(1)

Fit-3 ta' Mejju 2017, l-Awtorità fetħet investigazzjoni formali dwar l-għajnuna mill-Istat potenzjali mogħtija lil Landsvirkjun permezz ta' garanziji tal-istat għal kuntratti tad-derivattivi (“id-deċiżjoni tal-ftuħ”) (2).

(2)

Permezz ta' ittra li ġġib id-data tal-5 ta' Settembru 2017 (3). Landsvirkjun issottomettiet il-kummenti tagħha (4). L-Awtorità min-naħa tagħha ssottomettiet il-kummenti lill-Iżlanda (5). L-Awtorità ma rċevietx kummenti minn xi parti interessata oħra.

(3)

B'ittra li ġġib id-data tal-25 ta' Settembru 2017 (6), l-awtoritajiet Iżlandiżi ressqu l-kummenti tagħhom.

(4)

Fit-23 ta' Marzu 2018, l-Awtorità ltaqgħet mar-rappreżentanti ta' Landsvirkjun u mal-awtoritajiet Iżlandiżi. Wara l-laqgħa u l-mistoqsijiet li sarulha mill-Awtorità fis-27 ta' Marzu 2018 (7), Landsvirkjun ppreżentat informazzjoni addizzjonali fil-11 ta' April 2018 (8). Fit-12 ta' April 2018, l-awtoritajiet tal-Iżlanda infurmaw lill-Awtorità li huma jappoġġaw l-argumenti ta' Landsvirkjun u ma jħossux il-ħtieġa li jippreżentaw sottomissjonijiet addizzjonali (9).

(5)

Fis-6 ta' Ġunju 2018, l-Awtorità ddiskutiet is-suġġett ulterjorment f'laqgħa mal-awtoritajiet tal-Iżlanda u ta' Landsvirkjun. Fis-7 ta' Ġunju 2018, Landsvirkjun bagħtet informazzjoni addizzjonali lill-Awtorità (10). Wara l-laqgħa u wara li rċeviet l-informazzjoni addizzjonali mingħand Landsvirkjun, l-Awtorità talbet lill-awtoritajiet Iżlandiżi għal kjarifiki addizzjonali (11). Permezz ta' ittra datata d-29 ta' Ġunju 2018, l-awtoritajiet Iżlandiżi bagħtu l-informazzjoni mitluba (12).

(6)

Landsvirkjun hija kumpanija ta' sħubija pubblika rregolata permezz ta' Att ta' Landsvirkjun (13). Mill-1 ta' Jannar 2007, it-Teżor Nazzjonali assuma sjieda sħiħa ta' Landsvirkjun. Landsvirkjun hija proprjetà tal-istat, direttament permezz tat-Teżor tal-Istat (99,9 %) u indirettament permezz ta' Eignarhlutir ehf. (0,1 %), kumpanija b'responsabbiltà limitata li tappartjeni kollha kemm hi lit-Teżor tal-Istat.

(7)

Skont l-awtoritajiet Iżlandiżi (14), Landsvirkjun hija esposta għar-riskju tal-iskambju tal-munita barranija (“FX”) u r-riskji taċ-ċaqliq fir-rata tal-imgħax fil-portafoll tagħha tad-dejn. Landsvirkjun tuża diversi kuntratti tad-derivattivi biex tikkontrolla u timmaniġġja dawn ir-riskji.

(8)

Kif spjegat fid-deċiżjoni ta' ftuħ, l-Awtorità eżaminat dawn it-tipi ta' kuntratti tad-derivattivi li daħlet fihom Landsvirkjun: Swaps FX, opzjonijiet FX u swaps tar-rati tal-imgħax (15). Fid-deċiżjoni ta' ftuħ, l-Awtorità pprovdiet deskrizzjoni ta' dawn il-kuntratti derivattivi bbażati fuq l-ispjegazzjonijiet tal-awtoritajiet Iżlandiżi (16).

