EUR-Lex Access to European Union law
This document is an excerpt from the EUR-Lex website
Document 32011D0786
2011/786/EU: Commission Decision of 29 November 2011 on the safety requirements to be met by European standards for bicycles, bicycles for young children, and luggage carriers for bicycles pursuant to Directive 2001/95/EC of the European Parliament and of the Council Text with EEA relevance
2011/786/UE: Deċiżjoni tal-Kummissjoni tad- 29 ta’ Novembru 2011 dwar ir-rekwiżiti ta’ sigurtà li għandhom jiġu ssodisfati mill-istandards Ewropej għar-roti, ir-roti għat-tfal żgħar, u l-mezzi ta’ ġarr fuq ir-rota skont id-Direttiva 2001/95/KE tal-Parlament Ewropew u tal-Kunsill Test b’relevanza għaż-ŻEE
2011/786/UE: Deċiżjoni tal-Kummissjoni tad- 29 ta’ Novembru 2011 dwar ir-rekwiżiti ta’ sigurtà li għandhom jiġu ssodisfati mill-istandards Ewropej għar-roti, ir-roti għat-tfal żgħar, u l-mezzi ta’ ġarr fuq ir-rota skont id-Direttiva 2001/95/KE tal-Parlament Ewropew u tal-Kunsill Test b’relevanza għaż-ŻEE
ĠU L 319, 2.12.2011, p. 106–111
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV) Dan id-dokument ġie ppubblikat f’edizzjoni(jiet) speċjali
(HR)
In force
2.12.2011 |
MT |
Il-Ġurnal Uffiċjali tal-Unjoni Ewropea |
L 319/106 |
DEĊIŻJONI TAL-KUMMISSJONI
tad-29 ta’ Novembru 2011
dwar ir-rekwiżiti ta’ sigurtà li għandhom jiġu ssodisfati mill-istandards Ewropej għar-roti, ir-roti għat-tfal żgħar, u l-mezzi ta’ ġarr fuq ir-rota skont id-Direttiva 2001/95/KE tal-Parlament Ewropew u tal-Kunsill
(Test b’relevanza għaż-ŻEE)
(2011/786/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2001/95/KE tal-Parlament Ewropew u tal-Kunsill tat-3 ta’ Diċembru 2001 dwar is-sigurtà ġenerali tal-prodotti (1), u b’mod partikolari l-Artikolu 4(1)(a) tagħha,
Billi:
(1) |
Id-Direttiva 2001/95/KE tistipola l-istandards Ewropej li għandhom jiġu stabbiliti mill-korpi Ewropej tal-istandardizzazzjoni. Dawn l-istandards għandhom jiżguraw li l-prodotti jissodisfaw ir-rekwiżit ta’ sikurezza ġenerali tad-Direttiva. |
(2) |
Skont id-Direttiva 2001/95/KE, prodott jitqies li jkun sikur meta jkun konformi mal-istandards nazzjonali volontarji li jittrasponu l-istandards Ewropej, li r-referenzi tagħhom ġew ippubblikati mill-Kummissjoni f’Il-Ġurnal Uffiċjali tal-Unjoni Ewropea. |
(3) |
L-Artikolu 4 tad-Direttiva 2001/95/KE jistipula l-proċedura għat-tfassil tal-istandards Ewropej. Skont dik il-proċedura, il-Kummissjoni għandha tistabbilixxi r-rekwiżiti ta’ sikurezza speċifiċi li għandhom ikunu ssodisfati mill-istandards Ewropej u sussegwentement jagħtu mandat lill-korpi Ewropej tal-istandardizzazzjoni biex ifasslu dawk l-istandards. |
(4) |
