24.9.2015   

MT

Il-Ġurnal Uffiċjali tal-Unjoni Ewropea

L 248/99

(1)

L-awtoritajiet Spanjoli nnotifikaw lill-Kummissjoni u lill-Istati Membri l-oħra b'miżura ta' rtirar mis-suq li għandha x'taqsam ma' mezzi li jgħinu lil dak li jkun iżomm f'wiċċ l-ilma waqt l-għawm tat-tip Delphin schwimmscheiben- Typ Super, immanifatturati minn Delphin Vertriebs- und Service GmbH, D-61192 Niddatal, il-Ġermanja. Il-prodott kellu l-marka KE f'konformità mad-Direttiva 89/686/KEE, wara li ġie ttestjat u eżaminat skont it-tip f'konformità mal-istandard armonizzat EN 13138-1:2008 Mezzi li jgħinu lil dak li jkun iżomm f'wiċċ l-ilma waqt l-għawm — Parti 1: Rekwiżiti ta' sikurezza u metodi ta' ttestjar ta' mezzi li jgħinu lil dak li jkun iżomm f'wiċċ l-ilma waqt l-għawm li jintlibsu, maħruġa mill-Korp Notifikat Ġermaniz TÜV Rheinland LGA Products GmbH (NB 0197). Il-prodott huwa meqjus li huwa tagħmir protettiv personali u huwa kklassifikat fil-kategorija II.

(2)

In-notifika saret wara li ġie rrapportat aċċident: wara sessjoni tal-għawm, meta l-ġenituri kienu qed jiġbru l-affarijiet personali tagħhom qabel jitilqu lejn id-dar, tifel gidem waħda mid-diski, u nqalgħet biċċa żgħira minnha u belagħha bil-konsegwenza li kellu bżonn l-għajnuna medika u li jittieħed l-isptar.

(3)

L-awtoritajiet Spanjoli ordnaw l-irtirar tal-prodott mis-suq. Il-miżura kienet motivata bl-applikazzjoni mhux sodisfaċenti tal-istandards imsemmija fl-Artikolu 5 tad Direttiva 89/686/KEE, b'mod partikolari l-istandard armonizzat EN 13138-1:2008 Mezzi li jgħinu lil dak li jkun iżomm f'wiċċ l-ilma waqt l-għawm — Parti 1: Rekwiżiti ta' sikurezza u metodi ta' ttestjar ta' mezzi li jgħinu lil dak li jkun iżomm f'wiċċ l-ilma waqt l-għawm li jintlibsu, il-klawżola 5.4.2, Partijiet żgħar, relatati ma' rekwiżiti bażiċi ta' saħħa u sikurezza tal-punt 1.2.1 tal-Anness II tad-Direttiva 89/686/KEE, Nuqqas ta' riskji u fatturi oħra 'inerenti' li joħolqu l-problemi. Il-klawżola 5.4.2 tal-istandard EN 13138-1 teħtieġ li l-partijiet iż-żgħar imwaħħla jkunu jifilħu għal tiġbid ta' (90 ± 2) N fid-direzzjoni li x'aktarx tkun l-aktar waħda li ċċedi malajr mingħajr ma jinqalgħu mill-oġġett. Il-partijiet li jistgħu jinqalgħu m'għandhomx jiffittjaw kompletament fiċ-ċilindru għall-ittestjar tal-partijiet iż-żgħar, li l-ittestjar tagħhom irid ikun skont l-istandard EN 71-1.

(4)

L-awtoritajiet Spanjoli indikaw li, wara li twettqu t-testijiet tat-tensjoni skont l-istandard armonizzat EN 13138-1: 2008, ġie żvelat li l-partijiet iż-żgħar jistgħu jinqalgħu minn mal-prodott, u jinbelgħu minn tfal żgħar li għalihom huwa maħsub il-prodott. Il-livell tal-ġibda fejn partijiet żgħar ta' dan it-tip inqalgħu irriżulta dejjem inqas minn 90 N u dawn kienu jiffittjaw kompletament fiċ-ċilindru għall-ittestjar tal-partijiet iż-żgħar. L-awtoritajiet Spanjoli kkunsidraw li l-klawżola 5.4.2 ta' dak l-istandard mhijiex limitata biss għal partijiet żgħar imwaħħla, iżda għall-partijiet żgħar b'mod ġenerali. Huma użaw “tagħmir għall-ittestjar b'gidma” skont it-testijiet definiti fl-istandards EN 12227:2010 Playpens għall-użu domestiku — Rekwiżiti tas-sikurezza u metodi għall-ittestjar u EN 716-2:2008 Għamara — Sodod żgħar u sodod żgħar li jintwew għat-tfal għall-użu domestiku — Parti 2: Metodi ta' ttestjar.

