(1)

Il-medja tal-indiċi matul il-lejl tal-Ewro (EONIA) hija parametru referenzjarju ta’ importanza kritika li jirrappreżenta r-rati tal-imgħax fuq tranżazzjonijiet ta’ self mil-lum għall-għada mhux garantiti denominati f’euro. L-EONIA tintuża fil-kuntest ta’ swaps tal-indiċi matul il-lejl, u firxa wiesgħa ta’ prodotti oħra. Hija essenzjali għas-saldu fi flus kontanti u rilevanti ħafna għal finijiet oħra bħal proċeduri ta’ valutazzjoni differenti kif applikati bħala parti mill-proċessi ta’ ġestjoni tal-kollateral u tar-riskji jew il-kontabbiltà.

(2)

Il-metodoloġija oriġinali għall-kalkolu tal-EONIA kienet ibbażata fuq sottomissjonijiet ipprovduti minn banek tal-bordijiet kontribwenti. Fi Frar 2018, l-Istitut Ewropew tas-Suq Monetarju (EMMI), li jaġixxi bħala amministratur tal-EONIA, ħabbar li l-konformità tal-EONIA mar-Regolament (UE) 2016/1011 ma setgħetx tiġi miksuba saż-żmien li tali obbligi japplikaw. Għalhekk, l-EMMI u l-industrija finanzjarja bdew jaħdmu fuq l-istralċ ordnat tal-EONIA. Fit-13 ta’ Settembru 2018, il-Grupp ta’ Ħidma dwar ir-rati mingħajr riskju tal-euro rrakkomanda r-rata tal-euro fuq terminu qasir (EURSTR) bħala r-rata mingħajr riskju ddenominata f’euro bħala sostituzzjoni għall-EONIA. Fl-14 ta’ Marzu 2019, il-grupp ta’ ħidma ppubblika wkoll rakkomandazzjonijiet dwar tranżizzjoni mill-EONIA għall-EURSTR, li kienet tinkludi fażi li matulha l-metodoloġija għall-kalkolu tal-EONIA kienet se tiġi modifikata u bbażata fuq l-EURSTR, kif ukoll il-metodu biex jiġi ddeterminat l-aġġustament tal-firxa bejn l-EURSTR u l-EONIA.

(3)

Wara dawk ir-rakkomandazzjonijiet, fil-31 ta’ Mejju 2019 il-Bank Ċentrali Ewropew (BĊE) ikkalkula firxa ta’ darba bejn l-EONIA u l-EURSTR, stabbilita għal 8,5 punt bażi. Fl-istess jum, l-EMMI ħabbar il-waqfien tal-EONIA mit-3 ta’ Jannar 2022. Matul it-tranżizzjoni, l-EMMI ppubblika metodoloġija riformata għall-EONIA li skontha l-EONIA hija ugwali għall-EURSTR kif ippubblikata mill-BĊE flimkien mal-aġġustament ta’ darba tal-firxa ta’ 8,5 punt bażi. Dik il-metodoloġija riformata tapplika għall-EONIA mit-2 ta’ Ottubru 2019 sal-waqfien tagħha fit-3 ta’ Jannar 2022. Fil-11 ta’ Diċembru 2019, l-EMMI ngħatat awtorizzazzjoni mill-Awtorità Belġjana tas-Servizzi Finanzjarji u s-Swieq (FSMA) għall-forniment u l-amministrazzjoni tal-EONIA skont l-Artikolu 34 tar-Regolament (UE) 2016/1011, li tippermetti li l-EONIA tintuża sakemm twaqqfet fit-3 ta’ Jannar 2022.

(4)

Minkejja t-tħabbira bikrija tal-waqfien tar-rata tal-EONIA mit-3 ta’ Jannar 2022 u r-rakkomandazzjonijiet bikrija tal-industrija biex kwalunkwe referenza għall-EONIA tiġi sostitwita bil-EURSTR speċjalment għal kuntratti li jimmaturaw wara dik id-data, volum kbir ta’ kuntratti u strumenti finanzjarji li jirreferenzjaw l-EONIA għadhom pendenti f’għadd ta’ Stati Membri. Għalhekk, l-EONIA għad għandha rwol kruċjali għas-swieq finanzjarji fl-Unjoni Ewropea. Barra minn hekk, minħabba l-proċess biex jintlaħaq kunsens espert u industrijali dwar it-triq ta’ tranżizzjoni xierqa, tali kuntratti u strumenti finanzjarji ġeneralment ma fihomx dispożizzjonijiet ta’ riżerva xierqa li jkopru l-waqfien permanenti tal-EONIA. Il-waqfien tal-EONIA għalhekk x’aktarx li jkollu impatt ta’ tfixkil sinifikanti fuq dawk il-kuntratti u l-istrumenti finanzjarji.