(9)

Permezz ta' ittra datata s-26 ta' Settembru 2006 (17), l-Awtorità bdiet il-proċedura dwar miżuri ta' għajnuna eżistenti prevista fl-Artikolu 17(2) tal-Parti II tal-Protokoll 3, dwar ċerti miżuri favur utilitajiet tal-elettriku fl-Iżlanda, inklużi garanziji illimitati tal-istat lil Landsvirkjun. F'dik l-ittra, l-Awtorità informat lill-awtoritajiet Iżlandiżi dwar l-opinjoni preliminari tagħha li dawn il-miżuri kienu jinvolvu għajnuna mill-Istat eżistenti inkompatibbli mal-funzjonament tal-Ftehim taż-ŻEE.

(10)

L-Awtorità kkonkludiet fid-Deċiżjoni tagħha Nru 302/09/COL (18) li l-garanzija illimitata tal-istat lil Landsvirkjun kienet tikkostitwixxi għajnuna mill-istat eżistenti. F'dik id-deċiżjoni, l-Awtorità pproponiet li l-awtoritajiet tal-Iżlanda jieħdu miżuri leġislattivi, amministrattivi u miżuri oħra meħtieġa biex jeliminaw kull għajnuna inkompatibbli li tirriżulta minn garanzija illimata tal-istat mogħtija lil Landsvirkjun.

(11)

Permezz ta' ittra tat-8 ta' Awwissu 2009 (19), l-awtoritajiet Iżlandiżi aċċettaw il-miżuri proposti u impenjaw ruħhom li jinfurmaw lill-Awtorità bil-miżuri li se jieħdu biex jimplimentaw id-Deċiżjoni Nru 302/09/COL. Wara aktar skambji mal-awtoritajiet Iżlandiżi, l-Awtorità rreġistrat fid-Deċiżjoni Nru 159/13/COL (20) l-aċċettazzjoni mill-Iżlanda tal-miżuri xierqa fir-rigward tal-iskema ta' għajnuna eżistenti u għalqet il-każ.

(12)

Fid-deċiżjoni tal-ftuħ, l-Awtorità ppreżentat l-opinjoni preliminari tagħha dwar l-eżistenza ta' għajnuna li tikkonċerna l-garanziji inkwistjoni u l-inkompatibilità potenzjali tagħhom mal-funzjonament tal-Ftehim ŻEE.

(13)

Skont il-fehma preliminari tal-Awtorità, il-garanziji tal-istat inkwistjoni kienu ngħataw lil Landsvirkjun għal kuntratti tad-derivattivi tal-anqas sa mill-2013. L-Awtorità spjegat fid-deċiżjoni tal-ftuħ li diversi aspetti neċessarji għall-valutazzjoni tal-għajnuna mill-istat ta' garanziji lil Landsvirkjun għall-kuntratti tad-derivattivi baqgħu mhux ċari (21).

(14)

L-Awtorità ma setgħetx teskludi l-eżistenza ta' għajnuna mill-Istat dwar il-garanziji. Fir-rigward tal-vantaġġ ekonomiku, l-Awtorità kienet tal-fehma preliminari li l-garanziji inkwistjoni ma jissodisfawx il-kundizzjonijiet (b), (c) u (d) tal-punt 3.2 tal-linji gwida dwar l-għajnuna mill-istat (“Linji Gwida dwar il-Garanzija”) (22) u kienu jikkostitwixxu vantaġġ fi ħdan it-tifsira tar-regoli dwar l-għajnuna mill-Istat. L-awtorità esprimiet dubji dwar jekk il-garanziji setgħux jiġu ddikjarati kompatibbli mat-tħaddim tal-Ftehim taż-ŻEE.

(15)

L-Iżlanda u Landsvirkjun ssottomettew kummenti kemm fir-rigward tal-kuntratti tad-derivattivi li daħlet fihom Landsvirkjun kif ukoll il-garanziji tal-istat. Il-partijiet tal-kummenti rilevanti għad-deċiżjoni huma miġbura fit-taqsimiet 4 u 5.

