Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32011D0787

2011/787/UE: Deċiżjoni ta’ Implimentazzjoni tal-Kummissjoni tad- 29 ta’ Novembru 2011 li tawtorizza l-Istati Membri jieħdu temporanjament miżuri ta’ emerġenza kontra t-tixrid ta’ Ralstonia solanacearum (Smith) Yabuuchi et al. fir-rigward tal-Eġittu (notifikata bid-dokument numru C(2011) 8618)

ĠU L 319, 2.12.2011, p. 112–115 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

⏵Dan id-dokument ġie ppubblikat f’edizzjoni(jiet) speċjali (HR)

Legal status of the document In force

ELI: http://data.europa.eu/eli/dec_impl/2011/787/oj

2.12.2011   

MT

Il-Ġurnal Uffiċjali tal-Unjoni Ewropea

L 319/112

DEĊIŻJONI TA’ IMPLIMENTAZZJONI TAL-KUMMISSJONI

tad-29 ta’ Novembru 2011

li tawtorizza l-Istati Membri jieħdu temporanjament miżuri ta’ emerġenza kontra t-tixrid ta’ Ralstonia solanacearum (Smith) Yabuuchi et al. fir-rigward tal-Eġittu

(notifikata bid-dokument numru C(2011) 8618)

(2011/787/UE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 2000/29/KE tat-8 ta’ Mejju 2000 dwar miżuri protettivi kontra l-introduzzjoni ġewwa l-Komunità a’ organiżmi ta’ ħsara għall-pjanti jew il-prodotti tal-pjanti u kontra t-tixrid tagħhom ġewwa l-Komunità (1), u b’mod partikolari l-Artikolu 16(3) tagħha,

Billi:

(1)

Ir-Ralstonia solanacearum (Smith) Yabuuchi et al. (magħrufa wkoll bħala Pseudomonas solanacearum (Smith) Smith) huwa organiżmu ta’ ħsara għat-tuberi tas-Solanum tuberosum L.u dan huwa suġġett għal miżuri provduti fid-Direttiva 2000/29/KE u d-Direttiva tal-Kunsill 98/57/KE tal-20 ta’ Lulju 1998 dwar il-kontroll tar-Ralstonia solanacearum (Smith) Yabuuchi et al  (2).

(2)

Wara intercettazzjonijiet fl-Unjoni tar-Ralstonia solanacearum (Smith) Yabuuchi et al. fuq it-tuberi tas-Solanum tuberosum L. li joriġina fl-Eġittu, il-Kummissjoni adottat id-Deċiżjoni 2004/4/KE tal-Kummissjoni tat-22 ta’ Diċembru 2003 li tawtorizza Stati Membri li temporanjament jieħdu miżuri ta’ emerġenza kontra t-tixrid tal-Pseudomonas solanacearum (Smith) Smith fir-rigward tal-Eġittu Dik id-Deċiżjoni pprojbiet id-dħul fl-Unjoni tat-tuberi tas-Solanum tuberosum L. li joriġina fl-Eġittu sakemm ma kienx hemm konformità ma’ ċerti rekwiżiti.

(3)

F’dawn l-aħħar snin kien hemm interċettazzjonijiet oħra tar-Ralstonia solanacearum (Smith) Yabuuchi et al. fuq it-tuberi tas-Solanum tuberosum L li joriġinaw fl-Eġittu (3). Għalhekk, il-miżuri ta’ emerġenza kontra t-tixrid ta’ organiżmu ta’ ħsara konċernat għandhom ikomplu jibqgħu fis-seħħ fir-rigward tad-dħul fl-Unjoni tat-tuberi tas-Solanum tuberosum L. li joriġinaw fl-Eġittu.

