Rekwiżiti tal-ekodisinn għal prodott sostenibbli

PUNTI EWLENIN

• Dan ir-regolament qafas jissostitwixxi u jkabbar l-iskop tad-direttiva kurrenti dwar l-ekodisinn (id-Direttiva 2009/125/KE — ara s-sommarju). Dan imbagħad ser isir il-bażi legali għall-assessjar u t-twaqqif tar-rekwiżiti tal ekodisinn² permezz ta’ atti delegati. Ir-rekwiżiti tal ekodisinn ikunu jistgħu jkunu stabbiliti jew għal grupp ta’ prodotti speċifiċi jew orizzontalment (iktar minn grupp wieħed ta’ prodotti) abbażi ta’ pjan ta’ ħidma pluriannwali li jkun aġġornat regolarment.
• Ir-regolament huwa parti minn pakkett ta’ miżuri li huma ċentrali biex jinkisbu l-objettivi tal-pjan ta’ azzjoni 2020 dwar l-ekonomija ċirkolari, waħda mill-pilastri ċentrali tal-Patt Ekoloġiku Ewropew.
• Ir-rekwiżiti tal-ekodisinn, jekk xierqa, jistgħu potenzjalment ikopru kull oġġett fiżiku li jitpoġġa fis-servizz jew fis-suq tal-UE b’xi eċċezzjonijiet, bħall-ikel u l-għalf, flimkien ma’ prodotti mediċinali u aspetti ta’ vetturi diġà koperti taħt il-leġiżlazzjoni dwar settur speċifiku tal-UE. Prodotti relatati mad-difiża u mas-sigurtà nazzjonali mingħajr użu doppju ser ikunu indirizzati permezz tar-rekwiżiti tal-ekodisinn.
• Dan jipprovdi għall-valutazzjoni dettaljata tal-fattabbiltà u t-twaqqif sussegwenti tar-rekwiżiti ta’ ekodisinn maħsuba biex:
  • itejjeb id-durabbiltà tal-prodotti, l-użu mill-ġdid, il-possibbiltà ta’ titjib fil-kwalità u l-possibbiltà ta’ tiswija;
  • jagħmel il-prodotti aktar effiċjenti fl-użu tal-enerġija u tar-riżorsi;
  • jindirizza l-preżenza ta’ sustanzi li jimpedixxu ċ-ċirkolarità;
  • iżid il-kontenut riċiklat;
  • jagħmel il-prodotti aktar faċli biex jerġgħu’ jiġu mmanifatturati u rriċiklati;
  • inaqqas ir-rifsa ekoloġika u ambjentali;
  • itejjeb id-disponibbiltà ta’ informazzjoni dwar is-sostenibbilità tal-prodott;
  • jindirizza l-qerda ta’ prodotti tal-konsumatur mhux mibjugħa.

Passaport ta’ prodott diġitali

Ir-regolament jintroduċi wkoll passaport ta’ prodott diġitali (DPP), karta tal-identità diġitali għall-prodotti, il-komponenti u l-materjali.

• Id-DPP jaħżen informazzjoni rilevanti biex jappoġġja s-sostenibbilità ta’ prodotti, jippromwovi ċ-ċirkularità tagħhom u jsaħħaħ il-konformità legali.
• L-informazzjoni hija aċċessibbli elettronikament u dan jagħmilha aktar faċli għall-konsumaturi, il-fabbrikanti u l-awtoritajiet (inklużi tad-dwana) biex jaċċessaw is-sostenibbilità, iċ-ċirkolarità u l-konformità regolatorja.
• L-informazzjoni inkluża fid-DPP ser tiddependi fuq il-prodott speċifiku inkwistjoni imma tista’ tinkludi:
  • prestazzjoni teknika;
  • il-materjali u l-oriġini tagħhom;
  • attivitajiet ta’ tiswija;
  • kapaċitajiet ta’ riċiklaġġ;
  • impatti ambjentali taċ-ċiklu tal-ħajja.

L-akkwist pubbliku sostenibbli

Ir-regolament jinkludi l-possibbilità għat-twaqqif ta’ rekwiżiti obbligatorji minimi biex ikunu mwettqa mill-awtoritajiet pubbliċi fl-UE meta jixtru prodotti koperti bir-regolament permezz tal-kriterji ta’ akkwist pubbliku sostenibbli.