Il-Kummissjoni għandha tippubblika r-referenzi għall-istandards Ewropej adottati f’Il-Ġurnal Uffiċjali tal-Unjoni Ewropea. |
(5) |
Skont it-tieni subparagrafu tal-Artikolu 4(2) tad-Direttiva 2001/95/KE, ir-referenzi tal-istandards Ewropej, adottati mill-korpi Ewropej tal-istandardizzazzjoni qabel id-dħul fis-seħħ ta’ dik id-Direttiva, jistgħu jiġu ppubblikati f’Il-Ġurnal Uffiċjali tal-Unjoni Ewropea, anki fin-nuqqas ta’ mandat mill-Kummissjoni, jekk dawk l-istandards jiżguraw il-konfomità mar-rekwiżit ġenerali ta’ sikurezza stabbilit f’dik id-Direttiva. |
(6) |
Bid-Deċiżjoni 2006/514/KE (2), il-Kummissjoni ppubblikat, f’Il-Ġurnal Uffiċjali tal-Unjoni Ewropea, ir-referenzi tal-istandards Ewropej EN 14764:2005 għar-roti tal-ibliet u tal-ivvjaġġar fit-tul, EN 14766:2005 għall-mountain bikes, EN 14781:2005 għar-ti tat-tlielaq, u EN 14872:2006 għall-mezzi ta’ ġarr fuq ir-rota. |
(7) |
L-erba’ standards Ewropej koperti mid-Deċiżjoni 2006/514/KE mhumiex appoġġjati minn mandat tal-Kummissjoni adottat skont l-Artikolu 4(1) tad-Direttiva 2001/95/KE. |
(8) |
Il-Kumitat Ewropew għall-Istandardizzazzjoni (CEN) ħabbar li l-istandards Ewropej EN 14764:2005, EN 14766:2005, EN 14781:2005, u EN 14872:2006 se jiġu riveduti. Ir-referenzi tal-verżjonijiet il-ġodda ta’ dawk l-istandards wara r-reviżjoni ma jistgħux jiġu ppubblikati f’Il-Ġurnal Uffiċjali tal-Unjoni Ewropea fl-assenza ta’ mandat mill-Kummissjoni li jistipula rekwiżiti ta’ sikurezza speċifiċi. |
(9) |
Il-Kummissjoni għandha għalhekk tiddetermina rekwiżiti ta’ sikurezza speċifiċi għar-roti u għall-mezzi ta’ ġarr fuq ir-rota bil-ħsieb li jingħata mandat lill-korpi Ewropej tal-istandardizzazzjoni biex jiżviluppaw standards Ewropej abbażi ta’ dawk ir-rekwiżiti. |
(10) |
Ir-roti għat-tfal żgħar, li mhumiex ikkunsidrati bħala ġugarelli skont it-tifsira tad-Direttiva tas-Sikurezza tal-Ġugarelli (id-Direttiva 2009/48/KE tal-Parlament Ewropew u tal-Kunsill (3)), jekk ma jkunux sikuri, jistgħu jesponu lit-tfal għal perikli serji fir-ras, fis-sider, fiż-żaqq jew fl-idejn u fis-saqajn, partikolarment b’riżultat ta’ waqgħat. |
(11) |
Iċ-ċiklisti żgħar għandhom it-tendenza li jweġġgħu waqt li jkunu qed jilagħbu jew isuqu r-rota b’veloċità żejda (4) u huma partikolarment vulnerabbli għall-waqgħat, kemm minħabba li jkun għadhom qed jiżviluppaw il-ħiliet taċ-ċaqliq tagħhom, huma u jikbru, kif ukoll minħabba li jkunu fil-proċess tat-tagħlim ta’ kif jimmaniġġjaw rota, inkluża l-kapaċità li jevitaw ostakoli, nies mexjin jew ċiklisti oħra. Dawn il-fatturi, flimkien ma’ ċentru ta’ gravità iktar ’il fuq fit-tfal, jagħmlu l-bilanċ xi ħaġa diffiċli. |
(12) |
