Is-sikurezza okkupazzjonali — it-tqandil manwali ta’ tagħbijiet

L-għan tad-Direttiva huwa li tiżgura li l-ħaddiema fl-Unjoni Ewropea (UE) jiġu protetti kontra r-riskji involuti fit-tqandil manwali ta’ tagħbijiet*.

ATT

Id-Direttiva tal-Kunsill 90/269/KEE tad-29 ta’ Mejju 1990 dwar il-ħtiġijiet minimi tas-saħħa u tas-sigurtà għat-tqandil manwali tat-tagħbija fejn hemm riskju partikolarment ta' korriment tad-dahar għall-ħaddiema (ir-raba' Direttiva individwali fit-tifsira tal-Artikolu 16(1) tad-Direttiva 89/391/KEE)

SOMMARJU

L-għan tad-Direttiva huwa li tiżgura li l-ħaddiema fl-Unjoni Ewropea (UE) jiġu protetti kontra r-riskji involuti fit-tqandil manwali ta’ tagħbijiet*.

X’TAGĦMEL DIN ID-DIRETTIVA?

Hija tistabbilixxi rekwiżiti ta’ saħħa u sikurezza għat-tqandil manwali ta’ tagħbijiet meta jkun hemm riskju, b’mod partikolari ta’ korriment fid-dahar, għall-ħaddiema.

PUNTI EWLENIN

Dawk li jħaddmu għandhom jagħmlu dak kollu li jistgħu biex jevitaw il-ħtieġa għat-tqandil manwali mill-ħaddiema.

Meta t-tqandil manwali ma jkunx jista’ jiġi evitat, min iħaddem għandu jbiddel il-mod kif inhu organizzat ix-xogħol, jew jipprovdi lill-ħaddiema bil-mezzi biex inaqqsu r-riskju, billi:

• jorganizza stazzjonijiet tax-xogħol li jagħmlu t-tqandil kemm jista’ jkun mingħajr periklu;
• jivvaluta, jekk possibbli, minn qabel, il-kundizzjonijiet tas-saħħa u s-sikurezza tat-tip ta’ xogħol, b’mod partikolari l-karatteristiċi tat-tagħbija;
• jevita jew inaqqas ir-riskju, b’mod partikolari ta’ korriment fid-dahar, billi jagħmel dak kollu possibbli u jżomm f’moħħu l-ambjent tax-xogħol u l-attività mwettqa;
• jassigura li l-ħaddiema għandhom tagħrif dwar il-piż, u d-distribuzzjoni tal-piż, ta’ tagħbija; u
• jassigura taħriġ, konsultazzjoni u parteċipazzjoni xierqa tal-ħaddiema dwar it-tqandil ta’ tagħbijiet, u r-riskji potenzjali.

Ikun hemm riskju ta’ korriment fid-dahar jekk it-tagħbija tkun:

• tqila wisq jew kbira wisq;
• goffa jew diffiċli biex tinqabad;
• instabbli jew ikollha kontenut li jista’ jiċċaqlaq;
• ippożizzjonata b’tali mod li tkun meħtieġa manipulazzjoni f’distanza mill-ġisem, jew li tirrikjedi li l-ġisem jitgħawweġ jew jiċċaqlaq; jew
• intrinsikament x’aktarx li tirriżulta f’korriment, b’mod partikolari jekk ikun hemm ħabta.

Sforz fiżiku jista’ jwassal għal riskju ta’ korriment, jekk:

• ikun wisq ta’ strapazz;
• ikun jista’ jsir biss billi jitgħawweġ il-ġisem;
• x’aktarx li jirriżulta f’ċaqliq f’daqqa tat-tagħbija; jew
• isir bil-ġisem f’pożizzjoni mhux stabbli.

L-ambjent tax-xogħol jista’ jżid ir-riskju jekk:

• ma jkunx hemm biżżejjed spazju biex issir l-attività;
• ikun hemm varjazzjonijiet fil-livell tal-art jew jekk din ma tkunx stabbli, jew tkun imħarbta jew tiżloq;
• ikun hemm kundizzjonijiet li jipprevjenu t-tqandil ta’ tagħbijiet f’għoli sikur jew b’pożizzjoni tajba; jew
• it-temperatura, l-umdità jew il-ventilazzjoni tkun inadegwata.

L-attività tista’ tippreżenta riskju jekk tkun tinvolvi:

• sforz eċċessiv li jinvolvi b’mod partikolari l-ispina;
• mistrieħ jew perjodu ta’ rkupru insuffiċjenti;
• distanzi eċċessivi ta’ rfigħ, tbaxxija jew ġarr; jew
• rata ta’ ħidma imposta minn proċess li ma jistax jitbiddel mill-ħaddiem.

Il-ħaddiem jista’ jkun f’riskju jekk:

• ma jkunx fiżikament adatt biex iwettaq il-kompitu;
• ikun liebes ħwejjeġ inadegwati; jew
• ikollu għarfien jew taħriġ inadegwat.

TERMINU EWLIENI

* Tqandil manwali ta’ tagħbijiet: għall-fini ta’ din id-Direttiva, kwalunkwe trasportazzjoni jew sostenn ta’ tagħbija, inkluż irfigħ, tniżżil, imbuttar, tiġbid, ġarr jew ċaqliq, li jinvolvu riskju, b’mod partikolari ta’ korriment fid-dahar.

META TAPPLIKA DIN ID-DIRETTIVA?

Id-Direttiva daħlet fis-seħħ fit-12 ta’ Ġunju 1990.

l-aħħar aġġornament 24.09.2015