(4)

Madankollu, dawk il-miżuri ta’ emerġenza għandhom jiġu adattati biex jirrispondu għal sitwazzjoni li tjiebet b’riżultat ta’ azzjonijiet meħuda mill-Eġittu, b’mod partikolari reġim ta’ kontroll għall-produzzjoni u l-esportazzjoni ta’ tuberi tas-Solanum tuberosum L. għall-Unjoni ppreżentat mill-Eġittu. Barra minn hekk, matul l-istaġun tal-importazzjoni 2010/2011 l-ebda interċettazzjoni tar-Ralstonia solanacearum (Smith) Yabuuchi et al ma kienet reġistrata fl-Unjoni.

(5)

Għalhekk, id-dħul fl-Unjoni tat-tuberi tas-Solanum tuberosum L. li joriġinaw fl-Eġittu għandu jkun permess jekk dawn tkabbru f’ċerti żoni stabbiliti mill-Eġittu f’konformità mal-istandards internazzjonali rilevanti. Il-Kummissjoni għandha tgħaddi l-lista ta’ dawn iż-żoni, ippreżentata mill-Eġittu, lill-Istati Membri biex ikunu jistgħu jwettqu kontrolli ta’ importazzjoni u jippermettu t-traċċabilità tal-konsinni. Għandha ssir dispożizzjoni għall-aġġornament ta’ dik il-lista fil-każ tal-interċettazzjoni tar-Ralstonia solanacearum (Smith) Yabuuchi et al. Barra minn hekk, ir-rekwiżiti ta’ kontroll tal-Unjoni għall-importazzjoni tat-tuberi tas-Solanum tuberosum L. li joriġinaw fl-Eġittu għandhom ikunu limitati għal reġim ta’ spezzjoni intensiva mal-wasla ta’ dawk it-tuberi fl-Unjoni.

(6)

L-Istati Membri għandhom jipprovdu lill-Kummissjoni lill-Istati Membri l-oħra, wara kull staġun ta’ importazzjoni, informazzjoni dettaljata dwar l-importazzjonijiet li saru sabiex l-applikazzjoni ta’ din id-Deċiżjoni tkun eżaminta.

(7)

Fl-interess taċ-ċarezza u r-razzjonalità, id-Deċiżjoni Nru 2004/4/KE għandha għalhekk titħassar u tinbidel b’din id-Deċiżjoni.

(8)

Hu neċessarju li tkun preveduta il-possibilità ta’ reviżjoni ta’ din id-Deċiżjoni.

(9)

Il-miżuri stipulati f’din id-Deċiżjoni huma konformi mal-opinjoni tal-Kumitat Permanenti dwar is-Saħħa tal-Pjanti,

ADOTTAT DIN ID-DEĊIŻJONI:

Artikolu 1

Żoni ħielsa mill-insetti

1.   Id-dħul fit-territorju fl-Unjoni tat-tuberi tas-Solanum tuberosum L. li joriġinaw fl-Eġittu għandu jitħalla jekk dawn jkunu tkabbru f’żoni inklużi fil-lista ta’ żoni ħielsa mill-insetti msemmija fil-paragrafu 2 u jekk hemm konformità mar-rekwiżiti stabbiliti fl-Anness.

2.   Il-Kummissjoni għandha tgħaddi lill-Istati Membri lista ta’ żoni ħielsa mill-insetti ppreżentata mill-Eġittu qabel kull staġun tal-importazzjoni li fiha ż-żoni ħielsa mill-insetti stabbiliti b’konformità mal-“FAO International Standard for Phytosanitary Measures No 4: Pest Surveillance - Requirements for the Establishment of Pest-Free Areas”.

3.   Meta interċettazzjoni tar-Ralstonia solanacearum (Smith) Yabuuchi et al. hija notifikata lill-Kummisjsoni u lill-Eġittu, iż-żona li fiha jkunu oriġinaw it-tuberi tas-Solanum tuberosum L. interċettati għandha tkun eskluża mil-lista ta’ żoni ħielsa mill-insetti, imsemmija fil-paragrafu 2 sakemm joħroġ l-eżitu tal-investigazzjonijiet imwettqa mill-Eġittu. Il-Kummissjoni għandha tgħaddi lill-Istati Membri r-riżultati ta’ dawk l-investigazzjonijiet u, jekk rilevanti, lista aġġornata taż-żoni ħielsa mill-insetti, kif ippreżentata mill-Eġittu.