Skont il-Bażi ta’ Dejta tal-Korrimenti, 37 % tal-korrimenti fejn kien involut rikkieb ta’ rota fl-UE kienu jikkonċernaw tfal bejn il-ħames (5) u d-disa’ (9) snin (5) Għalkemm l-inċidenti fit-toroq jikkontribwixxu għal proporzjon sinifikanti ta’ dawn l-inċidenti, ħafna inċidenti jseħħu waqt il-logħob, minħabba li ċiklisti żgħar jaħbtu f’oġġetti u nies oħra, jew sempliċement jaqgħu minn fuq ir-rota. Fir-Renju Unit, ġie stmat li iktar minn 2 000 tifel u tifla jiddaħħlu l-isptar kull sena wara li jkollhom inċident bir-rota d-dar, u 21 000 tifel u tifla oħra wara li jkollhom inċident f’postijiet bħal parks u grawnds (6) |
(13) |
L-istandard Ewropew EN 14765: 2005 + A1:2008 jispeċifa rekwiżiti ta’ sikurezza u metodi ta’ ttestjar għar-roti għat-tfal żgħar, li huma esklużi mill-ambitu tad-Direttiva tas-Sikurezza tal-Ġugarelli (id-Direttiva 2009/48/KE). Madankollu dan l-istandard mhuwiex appoġġjat minn mandat tal-Kummissjoni. |
(14) |
Għaldaqstant, huwa meħtieġ li jkunu stabbiliti rekwiżiti ta’ sikurezza, u sejħa għall-iżvilupp ta’ standards Ewropej skont dawn ir-rekwiżiti għar-roti għat-tfal żgħar, li mhumiex ikkunsidrati bħala ġugarelli skont it-tifsira tad-Direttiva tas-Sikurezza tal-Ġugarelli (Id-Direttiva 2009/48/KE). |
(15) |
Ġaladarba l-istandards rilevanti jkunu disponibbli, u jekk il-Kummissjoni tiddeċiedi li tippubblika r-referenza tagħhom f’Il-Ġurnal Uffiċjali tal-Unjoni Ewropea, skont il-proċedura stabbilita fl-Artikolu 4(2) tad-Direttiva 2001/95/KE, ir-roti, ir-roti għat-tfal żgħar, u l-mezzi ta’ ġarr fuq ir-rota li jkunu konformi ma’ dawk l-istandards jkunu preżunti li jikkonformaw mar-rekwiżiti ġenerali ta’ sikurezza tad-Direttiva 2001/95/KE, fir-rigward tar-rekwiżiti ta’ sikurezza koperti mill-istandards. |
(16) |
Il-miżuri previsti f’din id-Deċiżjoni huma konformi mal-opinjoni tal-Kumitat imwaqqaf skont l-Artikolu 15 tad-Direttiva 2001/95/KE. La l-Parlament Ewropew u lanqas il-Kunsill ma opponewhom, |
ADOTTAT DIN ID-DEĊIŻJONI:
Artikolu 1
Għall-finijiet ta’ din id-Deċiżjoni, għandhom japplikaw id-definizzjonijiet li ġejjin:
(a) |
“Rota” tfisser vettura b’żewġ roti li jduru biss jew prinċipalment permezz tal-enerġija muskulari tar-rikkieb, għajr għal vetturi b’żewġ sruġ jew aktar. |
(b) |
“Rota għat-tfal żgħar” tfisser rota b’għoli massimu tas-sarġ ta’ aktar minn 435 mm u anqas minn 635 mm, maħsuba għal rikkieba ta’ piż medju ta’ 30 kg. |
(c) |
“Rota tal-ibliet u tal-ivvjaġġar fit-tul” tfisser rota b’għoli massimu tas-sarġ ta’ 635 mm jew aktar maħsuba għall-użu f’toroq pubbliċi, inklużi toroq bla bankina. |
(d) |
“Mountain bike” tfisser rota b’għoli massimu tas-sarġ ta’ 635 mm jew aktar maħsuba għall-użu f’toroq mhux pavimentati f’terren imħarbat, fit-toroq pubbliċi u f’passaġġi pubbliċi, li tkun mgħammra b’qafas u komponenti oħra msaħħa kif xieraq, u tipikament, b’tajers wesgħin b’disinni rozzi u firxa wiesgħa ta’ gerijiet ta’ trażmissjoni. |