(5)

L-EONIA ġiet maħtura bħala parametru referenzjarju ta’ importanza kritika skont ir-Regolament ta’ Implimentazzjoni tal-Kummissjoni (UE) 2019/482 (2). Ir-Regolament (UE) 2021/168 tal-Parlament Ewropew u tal-Kunsill (3), li introduċa fir-Regolament (UE) 2016/1011 l-Artikolu 23b, ta s-setgħa lill-Kummissjoni Ewropea li taħtar sostituzzjoni waħda jew aktar għal parametru referenzjarju ta’ importanza kritika meta jiġu ssodisfati l-kundizzjonijiet kollha stabbiliti fl-Artikolu 23b tar-Regolament (UE) 2016/1011. Id-dikjarazzjoni tal-EMMI fil-31 ta’ Mejju 2019 li tħabbar il-waqfien tal-EONIA, flimkien maċ-ċirkustanza li, fiż-żmien tal-ħruġ ta’ dik id-dikjarazzjoni, ma kien hemm l-ebda amministratur suċċessur li kien se jkompli jipprovdi dak il-parametru referenzjarju, tissodisfa l-kundizzjoni stabbilita fl-Artikolu 23b(2), il-punt (b) tar-Regolament (UE) 2016/1011.

(6)

Barra minn hekk, id-data rrappurtata mill-membri tal-Grupp ta’ Ħidma dwar ir-rati mingħajr riskju tal-euro tissuġġerixxi li, mid-9 ta’ Lulju 2021, diversi eluf ta’ kuntratti tad-derivattivi bi skoperturi diretti tal-EONIA u ftehimiet kollaterali li jirreferu għall-EONIA billi r-rata tal-imgħax li tkopri l-kollateral għadha tapplika madwar l-Unjoni. Iż-żewġ referenzi diġà jirrappreżentaw ammont nozzjonali totali ta’ diversi triljuni ta’ euro. L-istess membri indikaw ukoll li l-isforzi kuntrattwali tagħhom ta’ negozjar mill-ġdid huma lesti, bħala medja, f’inqas minn nofs il-kuntratti li fihom referenzi għall-EONIA. Dawk ir-rati ta’ tlestija jindikaw il-fatt li n-negozjar mill-ġdid individwali tar-referenzi kollha tal-EONIA li jifdal se jikkawża sfida kbira għall-partijiet kontraenti fl-Unjoni, speċjalment l-entitajiet taħt superviżjoni. Mingħajr ma dawn il-kuntratti jiġu trasferiti għal sostituzzjoni maħtura għal parametru referenzjarju, hemm riskju serju ta’ frustrazzjoni kuntrattwali. Filwaqt li huma mistennija sforzi attivi kontinwi mill-membri tal-industrija għat-tranżizzjoni tal-kuntratti u l-istrumenti finanzjarji kollha li għadhom jirreferenzjaw l-EONIA għall-EURSTR sal-waqfien tal-EONIA, sostituzzjoni għar-referenzi tal-EONIA għandha għalhekk timmitiga l-materjalizzazzjoni ta’ tali riskju, li jista’ jaffettwa b’mod partikolari lill-klijenti involuti fi swaps tal-indiċi mil-lum għall-għada biex jiħħeġġjaw ir-riskju taċ-ċaqliq fir-rata tal-imgħax.

(7)

Ir-riżultat ta’ konsultazzjonijiet ta’ gruppi ta’ ħidma ta’ esperti stabbilixxa l-valutazzjoni preliminari dwar ir-rwol importanti tal-EONIA fis-swieq finanzjarji fl-Unjoni. Minn dawk il-konsultazzjonijiet tal-gruppi ta’ ħidma ta’ esperti deher li n-nuqqas ta’ approċċ armonizzat jagħti lok għal inċertezza legali, li tista’ tikkawża tilwim u tfixkil. Il-Grupp ta’ Ħidma dwar ir-rati mingħajr riskju tal-euro indirizza wkoll, fil-15 ta’ Lulju 2021, ittra formali li titlob għal azzjoni mill-Kummissjoni biex taħtar malajr sostituzzjoni statutorja għall-EONIA. Għalhekk huwa xieraq li l-Kummissjoni taħtar sostituzzjoni statutorja għall-EONIA biex tintuża fi kwalunkwe kuntratt, u fi kwalunkwe strument finanzjarju kif definit fid-Direttiva 2014/65/UE tal-Parlament Ewropew u tal-Kunsill (4), li ma fihiex dispożizzjonijiet ta’ riżerva jew dispożizzjonijiet ta’ riżerva xierqa.

