This document is an excerpt from the EUR-Lex website
Document 32019D1133
Council Decision (EU) 2019/1133 of 25 June 2019 on the position to be taken on behalf of the European Union in the International Partnership for Energy Efficiency Cooperation (IPEEC) with regard to the extension of the Terms of Reference for the IPEEC for the period from 24 May until 31 December 2019
Deċiżjoni tal-Kunsill (UE) 2019/1133 tal-25 ta' Ġunju 2019 dwar il-pożizzjoni li għandha tittieħed f'isem l-Unjoni Ewropea fis-Sħubija Internazzjonali għall-Kooperazzjoni fl-Effiċjenza fl-Użu tal-Enerġija (IPEEC) fir-rigward tal-estensjoni tat-Termini ta' Referenza għall-IPEEC għall-perijodu mill-24 ta' Mejju sal-31 ta' Diċembru 2019
Deċiżjoni tal-Kunsill (UE) 2019/1133 tal-25 ta' Ġunju 2019 dwar il-pożizzjoni li għandha tittieħed f'isem l-Unjoni Ewropea fis-Sħubija Internazzjonali għall-Kooperazzjoni fl-Effiċjenza fl-Użu tal-Enerġija (IPEEC) fir-rigward tal-estensjoni tat-Termini ta' Referenza għall-IPEEC għall-perijodu mill-24 ta' Mejju sal-31 ta' Diċembru 2019
ST/9718/2019/INIT
ĠU L 179, 3.7.2019, p. 23–24
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
3.7.2019 |
MT |
Il-Ġurnal Uffiċjali tal-Unjoni Ewropea |
L 179/23 |
DEĊIŻJONI TAL-KUNSILL (UE) 2019/1133
tal-25 ta' Ġunju 2019
dwar il-pożizzjoni li għandha tittieħed f'isem l-Unjoni Ewropea fis-Sħubija Internazzjonali għall-Kooperazzjoni fl-Effiċjenza fl-Użu tal-Enerġija (IPEEC) fir-rigward tal-estensjoni tat-Termini ta' Referenza għall-IPEEC għall-perijodu mill-24 ta' Mejju sal-31 ta' Diċembru 2019
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 194(2), flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1) |
It-Termini ta' Referenza għas-Sħubija Internazzjonali għall-Kooperazzjoni fl-Effiċjenza fl-Użu tal-Enerġija (IPEEC) (“il-Ftehim”) ġew iffirmati f'Ruma minn tnax-il Stat li kienu jinkludu erba' Stati Membri tal-Komunità Ewropea fl-24 ta' Mejju 2009 u ġew konklużi mill-Komunità Ewropea bid-Deċiżjoni tal-Kunsill 2009/954/KE (1). |
(2) |
Skont il-punt 7.1 tal-Ftehim, il-Membri tal-IPEEC jistgħu jiddeċiedu li jestendu d-durata tal-Ftehim. Il-Kumitat tal-Politika, li huwa l-korp tal-plenarja tal-IPEEC magħmul minn rappreżentanti ta' livell għoli tal-Membri kollha tiegħu, u li huwa inkarigat biex jirregola l-qafas globali u l-politiki tal-IPEEC, huwa l-korp xieraq li fi ħdanu l-Membri tal-IPEEC jistgħu jiddeċiedu dwar estensjoni tad-durata tal-Ftehim. |
(3) |
Il-Membri tal-IPEEC, għajr l-Unjoni, approvaw l-estensjoni tat-Termini ta' Referenza għall-IPEEC għall-perijodu mill-24 ta' Mejju sal-31 ta' Diċembru 2019 fil-laqgħa tal-Kumitat tal-Politika fil-21 ta' Frar 2019. |
(4) |
Jixraq li tiġi stabbilita l-pożizzjoni dwar l-estensjoni tat-Termini ta' Referenza għall-IPEEC li gjeħtieġ tittieħed f'isem l-Unjoni, billi l-estensjoni tat-termini ta' referenza tkun vinkolanti fuq l-Unjoni. |
(5) |