(e) |
“Rota tat-tlielaq” tfisser rota b’għoli massimu tas-sarġ ta’ 635 mm jew aktar maħsuba għal użu b’veloċità għolja f’toroq pubbliċi. Dawn ir-roti ġeneralment ikunu maħsuba għall-użu f’korsi pavimentati. |
(f) |
“Mezzi ta’ ġarr fuq ir-rota” tfisser apparat jew kontenitur, għajr trailers, li jiġi mmuntat u mwaħħal b’mod permanenti fuq u/jew maġenb ir-rota ta’ wara (mezz ta’ ġarr fuq wara), jew mar-rota ta’ quddiem (mezz ta’ ġarr fuq quddiem) ta’ rota u li huwa ddisinjat esklużivament biex iġorr tagħbija jew tfal bilqiegħda f’sit tat-tfal. |
Artikolu 2
L-Anness ma’ din id-Deċiżjoni jistipula rekwiżiti ta’ sikurezza speċifiċi għar-roti, ir-roti għat-tfal żgħar, u l-mezzi ta’ ġarr fuq ir-rota li għandhom jiġu ssodisfati mill-istandards Ewropej skont l-Artikolu 4 tad-Direttiva 2001/95/KE.
Artikolu 3
Din id-Deċiżjoni għandha tidħol fis-seħħ fl-20 jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell, id-29 ta’ Novembru 2011.
Għall-Kummissjoni
Il-President
José Manuel BARROSO
(2) ĠU L 200, 22.7.2006, p. 35.
(3) ĠU L 170, 30.6.2009, p. 1.
(4) http://www.rospa.com/roadsafety/info/cycling_accidents.pdf
(5) Il-Bażi ta’ Dejta IDB għal bejn l-2006 u l-2008
(6) http://www.capt.org.uk/resources/talking-about-cycle-safety
ANNESS
PARTI I
Ir-rekwiżiti ta’ sikurezza speċifiċi għar-roti
TAQSIMA 1
ir-rekwiżiti ta’ sikurezza applikabbli għal kull tip ta’ rota
1. Rekwiżiti ġenerali
Kull tip ta’ rota għandu jkollha disinn adattat għall-ħiliet tas-sewqan u l-istat fiżiku tal-utent li għalih tkun maħsuba. Għandha tingħata attenzjoni partikulari għad-disinn tar-roti għat-tfal żgħar.
Il-livell ta’ riskju ta’ korriment jew ta’ ħsara għas-saħħa waqt l-irkib ta’ rota għandu jkun l-anqas kompatibbli mal-użu raġonevoli u prevedibbli għall-prodott, meqjus bħala aċċettabbli u konsistenti ma’ livell għoli ta’ protezzjoni tas-saħħa u s-sikurezza.
Il-partijiet kollha aċċessibbli għall-utent waqt l-użu normali jew maħsub ma għandhomx jikkawżaw ħsara fiżika.
L-utenti għandhom ikunu infurmati bir-riskji u l-perikli li jista’ jkun hemm u kif jistgħu jipprevenuhom (ara t-taqsima dwar t-tagħrif ta’ sikurezza tal-prodott).
Ir-roti għandhom ikunu armati b’apparat li jdawwal u apparat li jirriffletti d-dawl fuq quddiem, fuq wara u fil-ġnub biex tkun żgurata il-viżibbiltà tajba tar-rota u tar-rikkieb. Dan l-apparat għandu jkun konformi mad-dispożizzjonijiet fis-seħħ fil-pajjiż fejn jinbiegħ il-prodott.
Il-manifattur għandu jindika t-tagħbija massima permessa rakkomandata (pereżempju, il-piż tar-rikkieb u l-passiġġieri, it-tagħbija, il-mezz ta’ ġarr, eċċ.) li għaliha tkun maħsuba rota.