(16)

Waqt li rreferiet għall-paragrafu 20 tad-deċiżjoni tal-ftuħ (23), l-Iżlanda argumentat li għall-kuntrarju ta' dak li ġie ddikjarat fl-ittra ta' segwitu tal-Awtorità tas-27 ta' Ġunju 2016, Landsvirkjun kienet kapaċi tidħol f'kuntratti tad-derivattivi tal-iħħeġġjar mingħajr garanziji tal-istat. Id-dikjarazzjoni fl-ittra ta' segwitu li turi mod ieħor hija żball li l-Iżlanda ma identifikatx dak iż-żmien. Barra minn hekk, il-qafas ġuridiku rilevanti ma jobbligax lil Landsvirkjun tikseb garanzija tal-istat, sabiex tidħol f'kuntratt tad-derivattivi. Landsvirkjun tista' tapplika kull sena għal garanzija għal derivattivi għall-iħħeġġjar sa valur nominali kumulattiv speċifiku.

(17)

B'riferiment għall-paragrafi 20, 24, 33 u 39 tad-deċiżjoni tal-ftuħ (24), l-Iżlanda tispjega li l-garanziji kienu ngħataw mill-Ministru tal-Finanzi u l-Affarijiet Ekonomiċi u mhux mill-Ġestjoni tad-Dejn tal-Gvern (GDM — Government Debt Management), li hija unità fi ħdan it-Teżor u l-Operazzjonijiet tas-Suq tal-Gvern Ċentrali. Il-GDM hija fdata b'ċerti kompiti relatati mal-garanziji tal-istat, iżda dan ma jfissirx li l-GDM hija fdata bil-kompitu li tagħtihom (25).

(18)

L-Iżlanda ma tikkontestax li l-garanziji tal-istatinkwistjoni huma imputabbli għall-istat u lanqas li, jekk il-vantaġġ selettiv jiġi kkonstatat, dawn jistgħu joħolqu distorsjoni tal-kompetizzjoni u jaffettwaw il-kummerċ bejn il-Partijiet Kontraenti għall-Ftehim taż-ŻEE.

(19)

Madankollu, l-Iżlanda tikkontesta s-sejba preliminari (26) tal-Awtorità li l-garanziji inkwistjoni jistgħu jagħtu vantaġġ lil Landsvirkjun.

(20)

Skont l-Iżlanda, il-garanziji inkwistjoni huma garanziji ta' ġbir li ma għandhom ebda valur speċifiku għal Landsvirkjun. Hemm biss possibbiltà teoretika ta' ġbir kontra l-Istat. L-Iżlanda titlob li Landsvirkjun tidħol f'kuntratti tad-derivattivi għall-finijiet ta' ħħeġġjar biss, jiġifieri biex jitnaqqas ir-riskju finanzjarju ta' Landsvirkjun mit-tranżazzjonijiet finanzjarji sottostanti. Dan huwa mitlub mill-istat bħala s-sid kif ukoll mill-politika tal-ġestjoni tar-riskju ta' Landsvirkjun stabbilita mill-Bord tad-Diretturi tagħha. L-Iżlanda targumenta wkoll li Landsvirkjun tidħol f'kuntratti derivattivi mingħajr garanzija tal-istat b'termini identiċi għal kuntratti garantiti.

(21)

B'referenza għall-paragrafu 65 tad-deċiżjoni tal-ftuħ (27), l-Iżlanda targumenta li l-garanziji inkwistjoni kienu jaqgħu taħt il-qafas leġiżlattiv li kien suġġett għad-Deċiżjoni tal-Awtorità Nru 302/09/COL, kemm qabel kif ukoll wara l-emendi wara dik id-deċiżjoni. L-Iżlanda tirreferi għall-korrispondenza bejn l-awtoritajiet tal-Iżlanda u l-Awtorità li tikkonferma dik l-ispjegazzjoni.

(22)

Il-qafas leġiżlattiv, li fl-ambitu tiegħu, il-garanziji tal-istat jingħataw lil Landsvirkjun, huwa bbażat fuq l-Att tal-Garanziji tal-Gvern (29) u l-Att ta' Landsvirkjun. Landsvirkjun kienet diġà stabbilita bħala sħubija skont l-Att dwar Landsvirkjun applikabbli preċedentement (30).

