlu f'wirjiet, f'fieri, f'eżebizzjonijiet jew f'raggruppamenti oħra ta' għasafar fejn ir-riskju possibbli ta' tixrid ta' infezzjoni huwa ogħla. Għalhekk, jenħtieġ li d-Deċiżjoni 2007/25/KE tiġi emendata biex tistabbilixxi b'mod ċar ir-rekwiżit li dawk l-għasafar ma jistgħux jiddaħħlu f'dawn l-avvenimenti qabel ma jiskadi l-perjodu ta' 30 jum minn meta jidħlu fl-Unjoni.

(9)

Barra minn hekk, fl-14 ta' Settembru 2017 l-Awtorità Ewropea dwar is-Sigurtà fl-Ikel adottat Opinjoni Xjentifika dwar l-influwenza tat-tjur (11) (l-Opinjoni tal-EFSA). Jenħtieġ li ssir reviżjoni tal-miżuri stabbiliti fid-Deċiżjonijiet 2006/415/KE u 2007/25/KE u fid-Deċiżjoni ta' Implimentazzjoni 2013/657/UE fid-dawl tas-sejbiet tal-Opinjoni tal-EFSA.

(10)

Sabiex jinżammu l-miżuri attwali ta' protezzjoni u biex tkun tista' ssir evalwazzjoni bir-reqqa tal-għażliet ta' politika għar-reviżjoni prevista tar-regoli tal-Unjoni bbażata fuq is-sejbiet tal-opinjoni tal-EFSA, jenħtieġ li l-perjodu ta' applikazzjoni tad-Deċiżjonijiet 2006/415/KE u 2007/25/KE u tad-Deċiżjoni ta' Implimentazzjoni 2013/657/UE jiġi estiż sal-31 ta' Diċembru 2018.

(11)

Fir-rigward tad-Deċiżjoni 2007/25/KE, jixraq ukoll li jiġu aġġornati l-kundizzjonijiet għall-introduzzjoni tal-għasafar domestiċi fl-Unjoni billi jiġi inkluż l-antiġen H7 tal-influwenza tat-tjur biex jintuża għat-testijiet dijanjostiċi u l-vaċċini.

(12)

Barra minn hekk, biex tiġi ffaċilitata l-applikazzjoni tar-regoli tal-Unjoni inkluża ċ-ċertifikazzjoni għall-introduzzjoni tal-għasafar domestiċi fl-Unjoni, jenħtieġ li ċerti kontroreferenzi fid-Deċiżjoni 2007/25/KE jiġu aġġornati biex iqisu l-bidliet fil-leġiżlazzjoni tal-Unjoni.

(13)

Għaldaqstant, jenħtieġ li d-Deċiżjonijiet 2006/415/KE u 2007/25/KE u d-Deċiżjoni ta' Implimentazzjoni 2013/657/UE jiġu emendati skont dan.

(14)

Sabiex jiġi evitat kull tfixkil dwar l-introduzzjoni tal-għasafar domestiċi fl-Unjoni, jenħtieġ li l-użu taċ-ċertifikat veterinarju maħruġ skont id-Deċiżjoni 2007/25/KE qabel l-emendi introdotti minn din id-Deċiżjoni, jiġi awtorizzat matul perjodu tranżitorju li jkun soġġett għal ċerti kundizzjonijiet.

(15)

Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DIN ID-DEĊIŻJONI:

Artikolu 1

Fl-Artikolu 12 tad-Deċiżjoni 2006/415/KE, id-data “31 ta' Diċembru 2017” hija sostitwita bid-data “31 ta' Diċembru 2018”.

Artikolu 2

Id-Deċiżjoni 2007/25/KE hija emendata kif ġej:

(1)

fl-Artikolu 1(1)(b):

(a)

il-punti (ii), (iii) u (iv) huma sostitwiti b'dan li ġej:

“(ii)

jinżammu fi kwarantina għal 30 jum wara l-importazzjoni fl-Istat Membru destinatarju f'postijiet approvati skont l-ewwel paragrafu tal-Artikolu 6 tar-Regolament ta' Implimentazzjoni tal-Kummissjoni (UE) Nru 139/2013 (*1), jew

(iii)

ikunu tlaqqmu fl-aħħar sitt xhur u sa mhux aktar tard minn 60 jum qabel it-tluq mill-pajjiż terz, u f'mill-inqas okkażjoni waħda jkunu tlaqqmu mill-ġdid kontra l-influwenza tat-tjur tas-sottotipi H5 u H7; il-vaċċini użati jridu jkunu approvati għall-ispeċi kkonċernata skont l-istruzzjonijiet tal-manifattur, jew

(iv)

ikunu nżammu f'iżolament għal mill-inqas 10 ijiem qabel l-esportazzjoni u jkun sarilhom test biex jiġi individwat l-antiġen jew il-ġenoma H5 u H7 tal-influwenza tat-tjur kif stabbilit fil-Kapitolu dwar l-influwenza tat-tjur tal-Manwal ta' Testijiet Dijanostiċi u Vaċċini għall-Annimali Terrestri, kif aġġornat b'mod regolari mill-OIE, imwettaq fuq kampjun meħud mhux qabel it-tielet jum ta' iżolament, u

(*1)  Ir-Regolament ta' Implimentazzjoni tal-Kummissjoni (UE) Nru 139/2013 tas-7 ta' Jannar 2013 li jistipula l-kondizzjonijiet tas-saħħa tal-annimali għall-importazzjoni ta' ċerti għasafar fl-Unjoni u l-kondizzjonijiet ta' kwarantina tagħhom (ĠU L 47, 20.2.2013, p. 1).”"