Il-manifattur għandu jindika jekk rota hix adattata għat-twaħħil ta’ mezz ta’ ġarr u (jew) sit tat-tfal.
2. Il-proprjetajiet fiżiċi
Immaniġġjar
Ir-rota immuntata kompletament għandha toffri mmaniġġar stabbli waqt l-irkib, l-ibbrejkjar, id-dawrien u s-sewqan. Għandu jkun possibbli li wieħed jirkeb ir-rota b’id waħda biss fuq il-handlebar (bħal meta wieħed jagħmel xi sinjali bl-id l-oħra) mingħajr ma tkun diffiċli għalih biex iħaddimha jew ta’ periklu għar-rikkieb.
Stabbiltà
Il-partijiet kollha tar-rota għandhom ikunu mibnija biex jipprovdu livell ta’ stabbiltà kompatibbli mal-użu normali mill-utent maħsub.
Għandu jkun possibbli li wieħed jirkeb ir-rota b’id waħda biss fuq il-handlebar (bħal meta wieħed jagħmel xi sinjali bl-id l-oħra) mingħajr ma tkun diffiċli għalih biex iħaddimha jew ta’ periklu għar-rikkieb. Ir-rota b’mezz ta’ ġarr immuntat għandha toffri mmaniġġar stabbli waqt l-irkib, l-ibbrejkjar, id-dawrien u s-sewqan.
Durabbiltà/Strapazz
Il-partijiet kollha tar-rota għandhom ikunu sikuri għall-utent maħsub matul il-ħajja kollha tal-prodott. Fejn ikun meħtieġ, dawn il-partijiet għandu jkollhom indikazzjoni tal-limitu tal-użu, li fih għandhom jiġu mibdula biex jibqgħu jaħdmu sew.
L-effett tat-temp (pereżempju x-xita) fuq is-sistemi tal-ibbrekjar għandu jiġi mminimizzat.
Sistemi ta’ bbrekjar
Rota għandu jkollha tal-inqas żewġ sistemi ta’ bbrekjar indipendenti. Tal-inqas waħda minnhom għandha topera fuq ir-rota ta’ quddiem u waħda oħra fuq ir-rota ta’ wara. Is-sistemi ta’ bbrekjar għandhom ikunu ddisinjati b’tali mod li jiżguraw is-sigurtà f’każijiet ta’ bbrekjar fin-niexef u fl-imxarrab.
Id-deċiżjoni dwar jekk is-sistema ta’ bbrekjar ta’ wara tkunx imħaddma minn id jew minn sieq ir-rikkieb, għandha tkun f’konformità mal-leġiżlazzjoni, id-drawwa jew il-preferenza fil-pajjiż fejn tkun se tintbagħat ir-rota.
Truf jaqtgħu
It-truf kollha mikxufa li jistgħu jiġu f’kuntatt ma’ ġisem l-utent waqt rikba normali jew waqt l-immaniġġar normali jew il-manutenzjoni ma għandhomx ikunu jaqtgħu.
Qbid
Ir-roti ma għandhomx jippreżentaw riskju ta’ qbid li jista’ jiġi evitat permezz tad-disinn.
Jekk ikun hemm riskju ta’ qbid waqt l-użu normali jew il-manutenzjoni, dan għandu jissemma fil-manwal għall-utent/twissijiet fuq ir-rota.
Ħruġ ’il barra
Partijiet li joħorġu ‘l barra għandhom jiġu evitati meta dawn ikunu ta’ periklu għall-utent.
3. Kwalitajiet mekkaniċi
Mekkaniżmi li jintwew
Il-mekkaniżmi li jintwew għandhom ikunu funzjonali, stabbli u sikuri f’każ ta’ ftuħ mhux previst waqt l-użu u ma għandhomx jikkawżaw korrimenti.
Qfil
Il-qfil, il-viti, l-imagħżel u n-nipples kollha użati fir-rota għandhom ikunu ta’ daqs xieraq u magħmulin minn materjal addattat biex ikunu evitati l-korrimenti.