Artikolu 2

Sottomissjoni ta’ informazzjoni u notifiki

1.   L-Istati Membri li jimportaw għandhom jissottomettu lill-Kummissjoni u lill-Istati Membri l-oħra, kull sena qabel il-31 ta’ Awwissu, l-informazzjoni dwar l-ammonti importati skont din id-Deċiżjoni matul l-istaġun ta’ importazzjoni preċedenti, rapport tekniku dettaljat dwar l-ispezzjonijiet imsemmija fil-punt 4 tal-Anness u ttestjar fuq infezzjoni moħbija msemmija fil-punt 5 tal-Anness u kopji taċ-ċertifikati fitosanitarji kollha uffiċjali.

2.   Meta l-Istati Membri jinnotifkaw lill-Kummissjoni b’suspett jew jikkonfermaw sejba tar-Ralstonia solanacearum (Smith) Yabuuchi et al. b’konformità mal-punt 6 tal-Anness, dik in-notifika għandha tkun akkumpanjata minn kopji taċ-ċertifikati fitosanitarji uffiċjali u d-dokumenti mehmużin tagħhom.

3.   In-notifika msemmija fil-paragrafu 2 għandha tkopri biss il-konsinna meta din tkun magħmula minn lottijiet li kollha għandhom l-istess prevenjenza.

Artikolu 3

Revoka

Id-Deċiżjoni 2004/4/KE hija revokata.

Artikolu 4

Reviżjoni

Il-Kummissjoni għandha tirrevedi din id-Deċiżjoni sat-30 ta’ Settembru 2012.

Artikolu 5

Indirizzi

Din id-Deċiżjoni hija indirizzata lill-Istati Membri.

Magħmul fi Brussell, id-29 ta’ Novembru 2011.

Għall-Kummissjoni

John DALLI

Membru tal-Kummissjoni

(1)  ĠU L 169, 10.7.2000, p. 1.

(2)  ĠU L 235, 21.8.1998, p. 1.

(3)  ĠU L 2, 6.1.2004, p. 50.

ANNESS

Ir-rekwiżiti li jridu jkunu sodisfatti, kif imsemmija fl-Artikolu 1, flimkien mar-rekwiżiti għat-tuberi tas-Solanum tuberosum L. stabbiliti fil-partijiet A u B tal-Annessi I, II u IV tad-Direttiva 2000/29/KE:

1.   Ir-rekwiżiti li jikkonċernaw iż-żoni ħielsa mill-insetti

Iż-żoni ħielsa mill-insetti msemmija fl-Artikolu 1 għandhom ikunu magħmula jew minn “settur” (unità amministrattiva diġà stabbilita li tkopri grupp ta’ “baċiri”) jew “baċir” (unità ta’ irrigazzjoni) u għandhom ikunu identifikati min-numri tal-kodiċi uffiċjali individwali.

2.   Ir-rekwiżiti li jikkonċernaw it-tuberi tas-Solanum tuberosum L. li jridu jkunu importati

2.1.

It-tuberi tas-Solanum tuberosum L. li jrid jkun ġew importati fl-Unjoni għandhom ikunu sottomessi għal reġim ta’ kontroll intensiv fl-Eġittu li jiżgura l-assenza tar-Ralstonia solanacearum (Smith) Yabuuchi et al. Ir-reġim ta’ kontroll intensiv għandu jkopri l-kondizzjonijiet tat-tkabbir, l-ispezzjonijiet tal-għelieqi, it-trasport, l-ippakkjar, l-ispezzjonijiet ta’ qabel l-esportazzjoni u l-ittestjar.

2.2.