(23)

Skont l-Artikolu 1 ta' l-Att ta' Garanzija tal-Gvern, l-istat qatt ma jista' joħroġ garanzija mingħajr bażi ġuridika (31). Fil-każ ta' Landsvirkjun, il-bażi ġuridika għal garanziji tal-gvern huwa l-Att ta' Landsvirkjun. Taħt l-Att ta' Landsvirkjun, qabel u wara l-proċedura għall-għajnuna eżistenti, il-garanzija tas-sidien hija garanzija għall-ġbir. Barra minn hekk, il-garanziji huma mogħtija mill-Ministru tal-Finanzi u l-Affarijiet Ekonomiċi aktar milli mill-GDM.

(24)

Garanzija tal-ġbir hija differenti minn dik normalment applikabbli fir-regoli ta' responsabbiltà għal sidien ta' kumpaniji. Skont l-Att dwar il-Kumpaniji ta' Sħubija Nru 50/2007, is-sidien huma responsabbli għall-obbligi tal-kumpanija ta' sħubija abbażi ta' garanzija diretta, bla limitu u bla kundizzjonijiet, u għaldaqstant mingħajr limitazzjonijiet, għall-obbligi kollha tal-kumpanija.

(25)

Taħt garanzija għall-ġbir, il-kreditur għandu jeżawrixxi r-rimedji legali kollha kontra Landsvirkjun qabel ma jipproċedi kontra l-istat. Fil-prattika, dan ifisser li l-kreditur għandu jagħti prova li d-debitur ikun insolventi, skont il-prinċipji ġenerali tad-dritt tal-Iżlanda. Il-kreditur għalhekk ikun jeħtieġ li jkun ipprova jagħmel sekwestru u ma kellux suċċess jew formalment jibda (jew ikun parti ma' oħrajn) il-proċeduri stabbiliti fl-Att dwar il-Falliment qabel idur fuq il-garanti (32). Minħabba l-proċedura iebsa u twila ħafna u r-rekwiżit li l-mezzi kollha jkunu eżawriti fir-rigward tal-kumpanija qabel ma l-garanti jista' jiġi indirizzat, garanzija ta' ġbir għandha ħafna inqas valur għall-kredituri. Landsvirkjun tirreferi wkoll għall-prattika preċedenti tal-Awtorità f'dan ir-rigward (33).

(26)

Rigward il-kuntratti tad-derivattivi inkwistjoni li kienu koperti minn garanzija tal-istat, dawn il-kuntratti tad-derivattivi kienu jikkonċernaw obbligi finanzjarji sottostanti (self jew bonds) li kienu ffirmati qabel l-implimentazzjoni tal-miżura xierqa fil-kuntest tal-proċedura dwar l-għajnuna eżistenti (34).

(27)

Landsvirkjun tiddikjara li l-istrutturi tal-finanzjament tagħha huma kompletament konformi mal-prattika standard madwar il-pajjiżi tal-OECD għal impriżi kbar u l-kuntratti tad-derivattivi jiffurmaw parti integrali mill-ġestjoni tar-riskju. Landsvirkjun tidħol fi Ftehimiet Prinċipali ISDA (35) ma' kontropartijiet, li jistabbilixxu termini standard li japplikaw għat-tranżazzjonijiet tad-derivattivi kollha konklużi bejn dawk il-partijiet (36).

(28)

Landsvirkjun għandha obbligi finanzjarji denominati f'USD u muniti oħrajn, kemm b'rati tal-imgħax varjabbli kif ukoll fissi (37). Landsvirkjun hija għalhekk esposta għal FX u r-riskji taċ-ċaqliq fir-rata tal-imgħax. Landsvirkjun tiħħeġġja dawn ir-riskji bl-użu ta' kuntratti derivattivi li jikkonvertu l-obbligi finanzjarji denominati f'munita għajr il-USD (li mill-2008 hija l-munita funzjonali tagħha) għal USD u obbligi finanzjarji b'rati tal-imgħax varjabbli marbuta mar-rati tal-imgħax fissi.