Il-qfil kollu u l-viti użati f’postijiet importanti għas-sikurezza fuq ir-rota għandhom ikunu mwaħħla fis-sod biex ikun evitat li jinħallu meta mhux suppost.
Addattament u kontroll
Il-partijiet tar-rota ddisinjati biex ikunu addattati skont il-daqs u l-binja tal-utent, bħal pereżempju s-sarġ jew il-handlebar, għandhom ikunu jistgħu jiġu manipulati faċilment mingħajr ma titnaqqas is-sikurezza tal-utent. L-istruzzjonijiet għandhom jindikaw l-għodda adattata li għandha tintuża, filwaqt li jkun ikkunsidrat l-utent maħsub. Il-partijiet tal-kontroll kollha għandhom ikunu aċċessibbli b’mod faċli u taħt kundizzjonijiet ta’ użu normali. Għandhom jinbnew u jkunu mmuntati biex jippermettu lill-utent iżomm il-kontroll tar-rota. B’mod partikolari, ir-rikkieb għandu jkun jista’ jibbrejkja u jbiddel il-gerijiet waqt li jżomm tal-anqas id waħda fuq il-handlebar.
4. Kwalitajiet kimiċi
L-oġġetti kollha li jiġu f’kuntatt mar-rikkieb ma għandhomx jippreżentaw perikli tossiċi għall-utent maħsub, partikolarment f’roti għat-tfal.
5. Metodi ta’ ttestjar
L-istandard għandu jiddeskrivi testijiet ta’ stabbiltà, testijiet ta’ prestazzjoni biex ikunu evalwati t-tagħbija massima, is-saħħa tal-magna, l-ibbrejkjar, is-sewqan, id-durabbiltà tal-partijiet tal-qafas u t-testijiet ta’ strapazz.
6. Tagħrif dwar is-sikurezza tal-prodott
It-tagħrif dwar is-sikurezza għandu jkun miktub bil-lingwa/i tal-pajjiż li fih jinbiegħ il-prodott.
It-tagħrif dwar is-sikurezza tal-prodott għandu jingħata ma’ kull tip ta’ rota. Tagħrif bħal dan dwar is-sikurezza għandu jkun jista’ jinqara, jinftiehem u kemm jista’ jkun komprensiv, waqt li jinżamm fil-qosor.
Għodda viżiva, bħal pereżempju pittogrammi u stampi għandhom jidhru b’mod prominenti fit-tagħrif dwar is-sikurezza tal-prodott.
It-tagħrif dwar is-sikurezza għandu jinkludi tagħrif dwar ix-xiri, l-istruzzjonijiet dwar l-użu, it-tindif, l-iċċekkjar u l-manutenzjoni, marki u twissijiet u għandu jiġbed l-attenzjoni għall-perikli li jista’ jkun hemm u l-prekawzjonijiet li għandhom jittieħdu biex jiġu evitati l-aċċidenti.
It-tagħrif dwar is-sikurezza għandu jinkludi struzzjonijiet dwar kif għandhom ikunu pożizzjonati r-rifletturi u l-bozoz biex tkun żgurata viżibbiltà massima, skont id-dispożizzjonijiet fis-seħħ fil-pajjiż li fih jinbiegħ il-prodott.
Ma għandhux ikun hemm kunflitt bejn it-tagħrif dwar is-sikurezza mogħti mal-prodott u l-użu normali tal-prodott.
In-numru sekwenzjali tal-qafas għandu jkun miktub fuq il-qafas b’mod permanenti u li jidher faċilment, f’post viżibbli u għandu jinkludi l-isem u l-indirizz tal-operatur li mmonta r-rota (jew tar-rappreżentant tiegħu).
TAQSIMA 2
Rekwiżiti ta’ sikurezza addizzjonali applikabbli għal roti speċifiċi
Għar-roti li jinsabu f’din it-taqsima, barra mir-rekwiżiti ta’ sikurezza tat-Taqsima 1, għandhom japplikaw ukoll ir-rekwiżiti li jidhru speċifikati hawn taħt.