It-tuberi tas-Solanum tuberosum L. li jridu jkun ġew importati fl-Unjoni għandhom ikunu:

(a)

preparati f’lottijiet, u kull wieħed minnhom għandu jkun magħmul esklussivament minn tuberi tas-Solanum tuberosum L. li l-ħsad tagħhom jkun sar f’żona unika kif speċifikat fil-punt 1;

(b)

ittikkettjati b’mod ċar fuq kull xkora, taħt il-kontroll tal-awtoritajiet kompetenti Eġizzjani, b’indikazzjoni li ma titħassarx tan-numru ta’ kodiċi uffiċjali rilevanti kif mogħti fil-lista ta’ żoni ħielsa mill-insetti msemmija fl-Artikolu 1, u bin-numru tal-lott rilevanti;

(c)

akkumpanjati biċ-ċertifikat fitosanitarju uffiċjali meħtieġ skont l-Artikolu 13(1)(ii) tad-Direttiva 2000/29/KE li jindika in-numru/i tal-lott/lottijiet skont it-taqsima “Marki ta’ distinzjoni” taċ-ċertifikat, u n-numru/i tal-kodiċi uffiċjali kif imsemmija fil-punt 2.2(b), skont it-taqsima “Dikjarazzjoni addizzjonali” taċ-ċertifikat;

(d)

esportati permezz ta’ esportatur reġistrat uffiċjalment, li l-isem jew it-trejdmark tiegħu għandu jkun indikat fuq kull kunsinna.

3.   Ir-rekwiżiti li jikkonċernaw il-punti tad-dħul

3.1.

L-Istati Membri għandhom ikunu nnotifikaw lill-Kummissjoni bil-punti tad-dħul awtorizzati għall-importazzjoni tat-tuberi tas-Solanum tuberosum L. li joriġinaw fl-Eġittu u l-isem u l-indirizz tal-korp uffiċjal responsabbli inkarigat minn kull punt. Il-Kummissjoni għandha tinforma lill-Istati Membri l-oħra u lill-Eġittu b’dan.

3.2.

Il-korp uffiċjali responsabbli li jieħu ħsieb il-punt tad-dħul irid ikun ġie notifikat minn qabel biż-żmien li fih x’aktarx jaslu l-kunsinni tat-tuberi tas-Solanum tuberosum L. li joriġinaw fl-Eġittu kif ukoll bl-ammont relatat;

4.   Ir-rekwiżiti li jikkonċernaw l-ispezzjonijiet

4.1.

Fil-punt tad-dħul, tat-tuberi tas-Solanum tuberosum L. għandhom ikunu soġġetti għall-spezzjonijiet meħtieġa skont l-Artikolu 13a(1)(b) tad-Direttiva 2000/29/KE, u spezzjonijiet bħal dawn, għandhom isiru fuq it-tuberi maqtugħa ta’ kampjuni ta’ mill-anqas 200 tuberi kull wieħed, meħuda minn kull lott f’kunsinna, jew jekk il-lott jeċċedi 25 tunnellata, minn kull 25 tunnellata jew parti minnu f’tali lott.

4.2.

Kull lott ta’ kunsinna għandu jibqa’ taħt kontroll uffiċjali u ma jistax jitqiegħed fis-suq jew użat sakemm ikun stabbilit li l-preżenza tar-Ralstonia solanacearum (Smith) Yabuuchi et al. ma kinitx suspettata jew skoperta f’dawk l-ispezzjonijiet. Barra minn hekk, f’każi fejn sintomi tipiċi jew suspetti r-Ralstonia solanacearum (Smith) Yabuuchi et al. ikunu skoperti f’lott, il-lottijiet kollha li jibqgħu fil-kunsinna in kwistjoni u l-lottijiet f’kunsinni oħra li joriġinaw mill-istess żona għandhom ikunu miżmuma taħt kontroll uffiċjali sakemm il-preżenza tar-Ralstonia solanacearum (Smith) Yabuuchi et al. tkun ġiet konfermata jew rifjutata fil-lott inkwistjoni.

4.3.