(8)

Il-konsultazzjonijiet fil-kuntest tal-Grupp ta’ Ħidma dwar ir-rati mingħajr riskju tal-euro indikaw ukoll li s-sostituzzjoni tar-referenzi għall-EONIA f’kuntratti permezz ta’ negozjar mill-ġdid kuntrattwali spiss kienet imfixkla mill-volum ta’ kuntratti li ma jilħqux il-maturità qabel id-data tat-tmiem tal-EONIA tat-3 ta’ Jannar 2022, u mid-diffikultà li jinkiseb kunsens mill-ġdid f’kull kuntratt. Dan jispjega l-ammont ta’ kuntratti li għadhom jirreferu għall-EONIA. Meta wieħed iqis dik is-sitwazzjoni, u meta titqies id-data rrapportata mill-membri tal-Grupp ta’ Ħidma dwar ir-rati mingħajr riskju tal-euro, jenħtieġ li jiġi żgurat li kwalunkwe kuntratt jew strument finanzjarju li għadu jirreferi għall-EONIA mid-data tal-waqfien tiegħu jaqa’ taħt dan ir-regolament ta’ implimentazzjoni, u huwa fil-kamp ta’ applikazzjoni tal-miżura statutorja ta’ sostituzzjoni.

(9)

Flimkien mat-tħabbira, fil-31 ta’ Mejju 2019, tal-waqfien tal-pubblikazzjoni tal-EONIA mit-3 ta’ Jannar 2022, l-EMMI ħabbar bidliet fil-metodoloġija tal-EONIA biex jiżgura konformità kontinwa mar-Regolament (UE) 2016/1011 u biex tiżgura tranżizzjoni bla xkiel sal-waqfien finali tal-EONIA. Dawn il-bidliet japplikaw għall-metodoloġija tal-EONIA mit-2 ta’ Ottubru 2019, u jorbtu direttament il-kalkolu tal-EONIA mal-iżvilupp tal-EURSTR, billi jiddikjaraw li l-EONIA hija ugwali għall-EURSTR flimkien ma’ aġġustament fiss tal-firxa bbażat fuq il-firxa kkalkulata mill-BĊE. Iż-żieda ta’ aġġustament fiss tal-firxa tillimita l-impatt ekonomiku tal-ħatra tal-EURSTR bħala s-sostituzzjoni statutorja għall-EONIA fil-kuntratti kollha li jimmaturaw wara d-data tat-tmiem tal-EONIA tat-3 ta’ Jannar 2022.

(10)

L-ittra formali mill-Grupp ta’ Ħidma dwar ir-rata mingħajr riskju tal-euro datata l-15 ta’ Lulju 2021 talbet speċifikament li s-sostituzzjoni statutorja tal-EONIA tkun ibbażata fuq il-EURSTR, flimkien mal-aġġustament fiss eżistenti tal-firxa bejn l-EONIA u l-EURSTR, u b’hekk jiġi evitat it-trasferiment tal-valur fit-tranżizzjoni. Huwa xieraq li s-sostituzzjoni statutorja għall-EONIA tirrifletti rakkomandazzjonijiet mill-grupp ta’ ħidma tar-rata mingħajr riskju kkonċernat, u għalhekk tkun ibbażata fuq il-EURSTR flimkien mal-aġġustament tal-firxa fissa kkalkulat mill-BĊE.

(11)

Sostituzzjoni għall-EONIA tissostitwixxi bl-operat tal-liġi, ir-referenzi kollha għal dak il-parametru referenzjarju fi kwalunkwe kuntratt, u fi kwalunkwe strument finanzjarju kif definit fid-Direttiva 2014/65/UE li ma fihx dispożizzjonijiet ta’ riżerva jew dispożizzjonijiet ta’ riżerva xierqa, skont l-Artikolu 23b(3) tar-Regolament (UE) 2016/1011. Għalhekk, dik is-sostituzzjoni ma taffettwax il-kuntratti li ġew innegozjati mill-ġdid b’suċċess biex ikopru l-waqfien tal-EONIA, kif previst fl-Artikolu 23b(11) tar-Regolament (UE) 2016/1011.

(12)

Meta jitqies li l-EONIA mhux se tibqa’ tiġi ppubblikata fit-3 ta’ Jannar 2022, ir-rata ta’ sostituzzjoni maħtura għandha tissostitwixxi r-referenzi għall-EONIA minn dik id-data.

(13)

L-FSMA, bħala superviżur tal-amministratur tal-EONIA, u l-BĊE, bħala bank ċentrali responsabbli għaż-żona monetarja tal-EONIA, taw il-fehmiet tagħhom dwar dan ir-Regolament.

(14)

Il-miżuri stipulati f’dan ir-Rgolament huma skont l-opinoni tal-Kumitat Ewropew tat-Titoli,