1. Roti għat-tfal żgħar
Il-limiti għall-għoli massimu tas-sarġ u għall-piż medju huma bbażati fuq dejta antropometrika (il-piż medju u t-tul tas-saqajn skont l-età). Għal dawn ir-roti għandhom japplikaw ir-rekwiżiti li ġejjin:
— |
L-ebda tip ta’ qfil li jista’ jinfetaħ malajr ma jista’ jintuża. |
— |
Ma għandhomx jitwaħħlu ċineg u klipps li jaqbdu mas-swaba’ tas-saqajn. |
— |
Il-forza tal-brejkijiet ta’ quddiem għandha tkun limitata biex tevita li jintilef il-kontroll tar-rota minħabba li jeħlu r-roti. |
— |
Għandu jkun possibbli li jitwaħħlu jew jitneħħew stabbilizzaturi mingħajr ma tħoll l-muntatura tal-assi tar-rota ta’ wara. |
— |
Roti għat-tfal żgħar ma għandhomx ikunu ta’ periklu ta’ qbid fi kwalunkwe pożizzjoni possibbli tas-sedil. |
— |
Roti għat-tfal żgħar għandhom ikunu armati b’tal-anqas żewġ sistemi ta’ brejkijiet indipendenti, waħda fuq quddiem u l-oħra fuq wara. |
2. Mountain bikes
Fuq il-mountain bikes, il-komponenti ta’ sikurezza kollha għandhom ikunu ddisinjati biex jifilħu il-forzi kollha li f’użu normali huma ikbar minn dawk f’tipi oħra ta’ roti (eż vibrazzjoni u taħbit ikkawżati minn toroq imħarbta, forzi ikbar fuq il-komponenti tas-sewqan u l-iggwidar u l-brejkijiet) u biex jifilħu għar-reazzjoni f’każ ta’ użu ripetut tal-brejkijiet.
3. Roti tat-tlielaq
Fuq ir-roti tat-tlielaq, il-komponenti tas-sikurezza kollha għandhom ikunu ddisinjati biex jifilħu l-forzi kollha li f’użu normali huma ikbar minn dawk f’tipi oħra ta’ roti (eż veloċità ogħla, forzi ikbar fuq il-komponenti tas-sewqan u l-iggwidar u l-brejkijiet).
PARTI II
Ir-rekwiżiti ta’ sikurezza speċifiċi għal mezzi ta’ ġarr fuq ir-rota
1. Rekwiżiti ġenerali
Rekwiżiti speċifiċi u metodi ta’ ttestjar għall-mezzi ta’ ġarr fuq ir-rota għandhom jiggarantixxu s-sikurezza tal-utent u tat-tfal, meta jiġu trasportati fuq ir-roti. Il-prodott għandu jgħaddi minn testijiet li jassiguraw l-istabbiltà tiegħu u d-durabbiltà tiegħu, kif ukoll ir-reżistenza tiegħu għall-istrapazz u t-temperatura.
2. Klassifikazzjoni
Il-mezzi ta’ ġarr għandhom jinqasmu fi klassijiet ta’ kapaċità għall-ġarr ta’ tagħbija, skont l-użu intenzjonat u skont il-post fejn il-mezz ta’ ġarr ikun se jitwaħħal fuq ir-rota.
3. Daqs
Il-mezzi ta’ ġarr maħsuba biex iġorru is-sits għat-tfal għandhom ikunu ta’ daqs xieraq għal dan l-użu.
4. Stabbiltà
Il-partijiet kollha tal-mezz ta’ ġarr għandhom ikunu ddisinjati b’tali mod li joffru biżżejjed stabbiltà għall-użu normali mill-utenti maħsuba.