(b)

jiżdied il-punt ġdid (v):

“(v)

jiġu ttrasferiti f'dar privata jew f'residenza oħra fl-Unjoni u fil-perjodu ta' 30 jum wara d-dħul tagħhom fl-Unjoni ma jkunux jistgħu jiddaħħlu f'wirjiet, f'fieri, f'eżebizzjonijiet jew f'raggruppamenti oħra ta' għasafar, bl-eċċezzjoni tal-movimenti f'faċilità approvata għall-kwarantina wara l-importazzjoni tagħhom fl-Unjoni kif imsemmi fil-punt (ii).”

(2)

fl-Artikolu 2, il-paragrafu (4) huwa sostitwit b'dan li ġej:

“4.   Meta dawn il-kontrolli juru li l-annimali ma jissodisfawx ir-rekwiżiti stabbiliti f'din id-Deċiżjoni, għandu japplika l-Artikolu 35 tar-Regolament (UE) Nru 576/2013 tal-Parlament Ewropew u tal-Kunsill (*2).

(*2)  Ir-Regolament (UE) Nru 576/2013 tal-Parlament Ewropew u tal-Kunsill tat-12 ta' Ġunju 2013 dwar il-movimenti mhux kummerċjali tal-annimali domestiċi u li jħassar ir-Regolament (KE) Nru 998/2003 (ĠU L 178, 28.6.2013, p. 1).”"

(3)

Fl-Artikolu 6, id-data “31 ta' Diċembru 2017” hija sostiwita bid-data “31 ta' Diċembru 2018”.

(4)

Fl-Anness II, il-Parti II tal-mudell taċ-ċertifikat veterinarju hija emendata kif ġej:

(a)

Il-punt 3 huwa sostitwit b'dan li ġej:

“[3.

L-għasfur (għasafar) jikkonforma(w) mill-inqas ma' waħda mill-kundizzjonijiet mniżżlin hawn taħt:

(1) jew

[jiġi/jiġu minn pajjiż terz elenkat fil-Parti 1 tal-Anness I jew fil-Parti 1 tal-Anness II tar-Regolament (UE) Nru 206/2010 u ġie/ġew iżolat(i) fil-bini speċifikat fil-punt I.11 taħt superviżjoni uffiċjali għal mill-inqas 30 jum qabel id-data tad-dispaċċ u protett(i) b'mod effettiv mill-kuntatt ma' kwalunkwe għasfur ieħor;]

(1) jew

[tlaqqam/tlaqqmu fi … [jj/xx/ssss] u tlaqqam/tlaqqmu mill-ġdid fi … [jj/xx/ssss] kontra l-influwenza tat-tjur tas-sottotipi H5 u H7 fi żmien 6 xhur u mhux aktar tard minn 60 jum qabel id-data tad-dispaċċ, skont l-istruzzjonijiet tal-manifattur. Il-vaċċin(i) użat(i) mhuwiex/mhumiex vaċċin(i) ħaj/ħajja u huwa/huma approvat(i) għall-ispeċi kkonċernata fil-pajjiż terz tad-dispaċċ jew mill-inqas fi Stat Membru wieħed tal-Unjoni Ewropea;]

(1) jew

[ġie/ġew iżolat(i) għal mill-inqas 10 ijiem qabel id-data tad-dispaċċ u jkun(u) ġie/ġew soġġett(i) għal test biex jiġi individwat l-antiġen jew jew il-ġenoma H5 u H7 tal-influwenza tat-tjur kif stabbilit fil-Kapitolu 2.3.4. dwar l-influwenza tat-tjur tal-Manwal ta' Testijiet Dijanostiċi u Vaċċini għall-Annimali Terrestri tal-OIE, kif aġġornat b'mod regolari, imwettaq fuq kampjun meħud fi … [jj/xx/ssss], li ma jistax jittieħed qabel it-tielet jum ta' izolament;]

u

jiġi/jiġu ttrasferit(i) f'dar privata jew f'residenza oħra fl-Unjoni Ewropea u fil-perjodu ta' 30 jum wara d-dħul tiegħu/tagħhom fl-Unjoni ma jistax/jistgħux jiddaħħal/jiddaħħlu f'wirjiet, f'fieri, f'eżebizzjonijiet jew f'raggruppamenti oħra ta' għasafar.]

(1) jew

[3.