(29)

Landsvirkjun tuża kuntratti tad-derivattivi għall-finijiet ta' ħħeġġjar biss (38). Landsvirkjun ma tidħolx f'kuntratti tad-derivattivi għal finijiet spekulattivi jew ta' arbitraġġ (39). L-illimitar tal-użu ta' kuntratti derivati għal skopijiet ta' ħħeġġjar biss ġie wkoll impost fuq Landsvirkjun mill-proprjetarju tagħha — l-Istat. Landsvirkjun ippreżentat dokumenti interni u ittri minn sidha biex tikkonferma dawn l-affermazzjonijiet (40).

(30)

Landsvirkjun tispjega wkoll li l-politika tagħha hija li ma tuża l-ebda garanziji, irrispettivament minn humiex privati jew pubbliċi, għall-ebda tranżazzjoni. Wara l-emendi li saru għas-sistema tal-garanziji tal-istat, Landsvirkjun bdiet tinnegozja tiġdid tal-kuntratti tad-derivattivi garantiti, fejn l-aħħar garanziji tal-istat tneħħew f'Lulju 2017 (41). Landsvirkjun hija kapaċi u fil-fatt tidħol f'kuntratti tad-derivattivi mingħajr garanziji tal-istat. Landsvirkjun pprovdiet ukoll evidenza li turi li t-tneħħija tal-garanziji tal-istat ma rriżultawx f'tibdiliet ekonomiċi tal-kuntratti tad-derivattivi (42).

(31)

Landsvirkjun hija tal-fehma li l-ebda vantaġġ ma ġie mogħti permezz ta' garanziji tal-istat għal kuntratti tad-derivattivi inkwistjoni.

(32)

Skont id-definizzjoni derivattiva ta' ħħeġġjar tnaqqas l-esponiment għar-riskju li għandu jwassal għal tnaqqis tal-primjum imħallas għall-garanzija marbuta mat-tranżazzjoni sottostanti. Landsvirkjun itenni li l-emenda tal-kuntratti pendenti tad-derivattivi biex telimina l-garanzija tal-istat ma involviet l-ebda spiża addizzjonali għall-kumpanija. Il-kundizzjonijiet u r-rekwiżiti rigward il-finanzjament ta' Landsvirkjun bi jew mingħajr garanzija tal-istat ma nbidlux (43).

(33)

Landsvirkjun ressqet żewġ rapporti dwar l-effetti tal-garanziji mill-istati fuq kuntratti tad-derivattivi (44). Skont ir-rapporti, ma kienx jeżisti vantaġġ ekonomiku tal-garanziji tal-istat fuq il-portafoll tad-derivattivi.

(34)

Landsvirkjun tispjega wkoll li bejn l-2010 u l-2017 il-flus kontanti li kellha kienu bejn USD 142 miljun u USD 287 miljun. Din il-pożizzjoni ta' ammont għoli ta' flus kontanti ġiet miżmuma għal skopijiet ta' riskju ta' likwidità, jiġifieri bħala lqugħ għal riskju mhux previst. Likwidità b'saħħitha tinvolvi kost ta' opportunità li huwa marbut direttament ma' primjums attwalment imħallsa lill-Istat. Minflok li żżomm il-flus kontanti, il-kumpanija setgħet xtrat lura bonds mis-suq u/jew self imħallas minn qabel/amortizzat mingħand is-selliefa tagħhom. Hija mhux biss kienet tiffranka l-imgħax, iżda wkoll it-tariffi ta' garanzija ta' [0,1–2]% li Landsvirkjun bħalissa tħallas għal bonds u self garantit.

(35)

L-Artikolu 61(1) tal-Ftehim dwar iż-ŻEE jgħid:

“Sakemm ma jkunx stipulat mod ieħor f'dan il-Ftehim, kull għajnuna mogħtija mill-Istati Membri tal-KE, l-Istati tal-EFTA jew permezz ta' riżorsi tal-Istat fi kwalunkwe forma li twassal biex ixxekkel jew thedded li xxekkel il-kompetizzjoni billi tiffavorixxi ċerti impriżi jew il-produzzjoni ta' ċerti prodotti, safejn tolqot il-kummerċ bejn il-Partijiet Kontraenti, tkun inkompatibbli mal-funzjonament ta' dan il-Ftehim.”