Il-partijiet tal-mezzi tal-ġarr għandhom jiġu mmontati u mwaħħla fis-sod bl-użu ta’ tagħmir għat-twaħħil provdut jew b’dak speċifikat mill-manifattur, u skont l-istruzzjonijiet tal-manifattur.
It-tagħmir kollu għat-twaħħil għandu jkun ta’ daqs xieraq.
L-effetti tal-kundizzjonijiet tat-temp fuq il-prestazzjoni ta’ sikurezza tal-mezz ta’ ġarr għandhom ikunu mminimizzati.
5. Truf jaqtgħu
Truf esposti li jistgħu jiġu f’kuntatt ma’ ġisem ir-rikkieb jew it-tifel/tifla ttrasportat/a waqt rikba normali jew waqt immaniġġar normali jew manutenzjoni ma għandhomx joħolqu riskju ta’ korriment. It-truf tal-molol għandhom ikunu tondi jew mgħottija b’kappa prottettiva.
6. Ħruġ ’il barra
Biex ikun evitat jew imminimizzat ir-riskju għall-utent jew għat-tifel/tifla li j/tkun qed j/tinġarr, oġġetti li joħorġu ‘l barra għandhom jiġu evitati jew ikunu ddisinjati kif xieraq.
7. Viżibbiltà
Il-prodott għandu jkun iddisinjat b’tali mod li jiżgura li r-rota tibqa’ viżibbli meta tintuża fid-dlam jew f’kundizzjonijiet ta’ viżibbiltà mnaqqsa.
8. Tagħrif dwar is-sikurezza tal-prodott
Kemm jekk il-mezz ta’ ġarr ikun mibjugħ separatament kif ukoll jekk huwa diġà mmuntat fuq ir-rota, il-prodott għandu jkollu tal-inqas it-tagħrif li ġej għall-konsumatur:
(a) |
kif u fejn għandu jitwaħħal il-mezz ta’ ġarr mar-rota; |
(b) |
il-kapaċità ta’ ġarr ta’ tagħbija massima tal-mezz ta’ ġarr u twissija biex ma tinqabiżx din it-tagħbija, għandhom ikunu mmarkati b’mod permanenti fuq il-prodott; |
(c) |
jekk il-mezz ta’ ġarr huwiex addattat għat-twaħħil ta’ sit tat-tfal; |
(d) |
twissija li t-tagħbija tista’ tinġarr biss b’mod sikur fuq il-mezz ta’ ġarr; |
(e) |
twissija biex il-mezz ta’ ġarr ma jiġix modifikat; |
(f) |
twissija li l-qfil għandu jintrass u jiġi ċċekkjat spiss; |
(g) |
twissija li r-rota tista’ tirreaġixxi differenti (partikolarment fis-sewqan u l-ibbrejkjar) meta l-mezz ta’ ġarr ikun mgħobbi; |
(h) |
twissija biex ikun żgurat li kull tagħbija jew tifel/tifla impoġġija fil-mezz ta’ ġarr ikunu marbuta b’mod sikur skont l-istruzzjonijiet tal-manifattur u biex ikun żgurat li ma jkunx hemm ċineg maħlula li jistgħu jinqabdu fir-roti; |
(i) |
struzzjonijiet dwar kif għandhom ikunu pożizzjonati r-rifletturi u l-lampi biex tkun żgurata l-viżibbiltà f’kull mument, speċjalment meta, pereżempju, ikun hemm tagħbija fuq il-mezz ta’ ġarr; |
(j) |
tagħrif bl-isem u l-indirizz tal-manifattur, l-importatur jew ir-rappreżentant, il-marka kummerċjali, il-mudell u n-numru tal-produzzjoni jew ir-referenza għandu jitpoġġa b’mod viżibbli, li jinqara faċilment u permanenti fuq il-prodott; |
(k) |
tagħrif dwar it-tip/i ta’ roti li għalih/om huma maħsuba l-mezzi ta’ ġarr, sakemm il-prodott ma jinbiegħx bħala parti mir-rota u jkun diġà mwaħħal magħha. |