Is-sid/il-persuna responsabbli għall-għasfur (għasafar) iddikjara(t) li huwa/hija għamel (għamlet) l-arranġamenti għall-kwarantina ta' 30 jum ta' wara d-dħul fl-Unjoni Ewropea, f'faċilità jew f'ċentru ta' kwarantina approvat skont l-ewwel paragrafu tal-Artikolu 6 tar-Regolament ta' Implimentazzjoni (UE) Nru 139/2013”.

(b)

Il-punt 4.1 huwa sostitwit b'dan li ġej:

“4.1.

L-għasfur (għasafar) huwa/huma “annimal(i) domestiku(ċi)” kif definit fl-Artikolu 3(b) tar-Regolament (UE) Nru 576/2013 maħsub għall-moviment mhux kummerċjali.”

(5)

Fl-Anness III jiżdied il-punt 5 li ġej:

“5.

L-għasfur (għasafar) irid(u) jiġi/jiġu ttrasferit(i) f'dar privata jew f'residenza oħra fl-Unjoni u fil-perjodu ta' 30 jum wara d-dħul tiegħu/tagħhom fl-Unjoni ma jistax/jistgħux jiddaħħal/jiddaħħlu f'wirjiet, f'fieri, f'eżebizzjonijiet jew f'raggruppamenti oħra ta' għasafar, bl-eċċezzjoni tal-movimenti f'faċilità approvata ta' kwarantina wara d-dħul tiegħu/tagħhom fl-Unjoni.”

Artikolu 3

Fl-Artikolu 4 tad-Deċiżjoni ta' Implimentazzjoni 2013/657/UE, id-data “31 ta' Diċembru 2017” hija sostitwita bid-data “31 ta' Diċembru 2018”.

Artikolu 4

Għal perjodu tranżitorju sal-1 ta' Marzu 2018, l-għasafar domestiċi li jkollhom ċertifikat veterinarju maħruġ qabel dik id-data u fi żmien il-perjodu tal-validità tiegħu skont il-mudell taċ-ċertifikat veterinarju stabbilit fl-Anness II u d-Dikjarazzjoni stabbilita fl-Anness III tad-Deċiżjoni 2007/25/KE fil-verżjonijiet tagħhom qabel l-emendi introdotti fid-Deċiżjoni 2007/25/KE bl-Artikolu 2 ta' din id-Deċiżjoni, jistgħu jibqgħu jiddaħħlu fl-Unjoni.

Artikolu 5

Din id-Deċiżjoni hija indirizzata lill-Istati Membri.

Magħmul fi Brussell, l-20 ta' Diċembru 2017.

Għall-Kummissjoni

Vytenis ANDRIUKAITIS

Membru tal-Kummissjoni

(1)  ĠU L 395, 30.12.1989, p. 13.

(2)  ĠU L 224, 18.8.1990, p. 29.

(3)  ĠU L 268, 24.9.1991, p. 56.

(4)  ĠU L 24, 30.1.1998, p. 9.

(5)  ĠU L 10, 14.1.2006, p. 16.

(6)  ĠU L 178, 28.6.2013, p. 1.

(7)  Id-Deċiżjoni tal-Kummissjoni 2006/415/KE tal-14 ta' Ġunju 2006 dwar ċerti miżuri ta' protezzjoni fir-rigward tal-influwenza tat-tjur tas-sottotip H5N1 ta' patoġeniċità għolja ħafna fit-tjur tal-Komunità u li tirrevoka d-Deċiżjoni 2006/135/KE (ĠU L 164, 16.6.2006, p. 51).

(8)  Id-Deċiżjoni tal-Kummissjoni 2007/25/KE tat-22 ta' Diċembru 2006 fir-rigward ta' ċerti miżuri ta' ħarsien relatati mal-influwenza tat-tjur li għandha patoġeniċità għolja u l-movimenti ta' għasafar domestiċi li huma akkumpanjati mis-sid tagħhom fil-Komunità (ĠU L 8, 13.1.2007, p. 29).

(9)  Id-Deċiżjoni ta' Implimentazzjoni tal-Kummissjoni 2013/657/UE tat-12 ta' Novembru 2013 rigward ċerti miżuri ta' salvagwardja b'rabta mal-influwenza tat-tjur b'patoġeniċità għolja ħafna tas-sottotip H5N1 li għandhom jiġu applikati fil-każ ta' tifqigħa ta' din il-marda fl-Iżvizzera u li tirrevoka d-Deċiżjoni 2009/494/KE (ĠU L 305, 15.11.2013, p. 19).

(10)  Id-Deċiżjoni tal-Kummissjoni 2006/563/KE tal-11 ta' Awwissu 2006 dwar ċerti miżuri ta' ħarsien b'rabta mal-influwenza tat-tjur patoġenika ħafna tas-sottotip H5N1 fi tjur slavaġ fil-Komunità u li tirrevoka d-Deċiżjoni 2006/115/KE (ĠU L 222, 15.8.2006, p. 11).

(11)  EFSA Journal 2017;15(10):4991.

Top