(36)

Għalhekk biex miżura tiġi kkwalifikata bħala għajnuna mill-Istat skont din id-dispożizzjoni jeħtieġ li l-kundizzjonijiet kumulattivi li ġejjin ikunu ssodisfati: (i) Il-miżura għandha tingħata mill-Istat jew permezz ta' riżorsi tal-Istat; (ii) għandha tagħti vantaġġ lil impriża; (iii) għandha tiffavorixxi ċerti impriżi; u (iv) għandha tkun kapaċi ttellef il-kompetizzjoni u taffettwa l-kummerċ (45). L-Awtorità tqis li hu adatt li tibda l-valutazzjoni tagħha b'jekk il-garanziji għal kuntratt tad-derivattivi in kwestjoni kinux jagħtu vantaġġ lil Landsvirkjun.

(37)

L-Awtorità taqbel mal-awtoritajiet tal-Iżlanda u Landsvirkjun li l-garanziji inkwistjoni jaqgħu taħt il-leġislazzjoni Iżlandiża dwar il-garanziji tal-istat, inkluż l-Att ta' Landsvirkjun, li kien soġġett għal proċedura ta' għajnuna eżistenti (46).

(38)

L-investigazzjoni formali kurrenti mibdija mid-deċiżjoni tal-ftuħ għandha ambitu iktar ristrett minn dak tal-proċedura dwar l-għajnuna eżistenti fis-sens li tkopri biss l-applikazzjoni tal-Att ta' Landsvirkjun għal garanziji tal-istat għal ċerti kuntratti tad-derivattivi.

(39)

Fid-deċiżjoni tal-ftuħ, l-Awtorità kellha dubji dwar jekk il-garanziji ssodisfawx il-kundizzjonijiet (b), (c) u (d) taħt il-punt 3.2 (47) tal-Linji Gwida ta' Garanzija li jippermettu li tiġi eskluża l-preżenza ta' għajnuna (48).

(40)

Mingħajr preġudizzju għall-kwistjoni ta' jekk il-kundizzjonijiet stabbiliti fil-Linji Gwida dwar il-Garanziji biex tiġi eskluża l-għajnuna mill-Istat humiex issodisfati, kif spjegat hawn taħt u fuq il-bażi tal-informazzjoni li waslet mingħand l-Iżlanda u Landsvirkjun matul il-kors tal-investigazzjoni formali, l-Awtorità ssib li l-garanziji inkwistjoni mill-Istat ma rriżultawx f'vantaġġ lil Landsvirkjun (49).

(41)

Vantaġġ, fis-sens tal-Artikolu 61(1) tal-Ftehim ŻEE, huwa kull benefiċċju ekonomiku li impriża ma setgħetx tikseb taħt kundizzjonijiet normali tas-suq, jiġifieri fin-nuqqas ta' intervent mill-Istat (50). L-Awtorità ddeċidiet f'diversi drabi li garanzija tista' tikkostitwixxi vantaġġ skont l-Artikolu 61(1) tal-Ftehim ŻEE (51).

(42)

Il-benefiċċju ta' garanzija hu li r-riskju assoċjat mal-garanzija jittieħed mill-Istat. It-teħid ta' dan ir-riskju mill-Istat għandu normalment jiġi remunerat bi premju xieraq (52). Madankollu, skont il-Linji Gwida dwar il-Garanziji, “jekk garanzija individwali jew skema ta' garanzija konkluża mill-Istat ma ġġib l-ebda vantaġġ għal impriża, din ma tikkostitwixxix għajnuna mill-Istat” (53). Il-punti 3.2 sa 3.5 tal-Linji Gwida dwar il-Garanziji stabbilixxew il-kondizzjonijiet biex tkun eskluża għajnuna fil-garanziji individwali u skemi ta' garanzija. Skont il-punt 3.6 tal-Linji Gwida dwar il-Garanziji, “nuqqas ta' konformità ma' kwalunkwe waħda mill-kundizzjonijiet stipulati fil-punti 3.2 sa 3.5 ma jfissirx li l-garanzija jew skema ta' garanzija hija awtomatikament meqjusa bħala għajnuna tal-istat.”