(5)

L-awtoritajiet Ġermaniżi ma jaqblux mal-valutazzjoni tar-riskju mwettqa mill-awtoritajiet Spanjoli, peress li l-metodu ta' ittestjar użat ma kienx kompatibbli mal-użu prattiku tat-tagħmir. Fl-opinjoni tagħhom, il-klawżola 5.4.2 tal-istandard EN 13138-1 tkopri biss il-partijiet żgħar imwaħħla. L-awtoritajiet Ġermaniżi sostnew li l-prodott ma jippreżenta l-ebda riskju serju, peress li mhuwiex ġugarell u x-xenarju ta' riskju, kif deskritt mill-awtoritajiet Spanjoli, mhuwiex realistiku.

(6)

Il-manifattur ukoll ikkuntesta l-metodu tat-test użat mill-awtoritajiet Spanjoli. Waqt l-eżami tat-tip KE tal-prodott, il-korp notifikat ma wettaqx test minnhom skont il-klawżola 5.4.2 tal-istandard EN 13138-1 bir-rimarka li l-prodott ma kellux partijiet żgħar imwaħħla.

(7)

Wara n-notifika, il-manifattur talab lill-korp notifikat biex iwettaq test addizzjonali tat-tensjoni skont il-klawżola 8.5.2.2 tal-istandard EN 1888:2012 Oġġetti ta' kura tat-tfal — Trasport bir-roti għat-tfal — Rekwiżiti ta' sigurtà u metodi ta' ttestjar, bl-użu ta' “tagħmir għall-ittestjar b'gidma” deskritt fil-klawżola 5.7 ta' dak l-istandard, li huwa identiku għat-“tagħmir għall-ittestjar b'gidma” deskritt fl-istandards EN 716-2 u EN 12227. L-ebda parti żgħira ma setgħet tinqala' minn mal-prodott. Barra minn hekk, il-Korp Notifikat wettaq test ta' segwitu li wera li l-ebda partijiet ma nqalgħu meta l-apparat ġie soġġett għal forza ta' tensjoni ta' 90N, test li jixbah il-metodu ta' ttestjar għal partijiet żgħar fl-istandard EN 71-1 Is-sikurezza tal-ġugarelli — Parti 1: Kwalitajiet mekkaniċi u fiżiċi.

(8)

Il-Kummissjoni talbet l-assistenza teknika ta' esperti sabiex jevalwaw il-kwistjonijiet ewlenin involuti fil-każ. Studju estern imwettaq minn esperti tekniċi li kkonkluda li ittestjar b'partijiet żgħar imwaħħla biss huwa biżżejjed biex juri konformità mar-rekwiżit bażiku tas-saħħa u s-sigurtà stabbilit fil-punt 1.2.1 tal-Anness II tad-Direttiva 89/686/KEE.

(9)

L-istandard EN 13138-1 ma jipprevedix metodu ċar ta' ttestjar għall-ittestjar ta' partijiet żgħar imwaħħla. Fid-dawl ta' din l-ambigwità, kellha ssir għażla minn fost il-metodi ta' ttestjar xierqa disponibbli, filwaqt li titqies in-natura tal-prodott. L-awtoritajiet Spanjoli applikaw il-metodu ta' ttestjar li dehrilhom li kien l-aktar xieraq biex jivvalutaw ir-riskji li jista' jippreżenta l-prodott. L-esperti tekniċi, madankollu, ikkonkludew li l-metodu ta' ttestjar applikat mill-awtoritajiet Spanjoli ma kienx xieraq.

(10)

It-test tat-tensjoni mwettaq mill-korp notifikat Ġermaniż jista' jitqies bħala l-uniku metodu ta' ttestjar rilevanti f'dan il-każ. Għalhekk, it-test tal-eżami tat-tip KE huwa validu u l-analiżi tal-eżami tat-tip KE mogħtija mill-korp notifikat saret b'mod korrett.

(11)

Skont l-istatistika disponibbli dwar għajnuniet għall-għawm magħmula minn materjal li jżomm f'wiċċ l-ilma minnu nnifsu fis-suq u aċċidenti, tista' tinġibed konklużjoni li għajnuniet għall-għawm magħmula minn materjal li jżomm f'wiċċ l-ilma minnu nnifsu ma joħolqux xi riskju partikolari ta' fgar meta użati skont l-iskop maħsub tagħhom u skont il-kundizzjonijiet previsti tal-użu tagħhom. Dawn il-prodotti huma maħsuba biex jintużaw biss fl-ilma,