Il-Membri tal-IPEEC qed iqisu l-possibbiltà li jikkombinaw l-attivitajiet attwali tal-IPEEC u l-attivitajiet tal-effiċjenza fl-użu tal-enerġija tal-Aġenzija Internazzjonali tal-Enerġija (AIE) f'hub tal-effiċjenza fl-użu tal-enerġija, sabiex jiksbu sinerġiji f'dak il-qasam. L-estensjoni qasira tat-Termini ta' Referenza għall-IPEEC għandha l-għan li bħala miżura interim, tippermetti li jkun hemm biżżejjed żmien biex jiġi stabbilit il-hub tal-effiċjenza fl-użu tal-enerġija filwaqt li jiġi żgurat li l-attivitajiet tal-IPEEC ikomplu u jiġu ttrasferiti lejn il-hub il-ġdid tal-effiċjenza fl-użu tal-enerġija mingħajr interruzzjoni. |
(6) |
B'mod operazzjonali, estensjoni sal-31 ta' Diċembru 2019 tqis l-implimentazzjoni kontinwa tal-programm ta' ħidma u tas-servizzi ewlenin tal-IPEEC lill-Membri tal-IPEEC. Dan jinkludi ħidma relatata mal-effiċjenza fl-użu tal-enerġija taħt il-G20, li din is-sena ser jinkludi avvenimenti skedati wara tmiem il-mandat attwali tal-IPEEC fl-24 ta' Mejju 2019. Titqies ukoll id-disponibbiltà ta' fondi biex jiġu koperti l-attivitajiet matul il-perijodu ta' estensjoni, billi s-Segretarjat tal-IPEEC attwalment qed jirċievi kontribuzzjonijiet għas-sena kalendarja 2019 sħiħa u għall-attivitajiet, il-persunal li jifdal u r-riżorsi possibbli jistgħu jiġu ttrasferiti fil-hub tal-effiċjenza fl-użu tal-enerġija. |
(7) |
Għalhekk, estensjoni qasira tat-Termini ta' Referenza għall-IPEEC hija importanti biex jiġi evitat it-tmiem f'salt tal-attivitajiet tal-IPEEC fl-24 ta' Mejju 2019. F'konformità mal-punt 3.4 tat-Termini ta' Referenza għall-IPEEC, id-deċiżjoni finali dwar l-estensjoni għandha tiġi adottata bil-kunsens tal-Membri tal-IPEEC, u wara l-laqgħa tal-Kumitat tal-Politika tal-21 ta' Frar 2019, deċiżjoni tal-Kunsill dwar il-pożizzjoni tal-Unjoni hija neċessarja, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f'isem l-Unjoni fis-Sħubija Internazzjonali għall-Kooperazzjoni fl-Effiċjenza fl-Użu tal-Enerġija (IPEEC) fir-rigward tal-estensjoni tat-Termini ta' Referenza għall-IPEEC għall-perijodu mill-24 ta' Mejju sal-31 ta' Diċembru 2019 għandha tkun din li ġejja:
(a) |
li tapprova l-estensjoni tat-Termini ta' Referenza tal-IPEEC għall-perijodu mill-24 ta' Mejju sal-31 ta' Diċembru 2019; |
(b) |
li taqbel mad-deċiżjoni tal-Bord ta' Tmexxija tal-Aġenzija Internazzjonali tal-Enerġija (AIE) li l-AIE tkompli tospita s-Segretarjat tal-IPEEC sal-31 ta' Diċembru 2019 abbażi tal-Memorandum li jikkonċerna l-Ospitar tas-Segretarjat tal-IPEEC mill-AIE; |
(c) |
li tapprova t-trasferiment amministrattiv tal-IPEEC lejn hub ġdid tal-effiċjenza fl-użu tal-enerġija, b'mod partikolari b'rabta mat-trasferiment tal-Gruppi ta' Kompiti, il-fondi u l-persunal tas-Segretarjat tal-IPEEC. |
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fil-Lussemburgu, il-25 ta' Ġunju 2019.
Għall-Kunsill
Il-President
A. ANTON
(1) Id-Deċiżjoni tal-Kunsill 2009/954/KE tat-30 ta' Novembru 2009 dwar l-iffirmar u l-konklużjoni tat-Termini ta' Referenza għas-Sħubija Internazzjonali għall-Kooperazzjoni fl-Effiċjenza fl-Użu tal-Enerġija (IPEEC) u tal-Memorandum dwar l-ospitar tas-Segretarjat tas-Sħubija Internazzjonali għall-Kooperazzjoni fl-Effiċjenza fl-Użu tal-Enerġija mill-Aġenzija Internazzjonali tal-Enerġija (ĠU L 330, 16.12.2009, p. 37).