Jekk jiġu skoperti sintomi tipiċi jew suspetti tar-Ralstonia solanacearum (Smith) Yabuuchi et al. waqt l-ispezzjonijiet, il-konferma jew ir-rifjut tar-Ralstonia solanacearum (Smith) Yabuuchi et al. għandha tkun determinata mill-ittestjar f’konformità mal-iskema tat-testijiet stabbilita fid-Direttiva 98/57/KE. Jekk il-preżenza tar-Ralstonia solanacearum (Smith) Yabuuchi et al. hija konfermata, il-lott li minnu ttieħed il-kampjun għandu jkun soġġettat jew għar-rifjut jew għall-permess biex jintbaghat lejn destinazzjoni barra mill-Unjoni, jew għall-qerda, il-bqija tal-lottijiet fil-kunsinna mill-istess żona għandhom ikunu ttestjati skont il-punt 5.

5.   Ir-rekwiżiti li jikkonċernaw l-ittestjar għal infezzjoni moħbija

5.1.

Barra mill-ispezzjonijiet imsemmija f’punt 4, l-ittestjar għal infezzjoni moħbija għandu jitwettaq fuq kampjuni minn kull żona kif speċifikat fil-punt 1 skont l-iskema tat-testijiet stabbilita fid-Direttiva 98/57/KE. Matul l-istaġun tal-importazzjoni għandu jittieħed ta’ mill-inqas kampjun wieħed minn kull settur jew baċir kull żona kif speċifikat fil-punt 1 b’rata ta’ 200 tuberi kull kampjun. Il-kampjun magħżul għall-infezzjoni moħbija għandu jkun suġġett għal spezzjoni tat-tuberi maqtugħin. Għal kull kampjun ittestjat u konfermat pożittiv għandu jkun hemm żamma u konservazzjoni xierqa ta’ xi fdalijiet ta’ estratt ta’ patata.

5.2.

Kull lott li minnu jkunu ttieħdu l-kampjuni għandu jibqa’ taħt kontroll uffiċjali u ma jistax jitqiegħed fis-suq jew jintuża sakemm ikun ġie stabbilit li l-preżenza tar-Ralstonia solanacearum (Smith) Yabuuchi et al. ma tkunx ġiet konfermata fl-ittestjar. Jekk il-preżenza tar-Ralstonia solanacearum (Smith) Yabuuchi et al. tkun konfermata, il-lott li minnu l-kampjun ikun ittieħed għandu jkun soġġett jew għar-rifjut jew għall-permess biex jintbagħtu prodotti lejn destinazzjoni ‘l barra mill-Unjoni, jew għall-qerda.

6.   Ir-rekwiżiti li jikkonċernaw in-notifiki

Fil-każ ta’ sejbiet suspetti u konfermati tar-Ralstonia solanacearum (Smith) Yabuuchi et al. l-Istati Membri għandhom jinnotifikaw lill-Kummissjoni u lill-Eġittu immedjatament bihom; In-notifika ta’ sejba suspetta għandha tkun fuq bażi ta’ riżultat pożittiv fit-testij(iet) ta’ għarbiel rapidi kif speċifikat fil-punt 1 tat-taqsima I u t-taqsima II tal-Anness II tad-Direttiva 98/57/KE, jew it-test(ijiet) għarbiel kif speċifikat fil-punt 2 tat-taqsima I u tat-taqsima III tal-Anness II ta’ dik id-Direttiva.

7.   Rekwiżiti dwar it-tikkettjar

L-Istati Membri għandhom jistabbilixxu rekwiżiti ta’ tikkettjar xieraq fir-rigward tat-tuberi tas-Solanum tuberosum L., inkluż rekwiżit li jindika l-oriġini Eġizzjana, bl-għan li jkun evitat li t-tuberi tas-Solanum tuberosum L. jinżergħu. Dawn għandhom jieħdu miżuri xierqa għar-rimi tal-iskart wara l-ippakkjar u l-ipproċessar tat-tuberi tas-Solanum tuberosum L. biex ikun evitat kull tifrix tar-Ralstonia solanacearum (Smith) Yabuuchi et al. bħala riżultat ta’ infezzjoni moħbija possibbli.

Top