(43)

Wara l-1 ta' Jannar 2010, Landsvirkjun irnexxielha tinnegozja mal-kontropartijiet tal-kuntratti tad-derivattivi it-tneħħija tal-garanziji tal-istat, u l-aħħar tali garanzija tneħħiet f'Lulju 2017 (54). Kif turi l-evidenza pprovduta matul l-investigazzjoni formali, it-tneħħija ta' garanziji tal-istat ma biddlitx it-termini ekonomiċi tal-kuntratti tad-derivati (55).

(44)

L-Awtorità tqis il-fatt li l-kontropartijiet kienu lesti biex ineħħu l-garanziji statali mingħajr ma jitolbu termini ekonomiċi aħjar bħala indikazzjoni li l-garanziji ma kinux jinvolvu vantaġġ għal Landsvirkjun.

(45)

Barra minn hekk, Landsvirkjun ma użat l-ebda garanziji privati u mill-informazzjoni pprovduta matul l-investigazzjoni formali, mhuwiex possibbli li jiġi stabbilit prezz tas-suq għall-garanziji fuq derivattivi għall-iħħeġġjar.

(46)

Sabiex jiġi kwantifikat il-vantaġġ potenzjali mogħti b'garanzija (meta l-prezz tas-suq ma jistax jiġi stabbilit), il-Linji Gwida dwar il-Garanziji jipprevedu tqabbil tat-termini ekonomiċi ta' tranżazzjoni bi u mingħajr il-garanzija (56).

(47)

It-tneħħija tal-garanziji statali inkwistjoni ma biddlux it-termini ekonomiċi rilevanti tal-kuntratti tad-derivattivi relevanti. Għalhekk, il-garanziji ma jistgħux jitqiesu li jikkostitwixxu vantaġġ għal Landsvirkjun. Barra minn hekk, l-Awtorità m'għandha l-ebda indikazzjoni jew informazzjoni għad-dispożizzjoni tagħha li tissuġġerixxi li termini ekonomiċi ta' kuntratti tad-derivattivi rilevanti kienu jkunu differenti mingħajr il-garanziji tal-istat fiż-żmien meta l-garanziji tal-istat kienu effettivament mogħtija. Konsegwentement, l-Awtorità għandha tassumi li t-tneħħija (jew in-nuqqas) ta' garanziji tal-istat ma jibdlux it-termini ekonomiċi ta' kuntratti tad-derivattivi rilevanti fi kwalunkwe punt matul il-ħajja ta' dawn il-garanziji.

(48)

Il-konklużjoni li l-garanziji fuq kuntratti tad-derivattivi inkwistjoni ma tawx vantaġġ lil Landsvirkjun hija appoġġata wkoll mir-rapporti msemmija fil-premessa (33). B'mod partikolari, Zanders (kumpanija ta' konsulenza li tispeċjalizza fis-servizzi finanzjarji) ħarset, f'isem Landsvirkjun, lejn kampjun ta' derivattivi miżmuma minn Landsvirkjun u kkalkulat il-marġini korrispondenti għal dawk il-kuntratti tad-derivattivi (57). Ir-rapport wera li tali marġnijiet, li kienu jvarjaw bejn [(–)2–2] u [10–15] punt bażi, kienu konformi mal-marġnijiet osservati għal kuntratti tad-derivattivi simili miżmuma minn kumpaniji bi klassifikazzjoni ta' kreditu komparabbli, li, b'differenza għal Landsvirkjun, ma bbenefikawx minn garanzija ta' ġbir. Fuq din il-bażi, ir-rapport ta' Zanders jikkonkludi li, bħala medja, m'hemm l-ebda vantaġġ tal-ipprezzar bejn Landsvirkjun u kumpaniji oħra bħala riżultat tal-garanzija ta' ġbir. Għaldaqstant, ir-rapport jikkonkludi li Landsvirkjun ma bbenefikatx minn vantaġġ ekonomiku minn tali garanzija.

(49)

Rapport minn ditta ta' konsulenza oħra, Summa Consulting slf, osservat fir-rigward tal-ipprezzar ta' derivattivi tal-iħħeġġjar li, “meta titqies il-karta tal-bilanċ b'saħħitha, il-pożizzjoni ta' likwidità tajba u kwalità kreditizja tajba ta' Landsvirkjun, mhuwiex probabbli li l-garanzija tal-istat jew l-assenza tagħha se jkollha effetti sinifikanti fuq l-ipprezzar tal-kuntratti tad-derivattivi li Landsvirkjun daħlet fihom” (58).

(50)

Barra minn hekk, Landsvirkjun użat il-kuntratti tad-derivattivi garantiti esklussivament għal finijiet ta' ħħeġġjar, jiġifieri biex tikkonverti l-obbligi finanzjarji tagħha denominati f'muniti oħra apparti d-USD (li mill-2008 hija l-munita funzjonali tagħha) għal USD u obbligi finanzjarji b'rati tal-imgħax varjabbli marbuta mar-rati tal-imgħax fissi (59). Skont l-informazzjoni sottomessa matul l-investigazzjoni formali, l-implimentazzjoni tal-miżuri xierqa matul il-proċedura ta' għajnuna eżistenti wasslet biex tillimita l-garanziji tal-istat għal 80 % tal-valur tal-kuntratti tad-derivattivi inkwistjoni u l-garanziji fuq derivattivi tal-iħħeġġjar kienu limitati minn valur nominali kumulattiv speċifiku (60). Għalhekk, la Landsvirkjun u lanqas l-istat bħala l-garanti tagħha ma jista' jingħad li ġew esposti għal obbligazzjonijiet bla limitu minn dawn il-garanziji.

(51)

Barra minn hekk, il-garanziji inkwistjoni huma, skont l-Artikolu 1 ta' l-Att ta' Landsvirkjun, garanziji ta' ġbir. Taħt garanzija għall-ġbir, il-kreditur għandu jeżawrixxi r-rimedji legali kollha kontra Landsvirkjun qabel ma jipproċedi kontra l-istat (61). L-Awtorità qabel ikkonkludiet li, għalkemm ma teskludix vantaġġ, din it-tip ta' garanzija hija anqas riskjuża (62). Kif muri minn Landsvirkjun, f'kull waħda mis-snin 2010 sa 2017, il-flus kontanti u l-ekwivalenti fi flus kontanti jaqbżu t-telf irreġistrat minn derivattivi iggarantiti (63). Għalhekk, kwalunkwe riskju lill-garanti tnaqqas.

(52)

Kif spjegat fil-premessa (36), sabiex miżura tikkostitwixxi għajnuna mill-Istat skont it-tifsira tal-Artikolu 61(1) tal-Ftehim taż-ŻEE, l-erba' kundizzjonijiet iridu jiġu ssodisfati b'mod kumulattiv. Minħabba li l-garanziji inkwistjoni ma jagħtux vantaġġ lil Landsvirkjun, mhuwiex meħtieġ li titwettaq valutazzjoni fir-rigward tal-kundizzjonijiet l-oħrajn.

(53)

Fuq il-bażi tal-valutazzjoni ta' hawn fuq, l-Awtorità tikkonkludi li l-garanziji tal-gvern mogħtija lil Landsvirkjun għal kuntratti tad-derivattivi li jiħħeġġjaw ir-riskji ta' Landsvirkjun tal-munita barranija ta' kambju u tar-rata tal-imgħax, li l-aħħar waħda minnhom tneħħiet f'Lulju 2017, ma kinux jikkostitwixxu għajnuna mill-Istat skont it-tifsira tal-Artikolu 61(1) tal-Ftehim taż-ŻEE.